Jehova – tupinnartuliortartoq

„Illimmi angingaarputit tupinnartuliortarlutillu, kisivit Guutiuvutit.“ — TUSSIAAT 86:10.

1, 2. (a) Inuit isumassarsiaat nassaavilu silarsuarmut qanoq sunniuteqarsimappat? (b) Pitsaanerusumik sumi neriuutissarsisinnaavugut?

INUUP muteerniusup tupinnartunik nassaarsimanini — qaammaqqummik kallerup innitortumik, telemik attaveqaammik, videomik, biilimik, timmisartumik sukkasuuliamik qarasaasiamillu — perruualaarutigisinnaavaa. Tamakkulu tamarmik silarsuarmik millisitsisimappullusooq. Mannali silarsuaq! Eqqissinermut, siumukarnermut tamanullu nammaattunik pissaqartitsinermut taarsiullugu inuiaat sorsunnernik amiilaarnartunik, pinerlunniarnernik, peqqarniisaarniarnernik, mingutsitsinernik, napaatinik piitsuussutsimillu atugarliortitaapput. Atomimillu sakkussiat silarsuarmi sumi tamaaniittut inuiaat arlaleriaammik nungutitaanissaannik suli navianartorsiortitsipput, naak ikilisarneqarsimagaluarlutik. Politikerillu ileqqorlunnerujartuinnartillugit pisuut pisuunngoraluttuinnarput piitsullu piitsunngoraluttuinnarlutik. Tamakkununnga tamanut aaqqiissutissaqarpa?

² Aap! Ilumut aniguisitsisinnaasoqarpoq — tassa ’qullersaasoq’. (Nalunaajaasup oqaasii  5:7) Taassuma Tussiaatit annikilliorfimmi tuppallersaatissanik unnersuussutinillu pitsaasunik imallit isumassarsisitsinikkut allatsissimavai. Tussiaatit taakku ilaat 70-init amerlanerusut Davidip allassimavai, ilaatigut tussiaat 86 ima naatsumik aallarniutilik: „Davip qinnutaa.“ Qinnut tamanna pigiliunneqarsinnaavoq.

Annikilliortoq ilumoorlunili

3. Ulluni makkunani kajumissinartumik Davidip qanoq maligassiorpaatigut.

³ Davidip tussiaat tamanna annikilliornermini allassimavaa. Uagut ullumikkut Satanip aaqqissuussaata ’ulluisa naggataanni’ inuusugut, ullunillu ’ajornartunik’ atuisugut, annikilliornartunit assingusunit nalaanneqartarpugut. (2 Timûtiuse 3:1; takujuttaaq Matîuse 24:9-13.) David uagutsitulli ajornartorsiutinik nalaataminik isumakuluuteqarlunilu nikallungassuteqartarsimavoq. Misilinneqarnerilli tamakku pissutigiinnarlugit Pinngortitsisiminut ilumoorluni tatiginninnini sanngiillisinngisaannarpaa. Ima qinusimavoq: „Tusaaniannga [Jehova] akillungalu, inukuluullungalu piitsuugama. Sernissunnga unneqqarikkama, ikioruk kiffat, illit Guutiga, tatigigakkit.“ — Tussiaat 86:1, 2.

4. Jehovamut tatiginninnerput qanoq ililluta takutittariaqarparput?

⁴ Daviditut iliorluta tatigisinnaavarput Jehovap, ’Guutip tuppallersaasup’, qinnutivut maniguuttut tusaajumaarai. Guuti tatigilluinnarutsigu Davidip siunnersuutaa manna malissimassavarput: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ — Tussiaat 55:23.

Jehovamut qanimut attaveqarneq

5. (a) Juutit allakkanik ilisimasalittaasa kukkuneri eqqortumik nutsikkat ilaanni qanoq ilillutik naqqinneqarpat? (b) Tussiaat 85-imi 86-imilu Jehovap aqqa qanoq ililluni qutsissisinneqarpa? (Ataani ilanngussaq takuuk.)

⁵ Tussiaat 86-imi Davidip Guutip aqqa aqqanileriarluni atorpaa. Tussiaat taanna qinnutaavoq Davidip qanimut Jehovamut attaveqarsimaneranik ersersitsisoq. Kingusinnerusukkut juutit allakkanik ilisimasalittaasa, ingammik soferimikkut, Guutip aqqanik atueqqissaarneq tamanna iluarinanngitsutut isigilersimavaat. Taakkuupput upperisapalaaqalersitsillutik Guutip aqqata atorpallaartoornissaanut siooralersitsisut. Inuup Guuti assilillugu pinngortitaasimanera sumiginnarpaat, taamaattumillu kinaassusilittut pissutsit aamma inuit ersersittagaat Guutimut piginnginnerarlugit. Allakkat hebriiarisuuanni Guutip aqqa, JHWH (Jehova), aqqanileriarluni atorneqaraluartoq taakkua ilaat arfineq-marluk taaguummik ’Adhonajʹ-imik taarsersimavaat. Qujamasuutigisinnaavarput Ny Verden-oversættelsen af De hellige Skrifter-imi, peqqissaartumillu nutsikkani allani, Guutip aqqa Guutip oqaasiani inissavimminut ikkunneqarsimammat. Taamaalilluni Jehovamut attaveqarnerput eqqortumik iliorluni erseqqissarneqarpoq. *

6. Sutigut takutissinnaavarput Jehovap aqqa erlinnartuutitut isigigipput?

⁶ Davidip qinnutaa nangippoq: „Saammaannga, [Jehova], ilinnummi torlulasarpunga ulloq tamaat. Kiffat tipaatsutsiguk, [Jehova], kiperiffigigakkit.“ (Tussiaat 86:3, 4) Malugiuk Davidip Jehova „ulloq tamaat“ torlulaffigisarsimagaa. Aammami unnuakkut qinukulasarsimavoq, soorlu taamani inoqajuitsumi qimaaqqanermini. (Tussiaat 63:6, 7) Ullumikkut aamma Jehovap nalunaajaasuisa ilaat pinngitsaalisaallutik atoqatigeriarneqaraluaraangamik imaluunniit allatut pinerliniarneqarialuaraangamik Jehovap aqqa nipituumik suaarutigisarsimavaat. Ilaatigut tamatuma ajunngitsumik kinguneqartarnera tupaallaatigisarsimavaat. * Jehovap aqqa uagutsinnut erlinnartuuvoq, soorlu ’Jesus  Kristusip, Davidip ernerata’ nunamiikkallarami erlinnartuutissimagaa. Jesusip ajoqersukkani ajoqersuussimavai Jehovap aqqata illernarsisinneqarnissaata qinnutiginissaanik, nassuiaattarsimallugillu aqqa qanoq pingaaruteqartoq. — Matîuse 1:1; 6:9; Juánase 17:6, 25, 26.

7. Jehovap kiffaminik ikiuisarneranut sunik assersuutissaqarpa, tamannalu qanoq qisuariarfigisariaqarparput?

⁷ Davidip tarnini, kinaassutsini tamaat, Jehovamut saatsittarsimavaa, kajumissaarsimavaatigullu aamma uagut taamaaliornissatsinnik, Tussiaat 37:5-imi ima oqarluni: „Atugassatit [Jehovamut] isumagitikkit, tatigiuk ikiunngitsoornavianngimmatit.“ Taamaalilluni Jehovap tarnitsinnik qiimmattartitsinissaanik qinnuterput akineqanngitsoornavianngilaq. Jehovamut kiffartortut ilarpassuisa naak ajornartorsiuteqartaraluarlutik, malersorneqartaraluarlutik nappaateqaraluarlutillu assuarnaassutsiminnik attassiinnartut kiffartornertik assut nuannaarutissarsiffigiuartarpaat. Qatanngutitta Afrikami sorsuffiusuniittut, soorlu Angolami, Liberiami, Mocambiquemi Zairemilu, Jehovamut kiffartornertik inuunerminni salliutittuarpaat. * Anersaakkullu naammattorsuarnik katersuinermi Jehovap nuannaarutissaqartingaartarpai. Taakkunatut nikallujuittariaqarpugut. (Rûmamiut 5:3-5) Nikallujuitsillutalu ima neriorsoqqissaarneqarpugut: „Takorluukkammi suli eqquutinngilaq eqquuffissaali qanillivoq, eqquutinngitsuussanngilaq!“ (Habakkuk 2:3) Qanortoq aamma uagut isumalluarluta Jehovamullu tatiginnilluta naggatissamut ’qanilliartorasuarta’.

Jehovap ajunngissusia

8. Qanoq ililluta Jehova qanimut attaveqarfigisariaqarparput, qanorlu ililluni ajunngissutsiminik ersersitsivisimavaatigut?

⁸ David aamma ima ilungersortumik qinuvoq:  „[Jehova], illit avaaginnittuuvutit isumakkeerfiginnittarlutillu, ilumoorsutsit angeqaaq ilinnik torlorfiginnittunut tamanut. Tusaaniaruk qinnutiga, [Jehova], tusannga qinnuigigaangakkit. Ullormi annikilliorfinni torlorfigissavakkit, akiumaaramma.“ (Tussiaat 86:5-7) Malugisinnaavarput David Jehovamut qanimut attaveqarsimasoq, attaveqarnermik qinunikkut ineriartortinneqarsinnaasumik. Ilaanni David ima qinusimavoq: „Eqqaanaveerigit inuusunninni ajortuliakka unioqqutitsisarnikkalu, eqqaanianngalu unneqqarillutillu ajunngitsuugavit, [Jehova].“ (Tussiaat 25:7) Jehova tamatigut ajunngilluinnartuuvoq, tamannami erserpoq Jesusip utertitsissutissatut pilliuteqarnissaanut aqqutissiuussisimaneratigut, ajortuliorsimasut peqqissimisut naakkinnittuliorfigalugit nalunaajaasunilu ilumoortut qujamasuttullu pisassarinngisaraluannik ajunngitsuliorfigalugit. — Tussiaat 100:3-5; Malaki 3:10.

9. Neriorsueqqissaarut suna ajortiminnik peqqissimissutiginnittut uummammiuliunniartariaqarpaat?

⁹ Siornatigut kukkussutigisimasavut ugguaatigisariaqarpavut? Maannakkut narlumuinnaq ingerlalersimagutta apustili Paulusip peqqissimisut ’ullunik inuummarissiffiusunik Jehovap kiinaanit nalliuttunik’ misigisaqarnissaannik neriorsueqqissaarnera eqqaamagutsigu qiimmaallaatigissavarput. (apustilit suliait 3:19) Qinunikkut Jehovamut qanittuarniarta utertitsiserput Jesus ima oqarsimasoq aqqutigalugu: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi.’ Ullumikkut Jehovamut nalunaajaasuusut taassumunnga ilumoorfiginnittut Jesusip aqqagut qinugaangamik nakussatsinneqartaqaat. — Matîuse 11:28, 29; Juánase 15:16.

10. Tussiaatit qanoq ilillutik Jehovap nallittuinera erseqqissarpaat?

¹⁰ Tussiaatit-ni Jehovap „nallittuinera“, imaluunniit Ny Verden-nutsigaq naapertorlugu „ilumoorluni tunniusimanera“, 100-t sinnerlugit taaneqarsimavoq, ilalumi angimmat. Tussiaat 118-ip versiini siullerni sisamani Guutip kiffai kajumissaarneqarput Jehova qutsavigeqqullugu sisamariarluni oqaatigineqarluni ’nallittuinera [ilumoorluni tunniusimanera] atammat naassaanngitsumut’. Tussiaat 136-mi Guutip pissusia nuannersoq tamanna, nallittuinera, imaluunniit ilumoorluni tunniusimanera, 26-eriarluni taaneqarpoq. Qanorluunniit ittumik kukkuluttoraluarutta — Jâko 3:2-mimi allassimavoq ’tamatta qassiinik naakkiuttartugut’ — tamatigut Jehova qinnuigisartigu isumakkeerfiginninnissaanik nallittuinera ilumoorlunilu tunniusimanera tunaartaralugit. Guutip piumasaanik ilumoorluta iliortuaannarutta ilumoorluni asanninnerminik ersersitsivigissavaatigut misilinneqarnitta suulluunniit nikallujuilluta atornissaanut nukissaqarnissatsinnut ikiorluta. — 1 Korintumiut 10:13.

11. Utoqqaanertat qanoq ilillutik imminut pisuutinnermik misigisut ikiorniarsinnaavaat?

¹¹ Arlaatigut inoqatitsinnit naakkiutsinneqarsinnaasarpugut. Ilaat meeraanerminni misigissutsikkut timikkulluunniit atornerlugaasimapput, tamannalu pissutigalugu imminnut pisuutittutut imaluunniit naleqanngitsutut isigilersimallutik. Illit taamatut misigiguit Jehova torlorfigisinnaavat akinissaa tatigalugu. (Tussiaat 55:16, 17) Utoqqaanertaq inussiarnersoq sukumiisumik iliuuseqarniarsinnaavoq inuk taama misigisoq ikiorniarlugu paasitinniarlugulu nammineq pisuunngitsoq. Taavalu aamma sianerfigisarsinnaavaa nammineq ’nanertortigisaminik nammassinnissinnaalernissaata’ tungaanut ikiorniarlugu. — Galâsiamiut 6:2, 5.

12. Ajornartorsiutit qanoq ilillutik annertusiartuinnarsimappat, qanorlu ililluta nammassinnaavavut?

¹² Jehovap innuttai aamma allarpassuarnit alianartunit nalaanneqarsinnaasarput. 1914-imi sorsunnersuarmit siullermiilli nunarsuaq alianartunit annertuunit eqqorneqartarsimavoq. Jesusip siulittuisimaneratut tassaapput ’eqqanaarnartup aallaqqaatai’. „Pissutsit aaqqissuussaanerata naggatissaa“ qanilliartortillugu  alianartut annertusiartuinnarsimapput. (Matîuse 24:3, 8, NV) Diaavulup piffissaa sivikitsoq naangajalerpoq. (sarĸúmersitat 12:12) Liiveq qamalluni uiannisaartoq assigalugu assortuisorsuup taassuma suut tamaasa atorlugit Guutip savaataanit nigortinniarsaraatigut nungutitaaqqulluta. (1 Pîtruse 5:8) Iluatsitsinavianngilarli! Daviditummi iliorluta Guuterput Jehova tunaartarilluinnarparput.

13. Angajoqqaat meeqqallu Jehovap ajunngissusia qanoq ilillutik iluaqutigisinnaavaat?

¹³ Qularnanngitsumik Davidip ernini Salomon Jehovap ajunngissusianik tunaartarinninnissap pisariaqassusianik ilinniartissimavaa. Taamaattumik Salomon nammineq ernerminut ima oqarsinnaasimavoq: „[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai. Silatuutut imminut isigeqinak, [Jehova] mianeruuk ajortorlu nigorsimallugu!“ (Ussatit 3:5-7) Aamma ullumikkut angajoqqaat meeqqatik Jehovamut tatiginnillutik qinusarnissaannik ilinniartittariaqarpaat silarsuarmillu soqutigittaatsumit ussiiniutinut — soorlu atuaqatinit tatineqarnermut kanngunartuliornissamullu ussernartorsiornernut — qanoq ilillutik akiuunnissaannut ilinniartillugit. Ullut tamaasa meeqqatit sallusuissut malillugu inooqatigigukkit qinunikkut Jehovamut qanimut attaveqalernissaannik taassuminngalu asannilernissaannik ikiorsinnaassavatit. — 5 Moses 6:4-9; 11:18, 19.

Jehovap naammassisai asseqanngitsut

14, 15. Jehovap suliaasa asseqanngitsut ilaannik taasaqarit.

¹⁴ David qulanngilluinnarluni ima oqarsimavoq: „Guutini ilittut ittoqanngilaq, [Jehova], naammassisatillu assissaqanngillat.“ (Tussiaat 86:8) Jehovap naammassisai inuup takorloorsinnaasaanit annerungaarlutillu ataqqinarnerungaarput. Pinngortitarsuup avataarsuatalu angissusiannik, ataqatigiissusiannik kusanassusiannillu ullumikkut ilisimatuussutsip takussutississimavaatigut. Pinngortitarsuup Davidip taamanikkut paasisinnaasimasaanit tupinnarnerulluinnarnera paasisimavarput. Taamaattorli taanna ima oqarnissaminut killinneqarsimavoq: „Qilaap oqaluttuaraa Guutip naalannassusia, isuisimasup nalunaarutigaa assaasa piliaat.“ — Tussiaat 19:1.

¹⁵ Nunarsuup inissinneqarsimera, ullut unnuallu paarlakaajaannerat, ukiup qanoq ilinerisa paarlakaajaannerat, siaruarteriffiusarlunilu katersuiffiusarnera kiisalu allarpassuit inuit siunissami nuannaarutigisinnaasassaat eqqarsaatigigaangatsigik Jehovap naammassisimasaanik takussutissinneqartarpugut. Aammalu inuk ima tupinnartigisumik piliaavoq pinngortitamik avatangiisiminik nuannaarutiginnissinnaalluni. — 1 Moses 2:7-9; 8:22; Tussiaat 139:14.

16. Jehovap ajunngissusianut takussutissaq annerpaaq suua, sunillu tupinnartunik kinguneqassava?

¹⁶ Ulloq manna tikillugu inuiaat ajornartorsiuteqartuarnerannik kinguneqartumik siuaasavut siulliit imminut naalanngereersullu Guutip ernini ’inunngortoq Jesus Kristus’ asannissutsimigut piginnaatippaa inuiaat nunarsuarmiittut utertillugit pisiareqqullugit kingornalu qilammit kunngitut naapertuilluartutut naalakkersuleqqullugit. Allaat inuit imminut ilumoortut toqqarsimavai ’pinngortitatut nutaatut’ Kristus peqatigalugu ’qilaatut nutaatut’ asannittutut ’nunamik nutaamik’, inuiannik milliardilikkuutaanik makititaasussanik ilalinnik, naalakkersuinissaannut. (Rûmamiut 5:15; 2 Korintumiut 5:17; sarĸúmersitat 21:1, 5-7; 1 Korintumiut 15:22-26) Jehovap suliai taamaalillutik tupinnarsinerpaaffissartik tikillugu ingerlajuassapput. Taamaattumik ima nillersinnaavugut: „[Jehova], . . . angingaarpoq isumassuinerit ilinnik mianerinnittunut pissarititat.“ — Tussiaat 31:18-20.

17. Tussiaat 86:9 Jehovap suliaanut atatillugu qanoq ililluni eqquussimava?

¹⁷ Jehovap suliaanut Davidip Tussiaat 86:9-mi eqqartugai ilaapput: „Inuiaat pinngortitavit tamarmik ornissavaatsit pallorfigalutillu, [Jehova], aqqillu ataqqissavaat.“ Pinngortitamut nutaamut, ’savarpannguanut’ naalagaaffimmik  kingornussisussanut, ilaasut qinereeramigit Jehova ’savanik allanik’ tassaasunik ’amerlangaartut inuiannit tamaneersut’, aap, inunnik millionilikkuutaanik aamma Jesusip aavanut kuisamut uppernerminnik ersersitsisunik katersuiuarsinnarpoq. Taakku tassaapput peqatigiit suliniuteqarluartut nunarsuarlu tamakkerlugu inuiaqatigiiusut eqqissinermik nuannarisaqartut. Qilammi inngilerpassuit tamanna takusinnaagamikku Jehovamut pallorput ima nillerlutik: ’Pilluaqqussut naalannaallu ilisimassullu qujaniullu ataqqinaallu pissaanerlu nakuussullu Guutitta pigai naassaanngilluinnartumik.’ Aamma amerlangaartut Jehovap aqqa unnersiutigaat kiffartuullugulu ’ullukkut unnuakkullu’, silarsuup matuma naggatissaani aniguinissaminnik nunarsuarmilu paratiisiusumi naassaanngitsumik inuulernissaminnik neriugisaqarlutik. — Lúkarse 12:32; sarĸúmersitat 7:9-17; Juánase 10:16.

Jehovap angissusia

18. Jehovap qanoq ililluni ersersissimavaa kisimi Guutiulluni?

¹⁸ Taava Davidip Jehovap Guutiussusia eqqaavaa ima oqarluni: „Illimmi angingaarputit tupinnartuliortarlutillu, kisivit Guutiuvutit.“ (Tussiaat 86:10) Jehovap itsarsuarli takutittuartarsimavaa kisimi Guutiulluni. Egyptenimi Faraop naakkittaatsup Moses unammillerpaluttumik ima oqarfigisimavaa: „[Jehova] taanna kinaammat naalassavara Israelikkullu aallarnissaat akueralugu? [Jehova] taanna naluara.“ Sivitsunngitsorli nalujunnaarpaa Jehova qanoq angitigisoq. Guutip ajugaqanngitsup Egyptenip guutii tupinnartuliortartuilu nikanarsarpai perlunnik ajunaarutaasunik nunamut nalliutititsilluni, Egyptenimiut angajulliliaat toqorartillugit, kiisalu Farao sakkutooqqinnertaalu Immami Aappalaartumi ajunaartillugit. Tamatumuuna erserpoq Jehova kisimi Guutiusoq. — 2 Moses 5:2; 15:11, 12.

19, 20. (a) Erinarsukkap sarĸúmersitat 15:3, 4-miittup nipittornerpaaffissani qaqugu angussavaa? (b) Ullumikkut qanoq ililluta Jehovap suliaanut suleqataasinnaavugut?

¹⁹ Pallorfiginnitsiminik naalattunik Egyptenitut ittumit — Satanip silarsuaanit — aniguisitsinissaminut piareersaatitut Guutituatut Jehova tupinnartuliortuarsinnarpoq. Oqaluttuarisaanermi oqaluussilluni suliniarnersuit annersaatigut eqqartuussissutini nunarsuaq tamakkerlugu nalunaajaatissatut oqaluussissutigitippai, taamaalilluni Jesusip Matîuse 24:14-imi siulittuutaa eqquutitillugu. Ungasinngitsukkut ’naggatissaq’, Jehovap nunarsuarmi ajussuseq tamaat peerneratigut angingaassutsiminik aatsaat taama annertutigisumik takutitsiffissaa, nalliutissaaq. (Tussiaat 145:20) Taava Mosesip Savaaqqallu erinarsugaata nipittornerpaaffissani angussavaa: ’Angeqaat tupinnaqalutillu suliatit, Jehova Guuti ajugaqanngitsutit; iluarput ilumoorlutillu aqqutigisatit, inuiaqatigiit kunngiat-aa. Kia mianerissannginneraatit, Jehova, aqqillu unnersiutiginagu? Kisivit illernartorsuugavit.’ — sarĸúmersitat 15:3, 4.

²⁰ Guutip siunertai misinnangaartut allanut oqaluttuaralugit suliniuteqarluarniarta. (Naleqqiuguk apustilit suliáinik agdlagkat 2:11.) Soorlu ilanngutassiami tulliuttumi ersersinneqassasoq Jehova ullumikkut siunissamilu aningaartunik tupinnangaartunillu naammassisaqartuassaaq. (wD 15/12)

[Quppernerup ataani ilanngussat]

Apeqqutit uteqqiissutissat

□ Davidip Tussiaat 86-imi qinuneratut sooq qinusariaqarpugut?

□ Qanoq ililluni Jehovamut qanimut attaveqalersoqarsinnaava?

□ Jehovap qanoq ililluni ajunngissutsiminik ersersitsivigisarpaatigut?

□ Jehovap suliaasa tupinnangaartut ilaannik taasaqarit.

□ Angissuseq eqqarsaatigalugu Jehova qanoq ililluni Guutituaava?

[Atuaqqissaarnermi apeqqutit]

[Qupp. 11-mi assiliartaq]

’Nunassami nutaami’ Jehovap suliassai tupinnartut naalannassuianut ajunngissusianullu ersiutaassapput