Jehovap isumassorsimavaanga

INGASATTAJAARNANGA oqassaguma Jehovamut kiffartornera qaqutigoortumik aallartissimavara. New Zealandip avannarpasinnerusortaani nunami alianaatsumi peroriartorsimavunga. Tamaani uattulli maoriunerusut najugaqarput. Ullut ilaanni hestersunga illuma Benip unitsippaanga. 1942-mi ukiaavoq (nunarsuup affaani avannarlermi upernaajulluni). 27-nik ukioqarpunga anglikanerillu ilagiivinut suleqataalluarlunga ilaasortaavunga.

Ukiorpassuarni Benip atuakkat assigiingitsut eqqartuussisup Rutherfordip, taamani Vagttårnip peqatigiiffianut præsidentiusup, allassimasai atuartarsimavai. Maannakkullu allakkanik tigummiarluni tikippaanga. New Zealandimi Vagttårnip peqatigiiffiata immikkoortortaqarfianit allagarsisimavoq qinnuigineqarluni tamaani najugaqartut Naalakkap unnukkorsiortitsinissaanut qaaqqoqqullugit. Aamma ataatsimiinnermik ingerlatsisinnaasumik ujarleqquneqarsimavoq. Qummut qiviarlunga oqarfigaanga: „Illit eqqarsaatigisimavakkit.“ Oqaluffimmi nerliiviliartarpunga, tulluussutigeqaaralu suliassamut tamatumunnga piukkunneqarnera.

Unnuk tamanna nalliummat inuit 40-t missaat Benip angerlarsimaffianut takkupput Naalakkap toqunera eqqaaniariartorlugu. Najuuttuni ataasinnguarluunniit Jehovamut nalunaajaasuunngilaq. Takkukkama illuma oqalugiaatissamut najoqqutassara uannut tunniuppaa. Erinarsuut toqqarneqarsimasoq qaangiinnarlugu Benip sakia qinnuigaara ataatsimiinnerput qinnummik aallarneqqullugu. Taava eqqarsaatit najoqqutassanniittut saqqummiuppakka. Ilaatigut imarivai apeqqutit arlallit Biibili tunngavigalugu akissutitallit. Najuuttut ilaat palasiusoq akerliliisarpoq, allassimaffiilli najoqqutanni innersuussutigineqarsimasut atuarlugit akissutissittarpara.

Eqqaamavara oqalugiaammi ilaatigut eqqaaniaanerup ukiup qanoq ilinerani pisussaaneranik apeqqut tikinneqartoq. Najuuttut tamarmik igalaakkut silammut qiviarput, namminnerlu qularnaallisillugu takusinnaallugu qaammat imissisimasoq. Aap, nisanip 14-eraa.

Mannalumi unnuk! Ataatsimiinneq nalunaaquttap akunnerinik sisamanik sivisussuseqarpoq. Apeqquteqartorpassuupput, peqatigiiffiullu oqalugiaatissamut najoqqutassiaani allassimafiit innersuussutigineqarsimasut atorlugit akineqartarput. Kingumut qiviaraanga qularutiginngivittarpara unnuk taanna Jehovap asannilluni isumassuinermigut ikiorsimanngippanga saperluinnarsimassagaluarlunga. Aap, Jehovap ikiorsimavaanga naak suli tunniulluinnarlunga kuisimanngikkaluartunga.  1942-mi unnuk taanna eqqaaniaanermi inuunerma siunertaa nassaaraara.

Inuusunnera

1914-imi inunngorsimavunga. Inunngornera qaammatinik sisamanik sioqqullugu ataataga toqusimavoq. Eqqaamavara meeraagallarama meeqqat allat usorisarlugit ataataqarmata asannitsiminnik. Ataatamik assorsuaq amigaateqarsimavunga. Anaanannullu ueqarani inuuneq artornarsimaqaaq, sulilu artornarnerulersimassaaq sorsunnersuaq siulleq annertuumik sunniutilermat.

Arnamut inuusuttunnguamut Agnes Copemik atilimmut katippunga, taannalu ukiuni 58-init amerlanerusuni inuuninni ingiallortigisimavara. Aallaqqaataani inuunermi qaffakkiartornissaq anguniagarisimavarput. Panernersuaqarnerali pissutaalluni nunaatilittut inuuniarneq iluatsippallaanngilaq. Timersornerup tungaatigut nuannaarutissarsisarsimavunga, 1942-mili eqqaaniaaneq tikillugu inuunera iluamik siunertaqarsimanngilaq.

Ilaquttanut oqaluussineq

Eqqaaniaanerup tamatuma kingorna Biibili atuaqqissaarluartalerpara, Vagttårnillu peqatigiiffiata atuagassiaataasa imaat illunnut arnanut angutinullu oqaloqatigiissutigisalerlugit. 1943-mi septemberiugaa nunap ilaanit allamit Jehovamut nalunaajaasunit avinngarusimasumiittugut pulaarneqarpugut. Nalunaaquttap-akunnerini sisamani sukumiisumik oqaloqatigiippugut. Tusarakkulu aqaguani ingerlaqqittussaasut oqarpunga: „Massakkut kuisissallunga sumik akornuteqarnerpunga?“ Unnuakkut marlup qeqqa illukkalu marluk uangalu imermut morsutsinneqarpugut.

Taava ilaquttannut oqaluussiartorlunga angalaqattaartalerpunga. Tusarusukkaangata Matîuse kapitali 24 aallaavigisarpara. Tusarusunngikkaangatalu Jesusip farisiiarinut oqaasii Matîuse kapitali 23-miittut atortarpakka. Kisianni piffissap ingerlanerani pissuserinnerusumik oqaluussinissara ilikkariartorpara, Ataatarput qilammiusoq inussiarnerlunilu asanittoq assiginiarnerulerlugu. — Matîuse 5:43-45.

Aallaqqaammut nuliama akerlilersorsimagaluarpaanga Jehova kiffartuukkakku, sivitsunngitsorli ilaaqquffigaanga, decemberimilu 1943-mi kuisilluni. Nuliama saniatigut allat tallimat nunaqarfitsinnit Waimameersut ullormi puiunaatsumi tassani aamma kuisipput. Taamaalilluta tamaani Naalagaaffimmik oqaluussissutiginnittartut qulingiluanngorpugut.

Akerlilersorneqaraluarluni pilluaqqusaanerit

1944-mi qatanngutinit avataaneersunit pulaarneqaqqippugut. Tamatumuuna toqqaannartumik illumiit illumut oqaluussinermik pisariaqarteqisatsinnik ilinniartinneqarpugut. Illoqarfimmi takussaanerujartuinnartilluta kristumiuuneraqatigiinnit akerlilersorneqaleriartorpugut. (Juánase 15:20) Palasinit akerlilersorneqaqattaartorujussuuvugut, ajoqersuutit pillugit ilaatigut sivisuumik oqallittarluta. Jehovalli ajugaatittarpaatigut, allallu tamaani najugaqartut, ilaatigut najaga, Jehovap asannilluni isumassuineranut pipput.

Junimi 1944-mi Waimami ilagiinnik pilersitsisoqarpoq. Upperisarsiornikkulli malersuineq uumissuinerlu annertusiartorput. Jehovap nalunaajaasui nunaqarfiup iliveqarfiani ilineqaqqusaajunnaarput. Malersuinerit ilaatigut peqqarniisaarnertaqartarput. Toqqaannartumik saassussineqartarpoq. Biilera biilinnullu quera nunguillugit ikuallanneqarput. Qujanartumilli Jehovap pilluaqqusineratigut qaammatit pingasut qaangiummata biilimik usisarfilimmik pisisinnaalerpugut. Ilaquttakkalu amerliartuinnartut ataatsimiigiaqatigigaangakkit qamutit hestimik qimuttullit atortarpakka.

Soqutiginnittoqangaarmat ataatsimiiffissamik annerusumik pisariaqartitsisorujussuuvugut. Taamaattumik aalajangerpugut Waimami rigsaaliliorniarluta. Taanna New Zealandimi rigssalit siullersaraat. 1949-mi  decemberip aallaqqaataani orpiit siulliit uppitippavut, qaammatillu sisamat qaangiummata inersuaq nutaaq 260-inut inissalik atoqqaarfissiuutigalugu ataatsimeersuarpugut. Taamanikkut taama atsigisumik illuliorneq qaqutigoortuliorneruvoq, aatsaat Jehovap ikiuineratigut naammassineqarsinnaasoq.

Jehovap isumassuineranut takussutissat amerlanerusut

New Zealandip avannaarpiaani Naalagaaffimmik oqaluussisartut amerliartuinnarmata pisariaqartitsiffiunerusumut nuunnissamik angalallutik nakkutilliisut kajumissaarisarput. Taamaattumik 1956-imi ilaqutariilluta aalajangerpugut Pukekohemut, Auklandip kujatinnguniittumut, nuunniarluta. Tamaani ukiuni 13-ini kiffartorpugut. — Naleqqiuguk apustilit suliait 16:9.

Taamanimiit Jehovap isumassuineranut takussutissat ingammik marluk eqqaamalluarpakka. Kommunimi bilimik usisarfilimmik biilertutut maskiinanillu nakkutilliisutut sulitillunga Peqatigiiffiup Aucklandimi immikkoortortaqarfianit Naalagaaffiup Kiffartornermut Ilinniarfianut sapaatip-akunnerini sisamani atuariartornissannik neqeroorfigineqarpunga. Taamaattumik sapaatip-akunnerini sisamani sulinngiffeqarniarlunga qinnuteqarpunga. Chefinginiørip akivaanga: „Aap, soorunami. Kissaatigigaluaqaara amerlanerusut ilittut issasut. Uteruit allaffinnut alakkakutsoorniarna.“ Kingorna allaffimminukarama sapaatip-akunnerinut sisamanut peqanngiffinnut akissarsisippaanga. Taamaalillunga ilaquttama timikkut pisariaqartitaat matussutississinnaalerpakka. — Matîuse 6:33.

Eqqaarusutama aappaa nuliaralu 1968-imi pionerinngoreersugullu pivoq. Tamatumuunakkut aamma Jehovamit ikiorneqarnissarput tunaartaraarput, taamaaliorporlu. Ullaat ilaanni ullaakkorsioreerluta nuliama nillataartitsivik ammarpaa taamaallaat punnimininnguup kiserngorunnera uppernarsarniaannarlugu. „Sarn,“ oqarpoq, „nerisassaataaruppugut. Suli isumaqarpit oqaluussiartussasugut?“ „Aap!“ akivara.

Oqaluussinitsinni naapitatta siulliup illumi ningiup atuagassiat neqeroorutivut tiguai akillutalu manninnik 20-nik tunilluta. Pulaakkatta tulliata naatitanik tunivaatigut — kumarasinik (naatsiiat tungusunnitsut), blomkålinik kuloruujunillu. Nerisassat ulloq taanna angerlaassavut aamma neqimik punnermillu ilaqarpoq. Aap, Jesusip oqaasii ilumoorluinnarput: ’Timmissat qilaap ataaniittut isiginiarsigik: siaruarterinatillu katersuinatillu quinullu qimatulinngillat; taamaattoq Ataatassi qilammiusup nerisittarpai. Taakkunannga pingaarnerunginnerpisi?’ — Matîuse 6:26.

 Nunami allamiilerpugut

Oqaluussiffissarput nutaaq tassa Rarotonga Cookip-qeqertaaniittoq. 1970-imiit ukiuni sisamani tamaani specialpioneritut kiffartorpugut. Uagutsinnut unamminiarnartoq siulleq tassa oqaatsinik allanik ilinniarneq. New Zealandimili maorisut oqaatsivut Cookillu qeqertaani oqaatsit imminnut assingummata sapaatit-akunneri tallimaannaat qaangiuttut siullermeerlunga tamanut oqalugiarpunga.

Cookip-qeqertaani ikittuinnarnik oqaluussisartoqarpoq, ataatsimiiffigisinnaasatsinnillu soqanngilaq. Qinnutitsinnut akissutitut Jehovap pisariaqartitatsinnik tuneqqippaatigut. Pisinarfiutilimmik nalaatsornerinnakkut oqaloqateqarnerup kinguneranik toqqavissamik naleqquttumik attartorsinnaalerpugut, ukiorlu ataasinngunngitsorluunniit rigssalitaarpugut 140-nut inissalimmik mikisumillu inissiartalimmik. Jehovap ataqqineqarnissaanut unnersiutigineqarnissaanullu pilluaqqusaaqattaartuarpugut.

Ingammik qeqertani tamakkunani najugaqartut inussiarnisaartuunerat qujamasuutigeqaarput. Oqaluussitilluta nillertumik imeruersaatissinneqartarnerput nalinginnaaqaaq. Tamaani silaannaq kissarlunilu isugutasuummat imeruersaatit tamakku qujaruttaqaavut. Angerlamut apuukkaangatta bananit, melonit, mangot appelsinallu nalusatsinnit matutta silataanut ilineqarsimasut naammattoortarpavut.

1971-imi nuliaralu oqaluussisartut allat pingasut ilagalugit Rarotongamiit qeqertamut Aitutakimut, ikkattumik qeqertarasaartumik tasinngortaasaqarnermigut nalunngisaasumut, aallarpugut. Qeqertarmiut inoroorsaartut akornanni Guutip oqaasianik nuannarisaqartunik naapitsisarpugut, angerlarsimaffimmilu Biibilimik atuaqqissaarnerit sisamat aallartippavut. Rarotongamut uteratta Biibilimik atuaqqissaaqatiginninnerit taakku allakkatigut nangippavut. Aitutakimi atuaqqissaaqatitaavut taakku kingorna kuisipput, ilagiinnillu pilersitsisoqarpoq. Taavani 1978-imi Cookip-qeqertaani rigssalip aappaa napparneqarpoq. Ikkussuillutalu imerterigatta Jehova naajartortitsiuarpoq. — 1 Korintumiut 3:6, 7.

Cookip-qeqertaani qeqertanut qulinut tikeraarnera immikkut pisinnaatitaaffittut isigaara. Angalanerilli ajornartorsiutitaqartarput. Umiarsuarmik kilometerit 180-it ingerlallugit Atiumukarneq anorersuartarnera mallersorsuusarneralu pissutaallutik ullunit arfinilinnit amerlanerusunik sivisussuseqarsinnaasarpoq. (Naleqqiuguk Korintumiunut agdlagkat áipait 11:26.) Nerisassaqarpianngilaq amerlasuullu merianngorrapput, qujanartumilli Jehovap isumassormanga ornitannut apuuppunga.

Cookip-qeqertaaniissinnaatitaanerput 1974-imi akueriumaneqarunnaarpoq taamaattumillu New Zealandimut utertariaqarsimavugut. Taamaalinerani qeqertani taakkunani pingasunik ilageeqalersimavoq.

Immikkut pisinnaatitaaffiit suli allat — misilinneqarnerlu

New Zealandimi annerusumik suliniuteqarnissamut periarfissat amerlipput. (1 Korintumiut 16:9) Peqatigiiffik Napasuliaq Alapernaarsuiffik-mik atuagassianillu Biibililersaarutaasunik allanik Cookip-qeqertaani oqaaserineqartumut maorisuunngortitsisinnaasumik pisariaqartitsivoq. Nutserinermik suliassaq tamanna uannut tunniunneqarpoq sulilu tamanna immikkut pisinnaatitaaffigaara. Aamma qatanngutinut Cookip-qeqertaaniittunut pulaartarnissamut angalalluni nakkutilliisutut immikkut pisinnaatitaaffeqalerpunga.

Angalanerma ilaanni qatanngut Alex Napa, specialpioneri Rarotongameersoq, Manahikimut, Rakahangamut Penrhynimullu — Cookip-qeqertaasa avannarpasinnerusut ilaannut — ullut 23-t umiartorluni angalasarialimmut ilagaara. Qeqertani tamani najugaqartut inoroorsaartut Jehovap killittarpai inissaqartittarluta atuagassiaatitsinnillu tigusiumasarlutik. (Naleqqiuguk apustilit suliait 16:15.)  Qeqertani tamakkunani uillunik sapangartalinnik peqarluarpoq, akuttunngitsumillu inuit sapannganik tunissuteqarumasarput nunarsuaq tamakkerlugu oqaluussinermut tapersersuutitut. Inuit anersaakkut sapannganik tunisarpavut taakkualu sapangavinnik tunisarpaatigut. — Naleqqiuguk Matîuse 13:45, 46.

Qeqertat avinngarusimasut tamakku alianaalluinnartuupput. Takorlooriaruk eqalussuarsuit ikkannersuarni qeqertarasaartuni meeqqanik pinnguaqateqartut! Unnukkut qilak tupinnarluinnartumik kusanartarpoq. Aap, tussiaasiortup oqaasia ilumooqaaq: „Ullup oqariartorfigaa ulloqanni, unnuap ilisimatippaa unnuaqanni.“ — Tussiaat 19:3.

Ukiulli qulingiluat matuma siorna ilumuussusera misilinneqartariaqarsimavoq. Nulia qaratsaminik aanaartorluni napparsimmavimmut unippoq. Pilanneqartariaqarpoq, nakorsalli aalersussanngikkunikku passukkumanngilaat. Nalunngeqatiginnissuterput malillugu aalersortinneq, Guutip inatsisaanik unioqqutitsinerusoq, akueriumanngilarput. Pilattaasartorli nalunngeqatiginnissutini malillugu inuup inuunera annaanniarlugu suulluunniit, ilaatigut aak, atorneqartariaqartut isumaqarpoq.

Nuliara ajorsiartuinnarpoq, naggataatigullu peruluttut inaannut pisinneqarpoq, pulaartoqaqqusaavallaarunnaarlunilu. Siutaata igalaasartaata naqisimaneqarnera pissutaalluni tutsarlussivoq. Peruluttorujussuuvoq. Pulaareersunga nakorsap biilinnut aneqatigaanga oqarfigalungalu nuliara pilatsittuuguni aalersortittuugunilu perulukkunnaassagaluartoq. Nakorsaq akuereqqulluni kimigiisertorujussuuvoq. Kisianni nuliaralu Jehova tatigaarput — inatsisaanik naalannerput aaqqissuussanermi matumani ukiualunnguanik annaasaqarnissatsinnik kinguneqassagaluarpalluunniit.

Taavali nuliara malunnartumik pitsanngoriasaarpoq. Ilaanni pulaarakku siniffimmini issialluni atuartoq naammattoorpara. Ulluni tulliuttuni napparsimasunut napparsimmavimmilu sulisunut oqaluussisalerpoq. Taamaallunga pilattaasartup allaffianukaqqusaavunga. „Hr. Wharerau,“ oqarpoq, „iluatsitsisorujussuuvutit! Isumaqarpugut nuliavit nappaanni qaangileraa.“ Ilimagineqanngilluinnartumik aavata naqitsinera pitsanngorsimavoq. Nuliaralu marluulluta Jehova qutsavigaarput sapinngisatsinnillu kiffartuunnissaanik aalajangernerput nutarsaqqillugu.

Maanna Cookip-qeqertaani kiisalu Rarotongami kiffartuleqqippugut. Tamanna immikkut pisinnaatitaaffittut pilluaqqusaanertullu isigaarput! Nuliaralu kingumut qiviaraangatta ukiuni 50-ingajanni Jehovamut kiffartornitsinni Jehovap isumassuiuarsimanera qujamasuutigisaqaarput. Timikkut pisariaqartitavut pissarsiariuaannartarsimavavut. Anersaakkut pilluaqqusaanerpassuit amerlangaarmata kisitsiseqartinngilavut. Tamakku ilaat immikkut maluginiagassaavoq: ilaquttakka 200-nit amerlanerusut sallusuissummik ilassinnissimapput Jehovamullu nalunaajaasunngorsimallutik kuisimasut, taakkua ilagaat nammineq kinguaakka 65-it. Ernuttama ilaat Betelimi New Zealandimiittumi kiffartorpoq, panimma ilaat uini meeqqanilu immikkoortortaqarfinnik sanaartornermut suleqataapput. — 3 Juánase 4.

Nunarsuaq tamakkerlugu paratiisimi, nunamit inunngorfinnit alianaatsumit suli alianaannerusumi, inuulernissaq qilanaareqaara. Qilanaareqaaralu makiffissami ataatama anaanamalu tikilluaqqunissaat Jehovallu isumassuineranik, ilaatigut utertitsissummik Naalagaaffimmillu, oqaluttuunnissaat.

Jehovamut kiffartornissamut aalajangersimanera uannik isumassuineranik nammineq misigisannit nakussatsinneqartarpoq. Taamaattumik Tussiaat 104:33-mi tussiaasiortup oqaasii pigiliussimavakka: „[Jehova] erinalersorfigissavara inuutillunga, Guutiga erinalersorfigalugu toqunngikkallartillunga.“ — Oqaluttuartoq: Sarn Wharerau. (wD 1/9 92)

[Qupp. 23-mi assiliartaq]

New Zehlandimi rissali siulleg 1950-imi sananeqarpoq