’Kuisissaanga?’

APEQQUTIT inuunerup ingerlanerani aalajangerfigisassatta pingaarnersaat tassaavoq apeqqut manna: ’Kuisissaanga?’ Soorli apeqqut tamanna taama pingaartigaa? Apeqqummut tamatumunnga qanoq qisuariarnerput sunniuteqassammat, maannakkut inuunitsinnuinnaanngitsoq aammali siunissatsinnut.

Illit apeqqummut tamatumunnga ullumikkut aalajangerniartussaavit? Immaqa Jehovap nalunaajaasui ilagalugit Biibili sivisungaatsiartumik atuaqqissaareersimavat. Immaqaluunniit angajoqqaavit mikisuuninniilli Biibilimik ilinniartissimavaatsit. Maannalu aalajangertariaqalerputit inuunerit qanoq atussanerlugu. Eqqortumik aalajangiisinnaassaguit kuisinnerup suut nassatarigai kikkullu kuisittussaasut paaseqqaartariaqarpat.

Kuisinnerup suut nassatarigai

Katinneq assigikannerlugu kuisinneq tassaavoq nalliuttoq pingaaruteqartoq nutaamik attaveqalernermut malunnartitsiniutaasoq. Angut arnarlu katinnginnerminni qanimut imminnut attaveqatigiileriartuaarsimapput. Katinneq immini tassaannaavoq aappariit isumaqatigiissutigereersimasaminnik, tassa katillutik inooqatigiilernissaminnik, tamanut nalunaarutiginninnerat. Katinnermikkut immikkut pisinnaatitaaffinnik nuannaarutiginninnissaminnut periarfissaqalerput, tamannali ilutigalugu aamma akisussaaffeqalerlutik.

Tamanna kuisinnermut assingussuteqarpoq. Biibili atuaqqissaaraangatsigu ilikkartarparput Jehova qanoq ililluni asanninnermik uagutsinnut ersersitsisimasoq. Inuunermik inuunissatsinnullu pisariaqartitatsinnik tuniinnarsimanngilaatigut, aammali ernituaminik tunisimalluta. Taamaalilluni Guutip inuit ajortillit imminut qanimut attaveqalernissaannik nunamilu paratiisiusumi naassaanngitsumik inuulersinnaanissaannik periarfissiuussimavai. Tamatuminnga ilisimanninnitta arlaannik iliuuseqarusulersissannginnerpaatigut?

Qanoq iliorsinnaagatta? Guutip ernerata, Jesus Kristusip, ima kajumissaarpaatigut: ’Uannik malinnikkumasoq imminik isumakkiissavoq, [napasorlu anniartitaaffini, NV] ersullugu malissavaanga.’ (Matîuse 16:24) Aap, Jesus Kristusimut ajoqersuganngorsinnaavugut Ataatamilu, Jehovap, soqutigisaanik kiffartuussinermigut maligassiai malissinnaallugit. Taamaaliussaguttali ’imminik isumakkeertariaqarpugut’, tassa nammineq kajumissutsitsinnik Guutip piumasaa nammineq piumasatsinnit sallinngortittariaqarparput; tamatuma nassatarissavaa taassuma piumasaanik iliorniarluta inuunerput tunniulluinnassallugu. Nammineq kajumissutsimik inuttut aalajangerneq tamanna nalliuttorsiorpalaartumik tamanut nalunaarutigineqartarpoq. Imermi kuisinneq tassaavoq Guutimut tunniulluinnarsimaneq ersersinniarlugu tamanut ammasumik nalliuttorsiorneq.

Kikkut kuisittussaappat?

Jesus Kristusip malinnitsini kajumissaarsimavai ’aallaqqullugit inunnillu inuiaqatigiinnit tamaneersunik ajoqersuganngortitsiortoqqullugit Ataatap Ernerullu anersaallu illernartup aqqani kuillugit, ajoqersorlugillu peqqusani tamaasa maleruaqqullugit’. (Matîuse 28:19, 20, NV) Soorunami kuisittussat isumamikkut uummatimikkullu inersimassusermik angusereersimasariaqarput. Guutip oqaasianik namminneq atuaqqissaartarnermikkut paasisimavaat inooriaaserisimasaminnit ’isumataartariaqarlutik’ ’saanniartariaqarlutillu’. (apustilit suliait 3:19) Taava paasilersimavaat Jesusimut ajoqersuganngornissap oqaluussinermillu taassuma aallarnigaanik suliaqarnissap qanoq pisariaqartiginerat. Tamakku tamarmik kuisinnerup siornagut pisarput.

Illit anersaakkut ineriartorninni tamanna angusimaviuk? Guutip kiffartuunnissaa sakkortuumik  kissaatigaajuk? Taava kunngip kiffarsuanik Etiopiamiumik oqaluttuaq apustilit suliáinik agdlagkat, kapitali 8-miittoq, qinunikkut eqqarsaatigeqqissaarniaruk. Angut taanna Jesusip Messiasiuneranik siulittuutit nassuiarneqartut tusareeramigit isumani uummatinilu misissorlugu ima aperaaq: ’Kuisissallunga sumik akornuteqarnerpunga?’ Akornutissaqarsimannginnami kuisippoq. — apustilit suliait 8:26-38.

Aamma ullumikkut inuppassuaqarpoq taama aperisunik: ’Kuisissallunga sumik akornuteqarnerpunga?’ Tamatuma kingunerisaanik 1991-imi inuit 300.945-t tunniulluinnaqqammersut kuisissimapput. Tamanna Jehovap innuttaanut nuannaarutaaqaaq, ilagiinnilu utoqqaanertat inunnik eqqortuliorusuttunik kuisinnissaannut ikiuisinnaanertik nuannaarutigaat.

Taavami ilagiinni utoqqaanertat, imaluunniit inuusuttuuguit angajoqqaavit, kuisinnissannut utaqqilaaqquppatsit? Nikallussanngilatit. Eqqaamajuk Qutsinnerpaamut attaveqassalluni aalajangerneq asuleernerinnaanngimmat. Najoqqutassat qutsissut maleruagassaapput. Taamaattumik siunnersuutit pitsaasut tusarnaartakkit ilungersorlutillu maleruarniarsarisarlugit. Paasinngisaqaraangavit nangaanak apersortarit sukkut siumukartariaqarnerit paasilluarumallugu.

Inuilli ilaat oqartarnermittut ’annertuumik alloriarnissaminnut’ nangaasarput. Illit taakkununnga ilaavit? Soorunami tunniulluinnarnissamut kuisinnissamullu utaqqinissannut aalajangersimalluinnartunik pissuteqarsinnaavoq. Kuisinnissamulli piukkunnarsereeraluarlutit nangaajuaruit imminut ima aperissallutit pitsaassaaq: ’Kuisissallunga sumik akornuteqarnerpunga?’ Qinunikkut eqqarsarluarit paasiniarlugu Jehovap imminut inuttut attaveqalernissamik neqeroorutaanut ilassinninnissannut nangaassuteqarnissannut pissutissaqarluarnerlutit.

’Inuusuppallaarpunga’

Inuusuttuuguit immaqa ima eqqarsassaatit: ’Inuusuppallaarpunga.’ Ilumoorpoq inuusuttut angajoqqaaminnut naalattuaannarunik maleruuttuaannarunillu aammalu sapinngisaminnik Biibilimi unnersuussutinik maleruaaniarsaralutik, isumalluarsinnaammata Jehovap „illernartutut“ isigigaatik. Biibilimi oqaatigineqarpoq Guutip angajoqqaanik naapertuilluartunik iluarinninnera meeraannut mikisunut aamma atuuttoq. (1 Korintumiut 7:14) Biibilimili meeqqat mikisut ukiui killilerneqarsimanngillat. Taamaattumik pingaaruteqarpoq kristumiut inuusuttut apeqqummik matuminnga isumaliutiginneqqissaarnissaat: „Kuisissaanga?“

 Biibilimi inuusuttut kajumissaarneqarput ’inuusuttuunermik ulluini Pinngortitsisiminnik eqqarsaatiginninnissaminnik’. (Nalunaajaasup oqaasii 12:1) Tamatumani pitsaasumik maligassaqarpugut, tassa Samuel inuusuttoq ’meeraatigigaluarluni Jehovap kiinaata saani kiffartuussisoq’. Aamma Timoteus, meeraanerminit anaanaminit aanaminillu sallusuissummik ilinniartinneqarnerminik uummammiuliussisoq, maligassaraarput. — 1 Samuel 2:18; 2 Timûtiuse 1:5; 3:14, 15.

Taamatuttaaq ullumikkut inuusuttorpassuit Jehovamut kiffartornermut inuunertik tunniulluinnarsimavaat. Akifusa 15-inik ukiulik oqaluttuarpoq oqaluussinermut tunngasumik ataatsimiinnermi sammineqartoq kuisissalluni aalajangernissaminut iluaqutigisimallugu. Ayumi qulinik ukioqarluni kuisissimavoq. Jehova kiffartuukkusulersimavaa taassumunnga qamuuna asannissuseqalersimanini pissutigalugu. Maanna 13-inik ukioqarpoq Biibilimillu atuaqqissaaqatigisartakkami aamma Jehovamut asannissuseqalersimasup 12-inik ukioqarluni kuisinnera nuannaarutigisinnaasimallugu. Ayumip aqqaluaa Hikaru aamma qulinik ukioqarluni kuisissimavoq. „Oqartoqaraluarpoq meeraavallaartunga, Jehovalli misigissutsikka nalunngilai. Tunniulluinnarnissannik tamakkiisumillu kiffartuunnissaanik aalajangeriitsiaannarlunga kuisinnissara aalajangiulluinnarpara,“ nassuiaavoq.

Soorlu qatanngutip niviarsiannguup misigisimasaanit takuneqarsinnaasoq angajoqqaat maligassiaat aamma pingaaruteqartorujussuuvoq. Anaanaa ataataanit inerterneqarsimavoq meeqqatik Biibilimik atuaqqissaaqatigisaqqunagit. Patittartarpai atuagaallu ikuallattarlugit. Anaanamilli qasusuissusiatigut uppissusiatigullu Jehovamut kiffartornissap pingaaruteqassusia meeqqat paasivaat. Niviarsiannguaq 13-inik ukioqarluni kuisippoq, aqqaluaatalu nukaatalu kingorna aamma maligassiaa malippaat.

’Utoqqaavallaarpunga’

Tussiaasiortoq ima allassimavoq: „Nukappiaqqat niviarsiaqqallu, utoqqaat inuusuttullu! [Jehovap] aqqa unnersiutigissavaat.“ (Tussiaat 148:12, 13) Aap, aamma utoqqaat Jehovamut kiffartornissap pingaaruteqassusia paasisariaqarpaat. Utoqqaat inuunerminni allannguinissartik amerlanertigut ornigineq ajorpaat. Oqartarput „qimmeq utoqqaq pinnguaatinik nutaanik ilinniartinneqarsinnaanngitsoq“. Eqqaamajulli Abraham Jehovap ’nunaminit eqqarliminillu nunamut takutitassaminut aallaqqummani’ 75-inik ukioqarsimammat. (apustilit suliait 7:3; 1 Moses 12:1, 4) Moses 80-inik ukioqarsimavoq Jehovap matuminnga suliassimmani: ’Innuttakka Israelikkut Egyptenimit aniguisikkiartukkit.’ (2 Moses 3:10) Angutit taakku allallumi Jehovap imminut asanninnerminnik tunniusimanerminnillu ersersitseqqusinerani inuunerminni ’kisarluareersimagaluarput’, Jehovalli kajumissaarutaa nangaanatik malippaat.

 Ullumikkummi? Shizumu Biibilimik atuaqqissaalerami ukiuni 78-ini buddhasiortooreersimavoq. Biibilimik atuaqqissaartalermat ilaqutaasa akerlereqaat, allaat nammineq angerlarsimaffimmini atuaqqissaaqquneq ajorlugu. Ukiumi ataasiinnarmi atuaqqissaareerluni paasivaa Jehovamut tunniulluinnarnissaq pisariaqartoq, kuisillunilu. Sooq taamatut inuunermini allannguiva? Ima nassuiaavoq: „Ukiorpassuarni eqqunngitsumik upperisarsiornermit tammartitaasimaavunga, maannalu kissaatigaara Jehovap oqaasiinik sallusuissutaasunik naassaanngitsussamut piuartuarnissara.“

’Annaffigaarsi’

Piffissaq ingerlalertoqaaq. Inuup inuunera navianartorsiorpoq — aamma illit inuunerit. Jehovamut tunniulluinnarnissavit tamatumalu kuisinnikkut takutinnissaata ilungersortumik eqqarsaatigeqqissaarnissaat pisariaqartorujussuuvoq. Apustilip Peterip tamanna erseqqissarsimavaa ima oqarami: ’Annaffigaarsi kuissut.’ Nangilluni nassuiaavoq kuissut ’timimut eqqiarfiunngitsoq’ (kuisinnissamut piukkunnarsereersimasoq timikkut eqqiareersimassammat), ’Guutimulli ilerasunnaveerutissamik angeruseqarfiusoq’. — 1 Pîtruse 3:21.

Jehovap piumasaqaataanik naammassinninnermikkut ajoqersukkat kuisittut ilerasuutaaruttarput. Jehovamut kiffartornerminni sapinngisartik tamaat iliuuseqartuaannarunik nalerisimaartuaannassapput isumamikkullu eqqissisimajuaannassallutik. (Jâko 1:25) Kisianni soorunami aatsaat Jehovap pissutsit aaqqissuussaani nutaami pilluaqqussutissat naassaanngitsut angusinnaassavaat. Qanortoq pilluaqqussutissat tamakku peqataaffigigigit apeqqummut matumunnga ajunngitsumik qisuariarnikkut: ’Kuisissaanga?’ (wD 1/10 92)

[Qupp. 27-mi assiliartaq]

Samuel nukappiaraalluni Jehovap saani kiffartorsimavoq

[Qupp. 28-mi assiliartaq]

Moses Jehovamit suliassinneqarnermini 80-inik ukioqarsimavoq

[Qupp. 29-mi assiliartat]

Ullumikkut utoqqaat inuusuttullu kuisittut Guutip aaqqissuussassaani nutaami pilluaqqussutissat qilanaarisinnaavaat