Qanoq ililluni iivangkiiliup iluaqusersinnaavaatit?

BIIBILI atuakkiatut naleqassutsimigut — allaat Guuteqannginneraasut akornanni — eriagineqartorujussuuvoq. Ikittuinnaalli imaasa maleruarnissaat siunertaralugu atuartarpaat. Allaallu inuppassuit isumaqannguatsiarput nutaarsiassaq nuannersoq Biibilimiittoq ukiunik 2000-ingajannik pisoqaatigigami muteerninngorsarneqartariaqartoq, nutarsarneqarluni. Iivangkiiliuli pisoqalisimallunilu itsangavallaarpa? Naamerluinnaq.

Angutit arnallu, utoqqaat, inuusuttut meeqqallu millionilikkuutaat ullumikkut nalunngilaat Biibili ikiortissaasoq nalissaqanngitsoq. Soorlumi Today’s English Version-ip siulequtaani allassimasoq: „Biibili tassaannaanngilaq atuagatsialassuaq nersorneqartussaallunilu ataqqineqartussaasoq, nutaarsiassaavoq nuannersoq inunnut tamanut sumiikkaluartunut — tusarliussaalluni ulluinnarni paasineqartussaallunilu maleruarneqartussaq.“

Iivangkiiliu ilinnut qanoq pingaaruteqarpa? ulluinnarni najoqqutassatut atorpiuk? Maluginiariaruk nutaarsiassaq nuannersoq ukiuni hundredelinni siullerni inuit ilaannut tamatuminnga tusarnaartunut qanoq iluaqutaasimasoq taamatuttaarlu ullumikkut inuit ilaannut qanoq sunniuteqarsimasoq.

Inuit iivangkiiliumit ikiorneqarsimasut

Jesusip nalaani aalisartut illumilu ningiut suleruloortut nutaarsiassamut nuannersumut kajungersimapput Guutillu inunnik siunertaa ilinniarsimallugu. Nutaarsiassaq nuannersoq inuuneranni annertuumik allanngortitsisimavoq ilaatigullu annertuumik kiffaajunnaarsitsisimalluni. Assersuutigalugu, Maria Magdalene anersaapilummit pulaneqarsimanerminit  ajorunnaarsitaasimavoq. Zakæusip, ilanngaaserisuusup, piumatuutut inooriaatsini qimassimavaa. (Lúkarse 8:2; 19:1-10) Tappiitsut pupissullu Jesusimukaraangamik, nutaarsiassamik nuannersumik oqaluussissutiginnittumut, ikiorneqartarsimapput. (Lúkarse 17:11-19; Juánase 9:1-7) Jesus eqqortumik ima oqarsinnaasimavoq: ’Tappiitsut tappissipput, tusiattut pisupput, pupissut pupeerupput, tusilartut tusarput, toqusut makipput piitsullu iivangkiiliumik oqaluffigineqarput.’ — Matîuse 11:5.

Timikkulli ajorunnaarsinneqarnerannit pingaarneruvoq nutaarsiassap nuannersup inuit atugarissaanngitsut taakkua inuttut pissusiisigut allanngortitsinera. Eqqortumik isumallit siunissamut neriuutissaqalersimapput. Guutip naalagaaffia — iivangkiiliumit inuit atugarisaannut tunngasumit sumilluunniit pitsaanerusoq — tunaartarilersimavaat. (Matîuse 4:23) Neriuutaat Jesus toqummat kipitinneqanngilaq. Jesusip toqoreernerani pisut apustilit suliait 5:42-mi allaaserineqarput: ’Soraanngillallu ullut tamaasa naalaffimmi illunilu ajoqersuillutik iivangkiiliulu Jesus Kristusimik oqaluutigalugu.’ Ukiuni hundredelinni siullerni inuit nunat ilarpassuiniittut anersaakkut ikiorneqarput oqaluussinermut tamatumunnga ajunngitsumik qisuariaramik.

Naalagaaffik taamanikkut tassaasimavoq nutaarsiassaq nuannernerpaaq. Ullumikkummi Naalagaaffik pillugu tusarliussaq suli nutaarsiassaava nuannersoq?

Nutaarsiassaq nuannersoq ullumikkut qanoq isumaqarpa?

Silarsuarmik eqqissineqarfiusumik isumannaatsumillu kipisagisaqaruit Naalagaaffimmik nutaarsiassat ilinnut nuannerluinnassapput. Aap, silarsuarmi inuit millionilippassuit pisariaqartitartik inorlugu nerisaqarfigisaanni perlerarfigisaannilu, silarsuarmi inunnik tamanik ulorianartorsiortitsisunik nappaassualimmi, silarsuarmi pinerlunniartarnerup annilaarnaannartumik annertusiartorfigisaani politikkikkullu patajaneqarfiujartuinnartumi, Guutip naalagaaffianik tusarliussaq nutaarsiassatuaavoq nuannersoq piviusoq ataavartorlu. Piviusumik pitsannguinissamut neriuutissatuaavoq ilumoortoq.

Taamaattumik Jesusip nalerput ima siulittuutigaa: ’Naalagaaffimmik iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ (Matîuse 24:14) Oqaatsit taakku malugisarialimmik eqquupput Jehovap Nalunaajaasui nunani 200-nit amerlanerusuni nutaarsiasssaq nuannersoq oqaluussissutigimmassuk. Katuullit atuagassiaanni „Nova Evangelizacão 2000-imi Jehovap Nalunaajaasui tamatuminnga nersualaarneqarput ima oqaasertalimmik: „Jehovap Nalunaajaasui sumi nassaassaappat? Angerlarsimaffiit matuisa silataanni. Jehovamullu nalunaajaasuujumagaanni, Jehovamullu pigitikkumagaanni, oqaluussisartuusariaqarpoq. Taamaattumik misilittakkaminnik suliarinnillutillu nalunaarutiginnillutillu saqqummiussisut takusarpavut.“

Nutaarsiassarli nuannersoq imaaliallaannarluni iluaqutigineqarsinnaanngilaq. Tamatumunnga tusarnaartut maleruaasullu kisimik iluaqutissarsiffigisinnaavaat. Tamanna ersersinniarlugu Jesus angummik siaruarteriartortumik assersuusiorsimavoq. Issut assigiinngitsut naatsiiassat, imaluunniit inerittussat, tuffigisaat inuit nutaarsiassamut nuannersumut tusarnaartut uummatimikkut assigiinngissusiinut assersuutaapput. Jesus oqarsimavoq: ’Naalagaaffimmik oqaaseq inuup tusaraangagu paasinagulu, taava ajortup issuma piiariartorarai uummataanut siaruartersimasut; . . . Issorissumulli siaruartersimasut tassa oqaatsimik tusartoq paasillugulu, taavalu inerititaqalerluni, ilaat hundredeleriakkanik, ilaat arfinilinnik quleriakkanik, ilaat pingasunik quleriakkanik.’ — Matîuse 13:18-23.

 Soorlu ukiuni hundredelinni siullerni taamaassimasoq inuit amerlanersaasa nutaarsiassaq nuannersoq paasiniartorsuusanngilaat. Paasinnginnamikkulu pilluaqqussutissartaanik pissarseqataaneq ajorput. Ilaasali nutaarsiassamik nuannersumik pingaartitsinertik ersersittarpaat, ilinniartarlugulu qanoq ilillutik inuunertik Guutip piumasaanut naapertuuttunngorsarsinnaallugu. Tamanna taakkunnunnga pilluaqqussutisiaavoq. Inuit immikkoortut marluk taakku arlaannut sorlernut illit ilaavit?

Iivangkiiliup nalitsinni pissaanera

Pisartut takutippaat nutaarsiassaq nuannersoq inunnut ’neriugisaqaratillu Guuteqanngitsunut’ ikiuutaasartoq. (Evfisumiut 2:12; 4:22-24) Robertop Rio de Janeiromeersup ikiorneqarnissani pisariaqartissimavaa. Inuusuttuunerminiilli kusanaatsumik inooriaaseqarsimavoq ikiaroornartumut, kanngunartuliornermut tillinniartarnermullu akuliusimalluni. Naggataatigut parnaarussaavoq. Parnaarussivimmi Roberto Jehovap nalunaajaasuinik Biibilimik atuaqqissaaqatigineqartalerpoq. Ima anersaakkut siuariaateqartigaaq parnaarussaanerata sivisussusissaa sivikillerujussuarneqarluni.

Iperagaanermi kingorna Robertop arnaq inuusuttunnguaq siornatigut saassussimasani illuinnarsuummillu qunusiarisimasani naapippaa. Aamma taanna Jehovap nalunaajaasuinit Biibilimik atuaqqissaaqatigineqartarpoq. Taava qanoq pisoqarpa? Allakkat pisimasumik oqaluttuarinnittut ima nangipput: „Kingorna naapeqqissimanatik aatsaat rigssalimi naapeqqipput. Takoqqinnerat killitsinnaqaaq. Tamarmik nuannaarnerup pianik qullilipput qatanngutitullu imminnut pakkutaarlutik. Maanna tillinniartartuusimasoq ajoquserniarsimasaralualu tamarmik Jehovamik pallorfiginnittuupput.“

Aamma Isabelimik atilik ikiorneqarnissaminik pisariaqartitsisimavoq, tassami kamajasuunermigut nalunngisaavoq. Isabel anersaapilussiornermut eqqumiitsorsiornermullu akuliusimasorujussuuvoq anersaapilunnillu ilungersuatinneqartarluni. Jehovap nalunaajaasui Biibilimik atuaqqissaaqatigisaleramigit paasilerpaa nutaarsiassaq nuannersoq ilumut iluaqutaasoq. Piffissangaatsiaq ingerlareersoq anersaapiluit sunniinerannit aniguivoq inuttullu pissutsini allanngortillugu — naggataatigullu kamajasuunini akiorsinnaalerpaa. Maanna kristumiuuvoq aalajaatsoq inunnut allanut inussiarnersuunermigut nalunngisaasoq.

Aap, nutaarsiassaq nuannersoq isumaliutersuutaannanngilaq. Ilumut inuit inuunerannik allanngortitsinissamut pissaaneqarpoq. (1 Korintumiut 6:9-11) Tamannaannanngilarli.  Aamma siunissami pilluaqqussutisiassanik tikkuartuussivoq.

Siunissami pilluaqqussutisiassat

Guutip oqaasia naapertorlugu siunissamik nuanningaartumik utaqqisaqarpugut. Taamanikkussamut Jesusip Guutip naalagaaffiata tikiunnissaanik piumasaatalu nunami qilammisut pinissaanik qinnutai eqquuttut takusinnaalissavarput. (Matîuse 6:10) Naatsumik oqaatigalugu, pissutsit aaqqissuussaanerat maanna atuuttoq ajortunngorsimasoq pinerlunneqarfioqisorlu peerneqassaaq, Guutillu qilammi naalakkersuisuutitai, Guutip naalagaaffia, inunnik eqqortuliorusuttunik nutaarsiassamillu nuannersumik tusarnaarnissaminnut maleruaanissaminnullu piumassuseqarsimasunik naalakkersulissalluni. — Daniel 2:44.

Inuit aalajaatsut kajumissaarneqarlutik qanilaartut naassaanngitsumik inuuffigisassaannik nunarsuarmik paratiisinngortitsippata allanngornersuaqassaaq. (Tussiaat 37:11, 29) Pinerlunniartarnerit, nappaatit, kaannersuit, mingutsinnerit sorsunnerillu peerulluinnarnissaannik tusarliussaq ilumut nutaarsiassaavoq nuannerluinnartoq! Takorloorsinnaaviuk illit ilaquttatillu peqqilluinnarlusi silarsuassami nutaami eqqissineqarfiusumi, nappaatinut toqumullu siooraneqarfiunngitsumi, inuususi? — sarĸúmersitat 21:4.

Nutaarsiassaq nuannersoq inuit ilaasa ingasattutut takorluukkersaarutaannartulluunniit isigisarpaat. Kukkuppulli. Nutaarsiassaq nuannersoq uppernarsaatissanik pitsaanerpaanik tunngavissaqarpoq, inuillu millionilikkuutaat inuunerannik allanngortitsereersimavoq. Taamaattumik upperineqanngikkaluarpat annilaangassanngilatit.

Takorlooriaruk inuk silatusaartoq suliffissuaqarfiup eqqaaniittumik nunaatisisoq taamaalionermigut aningaasanik iluanaaruteqarnissani naatsorsuugigamiuk. Aningaasaatini taamatut atormagit arlaannit avoqqaarineqassanerpa? Naamik. Inuilli oqarumassapput taamaaliorami isumatusaartoq. Sooq taava Naalagaaffimmut atatillugu siumut naatsorsuisoqassannginnerpa nutaarsiassamullu nuannersumut ’aningaasanik’, piffissamik nukinnillu, atuilluni? Nutaarsiassamik nuannersumik upperinninneq annannissamik kinguneqartussaammat, allamik pitsaanerusumik iluanaarutissartalimmik ’aningaasanik atuiffissaqanngilaq’. — Rûmamiut 1:16.

Qanoq ilillutit nutaarsiassamut nuannersumut ’aningaasanik atuisinnaavit’? Siullermik Guutimit ajoqersorneqarnissannut piumassuseqartariaqarputit. Taava ilikkakkatit naapertorlugit iliuuseqartariaqarputit. Piumasaqaatit tunngaviusut itsaq pruffiit hebriiariusut ilaasa taasimasai maleruakkit: „Illit inuk, [Jehovap] ilisimatereerpaatit suna ajunngitsuusoq, nalunngereerpat suut ilinnit piumasarigai: Iluartumik iliussasutit, ilumoortumik asannissasutit, makitajuillutillu Guutit peqatigalugu inuussasutit.“ (Mika 6:8) Guuti peqatigalugu inuunissaq ilinniassagaanni piffissaq iliuuseqarnissarlu pisariaqarput. Jehovap nalunaajaasuisa, Robertomik Isabelimillu ikiuisimasut, ikiorusuttorujussuuaatsit — soorlu ukiut ingerlanerini inuit allat millionilikkuutaat ikiorsimagaat.

Guutip neriorsuutaasa eqquunnissaat utaqqitillugu ’aningaasat atukkavit’ kingorna iluanaarutigisinnaajumallugit iliuuseqartariaqarputit, tassa nutaarsiassaq nuannersoq naapertorlugu inuullutit, isumanni eqqissineq nuannaarutigalugu Guutimullu qaninnerujartortumik attaveqarnissat sulissutigalugu. Taava ’aningaasanik atuinerit’ isumannaatsuussaaq — aningaasatigut ajornartorsiornernit imaluunniit politikkikkut allanngornernit sunilluunniit ulorianartorsiortinneqarsinnaanani. Naggataatigullu, nuanningaartumik iluanaaruteqarumaarputit. Iluanaarut tamanna suua? Apustili Johannes ima allassimavoq: ’Silarsuaq pilerinartuilu nungujartorput; Guutilli peqqusaanik naammassinnittoq naassaanngitsumik atassavoq.’ — 1 Juánase 2:17. (wD 15/12 92)

[Qupp. 7-mi assiliartaq]

Nutaarsiassap nuannersup inerittussai issunut assigiingitsunut nakkalatserneqarput

[Suminngaanneernera]

Garo Nalbandian