Uummaterput ataasiinnarmut sammili

„Ajoqersunnga [Jehova] aqqutigeqqusannik, . . . Uummatiga saatsiguk ataasiinnarmut matumunnga: Aterpit mianerineqarnissaanut.“ — TUSSIAAT 86:11.

1. Jehovap kiffani imminik ilumoorfiginnittut qanoq akilertarpai?

’JEHOVA, kisivit Guutiuvutit.’ (Tussiaat 86:8, 10) Davidip pingaartitsingaarnerminit killinneqarluni Guuti unnersiutigilersimavaa. Suli David Israelimut kunnginngunngitsoq Jehovap Saulimit filisterinillu aniguisissimavaa. Taamaattumik ima erinarsorsinnaasimavoq: „[Jehova] tassa qaarsora pallittaalisara, aniguisitsisiga. Unneqqarissutut iliortarputit unneqqarissumut.“ (2 Samuel 22:2, 26) Jehovap kiffani imminut ilumoortoq misilinneqarnerpassuarminik nikallujuilluni atuinissaanut nakussatsittarsimavaa. Davidip Guutini ilumoorfigisassaminut ilumoortoq tatigisinnaasimavaa, unnersuunneqartuarnissanili pisariaqartissimallugu. Taamaattumik David Guutimut ima qinusimavoq: „Ajoqersunnga [Jehova] aqqutigeqqusannik.“ — Tussiaat 86:11.

2. Jehovap imminik ajoqersorneqarnissarput qanoq ililluni ajornarunnaarsissimavaa?

² David silamiut isumassarsiaannik isumaliutersuutaannillu sammisaqarusunngilluinnarsimavoq. Guutip pruffiitiata kingorna oqarsimaneratut ’Jehovamit ajoqersorneqarnissani’ kissaatigisimavaa. (Jesaja 54:13) Biibilip atuagartaasa ullumikkut atuarsinnaasatta tamarmik ilaat qularnanngitsumik qulingiluaannaat Davidip atuarsinnaallugillu isumaliutigeqqissaarsinnaasimavai. Unnersuussutilli Jehovameersut taakkunani nanisinnaasani erlinnangaartutut isigisimavai. Uagut ullumikkut Biibilip atuagartai 66-iusut tamaasa, kiisalu atuagassiarpassuit „inussiaq aalajaallunilu silatooq“ aqqutigalugu tunniunneqartartut, ’mamarsaatigisarnerisigut’ Jehovamit ajoqersortissinnaavugut. (Matîuse 24:45, NV) Jehova qinnuigisartigu ’Guutip asasaminut piareersagaanik’ ujartuinitsinni anersaaminik ikioqqulluta. — 1 Korintumiut 2:9, 10.

3. Unnersuussutit Biibilimiittut qanoq ilillutik iluaqusersinnaavaatigut?

³ Apeqqutit inuunitsinni saqqummersinnaasut suulluunniit Biibilimi akissutissaqarput. ’Siornagummi allassimasut tamarmik allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit.’ (Rûmamiut 15:4) Unnersuussutit Jehovameersut pigiliukkutsigik misilinneqarnitsinni nakuussutigissavavut, nikallungagaangatta tuppallersaatigisarlugit Naalagaaffimmillu neriuutip piviulluinnartutut isiginissaanut iluaqutigissallugit. Qanortoq Guutip oqaasii „ullukkullu unnuakkullu“ atuartarnerisigut nuannaarutissarsisarta, ilisimassummi Biibilimiittoq „aalajangiussisiminut tamanut orpiuvoq inuunartoq, pilluarput taassuminnga iperaanaveersaartut“. — Tussiaat 1:1-3; Ussatit 3:13-18; takujuttaaq Juánase 17:3.

4. Iliuutsivut eqqarsaatigalugit Jesusip qanoq maligassiuuppaatigut?

⁴ Guutip ernerata Jesusip, aamma ’Davidip erneranik’ taaneqarsimasup, Jehovamit unnersuunneqarnissani ujartortuaannarsimavaa.  (Matîuse 9:27) * Ima oqarsimavoq: ’Erneq isumaminik qanoq-iliorsinnaanngilaq, kisianni Ataataq taamaaliortoq takuguniuk.’ ’Soorlu Ataatama ajoqersoraanga taama oqaluppunga.’ (Juánase 5:19; 8:28) Jesusip maligassatsinnik qimatsivigisimavaatigut ’tumini atuaqqullugit’. (1 Pîtruse 2:21) Eqqarsaatigeriaruk! Jesusip iliorsimanissaraluatut atuaqqissaartarutta Jehovap iliuusissatsitut kissaatigisaatut iliortuaannarsinnaassaagut. Jehovallu iliuusereqqusai tamatigut eqqortuupput.

5. „Sallusuissut“ sunaava?

⁵ Taava David ima nalunaarpoq: „Saqisinnaaqqullunga sallusuissutinni.“ (Tussiaat 86:11) Ukiut tuusintit tamatuma kingorna Pilatusip Jesus, Davidip ernera, ima aperisimavaa: ’Sunaana sallusuissut?’ Aatsaannguummat Jesusip oqarfigisimavaa naalagaaffini ’silamit matumannga pinngitsoq’. Imalu: ’Soorlu oqartutit, kunngiuvunga. Inunnguutigalugulu nunamut pissutigaara sallusuissut nalunaajaatigissallugu.’ (Juánase 18:33-38) Tassani Jesusip erseqqissaatigaa sallusuissut pingaarnerpaamik Messiasikkut naalagaaffimmut tunngasuusoq. Tassami Biibilimi pingaarnerpaatut sammineqartoq tassa naalagaaffik tamanna aqqutigalugu Jehovap aqqanik illernarsisitsinissaq. — Hesekiel 38:23; Matîuse 6:9, 10; sarĸúmersitat 11:15.

6. Sallusuissummi saqinitsinni suut eqqumaffigisariaqarpavut?

⁶ Sallusuissummi saqineq tassa Naalagaaffik pillugu neriuummik inuunermi pingaarnerpaatitsineq. Naalagaaffiup soqutigisai inuunitsinni salliutilluinnartariaqarpavut pissutsillu atukkavut naapertorlugit Jesusip maligassiaa ilungersuussilluta malinniartariaqarlugu Naalagaaffik pillugu sallusuissut nalunaajaassutigalugu. (Matîuse 6:33; Juánase 18:37) Piffissap ilaannaa sallusuissummi saqisinnaanngilagut qalliinnakkullu kiffartuussiitigaluta ingasattumik aliikkutassarsiortarluta, piffissaajarnartumik silamiorpaluttumik anguniagaqarluta imaluunniit ’pisuussutinut kiffaalluta’. (Matîuse 6:24) Aqqutit tamakku allamut sammisut tammartajaarfigisinnaavavut ’aqqullu amitsoq inuunermut sammisoq’ naneqqinngitsoorlugu’. (Matîuse 6:24) Taamaattumik aqqut amitsoq qimannaveersaarniartigu. (Matîuse 7:13, 14) Ajoqersuisorsuatta, Jehovap, oqaatsini peqatigiissortanilu aqqutigalugit aqqut tamanna qaammarsarpaa imalu oqarluni: „Talerpiup saamiulluunniit tungaanut sanguleraangassi siutissi tusaassavaat kingunissinni ima oqartoqartoq: ’Aqqut aana ingerlavigisassarsi.’“ — Jesaja 30:21.

 Mianerinninneq eqqortoq

7. Qanoq ililluta uummaterput ’ataasiinnarmut saatsissinnaavarput’?

⁷ Davidip qinnutaa versi 11-mi nangippoq: „Uummatiga saatsiguk ataasiinnarmut matumunnga: Aterpit mianerineqarnissaanut.“ Daviditut kissaatigisariaqarparput uummammik tamakkiisumik Guutip piumasaanik iliorluinnarnissarput. Aamma tamanna Mosesip unnersuussutaanut naapertuuppoq: „Israelikkunaa, [Jehovap] Guutissi ilissinnit suna piumasaraa? Piumasaraa [Jehova] Guutersi mianerissagissi aqqutigeqqusai tamaasa ingerlavigalugit [Jehovalu] Guutersi asassallugu kiffartuutissallugulu uummatissigut iluunngarlusi tarnissigullu iluunngarlusi, [Jehovallu] peqqussutai ileqqoreqqusaalu ullumi ilissinnut tunniussakka maleruassagisi ajunngitsunik atugaqarsinnaaqqullusi.“ (5 Moses 10:12, 13) Ilumummi Jehovamik tarnitsigut uummatitsigullu iluunngarluta kiffartuussinerput ajunngitsunik atugaqassutigisarparput. Taamaalillutalu aqqanik asseqanngitsumik mianerinninnermik ersersitsisarpugut. Jehovap aqqa isumaqavippoq „Pitippaa“ (imaluunniit ’naammassivaa’), ingammik siunertaminik misinnangaartunik naammassinninniarnerminut atatillugu. Aamma aqqa isumaqarpoq qilammi nunamilu tamarmi oqartussaasoq qutsinnerpaaq. Ataqqinassusia mianerinnittumik ataqqillugu Guuti kiffartuukkutsigu inunnut siooraneq allamut saassutiginavianngilarput. Uummaterput aveqqanavianngilaq. Akerlianilli Jehovap, Eqqartuussisup qutsinnerpaap Kisimilu Naalagaasup inuunitsinnillu assamminiititsisup, iluarinngisaanik iliortoornissarput siooragissavarput. — Jesaja 12:2; 33:22.

8, 9. (a) ’Silarsuarmut ilaannginneq’ qanoq paasisariaqarpa? (b) ’Silamiunut isiginnaagassiaagatta’ qanoq iliortariaqarpugut?

⁸ Allaat oqalorujuunneqarlutalu malersorneqaraangatta Jesusip maligassiaa malikkumassavarput silarsuarmut ajortumut avatangiisitsinnut ilanngunnaveersaarluta. (Juánase 15:17-21) Tamanna paasisariaqanngilaq Jesusip ajoqersugai kiserliorniartuullutik imaluunniit mattuffimmi mattullutik inuussasut. Jesus Ataataminut qinunermini ima oqarsimavoq: ’Qinnutinngilakka silarsuarmit peerseqqullugit, kisianni ajortumut sernigeqqullugit. Silarsuup inuisa ilaginngilaat, soorlu uangattaaq silarsuup inuisa ilaginngikkaannga. Sallusuissutsikkut iluarsakkit; oqaatsisit sallusuissutaapput. Soorlu uanga silamiunut aallartikkimma, taama uangattaaq silamiunut aallartippakka.’ (Juánase 17:15-18) Jesusitut aallartitaasimavugut Naalagaaffik pillugu sallusuissut oqaluussissutigissallugu. Jesus ilakkuminartuusimavoq. Ilinniartitseriaasia inunnut nutaannguallannartumik sunniuttarsimavoq. (Naleqqiuguk Matîuse 7:28, 29; 11:28, 29; Juánase 7:46.) Uaguttaaq taamatut ilinniartitsisariaqarpugut.

⁹ Inunnut eqqortumut kajumittunut kajumissinartumik inussiarnersuullutalu timitsigut pissutsitsigullu torersuusariaqarpugut minguitsunillu oqaaseqarluta. Torinngitsunik kanngunartunillu atisaqarnaveersaartariaqarpugut, silarsuatoqqamut nakkassutigisinnaasatsinnik ilagisartagaqarnaveersaartariaqarluta kiisalu inooriaaseq kanngunartoq najoqqutaqanngitsorlu silarsuarmi avatangiisitsinni nalinginnaaqisoq ingalassimaniartariaqarlugu. ’Silamiunut isiginnaagassiaalersimagatta inngilinut inunnullu’ ulloq unnuarlu  tamaat kristumiutut maligassaasutut kiffartorlutalu inuusariaqarpugut. (1 Korintumiut 4:9; Evfisumiut 5:1-4; Filípimiut 4:8, 9; Kulorsamiut 4:5, 6) Tamatumunngaannaq uummaterput sammisuusariaqarpoq.

10. Kiffartornermut illernartumut uummatiminnik sammisitsisut qanoq Jehovap eqqaamassavai?

¹⁰ Jehovap aqqanik mianerinninnissamut uummatiminnik sammisitsisut siunertaanillu misinnangaartunik isumaliutiginneqqissaartarlutillu inuunerminni taassumunnga kiffartornerminnik sallerpaatitsisut Jehovamit eqqaamaneqassapput. „[Jehovammi] nunarsuarmiittut tamaasa takusinnaavai, uummatimikkut iluunngarlutik imminik tunaarinnittut pissaanermigut ikiorsinnaallugit.“ (1 Israelikkut 16:9) Malaki 3:16-imi, nalerput pillugu siulittuutaasumi, ima allassimavoq: „Taava [Jehovamik] mianerinnittut oqaloqatigiipput, [Jehovalu] naalaarpoq tusarnaarlunilu. Atuakkallu allanneqarput [Jehovap] aqqanik ataqqinnittut [Jehovamit] eqqaaneqaatissaannik.“ Qanortoq aamma uagut uummaterput ataasiinnarmut, Jehovamik mianerinninnermut peqqinnartumut, sammisuuli.

Jehovap ilumoorluni tunniusimanera

11. Imminik ilumoorfiginnittunut Jehovap ilumoortumik tunniusimanini qanoq ililluni ersersissavaa?

¹¹ Davidip qamannga pisumik qinunini ima nangippaa: „Qutsavigaakkit [Jehova] Guutiga uummatikkut iluunngarlunga. Ataqqissavara aqqit naassaanngitsumut, unneqqarissutsinnik [ilumoorlutit tunniusimaninnik, NV] angingaartumik misigitikkamma, annaakkamma toqusut inaata itineranit.“ (Tussiaat 86:12, 13) Tassa tussiaammi tassani aappassaanik Jehova ilumoorluni tunniusimanera pillugu unnersiutigaa. Asanninneq tamanna ima angitigaaq aaqqinneqarsinnaanngitsuusaatut ittunit allaat aniguisissinnaalluta. David Saulip puilasuitsumi piniarsaarimmani immaqa arlaannut pularusuinnaraluarpoq toqorusullunilu. Soorlumi immaqa tassa Sheol, imaluunniit toqu, ajaperlugu. Jehovalli aniguisippaa! Taamatuttaaq Jehovap ullumikkut kiffani tupinnaannartumik ikiortarsimavai, aammalu toqunissartik tikillugu assuarnaattuartut annertoqqusersortarsimavai. Taassumunnga ilumoorfiginnillutik kiffartortut akissarsiassartik piumaarpaat, pisariaqassappat makititaanikkut. — Naleqqiuguk Job 1:6-12; 2:1-6, 9, 10; 27:5; 42:10; Ussatit 27:11; Matîuse 24:9, 13; sarĸúmersitat 2:10. *

12. Kristumiuuneraqatigiit palasii qanoq ilillutik peqqarniisaarlutillu innimiillisaarsimapput, qanorlu siunissaqarpat?

¹² Davdip imminik malersuisut ima oqaatigai: „Angutit soqqusaatsut saassuppaannga, Guuti, nakuusertorpassuit toqunniarpaannga, illit soqutaatinngilaatsit.“ (Tussiaat 86:14) Ullumikkut malersuisunut kristumiuuneraqatigiit palasii ilaasarput. Taakku Guutimik pallorfiginnittuuneraraluarput, taassumali aqqa illernartoq „Naalakkamik“ taarsersimavaat ataasiullunilu pingasuusutut paasiuminaatsutut nassuiartarlugu, massa Biibilimi taamaannerarneqanngivissoq. Ila innimiimmata! Aammalu Jehovap Nalunaajaasui inerteqqutaalersinniartarpaat parnaarussaatittarlugillu, sulilu tamakkua nunarsuarmi sumi tamaani nunani tupaallannartumik amerlasuuni pisarput. Guutimik mitallersut annoraarsuallit taakku Babylonip Angisuup ilaa arnatut atortittartutut ittoq peqatigalugu siaruartersimasaminnik katersuillarumaarput. — sarĸúmersitat 17:1, 2, 15-18; 19:1-3.

13. Jehovap ajunngissutsi ilisimaneqaleqqullugu pissutsit suut ersersittarpai?

¹³ Davidip qinnutaa tamatumannga nuannerneroqisumik ima nangippoq: „Kisianni [Jehova], illit Guutiuvutit naakkinnittuullunilu saammaasoq, kamajaatsoq, nallittuinermik  sallusuissummillu peqangaartoq.“ (Tussiaat 86:15) Guutitta pissusii pitsaalluinnartuupput. Oqaatsit taakkua Sinajip Qaqqaani Moses Jehovap naalannassusia takujumallugu qinummat pisimasumik eqqaasippaatigut. Taamani Jehova ima akisimavoq: „Naalannassusera tamaat kiinnavit saagut sarsutitissavara, ateralu [Jehova] illit saanni nalunaarutigiumaarpara.“ Imali Moses mianersoqquaa: „Kiinarali takussanngilat, uannik takunnittoq inuuginnarsinnaanngimmat.“ Taava Jehova nuiami saqqummerpoq oqarlunilu: „Uanga tassa [Jehova], Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu.“ (2 Moses 33:18-20; 34:5, 6) Oqaatsit taakku Davidip qinnummini issuarpai. Jehovap pissusii tamakku taassuma takunissaaninngarnit uagutsinnut pingaaruteqarnerujussuupput. Jehovap ajunngissusia pissutsitigut kajungernartutigut tamakkunuunatigut nammineq misigisarput pingaartinnginnerparput?

’Isumalluarnartumik nalunaaqutiliorfiginnga’

14, 15. Jehovap kiffani qanoq ililluni ’isumalluarnartumik nalunaaqutissittarpai’?

¹⁴ Davidip Jehovap pilluaqqusinissaa ilungersorluni qinnutigeqqippaa oqarluni: „Saaffiginnga saammaallungalu, kiffat nakussatsiguk, kiffavit arnap ernera annaaguk. Piumaartussamik isumalluarnartumik siulittuiffiginnga [imaluunniit: nalunaaqutiliorfiginnga], tamanna uanga akeqqannut takoqqullugu kanngutsisitaaqqullugillu. Illit [Jehova] annaatissavarma tuppallersarlungalu.“ (Tussiaat 86:16, 17) Davidip miserratiginngilaa ’Jehovap kiffaata arnap erneratut’ Jehovap pigimmani. Aamma uagut ullumikkut Jehovamut tunniulluinnarsimasugut tamatta taassuma pigaatigut. Jehovap pissaanera annaassissutaasoq anersaavatigut illernartukkut pisariaqartipparput. Taamaattumik Guuti qinnuigisarparput ’isumalluarnartumik nalunaaqutiliorfigeqqulluta’. Jehovap ajunngissusia pissutsinut pitsaasunut eqqartoriikkatsinnut ilaavoq. Taamaattumik sunik Jehovap nalunaaqutiliorfigissagaatigut naatsorsuutigisinnaavarput?

¹⁵ Jehova ’tunissutit tamarmik ajunngitsut tunniussallu tamarmik naammalluartut’ pilerfigaat, Jesusillu neriorsoqqissaarpaatigut Jehovap ’imminit qinusut anersaamik illernartumik tunissagai’. (Jâko 1:17; Lúkarse 11:13) Anersaaq illernartoq Jehovap tunissutaasa erlinnanagaartut ilagaat. Allaat malersorneqarnitsinni Jehovap anersaani ikiortigalugu nuannaartissinnaavaatigut. Taamaattumik Jesusip apustilii eqqartuussisunut sassartinneqaramik  nuannaarlutik nalunaarsinnaasimapput Guutip naalakkamisut isigaluni imminut naalattut anersaamik illernartumik tunisarai. (apustilit suliait 5:27-32) Anersaap illernartup nuannaartitsinerata ’isumalluarnartumik nalunaaqutississimavai’.

16, 17. (a) Paulus Barnabasilu Jehovap ajunngissutsiminik qanoq nalunaaqutississimavai? (b) Thessalonikamiut malersugaasut qanoq nalunaaqutissinneqarpat?

¹⁶ Aasiaaqqami ajoqersuiartortitatut angalanerminni Paulus Barnabasilu misilinneqarnernik nalaataqartarsimapput, allaat sakkortuumik malersorneqartarlutik. Antiochiami Pisidiamiittumi oqaluussimmata tusarliussaat juutit tusaajumanngilaat. Taamaattumik inuiannut allanut oqaluussisalerput. Qanoq kingunilimmik? ’Guutimik nalusut tamanna tusaramikku tipaatsulerput. Jehovallu oqaasia unnersiutigaat, inuunermillu naassaanngitsumik pissaqaqqusaasut tamarmik upperlutik.’ (apustilit suliait 13:48) Juutilli perulluliortitsilerput ajoqersuiartortitallu nunamit anisinneqarput. Anisinneqaramik nikallorpat? Naamerluinnaq, ’ajoqersukkammi anersaamik illernartumik ilumioqangaalerput’. (apustilit suliait 13:48, 52) Taamaalilluni Jehovap isumalluarnartumik, ajunngissutsiminik, nalunaaqutissippai.

¹⁷ Kingorna Thessalonikami ilagiit pilersitaaqqammersut malersugaalerput. Tamanna pissutigalugu apustili Paulusip allaffigai tuppallersarlugit annikilliornerminnilu nikallujuissusiannik nersorlugit. ’Oqaaseq anersaakkut illernartukkut tipaatsullutik ilassivaat.’ (1 Tásalûníkamiut 1:6) ’Anersaap illernartup tipaatsutsitsinerata’ nakussatsippai, tamannalu Guutimit, naakkinnittumit, saammaasumit, kamakkumaarnertullunilu sallusuitsumit, ersarissumik nalunaaqutaavoq.

18. Qatanngutivut Europap kangianiittut qanoq ilillutik Jehovap ajunngissusianik pingaartitsinerminnik ersersitsisimappat?

¹⁸ Nalitsinni Jehovap qatanngutivut aalajaatsut Europap kangianiittut ajunngissutsiminik ersersitsivisarsimavai, malersortaat uumissuisut kanngutsisillugit. Naak qatanngutit taakku ukiorpassuarni naqisimaneqareernerminnit qanittukkut aniguisitaagaluarlutik suli nikallujuisaartariaqarput, aningaasatigut annertuumik ajornartorsiuteqaramik. ’Anersaalli illernartup tipaatsutsisup’ tuppallersartarpai. Kiffaanngissuseqarnerulersitaanertik suli annerusumik nalunaajaanermut atoramikku nuannaarneq annerpaaq misigisarpaat. Ataatsimeersuarnernut peqataasartut kuisittullu amerlassusiisigut takuneqarsinnaavoq amerlasuunit tusarnaarneqartartut. — Naleqqiuguk ap. sul. 9:31; 13:48.

19. Oqaatsit Tussiaat 86:11-miittut qanoq ililluta pigiliussinnaavavut?

¹⁹ Ilanngutassiami matumani siulianilu eqqartukkatta Davidip ilungersortumik qinnutaa manna uppernarsarpaa: „Ajoqersunnga [Jehova] aqqutigeqqusannik, . . . Uummatiga saatsiguk ataasiinnarmut matumunnga: Aterpit mianerineqarnissaanut.“ (Tussiaat 86:11) Oqaatsit taakku 1993-imut allassimaffiusussat pigiliunniartigik, uummammik tamakkiisumik Naalagaaffiup soqutigisaanik sulissuteqarluta Guutittalu, Naalakkap kisimi oqartussaasup Jehovap, ajunngissusianik nunguttussaanngitsumik pingaartitsinerput ersersillugu.

[Quppernerup ataani ilanngussat]

Apeqqutit uteqqiissutissat

□ Qinugaangatta: „Ajoqersunnga Jehova“ suna ersersittarparput?

□ Uummatitta Jehovap aqqata mianerineqarnissaanuinnaq sammisuunissaa qanoq paasisariaqarpa?

□ Jehovap aalajaatsut qanoq ililluni ilumoortumik tunniusimanerminik ersersissitsivigissavai?

□ Jehovap qanoq ililluni ’isumalluarnartumik nalunaaqutissittarpaatigut’?

[Atuaqqissaarnermi apeqqutit]

[Qupp. 17-mi ungalusaq]

1993-imut allassimaffik: „Ajoqersunnga [Jehova] aqqutigeqqusannik, . . . Uummatiga saatsiguk ataasiinnarmut matumunnga: Aterpit mianerineqarnissaanut.“ — Tussiaat 86:11.

[Qupp. 16-mi assiliartaq]

Sallusuissummi iluartumik saqisunut Jehova qaarsuuvoq pallittaalisaallunilu

[Qupp. 19-mi assiliartaq]

Jehovap Nalunaajaasuisa Skt. Petersborgimi Ruslandimiittumi junimi ataatsimeersuarneranni nunanit tamalaaneersunit peqataaffigineqartumi 46.214-it najuupput 3256-illu kuisillutik. ’Anersaami illernartumik tipaatsullutik’ Jehovap ajunngissusianik iluaqutiginnittut taakku takullugit nuanneqaaq.