Naalagaaffimmik oqaluussissutiginninnermit nutaarsiassat

Inooriaasertik allanngortissimavaat

QULARNANNGITSUMIK takusimavatit aqqusinerni allanut oqalutsillugit, illumiit illumut angalaartillugit imaluunniit ataatsimiittarfimminni kristumiutut ataatsimiitsillugit. Tassaapput Jehovap nalunaajaasui inuusuttut peqqissaartut. Immaqa isumaqarputit taakku nalunaajaasuusut angajoqqaamik taama ajoqersorsimammatik, aammami ilarpassui taamaapput. Kisianni inuusuttut taakkua ilaat allaanerulluinnartumik tunuliaqutaqarput, maannakkut inooriaatsiminnit allaanerulluinnartumik inooriaaseqarsimallutik. Tassami, quppernermi tulliuttumi assilissami takusinnaasatit siornatigut pinerluttuliortartut ikiaroornartumillu atornerluisartut ilagisarsimavaat. Sooq inuunertik allanngortissimavaat? Norgemi illoqarfiit ilaat ’tikeraarfigeriartigu’ inuusuttut taakku allanngorsimasut ilaat naapinniarlugit.

Allanngornissap tunngavia

Nalunaajaasut illumiit illumut oqaluussitillutik naapissimavaat Annette 19-inik ukiulik. „Qasseeriarlunga oqarfigineqarsimavunga nalunaajaasut oqaloqatigeqqunagit, alapernaakkamali iseqquakka,“ taama oqaluttuarpoq. 11-nik ukioqarnerminit ikiaroornartunik atuisarsimavoq qasseeriarlunilu biilinik allanillu tillinniarnermi peqataasimalluni.

Naalagaaffik pillugu tussagassap killippaa. Ingammik makinnissamik neriuut qiimmaallaatigeqaa tallimanik ukioqarluni anaanani annaasimagamiuk. Akeqanngitsumik Biibilimik atuaqqissaaqateqarnissani akueraa rigssalimilu ataatsimiinnernut najuuttalerluni. Peeqqani allallu ilinniarsimasani pillugit oqaluttuuppai. Qanoq qisuariarpat? Soqutiginninngivillutik Annette sunnerniapilunneqarniarnerarpaat. Taamaattorli assortuisut taakkua ilaasa kingorna nammineq Biibili atuaqqissaartalerpaat.

Assersuutigeriartigu Espen, inuusuttoq 20-nik ukiulik. Annettep peeraata Naalagaaffimmik tusagassamik oqaluttuummani ingerlaannaq Biibilimik  atuaqqissaaqateqarusulersimavoq. Kisianni ikiaroornartunik anngiorluni niuernermut peqataasimagami Annettetullu tillinniaqataasimagami qaammatini sisamani parnaarussaanissani utaqqivaa. Tupa, marihuana ikiaroornartullu allat atortarpai. Sooq inuup tamatuminnga tunuliaqutallip Biibili atuaqqissaarusulissavaa? Espenip paasilerpaa inooriaatsini imaqanngitsuusoq siunertaqaranilu. Ima oqaluttuarpoq: „Biibilip siunissaq inuunissarlu uannut siunertaqarluartut pillugit neriorsuutaasa killippaannga. Taamaattumik atuaqqissaalerpunga paasiniarlugu sallusuissummik oqaluttuunneqarnersunga.“

Allat Biibilimik atuaqqissaarusulerput

Tamatuma nalaani angutip inuusuttup taakkua ilisarisimasaata tusagassaq nuannersoq tusarpaa, aamma atuaqqissaartalerluni ataatsimiinnernut najuuttalerpoq. Kinguninnguagut angut inuusuttoq alla aamma ikinngutini ilagalugit Biibilimik atuaqqissaartalerpoq anersaakkullu siumukalerluni. Taava inuusuttup allap ilagisartakkami pitsaasumik allanngornerat tupigusuutigalugu erniinnaq Biibili atuaqqissaarusulerpaa.

Taakkua ilagisartagaasa ilaat, Gilbert, nipilersortartoq inuusuttoq, maannakkut Biibilimik atuaqqissaartalerpoq. Angajoqqaavi tamarmik kræftimik toqusimapput, Biibilimilu makinnissamik neriuut tuppalliutigaa. (Juánase 5:28, 29) Taanna aamma ikiaroortarluni inuunerluttuuvoq, rockimik nipilersortartutut tusaamasanngornissani kissaatigalugu. Piffissalli ingerlanerani anersaakkut siumukarluarpoq erniinnarlu Jehovamut nalunaajaasunngussalluni aalajangerpoq. Kiisalu Espenip nukaata Biibili misissulerpaa nalunaajaasut ilagisalerlugit.

Sallusuissutip Biibilimeersup inooriaatsit allanngortippai

Inuusuttut taakku pikataasimagaluartut, nujappittuusimagaluartut, ikiaroornartunik atornerluisuusimagaluartut pinerluttuliortuusimagaluartullu ilumut allanngorsimaqaat. Annette Naalagaaffimmik oqaluussisartuuvoq maannalu ukioq ataaseq pioneritut kiffartuussisimalluni. Espen Gilbertilu ikiorti-pioneritut kiffartuussisimapput ilagiinnilu kiffartortuullutik. Tamarmik nalunaajaasunik aappaqarput. Inuusuttut taakkua kammalaataasa ilaat sisamat allat aamma Naalagaaffimmik oqaluussisartunngorsimapput ilungersortut!

Taavami Espenip qaammatini sisamani parnaarussaanissaa? Inuunerminik allanngortitsilluinnarsimanera pissutigalugu pillaat tamanna allanngortinneqarpoq nalunaaquttap-akunnerini 80-ini inuiaqatigiinnut kiffartuussinissaanik. Politiit oqartussallu allat isumaqatigiissuteqarfigalugit piffissaq tamanna atorsimavaa Jehovap nalunaajaasuisa ataatsimiittarfianni assigiinngitsut suliaralugit. Politiit aaqqissuussineq tamanna naammagisimaqaat.

Aap, nunarsuaq tamakkerlugu inuusuttut allat amerlasuut pinerluttuliortarsimapput. Guutilli oqaasiata apeqqutinut tunngaviusunut akissutissaqalersissimavai siunissamullu piviusumik neriuutissaqalersissimallugit. Taamaattumik pinerluttuliortarunnaarlutillu ikiaroornartunik atornerluiunnaarlutillu pikataajunnaarsimapput. Inooriaasertik allanngortissimagamikku inuusuttutut qulaani eqqartorneqartutut ilerput — atisarissaarlutik sulilluarlutik Jehovamut nalunaajaasuullutik. Inuusuttut amerlasuut ullumikkut ajornartorsiutaannut aaqqiissutissamik piviusumik Biibilimeersumik inuit allat paasitikkusuppaat. — Takuuk 1 Korintumiut 6:9-11. (wD 1/2 93)

[Qupp. 31-mi assiliartaq]

Espen, Annette, aamma Gilbert