Itsarsuarli ajunngitsup ajortullu akornanni akiuunneq

FILMINI nutaanngitsuni „sapiitsup“ pissaanerit ajortut tamatigut ajugaaffigisarpai. Inuunermili piviusumi inernera tamatigut taamaanneq ajorpoq. Inuunermi piviusumi ajussuseq ajugaagajuttarpoq.

Nutaarsiassat ajussutsimik ulikkaartarput. USA-p avannaani angutip Milwaukeemiup inuit 11-it toqqussimavai timaallu aggorlugit qerititsivimmini toqqorlugit. USA-p kujataani Texasimi takornartaq biilerluni cafeteriamut aporujussuarsimavoq minuttinilu qulini eqqaminiittut tamaasa eqqarfigalugit. Inuit 22-it toqoreeramigit imminorpoq. Koreami Jehovap nalunaajaasuinik assortuisup ataatsimiittarfiat ikuallatsippaa, taamaalilluni nalunaajaasut 14-it toqullugit.

Iliuutsitigut nalinginnaanngitsutigut tamakkutiguinnaanngitsoq ajussuseq ersertarpoq — soorlu inuiannik toqoraanikkut. Naatsorsuutigineqarsimavoq ukiuni hundredelinni makkunani Armeniamiut 1 millionit, juutit 6 millionit aamma Campucheamiut 1 millionit sinnerlugit ammip qalipaataa naalakkersuinerlu pillugit nungutitaasimasut. Jugoslaviaasimasumi inuppassuit nagguitsik pillugu nungusarneqarsimapput. Naluarput nunarsuaq tamakkerlugu inuit pisuunngitsut millionillit qassit naakkittaatsumik anniartitaasimasut.

Tataannartut tamakku nuanniitsumik aperisariaqalersittarpaatigut: Sooq inuit taamaaliortarpat? Oqaannarsinnaanngilagut niaqulaartut  kisimik taamaaliortartut. Ukiuni hundredelinni makkunanni inuuffigisatsinni annertuumik ajortuliortoqarsimanerata takutippaa nassuiaaneq tamanna eqqunngitsoq.

Ajortuliorneq tassaavoq ileqqussatigut eqqunngitsuliorneq. Taamaaliortoq ajunngitsuliorniarluni ajortuliorniarluniluunniit qinersisinnaavoq. Naliliisinnaassutsili arlaatigut ajoquserneqarsimammat ajortuliornissani qinerpaa. Kisianni sooq aamma qanoq ililluni taama pisoqartarpa?

Ajussutsimik upperisarsiornikkut nassuiaanerit amerlanertigut naammattanngillat. Filosoffi katuuliusoq Thomas Aquinas oqarsimavoq „Guutip ajussuseq akuerisimanngitsuuppagu ajunngitsorpassuit aamma piusimassanngikkaluartut“. Filosoffit naaggaartut amerlasuut aamma taama isumaqarsimapput. Assersuutigalugu, Encyclopædia Britannica-mi allassimavoq Gottfried Leibnitz isumaqarsimasoq ajussuseq „tassarpiaasoq silarsuarmi ajunngitsumik pilersitsisoq, taamaalilluni akerlerisaminit malunnarnerulersinneqartoq“. Allatut oqaatigissagaanni taanna isumaqarpoq ajussuseq pisariaqartikkipput ajunngitsut pingaartissinnaassagutsigik. Assigaa kræftimik nappaatilik oqarfigigutsigu nappaataa pisariaqartoq inuit allat peqqissutsiminnik nuannaarutigisinnaassappata.

Ajortumik ilioriartarnerit arlaannit siunertaqartumit pinngitsooratik pilerfeqarsimassapput. Toqqaannanngikkaluamik Guutimeersuunerpat? Biibili ima akivoq: ’Usserneqarsimasumik oqartoqarnaveerli ima: „Guutimit usserneqarpunga; Guutimi ajortumut ussertinnavianngilaq, namminerlu kinaluunniit ussertanngilaa. Kinaluunniilli usserneqararaaq, nammineq piummatsiminit qiisagaangami uerillunilu, taavalu piummasia pilereeraangat ajorti pinngoraraaq; ajortilu naammatsittaraangami toqumik kingunissisaraaq.’ (Jâko 1:13-15) Taamaattumik kissaat ajortoq ajattorneqarani ineriartortinneqaraangat ajortuliaq pinngortarpoq. Aammali allamik pissuteqarpoq.

Biibilimi nassuiarneqarpoq pilerissutsit takkuttartut inuiaat tunngaviusumik ajoquteqarmata — tassa ajortimik kingornussamik. Apustili Paulus ima allassimavoq: ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Ajorti kingornussaq pissutigalugu eqqarsaatitsinni namminissarsiorneq inussiarnissutsimit malunnarnerusinnaavoq, naakkittaassutsillu misiginneqataaneq inangersinnaallugu.

Soorunami inuit amerlanersaasa immineerlutik nalunngilaat iliuutsit aalajangersimasut eqqunngitsuusut. Nalunngeqatiginnissusiata — imaluunniit ’inatsisit uummataanni allassimasut’ Paulusip eqqartorsimasaasa — eqqunngitsuliornissaannut nangartartarpaat. (Rûmamiut 2:15) Taamaattoq avatangiisit naakkittaatsut misigissutsit taamaattut nigortissinnaavaat, nalunngeqatiginnissuserlu sumiginnarneqaqattaaruni misigissuseeruttarpoq. * — 1 Timûtiuse 4:2.

Inuiaat naammalluinnanngissusiat ullutsinni ajussutsip atugaangaarneranut pissutituaasinnaanerpa? Oqaluttuarisaanermik ilisimatooq Jeffrey Burton Russell ima nassuiaavoq: „Ilumoorpoq tamatta ajortunik ilumiugisaqartugut, kisianni Auschwitzimi pisimasut nassuiassagaanni allaat inuppassuit ajussusiata katinnerat naammanngilaq. . . . Ajussuseq taama sualutsigisoq allarluinnaavoq.“ Jesus Kristusip nammineq ajussutsimut allarluinnarmut tamatumunnga pissutaasoq ersersissimavaa.

 Toqunermi kinguninnguani Jesusip nassuiarsimavaa angutit imminik toqutsiniartut nammineq piumassusertik kisiat atornagu iliuuseqartartut. Pissaanerup takussaanngitsup siulersorsimavai. Jesusip ima oqarfigai: ’Ataataq nagguigisarsi tassa Diaavulu ataatassilu pilerigisai suliariniarpasi. Taanna pileqqaarnerminit inunnik toqutsisuuvoq, sallusuissullu aalajangiutinngilaa ilumigut sallusuissuteqannginnami.’ (Juánase 8:44) Diaavulu, Jesusimit ’silap matuma naalagaa’-nik taaneqartoq, ajussutsimik pisooqataasorujussuuvoq. — Juánase 16:11; 1 Juánase 5:19.

Ukiuni tuusintilikkuutaani inuiaat naammalluinnanngissusiat aamma Satanip sunniinera tamarmik naalliunnartunut pissutaasarsimapput. Sualukkunnaariartornissaannullu takussutissaqanngilaq. Ajussuseq atajuassava? Imaluunniit pissaanerit ajunngitsut qaquguluunniit ajussuseq nungutikkumaarnerpaat? (wD 1/2 93)

[Quppernerup ataani ilanngussaq]

[Suminngaanneernera]

Assiliaq: US Army