Nangaaneq toqussutaasinnaavoq!

ILAQUTARIIT pingasut, inersimasut arfineq-marluk meeqqallu arfinillit, qimaarsuataarput. Qularnanngitsumik ujaqqanit nakkaasunit qimaallutik illumi annaffissarsiorput. Ujaqqalli nakkaasut nipiliornersuat milliartortillugu siooranartoq alla takkuppoq — arsanik nuiaq qernertoq ipianngunartoq. Maanna qimaasariaqalerput.

Siulliulluni angut, immaqa kiffaasoq, pooqattamik pisariaqarnerpaanik imalimmik nammalluni arpappoq. Nukappiaqqat marluk, ataaseq sisamanik ukiulik aappaalu tallimanik ukiulik, tasiorlutik malinnipput. Sinnerisalu malippaat — annilaangaaqalutik, tamaviaaqalutik neriuutaarutilersutullu qimaallutik. Anersaartorniaraluarput, silaannarmilli pinnatik arsat isugutasut najuussorpaat. Ataasiakkaarlutik taakku 13-iusut tamarmik aqullaajorarput arsanillu nakkaasunit matoorunneqarlutik. Inuit taakku timaasa sinnikunnguakkului ukiuni 2000-ingajanni matoorussaaqqasimapput, taava itsarnisarsiuunit nassaarineqarput toqulernerannilu pisimasut alianartut paasineqarlutik.

Taakku 13-it illoqarfiusimasumi Pompejimi Italiamiittumi ukioq 79 u.n.k. augustip ulluisa 24-anni inuit ajunaarsimasut 16.000-it missaanniittut ilaannaraat. Amerlasuulli annassimapput Vesuvip siullermeerluni anitsinerani illoqarfimmit qimaasimagamik. Nangaasulli — ingammik inuit pigissaartut angerlarsimaffimminnit pigisaminnillu aallarumanngitsut — ujaqqanik arsanillu 6 meterinik issutigisunit matoorunneqarput.

Naak Pompejimi pisimasut tamakku ukiut 2000-ingajaat matuma siornagulli pisimagaluartut taamaattoq pissutsinut ullumikkut inuiaat atugaannut allaqaqisutigut assingussuteqarput. Nunarsuaq tamakkerlugu nalunaaqutip qaqqap Vesuvip anitsisimaneranit aarlerinarneroqisup maanna mianersoqquaatigut silarsuup matuma aaqqissuussaanerata aserornissaanik nalliulluinnalersumik. Aniguissagutta ingerlaannaq iliuuseqartariaqarpugut. Nangaaneq inuunermik ulorianartorsiortitsineruvoq. Nalunaaqut tamanna sunaanersoq aamma qanoq ililluta silatuumik qisuariarfigisinnaagipput ilanngutassiami tulliuttumi sammissavavut. (wD 1/3 93)

[Suminngaanneernera]

Soprintendenza Archeologica di Pompei