’Nuliariinneq tamani kanngunaakkili’

’Nuliariinneq tamani kanngunaakkili, nuliariillu innarfiat minguikkili.’ — EPRÎARIT 13:4.

1. Aappariinnermi pilluarneq eqqarsaatigalugu ilaat qanoq misigisaqarsimappat?

ALLAAT ukiuni aappariit avikulaffigisaanni makkunani inoqarpoq millionilippassuarnik aappariinnerminnik nuannaarutiginnittunik. Naak inuttut pissutsitik tunuliaqutatillu assigiinngikkaluartut aappriinnerminni iluatsittumik ingerlanissamut najoqqutassaminnik nassaarsimapput. Aappariinnerit taamaattut Jehovap nalunaajaasuisa akornanni nassaassaapput. Aappariit tamakku amerlanersaasa nassuerutigiumassavaat oqitsunik oqimaatsunillu atugaqartarsimallutik, aapparmillu kukkuneri sanngiissutaalu takusinnaallugit. Taamaattorli ajornartorsiutit minnerusut atornissaat aappariinnermillu ’narlumuinnaq’ aqunnissaat ilikkarsimavaat. Suut iluaqutigalugit ’ikkarluit’ aappariinnermi nalaatassat anigortarsimavaat? — Kulorsamiut 3:13.

2. (a) Pissutsit pitsaasut suut aappariinnerup ataannartinneqarnissaanut peqataasarpat? (b) Pissutsit suut aappariinnermik ajortunngortitsisarpat? (Qupp. 14-imi ilanngussaq takuuk.)

² Kristumiut pilluarnartumik imaqarluartumillu aappariissimasut oqaaseqaataat matuma kingulianiittut tamatuminnga qulaarinnilluarput. Angut ukiuni 16-ini uiusimasoq oqarpoq: „Ajornartorsiummik takkuttoqaraangat tamatigut sapinngisatsinnik aappatta isumaa tusarnaartarparput.“ Tassa aappariippassuit ataavartarnerannut pissutaasoq pingaartoq tassa ammasumik unneqqareqatigiiffiusumillu oqaloqatigiittarneq. Arnaq ukiuni 31-ni nuliaasimasoq oqarpoq: „Akunnitsinni kissalaarfigeqatigiinneq atatiinnarniarlugu tasiortarneq nuannersunillu sammisaqaqatigiittarneq salliutittuaannarsimavavut.“ Tamannalu attaveqatigiinnermut pitsanngorsaasunut ilaavoq. Aappariit allat ukiuni 40-ngajanni aappariissimasut quiasaarsinnaanerup, imminut illaatigisinnaanerup aappallu illaatigisinnaanerata attatiinnarnissaata pingaaruteqassusiat erseqqissarpaat. Aammalu oqaatigaat taamaaliortarnermikkut aappap pitsaasortai ajortortaalu takusinnaasarlugit taamaattorli tunniusimasumik asanninnermillu ersersitsivigisinnaasarlugu. Kukkuluttornermik nassuerutiginnissinnaanerup utoqqatsersinnaanerullu pingaaruteqassusiat uiusup ataatsip eqqaavaa. Akuersiinnarumassuseqartaraanni aappariineq aserornani ingerlaannassaaq. — Filípimiut 2:1-4; 4:5, Kingdom Interlinear.

Isumap allanngornera

3, 4. Aappariinnermi ilumoorfigeqatigiinnermut isuma qanoq allanngorsimava? Assersuusiorit.

³ Ukiut qulikkaat marlussuit ingerlaneranni aappariinnermi ilumoorfigineqatigiinnissaq pillugu silarsuarmi tamarmi isuma allanngorsimavoq. Inuit katissimasut ilaat isumaqarput aapparinngisamik sammisaqarneq kukkusuunngitsoq, tassa allasiornermik akuersiinnarneq muteerniusoq, ingammik aappaasup nalunngippagu akuerippagulu.

 ⁴ Kristumiu nakkutilliisoq ima oqarsimavoq: „Silarsuarmi ileqqussatigut najoqqutassat ilumoorsaarnerusut malillugit inooriaaseq iluamik oqaatigalugu taamaatilluinnarneqarsimavoq. Inooriaaseq minguitsoq qanganisarpaluttutut isigineqalersimavoq.“ Politikerit, timersortartut isiginnaartitsisartullu nuimasut Biibilimi ileqqoreqqusaasunik isertuanngivillutik unioqqutitsisarput, taamaakkaluartorli nuannaartorisaajuarlutik. Iluamimmi oqaatigalugu ileqqussatigut eqqunngitsuliortutut kanngunartuliortutullu naqissusiisoqartarunnaarpoq. Minguissuseq assuarnaassuserlu inuit nuimasut akornanni pingaartinneqarpallaanngillat. Taamaattumik ’allat taamaaliorsinnaappata aamma uanga taamaaliorsinnaavunga’ najoqqutaralugu inuit amerlanerit iliuusii malinneqartarput, Guutillu peqqussutai sumiginnarneqarlutik. Paulusip oqarsimaneratut ippoq: ’Taakku sianigisaarullutik kanngunartuliornermut tunniupput nalinginnarnik piumatuunerminni mingunnartuliorumallutik.’ — Evfisumiut 4:19; Ussatit 17:15; Rûmamiut 1:24-28; 1 Korintumiut 5:11.

5. (a) Allasiorneq Guutip qanoq isigaa? (b) Oqaaseq Biibilimi atorneqartoq ’uersaavoq’ qanoq isumaqarpa?

⁵ Guutilli najoqqutassiai allanngorsimanngillat. Katissimanani inooqatigiinneq kanngunartuliornertut isigaa. Aappriinnermi ilumoorfigeqatigiinnginneq allasiornerujuassaaq. * Apustili Paulus ersarissumik ima oqarsimavoq: ’Naluisiluunniit iluaatsut Guutip naalagaaffia kingornussarissanngikkaat? Tammaqinasi: Uersaasulluunniit Guutipilussiortulluunniit arnaanillilluunniit mumingasumilluunniit kanngunartuliorfigitittut kanngunartuliorfiginnittulluunniit tillittulluunniit piumatuulluunniit imerajuttulluunniit oqarnittulluunniit arsaarisulluunniit Guutip naalagaaffia kingornussarissanngilaat. Taamaattunillu ilaqarsimagaluarpusi; uffarsimavusili iluartitaallusilu iluartuutitaallusilu Naalakkap Jesus Kristusip aqqagut Guutittalu anersaavagut.’ — 1 Korintumiut 6:9-11.

6. Korintumiunut agdlagkat sujugdlît 6:9-11-mi Paulusip oqaasiini suna qiimmaallannarpa?

⁶ Tassani qiimmaallannartoq tassa Paulusip oqarnera, ’taamaattunillu ilaqarsimagaluarpusi, uffarsimavusili’. Aap, silarsuarmi ’maajunnartuliortut’ akornanni inuusimagaluarlutik silatuumik ingerlalersimasut Kristus taassumalu pilliutaa ilassisimavaat minguiarsimallutillu. Guutip ileqqussatigut najoqqutassiaanik maleruaalernermikkut taassuma iluarisaanik inuulernissartik qinersimavaat tamatumalu kingunerisaanik pilluarlutik inuulersimallutik — 1 Pîtruse 4:3, 4.

7. „Kanngunartuliorneq“ silarsuarmi qanoq paasineqartarpa, Biibilimilu qanoq oqaatigineqarpa?

⁷ Silarsuarmili muteerniusumi kanngunartuliornermut paasinnittaaseq ima kimikillisimatigaaq Guutip isumaanit allaanerulluinnalersimalluni. Oqaatsinik ujarlerfissiami „kanngunartuliorneq“ tassaanerarneqarpoq „ileqqussatigut najoqqutassatut akuerisaasut akerliat“. Ullumikkut „ileqqussatigut najoqqutassiat akuerisaasut“ naapertussagaanni suli katinnani atoqatigiinneq, allasiorneq kiisalu anguteqammik arnaqammilluunniit atoqateqarneq akuersugaapput, massa Biibilimi kanngunartuliornertut assuarineqaraluartut. Aap, kanngunartuliorneq Biibilip tungaanit isigalugu Guutip ileqqussatigut najoqqutassiaanik unioqqutitserujussuarneruvoq.  — 2 Moses 20:14, 17; 1 Korintumiut 6:18.

Ilagiinni kristumiuni

8. Ilagiinnut kristumiunut ilaasortaasut ilaat qanoq ilillutik kanngunartuliornermut nakkarsinnaappat?

⁸ Ullumikkut kanngunartuliorneq ima nalinginnaatigaaq allaat ilagiit kristumiut ilaannik sunniisinnaasarluni. Tv-kkut isiginnaagassiat kusanaatsut, videokkut isiginnaagassiat atuagassiallu kanngunartunik imallit aqqutigalugit sunniisinnaavoq. Naak Jehovamut nalunaajaasut ikittuinnaat anisitaasaraluartut eqqaamasariaqarparput taakkunani amerlanerpaat kinguaassiuutitigut kanngunartuliorneq pissutigalugu anisitaasarmata. Qujanartumik anisitaasut ilarpassuisa kingorna kukkunertik nassuerutigisarpaat, minguitsumik inuuleqqillutik, piffissallu ingerlanerani ilagiinnut ilanngutiteqqinneqarlutik. — Naleqqiuguk Lúkarse 15:11-32.

9. Mianersunngitsut Satanip qanoq pisarpai?

⁹ Nalunanngilluinnarpoq Satan liivitut uiannisaartutut kristumiunik mianersunngitsunik iisassarsiortuaannartoq. Qoqassiiniarnerinit ukiut tamaasa kristumiut mianersunngitsut napitinneqartarput. Satanip silarsuaani namminissarsiussuseq, inuulluarniapilussuseq soqutigittaassuserlu malunnarnerpaapput. Timip kajungerisai pingaartinneqaqaat. Imminut naalakkersinnaaneq soqutigineqanngilaq. — Evfisumiut 2:1, 2; 6:11, 12; 1 Pîtruse 5:8.

10. Kikkut usserniarneqartarpat, aamma sooq?

¹⁰ Ilagiit iluanni kikkut kanngunartuliornissamik ussernartorsiortinneqarsinnaappat? Kristumiut amerlanerit, ilagiinni utoqqaanertaagaluarunik, nakkutilliisuugaluarunik angalasartut, Betelimi kiffartoraluarunik, pioneriugaluarunik qaammammut nalunaaquttap- akunnerini amerlasuuni oqaluussisartut, angajoqqaajugaluarunik ilaqutariinnik pilersuisut, imaluunniit inuusuttut ilagisartakkaminnit tatineqartut tamarmik ussernartorsiortinneqarsinnaapput. Kikkut tamarmik uinimmut pilerinartunit ussernartorsiortinneqarsinnaapput. Allaat sillimanngilluinnarfimmi kinguaassiuutitigut ussernartorsiortoqalersinnaavoq. Paulus ima allassimavoq: ’Tamanna pillugu kinaluunniit qeqartuusoq mianersorli orloqqunani. Allamik usserneqanngisaannarpusi kisianni inuit atortagaannik.’ — 1 Korintumiut 10:12, 13.

Ussernartorsiulersoorfiit

11-13. Suut kanngunartuliornermik kinguneqartarsimappat?

¹¹ Ussiiniutit pissutsillu suut pissutigalugit ilaat sianiilliorlutik kanngunartuliorlutillu allasiorsimappat? Assigiinngitsorpassuupput, nunamiillu nunamut aamma kulturimiit kulturimut allanngorarsinnaapput. Nunanili tamani arlalinnik assigiissuteqarpoq. Assersuutigalugu, nalunaarutigineqarsimavoq ilaat imigassartalimmik nuannannersuaqartitsisarsimasut. Allat nipilersukkanut pileritsannartunut tusarnaartarsimapput peqqusaarpaluttunillu qitittarsimallutik. Afrikap ilaani angutit silamiut uppinngitsut arlalinnik nuliaqartarput, imaluunniit panerfaqartarput. Arnat ilaat aningaasatigut toqqissinartumik inissisimalerusullutik panerfanngortarsimapput, naak tamanna kanngunartuliornerugaluartoq. Nunallu tamatuma ilaani kristumiut uiusut ilaasa ilaquttatik qimattarsimavaat piiaaffinni allaniluunniit suliniarlutik. Angerlarsimaffimminni sungiusimasaminnit sakkortunerungaartumik ilumuussusertik misilinneqartittarsimavaat.

¹² Nunat ilaanni ilaat Satanip nakkarfissiaanut nakkartarsimapput, tassa angut arnarlu kisimiittarsimallutik — soorlu biilernermut ilinniarnermi. * Aamma utoqqaanertat paarsisutut sulinerminni mianersortariaqarput qatanngut arnaq unnersuunniaraangamikku kisimeeqatigisarnagu. Tassami oqaloqatigiinneq misigissutsinut tunngavaallaasersoorsinnaavoq, taakkununnga tamanut peqqusiileqinarsilluni. — Naleqqiuguk Mákorse 6:7; apustilit suliait 15:40.

¹³ Pisut taamatut ittut kristumiut ilaasa mianersorunnaassutigisarsimavaat kanngunartuliornermik  kingunilimmik. Soorlu ukiuni hundredelinni siullerni pisimasoq ’namminneq piummatsiminnit usserneqarsimapput’, ajortuliornermik kingunilimmik. — Jâko 1:14, 15; 1 Korintumiut 5:1; Galâsiamiut 5:19-21.

14. Sooq oqarsinnaavugut allasiortoq namminissarsiortuusoq?

¹⁴ Anisitsinernik misissueqqissaarnikkut erserpoq pissutsit aalajangersimasut kanngunartuliornermut aallarniutaasarsimasut. Namminissarsiussuseq qanorluunniit ittumik akuusarpoq. Tassa qanoq? Aap, allasiornermi pisuunngitsut tamatigut eqqugaasarput. Soorlu aappaq katissimasaq. Meeraqarpata meeqqat eqqugaanerpaasarput. Allasiornermi avinnermik kinguneqarpat meeqqat — ilaqutariinni ataatsimoortuni toqqissisimallutik inoorusuttut — pilliutaanerpaasarput. Allasiortoq pingaarnerpaamik imminut eqqarsaatigisarpoq. Tassa namminissarsiussuseq. — Filípimiut 2:1-4.

15. Allasiornermut suna pissutaasinnaava?

¹⁵ Allasiorneq tassaagajunngilaq sanngiilleriataarneq. Tamanna sioqqullugu aappariinnerup iluani pissutsit ajorsiartuaarsimapput. Immaqa oqaloqatigiittarneq imaqarpiarunnaarsimavoq. Immaqa kajumissaaqatigiinneq amigaatigineqarpoq. Immaqa aappariit imminnut taamaattussaannartut isigilersimapput piffissamilu sivisungaatsiartumi kinguaassiuutitigut pisariaqartitaminnik aveqatigiissimanatik. Inuk allasiorsimappat ersertarpoq Guutimut attaveqarnera sanngiillisimasoq. Guuti piviusutut, eqqarsaatinik atuaasartutut iliuutsitsinnillu tamanik isiginnittutut isigiunnaarsimavaa. Allasiortup isumaani „Guuti“ oqaasiinnanngorsimavoq, ulluinnarni pingaaruteqanngitsoq. Taamaalisimagaanni Guutimut ajortuliornissaq ajornanngitsuararsuusarpoq. — Tussiaat 51:4, 5; 1 Korintumiut 7:3-5; Eprîarit 4:13; 11:27.

Qanoq akiuuttoqarsinnaasoq

16. Kristumiup allasiornissamik ussernartorsiornini qanoq ililluni akiorsinnaavaa?

¹⁶ Kristumiup ilumuunngitsuliornissaminut ussernartorsiortinneqaleruni suut eqqaamasariaqarpai? Siullerpaamik pingaarnerusumillu kristumiutut asanninneq Biibilip najoqqutassiaanik tunngaveqartoq eqqarsaatigisariaqarpoq. Timikkut ajuutiginninneq namminissarsiornermut nakkassutigisariaqanngilaq, taamaalillunilu inunnik allanik aliasuutissiissutigisariaqarnani. Pissutsilli Jehovap isaanit isiginiartariaqarput, ajortumik iliornerup ilagiinnik Jehovallu aqqanik mitannarsisitsinissaa eqqarsaatigalugit. (Tussiaat 101:3) Kristusip isumaanik pigiliussinikkut tamannalu malillugu iliuuseqarnikkut ajutoornissaq pinaveersaartariaqarpoq. Eqqaamassavat kristumiutut asanninneq namminissarsiunngitsoq pakatsisitsinngisaannarmat. — Ussatit 6:32, 33; Matîuse 22:37-40; 1 Korintumiut 13:5, 8.

17. Ilumoorfiginnissutsimik maligassat kajumissinartut suut taasinnaavavut?

¹⁷ Aalajaassinnaajumagaanni uppernerup aalajaatsuutinnissaa neriuutillu eqqarsaatigiuaannarnissaa pingaaruteqarpoq. Tamatumalu  nassatarissavaa angutit arnallu, ilaatigut Jesusip, assuarnaassutsiminnik attassiinnarsimanermikkut maligassiaannik sapinngisamik eqqaamanninniarsarinissaq. Paulus ima allassimavoq: ’Taamaammat, nalunaajaasut taama eqimatigisut avatangermatigut, uaguttaaq oqilaaqutaasut tamaasa ajortilu uatsinnik ninniortitseqqajaaginnartoq iperartigik, nikallujuerlutalu arpanniarta assoruunnitsinni uatsinnut siunertarititaasumi, uppernermillu aallarniisoq inerititsisorlu Jesus aarlorfigisigu; taassuma tipaatsuutissaq imminut saqqangiussaq pillugu ilalaarluni sanningasulik atorpaa, mitaatigineqarnini soqutiginagu, ingissimavorlu Guutip issiavissaarsuata talerpiata tungaanut. Taamaattumik eqqarsaatiginiarsiuk taanna, ajortuliortut taama atsigisumik assortormanni ilalaaginnartoq, qasuleqqunasi tarnissigullu nikalloqqunasi.’ (Eprîarit 12:1-3) Aappariinnerup kiviartortiinnarnissaanut taarsiullugu silatuup eqqarsaatigissavaa qanoq ililluni ’umiarsuup ajoquserneri’ iluarsaassinnaanerlugit umiarsuaq makittarissiseqqillugu, tassa aappani sumiginnarnaveersaarlugu salloqittarnaveersaarlugulu. — Job 24:15.

18. (a) Sooq allasiorneq salloqittaanermik taassallugu ingasappallaanngila? (b) Neriorsuinerit Guutip qanoq isigai?

¹⁸ Oqaaseq salloqittaaneq kanngunartuliornermut atussallugu sakkortuallaarpa? Naamik, salloqittaaneermi tassaavoq allap tatiginninneranik ilumoorfiginninneranillu killuussineq. Katinnermi neriorsuut tatiginninnermik tunngaviligaavoq neriorsuinerullunilu aappaq oqitsuni oqimaatsunilu, atoruminartuni atoruminaatsunilu asajumallugu ataqqiumallugulu. Taamaaliorneq ullumikkut itsangagilerneqarsimasumik — tassa uppernarsaanermik — qularnaveeqquserneqartarpoq. Tatiginninnermik tamatuminnga killuussineq tassaavoq aapparisamik killuussineq. Guutip neriorsuutinut isiginninnera Biibilimi ersarissumik oqaatigineqarpoq: „Neriorsuutit eqqortissavat, eqqortissinnaanngikkukkuli ajunnginnerussaaq neriorsuinngiinnaruit.“ — Nalunaajaasup oqaasii 5:4.

19. Sooq Jehovap nalunaajaasua nakkaraangat Satan nuannaartaqaa?

¹⁹ Soorlu ajortuliortup annaanneqarnera qilammi nuannaarutigineqartorujussuusarnera qularnanngilluinnartoq, taamatuttaaq Jehovap nalunaajaasuisa ilaat assuarnaassutsiminik iperaagaangat nunami Satanip malinnittaasa takussaasut takussaanngitsullu akornanni nuannaapilunneq angisaqaaq. — Lúkarse 15:7; sarĸúmersitat 12:12.

Tamanit ussernartorsiutaasartut

20. Ussernartorsiorneq qanoq akiorsinnaavarput? (2 Pîtruse 2:9, 10)

²⁰ Kanngunartuliornerup ingalannissaa ilaannikkut ajornarluinnartarpa? Uinngup pilerissusia Satanillu sunniinera ima ingasatsigippat kristumiut aalajaassinnaanatik assuarnaassutsiminnillu attassiinnarsinnaanatik? Paulus ima kajumissaarisimavoq: ’Guuti ilumoorpoq; taassuma artukkassinnik ussersinnavianngilaasi, kisianni aniguinissaq ussernartumut aappiullugu pinngortissavaa ilissinnut artornarunnaarsillugu.’ Ullumikkut silarsuarmi ussernartorsiortinneqanngitsuuissinnaangilagut, Guutimulli qinusarnitsigut ussernartorsiornivut akiorluarsinnaavavut aalajaassinnaallutalu. — 1 Korintumiut 10:13.

21. Apeqqutit suut ilanngutassiami tulliuttumi akineqassappat?

²¹ Guutip qanoq ililluni ussernartorsiornitsinnik akiuinissatsinnut ikiorsinnaavaatigut? Tamatta immikkut qanoq iliorsinnaavugut aappariinnerput, ilaqutariinnerput kiisalu Jehovap aqqa ilagiillu tusaamaneqarnerat sernissorumallugit? Apeqqutit tamakku ilanngutassiami tulliuttumi sammineqassapput. (wD 15/2 93)

[Quppernerup ataani ilanngussaq]

Eqqaamavigit?

□ Suut aappariinnerup nukittuunnguutigisarpai?

□ Sooq silarsuup ileqqussanut isiginnittaasia pigissanngilarput?

□ Ussernartut pissutsillu suut kanngunartuliornermik kinguneqarsinnaappat?

□ Ajortuliornaveersaarnisamut suna illersuutaava pitsaanerpaaq?

□ Ussernartorsiortinneqaraangatta Guutip qanoq ililluni ikiortarpaatigut?

[Atuaqqissaarnermi apeqqutit]

[Qupp. 10-mi ungalusaq]

PISSUTSIT PITSAASUT AAPPARIINNERMIK NUKITTUUNNGORTITSISARTUT

□ Biibilimi najoqqutassiat maleqqissaarneqarput

□ Aappariit marluullutik Jehovamut qanimut attaveqarput

□ Uiusup nuliani, misigissusii isumaalu ataqqivai

□ Ulluinnarni oqaloqatigiilluartarput

□ Imminnut nuannaarteqatigiinniartarput

□ Quiasaarsinnaassuseqarput, imminnullu illaatigisinnaassuseqarlutik

□ Kukkunitik ammasumik nassuerutigisarpaat; isumakkeerfigeriaannaasarput

□ Asannilersooqqaarnertik atatiinnarniarpaat

□ Meeqqanik perorsaanermi suleqatigiipput

□ Akuttunngitsumik Jehova Guutimut qinoqatigiittarput

PISSUTSIT PITSAANNGITSUT AAPPARIINNERMIK AJORSIARTORTITSISARTUT

□ Namminissarsiussuseq malartitassaanngissuserlu

□ Sammisaqaqatigiinngippallaarneq

□ Oqaloqatigiinngippallaarneq

□ Aappariit akornanni isumalioqatigiinngippallaarneq

□ Aningaasanik nakkutilliinerlunneq

□ Meeqqanik/meerassanik perorsaanikkut isumaqatigiinnginneq

□ Uiusup qaangiuttoortarnera imaluunniit iliuutsit allat sallinngortillugit ilaquttaminik sumiginnaanera

□ Ilaqutariit anersaakkut pisariaqartitaannik sumiginnaaneq

[Qupp. 11-mi assiliartaq]

Aappariinnermik kanngunaatsuutitsineq ataavartumik pillualersitsisarpoq