Jehovamut kiffartorninni nuannaarnera

OQALUTTUARTOQ: GEORGE BRUMLEY

Kaasari Haile Selassiep politiissatut ilinniartitai inuusuttut radioteknikimik ilinniartereerlugit atuarneq naasorlu ilinniartut ilaata kisimiitillunga ornippaanga. Oqaluttuuppaanga nalunagu Jehovap Nalunaajaasuinit ajoqersuiartortitaasunga, ilungersorpaluttumillu aperalunga: „Biibilimik atuaqqissaaqatigisinnaavinga?“

SULINERPUT taamani Etiopiami inerteqqutaavoq. Oqartussaasut kinaasunga paasigaluarunikku Jehovap nalunaajaasuinik allanik nunamit anisitsisareernermissut nunamit anisissagaluarpaannga. Taamaattumik eqqarsaatigissorujussuuara ilinniartoq ilumuuvilluni Biibilimik atuaqqissaarusunnersoq imaluunniit tassaaginnarnersoq naalakkersuisut pisariniarlunga aallartitaat. Ilaqutariinnik pingasunik mikisunik meerartalinnik pilersuisutut ernumatsattorujussuuvunga suliffiga annaassasoralugu nunamillu anisitaallunga ikinngutit nuannaringaalersimasakka qimattariaqalissasoralugit.

’Soormiuna,’ immaqa eqqarsarputit, ’ataataq Amerikamiu Afrikamut avannarlermut nunasisimasoq — nunaminit qanigisaminillu ungaseqisumut?’ Tamatumunnga nassuiaatiga atuariassagit.

USA-mi alliartornera

1920-kkunni suli atuartuusunga ataatama atuagassiaq Napasuliaq Alapernaarsuiffik pisartagarilerpaa atuakkallu Studier i Skrifterne pissarsiaralugit. Ataataga atuarumatoorsuuvoq atuagassiallu Biibililersaarutit tamakku tiguartiffigilluinnarlugit. Aammali quiasaarumatuujuvoq. Assersuutigalugu, atuagaateqarpoq amermik qalilimmik saqqaani tunuanilu kuultiusamik allassimasumik „Holy Bible“. Sapaatikkut qaaqqusisimagaangami ilaannut oqarsinnaasarpoq: „Ullumi sapaatiuvoq. Biibilimi versinik marlussunnik nipituumik atuarusussinnaavit?“

Pulaartoq tamatigut akuersisarpoq, atuagarli qupperaangamiuk paasisarpaa qupperneri tamavimmik allanneqanngitsut! Pulaartoq soorunami paatsuungasaqaaq. Taava ataataga oqartarpoq naalagiartitsisartut Biibilimut ilisimasaqanngilluinnartut, biibilimillu aalleriarluni Mosesimik allakkat siulliit 2:7 atualeraraa. Tassani inummik siullermik pinngortitsineq ima oqaatigineqarpoq: „Inuk tarninngorpoq uumasoq.“ — 1 Moses 2:7, (NV); King James-nutsigaq; takuuk Korintumiunut agdlagkat sujugdlît 15:45.

Ataatama nassuiartarpaa inuk tarneqanngitsoq, kisianni tarniusoq. Taavalu erseqqissartarpaa ajortip akissarsiarititaa tassaasoq toqu, inullu toqugaangami toquittartoq; ilisimajunnaarluinnartartoq. (Nalunaajaasup oqaasii 9:5, 10; Hesekiel 18:4; Rûmamiut 6:23) Suli atuffarissinanga Mosesimik allakkat siulliit 2:7 alanngaartalerpara. Biibilimi ajoqersuutinik ilumoortunik ilisimasaqarnerup tamakkuninngalu allanik avitseqateqarnerup piviusumik nuannaarnassusianik misigisama tamanna eqqaamasama siullersaraat.

Angerlarsimaffitsinni akuttoqatigiissumik Napasuliaq Alapernaarsuiffik-mik pisaratta ilaqutariit tamarmik anersaakkut inuussutissanik iluaqutiginnilerput. Aanaga uagutsinni najugaqarpoq, taannalu ilaqutariinni siullersaalluni nutaarsiassamik nuannersumik oqaluussisartunngorpoq. Najugaqarfitsinni, Carbondalemi Illinoisimiittumi, Jehovap Nalunaajaasui ilageeqanngillat, ataatsimiinneqartarporli. Anaanatta uagut meeqqat tallimat illoqarfiup illuatungaanukaqatigisarpaatigut arnat utoqqasaarpaaluit  Napasuliaq Alapernaarsuiffik-mik atuaqqissaartut peqataaffigiartorlugit. Aamma oqaluussinermut peqataasalerpugut.

Radiolerisuunermit parnaarussivimmut

1937-imi 17-iinnarnik ukioqarlunga katippunga. Radionik iluarsaasarnermik tamatuminngalu allanik ilinniartitsinermik inuuniuteqarniarsarigaluarpunga. Marlunnik meerartaareerluta, Peggymik Hankimillu, aappariinnerput aserorpoq. Avinnerput uanga pisuussutigaara. Kristumiorpalaanngeqisumimmi inuuvunga. Meeqqama angajulliit marluk perorsarnissaannut periarfissaarunnera inuunera tamaat anniaatigisimavara.

Sorsunnersuup aappaata nalaani sorpassuit eqqarsaatigisalerpakka. Sakkutuutut suliaqartunit løjtnantinngornissannik sakkutuunngortunillu radioteknikimik ilinniartitsinissannik neqeroorfigineqarpunga. Jehovalli sorsunnermik isiginnittaasia eqqarsaatigingaarakku ullut tamaasa qinusalerpunga. Napasuliaq Alapernaarsuiffik-mik pisartagaqarnera naasimavoq, Lucille Haworthillu allagartaq pisartagaqarnerma nutarsassutissaa isumagisussanngorsimavaa. Taamaattumik pulaarpaanga. Lucillep ataataa, Perry Haworth ilaqutarpassuisalu amerlanersaat 1930-kkunniilli Jehovamut nalunaajaasuusimapput. Lucillelu asannilerpugut 1943-milu decemberimi katilluta.

1944-mi kuisippunga, nuliaralu piffissani tamaat oqaluussisartuusoq pionerioqatigilerlugu. Tamatuma kinguninngua sakkutuunngoriartoqqusaavunga, piumanngilangali. Tamanna pissutigalugu naalagaaffiup perorsaaviani El Renomi Oklahomamiittumi ukiuni pingasuni parnaarussaaqqasussanngorpunga. Jehovamut kiffartornera pissutigalugu annikilliortitaanera nuannaarutigaara. Ullaat tamaasa iteraangama sumiinnera soorlu tamaaniinnera eqqarsaatigisarpakka. Assut nalerisimaartarpunga Jehovalu qutsavigisarlugu. Sorsunnerup kingorna 25-t qulaallugit ukiullit tamaasa misiligutaasumik iperarallarneqartalerput. Uanga 1946-mi februarimi iperarneqarpunga.

Piffissaq tamaat kiffartorneq

Angerlamut apuuppunga Lucille illoqarfimmi minnerusumi Oklahomamiittumi, Wagonerimik atilimmi, pioneritut kiffartortoq. Biileqanngilagut taamaattumillu oqaluussiffissarput annertooq pisuinnarluta angalaarfigisarlugu. Kingorna Wewokamut Oklahomamiittumut nuuppugut. Erniinnaq radioqarfimmi qanittumiittumi atorfinitsitaavunga, aallakaatitsinermut peqataasalerlunga. Ullormut nalunaaquttap-akunnerini arfinilinni sulisarama pioneritut kiffartornissannut piffissakilliorpunga. Jehovamulli kiffartornermik immikkut pisinnaatitaaffipput nuannaarutigaarput. Iluatsitsilluta pisoqqamik biilisivugut, Los Angelesimi ataatsimeersuarnermut peqataanissarput angumereqqarlugu. Tassa 1947-mi. Taavaniitilluta isumaliutigilerparput ajoqersuiartortitanngorniarluta Napasuliaq Alapernaarsuiffiup Biibilimik Ilinniarfianut Gileadimut qinnuteqarnissarput.

Paasivarput taamaaliornissaq alloriarnerujussuussasoq, taamaattumillu kissaatigaarput USA tassanngaannaq qimanniarnagu. Meeqqama annaasimanerat suli artorsaatigisaqaara. Taamaattumillu misileeqqippugut taakkununnga angajoqqaatut oqartussaaneq piniarsaralugu. Parnaarussivimmiissimanera siornatigullu inooriaaserisimasara pissutigalugit iluatsitsinngilagut. Taamaattumik aalajangerpugut ajoqersuiartortitanngorniarluta, ilinniarfiullu Gileadip 12. klassianut qaaqqusaalluta.

1949-mi ilinniarnerput naammassivarput, suliassarpullu siulleq tassa ilagiinnut Tennesseemiittunut tikeraartarnissaq. Ukiuni pingasuni angalalluta kiffartortutut USA-mi sulereerluta Napasuliaq Alapernaarsuiffiup Peqatigiiffiata præsidentianit allagarsivugut. Aperineqarpugut oqaluussinermik atuarfimmilu ilinniartitsinermik suliaqassalluta Etiopiamukarnissamut piumassuseqarnersugut. Tassami nunami tassani oqartussaasut piumasaraat ajoqersuiartortitat atuarfimmi ilinniartitsisarnissaat. Akuersivugut, 1952-imilu aasakkut Etiopiamut aallarluta.

Etiopiami ullaap tungaa meeqqat atuarfianni ilinniartitsisarpugut ualikkullu akeqanngitsumik Biibilimik atuaqqissaaqatiginnittarluta. Sivitsunngitsoq atuaqqissaarnernut tamakkununnga aggertartut ima amerlitigilerput ullut tamaasa nalunaaquttap-akunnerini pingasuniit sisamanut atuaqqissaaqatiginnittarluta. Atuaqqissaaqataasartut ilaat politiiupput, allat ilinniartitsisuullutik imaluunniit ajoqersuiartortitat  Etiopiamilu ortodoksit atuarfiini ’ajoqiullutik’. Ilaannikkut atuaqqissaarnermut 20-t amerlanerilluunniit peqataasarput! Atuaqqissaaqataasartut ilarpassuisa upperisarsiorneq ilumuunngitsoq qimappaat Jehovamullu kiffartulerlutik. Soorunami soqutiginninneq tamanna nuannaarutigeqaarput. Ullut tamaasa iteraangama Jehova qutsavigiuartarpara.

Inerteqqutaaffimmi angajoqqaatullu oqaluussineq

1954-imi paasivarput angajoqqaanngortussanngorluta. Taamaattumik aalajangertariaqalerpugut USA-mut utissanerluta Etiopiamiiginnassanerlutaluunniit. Soorunami tamaaniiginnassagutta silamiutut suliffittaartariaqassaanga. Radioteknikeritut suliffittaarpunga kaasarillu Haile Selassiep radioqarfia paarisussanngorlugu. Tassa aallanngilagut.

Septemberip 8-aani 1954-imi panipput Judith inuuvoq. Qularutiginngilluinnaraluarpara kaasarimi isumannaatsumik suliffittaarluta, ukiulli marluk qaangiuttut annaavara. Qaammatilli marluk qaangiutinngitsut politeeqarnerup iluani suliffittaarpunga — allaat amerlanerusunik aningaasarsiaqalerlunga. Angutit inuusuttut radionik iluarsaanissaannik ilinniartittussaavakka.

Ukiut tulliuttut pingasut ingerlaneranni marlunnik ernertaarpugut, Philip aamma Leslie. Tamatuma nalaani oqaluussinermut peqataanissamut kiffaanngissuserput eqqarsaatigalugu allanngorneqarpoq. Etiopiami ortodoksit ilagiivisa naalakkersuisut akuersisissimavaat Jehovap Nalunaajaasuisa ajoqersuiartortitaannik tamanik nunamit anisitsinissaannik. Peqatigiiffiup siunnersuineratigut visumminni, kinaassutsinnut allagartanni naqissusigaalluni atortussanngortitaasumi, ajoqersuiartortitatut sulininnik allassimasoq silamiutut suliffinnut allanngortippara. Ajoqersuiartortitatut sulinerput inerteqqutaalerpoq, taamaattumillu ’nipaatsumik’ oqaluussisariaqalerpugut. Ilagiit ataatsimiittarneri ingerlaannarput, ikittunnguakkuutaarlutali ataatsimiittariaqartalerpugut.

Politiit oqaluussisartut assigiinngitsut pasitsaassimasamik angerlarsimaffii ujaasiffigaat. Politeeqarnerulli iluani qullersaasut ilaat suleqatimi nalusaannik Jehovamik pallorfiginnittut ilagaat, politiillu ilisimatitseqqaaratik paasiniaassamaaleraangata mianersoqqusarpaatigut. Taamaattumik ukiuni tamakkunani politiit atuagassiaatitsinnik arsaarinninnissamut iluatsitsinngillat. Sapaatikkut illoqarfiup avataatungaani neriniartarfinni Napasuliaq Alapernaarsuiffik-mik atuaqqissaartarpugut. Tassani silaannarmi issiasoqarsinnaavoq taqussanillu nerisoqarsinnaalluni.

Tassa tamatuma nalaani, politiinngornianik radioteknikimik ilinniartitsisarnerma nalaani, ilinniartoq ilanngutassiap matuma aallaqqaataani eqqaasara uannut saaffiginnippoq Biibilimik atuaqqissaaqatigisaleqqulluni. Misigisimagama tamanna ilumoorukkaa, aallartippugut. Marloriaannarluta atuaqqissaaqatigeereerluta ilinniartoqatini alla ilagalugu atuaqqissaaqatigiartorpaanga, kingornalu aamma alla. Mianersoqquakka uannik atuaqqissaaqatigineqartarnertik allanut oqaluttuareqqunagu. Taamaaliorumanatik neriorsuipput, oqaatsitillu eqqortillugit.

1958-imi Yankee Stadiumimi Polo Groundsimilu New Yorkimiittuni nunanit tamalaanit peqataaffigineqartumik  ataatsimeersuarneqarpoq qulequtalimmik „Guutip piumasaa“. Tamanna sioqqullugu Peggy Hankilu, taamatuttaarlu ilaqutarpassuama ilarpasui, Jehovamut nalunaajaasunngorsimapput suliniartut. Ataatsimeersuarnermut tamatumunnga najuussinnaanera nuannaarutigeqaara! Meeqqama angajulliit marluk qanigisamalu allat takoqqinnerat nuannaarutigiinnanngilara, aammali inuit millionip kuartianit amerlanerusut ataatsimeersuarnerup ulluisa kingullianni katersuussimasut killitsissutigeqalugit!

Aappaaguani Peqatigiiffiup præsidentiata Nathan H. Knorrip Etiopiamut tikeraarpaatigut. Qanoq ililluta inerteqqutaaffiup nalaani suliatta ingerlatiinnarnissaanut pitsaasunik siunnersuuteqarpoq. Aammalu ilaquttakka qanorlu ingerlanersugut paasissallugu soqutigaa. Oqaluttuuppara meeqqavut qinunermut ilinniartissimallugit. Aperaara Judith qinusoq tusarusunneraa. Tusarusuppaa, qinoreermallu Judith oqarfigaa: „Ajunngeqaaq, Judith.“ Nerileratta qatanngut Knorr qinnuigaara qujaqqullugu, ameneereermallu Judithip saappaa oqarfigalugu: „Ajunngeqaaq, qatanngut Knorr!“

Meeqqavut USA-mi perorsarneqarput

1959-imi politiinut isumaqatigiissutiga atorunnaarpoq. Etiopiamiiginnarusukkaluarpugut, isumaqatigiissutinnilli nutarsaanissara oqartussaasunit akueriumaneqanngilaq. Taavami sumunnassaagut? Nunanut Afrikap ilaanut allanut pisariaqartitsiffiusunut nuunniarsarigaluarpunga, iluatsitsinangali. Pakatsikulussimalluta USA-mut utertariaqarpugut. Tikikkatta ilaquttavut nuannersumik takoqqippavut. Meeqqakka tallimat imminnut nuannariittorujussuanngorput taamanimiillu qanimut attaveqatigiilerlutik.

Wicthitami Kansasimiittumi najugassippugut, radioteknikeritullu aammalu radiodiscjockeytut suliffittaarlunga. Lucillep illup iluani suliassat suliarisarpai, meeqqavullu atuarfimmi angerlarsimaffitta ungasinngitsuaniittumi atualerput. Ataasinngornerit tamaasa unnukkut ilaqutariit tamatta Napasuliaq Alapernaarsuiffik atuaqqissaaqatigiissutigisarparput. Atuaqqissaaqatigiinnerup uummaarissumik soqutiginartumillu ingerlanissaa tamatigut isumaginiartarpara.

Meeqqavut ullut tamaasa aperisarpavut atuarfimmi qanoq ingerlanersut. Teokratiimik ilinniarfimmut ilaanertik assut iluaqutigaat. Mikisunnguuneranniilli oqaluussilluni angalaarnermi ilinniartissimavavut. Atuagassianik Biibililersaarutinik matuni neqeroornissaq ilinniarpaat, Biibilimillu atuaqqissaaqatigisartakkatsinnut ilagisarpavut.

Aamma inuunermi ilisimasassanik ajornannginnernik meeqqavut ilinniartinniartarpavut, nassuiaallugit qatanngutigiit tamarmik assigiilluinnarmik pineqarsinnaanngitsut. Assersuutigalugu, meeqqat tamarmik assigiilluinnarmik tamatigut tunissutissarsineqarsinnaasanngillat. „Qatanngutissi arlaat pinngussamik ilissinnut pisiarineqarsinnaanngitsumik tunisikkaluarpat kamassimaakujullusi pissagaluarpisi?“ aperaavut. Naamik, ilaannikkummi arlarsi ilami pinngisaanik tunineqartarpoq. Arlaannaalluunniit puiorneqarneq ajorpoq. Tamatigut naligiimmik piniartarpavut arlaallu ilaanit pingaarnerutinnaveersaartarlugit.

Ilaannikkut meeqqat allat uagut meeqqatsinnut inerteqqutigisatsinnik iliorsinnaatitaasarput. Akuttunngitsumik meeqqavut oqarsinnaasarput: „Ajja, taakku taamaalioqqusaapput, sooq uanga taamaalioqqusaanngilanga?“ Tamatuminnga nassuiaanniartarpakka, ilaannikkulli allatut ajornartumik oqaannartariaqartarpunga: „Taakkunamiuunngilatit; Brumleykkormiuuvutit uagullu allaanernik malittarisassaqarpugut.“

Perumi kiffartorneq

Etiopiamiilli nuunnitta kingorna uanga Lucillellu ajoqersuiartortitatut kiffartorneq assut maqaasisimavarput. Kiisamilu 1972-imi Perumut Amerikami kujallermiittumukarnissatsinnut periarfissarsivugut. Tamanna meeqqatsinnik inuusuttuaranngortunik perorsaaffissatut tulluarluinnarpoq. Meeqqatta ajoqersuiartortitanik, specialpionerinik nunasisunillu allanik ineriartornartumik katerisimaaqateqartarnermikkut Naalagaaffimmik salliutitsisut nuannaassusiat qujanartumik takusinnaasarpaat. Tamanna Philipip taavaa ilagisartakkanit ajunngitsup tungaanut tatineqarnermik.

Kansasimi ikinngutitoqqatta ilaasa Naalagaaffimmik oqaluussinitsinni qanoq ingerlalluartigisugut tusaramikku Perumut malippaatigut.  Angerlarsimaffipput ajoqersuiartortitat angerlarsimaffiattut aaqqissuuppara. Tamarmik oqaluussinermut piffissaqarsinnaaqqullugit suliassat assigiinngitsut akunnitsinni agguataarpavut. Ullaat tamaasa Biibilimi allassimaffimmik eqqartueqatigiittarpugut. Ila taamani nuannertaqaaq. Ullaat tamaasa iteraangama sumiinnera soorlu tamaaniinnera eqqarsaatigisarpakka, nipaatsumillu Jehova qutsavigisarlugu.

Taamaalluni Judith katippoq, USA-mullu uterluni taavani piffissani tamaat kiffartortuunini nangillugu. Philip ukiuni pingasuni specialpionerioreerluni Betelimut qinnuteqarpoq, Brooklynimilu New Yorkimiittumi Betelimut pilluni. Aamma Leslie USA-mut uterpoq. Killitsisimaarlutik Perumit aallarput, oqarfigisarpaatigullu imminnut iliuuserisimasarput pitsaanerpaaq tassaasoq Perumut nooqatigisimagatsigik.

Perumi aningaasarsiorneq ajorsiartuinnartillugu paasivarput nuuttariaqalerluta. 1978-imi Wichitamut uteratta Jehovamut nalunaajaasorpaaluit Spaniamiusut oqaasillit naapippavut. Qinnuigaatigut uninngavigeqqullutik ikioqqullutillu, nuannaarlutalu taamaaliorpugut. Ilagiit pilersinneqarput, erniinnarlu siornatigut ilageeqatigisimasatsitut nuannaritigilerpavut.

Ecuador kajungernarsivoq

Naak iluaallernerma kingorna ilaannaasumik nukillaaraluarlunga Lucille ilagalugu nunami allami kiffartuleqqinnissara kissaatigeqaara. 1984-imi nakkutilliisup angalasartup oqaluttuuppaatigut Ecuadorimi siumukarneqartorujussuusoq utoqqaanertanillu atorfissaqartitsisut. Erseqqissaaffigaara nukillaarsimanera pissutigalugu kiffartornermi iliuuserisinnaasakka killeqalersimasut, oqarfigaangali allaat 65-inik ukiulik ilaannaasumik nukillaarsimasoq iluaqutaasinnaaqisoq.

Unnuaq tamanna Ecuadorimut nuunnissamut periarfissaasinnaasut oqaluuseringaaratsigik sininneq ajuleraluarpugut. Lucille uattulli aallarusuttorujussuuvoq. Taamanikkut uumasunut ajoqutaannaasunut akiuiniarnermut atortuerniarfiuteqarpugut; taanna tuniniarparput. Sapaatit-akunnerisa marluk ingerlaneranni tunivarput. Ullullu qulit ingerlanerinnaanni illorput tunivarput. Utoqqaliarsaalernitsinni nuannarinerpaasatsinnut uterpugut — nunami allami ajoqersuiartortitatut kiffartornermut.

Quitomi najugassippugut. Tamaani oqaluussilluni nuannerluinnarpoq. Ullut tamaasa nutaanik pissanganartunillu misigisaqartarpugut. 1987-imili inalugarsuanni kræfteqartunga paasineqarpoq. Ingerlaannaq suliarineqartariaqarpunga. Taamaattumik Wichitamukarpugut, tassanilu iluatsittumik suliarineqarpunga. Ukiut marluk Quitomi kiffartoreersunga aamma kræfteqartunga paasineqarpoq, USA-milu uniinnartariaqalerpugut. North Carolinamut, maannakkut najukkatsinnut, nuuppugut.

Inuuneq pisooq akissarsinartorlu

Timikkut pitsanngoriangaarnissara ilimanarunnaarpoq. 1989-imi inalugarsuakkut aqquserneqarpunga. Sulili utoqqaanertatut kiffartorpunga soqutiginnittunillu arlalinnik uagutsinni Biibilimik atuaqqissaaqateqartarlunga. Ukiut ingerlaneranni ikkussuinitsigut imerterinitsigullu imaluunniit sallusuissutip naatsiassartaanik isumassuinitsigut iluamik oqaatigalugu inunnik hundredelikkuutaanik ikiuisimavugut. Ikiuisarnerit tamakku qanorluunniit akulikitsigisumik misigisaraluaraanni tamatigut assigiimmik nuanaarutaasarput.

Aamma meeqqama tamarmik Jehovamut kiffartornerat nuannaarutigeqaara. Peeggyp ukiuni 30-ni uini, Paul Moske, USA-mi angalalluni kiffartortoq ilagisimavaa. Philip nulianilu, Elizabeth, Judith ilagalugu New Yorkimi immikkut kiffartuuteqarput. Hank Leslielu aappatillu Jehovamut nalunaajaasuupput suliniartut, aamma qatanngutikka sisamat ilaqutaallu, aap, qanigisakka 80-init amerlanerusut, Jehovamut kiffartorput. Lucillelu ukiuni 50-ingajanni uannut nuliaasimavoq kristumiu asseqanngilluinnartoq. Ukiunilu kingulliunerusuni timinnut peqqiitsumut atatillugu nuannerpallaanngitsunik suliaqartuartarsimavoq — naammagittaalliussananilu.

Inuunera nuannaarutissartarpassuaqarsimavoq. Aap, nuannaarneq angingaarmat oqaatigisinnaanngilaraluunniit. Jehovamut kiffartorneq pilluarnangaarmat kissaatiga annerpaaq tassa maani nunami naassaanngitsussamut taassuminnga pallorfiginninnissara. Tussiaat 59:17 eqqarsaatigiuaannarsimavara, ima allassimasoq: „Uangali erinalersuutigissavara pissaanerit, unneqqarissutsit ullaakkut qiimmattaatigalugu. Illimmi pallittaalisarigakkit, annikillioraangama navialitsaaliffiga.“ (wD 1/12 92)

[Qupp. 22-mi assiliartaq]

George Brumley Etiopiamilu kaasari, Haile Selassie