Jehovap nallittuinerata isumatsassimanermit aniguisippaatigut

„Saammaannga unneqqarissutsinni, Guuti, unioqqutitsinikka piiarigit nallittuingaarnini.“ — TUSSIAAT 51:3.

1, 2. Jehovamut kiffaasup ingasattumik ajortuliorsimanera taassumunnga qanoq sunniussinnaava?

JEHOVAP inatsisaanik unioqqutitsisoq pillarneqanngitsoortanngilaq. Guutimut sualuttumik ajortuliorutta tamanna misigissavarput! Naak ukiorpassuarni Jehova aalajaalluta kiffartuussimagaluarlugu, inatsisaanik unioqqutitsineq annilaanganermik isumatsangaarnermilluunniit kinguneqarsinnaavoq. Immaqa misigissaagut Jehovap qimassimagaatigut taassumunngalu kiffartuussinermut qinngaqqunnarluta. Ajortuliornerput nuiatut ussissutut Guutip iluarinninneranut assiaqutaasutut misigisinnaavarput.

² Israelikkut kunngiat David ilaanni taama misigisimavoq. Tamanna qanoq ililluni pisimava?

Kukkuluttorneq ingasattumik ajortuliornermik kinguneqarsinnaavoq

3, 4. Kunngi David siumukariartoraluarluni sumik misigisaqarsimava?

³ Davidip Guuti asagaluarpaa, ingasattumilli ajortuliornermik kinguneqartunik kukkuluttorsimavoq. (Naleqqiuguk Galâsiamiunut agdlagkat 6:1.) Inunnut naammalluinnanngitsunut kikkunulluunniit tamanna pisinnaavoq, ingammik allanut oqartussaassuseqaraanni. Kunngiugami siumukariartorluni David tusaamasaalersimavoq pissaaneqalerlunilu. Kia assortorsinnaanerpaa? Inassutai sunnguit tamaasa kiffaasa pikkorissut naalappallattarpaat, inuillu taassumunnga naalannertik nuannaarutigisarpaat. Taamaattorli David eqqunngitsuliorpoq arlalinnik nuliaqalerami Israelikkullu kiseqqugamigit. — 5 Moses 17:14-20; 1 Israelikkut 21:1.

⁴ David pisuujunerujartuinnartilluni Guutimut inunnullu sualuttumik ajortuliorsimavoq. Ajortuliai ajortulianit allanit malitseqararaat, soorlu annoraamineq Satanimit ikaartitigaq! Uffa Israelikkoqatini Amonikkunnut sorsuttut nammineq illumi qaliata qaavanit Uriasip nulia pinnersoq, Batseba, uffartoq isiginnaarpaa. Urias sorsugiaqataasimavoq, kunngillu arnaq taanna illussaarsuarminukaatippaa allasiorfigalugulu. Takorlooriaruk qanoq uissuummitigisimassasoq kingorna paasileramiuk naartulersissimallugu! Davidip Urias qaaqqutippaa, neriulluni taassuma unnuakkut Batseba innaakkumaaraa isumaqassasorlu meerassaq nammineq meeraralugu. Naalli Davidip putumatikkaluaraani Uriasip Batseba innaakkumanngilaa. Taava Davidip annilaangaqaluni anngiortumik sakkutuut naalagaat Joas peqquaa Urias sorsuffimmut sallermut, qularnanngivissumik toqutaaffissaanut, piseqqullugu. Urias sorsuffimmi toqutaavoq, uillarneralu aliasuffik nalinginnaasoq qaangiummat inuillu suli paasinngikkaat naartusuni  Davidimut katippoq. — 2 Samuel 11:1-27.

5. Davidip Batseba kanngunartuliorfigereermagu susoqarpa, ajortuliorneralu taassumunnga qanoq sunniuppa?

⁵ Pruffiiti Natan aqqutigalugu Guutip Davidip ajortuliorsimanera qulaarpaa ima oqarluni: „Uanga perlummik nalliutitsivigiumaarpakkit illit nammineq ilaquttannit pisussamik.“ Taamaattumik Batsebap meerartaava toquvoq. (2 Samuel 12:1-23) Davidip angajulliliaata, Amnonip, qatanngutissani arnaq Tamar pinngitsaalillugu arneriffigaa taassumalu qatanngutissaanit toqutaalluni. (2 Samuel 13:1-33) Kunngip ernerata, Absalomip, pikitsitsilluni kunngiussuseq tigoriaraluarpaa Davidillu panerfai kanngunartuliorfigigamigit ataatani kangunarsarlugu. (2 Samuel 15:1–16:22) Israelikkut imminnut sorsuunnerat Absalomip toqutaaneranik kinguneqarpoq Davidilu aliasunnerulerpoq. (2 Samuel 18:1-33) David ajortuliaasa imminut nikanartilersippaa paasilerpaalu Guutiminut nallittuisumut qanittumik attaveqartariaqarluni. Uagut ajortuliussagaluarutta imminut nikanartilluta peqqissiminiarisa Jehovamullu qanillilluta. — Naleqqiuguk Jâkup agdlagai 4:8.

6. Sooq kunngip Davidip ajortuliorsimanerminut pisuutitassaanera ingammik annertua?

⁶ Davidip ajortuliornermigut pisuutitassaanera ingammik annertuvoq, Israelikkunnut naalagaagami Jehovallu inatsisaanik paasisimasaqarluarluni. (5 Moses 17:18-20) David Egyptenimiut Faraorinngilaat imaluunniit Babylonimiut kunngiginngilaat Guutip inatsisaanik paasisimasaqanngitsoq ileqqoriinnarlugu Guutip iluarinngisaanik iliortartoq. (Naleqqiuguk Evfisumiunut agdlagkat 2:12; 4:18.) Inuiaqatigiinnut Jehovamut tunniulluinnarsimasunut ilaagami Davidip ilisimalluarpaa allasiorneq toqutsinerlu ajortuliaasut ingasattut. (2 Moses 20:13, 14) Kristumiuttaaq Guutip inatsisai nalunngilaat. Ajorti kingornussaasoq, inuttut  sanngiissuseq usserniarneqarnerillu nakkaannarfigisat pissutigalugit ilaasa Daviditut unioqqutittarpaat. Uagut taamaaliussagaluarutta anersaakkut taartumiittuartariaqassanngilagut isumatsassimajuarnatalu.

Ajortulianik anngiiaatiginninneq oqilisitsisarpoq

7, 8. (a) Davidip ajortuliorsimanini toqqorniarsarimmagu susoqarpa? (b) Sooq inuup ajortuliorsimanini anngiiaatigalugulu saqqummiuttariaqarpaa?

⁷ Guutip inatsisai ingasattumik unioqqutissimagutsigik ajortuliatta nassuerutiginissaat immaqa ajornakusoortittarparput, allaat Guutimut. Tamanna qanoq kinguneqarsinnaava? Tussiaat 32-mi David ima nassuersimavoq: „Taamani nipangiinnarama timiga taroriartorpoq anersaarulunninni ulloq tamaat. Nanertungaarmanga assavit ullukkullu unnuakkullu inuussutiga sakkukilliartorpoq aasap kiassuanit.“ (Versit 3, 4) Davidip uteriilluni ajortuliaminik toqqortuiniaraluarnini ilerasuuteqarnerminillu naqisimanninniaraluarnini qasulluinnassutigaa. Isumakuluutimi artorsingaarmanni orpittut panernersuarmik eqqorneqartutut imermik uumaannarnissamut pisariaqartumik amigaateqartutut misigilerpoq. Aap, qularnanngilluinnartumik isumakkut timikkullu atugarliorsimassaqaaq. Nuannaarnini katassimassavaa. Uagut assingusumik misigisaqarutta qanoq iliortariaqarpugut?

⁸ Ajortulianik anngiiaatiginninneq isumakkeerfigineqarnermik pitsannguallannermillu kinguneqarsinnaavoq. „Taavali unioqqtitsininnik anngiiarfigaakkit isertorunnaarlugulu kukkussutiga,“ David taama erinarsorsimavoq. „Oqarpunga: ’Ajortuliakka anngiiaatigissavakka [Jehovamut].’“ (Tussiaat 32:5) Illit ajortuliaq isertugaq isumakuluutigaajuk? Pitsaanerussannginnerpa anngiiaatigigukku saqqummiullugulu, taamaalillutillu Guutimit isumakkeerfigineqarlutit? Ilagiinni utoqqaanertat ornillugit anersaakkut katsorsartinnissat ujartorniaruk. (Ussatit 28:13; Jâko 5:13-20) Peqqissiminerit akuerineqassaaq kristumiutullu nuannaarnerit pigileqqikkiartussavat. „Pilluarpoq ajortuliaminik isumakkeerfigineqartoq, Guutip pinngitsuutitaa,“ David taama allassimavoq. „Pilluarpoq inuk [Jehovap] pisuussuteqartutut oqaatiginngisaa, peqqusersiornermillu ilumiugisaqanngitsoq.“ — Tussiaat 32:1, 2.

9. Tussiaat 51 qanga aamma sooq allanneqarsimava?

⁹ Ajortuliorsimagamik David Batsebalu Jehova Guutimut nassuertussaasimapput. Naak ajortuliatik pissutigalugit toqutassaatinneqarsinnaagaluartut Guutip naakkinnittuliorfigisimavai. Ingammik David naakkinnittuliorfigaa Naalagaaffik pillugu angeruseq pissutigalugu. (2 Samuel 7:11-16) Davidip Batsebamik ajortuliorfiginnissimanerminik peqqissimissutiginninnera malugineqarsinnaavoq Tussiaat 51-imi. Ajortuliornermigut pisuutitassaanermi ingasatsigissusianik pruffiitip Natanip paasitereeraanilu kunngip Davidip peqqissimeqisup taallaq tamanna killitsinnartoq taalliarisimavaa. Natan sapiissuseqartariaqarsimavoq David ajortuliorsimaneranik eqqaasissagamiuk, soorluttaaq ullumikkut utoqqaanertat toqqakkat kristumiut taamaaliussagaangamik sapiissuseqartariaqartartut. Unnerluut misiutiginagu Natanillu toqutassaatinneqarnissaa peqqussutiginagu kunngi maniguulluni anngiiarpoq. (2 Samuel 12:1-14) Tussiaat 51-ip takutippaa kanngunartumik iliorsimanerminut atatillugu Davidip qanoq Guuti qinnuigisimagaa, tussiaallu tamanna qinunikkut eqqarsaatigeqqissaassallugu pitsaassaaq, ingammik eqqunngitsuliorsimagutta Jehovamillu naakkinnittuliorfigineqarnissarput kissaatigingaarlugu.

Guutimut nassuertussaavugut

10. David qanoq ililluni anersaakkut siumukariartuleqqissinnaasimava?

¹⁰ David eqqunngitsuliorsimanini patsisissarsiorfiginagu  ima qinuvoq: „Saammaannga unneqqarissutsinni, Guuti, unioqqutitsinikka piiarigit nallittuingaarninni.“ (Tussiaat 51:3) Unioqqutitsinermigut Davidip Guutip inatsisaasa killissarititai qaangersimavai. Anersaakkulli peqqissiartoqqinnissaa neriunaateqarsimavoq Guutip unneqqarissutsi imaluunniit ilumoortumik tunniusimanini naapertorlugu iluarinartilerpani. Guutip nallittuingaartarsimanera pissutigalugu kunngip peqqissimisup tatigisinnaavaa unioqqutitsinini Pinngortitsisup piiassagai.

11. Ullormi saammaannartitsivimmi pilliutaasarsimasut sumut assersuutaappat, ullumikkullu annakkumagaanni suna pisariaqarpa?

¹¹ Ullormi saammaannartitsivimmi pilliutaasarsimasut siumut assersuutaasut ikiortigalugit Jehovap takutissimavaa peqqissimisut ajortuliaannik minguiassallugit. Jesus Kristusip utertitsissutitut pilliutaanut uppernerput tunngavigalugu ullumikkut Guutimit naakkinnittuliorfigineqarsinnaallutalu isumakkeerfigineqarsinnaavugut. Davidip siumut assersuutaasut ikiortigalugit Jehovap ajunngissusia pisassarinngisaraluaq tatigisinnaallugu nalunngissimappagu uagut ullumikkut Guutimut kiffaasugut suli annertunerungaartumik utertitsissut annaassissut upperisinnaavarput. — Rûmamiut 5:8; Eprîarit 10:1.

12. Ajortuliorneq qanoq paasisariaqarpa, Davidillu eqqunngitsuliorsimanini qanoq isigai?

¹² Guutimut qinulluni David ima nangissimavoq: „Salinnga pinerluutaarulluinnarlunga, minguersannga ajortaarutillunga; massami unioqqutitsinikka ilisimavakka, ajortuliaralu takkunniitittuaannarpara.“ (Tussiaat 51:4, 5) Ajortuliorneq tassaavoq Jehovap najoqqutassiaanik sanioqqutsineq. David ilumut taamaaliorsimavoq. Kisianni David toqutsisuunngilaq allasiortuunaniluunniit eqqunngitsuliornerminik isumakuluuteqarani pillaatisiassaminik imaluunniit nappaateqalersinnaanissaminik isumakuluuteqaannartoq. Davidip Jehova asavaa ajortorlu uumigalugu. (Tussiaat 97:10) Ajortuliorsimanini maajugaa kissaatigaalu Guutip tamatuminnga minguiarluinnassagaani. Unioqqutitsisimanini miserratiginngivippaa pilerissutsiminillu ajortunit ajugaaffigineqarsimanini aaliasuutigingaarlugu. Ajortuliorsimanini eqqarsaatigiuarpaa, inuk Guutimik-mianerinnittoq ilerasuuteqartuassammat peqqissiminissani, anngiiarnissani Jehovamillu isumakkeerfigineqarnissani tikillugu.

13. Sooq David oqarsimava Guutimuinnaq ajortuliorsimalluni?

¹³ Jehovamut nassuertussaanini akueralugu David ima allassimavoq: „Ilinnut, ilinnuinnaq ajortulisimavunga isivillu iluarinngisaannik iliorsimallunga. Taama oqarpunga ersersinniarlugu eqqortumik iliortartutit pisuutitsigaangavit, minguitsuusarlutillu eqqartuussigaangavit.“ (Tussiaat 51:6) Davidip Guutip inatsisai unioqqutissimavai, kunngitut atorfini kanngunarsarlugu aamma Jehovamut ataqqinanngilluinnartumik iliorsimalluni, ’mitaatigineqartillugu’. (2 Samuel 12:14; 2 Moses 20:13, 14, 17) Davidip ajortuliorsimaneri aamma inuiaqatigiinnut Israelikkunnut namminerlu ilaquttaminut ajortuliornerupput, soorluttaaq ullumikkut unioqqutitsisoq kuisimasoq ilagiinni kristumiuusuni asasamilu akornanni aliasunnermut isumakuluutinulluunniit pisuusartoq. Kunngip peqqissimisup nalunngilaa inoqatini, ilaatigut Urias, ajortuliorfigisimallugit, aammali paasivaa Jehovamit pillarneqartussaanini annerusoq. (Naleqqiuguk 1 Moses 39:7-9.) Davidip nalunngilaa Jehovap eqqartuussutaa naapertuilluartuussasoq. (Rûmamiut 3:4) Kristumiuttaaq ajortuliorsimagunik taama isumaqartariaqarput.

Qajassuussinerunissamut pissutaasut

14. Qajassuussinerunissamut pissutaasinnaasut suut Davidip eqqartorpai?

¹⁴ Naak imminik pinngitsuutinniarsarinngikkaluarluni David ima oqarsimavoq: „Erniugamali  ajortimioreerpunga, anaanama ilumiugilerpaanga ajortiliulluni.“ (Tussiaat 51:7) David ajortimioreerluni erniusimavoq, ajortilu kingornussaasoq pissutigalugu anaanaa ernisunnermini nallisitsisarsimavoq. (1 Moses 3:16; Rûmamiut 5:12) Davidip oqaasii ima paasisariaqanngillat aappariinneq, naartulerneq meerartaarnerlu ajortuliornerusut, tassami Guutip aappariinneq meerartaartarnerlu pilersissimavai. David aamma anaanami aalajangersimasumik ajortuliarisimasaanik eqqarsaateqanngilaq. Ajortimioreerluni erniusimavoq angajoqqaani inuit naammalluinnanngitsut tamaasa assigalugit ajortiliummata. — Job 14:4.

15. Naak Guutip qajassuussinerunissamut pissutaasinnaasut eqqumaffigissagaluarai, uagut qanoq iliortariaqanngilagut?

¹⁵ Ajortuliorsimagutta Guutimut qinunitsinni taamaaliornitsinnut pisooqataasut suulluunniit qajassuussinerunissamut pissutaasinnaasut eqqaasinnaavavut. Kisianni Guutip ajunngissusia pisassarinngisaraluarput eqqunngitsuliornissamut utoqqatsissutissatut atornaveertigu ajortisiarlu kingornussaasoq patsisiginiarnagu ajortuliornitsinnut akisussaanerput akueriniartigu. (Jûtarsi 3, 4) Davidip miserratiginngilaa minguttuunik eqqarsaateqartarnerminut ussernartunullu naakkaannarnerminut nammineq akisussaalluni. Qinusariaqarpugut ussiiniarnernut naakkaannaqqunata qinnutivullu naapertorlugit iliuuseqarluta. — Matîuse 6:13.

Minguiarneqarnissamik qinuneq

16. Pissuseq suna Guutip nuannaraa, tamannalu ileqqutsinnut qanoq sunniuteqartariaqarpa?

¹⁶ Ilaat immaqa Guutimut tunniusimalluinnartutut isikkoqarput, Guutilli qallikkut pissutsit kisiisa pinnagit aamma inuit ilorpiamikkut pissusiviat isigisarpaa. David ima oqarsimavoq: „Illit sallusuissummik isertortumiittumik iluarisaqartutit ilisimalersinnga ilisimassummik uanga uummatinni isertaasumik.“ (Tussiaat 51:8) David sallutuutut peqqusersiorsimavoq Uriasip toqutaanissaa pilersaarutigigamiuk Batseballu naartulernerani piviusut toqqortorniarsarigamigit. Nalunngilluarpaali Guutip sallusuissuseq illernassuserlu nuannarigai. Tamanna ilioriaatitsinnut ajunngitsumik sunniuteqartittariaqarparput, peqqusersioraluaruttami Jehovap pillagassaatissavaatigut. (Ussatit 3:32) Davidip aamma paasivaa Jehovap ’ilisimassummik ilisimalersippani’ kunngitut peqqissimisutut inuunini naallugu Guutip najoqqutassiai maleruarsinnaassallugit.

17. Sooq David qinusimava isopimik minguersaqqulluni?

¹⁷ Tussiaasiortup paasigamiuk ajortulioriartarnermi ajugaaffiginissaanut Guutip ikiuinera pisariaqartillugu, ima qinuvoq: „Ajortaajarlunga minguersannga isopimik, uffannga apummit qaqornerulersillunga.“ (Tussiaat 51:9) Isop (immaqa akuutissaq merian, Origanum maru) ilaatigut pupissimasut ileqqulersorluni minguiarneqarneranni atorneqartarsimavoq. (3 Moses 14:2-7) Taamaattumik David assersuutaalluartumik qinusinnaavoq isopimik minguiaqqulluni. Minguiarneqarnissaq aamma eqqarsaatigineqarpoq qinusimammat uffaqqulluni apummit qaqornerusumik, aput paamik pujoralammilluunniit minguitsoq. (Jesaja 1:18) Uagut eqqunngitsuliorsimanitsinnik ilerasuuteqarutta taava tatigisariaqarparput peqqissimilluta Guutimit isumakkeerfigineqarnissarput ujartorutsigu Jesusip utertitsissummik pilliutaa tunngavigalugu minguiarsinnaagaatigut.

Guutimut attaveqarlualernissat qinnutigiuk

18. David ajortuliorsimanini peqqissimissutiginngikkallaramigit anngiiaatiginngikkallaramigillu qanoq misigisimava, tamatuminngalu ilisimanninnerput qanoq iluaqutigisinnaavarput?

¹⁸ Kristumiut ilerasuuteqarsimasut tamarmik  Davidip oqaasii makku paasilluarsinnaavaat: „Tipaatsunnermik nuannaarnermillu tuninnga, saarnit sequmisitatit qiimmattartikkit!“ (Tussiaat 51:10) Davidip ajortuliorsimanini peqqissimissutiginngikkallaramiuk anngiiaatiginngikkallaramiullu ilerasuuteqangaarnini naalliuutigisimaqaa. Allaat erinarsortartut nipilersortartullu pikkorissut tipaatsuummik erinarsorneri nuannaarutigisinnaasimanngilai. Guutimit iluarisaannginnini ima erloqissutigitigisimavaa saanini sequtsertutut misigalugit. Isumakkeerfigineqarnissani, anersaakkut iluarsinissani nuannaaleqqinnissanilu erinigingaarsimavai. Ullumikkut ajortuliorsimasut peqqissimisut aamma Jehovamit isumakkeerfigineqarnissartik pisariaqartippaat nuannaarneq Jehovamut ajunngitsumik attaveqarallaramik misigisimasartik angoqqissinnaaqqullugu. Inuup peqqissimisup ’anersaakkut illernartukkut tipaatsunneq’ misigisaleqqippagu nalunassanngilaq Jehovap isumakkeerfigalugulu asagaa. (1 Tásalûníkamiut 1:6) Ila, tuppallernassusia!

19. Ajortuliorsimanini tamaasa Guutip piiarpagit David qanoq misigissava?

¹⁹ David nangilluni ima qinuvoq: „Kiinnat alartiguk ajortuliannit, pinerluutikka nungullugit piiarigit.“ (Tussiaat 51:11) Ilimagisinnaanngilarput Jehovap ajortuliorneq akuerissagaa. Taamaattumik Davidip qinnuigaa kiinnani ajortuliaminit alarteqqullugu. Kunngip aamma Guuti qinnuigaa pinerluutini naapertuilluanngitsulianilu piiarluinnaqqullugit. Jehovap taamaaliornerinnaaluunniit pissutigalugu David isumagisseqissaaq ilerasuuteqarunnaariartorlunilu, paasilluinnassavaalu maanna Guutiminit asannittumit isumakkeerfigineqarsimalluni.

Illimmi ajortuliorsimaguit?

20. Kristumiu ingasattumik ajortuliorsimasut tamarmik qanoq ilungersortumik kajumissaarneqarpat?

²⁰ Tussiaat 51-ip takutippaa Jehovap kiffaasa tunniulluinnarsimasut sualuttumik ajortuliorsimagaluarlutik peqqissimigunik tamarmik tatiginnillutik qinnuigisinnaagaat iluarileqqeqqullutik minguiaqqullutillu. Illit kristumiuullutit taama ajortuliorsimaguit, sooq maniguullutit Ataatat qilammiusoq qinnuigissanngiliuk isumakkeerfigeqqullutit? Nassuerutigiuk Guutip ikiuinera pisariaqartillugu taassumannga iluarisaaleqqissaguit, qinnuigalugulu nuannaarneq misigisimasat angoqqeqqullugu. Kristumiut peqqissimisut tatiginnillutik Jehova taamatut qinnuigisinnaavaat, „taanna isumakkeerfiginnittuartarmat“. (Jesaja 55:7; Tussiaat 103:10-14) Aamma ilagiinni utoqqaanertat saaffigisariaqarput anersaakkut pisariaqartumik ikiortissinnaajumalluni. — Jâko 5:13-15.

21. Tullianik suna misissussavarput?

²¹ Jehovap nallittuinera isumatsassimanermit aniguisitsisarpoq. Davidilli Tussiaat 51-imi peqqissimilluni qinnutigisaasa ilaat allat misissoriartigik. Paasissavarput Jehovap uummat peqqissimisoq ajattortanngikkaa. (wD 15/3 93)

Qanoq akissavit?

□ Jehovamut kiffaasoq sualuttumik ajortuliorsimappat taassumunnga qanoq sunniuteqassava?

□ Davidip ajortuliorsimanini toqqorniarsarigaluaramiuk qanoq misigisimava?

□ Sooq David oqarsimava Guutimuinnaq ajortuliorsimalluni?

□ Naak Guutip qajassuussinerunissamut pissutaasinnaasut eqqumaffigissagaluarai, uagut qanoq iliortariaqanngilagut?

□ Kristumiu ingasattumik ajortuliorsimaguni qanoq iliortariaqarpa?

[Atuaqqissaarnermi apeqqutit]