Sanningasulik — Kristumiut ilisarnaataat?

UKIUT hundredelikkuutaat ingerlaneranni sanningasulik kristumiut ilisarnaataattut isumaqarfigineqartuarsimavoq. Ilumoorpali? Inuppassuit taama isumaqavissimagaluartut tupaallattarsimapput paasilerlugu sanningasulik kristumiuuneraqatigiinnuinnaanngitsoq attuumassuteqartuusoq. Tassami upperisarsiortut  kristumiuunngitsut akornanni nunarsuarmi sumi tamaani annertuumik atugaasimavoq.

1500-kkut aallartinneranni Hernaʹn Corteʹs sakkutuunilu ’kristumiuusut’ aztekerinut saassussileramik katinngatinik ima allannilinnik tigumiarsimapput: „Ilumoortumik uppernikkut sanningasullip illernartup ilisarnaataa malinniartigu, ilisarnaammi tamanna tunaartaralugu ajugaassaagut.“ Taakku tupaallassimassapput paasileramikku akeqqatik Guutimik nalusut aamma taama ittorluinnarmik, tassa sanningasulimmik, illernartitaqartuusut. Atuakkami Great Religions of the World-imi allassimavoq: „Cortesip ilaasalu akueriumanngisaraat aztekerit inunnik pilliisarnerat kristumiussutsimillu issuaanertut Satanerpalaartutut issinnaasut: . . . anorimut sialummullu guutiutitanik sanningasulimmut eqqaanartunik ataqqinninnermik ersersitsineq.“

Aviisip La Nacioʹn-ip pingaarnerutitaanik allattup Jose Alberto Furquep erseqqissarpaa 1700-kkut affaanni kingullerni ’ilisarnaatit sanningasulingasut Amerikap qiterliup kujalliullu ilarujussuani nassaarineqarsimasut pilerfii isumaallu pillugit inuup inuiaqatigiillu pissusiinik ilisimatuut itsarnisarsiuullu akornanni sakkortuumik akioriilluni oqallinnersuaqalersimasoq’. Ilaat sanningasullip kristumiut ilisarnaativiattut isigisaalluni ataqqisaaneranik ima illersuiniartigisimagunarput allaat isumaliutersuusiorsimallutik Amerika avannarlermiut kujallermiullu Colombusip pingaaruteqartumik angalanera sioqqullugu arlaatigut qanoq ilillutik pinerpoq ’kristumiunngortinneqarsimasut’! Isumaliutersuulli tamanna tunngavissaqanngilluinnartutut tunuartinneqartariaqarsimavoq.

Akioriilluni oqallinneq tamanna paasisat nutaat amerliartortillugit unikkiartorpoq. Furque nassuiaavoq: „Atuakkiami 1893-imi Smithsonian Institutionip saqqummersitaani nalorninaallisinneqarpoq sanningasulik . . . Europamiut Amerikamut avannarlermut tikittut siulliit sioqquterujussuarlugilli ataqqisaasimasoq, tamatumuunalu uppernarsarneqarpoq ilisarnaat tamanna . . . inuiaqatigiinni tamani nukinnik inuunermik tunisisunik guutisiorfiginninnerup ilaatut atorneqartarsimasoq.“

Biibilimi ersersinneqarpoq Jesus sanningasulimmiunngitsoq, kisianni qisummi nappakkami, griikerisut staurosʹ-imi, toqunneqarsimasoq. Oqaaseq griikerisooq taanna Matîuse 27:40-mi atorneqartoq isumaqaannarpoq qisuk imaluunniit quassuttooq nappagaq. Tassa sanningasulik kristumiussutsimut ilumoortumut attuumassuteqanngisaannarsimavoq. Jesus Kristusip nassuiaatigisimavaa kristumiut suna ’nalunaaqutarivissagaat’ imaluunniit ilisarnaatigivissagaat. Ima oqarsimavoq: ’Matumannga tamarmik ilisarissavaasi ajoqersugarigissi: asaqatigiikkussi.’ — Juánase 13:35. (wD 15/11 92)