Sooq Naalakkap unnukkorsiortitsinera ilinnut pingaaruteqartoq

JESUS KRISTUSIP nunami inuunermi ulluisa kingullersaanni Naalakkap unnukkorsiortitsinera pilersissimavaa. Ulloq tassaavoq sisamanngorneq martsip ulluisa 31-at unnukkut, Jesusilu tallimanngornermi aprilip aallaqqaataani ualikkut toquvoq. Juutit qaammatisiutaat malillugu ulloq unnummit unnuup tullianut ingerlasarmat, unnukkorsiortitsineq Jesusillu toqunera tamarmik ukiumi 33-mi u.n.k. nisanip ulluisa 14-anni pisimapput.

Soormi Jesusip unnukkorsiortitsineq tamanna pilersissimagaa? Timiusaq viinnilu atorsimasai qanoq isumaqarpat? Kikkut peqataaffigissavaat? Qanoq akulikitsigisumik nalliuttorsiutigineqartussaava? Ilinnullu qanoq pingaaruteqarsinnaava?

Sooq pilersinneqarsimava?

Unnukkorsiortitsineq tamanna pillugu Jesusip apustilini ima oqarfigisimavai: ’Taamaaliortaritsi eqqaallunga.’ (1 Korintumiut 11:24) Naalakkap unnukkorsiortitsinera aamma eqqaaniaalluni nalliuttorsiornermik imaluunniit Kristusip toquneranik eqqaaniaalluni nalliuttorsiornermik taaneqartarpoq.

Jesus toqunini tikillugu assuarnaattuarsimavoq taamaalillunilu Jehovap kisimi oqartussaanera akitsisissimallugu. Uppernarsarsimavaa Satan sallutuujusoq Guutimik mitallersoq inunnik assuarnaatsunik unnerluutiginnittoq Guutimik kiffartuussinerminni namminissarsiornerarlugit. (Job 2:1-5) Jesus aalajaalluni toqunermigut Guutip uummataa nuannaartippaa. — Ussatit 27:11.

Inuttut naammalluinnartuulluni toqunermigut Jesusip aamma ’inuunini akissatut tunniuppaa amerlasuut utertinneqaatissaannik’. (Matîuse 20:28) Inuk siulleq Guutimut ajortuliorsimavoq taamaalillunilu inuunini naammalluinnartoq periarfissat tamaasa ilanngullugit annaallugu. Kisianni ’Guutip silamiut ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Aap, ’ajortip akissarsiarititaa tassa toqu, Guutilli saammaannermit tunissutaa tassa inuuneq naassaanngitsoq Kristus Jesusimi Naalakkatsinni’. — Rûmamiut 6:23.

’Naalakkamit pisoq’

Paulusip oqaasiisa tulliuttut Kristusip toquneranik eqqaaniaalluni nalliuttorsiorneq ersersinneruaat: ’Naalakkamimmi pivara ilissinnut pisitara imaattoq: Naalakkap Jesusip unnuaq taanna pisitaagami timiusaq tiguaa, qujallunilu aggorpaa oqarlunilu: „Tassa timiga pillusi tunniunneqartoq; taamaaliortaritsi eqqaallunga.“ Taamattaaq ermuseq tiguaa unnukkut nerigamik soraaramik, oqarlunilu: „Ermuseq manna tassa aakkut angerusisaaq; taamaaliortaritsi imeraangassiuk eqqaallunga.“ Timiusarmi tamanna nerisaraangassiuk, ermutsimillu tamatumannga imeraangassi, Naalakkap toqua oqaatigisassavarsi tikiutserlugu.’ — 1 Korintumiut 11:23-26.

Paulusip ukiumi 33-mi nisanip ulluisa 14-anni Jesus apustilillu aqqanillit ilagisimannginnamigit paasissutissat tamakku qularnanngitsumik isumassarsisitaalluni ’Naalakkamit pisimavai’. Unnuami Judasimit  akeqqaminut upperisarsioqatigiinnut juutiusunut Romamiunut toqutaatitsisunut pisitaaffimmini, Jesusip eqqaaniaalluni nalliuttorsiorneq pilersissimavaa. Timiusamik viinnimillu assersuutaasunik ilangiisussat eqqaaniaallutik taamaaliortussaapput.

Nalliuttorsiorneq qanoq akulikitsigisumik pisassava?

Paulusip oqaasii uku qanoq paasisariaqarpat: ’Timiusarmi tamanna nerisaraangassiuk, ermutsimillu tamatumannga imeraangassi, Naalakkap toqua oqaatigisassavarsi tikiutserlugu’? Kristumiut tanitaasut aalajaatsut toqunissartik tikillugu nalliuttorsiornerup assersuutai arlaleriarlutik ilangertarpaat. Toqoreerunik qilammi inuunissamut makititaassapput. Taamaattumik Guutimut silarsuarmullu arlaleriarlutik nalunaarsinnaavaat upperalugu Jesusip pilliutaa Jehovap pilersissimagaa. Qanoq sivisutigisumik taamaaliortoqartassava? ’Tikiutserlugu,’ Paulus taama allassimavoq. Qularnanngitsumik ima paasisariaqarpoq nalliuttorsiornerit tamakku ingerlanneqartassasut Jesus „najuunnissamini“ ajoqersukkani tanitaasut qilammi inuunissaannut makitinniarlugit tikiutserlugu. (1 Tásalûníkamiut 4:14-17, NV) Soorluttaaq Kristusip ajoqersukkani aqqanillit aalajaatsut oqarfigisimagai: ’Inissioriartoreerussilu kingumut tikiukkumaarpunga, uannullu pisikkumaarpassi najukkanneeqqullusi.’ — Juánase 14:3.

Jesusip toqunera ullut tamaasa imaluunniit sapaatit-akunneri tamaasa eqqaaniarneqartussaava? Poorskip, Israelikkut Egyptenimi inussiaataanermit aniguisitaasimanerannik eqqaaniaaffiusartup, nalaani Naalakkap unnukkorsiortitsinera Jesusip pilersissimavaa toqutaallunilu. Soqutiginartumik Kristus ’savaaqqamik poorskisiutigisatsinnik’ taaneqarsimavoq kristumiut pillugit savatut pilliutigineqarsimagami. (1 Korintumiut 5:7) Poorski ukiumut ataasiaannarluni nalliuttorsiutigineqartarsimavoq, tassa nisanip ulluisa 14-anni. (2 Moses 12:6, 14; 3 Moses 23:5) Ima paasisariaqarpoq poorski nalliukkaangat Jesusip toqunera eqqaaniarneqartassasoq, tassalu ukiumut ataasiarluni, imaanngitsoq ullut tamaasa imaluunniit sapaatit-akunneri tamaasa.

Ukiuni hundredelinni arlalinni kristumiuunerartut Jesusip toqunera ukiumut ataasiaannarlutik nalliuttorsiutigisarsimavaat. Nisanip ulluisa 14-anni eqqaaniaallutik nalliuttorsiortarput taamaattumillu ’quartodecimanerinik’, tassa „14-annik pingaartitsisut“-nik, taaneqartarlutik. Taakku pillugit oqaluttuarisaanermik ilisimatooq J. L. Mosheim ima allassimavoq: „Asiaaqqami kristumiut Naalakkap unnukkorsiortitsineranik eqqaaniaalluni nalliuttorsiorneq illernartoq tamanna piffissami juutit savaaqqamik poorskisiutigisaminnik nerisarfianni ingerlattarsimavaat, tassa qaammatip siulliup [nisanip] ulluisa 14-anni unnukkut. . . . Kristusip maligassiuinera inatsisitulli pingaaruteqartigisutut isigaat.“

Assersuutit isumaat

Paulus allassimavoq Jesusip ’timiusaq tigusimagaa, qujallunilu aggoraa’. Timiusaq aggulasoq kissitut ittoq tamanna qajuusanik imermillu, seernarsaateqanngitsumik (imaluunniit qapoqanngitsumik) iffiugaasoq aggorneqartariaqarpoq nerineqarsinnaaqqullugu. Biibilimi seernarsaat ajortimut ajortunngorsimanermullu assersuutaavoq. Paulusip kristumiut Korinthimiittut kajumissaarsimavai angut kanngunartuliortartoq ilagiinnit peeqqullugu ima oqarluni: ’Naluisi seernarsaatimininnguup timiusiassaq tamaat seernartittaraa? Seernarsaatitoqaq piiarsiuk timiusiassaaleqqullusi nutaaq seernaqanngitsuugassimi, uaguttaaq savaaraq poorskisiutigisarput toqutaammat, tamassa Kristusi. Tamanna pillugu nalliussiniarta seernarsaatitoqqamik pigisaqarnata, iluaassutsip ajorsutsillu seernarsaataannilluunniit pigisaqarnata, kisianni  qaamasumiissutsip ilumoorsutsillu seernaqanngitsuannik pigisaqarluta.’ (1 Korintumiut 5:6-8) Soorluttaaq seernarsaatimininnguup timiusiassaq tamaat seernartittaraa, ilagiit tamarmik Guutip isaani minguttuussapput inuup ajortuliortartup ajortumik sunniinera peerneqanngippat. Imminnit seernarsaat peertariaqarpaat, soorluttaaq Israelikkut poorskip kingorna timiusamik seernarsaateqanngitsumik nalliuttorsiorfimmi illuminni seernarsaammik pigisaqartussaaneq ajorsimasut.

Timiusaq seernarsaateqanngitsoq nalliuttorsiornermi atortagaq pillugu Jesus ima oqarsimavoq: ’Tassa timiga pillusi tunniunneqartoq.’ (1 Korintumiut 11:24) Timiusaq Jesusip inuttut timaanut naammalluinnartumut assersuutaavoq, Paulusillu ima oqaatigisimavaa: ’Tamanna pillugu silarsuarmut iserami ima oqarpoq: „Pilliutit toqutassat pilliutillu neqissat piumanngilatit, timimilli uannut piareersagaqarputit; pilliutit ikikkagassat pilliutillu ajortaaruteqqussutit nuannarinngilatit.“ Taava oqarpunga: „Tassa aggerpunga, mappersakkani pillunga allassimasoqarpoq, peqqusat, Guuti-aa, naammassiartorlugu.“ . . . Peqqusarlu tamanna Jesusip Kristusip timaata pilliutigineqarneragut ataasiaataasukkut iluarsissutigaarput.’ (Eprîarit 10:5-10) Jesusip inuttut timaa naammalluinnartoq ajorteqanngivissimavoq inuiaallu iluaqutissaannut utertitsissutissaalluni. — Eprîarit 7:26.

Viinnimik aappaluttumik ermuseq pillugu qinoreerami Jesus ima nangissimavoq: ’Ermuseq manna tassa aakkut angerusisaaq.’ (1 Korintumiut 11:25) Versi taanna aamma ima nutserneqarsimavoq: ’Ermuseq manna isumaqarpoq angeruseq nutaaq aakkut atortuulersitaasoq.’ (Moffatt) Soorlu Guutip Israelikkullu akornanni inatsisit tunngavigalugit angeruseq nersutit aavat aqqutigalugu atortuulersitaasimasoq, angerusisaaq Jesusip aava kuisimasoq aqqutigalugu atortuulersitaavoq. Angerusisaap tamatuma eqqartorneqarnera iluaqutigalugu paasisinnaavarput eqqaaniaalluni nalliuttorsiornermi assersuutit kikkunnut ilangerneqartussaatitaanersut.

Kikkut ilangiisussaappat?

Jesusip ajoqersugai tanitaasut angerfigeqatai eqqaaniaalluni nalliuttorsiornermi assersuutinik ilangiisussaatitaapput. Angeruseq tamanna Guutip Israelikkullu anersaakkut ittut akornanni angerusiuvoq. (Jeremia 31:31-34; Galâsiamiut 6:16) Inuiaalli naalattut tamarmik naggataatigut angerusisaakkut pilluaqquneqarumaarput, illittaarlu taakku ilagalugit pilluaqquneqarsinnaavutit.

Eqqaaniaalluni nalliuttorsiornermi assersuutinik ilangiisut namminneq Jesusimik Naalagaaffik pillugu angerfigeqatiginnissimasuusariaqarput. Jesusip unnukkorsiortitsineq tamanna pilersikkamiuk ajoqersukkani ima oqarfigisimavai: „Angerfigeqatigaassilu, soorlu Ataatama uanga angerfigeqatigigaanga, naalagaaffik pillugu.“ (Lúkarse 22:29, NV) Guutip Davidimik Naalagaaffik pillugu angerusiata Jesus, naassaanngitsumik kunngiusussaq, siumut tikkuarsimavaa. Israelikkut anersaakkut ittut 144.000-it, Jesusip naalakkersueqatissai, Savaaraq, Jesus Kristus, ilagalugu qilammi Zionip qaqqaani qeqartutut eqqartorneqarput. Makitinneqareerunik Kristus kunngitut palasitullu naalakkersueqatigissavaat. (2 Samuel 7:11-16; sarĸúmersitat 7:4; 14:1-4; 20:6) Naalakkap unnukkorsiortitsinerani angerusisaamik Kristusimit angerfigeqatigineqarsimasut kisimik assersuutinik ilangiisinnaatitaapput.

Guutip anersaavata tanitaasut anersaavat nalunaajaaqatigaa Guutip taakku qitornarigai Kristusillu kingornusseqatigigai. Paulus ima allassimavoq: ’Anersaap taassuma anersaarput nalunaajaaqatigaa Guutip qitornarigaatigut. Qitornaaguttali kingornussisussaavuguttaaq, Guutimit kingornussissalluta  Kristusilu kingornusseqatigissallugu; massami naallioqatigigutsigu taava naalannarseqatigissavarputtaaq.’ (Rûmamiut 8:16, 17) Guutip anersaavata illernartup imaluunniit pissaanerata sulissutiginnittup tanitaasut qilammi inuunissamik tupinnartumik kissaateqalersittarpai. Paasivaat qilammi inuunissaq pillugu Biibilimi allassimasut tamarmik imminnut atuumassuteqartuusut, nunamiittullu tamaasa qimannissaannut piumassuseqarput, aamma ilaquttatik inuttullu inuunertik. Nunami paratiisissami inuunissaq nuannissaqaaq, tassanili inuunissamik kissaatigisaqanngillat. (Lúkarse 23:43) Qilammi inuunissamik neriuut piviusoq allanngujaatsorlu, eqqunngitsumik upperisarsiornermi isummanik tunngaveqanngitsoq, neriuutigigamikku eqqaaniaalluni nalliuttorsiornermi assersuutit ilangersinnaavaat.

Inuk qilammi kunngiunissamut palasiunissamullu qaaqquneqarsimanani qaaqquneqarsimaneraraluarpat Jehovap iluarissanngilaa. (Rûmamiut 9:16; sarĸúmersitat 22:5) Kora ataqqinaateqarumavallaarluni palasitut pisinnaatitaaffeqarniarsarigaluarmat Guutip suujunnarsissimavaa. (2 Moses 28:1; 4 Moses 16:4-11, 31-35) Inulli misigissutsiminit aqunneqarluni imaluunniit siornatigut eqqunngitsumik upperisarisimasaminit killinneqarluni kukkusumik tunngaveqarluni eqqaaniaalluni nalliuttorsiornermi assersuutinik ilangiisaleraluarpat? Assersuutit ilangissaartariaqarpai Guutilu qinnuigisariaqarlugu isumakkeerfigeqqulluni. — Tussiaat 19:14.

Ilinnut pingaaruteqarnera

Jesusip utertitsissummik pilliutaa iluaqutiginiarlugu nunamilu inuunissaq naassaanngitsoq anguniarlugu eqqaaniaalluni nalliuttorsiornermi assersuutit pinngitsoornata ilangertariaqanngilavut. Assersuutigalugu Biibilimi allassimanngilaq inuit Guutimik mianerinnittut soorlu Abraham, Sara, Isak, Rebekka, Boaz, Rut Davidilu assersuutinik tamakkuninnga ilangiiumaartut. Kisianni nunami naassaanngitsumik inuunissamik kissaatillit allat assigalugit aamma taakkua Guuti Kristusilu upperfigisariaqarpaat, upperisariaqarlugulu Jesusip utertitsissummik pilliutaa Jehovap pilersissimagaa. (Juánase 3:36; 14:1) Jesusip toquneranik nalliuttorsiorneq ukiumoortoq tassaavoq pilliummik pingaartumik tamatuminnga eqqaasitsineq.

Jesusip pilliutaata pingaaruteqassusia takuneqarsinnaavoq apustili Johannes ima allassimammat: ’Tamakkuninnga ilissinnut allappunga ajortulioqqunasi; ajortuliortoqaraluarpallu Ataatami illersuisoqarpugut, Jesus Kristusimik iluartuusumik, taannalu ajortitta matoorneqaatigaat, uaguinnaanngitsummi silarsuarmiuttaaq tamarmik.’ (1 Juánase 2:1, 2) Kristumiut tanitaasut oqarsinnaapput Jesus ’ajortimik matoorneqaatigigaat’. Aammali silarsuarmiut tamarmik ajortaasa Jesus matoorneqaatigaat, taassumami inuiaat naalattut nunami paratiisissami qanittumi inuunissamik naassaanngitsumik periarfissaqartimmagit.

Kristusip toquneranik nalliuttorsiorneq najuuffigigukku Biibili tunngavigalugu oqalugiaat eqqarsalernartoq ilikkarnartorlu pissarsiaqarfigissavat. Oqalugiaatip eqqaasissavaatigut Jehova Guutip Jesus Kristusillu uagut pilluta iliuuserisimasaannik tamanik. Aamma inuit allat Guutimik Kristusimillu taassumalu utertitsissummik pilliutaanik ataqqinnittut najussallugit anersaakkut iluaqutigingaassavat. Tamatumuuna Guutip ajunngissusia pisassarinngisaraluaq inuunissamik naassaanngitsumik kinguneqartoq iluaqutigissallugu kissaatit nakkussatsinneqarsinnaassaaq. Aap, Naalakkap unnukkorsiortitsinera ilinnut pingaaruteqarsinnaaqaaq. Taamaattumik 1993-imi aprilip ulluisa 6-ianni Jehovap nalunaajaasui ilagalugit Jesus Kristusip toquneranik eqqaaniaanissamut tikilluaqqusaavutit. (wD 15/3 93)