Unnukkorsiorneq tamanna ilinnut pingaaruteqarsinnaava?

QAAMMATIP IMISSISUP nuna qaammarsarpaa. Jerusalemitoqqami illumi inersuarmi qullermi angutit aqqaneq-marluk nerrivimmut katersuussimapput. Taakkua ilaasa aqqanillit Ajoqersuisortik tusarnaaqqissaarpaat nalliuttorsiorneq malunnartoq pilersimmagu pingaartumillu oqaaseqarluni. Oqaluttuat ilaat imaappoq:

’Nerisillutilli Jesusip timiusaq tiguaa, pilluaqqusillunilu aggorpaa ajoqersukkaminullu tunniullugu oqarlunilu: „Tigusillusi nerigitsi, tassa timiga.“ ermuserlu tiguaa, qujallunilu taassuminnga tunivai oqarluni: „Tamassi tassannga imeritsi, tassaammat aaga, angerutsip pia, amerlasuut pillugit kuisoq ajortit isumakkeerneqaatissaannik. Oqarfigaassili: matuma kingorna matumannga viinnequtip inerititaanit imissaassaanga ulloq inna nalliutserlugu, nutaasoq imerumaarukku ilagalusi Ataatama naalagaaffiani.“ Qujaniullu tussiutigereeramikku Uuliap Qaqqaanukarput.’ — Matîuse 26:26-30.

TAMANNA ukiumi 33-mi ukiunik naatsorsuisarnitta kingorna seqernup tarrinnerata kingorna pisimavoq, juutit qaammatisiutaat malillugu qaammatip nisanip ulluisa 14-anni. Jesus apustiliilu poorskisioqqammerput Israelikkut ukiuni 1500-kkunni u.n.s. Egyptenimi inussiaassutsimit aniguisitaasimanerat eqqaaniarlugu. Kristusip Judas Iskariot aallartissimavaa, killuutigissamaarmani. Jesus apustilillu aqqanillit aalajaatsut kisimik najuupput.

Unnukkorsiorneq tamanna juutit poorskisiortarnerannut ilaanngilaq. Aap, tamanna tassaavoq nutaarluinnaq, Naalakkap unnukkorsiortitsineranik taaneqalersoq. Nalliuttorsiorneq tamanna eqqarsaatigalugu Jesusip ajoqersukkani ima peqquai: ’Taamaaliortaritsi eqqaallunga.’ (Lúkarse 22:19-20; 1 Korintumiut 11:24-26) Sooq taama oqarsimava? Qangarsuarli pisimasoq tamanna ilinnut qanoq pingaaruteqarsinnaava? (wD 15/3 93)