Aaqqissuussaaneq nuannaarnerlu ataqatigiipput

AAQQISSUUSSAAGUTTA pitsaasumik iliuuse-  qarsinnaassaagut. Sunniuteqarluarsinnaasumik iliuuseqartarutta piffissarput nukivullu pitsaanerpaamik atortassavavut. (Galâsiamiut 6:16; Filípimiut 3:16; 1 Timûtiuse 3:2) Inuunerli aaqqissuussaasumik sunniuteqarluarsinnaasumillu iliuuseqarnissamuinnaq tunnganngilaq. Tussiaasiortoq isumassarsisitaalluni ima allassimavoq: „Pilluarput inuiaat [Jehovamik] Guuteqartut.“ (Tussiaat 144:15) Sutigut tamatigut aaqqissuussamik iliuuseqartarneq ilutigalugu nuannaarnermik attassiinnarnissaq unamminiarnartuuvoq.

Aaqqissuussaasut nuannaartut

Jehova Guuti aaqqissuussilluarnermik maligassat annersaraat. Taassuma pinngortitaani tamani, cellinit mikisuaqqanit pinngortitanut angisoorsuarnut, atomiararpassuarnit ulloriaqatigiippassuarnut tupinnartunut, aaqqissuussaalluarneq peqqissaarussaalluarnerlu takuneqarsinnaapput. Qilammi nunamilu Jehovap inatsisai iluaqutigalugit ulluinnarni inuunerput nalorninata pilersaarusiorsinnaavarput. Nalunngilarput seqineq ullut tamaasa nuisartoq ukiorlu aasamik malitseqartartoq. — 1 Moses 8:22; Jesaja 40:26.

Jehovali aaqqissuussaanerup kisimi Guutiginngilaa. Aamma ’Guutiuvoq pilluartoq’. (1 Timûtiuse 1:11; 1 Korintumiut 14:33) Pilluarnera pinngortitaani takuneqarsinnaavoq. Qitsuit pinnguarumatuut, seqernup tarrilerneri alianaatsut, nerisassat mamartut, nipilersukkat isumassarsinartut, suliassat kajumissinartut allarpassuillu tamarmik takutitsipput inuunermik nuannaarutiginninnissarput siunertaralugu Jehovap pinngortissimagaatigut. Inatsisai tassaanngillat killilersuutit nuanniitsut, tassaallutilli pilluarnissatsinnik sernissuisussat.

Jesus Kristusip Ataatani malippaa, tassaalluni ’pilluartoq kisimi pissaasoq’ Ataatamisorluinnarlu ileqqoqartoq. (1 Timûtiuse 6:15; Juánase 5:19) Ataatani pinngortitsisoq suleqatigigamiuk tassaaginnarsimanngilaq sunniuteqarluarsinnaasumik „sanallaqqissorsuaq“, aammali suliani pilluaatigisimavai. Jehovamut ’nuannaarutaasimavoq ullut tamaasa, kiinaatalu saani nuannaartuarluni, nunarsuaq pigisaa tamaat nuannaarfigalugu inuilu nuannaarutigisarlugit’. — Ussatit 8:30, 31, (NV).

Iliuutsitsinni tamani inunnut inussiarnernermik, asanninnermik nuannaarnermillu ersersitserusuttarpugut. Ilaannikkulli sunniuteqarluarsinnaasumik iliuuseqarniangaarangatta ’Guutip anersaava najortigalugu’ eqqortumik inuuneq Guutip anersaavata inerititaanik ineriartortitsiniarnissamik ilaqartussaasoq immaqa puiortoortarparput. (Galâsiamiut 5:22-25) Taamaattumik pitsaassaaq ima aperissalluta: Tamakku ataatsikkoortinneqarsinnaappat? Aalajaatsumik ’eqqortumik saqilluta’  inuusinnaavugut, tamannalu ilutigalugu nammineq sulinitsinni allallu suliaannik nakkutiginninnitsinni tamatigut nuannaarnerput attatiinnarlugu?

Imminut naakkittaaffigeqinak

Siunnersuut Ussatit 11:17-imiittoq malugeriaruk. Siullermik isumassarsisitaalluni allattup oqaluttuuppaatigut ’naakkittartoq imminut iluaqutissiortartoq’. Akerliali aamma tikkuarpaa: „Naakkittaatsorli imminut ajoqusiinnartarpoq.“

Qanoq ililluta imminut naakkittaaffigisoorsinnaavugut? Pitsaanerpaamik siunertaqaraluarluta aaqqissuussaanngivissumik ingerlanitsigut. Qanoq kingunilimmik? Tamakkuninnga ilisimasakkaaq ataaseq ima oqarsimavoq: „Annikitsualunnik puiugaqartarneq, pappilissanik pingaarutilinnik tammaasarneq, oqqersuummik paaserpianngisaqartarneq, oqarasuaatikkut oqaloqatigiinnermik kukkusumik imaqarnersiuineq — tamakkua tassaapput kukkuniminiaqqat, quperlut sunniisinnaassuseqarluassutsip tunngaviinik iluaniit aallartillutik nerisut siunertarisanillu pitsaanerpaanik allaat maangaannartitsisut.“ — Teach Yourself Personal Efficiency.

Tamanna isumassarsisitaalluni Biibilimi allattup allagaanut naapertuuppoq: ’Suliassaminik peqqissaarinianngitsoq piminik aseruisup qatanngutigaa.’ (ússatit 18:9) Aap, inuit aaqqissuussaanngitsumik sunniisinnaassuseqanngitsumillu sulisut imminnik allanillu ajunaarutissiisarput. Tamannalu pissutigalugu inoqatiminnit ornigineqarneq ajorput. Peqqissaannginnermik kingunerisaanik imminnut ajunnaarutissittarput.

Qimmeq uumasoq imaluunniit løveq toqungasoq?

Aamma imminut naakkittaafigisinnaavugut imminut piumaffigivallaarnitsigut. Sunniisinnaassuseqarluartumik iliuuseqartarneq pillugu allattoq qulaani issuagarput oqarpoq ’angusinnaanngilluinnakkatsinnik imminut piumaffigivallaarsinnaasartugut’. Tamatuma, taassuma oqarneratut, kingunerisarpaa ’isumalluaataarunneq nikallorujussuarnerlu’. Pitsaalluinnartumik iliuuseqarnissaminut piumaffigivallaartoq immaqa aaqqissuussamik sunniisinnaassuseqarluartumillu iliuuseqartaraluarpoq, kisianni pillualivinngisaannarluni. Siusinnerusukkut kingusinnerusukkulluunniit imminut artukkerluinnartarpoq.

Pitsaalluinnartumik naammassisaqarnissatsinnik piumaffigivallaartuugutta eqqaamasariaqarparput ’qimmeq uumasoq iluanaarnerummat løvemit toqungasumit’. (Nalunaajaasup oqaasii 9:4) Pitsaalluinnartumik naammassisaqarnissatsinnik piviusorsiunngitsumik ilungersuutiginninnitsigut iluamik oqaatigalugu imminut toqunnavianngikkaluarpugut, kisianni qasusoorluinnarutta imminut ajoqusersinnaavugut. Tamatuma nassatarisaatut taaneqarsimapput „timikkut, misigissutsikkut, anersaakkut, silassorissutsikkut inunnullu allanut attaveqarnikkut qasusoorluinnarneq“. (Job Stress and Burnout) Anguneqarsinnaanngitsunik imminut anguniagassittarnikkut imminut qasusoortinneq imminut naakkittaaffiginerulluinnarpoq naggataatigullu pinngitsoorani pilluarnermik arsaarisuussalluni.

Imminut iluaqutissiortarit

Manna eqqaamajuk: „Naakkittartoq imminut iluaqutissiortarpoq.“ (Ussatit 11:17) Imminut iluaqutissiussaagut piviusorsiortunik silatusaartunillu anguniagalertarutta, eqqaamajuarlugu Guutip pilluartup, Jehovap, piginnaanitta killeqarnera nalunngikkaa. (Tussiaat 103:8-14) Piginnaanitta killeqarnera akuerigutsigu pisussaaffivullu pitsaasumik naammassiniarlugit piginnaanitta iluani ’sapinngisatsinnik’ iliuuseqartarutta pilluarsinnaavugut. — Eprîarit 4:11; 2 Timûtiuse 2:15; 2 Pîtruse 1:10.

Soorunami aamma tamatuma akerlianik ingasattajaartuunnginnissarput sianigisariaqarparput — imminut iluatatsippallaalinnginnissaq. Uffa aalajangersimalluinnartumik iliuuseqarnissaq pisariaqartinneqartoq Peterip ’imminut ajunngisaarfiginissaminik’ kajumissaarmani Jesusip akissutaa eqqaamajuk. Peterip  eqqarsariarnera tamanna ima navianartigimmat Jesus ima oqarsimavoq: ’Tununnut nigorit, Sataniaa, mamiatsaatigaakkit, Guutip pii pinnagit inuit pii isumagigakkit.’ (Matîuse 16:22, 23) Nammineq tarnimut iluaqutissiorneq tassaanngilaq soqutigittaatsumik imminuinnaq iluarusutsikkumatussuseq. Taamaaliorutta aamma pilluarneq annaassavarput. Silatusaarneq, ingasaassiniarneq pinnagu, pisariaqartipparput.

Allat iluaqutissiukkit

Jesusip nalaani allakkanik ilisimasut farisiiarillu isumaqarsimagunarput sunniisinnaassuseqarluinnartumik aaqqissuussaalluinnartumillu ingerlallutik. Taakkua guutisioriaasiat A Dictionary of the Bible-mi ima eqqartorneqarpoq: „Inassutit Biibilimeersut tamaviisa maleruagassaararpassuarnik soqutaarpianngitsunik ilaartorsimavaat. Pissutsit allanngoriartornerat eqqarsaatigineqarneq ajorpoq; Inatsisinut annikitsualuttaat tamaasa ilanngullugit naalalluinnarnissaq juutinut tamanut pinngitsuunngiivilluni piumasarisaavoq. . . . Inatsisitigut annikitsualunnik ima pilersitsiortortoqarsimatigaaq upperisarsiorneq inuutissarsiutigalugu atorfinngorsimalluni inuunerlu nammaganngorsimalluni naalliunnartoq. Ileqqussat tungaannit isigalugu inuit inuusaliatut nikanartunngortinneqarsimapput. Nalunngeqatiginnissutip nipaa nipangersinneqarsimavoq; oqaatsit Guutimeersut pissaanerat uumasoq kimeerussarneqarsimavoq maleruagassaararpassuarnillu atortuujuartussaatitaasunit ipitinneqarsimalluni.“

Tupinnanngilaq Jesus Kristusip tamanna pillugu assuarisimammagit. ’Ersugassanik oqimaatsunik ersunneq artornartunik qilersuisaraat,’ oqarsimavoq, ’inuillu tuiinut ilillugit, namminnerli assammilluunniit nuukkumasarinngilaat.’ (Matîuse 23:4) Ilagiinni utoqqaanertat asannittut inatsiseerarpassuarnik maleruagassaararpassuarnillu ’savaatinik’ artukkiiniartanngillat. Inussiarnernermik Jesus Kristusip maligassiaanik nutaannguallannartumik malinninnermikkut Guutip ’savaatai’ iluaqutaasumik iliorfigisarpaat. — Matîuse 11:28-30; Filípimiut 2:1-5.

Peqatigiiffeqarnikkut akisussaaffiit isumagisassatik amerligaluaraangataluunniit utoqqaanertat isumassuisut puiunngisaannassavaat inuit — inuit Guutip asasai — paarisarigamikkik. (1 Pîtruse 5:2, 3, 7; 1 Juánase 4:8-10) Peqatigiiffeqarnermut tunngasunik ima ulapputeqartigissanngillat ’savanut’ paarsisutut, nakkutilliisutut sernissuisutullu suliassartik pingaarnerpaaq puiorlugu. — Ussatit 3:3; 19:22; 21:21; Jesaja 32:1, 2; Jeremia 23:3, 4.

Piffissamik pilersaarusiat kisitsisillu uitsatigivallaaraanni allanut isumassuinissaagaluaq tunullinngortinneqarsinnaasarpoq. Takorlooriaruk bussimik ingerlatitsisoq isumaqartoq suliassani pingaarnerpaaq tassaasoq piffissamik pilersaarusiaq qanorluunniit akeqassagaluarpat pinngitsuunngiivilluni maleqqissaartussaallugu. Allamik eqqarsaateqanngivippoq taamaallaat aqqusaagassani piffissaq eqqorluinnarlugu tamatigut aqqusaartassallugit. Ajoraluartumik, taassuma isumaa naapertorlugu, ilaasussat akornutaannanngorsimapput. Arreeqaammi aaqqissugaanatillu, aatsaallu ingerlaqqileraangat bussit unittarfiannut apuuttarlutik. Uffa suliassavini tassaasoq ilaasut kiffartuunnissaat, ingerlalluaqqissaarnissaminut akornutaannaasutut isigilersimavai, sumiginnarlugillu.

Tamaasa immikkut isumassukkit

Sunniuteqarluarsinnaasumik iliuuseqarniarluni ilungersupilunneq inuit ataasiakkaat pisariaqartitaannik arajutsisaqarnermik kinguneqarsinnaavoq. Sanngiitsut, sunniuteqarluarsinnaasumik iliuuseqarsinnaanngitsut, immaqa oqimaaqutaannartut isigineqalersoorsinnaapput. Tamanna ajorluinnartunik kinguneqarsinnaavoq. Itsaq griikerit naalagaaffianni illoqarfimmi Spartami meeqqat sanngiitsut napparsimasullu qimaannarneqartarsimapput toquniassammata. Sakkutuunngorsinnaanngillammi nukittuut sunniuteqarluartullu illoqarfimmik nukittuumik sunniuteqarluartumillu illersuisinnaasut. Filosoffi Bertrand Russell ima nassuiaavoq: „Meeraq inunngoraangat  ataataata ilaqutariit utoqqaanertaannut misissugassanngortittarsimavaa. Meeraq peqqissuuppat ataataanut utertinneqartarsimavoq perorsarniassammagu. Peqqissuunngippalli itersamut itisuumut imilimmut iginneqartarsimavoq.“ — History of Western Philosophy.

Sukannerpallaarneq allanngortitsiumanngippallaarnerlu iliuutsimut soqutigittaatsumut tamatumunnga ilisarnaataapput. (Naleqqiuguk Nalunaajaasup oqaasii 8:9.) Spartami oqartussaasut qularnanngitsumik misigisimapput sunniuteqarluarsinnaasumik iliuuseqarnissap aqqani taamatut iliornissaminnut pissutissaqarluarlutik, iliuusialli naakkinninnermik inussiarnernermillu ilaqanngilluinnarpoq, Guutip piumasaanut naapertuutinngilluinnarluni. (Tussiaat 41:1; Ussatit 14:21) Tamatuma akerlerluinnaanik ilagiinni kristumiuni nakkutilliisut eqqaamavaat Guutip savaatai tamarmik taassuma isaani erlinnartuusut, taamaattumillu tamaasa immikkut ajunngitsumik iliorfigisarlugit. 99-it peqqissut kisiisaanngitsoq isumassorpaat, aammali sanngiitsoq misigissutsikkulluunniit atugarliortoq ataaseq isumassorlugu. — Matîuse 18:12-14; apustilit suliait 20:28; 1 Tásalûníkamiut 5:14, 15; 1 Pîtruse 5:7.

Savaatit qanimut attaveqarfigikkit

Utoqqaanertat savaatit isumassugassatik qanimut attaveqarfigaat. Niueriaatsinilli misissuinerni nutaanerusuni ersersinniarneqarpoq siuttuusup nakkutilliisuusulluunniit sunniuteqarluarnerpaamik angusaqarnissani kissaatigiguniuk nakkutigisani alisimaniartariaqarai. Paasiniaasartup paasiniarsimavaa timmisartortartup sakkutuup sakkutuut imminit atsinnerusut qanimut suleqatigigaangagit imaluunniit alisimagaangagit qanoq pisoqartarnersoq: „Qanimut suleqatigigaangatik sakkutuut toqqissisimarpasittarput, immikkoortortaqarfiillu ingerlalluarnersut ingasattumik isumakuluutigissanagu. Qullersartilli ilasseraarunnaarlunilu sukannerpasinnerulersorlu arlaannik ajortoqarnersoq isumaliutigilersarpaat . . . isumakululernertillu tamanna suliaminnik nakkutiginneqqissaarnerulernermikkut anittarpaat. Tamatuma kingunerisarpaa malunnartumik sakkutooqarfiup sunniuteqarluarsinnaasumik ingerlalernera.“ — Understanding Organizations.

Ilagiilli kristumiut sakkutooqarfiunngillat. Kristumiut utoqqaanertat allat suliaannik nakkutilliigaangamik Jesus Kristusip maligassiaa malittarpaat. Jesus ajoqersukkaminut qanimut attaveqartuaannarsimavoq. (Matîuse 12:49, 50; Juánase 13:34, 35) Isumakulunneri sunniuteqarluarsinnaasumik suli tunisisinnaanissaannik pinngitsaaliiniutitut atunngisaannarsimavai. Nammineq ajoqersukkamilu akunnerminni tatigeqatigiinnerup ilumoorfigeqatigiinnerullu nimianik peqarnissaa isumagisarsimavaa. Ajoqersugai qamannga pisumik asaqatigiinnermikkut ataqatigiinnermikkullu ilisarineqarsinnaasimapput. (1 Tásalûníkamiut 2:7, 8) Taamatut qanimut attaveqatigiinneqarpat savaatit nuannaartut, Guutimut asanninnerminnik pissuteqarluinnarlutik, pingitsaalineqarnatik siulersorneqarnerminnut ajunngitsumik qisuariartassapput, sapinngisartillu tamaat kajumillutik Guutimut kiffartorumassapput. — Naleqqiuguk 2 Moses 35:21.

Allassimaffippassuarni kristumiutut pissutsit pitsaasut soorlu pilluarneq qatanngutigiissuarnillu asanninneq pingaarnerutillugit eqqartorneqarput. (Matîuse 5:3-12; 1 Korintumiut 13:1-13) Tamatumunnga sanilliullugu versit ikittuinnaat sunniuteqarluarsinnaasumik iliuuseqarnissaq erseqqissarpaat. Qularutissaanngilaq aaqqissuussilluarnissaq pisariaqartinneqarmat. Guutip innuttai aaqqissuussaajuaannarsimapput. Eqqarsaatigiulli Guutip kiffai Tussiaatit-ni pilluartutut qanoq eqqartorneqaqattaartigisut. Tussiaat 119, Jehovap inatsisaanik, oqaaqqissaarutaanik inassutaanillu annermik eqqartuisoq, ima aallartippoq: „Pilluarpoq assuarnaatsumik inuuseqartoq [Jehovallu] inatsisaanik maleruaasoq. Pilluarpoq inassutaanik maleruaasoq, taassuminngalu ujarlersoq uummatimigut iluunngarluni.“ (Tussiaat 119:1, 2) Ataatsikkut pissutsit aaqqissuulluarlugit nuannaarlunilu ingerlaniarneq unamminiarnartoq illit sapissanngiliuk? (wD 1/4 93)

[Qupp. 28-mi assiliartaq]

Armillarsfære — „qilaap globusia“, ukiuni akullerni ’qilaap kaajaluinneranik’ ersersitsiniutitut atorneqartarsimasoq