Atuartartut apeqqutaat

Kristumiu naleqquttumik aappassarsisinnaanngikkuni qanoq iliorsinnaava?

Naak kristumiuugaluarluta tunniulluinnarsimasut qamuuna kissaatigisaraluarput pinngitsooraangat nuanniilliulersinnaasarpugut. Tamanna Ussatit 13:12-imi eqqortumik oqaatigineqarpoq: „Utaqqivallaarneq tarnikkut anniaataalersarpoq.“ Kristumiut katikkusukkaluartut naleqquttumilli aappassarsisinnaanngitsut taamatorluinnaq misigisinnaapput. Ingammik apustilip Paulusip oqarneratut ’pileritsaqqasut’ taama misigisimasinnaasarput. — 1 Korintumiut 7:9.

Angutaagutta arnat arnaaguttalu angutit akornanni ilumoortumik aappassarsinissamik kissaammik Jehovap uummammiulersimavaatigut. Taamaattumik tupinnanngilaq kristumiut kisimiittut pissusissamisoortumik taamatut misigisarmata. (1 Moses 2:18) Kissaat tamanna sakkortunerusarpoq inuiaat katinnissamik (imaluunniit aalajangersimasumik utoqqaassuseqaleraanni katinnissamik) pingaartitsisut akornanni inuugaanni, imaluunniit kristumiut kisimiittut ilagiinni aappariinnik pilluartunik avatangerneqarsimappata. Peqqinnanngilarli piffissami sivisunerusumi taamatut kipisagisaqartuarnissaq. Taavami qanoq ilillutik kristumiut ilumoorusuttut ajornartorsiut ajugaaffigisinnaavaat nikallorpallaarnissaraluartillu pinngitsoortillugu?

Tamanna oqitsuunngilaq, ajornartorsiullu allat suusupagisariaqanngilaat eqqarsaatitulluunniit eqqumiikuluttutut iperarumajunnaakkatut isigisariaqarnagu. Kisimiittorli pissutsit allanngortinniarlugit nammineq iliuuseqangaatsiarsinnaavoq.

Siunnersuut pitsaasoq tassa Biibilimi najoqqutassiamik atoriaannaasumik matuminnga malinninnissaq: ’Tunisineq tigusinermit pilluarnarneruvoq.’ (apustilit suliait 20:35) Tamanna Jesus Kristusimit (aappaqanngitsuusumit) oqaatigineqarsimavoq, namminerlu misilittakkani naapertorlugit oqarsimavoq. Namminissarsiunngitsumik pissuteqarluni inunnut allanut iliuuseqarneq misigissutsinik ’utaqqivallaarnerup’ nassatarisaanik ajugaaffiginninniarnermi ikiuutissaalluarnerpaavoq. Kristumiu aappaqanngitsoq qanoq iliorsinnaava?

Tassa ilaquttat ilagiillu iluini allanut iliuuseqarniarluni nammineq aallartittariaqarpoq, kristumiutullu kiffartornermi suliniutit allisillugit! Siunnersuutip tamatuma imatut oqarnerinnaq assiginngilaa: ’Ulapinniarit, katikkusunnerillu tamaat puigussavat.’ Naamik, kristumiutut iliuutsit iluaqutaasut tamakku ulapputigineratigut paasilissavat ’uummatikkut aalajangernartartoq’, nammineq ’piumasamut’ naalaganngornarluni taamaalillunilu ajunngitsumik angusaqarluni. — 1 Korintumiut 7:37.

Ilaat katikkusungaaramik allamik eqqarsaateqarunnaarsimapput. Allaammi aviisitigut aappassarsiorsimapput. Aappaqannginnerulli iluaqutissartai eqqarsaatigissallugit pitsaanerungaassaaq. — Naleqqiutikkit ilanngutassiat „Aappariinneq pilluarnermut aqqutissatuaava?“ aamma „Jehovamut kiffartornermi pilluarneq piviusoq“ Napasuliaq Alapernaarsuiffik-mi 1. juni 1992.

Jehova qinnuigisaruk aappaqannginnerit nikallujuillutit atoqqullugu. (Filípimiut 4:6, 7, 13) Kristumiorpassuit aappaqanngitsut Guutip oqaasianik atuaqqissaartarlutillu isumaliutiginneqqissaartarnermikkut kristumiullu ataatsimiittarnerinut najuuttarnermikkut peqataasarnermikkullu ’nutaamik nukissarsisimapput’, soorlu Jesusip imminik malinnikkusuttut neriorsorsimagai. (Matîuse 11:28-30, NV) Taamaaliortarnertik iluaqutigalugu anersaakkut peqqissutsimik imminni ineriartortitsisimapput, kingorna naleqquttumik aappassarsigunik uiulluarnissaminnut nuliaalluarnissaminnullu iluaqutigisassaminnik.

Puigunngisaannassavat Jehovap kiffami aappaqanngitsut atugaat nalunngimmagit. Nalunngilaa periarfissaqaraluarunik allatut qinersisimassagaluartut. Aamma Ataatatta qilammiusup nalunngilaa sivisunerusoq eqqarsaatigalugu anersaakkut misigissutsikkullu uagutsinnut suna ajunnginnerpaasoq. Ataaserlu qularutissaanngilaq: naammagittarluta Jehovap utaqqineratigut taassumalu najoqqutassiaanik ulluinnarni atuinitsigut misigissavarput pisariaqartitavut pingaarnerpaat naassaanngitsumik iluaqutissatsinnut matussutississagai. — Naleqqiuguk Tussiaat 145:16. (wD 15/1 93)