Inuusuttut — suna noqqaassutigaasiuk?

’Inuusuttut kajungerisaat qimarratiginiakkit, kisianni iluarneq uppernerlu asanninnerlu eqqissinerlu noqqaassutigikkit, uummatimikkut iluunngarlutik Jehovamik torlorfiginnittut peqatigalugit.’ — 2 TIMÛTIUSE 2:22.

1. Inuusuttut akornatsinniittut qanoq ingerlanissaat kissaatigaarput?

„JEHOVAP NALUNAAJAASUI ukiut tamaasa amerlanerpaanik ilaasortartaartarput procentinngorlugulu amerlanerpaanik inuusuttortaqarlutik,“ aviisimi Dagen-imi Sverigemi piinsisiortut saqqummersittagaanni taama allassimavoq. Immaqa illit inuusuttunut minguitsunut Guutimillu mianerinnittunut taakkununnga ilaavutit. Immaqa naalungiarsuuninniilli kristumiutut perorsarneqarsimavutit, immaqaluunniit aatsaat kingusinnerusukkut Naalagaaffimmik tusarliussaq tusarsimavat ilikkakkatillu ajunngitsumik qisuariarfigisimallugit. Qanorluunniilli ikkaluarpat, ilisimassavat akornatsinniinnerit nuannaarutigigipput. Neriuppugut ukiuni hundredelinni siullerni inuusuttut kristumiut aalajaatsut assigalugit iluarnerup aqqutaa atuassagit. Apustilip Johannesip oqaasii uku qularnanngitsumik aamma ilinnut tulluarput: ’Nakuuvusi Guutillu oqaasia ilissinniittuarpoq, ajortorlu artorsartipparsi.’ — 1 Juánase 2:14.

2. „Inuusuttuunerup upernaavani“ iluarnerup aqqutaanik atuaaniarneq suut artorsartarpaat?

² Ullumikkut kristumiut inuusuttut ilarpassuisa — aap, amerlanersaasa — silarsuup tatisiniarnera akiorpaat. Immaqali illit taamaaliornissaq ajornakusoortippat. ’Inuusuttuunerup upernaavaniikkaanni’ misigissutsit nutaat sakkortuullu pissutigalugit misigissutsikkut patajanarsinnaasarpoq. (1 Korintumiut 7:36, NV) Immaqalu misigisarputit atuarfimmi, angerlarsimaffimmi ilagiinnilu akisussaaffitit annertusiartuinnartut. Puiorneqassanngilarlu Satan Diaavulup tatisinera. Taassuma aalajangiusimavaa sapinngisamik amerlasuut tammartinniarlugit taamaattumillu Edenip naatsiiviani iliorsimanermisut sanngiippasinnerusunik saassussisarluni. Taamanikkut nukarliunerusoq misilittagakinnerusorlu Eva peqqusersusaarluni saassuppaa, utoqqaanerusoq misilittagaqarnerusorlu Adam pinnagu. (1 Moses 3:1-5) Ukiut hundredet arlallit tamatuma kingorna Satanip Korinthimi ilagiit kristumiut pilersitaaqqammersut tamatumunnga assingusumik periaaseqarluni saassuppai. Apustili Paulus ima allassimavoq: ’Ernumavungali, soorlu pulateriaarsuup peqqusersuulluni Eva salloqittaraa, taamattaaq ilissi eqqarsaatisi aserussasoralugit Kristusimut peqqusersuikkunnaarsillusi.’ — 2 Korintumiut 11:3.

3, 4. Satan Diaavulup suut inuusuttunut tammarsaarutigisarpai, qanorlu kinguneqarsinnaappat?

³ Immaqa aamma angajoqqaavit kristumiuusut qanoq ingerlajumaarnersutit isumakuluutigaat. Imaanngitsoq isumaqaramik arlaannik eqqunngitsumik iliussasutit, misilittakkatilli naapertorlugit nalunnginnamikku inuusuttut Satanip ’qoqassiiniarnerinit’ nakkartikkuminarnerusartut. (Evfisumiut 6:11) Satanip nakkartitsiniutai navianartorsuartut inngivittarput. Allaammi pilerinartutut kajungernartutullu ittaqaat. Tv-kkut pigisanik pingaartitsineq,  atoqatigiinneq ammaannartoq, peqqarniisaarneq anersaarsiornerlu aliikkutassatut saqqummiunneqartarput. Taamaalilluni inuusuttut isumaat ’ilumoortut suulluunniit, assuarnaatsut suulluunniit, iluartut suulluunniit, minguitsut suulluunniit aamma asanartut suulluunniit’ akerlerluinnaannik immerneqartarput. (Filípimiut 4:8) Satanip sakkua iluatsitsinartoq alla tassaavoq ilagisartakkanit tatineqarneq. Immaqa peqativit inooriaatsimikkut atisalersoriaatsimikkut nujalereriaatsimikkullu assigeqqullutik sakkortuumik tatiniartarpaatsit. (1 Pîtruse 4:3, 4) Aviisimi ilanngutassiortoq William Brown ima allassimavoq: „Inuusuttuaqqanut immikkut silamiorpaluttumik guuteqarsimaguni tassaasimassaaq assigiissaarinerup guutia. . . . Inuusuttuaqqanut toqumit ajornerusoq tassaavoq allanit allaaneruneq.“ Niviarsiaraq Italiamiu Jehovamut nalunaajaasut ilaat ima oqaluttuarsimavoq: „Kanngugisimavara atuaqatikka oqaluttuutissallugit Jehovamut nalunaajaasuullunga. Tamanna nikallussutigisarsimavara, nalunnginnakkumi Jehova nuannaartinnagu.“

⁴ Uukapaatitaaqinalli — nakkartinnissat Satanip kissaatigaa. Silarsuarmi inuusuttorpassuit nakkaannarlutik tammartitaanertik pissutigalugu annikilliornartussarsuarmi inuunertik annaassavaat. (Hesekiel 9:6) Aatsaat iluarnermik noqqaassutiginnikkaanni annattoqarsinnaavoq.

Ilagisartagapalaaqarnaveersaarit

5, 6. (a) Timoteus inuusuttoq Efesusimiinnermini sunik akiorniagassaqarsimava? (b) Paulusip Timoteus qanoq siunnersorpaa?

⁵ Tamanna apustili Paulusip Timoteusimut inuusuttumut siunnersuutaata pingaarnersaraa. Ukiut qulit sinnerlugit Timoteusip Paulus ajoqersuiartorluni angalanerini ilagisimavaa. Ilaanni Timoteus illoqarfimmi Guutimik nalusoqarfiusumi Efesusimiittoq, Paulus Romamiut parnaarussivianniippoq toqunneqarnissani utaqqillugu. Toqumik pillarneqarnermi naammassineqarnissaa qanilliartortillugu qularnanngitsumik Paulusip isumakuluutigisimassavaa Timoteus qanoq ingerlajumaarnersoq. Efesus illoqarfiusimavoq pigissaarfiunermigut, kanngunartuliorfiunermigut aliikkusersuiffiupilunnermigullu ilisimaneqartoq, Timoteusilu ajoqersortiminit asasaminit annertoqqutissarsiniarsinnaajunnaassaaq.

⁶ Taamaattumik Paulus ’ernerminut asasaminut’ ima allassimavoq: ’Illumili angisuumi kuultiinnarnik siilviinnarnillu puugutaqaraanngilaq, qisunnittaaq marrarnillu peqartarpoq, ilaat erligisat, ilaat erligisaanngitsut. Taamaattumik taakkununnga ilanngunnaveersaartoq puugutaajumaarpoq erligisaq, illernartitaq, illup inuanut atugassaq, iluartuliornernut tamanut piareersagaq. Inuusuttulli kajungerisaat qimarratiginiakkit, kisianni iluarneq uppernerlu asanninnerlu eqqissinerlu noqqaassutigikkit, uummatimikkut minguillutik Jehovamik torlorfiginnittut peqatigalugit.’ — 2 Timûtiuse 1:2; 2:20-22.

7. (a) ’Puuguttat erligisaanngitsut’ Paulusip mianersoqqussutigisai suuppat? (b) Paulusip unnersuussutaa ullumikkut inuusuttut qanoq ilillutik maleruarsinnaavaat?

⁷ Tassani Paulusip Timoteus mianersoqquaa allaat kristumioqataasa akornanni ’puugutaqarsinnaasoq erligisaanngitsunik’, tassa inunnik eqqunngitsumik ileqqulinnik. Timoteusip taamanikkut allaat kristumiut tanitat ilaanik ilaqartarnini ajoqutigisinnaasimappagu, qanormitaava ullumikkut inuusuttut kristumiut silamiunik ilagisartagaqarneq ajoqutissarsissutigisinnaatigissavaat. (1 Korintumiut 15:33) Imaanngilaq atuaqatitit susassariumanngivissagitit. Mianersuutigissavalli taakkununnga atavallaalinnginnissat, ilaannikkut allanut akulerukkumanngivissutut isigineqartassagaluaruilluunniit. Soorunami tamanna artornarsinnaaqaaq. Niviarsiaraq Brasiliameersoq ima oqaluttuarsimavoq: „Artornaqaaq. Atuaqatima festeriaqatiseriuartarpaannga kristumiunullu naleqqutinngitsunukaqatiseriuartarlunga. Tamatigut oqartarput: ’Sooq ilaarusunngilatit? Pikkunaangaaravit!’“

8, 9. (a) Sooq inuusuttunik silamiunik pitsaarpasikkaluanik ilagisartagaqarnissaq inuusuttunut kristumiunut navianarsinnaava? (b) Ikinngutit pitsaasut sumi nassaassaappat?

 ⁸ Immaqa inuusuttut silamiut pujortartanngitsut, oqaasipiluttanngitsut imaluunniit kanngunartuliortanngitsut ilagisartagarinissaat ajunngitsutut isumaqarfigineqarsinnaagaluarpoq. Iluarnermilli noqqaassutiginnittuunngippata eqqarsariartaasiannit isumaannillu uinimmut sammisumit sunnerteriaannaassaatit. Aammami uppinngitsut qanoq annikitsigisumik soqutigisaqaqatiginnginnerpavut? (2 Korintumiut 6:14-16) Ikinngutigiinnarsinnaanerpigit tamannalu ilutigalugu najoqqutassiat eqqortut aalajangiusimajuaannarlugit?

⁹ Taamaattumik ilagisartagapalaaqarnaveersaarit. Kristumiut anersaamut tunngasunik pingaartitsisut Jehovamillu asannilluinnartut kisiisa ilagisakkit. Aammalu ilagiinni inuusuttut pitsaanngitsumik isumallit isornartorsiueqqajaasullu ilagivallaarnaveersaakkit. Anersaakkut ineriartortillutit qularnanngitsumik aamma ikinngutinik qinersisarnerit allanngoriartussaaq. Inuusuttuaraq oqarsimavoq: „Ilagiinni assigiinngitsuniittunik ikinngutitaartorsimavunga, taamaattumik maanna paasisinnaalerpara silamiunik ikinnguteqarnissaq pisariaqanngivissoq.“

 Eqqarsaatit kukkusut qimarratigikkit

10, 11. (a) ’Inuusuttut kajungerisaannik qimarratiginninneq’ qanoq paasisariaqarpa? (b) Qanoq ililluni ’kinguaassiuutitigut kanngunartuliorneq qimarratigineqarsinnaava’?

¹⁰ Paulusip Timoteus aamma kajumissaarpaa ’inuusuttut kajungerisaat qimarratigeqqullugit’. Inuusuttuaraatilluni allanit nuannarisaanissaq, nuannisarnissaq kinguaassiuutikkullu pilerissutsinik naammassinninnissaq pingaartinnarsinnaasaqaat. Imminullu naalakkersimaarsinnaanngikkaanni kissaatit tamakku ajortuliortitsisinnaapput. Taamaattumik Paulus oqarsimavoq kissaatit ajoqutaasut tamakku qimarratigisariaqarivut — annakkumalluni qimaarsuataarnertut. *

¹¹ Assersuutigalugu kinguaassiuutitigut perusussuseq kristumiut inuusuttut ilarpassuisa anersaakkut ajunaarnerannut pissutaasimapput. Taamaattumik pissutissaqarluartumik Biibilimi oqaatigineqarpoq ’kinguaassiuutitigut kanngunartuliorneq qimarratigissagipput’. (1 Korintumiut 6:18, NV) Katinnissaq siunertaralugu ilagisartagariittut najoqqutassaq tamanna atorsinnaavaat ussernartorsiulersinnaaffitik ingalassimallugit, soorlu illumi inissiamiluunniit imaluunniit biilimi uninngasumi kisimiinnaveersaarlutik. Immaqa itsangagineqassaaq oqarutta piffissani tamakkunani pingajoqartariaqartut, kisianni taamaaliornissaq illersuutaasorujussuussaaq. Soorunami nuannariinnermik ersersitsisarnissaq annerusutigut ippinnanngikkaluartoq, taamaattoq ippinnartumik iliortoornissaq pinngitsoorniarlugu ilaatigut killissalersornissaq pisariaqarpoq. (1 Tásalûníkamiut 4:7) Kinguaassiuutitigut kanngunartuliornermik qimarratiginninnermut ilaavoq tv-kkut isiginnaagassianik filminillu kukkusumik kissaateqalersitsisinnaasunik iisiginnaarnaveersaarnissaq. (Jâko 1:14, 15) Kanngunartunik eqqarsaateqalersuussagaluaruit erniinnaq allanik eqqarsaateqalerniartariaqarputit, pisuttuarlutit, atuarlutit illulluunniit iluani arlaannik sammisaqarlutit. Aammalu qinuneq tamatumani sunniuteqarluartumik ikiuutissaalluarpoq. — Tussiaat 62:8. *

12. Ajortup uumissornissaa qanoq ililluni ilinniarneqarsinnaava? Assersuusiorit.

¹² Pingaarnerpaamik, ajortup uumissornissaa imaluunniit maajuginissaa ilinniartariaqarpat. (Tussiaat 97:10) Qanorli ililluni kajungernarlunilu nuannerunartoq uumigineqarsinnaava? Kingunissaata eqqarsaatigineratigut! ’Tammaqinasi, Guuti mitaatigeqqunngilaq, inuk siaruartikkani naapertorlugit katersuiumaarmat. Uinimminummi siaruarterisoq uinimmit aserujassummik katersuiumaarpoq.’ (Galâsiamiut 6:7, 8) Pilerissutsivit nakkaannarfiginissaannut ussernartorsiuleruit pingaarnerpaaq eqqarsaatiginiarsarigigiuk, tassa nakkaannaruit Jehova Guuti aliasutsissavat. (Naleqqiuguk Tussiaat 78:41.) Aammalu puiussanngilat naartulersoorsinnaagavit imaluunniit kinguaassiuutitigut nappaammik, soorlu AIDS-imik, tunillatsissinnaallutit. Eqqarsaatigissavattaaq imminut ataqqinerit annaassagakku misigissutsikkullu nuanniilliulerlutit. Aamma kingunersuanut allaat ajornartorsiutissaqalersinnaavutit. Arnaq kristumiu oqaluttuarsimavoq: „Uigalu naapinngikkallaratta allanik kinguaassiuutitigut atoqateqartarsimavugut. Naak ullumikkut marluulluta kristumiuugaluarluta siornatigut kinguaassiuutitigut ileqqorisimasavut aappariinnitsinni akerleriinnernut ningarnernullu pissutaasarput.“ Kinguaassiuutitigut kanngunartuliornermut nakkaannarneq aamma immikkut pisinnaatitaaffinnik teokratiimut tunngasunik annaasaqarnermik kristumiullu ilagiivinit anisitaanermik kinguneqarsinnaavoq. (1 Korintumiut 5:9-13) Sivikitsuinnarmik nuannisarneq  taama erlinnartigisumut akigissallugu qinngaqqunnaqaaq!

Jehovamut qanimut attaveqalerniarsarigit

13, 14. (a) Sooq ajortup qimarratiginissaannaa naammanngila? (b) Qanoq ililluni ’Jehovamik ilisarinninnissaq noqqaassutigineqarsinnaava’?

¹³ Ajortumilli qimarratiginninnissaannaq naammanngilaq. Timoteus aamma kajumissaarneqarpoq ’iluarneq, upperneq, asanninneq eqqissinerlu noqqaassutigeqqullugit’. Tassa iliuuseqarnissaq pisariaqarpoq. Pruffiiti Hoseasip Israelikkut ilumuunngitsuliortut assingusumik kajumissaarsimavai: „[Jehovamut] uterniarta . . . [Jehovalu] ilisarilissavarput taassuminnga ilisarinninnissaq noqqaassutigissagatsigu.“ (Hosea 6:1-3) Illit taamaaliorpit? Taamaaliorneq tassaannaanngilaq ataatsimiinnernut najuuttarneq angajoqqaanillu oqaluussiartoqateqartarneq. Arnaq kristumiu ima oqarsimavoq: „Angajoqqaama sallusuissummi ajoqersorsimavaannga, siusissukkullu kuisippunga. . . . Qaqutigorujussuaq ataatsimiigianngitsoortarpunga qaammatillu tamaasa oqaluussinermut peqataasarlunga, namminerli inuttut Jehovamut qanimut attaveqalernissara ineriartortinngisaannarsimavara.“

¹⁴ Niviarsiaraq alla nassuerpoq nammineq Jehova Ikinngutitut Ataatatullu ilikkarsimanagu, Anersaatulli kinaassuseqanngitsutut isiginerusimallugu. Kinguaassiuutitigut kanngunartuliorpoq katissimananilu anaananngorluni 18-inik ukioqarluni. Illit taamatut kukkuluttoqinak! Hoseasip kajumissaarutaa maliguk ’Jehovamillu ilisarinninnissaq noqqaassutigalugu’. Ullut tamaasa Jehova qinnuigisarukku saqeqatigalugulu qanimut ikinngutigilersinnaavat. (Naleqqiuguk Mika 6:8; Jeremia 3:4.) Ujartorutsigu ’tamatsinnit ungasinngikkaluaqaaq’. (apustilit suliait 17:27) Taamaattumik aalajangersimasumik Biibilimik atuaqqissaarfeqarnissaq pingaaruteqarpoq. Tamanna oqimaatsorsuusariaqanngilaq. „Ullut tamaasa 15 minuttit missaanni Biibilimi atuartarpunga,“ niviarsiaraq Melodymik atilik oqaluttuarpoq. Aamma Napasuliaq Alapernaarsuiffik-p Iteritsi!-llu normuinik tamanik atuarnissannut piffissalertarit. Ataatsimiinnernut tamanut piareersartarit ’asanninnermut ajunngitsuliornermullu allanik kajumissaarisinnaaqqullutit’. — Eprîarit 10:24, 25.

Uummatit angajoqqaannut tunniuguk

15. (a) Sooq angajoqqaanut naalannissaq ilaannikkut ajornakusoorsinnaava? (b) Sooq inuusuttut angajoqqaaminnut naalannerat iluaqutaasarpa?

¹⁵ Angajoqqaat Guutimik mianerinnittut ikiuutaasorujussuusinnaapput pisariaqartumillu nakussatsitsisinnaallutik. Namminerli qanoq iliortariaqarnerit malugisariaqarpat: ’Angajoqqaasi naalassigik Naalakkami, taama iluarmat. „Ataatat anaanallu ataqqikkit“, tassa inassut siulleq unnersuummik ilalik: „Nunami pilluaqqullutit inuummersoqqllutillu.“’ (Evfisumiut 6:1-3) Utoqqaanerujartortillutit qularnanngitsumik kiffaanngissuseqarnerorusukkiartussaatit. Immaqa aamma angajoqqaavit kukkuneri tamaasa paasilersimavatit. „Angajoqqaatta nunamiut,“ apustili Paulus oqarsimavoq, „taamaallaat pitsaanerpaasorisartik malillugu iliorsinnaasimapput.“ (Eprîarit 12:10, The Jerusalem Bible) Sivisunerusorli  eqqarsaatigalugu angajoqqaannut naalannissat ilinnut iluaqutaassaaq. Taakkua asavaatsit allanillu tamanit ilisarisimanerullutit. Naak immaqa isumaqatigiuaannanngikkaluaritit ilinnut pitsaanerusussamik iliorniartartuupput. Soormi ’Jehovami’ ilinnik perorsaaniarnerat akerlilersussaviuk? (Evfisumiut 6:4) Tassami iluamik oqaatigalugu sianiitsup kisimi „ataatami oqaaqqissaarutai asiginnartarpai“. (Ussatit 15:5) Angajoqqaat oqartussaassusiannik akuerinninnissaq taakkuninngalu eqqortumik ataqqinninnissaq silatusaarnerunerpaavoq. — Ussatit 1:8.

16. (a) Sooq ajornartorsiutinik angajoqqaanut toqqortuinissaq silatusaarnerunngila? (b) Inuusuttut angajoqqaaminnik oqaloqateqartarnertik pitsanngorsarniarlugu qanoq iliorsinnaappat?

¹⁶ Tassa angajoqqaannut unneqqarissuusariaqarputit ajornartorsiuteqaraangavillu oqaluttuuttarlugit. Imaassinnaavoq sallusuissummut tunngasumik apeqqutissaqartutit imaluunniit iluarpallaanngitsumik iliorsimasutit. (Evfisumiut 4:25) Angajoqqaannullu toqqortornissat ajornartorsiutinik amerlanerusunik pilersitsiinnassaaq. (Tussiaat 26:4) Nassuerutigisariaqarpoq angajoqqaat ilaat oqaloqatigiittarnissamik ilungersuussisorsuunngimmata. „Anaanama eqqissilluni oqaloqatiginngisaannarpaanga,“ niviarsiaraq inuusuttuaraq naammagittaalliorpoq. „Isummama aninnissaannut qunujuaannarsimavunga, anaanama isornartorsiuinissaa qunugisarakku.“ Illit aamma taama misigiguit piffissaalluartukkut angajoqqaatit tamatuminnga oqaluttuunniakkit. „Ernera, uummatit uannut tunniuguk,“ Ussatit 23:26-mi taama kajumissaaruteqarpoq. Ajornartorsiutivit annertusilluinnannginnerini angajoqqaavit oqaloqatigisalernissaat ileqquliunniaruk.

Iluarneq noqqaassutigiuaruk

17, 18. Suut iluaqutigalugit inuusuttut iluarnermik noqqaassutiginnittuaannarsinnaappat?

¹⁷ Paulus Timoteusimut allakkami aappaata naalerneranni ima kajumissaarivoq: ’Ilinniakkatit ilinnut uppernarsakkat aalajangerfigikkit ilinniarfigisat nalunnginnakku.’ (2 Timûtiuse 3:14) Aamma illit taamatut kajumissaarumavatsigit. Arlaannit sumilluunniit usserneqarlutit iluarneq noqqaassutigiunnaarnaveersaarniaruk. Satanip silarsuaa pilerisaaruterpassuaqaraluarluni ajussutsimik ulikkaarluinnarpoq. Qanittukkut tamatumunnga ilaasut tamaasa ilanngullugit suujunnaarsinneqassaaq. (Tussiaat 92:8) Satanimik malinnikkumasut ilagalugit aserorneqannginnissaat aalajangiusimajuk.

¹⁸ Taamaattumik anguniakkatit, kissaatitit soqutigisatillu sianigiuakkit. Imminut aperisarit: ’Angajoqqaakka ilagiinniittullu ilaginngikkaangakkit oqaatsikka iliuutsikkalu qutsissunik najoqqutaqarninnik ersersitsisuuppat? Ikinngutit qanoq ittut qinerpakka? Atisarisartakkama nujalereriaatsimalu qanoq ittuunissaannut inuusuttut silamiut aalajangiisuutittarpakka? Suut anguniagaraakka? Piffissara tamaat oqaluussisartunngornissara imaluunniit Satanip silarsuaani toqujartortumi qaffakkiartornissara siunniusimavara?’

19. (a) Sooq Jehovap piumasarisai inuusuttut sapiissuseerussutigisariaqanngilaat? (b) Suut inuusuttut iluaqutigisinnaavaat?

¹⁹ Immaqa paasilissavat eqqarsariaatsit allanngortittariaqarlugu. (2 Korintumiut 13:11) Sapiissuseeruteqinalli. Eqqaamassavat Jehovap piginnaanerit qaangerlugu piumaffiginngimmatit. Pruffiiti Mika ima oqarsimavoq: „Nalunngereerpat [Jehovap] ilinnit piumasarigai: Iluartumik iliussasutit, ilumoortumik asannissasutit, makitajuillutillu Guutit peqatigalugu inuussasutit.“ (Mika 6:8) Ikiuutissat Jehovap tunniuttagai atorluarukkit tamanna artornartorsuunavianngilaq. Angajoqqaatit qanimut attaveqarfigiuakkit. Ilagiit kristumiut ilagisakkit. Ingammik ilagiinni utoqqaanertat ilisarisimalernissaat sulissutigiuk. Taakkua ajunngitsumik ingerlanissat aammalu annertoqqusersornissat tuppallersartarnissallu soqutigaat. (Jesaja 32:2) Pingaarnerpaamillu, Jehova Guutimut qanimut qamanngalu pisumik attaveqalerniarsarigit. Iluartumik noqqaassutiginninnissannut nakussatsillutillu piumassuseqalersissavaatit. (wD 15/4 93)

[Quppernerup ataani ilanngussat]

Eqqaamavigit?

□ Sooq inuusuttut Satanip ’qoqassiiniarnerinit’ nakkartikkuminarnerusinnaappat?

□ Sooq inuusuttunik silamiunik ilaqarpallaartarnissaq navianarpa?

□ Kinguaassiuutitigut kanngunartuliorneq qanoq qimarratigineqarsinnaava?

□ Qanoq ililluni Jehovamut qanimut attaveqalerniartoqarsinnaava?

□ Sooq angajoqqaanik oqaloqateqarluartarnissaq pingaaruteqarpa?

[Atuaqqissaarnermi apeqqutit]

[Qupp. 24-mi assiliartaq]

Inuusuttut marluk ilagisartagariittut imminnut ilinniarniartut kisimiinniartanngikkunik silatusaassapput