Kikkut silarsuup qaamasua malippaat?
Kikkut silarsuup qaamasua malippaat?
’Silarsuarmi qaammaqqutaasutut qaamavusi.’ — FILÍPIMIUT 2:15.
1. Upperisarsiornikkut qaamanerit ilumuunngitsut pillugit Biibilimi qanoq allassimasoqarpa?
BIIBILIMI ersarissumik takutinneqarpoq Jesus tassaasoq ’qaamasorsuaq’, ’silamiunut qaammaqqutaasoq’. (Jesaja 9:2; Juánase 8:12) Inuilli amerlagisassaanngitsut Jesus nunamiikkallarmat malissimavaat. Amerlanersaasa qaammaqqut ilumuunngitsoq taarmik siaruarterisoq malissimavaat. Taakku Guutip oqaasiani ima oqaatigineqarput: ’Taamaattummi apustilioqqusersuupput peqquserluttulillutik sulisut Kristusip apustiliisut pissuseqartuusaartut. Tupinnanngillammi, Satan nammineq qaamasup inngiliatut pissuseqartuusaartarmat. Taamaattumik tupinnangaassanngilaq kiffaassaaq iluarnerup kiffaasut pissuseqartuusaartarpata; suliatilli naapertorlugit naggateqarumaarput.’ — 2 Korintumiut 11:13-15.
2. Jesusip oqaasii naapertussagaanni inuit suna tunngavigalugu eqqartuunneqarumaarpat?
2 Tassa inuit tamakkeratik qaamaneq kissaatigaat, qanorluunniit qaamaneq nuannertigigaluarpat. Jesus ima oqarsimavoq: ’Tassaavoq eqqartuussut, qaamasoq silarsuarmut pimmat, inuillu taartoq qaamasumit asaneruaat suliatik ajormata. Ajortuliortup qaamasoq uumigisarpaa, qaamasumullu piumasarinngilaq suliani nalunarunnaarsinneqaqqunagit.’ — Juánase 3:19, 20.
Taartumik asannittut
3, 4. Upperisarsiornikkut siuttut Jesusip nalaani inuusimasut qanoq ilillutik takutissimavaat qaamaneq malikkumanagu?
3 Jesus nunamiikkallarmat qanoq ililluni taamaassimasoq eqqarsaatigeriaruk. Guutip Jesus tupinnartuliorsinnaassutsimik piginnaanilersimavaa Messiasiunini uppernarsarsinnaaniassammagu. Ilaanni sabbatimi inunnguutsiminik tappiitsoq ajorunnaarsissimavaa takunnissinnaalersillugu. Jesus taamaaliorami naakkinnittuliorluinnarpoq! Ajorunnaarsitaa qujamasuttorujussuuvoq, aatsaammi inuulillaramili takusaqarsinnaalerami! Upperisarsiornikkulli siuttut qanoq qisuariarpat? Juánase 9:16-imi allassimavoq: ’Farisiiarit ilaat taava [Jesus pillugu] oqarput: „Inuk taanna Guutimit pinngilaq, sabbat uniortikkamiuk.“’ Kakkaak uummatimikkut ajormata! Nuanneqisumik ajorunnaarsitsineqarsimavoq, tappiitsuusimasorli nuannaaqatiginngivillugu Jesusilu, Guutip ernera, nalunanngilluinnartumik Guutip anersaavanik pigisaqartoq qujamasuffiginngivillugu, avoqqaaraat! Taamaalillutillu Guutip anersaavata naammassisaanut ersarissumut ajortuliorput, ajortuliorlutik isumakkeerfigineqarsinnaanngitsumik. — Matîuse 12:31, 32.
4 Kingorna, upperisarsiortut ilumoortuusaartut taakkua tappiitsuusimasoq Jesus pillugu apersormassuk taanna ima oqarsimavoq: ’Tupinnaqaaq [Jesus] sumit pisoq nalugassiuk, isikkalu uisikkai. Ilisimavugut ajortuliortut Guutip tusanngikkai, kisianni Guutimik mianerinnittut peqqusaanillu iliortut tusartarpai. Silarsuaqartillugu tappiitsuulluni erniusup isaanik uisitsisumik tusartoqanngisaannarpoq. Una [Jesus] Guutimit pinngikkuni qanoq-iliorsinnaanngeqqajaqaaq.’ Upperisarsiornikkut siuttut qanoq qisuariarpat? ’Akivaat oqarlutik: „Tamarsuarpit ajortiliullutit erniusutit ajoqersorumavisigut?“ Ajallugulu anisippaat.’ Misiginneqatiginnissuseqanngivipput — uummataat ujaqqatut manngertigalutik. Taamaattumik Jesusip oqarfigai naak isiminnik takunnissinnaagaluarlutik anersaakkut tappiitsuusut. — Juánase 9:30-41.
5, 6. Upperisarsiornikkut siuttut ukiuni hundredelinni siullerni inuusimasut sutigut allatigut takutissimavaat taartoq asallugu?
5 Upperisarsiortut ilumoortuusaarniartut taakku Guutip anersaavanut ajortuliornerat aamma erserpoq taamani Jesusip Lazarus toqusunit makitimmagu. Tupinnartuliaq tamanna pissutigalugu inuppassuit Jesusimut uppertunngorput. Upperisarsiornikkulli siuttut taakku qanoq iliorpat? ’Taava palasiunerit farisiiarillu killisiuisoqatigiissussanik ataatsimut qaaqqusipput oqarlutik: „Qanoq pissaagut? Inuk taanna amerlasuunik nalunaaqqutiliormat. Ilaginnaannarutsigu tamarmik upperfigilissavaat, taavalu Romamiut nunarpullu innuttavullu tigujartussavaat.“’ (Juánase 11:47, 48) Atorfimmik nuimasumillu inissisimanermik annaanissaat annilaangassutigaat. Qanorluunniit akeqassagaluarpat Romamiunut — Guutimuunngitsoq — iluareqqusaarput. Taava qanoq iliorpat? ’Ullormit tassannga isumalioqatigiittarput [Jesus] toqukkumallugu.’ — Juánase 11:53.
6 Taamaaliuinnanngillalli. Tulliullugu iliuuserisaata ersersippaa taaq qanoq asatigigaat. ’Palasiunerit isumalioqatigiipput Lazarusissaaq toqukkumallugu, taanna pissutigalugu juutit ilarpassui tassunnarmata Jesus upperfigilerlugu.’ (Juánase 12:10, 11) Tassa ajussutsimik taasarialik! Naalli atorfitsik illersorniarlugu iliuuseqaraluaqisut qanoq pisoqarpa? Kinguaariit taamani inuusut suli nungutsinnagit, ukiumi 70-imi u.n.k., Romamiut tikiupput inaannillu naalagaaffiannillu arsaarlugit, allaallu toqorarlugit! — Jesaja 5:20; Lúkarse 19:41-44.
Jesusip misiginneqataassusia
7. Sallusuissummik nuannarisaqartut sooq Jesus ornigartaqaat?
7 Aamma ullumikkut inuit ilarpassui anersaakkut qaammarsarneqarumanngillat. Inuilli ilumoornermik nuannarisaqartut qaamanermut perusupput. Guuti kisiat oqartussaasutut isigiumavaat ilungersorlutillu Jesus, qaamanermik nassuiaasussatut Guutip aallartissimasaa, ujartorpaat, malillugulu. Inuit maniguuttut Jesus nunamiikkallarmat taamaaliorsimapput. Taassumunnga ussagartorsuussimapput. Tamanna allaat farisiiarit miserratigisinnaasimanngilaat. ’Tamarsuarmik malimmassuk’ assut naammagittaalliuutigisimavaat. (Juánase 12:19) Aap, inuit eqqortuliorusuttut Jesus asasimavaat, upperisarsiornikkut siuttut namminissarsiortut pissaaneqarumatuullu assiginngilluinnarmagit. Ilumoortuusaarniartut taakku pillugit Jesus ima oqarsimavoq: ’Ersugassanik oqimaatsunik ersunneq artornartunik qilersuisaraat inuillu tuiinut ilillugit, namminnerli assammilluunniit nuukkumasarinngilaat. Suliatilli tamaasa suliarisaraat inunnut isigeqqullutik.’ — Matîuse 23:4, 5.
8. Upperisarsiornikkut ilumoortuusaartut assiginagit Jesus qanoq ittuua?
8 Akerlianilli Jesusip misiginneqataassusia malugiuk: ’Inuppassuit takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut.’ (Matîuse 9:36) Ikiorniarlugit qanoq iliorpa? Satanip aaqqissuussaanit atornerlugaasimasut ima oqarfigai: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi. Nammaatarami iluaqaaq, nammakkiussaralu oqeqaluni.’ (Matîuse 11:28-30) Jesus Jesaja 61:1, 2-mi imminut siulittuutigineqartutut iliorpoq: „[Jehovap] . . . aallartippaanga nalunaarut nuannersoq ikiortissaqanngitsunut oqaatigeqqullugu, neriuutaaruttut neriuuteqalerseqqullugit, parnaarussat torlulaffigeqqullugit iperagaanissamik, qilersorsimasullu aniguisitaanissamik; torlulaatigeqqullugit [Jehovap] ukiua saammaassivik ullorlu Guutitta akiniaaffia, aliasuttut tamaasa tuppallersaqqullugit.“.
Qaammaqqusersuisussat katersorneqarput
9. 1914-imi sunik pingaaruteqartunik pisoqarsimava?
9 Qilaliareerami Jesusip Guutip Naalagaaffimmi pissaanermik imminut tunniussinissaa utaqqisussaasimavaa. Taava tamatuma kingorna ’savat’ ’savaasallu’ immikkoortitertussaasimavai. (Matîuse 25:31-33; Tussiaat 110:1, 2) Taamaaliornissaanullu piffissanngorpoq 1914-imi ’ullut kingulliit’ aallartimmata. (2 Timûtiuse 3:1-5) Taava Guutip qilammi naalagaaffiani kunnginngortitatut Jesusip talerpimmi tungaanut iluarisani qaamasumik malinnikkumasut katersulerpai. Sorsunnersuup siulliup kingorna katersuineq tamanna assut siuariartulersimavoq.
10. Inuit Jesusip katersuinermi atugai pillugit qanoq aperisoqarsinnaava?
10 Jesus Kristusip siulersuineratigut katersuineq tamanna siuariartorsimaqaaq. Inuit oqaluttuarisaanermi aatsaat taama amerlatigisut nunanillu assigiinngitsorpassuarnit pisut pallorfiginninnermut qaammarsakkamut ilumoortumullu katersuussimapput. Ullumikkut qaamarnermik Guutimeersumik Kristusimeersumillu qaammarsaasut kikkuuppat? Kikkut Filípimiut 2:15-imi allassimasutut ’silarsuarmi qaammaqqutaasutut qaamappat’, allat kajumissaarlugit ’imeq inuunartoq akeqanngitsumik tigoqqullugu’? — sarĸúmersitat 22:17.
11. Kristumiuuneraqatigiit anersaakkut qaamanermut attuumassuteqarpat?
11 Kristumiuuneraqatigiit taamaaliornerpat? Naamik, kristumiuuneraqatigiit, akerleriinnik silamiorpaluttunillu immikkoortortallit, taamaaliunngivipput. Kristumiuuneraqatigiit palasii Jesusip nalaani upperisarsiornikkut siuttut assigilluinnarpaat. Qaamanermik Guutimeersumik Kristusimeersumillu ilumoortumik qaammarsaaneq ajorput. Ukiut 33-t matuma siorna atuagassiami Theology Today-mi ima allassimavoq: „Ajoraluartumik nassuerutigisariaqarparput qaamaneq tamanna oqaluffinni malunnartumik qaamaneq ajortoq. . . . Oqaluffeqarfiit inuiaqatigiittut avataangiisiminniittutut ilerajuttarput. Silarsuarmut qaamaqqusersuisuunatik silarsuup nammineq qaamarnata assinganik qaamatitsipput.“ Ullumikkut kristumiuuneraqatigiit qanoq issusiat suli ajorneruvoq. Qaamanermik taaneqartoq kristumiuuneraqatigiit silarsuarmit ilaagaat qaamanerunani tassaavoq taaq, taartuunngitsumimmi allamik Satan silarsuaalu tunniussassaqanngillat. Aap, kristumiuuneraqatigiit, tamarmik immikkut ajoqersuutillit silamiorpalulluinnartullu, sallusuissutip qaamarnanik qaamatitaqanngilluinnarput.
12. Ullumikkut ilumoortumik qaammaqqusersuisut kikkuuppat?
12 Ullumikkulli nalorninngivilluta oqarsinnaavugut ilagiinnik kristumiunik ilumoortunik, peqatigiiffimmik qaammaqqusersuisumik, nassaassaqartoq: tassa silarsuup nutaap inuiaqatigiivi, Jehovap Nalunaajaasui. Taakkununnga ilaasut — angutit, arnat meeqqallu tamarmik — ataasioqatigiilluinnarlutik qaamasortik Jehovameersoq Kristusimeersorlu inuiannut tamanut qaamatippaat. Siorna Jehovap Nalunaajaasuisa ilagiivini 70.000-ingajanni qaammaqqusersuisut 4 millioninit amerlanerusut Guuti taassumalu siunertai pillugit inunnut allanut oqaluuttuussisarnermik ulapputeqarluarsimapput. Ukiut tamarluinnaasa inuit anersaakkut qaammarsarneqarusuttut ussagartarput. Ukiut tamaasa inuit hundredelinnik tuusintilikkuutaat Biibilimik atuaqqissaareerlutik sallusuissullu pillugu eqqorluartumik ilikkareerlutik kuisittarput. Aap, Guutip kissaatigaa ’inuit tamarmik annassasut sallusuissummillu ilisarsilissasut’. — 1 Timûtiuse 2:4.
13. Jehovamit qaamaneq sumut assersuunneqarsinnaava?
13 Jehovamit anersaakkut qaammarsarneqarneq assersuunneqarsinnaavoq itsaq Guutip innuttaasa Egypten qimammassuk pisumut. „[Jehova] Israelikkut siornatigut ingerlasarpoq, ullukkut napasumi nuiaasumiilluni aqqutissaannik ajoqersuukkumallugit, unnuakkullu napasumi innerusumiilluni qaammarsarumallugit, tassa ullukkut unnuakkullu ingerlasinnaaqqullugit.“ (2 Moses 13:21, 22) Napasoq nuiaasoq napasorlu innerusoq tassaasimapput Guutip siulersuinera tatigisassaasoq. Seqernup, Guutip ullukkut qaammarsarumalluta pinngortissimasaata, qaamarnatulli tatigisassaatigisimavoq. Taamaattumik qularutigissanngilarput Jehovap inuit ullumikkut ulluni kingullerni ajortuni sallusuissutikkut ingerlajumasut aqqutaat anersaakkut qaammarsassagaa. Ussatit 4:18-imi neriorsoqqissaarneqarpugut ’iluartup aqqutaata assigigaa ullaap qaammalernera qaammarissiartortoq ulluuneratut qaamatigilerserlugu’.
Naalagaaffiup qaamarnanik qaammarsaagit
14. Qaammaqqusersuisut qaamatitaata qiterisaa pingaarnerpaaq suusariaqarpa?
14 Jehova tassaammat qaamarnup pilerfia Kristusilu tassaalluni qaamarnup tamatuma assinganik qaamatitsinerpaaq, aamma Jesusip ajoqersugai qaamanertut taassumatut qaamatitsisariaqarput. Ajoqersukkani ima oqarfigai: ’Silarsuup qaamasoraasi. . . . Taamattaaq qaamasorsi qaamali inunnut, ajunngitsuliasi taakkununnga takoqqullugit Ataatarsilu qilammiusoq unnersiutigeqqullugu.’ (Matîuse 5:14, 16) Qaamarnup Jesusip ajoqersugaasa inunnut qaamatitassaata tamatuma qiterisaa pingaarnerpaaq suua? Inuiaat oqaluttuarisaaneranni piffissat pingaarnerpaartaanni tamaani inunnut allanut suna ilinniartitsissutigissavaat? Jesus oqanngilaq ajoqersukkami oqaluussissutigisassaat tassaasoq demokratii imaluunniit kisermaassilluni naakkittaatsumik naalakkersuineq, ilagiit naalagaaffiullu peqatigiinnissaat isumaluunniit silamiorpaluttoq alla. Matîuse 24:14-imili siulittuutigaa „naalagaaffimmik nutaarsiassaq nuannersoq“ naak akerlilersuineqaraluartoq silarsuaq tamakkerlugu oqaluussissutigineqassasoq „inuit najugarisaanni tamarsuarmi inuiaat tamarmik nalujunnaarutissaannik; taavalu naggatissaq nalliutissaaq“. (NV) Taamaattumik ullumikkut qaammaqqusersuisut inoqatitik Guutip naalagaaffianik, Satanip silarsuaanik suujunnaarsitsisussamik silarsuarmillu nutaamik naapertuilluarfiusumik pilersitsisussamik, oqaluttuuttarpaat. — 1 Pîtruse 2:9.
15. Qaamanermik nuannarisaqartut sumut ornigukkumassappat?
15 Qaamanermik nuannarisaqartut silamiut isumaliutersuutaannit anguniagaannillu tammartitaannginnissartik sianigisariaqarpaat, qanittukkummi tamakku tamarmik suujunnaarsinneqassapput, silarsuummi naggatissaa qanilliartuinnarpoq. Akerlianilli nutaarsiassaq nuannersoq, Guutip naalagaaffiata qaamarnanik nunarsuarmut tamarmut qaammarsaasut oqaluussissutigisaat, tusarnaarniartariaqarpaat. Taakku sarĸúmersitat, kapitali 7, versini 9-mi 10-milu ima siulittuutigineqarput: ’Kingorna takunnikkama, ata, amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat, issiavissaarsuup [Guutip] saani savaaqqallu [Kristusip] saani qeqartut. . . . Nipituumillu torlulapput oqarlutik: „Annaassut Guutitta issiavissaarsuarmi issiasup savaaqqallu pigaat.“’ Versi 14-imi ima nanginneqarpoq: ’Tassaaku annikilliornartumit angisuumit pisut.’ Aap, silarsuup matuma naggatissaani aniguissapput Guutillu naalagaaffiata aqutsinerani silarsuassamut nutaamut, naassaanngitsumik atasussamut, isissallutik.
Silarsuaq nutaaq qaammarsarneqarsimasoq
16. Annikilliornartussarsuarmi Satanip silarsuaa qanoq pineqassava?
16 Silarsuassaq nutaaq tamanna sallusuissutip qaamarnanit qaammaarissumit ulikkaarluinnaassaq. Takorlooriaruk qanoq issasoq aaqqissuussaanermik matuminnga Guutip atorunnaarsitsinera aqaguinnarpat. Satan, inngilipilui aammalu politikkikkut, niuernikkut upperisarsiornikkullu aaqqissuussai tamarluinnarmik peersimassapput! Aamma Satanip isumaqatissarsiorluni iluaqutiginiagai tamarmik peerussimassapput. Taamaattumik annikilliornartussarsuup kingorna aviisinik, atuagassianik atuakkanillu silarsuarmik matuminnga tapersersuutaasunik naqiterisoqartarunnaassaaq. TV-kkut radiokkulluunniit kusanaatsumik isumaqatissarsiortoqartarunnaassaaq. Satanip silarsuaani avatangiisit toqunartut tamarmik amiakkuerullugit ataaseerlugit nungunneqassapput! — Matîuse 24:21; sarĸúmersitat 7:14; 16:14-16; 19:11-21.
17, 18. Satanip silarsuaata suujunnaarsitaanerata kingorna anersaakkut avataangiisit qanoq issusissaat nassuiarsinnaaviuk?
17 Taamanikkussamut assorsuaq toqqissiallannassaaq! Inuiaat tamarmik anersaakkut qaamanermit peqqinnartumit ineriartornartumillu Jehovamit taassumalu naalagaaffianeersumit taamaallaat sunnerneqartalissaapput. Soorlu Jesaja 54:13-imi siulittuutigineqartoq: „Qitornatit tamarmik uannit, [Jehovamit], ajoqersorneqassapput, eqqissisimangaarlutillu inuussapput.“ Guuti nunarsuarmut tamarmut naalagaalerpat ’inuit najugaanni nunallit iluartuliornissamik ilikkarnissaannik’ neriorsuut Jesaja 26:9-miittoq eqquutissaaq.
18 Isumakkut anersaakkullu avatangiisit tamarmik iluarsiartorasuassapput. Suut pisut tamarmik ineriartornartuussapput, maannakkutut nikallornaratillu ileqqorluttuliaassanatik. Taamanikkussamut inuusut tamarmik Guuti taassumalu siunertai pillugit sallusuissummik ilinniartinneqassapput. Siulittuut Jesaja 11:9-miittoq tamakkiisumik eqquutissaaq: „[Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“
Qaamaneq malittariaqarparput
19, 20. Qaamanermik malinnikkumasut sooq eqqumasariaqarpat?
19 Ullumikkut aaqqissuussaanerup ajortup matuma ukiuini kingullerni pingaartorujussuuvoq ’silarsuup qaamasuanik’ taaneqartoq malissallugu. Sianigeqqissaartariaqarpugullu, tassami qaamasumi ingerlaqqunata saassunneqaqattaartuarpugut. Saassussineq tamanna taartup pissaanilissuineerpoq — Satanimit, inngilipiluinit nunarsuarmilu peqatigiissortaanit. Taamaattumik apustili Peter ima mianersoqqussisimavoq: ’Putumatsaalillusilu eqqumagitsi, akerartortersi Diaavulu liiuertut uiannisaartutut angalasarmat iisassarsiorluni.’ — 1 Pîtruse 5:8.
20 Qaamanermit attaveqarfigineqartut Satanip sunannguaq tamaat atorlugu akornuserniartarpai, taartumiiginnaqqugaluarnermik. Tamatumunnga ilaasinnaavoq qanigisanit ikinngutinilluunniit sallusuissut ingerlateqqunagu unitsinniarneqarneq. Imaluunniit Biibilip upperinissaanut qulalerneq, upperisapalaanit tappiillisinneqarsimanermit imaluunniit Guuteqannginneraasut upperisaqanngitsulluunniit isumaqatissarsiornerannit pissuteqartoq. Imaluunniit nammineq ajortilittut sanngiissutit Guutip piumasaanik naammassinninniarnerigaluaq artornartunngortissinnaavaat.
21. Guutip silarsuassaani nutaami inoorusuttut tamarmik qanoq iliortariaqarpat?
21 Akornutissat tamaasa akiornissaat silarsuarmilu piitsoqaranilu, pinerlunniartoqaranilu, naapertuilluanngitsuliortoqaranilu sorsunneqanngitsumi inuulernissat ilumut kissaatigaajuk? Nunarsuarmi paratiisiusumi peqqilluinnarlutit naassaanngitsumik inoorusuppit? Taamaappat Jesus Kristus silarsuup qaamasuatut akuerisariaqarpat taassumalu ajoqersugaasa, ’oqaatsimik inuussutaasumik aalajangiussisut’, ’silarsuarmi qaammaqqutaasutut qaamasut’ tusarliussaat tusarnaartariaqarlugu. — Filípimiut 2:15, 16. (wD 1/4 93)
Qanoq akissavit?
□ Upperisarsiornikkut siuttut qanoq ilillutik takutittarpaat taartoq asallugu?
□ Jesus inunnut qanoq pissuseqarsimava?
□ Qaammaqqusersuisunik katersuineq qanoq ingerlasimava?
□ Allanngornerit annertuut suut qanittumi piumaarpat?
□ Sooq ullumikkut silarsuup qaamasuata malinnissaa pingaartorujussuua?
[Atuaqqissaarnermi apeqqutit]
[Qupp. 14, 15-mi assiliartaq]
Farisiiarit manngertunik uummatillit angut Jesusip tappissisitaa ajattorlugu anisippaat