Biibili atorfissaqartipparput?

OXANA, arnaq inuusuttoq russeq, qiimmatsaqaaq Moskvami aqqusinermi biibilimik tuniniaasoq takuleramiuk. Ingiaqataata, Johnip, nunamit kikkut tamarmik biibilisisinnaaffigisaaneersup Oxanap nuannaangaarnera tupigusuutigeqaa. „Pitsippaara, naak uanga Guutimik upperisaqanngikkaluarlunga,“ oqaluttuarpoq. Oxanap aallaqqaammut pinaaseqqaaraluariarluni naggataagut tunissutaa tiguaa.

Amerlasuut Oxanatut Biibilimik pigisaqarusupput. Ingammik nunani ukiorpassuarni Biibilimik inerteqqutaaffiusimasuni taamaappoq. Atuagassiamik matuminnga naqiterisitsisut Biibilip piumaneqassusia malinnaaffiginiarlugu soorlu Sovjetrepublikkiugaluami, nunarsuullu ilaani allani, sulissussilluarput. Sumiiffinni tamakkunani inuit amerlasuut aatsaat Biibilimik misissuinissaminnut periarfissaqalersimapput — amerlasuullu oqariartuutaanut kimittuumut kajungilersimapput.

Isornartorsiuisut qulartullu

Maanili Danmarkimilu Biibili atuagaasivimmut ilineqarsimavoq, tassanilu pujoralammik tigooraasuinnanngorsimalluni. „Oqaluttuarisaaneq toqungasoq!“ ilaat oqarput, nangillutillu: „Piffimmut allamut allataavoq. Inunnut pissutsinut malinnaasunut oqaassutissaqanngilaq.“ Allaat ilagiinni siulersuisut nuimanerusut tamanut ammasumik Biibilimik nikanartitsiniartumik oqaaseqartarsimapput. Anglikanerit biskopiunerat Desmond Tutu Afrikami kujallermi aviisi The Star naapertorlugu oqarsimavoq: „Biibilip ilaa ataavartumik naleqanngilaq.“ Oqaatsit taamaattut pissutigalugit amerlasuut Biibilimut qanoq uppertiginissartik eqqarsaatigilersimavaat.

Siunnersorneqarnissamik pisariaqartitsineq

Isornartorsiuisut uppertullu miserratigisinnaanngilaat silarsuup aatsaat taama aaqqiissutissanik pisariaqartitsitigilersimanera. Inuup inuunermini inuiaqatigiinnilu allannguutaasartut aqussinnaanissai piaartumik ilikkartariaqarpai, ajunaarnersuaq pinngitsoortissagutsigu,“ Alvin Toffler atuakkiamini Fremtidschok-mi allappoq. Mianersoqqussut tamanna oqaatigineqarmalli ukiut 20-t sinnerlugit qaangiutereerput. Ajunaarneq Alvin Tofflerip eqqartugaa massakkorpiaq pisorinarpoq.

Ukiut hundredellit makkua naalerneranni malunnarpoq teknikkikkut ineriartornerup inuillu isumaliutersuutaasa silarsuaq aalajaatsunngortissinnaanngikkaat. Silarsuarmik nutaamik aaqqissuussinissamik neriugisaagaluit pakatsissutaasimapput, amerlasuullu ulluinnarni inuunerat artornarsisimavoq.

Kisitsisitigut naatsorsuinerit takutippaat pisuut piitsullu assigiinngissutaat annerulersimasoq. Qanittukkut misissuinerit takutippaat silarsuarmi pisuussutit 82,7 procentii innuttaasut 20 procentiinnaannit pigineqartut. Taamaammat eqqumiiginassava nunani amerlasuuni sorsunnerit, kaanneq, nappaatit, pikitsitsinerit inatsisaatsuliornerlu pisarmata? Inuunerlukkiartornerup inuit misigissusii nanertorpai, taamaalilluni inuiaqatigiit tunngaviat, ilaqutariit, ajutoortinneqarpoq.

Naak amerlasuut, Alvin Toffleritut, isumaqaraluartut, tassa inuit akisussaffigigaat „periaatsinik nutaanik nassaarnissaq aalajaassinnaanissaq piniarlugu“, piviusut takutippaat inuit namminneerlutik ajornartorsiutitik aaqqissinnaanngikkaat.

 Periarfissatuaq

Biibili, ukiut 3500-t matuma siornagut aallanneqalersimasoq, ukiut hundrelikkuutaat ingerlanerini allanngorsimanngilaq. Najoqqutassiai atortuarneqarsinnaapput. Assersuutigalugu Jeremia 10:23-ip oqaasertaasa ilumoorneri ullumikkut aatsaat taama erseqqitsigipput: „Inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ Inuilli ajornartorsiutiminnik aaqqiisinnaanngippata, taava kina aaqqiisinnaava? Biibilip aaqqiisinnaasutuaq tikkuarpaa: „Uanga tassa [Jehova], Guutit, iluaqutaasunik ilinnik ajoqersuisoq, ingerlavigisassakkut ingerlatitsisoq.“ — Jesaja 48:17.

Biibilip quppernerini Jehova Guutip qanoq immitsinnut ikiorsersinnaanersugut ilinniartippaatigut. Qanoq ingerlasariaqarnitsinnik unnersuutinik ulikkaarpoq. Siunnersuutai piffissami allanneqarfimminnisulli atorsinnaatigipput. Ilanngutassiap tulliuttup takutissavaa Biibili ullutsinnittaaq qanoq atorneqarsinnaasoq. Amerlasuutigut, peqqinnissamut atugarissaarnermullu, ilaqutariilluni inuunermut ileqqoqarnermullu tunngasutigut, ullumikkut sioqqatut maagaliornartutut ittumi Biibili qaarsutut aalajaatsutut ittoq takussavat.

[Qupp. 4-mi assiliartaq]

Silarsuatsinni eqqissiveqanngitsumi Biibili kisaraarput aalajaatsoq