Biibili — ullumikkut inunnut najoqqutassaalluartoq

„Allakkat tamarmik Guutip isumassarsiarititarai iluaqutaasumillu atorneqarsinnaallutik . . . inuit inuunerannut unnersuussutitut.“ — 2 Timûtiuse 3:16, „The Jerusalem Bible“.

ALLASSIMAFFIUP uuma takutippaa sooq Biibili ullutsinni suli atorneqarsinnaanersoq, tassa Guutimit isumassarsiarititaagami. Guutip pinngortitarigamisigut, timerput, isumarput, misigissutsivut pisariaqartitavullu allanit tamanit nalunnginnerpaavai. Israelikkut kunngiat David Jehova Guuti pillugu oqarsimavoq: „Naarmiuusunga isivit takusimavaanga, timima pisatai allassimapput illit allattaavinni.“ (Tussiaat 139:16 NV) Pinngortitsisup taama ilisimatigippatigut, qanoq ililluta pilluarsinnaanitsinnut qanorlu ililluta inooriaaserissisinnaanissatsinnut unnersuussutai misissussallugit naleqassaqaaq.

Misilittakkat takutippaat Biibilip najoqqutassiai  ullutsinni atoriaannaallutillu piviusorsiortuusut. Ersarissumittaaq allaatiginnippoq. Biibilip ullumikkut atoriaannaaneranut assersuutit sisamat aajuku.

Inuit ileqqui imminnullu attaveqarnerat: Pissuserissaarnissamut najoqqutassianik allanut attavigissaarnissamut siuarsaasunik Biibili imaqarpoq. Assersuutigalugu Israelikkut ima peqquneqarput: „Akinialerituussanngilatit puttarsisaqarnikkullu uumissuineq ileqqorinagu. Tullit ilittut asassavat.“ (3 Moses 19:18) Naak Israelikkunnut inatsisit uatsinnut atortussaanngikkaluartut, Biibilip najoqqutassiai maleruarutsigit tullerput eqqisseqatigissavarput. Assersuutitullu eqqarsaatigeriaruk Galâsiamiunut allakkani 5:22, 23-mi allassimasut inuit tamarmik ineriartortissinnaagaluarpatigit ajornartorsiutit qassit pinngitsoortinneqarsinnassagaluartut. ’Anersaalli inerititai tassa asanninneq tipaatsunnerlu eqqissinerlu kamajuinnerlu avaaginninnerlu angajoqqaatsernerlu ilumoornerlu qanilaarnerlu piitaajuinnerlu; taamaattunut inatsisit assortuinngillat.’ — Naleqqiuguk Rûmamiunut agdlagkat 8:5, 6.

Ilungersunartulli pissutaallutik aaqqiagiinnginnerit akiuunnerillu pilersarput. Taamaattoqartillugu Ussatit 29:11-mi mianersoqqussut eqqaamassallugu illersuutaassaaq: „Sianiitsup kamannini tamatigut anittarpaa, sianisuulli nunusinnaasarpaa.“ — Naleqqiuguk Ussatit 15:1; Matîuse 7:12; Kulorsamiunut agdlagkat 3:12-14.

Siunnersuut pitsaasoq tamanna atorneqarsinnaava? Aap, tamanna Frankrigimi angutip isummamigut allanngoriataartarsimasup misigisimasaagut erserpoq. Arlaleriarujussuarluni imminut ajornartorsiortittarsimavoq, allaat allanik saqitsaassisimanini pissutigalugu parnaarussaasarsimalluni. Tilluuttartuni pissartaanini iluaqutigisimanngilaa. Ataatsimik ataatanilu kamaassimapput, imaaliallaannarlu ataatani natermut uppitissimallugu. Imminnut attaveqarnerannut ajoqutaarujussuarpoq.

Taavali angutip taassuma Jehovamut nalunaajaasut attaveqarfigilersimavai Biibilillu najoqqutassiai ilinnialerlugit. Tamatumalu pissutsiminik allannguisissimavaa. Sulissutiginnilluarnerata allanngortippaa qanilaartunngortillugulu. Ullut ilaanni ataatani eqqissivissioqatiginiarlugu ornissimavaa. Angutaatalu ernermi allangorsimanera tupigusuutigingaaramiuk pisimasut puigorpai.

Tamanna apustilip Paulusip oqaasiisa ilumoornerannut assersuutit ilaannaraat: ’Guutimmi oqaasia uumavoq killinnartorsuullunilu pananillu illuttut kiinalinnit tamanit ipinnerulluni . . . uummatillu eqqarsaatai isumaalu killisiorsinnaallugit.’ — Eprîarit 4:12.

Ilaqutariilluni inuuneq: Ilaquttatit pilluarpat? Ilaqutariippassuit taamaanngillat. „Ersarippoq ilaqutariittut inuuneq aaqqissuussatut isigalugu navianartorsiortoq,“ Afrikami kujallermi aviisi The Natal Witness allappoq. Nangilluni allassimavoq ’ullutsinni meeqqat inuit atugarisaatigut mumisitsinermut inunngortartut’.

Ilaqutariilli ajornartorsiuleraangata unnersuutinik iluaqutigisinnaasaannik Biibili ulikkaarpoq. Assersuutigalugu allassimavoq uiusut ’nuliatik asasariaqaraat soorlu timitik’. Uiusullu tamanna maleruarpagu, nuliata akillugu ’uiminik mianerinninnini’ nuannaarutigissavaa. (Evfisumiut 5:25-29, 33) Angajoqqaat meeqqallu imminnut attaveqarnerat Evfisumiut 6:4-mi allaatigineqarpoq: ’Ilissi angajoqqaat, qitornasi narrutsatseqinasigik, paariniarsigilli perorsarlugit inertertarlugillu [Jehovamit].’ Siunnersuut tamanna angajoqqaat maleruarpassuk, ilaqutariinni pissutsit pitsaasuussapput meeqqat Biibilip maleruaqqusaanik maleruaanissaannik angajoqqaaminnullu naalannissaannik ajornannginnerulersitsisumik.— Evfisumiut 6:1.

Tamanna Biibilip ilaqutariinnut oqariartuutaanut assersuutaannaavoq. Amerlasuut Guutip unnersuussutaanik maleruaasimasut ilaqutariilluni inuuneq pilluarnartoq angusimavaat. Edward, marlunnik meeralik,  oqaluttuarpoq Biibilip najoqqutassiaanik maleruaanini qanoq iluaqutigisimallugu. „Aappariinnerput aseruleraluarsimavoq,“ oqaluttuarpoq. „Meeqqannut siunertaqartumik attaveqarnissannut piffissaqarsimanngilanga. Ilaqutariinnut Biibilip siunnersuutaasa malerualersimanerata annaassimavaatigut.“ — Ussatit 13:24; 24:3; Kulorsamiut 3:18-21; 1 Pîtruse 3:1-7.

Sianissutsikkut, timikkut misigissutsikkullu peqqinneq: Ilisimatusarnerit takutissimavaat timikkut peqqinneq sianissutsikkut misigissutsikkullu peqqinnermut tunngassuteqartoq. The World Book Encyclopedia allappoq: „Uummatip tillernerata sukkatsinnera, aap qullasippallaarnera, nukinik sukattoortitsineq, isumatsarujussuarneq aallussilluarsinnaannginnerlu paatsiveerusimaarnermut nalunaaqutaapput nalinginnaasut.“ Isumaqartoqarpoq nakuuserneq aqqutigalugu paatsiveerusimaarneq akiorneqarsinnaasoq.“Tilluunneq paatsiveerusimaarnermut akiuutaalluarpoq,“ Afrikami kujallermi aviisi The Star isumaqarpoq. Fitnessimi siunnersorti Jannie Claasens issuarpaa: „Arnaq ullormut uisakajaarsimaguni, tilluunnermut sungiusaammik tilluinermigut qasukkarsinnaavoq.“

Ajunnginnerpaassannginnerpa uisakajaartitsisut akiornissaat ilikkassallugit? Atuagassiami Stress — The Modern Scourge-mi dr. Michael Slutzkin oqarpoq ’paatsiveerusimaarnerup nassuerutiginissaa pingaartuusoq, pissutaasummi amerlasuut peerneqarsinnaammata’. Nangipporlu ’paatsiveerusimaarnermik katsorsaaneq . . . nappaatinik assigiinngitsorpassuarnik katsorsaaniarnermi iluaqutaasinnaasoq’.

Uisakajaarnermut illersuutaasinnaalluartumik Biibili unnersuussivoq: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik . . . eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (Filípimiut 4:6, 7) Uisakajaarneq taamatut akiorniarlugu iluaquterpassuaqarpoq — aamma timikkut. Biibilimi ussat imaappoq: „Uippalliaanneq timip inuummarississutigisarpaa.“ (Ussatit 14:30) Ussat alla imaappoq: „Uummatikkut nuannaarneq peqqinnartuuvoq, nikallunganerli saanernik aseroriartortitsisarpoq.“ — Ussatit 17:22.

Uisakajaarneq ulaperujunnerlu qaangerniarlugit amerlasuut tupamut, imigassanut ikiaroornartunullu saattarput. Atornerluinerit taamaattut ajoqutaanerannut uppernarsaatissaqarluarpoq. Biibilimi siunnersorneqarpugut ’uinngup anersaallu mingui tamaasa piiaqqullugit’. (2 Korintumiut 7:1; naleqqiuguk Ussatit 23:29-35.) Qularutissaanngilaq tamakkuninnga ajoqutaasunik ingalassimanninneq ullumikkut silarsuarmi illersuutaalluarmat.

Sulineq, aningaasat peqqusersuitsuunerlu: Eqiasunneq imminut akilersinnaanngilaq. „Eqiasuttoq ukiakkut assallatserineq ajorami katersuiffiup nalaani inerittunik ujaasisaraluarpoq nassaassananili,“ Ussatit 20:4-mi allassimavoq. Suleruloornerli akerlianik akilersinnaavoq. ’Tillittartoq tillissaarli,’ Evfisumiunut agdlagkat-ni 4:28-mi allassimavoq, ajunnginnerungaarpormi ’suliniarluni assamminik ajunngitsuliorluni, ajorsartunut tunniussassaqaqqulluni’. — Naleqqiuguk Ussatit 13:4.

Ilisimaviuk Biibilip najoqqutassiai sulisitsisup sulisullu attaveqarnerannut iluaqutaasinnaasut? Sulisut Biibilip nalaanisut ’kiffatulli’ ’uinikkut naalagarisatik tamatigut naalattariaqarpaat’. Sulisitsisut, imaluunniit ’naalakkat’, ’iluartumik ileqqorisariaqartumillu’ sulisutik pisariaqarpaat. — Kulorsamiut 3:22-24; 4:1; naleqqiuguk 1 Pîtruse 2:18-20.

Biibili peqqusersuitsumik niuerneq pillugu oqaassutissaqaqaaq. Naak ullutsinni peqqusersuinneq amigaataagaluartoq, kissaatiginartutut isigineqartarpoq. Biibilip tamanna erseqqissarpaa, Jesusimi ilaanni oqarsimavoq: ’Minnikkut ilumoortoq amerlasuutiguttaaq ilumoorpoq, minnikkullu ilumuunngitsoq amerlasuutiguttaaq ilumuunngilaq.’  — Lúkarse 16:10; naleqqiukkit Ussatit 20:10; 22:22, 23; Lúkarse 6:31.

Nunami Afrikamiittumi diamantinik nioqqutissiorfimmi tillinneq peqquserluttuliornerlu atugaasimaqaat. Taamaattumillu nioqqutissiorfimmut tassunga allamik ittussarsiorniarlutik aalajangertoqarsimavoq. Naalakkersuisuni ministerit qinnuigineqarsimapput tassunga atorfinissinnaasorisamik aqqinik allattueqqullugit. Naalakkersuisullu ataatsimiilermata allattukkat misissorneqarput atillu ataasiakkaarlugit piiarneqarlutik, peqquserlunneq pissutaanerulluni. Naggataagullu ateq ataasiinnanngorpoq — præsidentip siunnersuutaa.

„Ila, partiimut ilaasortaanngilaq!“ ministeri ataaseq akerliliivoq.

Præsidenti akivoq atorfik politikkimut tunngassuteqanngitsoq.

„Jehovamulli nalunaajaasuuvoq,“ alla oqarpoq.

„Taamaattumillu atorfik pissavaa,“ præsidenti aalajangiivoq. Nangipporlu: „Nalunngilarput peqqusersuitsuusut, inullu taamaattoq pisariaqartipparput. Nalunngilarput tatigisinnaallutigu.“

Aap, Biibilip najoqqutassiaanik maleruaasut ullutta silarsuaaniikkaluarluta iluaqutaasinnaasut misigigajuppaat.

Ilisimassut atoriaannaasoq toqqoruk

’Guutimik ilisarsilerneq’ qanoq isumaqarnersoq assersuutialutsigut takoreerparput. (Ussatit 2:1-9) Biibilimi naleqquttunik atoriaannaasunillu siunnersuuterpassuaqarpoq. Makkununnga tunngasunut najoqqutassiaqarpoq: eqqiluitsuuneq, eqiasuinneq, atassuteqarneq, kinguaassiuutitigut atoqatigiinneq, avinneq, akileraarutinut tungasut, inuit akornanni aaqqiagiinnginnermut piitsuunerullu ajornartorsiortitsineranut aaqqissutissat, ilaannaat taassagaanni. Millonillit uppernarsarsinnaavaat Biibilip najoqqutassiai malerualeramikkik inuunertik pitsanngoriarujussuarsimasoq.

Biibilimik maleruaaneq massakkuinnaanngitsoq siunissamili ungasinnerusumi aamma iluaqutaassaaq. Assersuutigalugu Biibilip neriorsuutigaa ullutsinni anniarnerit naalliunnerillu pissutaat Guutip akulerunneratigut peerneqassasoq. — Daniel 2:44; 2 Pîtruse 3:11-13; sarĸúmersitat 21:1-5.

Taamaattumik kajumissaarumavatsigit annertunerpaamik Biibili ilinniaqqullugu. Biibiliuteqanngikkuit, pissarsiariniarniaruk. Atuagassiamik uuminnga naqiterisitsisut ikiussallutit nuanaarutigissavaat. Allarpassuit Biibilip siunnersuutaanik maleruaanermik maannakkut siunissamilu iluaquserneqarsimanerattulli, Guutip oqaasiata pingaaruteqarneranik paasininnissannut ikiorneqassaatit. (wD 1/5 93)

[Qupp. 7-mi assiliartaq]

Ilaqutariit pilluartut ineriartortinneqarnerini Biibili najoqqutaalluarpoq