’Ilagiit utoqqaanertaat qaaqquligit’

’Napparsimasumik ilaqarussi ilagiit utoqqaanertaat qaaqquligit.’ — JÂKO 5:14.

1, 2. (a) Jehovap kiffai sunit navianartorsiortinneqarpat, qanorlu tamakkuninnga sunnerneqarsinnaappat? (b) Apeqqutit suut maanna akissutissarsisariaqarpavut?

PISSUTSIT ’ajornartut’ anigoruminaatsut ullumikkut atuupput. Inuit namminissarsiortuupput, pigisanik pingaartitsivallaartuupput pingaarniartuullutillu. ’Ullussat kingulliit’ tamakku inuit akornanni eqqissiviilliorfiupput. (2 Timûtiuse 3:1-5) Kristumiut pissutsit aaqqissuussaaneranni ajortumi inuusut pingasunit annertuunit navianartorsiortinneqarput: Satan Diaavulumit, inuiaat silarsuaannit guutiitsumit, kiisalu ajortilittut periataartarnerminnit kingornussaasumit. — Rûmamiut 5:12; 1 Pîtruse 5:8; 1 Juánase 5:19.

² Immaqa ilaannikkut misigisarpugut navianaatit tamakku akiornissaannut nukissavut naammanngitsut. Taavami aalajaalluta nikallujuittuarsinnaaqqulluta annertoqqutissatsinnik sumi nassaarsinnaavugut? Kristumiutut ileqqutsinni guutisiornitsinnilu aalajangigassaqaraangatta kikkut siunersiorsinnaavavut?

Ikiortissaq qaneqaaq

3. Kimut tuppallersartittarsinnaavugut, qanorlu ililluta?

³ Jehova nakussatsitsisigalugu nalunnginnatsigu tamanna tuppallersaatigalugulu toqqissisimassutigisarparput. (2 Korintumiut 1:3, 4; Filípimiut 4:13) Guutip ikiuinera tussiaasiortup  Davidip misigisarsimavaa, taamaattumillu ima allassimalluni: „Atugassatit [Jehovamut] isumagitikkit, tatigiuk ikiunngitsoornavianngimmatit.“ „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ (Tussiaat 37:5; 55:23) Guutip annertoqqusersuineranut qujamasussalluta pissutissaqarpugut.

4. Peterip Paulusillu qanoq tuppallersarsinnaavaatigut?

⁴ Aamma tuppallersaatigisinnaavarput nalunnginnatsigu kisittaanngitsoq misilinneqartarlutalu navianartorsiortinneqartarluta. Apustili Peterip kristumioqatini ima kajumissaarsimavai: ’Taanna [Satan Diaavulu] assortorsiuk uppernikkut aalajangerlusi, ilisimagassigik silarsuarmi qatanngutigisasi taamaaqataannik naalliutsitaasartut.’ (1 Pîtruse 5:9) Kristumiut tamarmik kissaatigilluinnarpaat uppernikkut aalajaannissartik. Immaqa apustili Paulusitut misigisarpugut ’tamatigut naalliutsitaasarluta’. Paulus naalliutsitaasutut misigigaluarluni ’annikilliortutut’ misigisarsimanngilaq. Immaqa taassumatut ’nikallungasaraluarpugut nikallorluinnartarnatali’. Allaat qinugisaagaluarluta ’qimagaasutut’ misiginavianngilagut. Immaqalu ’qunutitaagaluarluta nungutitaasutut’ misigineq ajorpugut. Taamaattumik ’nikallunngilagut’, ’takussaasulli pinnagit takussaanngitsut isiginiarsarisarlugit’. (2 Korintumiut 4:8, 9, 16, 18, NV) Qanoq ililluta taamaaliorsinnaagatta?

5. Suut pingasut aqqutigalugit Jehovap ikiortarpaatigut?

⁵ Jehovap, ’qinnutitsinnik tusartartup’, pingasut aqqutigalugit ikiortarpaatigut. (Tussiaat 65:3; 1 Juánase 5:14) Siullermik, oqaatsini isumassarsiarititaasut Biibilimiittut aqqutigalugit unnersuussutiminik neqeroorfigisarpaatigut. (Tussiaat 119:105; 2 Timûtiuse 3:16) Aappassaanik, anersaani illernartoq aqqutigalugu piumasaminik iliorsinnaaqqulluta nakussatsittarpaatigut. (Naleqqiuguk apustilit suliait 4:29-31.) Pingajussaanillu, nunami peqatigiissortai uagutsinnik ikiuinissaminnut piareersimajuaannarput. Ikiuut tamanna pisinnaajumallugu qanoq iliortariaqarpugut?

„Inuit tunissutaasut“

6. Jehova Taberami qanoq ikiuisimava, qanorlu ililluni?

⁶ Pruffiitip Mosesip nalaani pisimasup takutippaatigut qanoq ililluni Jehovap kiffani asannittumik ikiortarsimagai. Puilasuitsumi Sinajimi, Taberami, isumaqartumi „inneq, ikualaneq, naaralaarneq“, Guutip israelikkut naammagittaalliortut innermik ikualaffigilerpai. „Allamiut Israelikkunnut ilanngussimasut“ Israel Egyptenimit animmat malinnaasimasut Israelikkullu Guutip nerisassiissutaanik naammagittaalliutiginnilersimapput. Moses inunnut taakkualu pisariaqartitaannut akisussaanerminit artukkerneqartutut misigigami nalunginnamiullu Guuti kamattoq ima suaarpoq: „Kisimiillunga inuit tamaasa kissumiarsinnaanngilakka. Artorpakka. Artorsinniarumma taava erniinnaq toquinnaruma pitsaaneruvoq. Isinnut saammaannarsiguma ajunaarnissama misiginissaanut asattuunniannga!“ (4 Moses 11:1-15) Taava Jehova qanoq iliorpa? „Isralikkuni utoqqaanertaasut 70-it“ toqqarpai anersaaminillu tunillugit, Moses isumagisassaanik oqilisaanniassammassuk. (4 Moses 11:16, 17, 24, 25) Angutit piukkunnaatillit taakku toqqarneqarmata Israelikkut ’allamiullu Israelikkunnut ilanngussimasut’ sukkanerusumik unnersuunneqarsinnaalerput. — 2 Moses 12:38.

7, 8. (a) Itsaq Israelimi Jehova qanoq ililluni „inunnik tunissutaasunik“ tunissuteqarsimava? (b) Paulus naapertussagaanni Tussiaat 68:19 ukiuni hundredelinni siullerni qanoq eqquussimava?

⁷ Israelikkut nunami neriorsuutigisami ukiorpassuarni nunaqareersullu Jehova assersuutikkut Zionip Qaqqaanut qaqivoq Jerusalemilu naalagaaffimmi siumut assersuutaasumi Davidimik kunngeqartumi illoqarfinnut pingaarnersanngortillugu. Guutip, „Ajugaqanngitsup“, unnersiutigineqarnissaanut Davidip erinarsuut una appippaa: „Qutsissumut qullarputit, tiguakkat aallaruppatit, inuit tunissutaasut immikkoortippatit.“ (Tussiaat 68:15, 19, NV) Angutimmi nunap neriorsuutigisaasup tiguagaaqqanerata nalaani tigusaasimasut Levikkunnik pisussaaffiinik ikiuisussanngortitaapput. — Esra 8:20.

 ⁸ Ukiuni hundredelinni siullerni ukiunik naatsorsuisalerfitta kingorna apustilip kristumiuusup Paulusip tussiaasiortup oqaasiisa siulittuutaasumik eqquunnerat innersuussutigisimavaa: ’Tamattali immikkut Kristusip tunioraanermini uuttuutigisaa missiliorlugu saammaannermik tunineqarpugut. Tamanna pillugu ima oqaaseqarpoq: „Qutsissumut pavunnarluni tigusat aallaruppai, [inunnillu, NV] tunissutinik tunivai.“ Pavunnartumilli oqaaseqarmat imaanngila nunap ilaanut atsissunut samunnarallarsimasoq? Samunnartoq taannaavoq pavunnartoq qilaat tamarmik qulaannut, suut tamaasa tamakkissagamigit.’ (Evfisumiut 4:7-10) Kinaana taanna ’samunnartoq’? Sunaaffami allaanani tassaavoq Jehovap aallartitaa, David anneq, kunngi Messiasiusoq, Jesus Kristus. Taanna tassaavoq Guutip makititaa qutsissisitaalu ’akitsingaartillugu’. — Filípimiut 2:5-11.

9. (a) Ukiuni hundredelinni siullerni kikkut tassaappat „inuit tunissutaasut“? (b) Ullumikkut kikkut tassaappat „inuit tunissutaasut“?

⁹ Taava ’inuit tunissutaasut’ taakkua kikkuuppat? Paulus oqarpoq Guutip aallartitaata pingaarnerpaap ’ilaat apustilinngortissimagai, ilaat pruffiitinngortissimallugit, ilaat iivangkiiliulersaartunngortissimallugit, ilaat paarsisunngortissimagai ajoqersuisunngortillugillu, iluartut naammattunngoqqullugit, kiffartuutissaq suliareqqullugu, Kristusip timaa ineriartorteqqullugu’. (Evfisumiut 4:11, 12) Jesusip ajoqersugaasa ilaat apustiliusimasut, pruffiitiusimasut, iivangkiiliulersaartuusimasut, paarsimasuusimasut ajoqersuisuusimasullu tamarmik kiffartuutertik Guutimit siulersorneqarlutik suliarisimavaat. (Lúkarse 6:12-16; apustilit suliait 8:12; 11:27, 28; 15:22; 1 Pîtruse 5:1-3) Ullumikkut anersaap illernartup utoqqaanertat anersaakkut piukkunnaateqartut Jehovap Nalunaajaasuisa ilagiivini 70.000-it missinginiittuni nakkutilliisunngortissimavai. Taakku tassaapput inuit uagutsinnut tunissutaasut. (apustilit suliait 20:28) Naalagaaffimmik oqaluussissutiginninneq nunarsuaq tamakkerlugu annertusiartuinnarpoq, qatanngutillu angutit amerliartuinnartut ’paarsisutut suliaq’ anguniagaraat nakkutilliisutut akisussaaffeqalerniarlutik. (1 Timûtiuse 3:1) Toqqagaanermikkut aamma taakku tassaalertarput inuit tunissutaasut.

10. Ullumikkut kristumiut utoqqaanertat Esajasip ’naalakkanik’ siulittuutaanik qanoq ilillutik eqqortitsippat?

¹⁰ Kristumiut utoqqaanertat taakku, tassaasut inuit tunissutaasut, „naalakkat“ Naalagaaffiup naalakkersuinerani aqutsisuusussat pillugit Esajasip siulittuutaanut naleqqupput: „Tamarmik assigissavaat anorersuarmut oqquiffik sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa.“ (Jesaja 32:1, 2) Tassuuna erserpoq angutit toqqagaasut taakkua asannittumik nakkutilliinerat qanoq kajumissaarisuutigisariaqartoq. Aaqqissuussaq tamanna qanoq ilillutit tamakkiisumik iluaqutigisinnaaviuk?

Siulliullutit iliuuseqartarit

11. Nikallungagaangatta qanoq ililluta ikiortissinnaavugut?

¹¹ Immami ajunaalersoq utaqqeqqaarnani ingerlaannaq ikiortissarsiorluni suaartartarpoq. Inuuneq navianartorsiortillugu ikiortissarsiornissamut kajumissaarneqaqqaartariaqanngilarluunniit. Aamma kunngi Davidip Jehova torlorfigisarsimavaa ikioqqulluni. (Tussiaat 3:5; 4:2; 5:2-4; 17:1, 6; 34:7, 18-20; 39:13) Aamma uagut nikallungagaangatta immaqalu misigigaangatta ajornartorsiutit anigorsinnaanagit Jehova qinunikkut saaffigisarparput qinnuigalugulu anersaaminik illernartumik siulersussagaatigut. (Tussiaat 55:23; Filípimiut 4:6, 7) Biibili tuppallersaatissarsiorfigisarparput. (Rûmamiut 15:4) Napasuliaq Alapernaarsuiffiup Peqatigiiffiata atuagassiaatai siunnersuutinik atoriaannaasunik ujaasiffigisarpavut, taamaalillutalu nammineq ajornartorsiutivut aaqqissinnaasarpavut. Kisianni misigigutta ajornartorsiutitta artukkerluinnaleraatigut ilagiit utoqqaanertai siunnersoqqulluta aamma qinnuigisinnaavavut. Ilaannikkut ’utoqqaanertanik qaaqqusinissaq’ pisariaqalersinnaasarpoq. Sooq utoqqaanertat kristumiut qaaqqusariaqarpat? Anersaakkut ikiorneqarnissaq pisariaqartitarput qanoq ilillutik tunniussinnaavaat?

12-14. (a) Napparsimagaanni qanoq iliortariaqarpa? (b) Kristumiut ’napparsimasut’ Jâko 5:14-imi qanoq siunnersorneqarpat? (c) Nappaat suna Jâko 5:14-imi pineqarpa? Akissutit tunngavileruk.

¹² Napparsimaleraangatta timitta sulinera  iluarseqqissinnaaqqullugu uninngasarpugut. Nappaappulli iluarsineq ajuleraangat soorunami nakorsiartarpugut. Aamma anersakkut napparsimaleraangatta taamaaliortariaqannginnerpugut?

¹³ Tamatumunnga atatillugu ajoqersukkap Jakobip siunnersuutaa malugiuk: ’Napparsimasumik ilaqarussi ilagiit utoqqaanertaat qaaqquligit, qinnussavaallu uuliamik tanillugu Jehovap aqqani.’ (Jâko 5:14) Nappaanuna suna Jakobip pigaa? Biibilimik nassuiaasartut ilaasa timikkut nappaat tassani pineqarnerarpaat, taamanikkunngooq napparsimasumik uuliamik taniisarneq nalinginnaammat. (Lúkarse 10:34) Ilaat isumaqarput Jakobip immikkut piginnaanillit aqqutigalugit tupinnartuliornikkut ajorunnaarsitsineq eqqarsaatigigaa. Oqaasiisali ataqatigisai qanoq ersersitsippat?

¹⁴ Jakobip ’isumalluarneq’ ’naalliunnerup’ akerliatut eqqaavaa. Taamaattumik pissutissaqarluarpugut isumaqassalluta anersaakkut napparsimaneq pigaa. (Jâko 5:13) Ilagiinngooq utoqqaanertaat’, imaanngitsoq nakorsaq imaluunniit tupinnartuliorluni ajorunnaarsitsisinnaasoq, qaaqquneqassapput. Taakkualu qanoq iliussappanngooq? Jakob oqarpoq: ’Qinnussavaat. . . . Uppertullu qinnutaagut napparsimasoq annassavoq.’ (Jâko 5:14, 15; naleqqiuguk Tussiaat 119:9-16.) Ajortinik anngiiaatiginninneq ajorunnaarsinneqarnissamik neriuummut Jakobip ataqatigiissimmagu tassuuna erseqqissarneqarpoq anersaakkut napparsimaneq pigaa. Ima allappoq: ’Ajortissinnik anngiiarfigeqatigiigitsi qinnullusilu, katsorsarneqaqqullusi.’ Anersaakkut napparsimaneq unioqqutitsisimanermik annertuumik pissuteqarpat napparsimasoq iluarsisinnaavoq aatsaat oqaassutit Biibilimik tunngaveqartut ilassigunigit, isumataarluni ajortilittullu ileqquni qimakkuniuk. — Jâko 5:16; apustilit suliait 3:19.

15. Jâko 5:13, 14-imi qanoq kajumissaarneqarpugut?

¹⁵ Jakobip unnersuussutaani paasisinnaasarput alla tassa kristumiu naalliukkangami ’qinujuartariaqartoq’. Isumalluaruni, imaluunniit iluarusukkuni, taava ’unnersiutiginnissummik tussiarli’. Tassa naalliukkaluaraanni iluarusukkaluaraanniluunniit iliuuseqarniartariaqarpoq. Illuatungaatigut qinusariaqarpoq illuatungaatigullu nuannaarneq ersersittariaqarpoq. Taamaattuminguna tupinnanngitsumik Jakob napparsimasoqarpat iliuuseqarnissamut, aap, nammineq siulliulluni iliuuseqarnissamut kajumissaarisoq: ’Ilagiit utoqqaanertaat qaaqquligit.’ — Tussiaat 50:15; Evfisumiut 5:19; Kulorsamiut 3:16.

’Utoqqaanertat’ qanoq ikiuisartut

16, 17. Biibilip najoqqutassiaasa uagutsinnut atuutsinnissaannut utoqqaanertat qanoq ilillutik ikiorsinnaavaatigut?

¹⁶ Ilaannikkut nalusarparput qanoq ililluta Biibilimi najoqqutassiat uagutsinnut atussanerlugit. Tamatumani utoqqaanertat kristumiut naleqangaartumik iluaqutaasinnaapput. Assersuutigalugu, anersaakkut napparsimasoq qinnuttarpaat Guutip oqaasiani unnersuussutit iluarsinartut atorluarnerisigut ’Jehovap aqqani uuliamik tanillugu’. Taamaalillutik utoqqaanertat anersaakkut iluarseqqinnissatsinnut pingaaruteqartumik tunniussaqarsinnaapput. (Tussiaat 141:5) Amerlasuutigut pisariaqartitarput tassaaginnartarpoq sianisuumik eqqarsarnerluta uppernarsaaffigineqarnissarput. Tamanna utoqqaanertamut misilittagaqartumut oqaloqatigiissutigigutsigu eqqortuliorniarluta aalajangernitsinni nakussatsinneqassaagut. — Ussatit 27:17.

¹⁷ Utoqqaanertat aggeqquneqaraangamik ’nikallortunik tuppallersaasariaqarput’. Aamma ’sanngiitsut illersortariaqarpaat tamanullu kamajuillutik’. (1 Tásalûníkamiut 5:14) Utoqqaanertat ’sanngiitsullu’ akornanni qanimut paaseqatigiittumillu attaveqatigiinneqarpat sanngiitsut anersaakkut iluarseqqinnissaannut periarfissaqarluassaaq.

Nammineq akisussaaffipput, qinunerullu pingaarutaa

18, 19. Galâsiamiut 6:2, 5-imi allassimasunut atatillugu utoqqaanertat qanoq pingaaruteqarpat?

¹⁸ Kristumiut utoqqaanertat annertoqqusersuisuulluarnermikkut Guutip savaataanut  akisussaafitsik isumagisariaqarpaat. Tamatumunnga atatillugu Paulus ima allassimavoq: ’Qatanngutikka, inuk misiginngitsoorluni pinerlukkaluarpat taava ilissi anersaamut atasusi iluarsisinniarsiuk anersaamik qanilaartumik, misissorlutilli illittaaq usserneqaqqunatit. Nanertortigisassinnik ersoqatigiigitsi, taamalu Kristusip inatsisai naammassiniarsigik.’ Apustililli oqaatsini ima ilavai: ’Kialuunniit nammineq nammagassi nammassammagu.’ — Galâsiamiut 6:1, 2, 5.

¹⁹ Qanoq ililluta nammineq nammagassarput nammaatigalugu allat nanertuutigisaannik ersoqatigisinnaavavut? Oqaatsit griikerisuut ’nanertortigisaq’-mik ’nammagassaq’-millu nutserneqarsimasut isumaasa assigiinngissutaat misissorutsigu akissut nassaarisinnaavarput. Kristumiu anersaakkut artornartunik ajornartorsiuteqalerpat utoqqaanertat uppeqataasullu allat ikiorumassavaat taamaalillutillu ’nanertortigisaanik’ ersoqatigalugu. Ikiorneqartulli nammineq ’nammagassani’, tassa Guutimut akisussaaffini, nammineq nammattariaqarpaa. * Utoqqaanertat qatanngutitik ’nanertortigisaannik’ nuannaarlutik ersoqatigiumasarpaat qiimmassarnerisigut, Biibilimit unnersuunnerisigut qinnuttarnerisigullu. Kisianni uagut nammineq ’nammagassavut’ taakkua nammakkiussinnaanngilaat. — Rûmamiut 15:1.

20. Sooq qinuneq sumiginnartassanngilarput?

²⁰ Qinuneq pingaaruteqartorujussuuvoq sumiginnarneqartariaqaranilu. Kristumiorpassuilli anersaakkut napparsimasut qinunissartik ajornakusoortittarpaat. Utoqqaanertat anersaakkut napparsimasumik uppernikkut qinnussisarnerannut suna siunertaava? ’Jehovap makitissavaa’, ernumanermik qaangiinissaanik ikiorlugu, sallusuissummilu naapertuilluassutsimilu ingerlanissaanut nakussatsillugu. Kristumiu anersaakkut napparsimasoq eqqunngitsumik isumaqarsinnaavoq ajortuliorujussuarsimananili, Jakobimi ima oqarpoq: ’Ajortuliaqaraluarunilu isumakkeerfigineqassavoq.’ Tassa utoqqaanertat Biibilimit unnersuussutaat qamannga pisumik qinunermik ilalik anersaakkut sanngiitsup ajortuliaminik annertuumik anngiiassutigissavai isumataassutigalugillu. Tamatuma kingunerissavaa Guutimit isumakkeerfigineqarnera. — Jâko 5:15, 16.

21. Sooq kristumiut ilaat utoqqaanertanik aggeqqusinissaminnut tunuarsimaartarpat?

²¹ Ulluni makkunani nutaarpassuit kristumiut ilagiivinut takkussuutsillugit utoqqaanertat nalunngeqatiginnissutiminnik malinnilluartut peqqissaartumik nakkutilliineq eqqarsaatigalugu naammangaartunik sammisassaqarput. Jehovap inunnik tunissutaasunik taakkuninnga tunisimavaatigut ulluni ajornakusoortuni makkunani nikallujuinnissatsinnut ikiorniarluta. Kristumiulli ilaat isumaqaramik qatanngutit taakku ulapputissaqarpallaartut imaluunniit ajornartorsiutinik artorsinneqarpallaartut, taakkuninnga ikiortissarsiornissartik tunuarsimaarfigisarpaat. Qularutigissanngilarpulli angutit taakku nuannaarlutik allanik ikiuiumasarmata, kajumillutik ilagiinni kristumiuni paarsisutut minnertut kiffartorlutik. (wD 15/5 93)

[Quppernerup ataani ilanngussaq]

Qanoq akissavit?

□ Pisariaqartikkaangatsigu suut pingasut aqqutigalugit Jehovap ikiortarpaatigut?

□ Ullutsinni kikkut tassaappat inuit tunissutaasut?

□ Qaqugukkut utoqqaanertanik aggeqqusisariaqarpugut?

□ Utoqqaanertanit qanoq ikiorneqarnissarput naatsorsuutigisinnaavarput?

[Atuaqqissaarnermi apeqqutit]