Imminut pilliutigeriaannaallutit jehova kiffartuuguk

’Uannik malinnikkumasoq imminik isumakkiissaaq, [nappagarlu anniartitaaffini, NV] ersullugu malissavaanga.’ — MATÎUSE 16:24.

1. Jesusip qanoq ililluni ajoqersukkani toqunissaminik paasitissimavai?

QAQQAP Hermonimik aputeqartup eqqaani Jesus Kristusip inuunermini pisimasut pingaarnerit ilaat misigisimavaa. Ukioq ataaseq qaangiutsinnagu toqussaaq. Tamanna nammineq nalunngilaa; ajoqersugaasali naluaat. Maannali tamatuminnga nalujunnaarsinnissaannut piffissanngorsimavoq. Siornatigut Jesusip toqunissani eqqaamisaartarsimagaluarpaa, aatsaalli maanna ersarissumik eqqartulerlugu. (Matîuse 9:15; 12:40) Mattæus ima allassimavoq: ’Tamatuma kingorna Jesusip ajoqersukkani nalunaarfigilerpai Jerusalemimut pissagami anniangaartinneqassallunilu utoqqaanernit palasiunernillu allakkanillu ilisimasunit, toqutitaajumaarlunilu ullullu pingajuanni makikkumaarluni.’ — Matîuse 16:21; Mákorse 8:31, 32.

2. Jesusip anniartitaanissani eqqortormagu Peter qanoq qisuariarpa, Jesusillu qanoq akivaa?

² Jesusip toquffissaa qanillilerpoq. Peterilli eqqarsaat akueriuminaatsoq tamanna akerlereqaa. Akuerisinnaanngivippaa Messias ilumut toqutaajumaartoq. Taamaattumik Peterip sapiiserluni Naalakkani naveernialerpaa. Ima oqarami ajunngitsumik siunertaqaraluarpoq: ’Sernigilisit, Naalagaq, taamaalineqarnaveerit.’ Jesusilli ingerlaannaq Peterip kukkusumik ajunngisaarnera tunuartippaa, pulateriaarsuup toqunartup niaqua aserorterlugulusooq. ’Tununnut nigorit, Satan-iaa, mamiatsaatigaakkit, Guutip pii pinnagit inuit pii isumagigakkit.’ — Matîuse 16:22, 23.

3. (a) Peter qanoq ililluni nalugaluarlugu Satanimut sakkussiaalersimava? (b) Imminut pilliutigeriaannaassutsimut Peter qanoq ililluni nakutitsissutaaleraluarpa?

³ Nalullugu Peter Satanimut sakkunngortissimagaluarpoq. Jesus akinermini puilasuitsumi Satanimut akisimanermisut aalajangersimarpalutsigaaq. Taamani Diaavulup Jesus inuunermik ilungersunanngitsumik, tassa naalliuuteqarani kunngiussutsimik, usserniarsimagaluarpaa. (Matîuse 4:1-10) Maannakkullu  Peterip imminut ilungersorteqqunagu kajumissaarpaa. Jesusilli nalunngilaa Ataatami tamanna siunertarinngikkaa. Nalunngilaa imminut pilliutigeriaannaasuusariaqarluni, imminut iluarusutsinniarumatuujunani. (Matîuse 20:28) Taamaaliorniarnerminili Peter mamiatsaatigaa, taassuma misiginneqataaniarnera nakutitsiniutaalermat. * Jesusilli nalunngilluinnarpaa pilliutitaqanngitsumik inuuniarsimagaluaruni Guutimit iluarisaajunnaassalluni, Satanip toqussutaasumik napiarniutaanut nakkarsimassagami.

4. Sooq Jesusip imminut ajoqersugassaminulluunniit inuuneq inuulluataarnartoq kissaatiginngilaa?

⁴ Taamaattumik Peterip eqqarsariaasia iluarsaanneqarnissamik pisariaqartitsivoq. Jesusimut oqaasii tassaapput inuup eqqarsaatai, tassaanatik Guutip eqqarsaatai. Naalliuuteqarnani inuuneq inuulluataarnartoq, imminut ajoqersugassaminulluunniit, Jesusip kissaatiginngilaa, nangillunimi Peter ajoqersukkallu allat ima oqarfigai: ’Uannik malinnikkumasoq imminik isumakkiissaaq, [nappagarlu anniartitaaffini, NV] ersullugu malissavaanga.’ — Matîuse 16:24.

5. (a) Kristumiutut inuuniarneq qanoq ililluni unamminiarnartuua? (b) Pisariaqartut pingasut suut kristumiup akuerisariaqarpai?

⁵ Jesusip eqqarsaat pingaartoq manna uteqattaarsimavaa: kristumiutut inuuniarneq unamminiarnartuuvoq. Jesus malinniassagunikku kristumiut Naalakkamissut Jehova imminut pilliutigeriaannaallutik kiffartuuttariaqassavaat. (Matîuse 10:37-39) Taamaattumik kristumiut iliuusissatut piareersimaffigisariaqagaat pingasut makku eqqartorsimavai: (1) imminik isumakkiineq, (2) nappakkamik anniartitaaffimmik ersunneq, kiisalu (3) Jesusimik malinnittuarneq.

’Uannik malinnikkumasoq’

6. (a) Imminik isumakkiineq qanoq paasisariaqarpa? (b) Immitsinnik iluarusutsinniarnata kimut iluarisaaniartariaqarpugut?

⁶ Imminik isumakkiineq qanoq paasisariaqarpa? Ima paasisariaqarpoq inuk imminut isumakkeerluinnartariaqartoq, tassa ’uangaassutsi’ nigortilluinnarlugu. Grækerit oqaasiat ’isumakkiineq’-mik nutserneqarsimasoq isumaqarpoq „naaggarneq“, imaluunniit „misiutiginnilluinnarneq“. Taamaattumik kristumiutut inuunerup unamminiarnartua akuerigukku piumallutit nammineq anguniakkatit, ilorrisimaarnissat, kissaatigisatit, nuannaarutigisatillu taamaatissavatit. Naatsumik oqaatigissagaanni inuunerit tamaat tamatumunngalu atasut tamaasa naassaanngitsussamut Jehova Guutimut tunniuppatit. Imminik isumakkiineq tassaannaanngilaq nuannaarutigisatta ilaannik ilaannikkuinnaq tunuartitsisarnissaq. Kisianni isumaqarpoq inuup imminut oqartussaanini Jehovamut tunniukkaa. (1 Korintumiut 6:19, 20) Inuk imminik isumakkiisoq imminik iluarusutsinniarnani, Guutimulli iluarisaaniarluni inuussaaq. (Rûmamiut 14:8; 15:3) Tamanna isumaqarpoq inuunini naallugu tamatigut namminissarsiortumik pilerigisani naaggaarfigissagai Jehovalu angerfigissallugu.

7. Nappagaq kristumiup anniartitaaffia sunaava, qanorlu ililluni ersuttarpaa?

⁷ Taamaattumik nappakkamik anniartitaaffimmik ersunneq ilungersunartumik nassataqartarpoq. Nappakkamik ersunneq artornartuusarpoq, toqumullu assersuutaalluni. Kristusimik malinninniarnini pissutigalugu kristumiup pisariaqaraangat naalliuuteqarnissaq, mitagaanissaq anniartitaanissaq, aap, allaat toqutaanissaq akuerisinnaavai. Jesus ima oqarsimavoq: ’[Nappakkamik anniartitaaffimmik, NV] ersukkumanngitsoq malikkumanangalu, taanna qinngaqqunnaqaaq uanni.’ (Matîuse 10:38) Naalliuutillit ilaannaat nappakkamik anniartitaaffimmik ersuttarput. Ajortut perluppassuarnit eqqorneqartaraluarput nappakkamilli anniartitaaffimmik peqaratik. (Tussiaat 32:10) Kristumiutulli inuuneq tassaavoq Jehovamut illernartumik kiffartornerup nappagaanik anniartitaaffimmik ersunneq.

8. Inooriaatsimik sumik Jesusip malitsini maligassaqartippai?

⁸ Piumasarisaq kingulleq Jesusip taasaa tassa malittuassagitsinni. Jesusip peqquaatigut ajoqersuutigisani tamaasa akuereqqullugillu uppereqqullugit, aammalu inuunitsinni tamani taassuma maligassiaa maleruassagipput. Taassumalu inooriaasiani suut malunnarneruppat?  Malitsini naggataasumik suliassikkamigit ima oqarsimavoq: „Taamaattumik aallaritsi inuiaqatigiillu tamaasa ajoqersuganngortissigik, . . . ajoqersorsigillu ilissinnut peqqusakka tamaasa maleruaqqullugit.“ (Matîuse 28:19, 20) Jesusip Naalagaaffimmik nutaarsiassaq nuannersoq oqaluussissutigisimallugulu ajoqersuutigisimavaa. Ajoqersugaanilu qanigisai, aap kristumiut ilagiissaat siulliit tamarmik, aamma taamaaliorsimapput. Ilungersortumik suliniuteqarnerat tamanna silarsuarmullu ilaannginnerat pissutigalugit silamiunit uumigineqarlutillu assortorneqartarsimapput, taamaalillutillu nappagaq anniartitaaffik oqimaannerusoq ersuttariaqarsimallugu. — Juánase 15:19, 20; apustilit suliait 8:4.

9. Jesusip inuit allat qanoq iliorfigisarsimavai?

⁹ Jesusip inuunerani malunnarnerusut ilaat alla tassaavoq inunnik allanik iliorfiginnittariaasia. Inussiarnerluni ’qanilaarluni uummatikkullu makitajuissimavoq’. Taamaattumik tusarnaartui anersaakkut qiimmassarneqartarsimapput najuunneranilu nakussatsinneqartarsimallutik. (Matîuse 11:29) Imminut maleqqulluni inunnik naalagarsiortitsineq ajorpoq, aamma amerlasuunik maleruagassiorsimanani; aamma imminut ajoqersuganngoqqungaaramigit pisuusutut misigitinniartarsimanngilai. Naak imminik pilliutigeriaannaallutik inuugaluarlutik nuannaarneq piviusoq ersersittarsimavaat. Ila, ’ulluni makkunani kingullerni’ silamiut inuulluataarumatussusiannut akerliulluinnassusia. — 2 Timûtiuse 3:1-4.

Jesusitut imminut pilliutigeriaannaassuseq ineriartortiguk atatillugulu

10. (a) Filípimiut 2:5-8 naapertussagaanni Kristus qanoq ililluni imminik isumakkiisimava? (b) Kristus malinniarutsigu qanoq isumaliortaaseqartariaqarpugut?

¹⁰ Jesus imminik isumakkiinikkut maligassaalluarpoq. Nappagaq anniartitaaffik ersussimavaa Ataatami piumasaanik iliortarami. Paulusip kristumiut Filippimiittut ima allaffigisimavai: ’Ima isumaqaritsi soorlu Kristus Jesus; Guutip taattua taassuma pigigaluaramiuk Guutisut issutsi paggatigisatut isumaqartinngilaa, pissutsili iperarpaa kiffap taattua atillugu inuillu assigilerlugit; inuttullu pissuseqarluni malunnarsigami imminik nikanarsarpoq naalaannarluni toqumut allaat, massami [nappagaq anniartitaaffini, NV] toqumut allaat.’ (Filípimiut 2:5-8) Taassumannga annerusumik imminik isumakkiisoqarsinnaanerpa? Jesus Kristusip pigippatit illillu taassuminnga malinnittuuguit taassumatut isumaliortaaseqartariaqarputit.

11. Imminut pilliutigeriaannaalluta inuugutta kia peqqusaanik iliortariaqarpugut?

 ¹¹ Apustilip allap, Peterip, eqqartorpaa Jesus pilluta anniarlunilu toqutaasimammat, kristumiut Kristusip isumaata assinganik sakkoqartariaqartut, sakkutuutut piareersimalluartutut. Ima allassimavoq: ’Kristus taava uinikkut anniarmat, ilississaaq isumaata taamaaqataanik sakkulersorniaritsi (uinikkummi anniartoq ajortulissaararaaq), kingorna uinikkut inuunissarsi inuit illigutsannerinik pinnani Guutip peqqusaanik ileqqullugu.’ (1 Pîtruse 3:18; 4:1, 2) Jesusip imminik pilliutigeriaannaalluni inooriaasia Guutip piumasaanik iliornissamik isumaanut ersiutaalluarsimavoq. Imminut tunniulluni aalajaalluinnarsimavoq, tamatigut Ataatami piumasaa nammineq piumasaminit pingaartinnerusarlugu, allaat nikanarsaataasumik toqutaanissani tikillugu. — Matîuse 6:10; Lúkarse 22:42.

12. Jesusip imminut pilliutigeriaannaalluni inuunini nuanniitsutut isigisimavaa? Nassuiaruk.

¹² Jesusip imminik pilliutigeriaannaalluni inuunini naak imminut artornarlunilu unamminiarnaraluartoq nuanniitsutut isigisimanngilaa. Akerlianik Jesusip Guutip piumasaanut naalatsigitinneq nuannaarutigisimaqaa. Ataatami piumasaanik iliornissaq nerinissatulli pingaartitsigisimavaa. Taamaaliornermigut piviusumik nalerisimaartarsimavoq, soorlu mamartunik nerereerluni iluarusunnartartoq. (Matîuse 4:4; Juánase 4:34) Taamaattumik inuuninni nalerisimaarneq piviusoq misigerusukkukku iliuusissat pitsaanerpaaq tassaassaaq Jesus malillugu taassuma isumaata taamaaqataanik ineriartortitsinissat.

13. Asanninneq qanoq ililluni imminut pilliutigeriaannaassutsimut kajumissaarutaava?

¹³ Imminilli pilliutigeriaannaassutsimut suna kajumissaarutaava? Oqaaseq ataasiinnaq atussagaanni, asanninneq. Jesus ima oqarsimavoq: ’„[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ Tassa inassut siulleq annerusorlu. Aappaatalu taamaaqatigaa: „Tullit ilittut asassavat.“’ (Matîuse 22:37-39) Kristumiu oqaatsit tamakku maleruassagunigit namminissarsiorsinnaanngilaq. Jehovamut asanninnera taavalu inoqatiminut asanninnera nammineq pilluarnissaminit soqutigisaminillu salliutinnerusariaqarpai. Jesus taama inooriaaseqarsimavoq, naatsorsuutigalugulu malitsini taamaaliorumaartuttaaq.

14. (a) Akisussaaffiit suut Eprîarit 13:15, 16-imi nassuiarneqarpat? (b) Suup kajumissaarpaatigut nutaarsiassaq nuannersoq ilungersorluta oqaluussissutigeqqullugu?

¹⁴ Apustili Paulusip asanninnermik inatsit tamanna paasisimavaa. Ima allassimavoq: ’Taamaattumik soraarata taassumuuna pilliutinik qujaniutinik Guuti aatsivigisigu, tamassa qarlut taassuma aqqanik nassuerutiginnittut anitaannik. Puioqinasili avaaginnittassagassi tukkorlusilu, pilliutit taamaattut Guutip iluarimmagit.’ (Eprîarit 13:15, 16) Kristumiut uumasunik assigisaannillu Jehovamut pilliuteqarneq ajorput; taamaattumik pallorfiginninnerminni naalaffimmi nunamiittumi inuit palasiusut pisariaqartinngilaat. Jesus Kristus aqqutigalugu qujaniutinik pilliuteqarsinnaavugut. Aamma ingammik qujaniutinik pilliuteqartarnitsinni, tassa inunnut Guutip aqqanik nalunaajaasarnitsinni, taassumunnga asanninnerput takutissinnaavarput. Asanninnermit kajumissisinneqarluta namminissarsiornata nutaarsiassaq nuannersoq ilungersorluta oqaluussissutigisarparput, tamatigut qarlutta inerititaannik Guutimut pilliuteqarumalluta. Taamaalillutalu tullermut asanninnerput ersersittarparput.

Imminut pilliutigeriaannaaneq pilluaqqussutinik nassataqarluartarpoq

15. Imminut pilliutigeriaannaassuseq eqqarsaatigalugu immitsinnut qanoq aperisariaqarpugut?

¹⁵ Unikkallariarta apeqqutissat makku eqqarsaatiginiarlugit: Maannakkut inooriaatsikkut imminut pilliutigeriaannaassutsimik ersersitsinerpunga? Inuuninni anguniakkakka tamatumunnga ersiutaappat? Ilaquttama uanga maligassiara anersaakkut pissarsiffigisarpaat? (Naleqqiuguk 1 Timûtiuse 5:8.) Iliarsuimmi uillarnerillu? Taakkuattaaq imminik pilliutigeriaannaassuseq iluaqutigisarpaat? (Jâko 1:27) Tamanut qujaniutinik pilliuteqarnermut piffissaq annerusoq atorsinnaavara?  Immikkut pisinnaatitaaffissat, soorlu pionerinngornissaq, Betelimi sulinissaq ajoqersuiartortitanngornissarluunniit, angusinnaavakka, imaluunniit Naalagaaffimmik oqaluussisartunik amigaateqarfiusumut nuussinnaavunga tassani kiffartorniarlunga?

16. Isumassarsiullaqqinnerup qanoq ililluni imminut pilliutigeriaannaanerulernissatsinnut ikiorsinnaavaatigut?

¹⁶ Ilaannikkut isumassarsiorluarneq atorutsigu sapinngisamik Jehova imminut pilliutigeriaannaalluta kiffartuussinnaalissavarput. Assersuutigalugu, Janet, Ecuadorimi pioneriusoq, ulloq naallugu sulisarsimavoq. Erniinnaq piffissamik pilersaarusiornera pissutaalluni nalunaaquttap-akunneri pioneritut oqaluussiffissatut piumasarineqartut nuannaarluni angusinnaajunnaarpai. Aalajangerpoq sulisitsisuminut ajornartorsiut eqqartussallugu sulisarnermilu sivikillinissaanik qinnuteqassalluni. Sulisarnini sivikillisikkumanngimmagu, Janetip Maria, pionerinngorniarluni ullup ilaannaa suliffissaminik ujaasisoq sulisitsisuminukkaappaa. Tamarmik ullup affaani sulisinnaanissartik neqeroorutigaat, taamaalillutik katillutik ulloq naallugu suliffigisartagaq avillugu. Sulisitsisup akuerai. Maannakkut qatanngutit arnat taakku tamarmik pioneriupput. Inernera nuannersoq tamanna takugamiuk, Kaffap, saniatigut pioneriulluni aamma suliffimmi tamatumani ulloq naallugu sulisarnini qasunarilivikkamiuk, Magali sulisitsisuminukkaappaa, assigiimmik neqerooruteqarlutik. Taakkuttaaq akuerineqarput. Taamaalillutik marluk tamakkiisumik kiffartorunnaarnissaraluannut taarsiullugu qatanngutit arnat sisamat pioneriusinnaalerput. Isumassarsilluarneq iliuuseqarniarnerlu kinguneqarluarsimapput.

17-21. Aappariit eqqartorneqartut qanoq ilillutik inuunermi anguniakkatik allanngortissimavaat, sunalu kinguneralugu?

¹⁷ Aamma Evonnep ukiuni qulini kingullerni imminik pilliutigeriaannaassusia eqqarsaatigeriaruk. 1991-imi maajimi Napasuliaq Alapernaarsuiffiup Peqatigiiffia ima allaffigisimavaa:

¹⁸ „1982-imi oktobarimi ilaqutakkalu Betelimut Brooklynimiittumut takornariarpugut. Takusakka pissutigalugit tassani kajumissutsinnik sulinissara kissaatigilerpara. Qinnuteqaatissaq atuarpara apeqqutillu ilaat eqqarsarnartoq malugalugu: ’Qaammatini arfinilinni kingullerni oqaluussinermi nalunaaquttap-akunneri qassit agguaqatigiissillugit atorsimavigit? Agguaqatigiinnerat qulit inorpagit, nassuiaruk sooq.’ Pissutissaqarluarnanga killilimmik suliniuteqarsimagama aalajangerpunga anguniagaqalissallunga, qaammatinilu tallimani anguara.

¹⁹ Naak pioneriunnginnissannut ikittunik utoqqatsissutissaqaraluarlunga 1983 Yearbook of Jehovah’s Witnesses atuarakku, paasilerpara allat pioneriulerniarlutik uanga akornutinnit annerusunik ajugaaffiginnittariaqarsimasut. Taamaattumik 1983-imi apriilip aallaqqaataani ulloq naallugu suliffiga pigissaarnaraluartoq taamaatippara ikiorti-pionerinngorlungalu, septembarillu aallaqqaataani pionerinngorlunga.

²⁰ Kingusinnerusukkut, 1985-imi apriilimi angummut ilagiinni kiffartortumut pitsaasumut katippunga. Ukiut pingasut tamatuma kingorna aasakkut ataatsimeersuarnermi pioneriuneq pillugu oqalugiaat tusarnaartillugu uima ima isussuuppaanga: ’Isumaqarpit septembarip aallaqqaataani pionerinngornissannut akornutaasoqartoq?’ Ukiut marluk tulliuttut pionerioqatigaanga.

²¹ Uiga aamma sapaatip-akunneri marluk Betelimi Brooklynimiittumi sanaartornermi kajumissutsiminik suleqataasimavoq nunanilu allani  sanaartornermut suleqataanissamik qinnuteqarluni. 1989-imi maajimi Nigerialiarpugut tassani qaammat ataaseq immikkoortortaqarfissaliornermut peqataaniarluta. Aqagu Tysklandiliassaagut, tassanilu Polenimut aallarsinnaanissatsinnik allagartat piareersarneqassapput. Sanaartornermut taama immikkut itsigisumut peqataanissatsinnut tamakkiisumillu kiffartoriaatsimut nutaamut tamatumunnga misiliinissatsinnut pissangaqaagut.“

22. (a) Qanoq ililluta, Peteritut, kissaatiginngikkaluarlugu allanut nakutitseriaataasinnaavugut? (b) Jehovamut imminut pilliutigeriaannaalluni kiffartornermut suut aalajangiisuunngillat?

²² Nammineq pioneriusinnaanngikkuit tamakkiisumik kiffartortut kajumissaarsinnaavigit immikkut pisinnaatitaaffitsik tamanna attatiinnaqqullugu immaqalu taamaaliornissaannut ikiorlugit? Imaluunniit, ilaquttatut ikinngutitulluunniit ajunngitsumik siunertaqaraluartut ilaattut, Peteritut, tamakkiisumik kiffartortoq siunnersussaviuk eqqissimaaginnaqqullugu, nalullugu taamaaliornerit nakutitsiniutaasoq? Soorunami pioneriusup peqqikkunnaarnissaa arleqqutiginarpat imaluunniit kristumiutut akisussaaffini sumiginnarsimappagu, imaassinnaavoq tamakkiisumik kiffartornini unitsikkallartariaqaraa. Taaguutit, soorlu pioneri, Betelimi sulisoq assigisaatullu, Jehovamut imminik pilliutigeriaannaalluni kiffartornermut aalajangiisuunngillat. Inuttulli qanoq innerput — eqqarsariaaserput, allanut ilioriaaserput, inooriaaserput — tamatumunnga aalajangiisuuvoq.

23. (a) Qanoq ililluta Guutimut suleqataaneq nuannaarutigiuarsinnaavarput? (b) Eprîarit 6:10-12-imi sumik neriorsoqqissaarneqarpugut?

²³ Ilumut imminut pilliutigeriaannaagutta Guutimut suleqataaneq nuannaarutigisinnaavarput. (1 Korintumiut 3:9) Nalerisimaarluta nalunngisinnaavarput Jehovap uummataa nuannaartillugu. (Ussatit 27:11) Aamma qularisariaqassanngilarput Jehovamut aalajaattuarutta taassuma qimanngisaannassagaatigut. — Eprîarit 6:10-12. (wD 1/6 93)

[Quppernerup ataani ilanngussaq]

Qanoq isumaqarpit?

□ Imminut pilliutigeriaannaassutsimut Peter qanoq ililluni nakutitseriaatinngorsimagaluarpa?

□ ’Imminik isumakkiineq’ qanoq paasisariaqarpa?

□ Kristumiup nappagaq anniartitaaffini qanoq ililluni ersuttarpaa?

□ Imminut pilliutigeriaannaassuseq qanoq ililluta ineriartortissinnaallugulu atatiinnarsinnaavarput?

□ Suna imminut pilliutigeriaannaassutsimut kajumissisitsisuua?

[Atuaqqissaarnermi apeqqutit]

[Qupp. 20-mi assiliartaq]

Imminik isumakkiissallutit, nappagaq anniartitaaffiit ersussallugu Jesusilu malinniartuassallugu piumassuseqarpit?