Isumakkut peqqissuugit — naggatissaq qallilerpoq

„Suut tamarmik naggatissaat qallilerpoq. Taamaattumik [isumakkut peqqillusi, NV] qinusarnermut peqqissaarniaritsi. — 1 PÎTRUSE 4:7.

1. (a) Upperisarsiornikkut siuttut ilaat taassumalu malinnittui qanoq ilillutik pakatsisinneqarsimappat? (b) Ilimagisat aalajangersimasut eqquussimanngimmata suut apeqqutaalerpat?

„UNNUK MANNA qinutillunga Guutimit nalunaarfigineqarpunga. Oqarfigaanga inuit 116.000-t qilaliassasut uppertullu toqungasut ilaasa 3,7 millionillit ilerfi qilammut ammassasut.“ 1992-imi, oktobarip ulluisa 28-anni unnukkut upperisarsioqatigiit Ullussat Pillugit Ajoqersuiartortitanik taaneqartut, ullormik tamatuminnga eqqartuutiffissatut siumut isiginninniartut, siuttuisa ilaat taama oqarsimavoq. Kisianni oktobarip ulluisa 29-at nalliummat qilaliartoqanngilaq ilivermillu ammartoqarnani. Qilaliartitaanatik ullormik eqqartuutiffissamik upperisallit taakku Koreamiittut ullormut nutaamut isiinnarsimapput. Ullut eqqartuutiffissatut siulittuutigineqartarsimasut qaangiussorsimapput, tamatuminngali upperisallit anusinngujuittarput. Kristumiulli qanoq isumaqassappat? Naggatissap qanilliartornera upperiunnaartariaqarpaat?

2. Kia apustilinut ulloq eqqartuutiffissaq eqqartoqqaarsimavaa, pissutsinilu qanoq ittuni tamanna pisimava?

 ² Tamanna paasiniarlugu Jesusip ajoqersukkaminik oqaloqatiginnissimanera eqqaariartigu. Cæsarea Filippip eqqaani, Galilæap tasersuata avannaata kangiani, qaqqap Hermonip portungaartup ungataani Jesus isertuarnani oqarsimavoq toqutaajumaarluni. (Matîuse 16:21) Nangillunilu eqqarsalernartunik oqaaseqarpoq. Nassuiaaffigereeramigit ajoqersugaaniaraanni imminut pilliutigeriaannaalluni inuusariaqartoq Jesus nangilluni ima mianersoqqusivoq: ’Inuup ernera aggerumaarpoq Ataatami naalannassusia pigalugu inngilinilu ilagalugit; taavalu tamaasa immikkut akilissavai qanoq iliorneri naapertorlugit.’ (Matîuse 16:27) Jesusip tikiuffissaq eqqartorpaa. Taamanikkussarlu eqqartuussisutut aggerumaarpoq. Taamanikkussaq inuk Jesusimik aalajaalluni malinnittuunersoq sunut tamanut aalajangiisuussaaq. Jesus inuup qanoq iliornera tunngavigalugu, inuup nunap piinik pigisaqarnera tunngaviginagu, eqqartuussissaaq. Ajoqersugaasa tamanna eqqaamajuartariaqarpaat. (Matîuse 16:25, 26) Tassami Jesus Kristusip nammineq malinnitsini naalannaassutsikkut tikiunnissaminik eqqartuutiffissamillu eqqumaffiginneqquai.

3. Jesusip tikiunnissami qularnaalluinnarnera qanoq ersersissimavaa?

³ Jesusip nangilluni oqaasiisa ersersippaat tikiunnissani qanoq qularnaatsigisoq. Oqartussaasuseqarpalulluni ima oqarsimavoq: ’Ilumut oqarfigaassi: ukua maaniittut ilaasa Inuup Erneranik naalagaalluni aggersumik takutinnatik toqu misigissanngilaat.’ (Matîuse 16:28) Ullut arfinnillit tamatuma kingorna oqaatsit taakku eqquupput. Ajoqersugaasa qaninnerusut tupigusullutik isigitillugu Jesus alutornangaartumik allatut isikkoqalerpoq. Jesusip kiinaa seqinertut qinngortoq atisaalu akisullutik qaamasorsuanngortut takuaat. Allatut isikkoqalernera tamanna tassaasimavoq Jesusip naalannaassusissaanik Naalagaaffissaanillu takorruuineq. Naalagaaffik pillugu siulittuutinik uppernarsaaffigineqarneq uppernermut nakussatsinnartoq! Ajoqersukkanut isumakkut peqqissuunissaannut kajumissaarutaaqaaq! — 2 Pîtruse 1:16-19.

Sooq isumakkut peqqissuunissaq pisariaqavissuusoq

4. Sooq kristumiut Kristusip tikiunnissaa anersaakkut eqqumaffigisariaqarpaat?

⁴ Ukioq ataaseq qaangiutinngitsoq Jesusip Uuliap Qaqqaani issialluni ajoqersukkani oqaloqatigeqqippai. Tamarmik illoqarfik Jerusalem qimerloortillugu Jesusip nassuiarpaa tikiunnissani sunik ilisarnaateqarumaartoq imalu mianersoqqusilluni: ’Taamaattumik eqqumagitsi, Naalakkassi tikiuffissaa nalugassiuk.’ Malinnittuisa piffissaq eqqumaffigiuartariaqassavaat tikiuffissaa nalugamikku. Piareersimajuartariaqassapput. — Matîuse 24:42.

5. Eqqumanerup pingaaruteqassusia sumut assersuunneqarsinnaava?

⁵ Naalagaq tillittutut tikiukkumaarpoq. Nangilluni oqarsimavoq: ’Imaattorli ilisimassavarsi: tillittup unnuap qanoq ilineragut tillikkiartorfissaa illup naalagaata nalunngikkuniuk pigaaqqajaqaaq illuminut tillinniartunik iserniartoqaqqunagu.’ (Matîuse 24:43) Tillinniartup illumik piginnittoq iserniarnissaminik nalunaarfigisanngilaa; pakasaaneq sakkugisarpaa. Taamaattumik illumik piginnittoq pigaartuartariaqarpoq. Kristumiuli aalajaatsoq annilaanganeq pissutiginagu qasusuilluni eqqumasarpoq. Ilungersortumilli erinineq pissutigalugu Kristusip naalannaassusillip ukiuni tuusintini eqqissiffissaq pilersinniarlugu tikiunnissaa eqqumaffigisarpaa.

6. Sooq isumakkut peqqissuusariaqarpugut?

⁶ Naak eqqumaffiginnittoqaraluaqisoq ullormik tikiuffissaanik siumut eqqoriaasoqarsinnaanngilaq. Jesus ima oqarsimavoq: ’Taamaattumik ilississaaq piareersimaniaritsi, Inuup Ernera ilimasuffiginngisassigut tikiussammat.’ (Matîuse 24:44) Taamaattumik isumakkut peqqissuunissaq pisariaqarpoq. Kristumiu isumaqaraluaruni ullormi aalajangersimasumi Kristus tikiutissanngitsoq, immaqa ullormi tamatumanerpiaq tikiutissaaq! Soorunami kristumiut aalajaatsut ilaasa ajunngitsumik isumallit  ukiut ingerlaneranni naggatissap qaqugu piumaarnera naatsorsuutiginiarsimagaluarpaat. Jesusilli mianersoqqussutaa manna tamatigut naleqqulluartuusimavoq: ’Ullussamik taassuminnga ullulluunniit qanoq ilinissaanik ilisimasoqanngilaq, inngililluunniit qilammiittut ernerulluunniimmi ilisimanngilaat; Ataatama kisimi nalunngilaa.’ — Matîuse 24:36.

7. Kristusimik malinnittuussagutta qanoq inooriaaseqartariaqarpugut?

⁷ Taamaattumik qanoq isummertariaqarpugut? Kristusimik malinnittuussagutta upperiuartariaqarparput aaqqissuussaanerup matuma ajortup naggatissaa nalliulluinnalersoq.

8. Aallaqqaataaniilli kristumiut suna ilisarnaatigiuarsimavaat?

⁸ Ukiut ingerlaneranni taama isumaqarneq kristumiut ilisarnaatigiuarsimavaat, soorlu oqaluttuarisaanermik ilisimatuut Biibilimillu ilisimatuut miserratiginngikkaat. Assersuutigalugu, The Translator’s New Testament-mik naqiterisitsisut oqaatsimik nassuiaanerminni oqaatsimut „Ulloq“-mut tunngatillugu ima allassimapput: „Kristumiut ’Testamentitaap’ nalaani inuusimasut ilimagiuarsimavaat ullussaq (tassa piffissaq) silarsuup matuma ajussusia ajortunngorsimaneralu ilanngullugit soraarsitaaffissaa Jesusillu inuii-aat tamaasa eqqartuunniarlugit silarsuarmullu tamarmut Naalagaanngorniarluni piffissaq eqqissiffiusoq aallarnersarniarlugu nunarsuarmut tikiuteqqiffissaa.“ Encyclopædia Britannica-mi ima allassimavoq: „Kristumiussutsip nunarsuaq tamakkerlugu asseqanngitsumik siammarsimanera kristumiut naggatissamik, tassa Kristusip uteqqinnissaanik, ilimasulluinnarnerannut toqqaannartumik attuumassuteqarsimavoq. Kristumiut naggatissamik ilimasunnerat tassaasimanngisaannarpoq Guutip naalagaaffiata tikiuffissaanik iliuuseqarnani erinineq.“

Isumakkut peqqissuuneq qanoq paasisariaqartoq

9. Naak Peterip Messias pillugu ilimasunnermi ilaat kukkusuugaluartut qanoq ililluni tatiginninnini atatittuarsinnaasimavaa?

⁹ Ukiut 30-t sinnerlugit Jesusip ajoqersukkaminik qaninnerusunik oqaloqatiginninnerata kingorna apustili Peterip naggatissamik utaqqinini qatsussimanngilaa. Naak ajoqersugaqatinilu aallaqqaataani Messias pillugu ilimasunnitik eqqortuunngikkaluartut qularisimanngilaa Jehovap asanninnera pissaaneralu neriugisaata piviusunngornissaanut uppernarsaataasut. (Lúkarse 19:11; 24:21; apustilit suliait 1:6; 2 Pîtruse 3:9, 10) Allakkani Grækerisuuni arlaleriaqaluni erseqqissarneqartoq manna eqqaavaa: ’Suut tamarmik naggatissaat qallilerpoq.’ Taavalu kristumioqatini ima kajumissaarsimavai: ’Taamaattumik [isumakkut peqqillusi, NV] qinusarnermut peqqissaarniaritsi.’ — 1 Pîtruse 4:7.

10. (a) Isumakkut peqqissuuneq qanoq paasisariaqarpa? (b) Suut tamaasa Guutip piumasaa naapertorlugu eqqortumik paasissagutsigik suna pisariaqarpa?

 ¹⁰ ’Isumakkut peqqissuuneq’ tassaanngilaq silamiut isaanni kakkassuseq. Jehova ima oqarsimavoq: ’Ilisimatuut ilisimassusiat piuneerukkumaarpara, sianiisuullu sianissusiat suujunnaarsikkumaarpara.’ (1 Korintumiut 1:19) Oqaaseq Peterip eqqartugaa isumaqarsinnaavortaaq ’isumatusaartoq’. Taamaattumik isumakkut allanngoranngitsumik pissuseqarutta suut tamarmik Jehovap piumasaanut eqqortumik naleqassusiat paasissavarput; nalussanngilarput suut pingaaruteqartsut suullu pingaaruteqanngitsut. (Matîuse 6:33, 34) Naggatissaq nalliulluinnalersoq eqqarsaatigalugu ingasattumik inooriaaseqarusunngilagut; aammali ullut inuuffigisavut soqutiginagit inuujumanata. (Naleqqiuguk Matîuse 24:37-39.) Kisianni eqqarsaatitsigut, misigissutsikkut, iliuutsikkullu allanngoranngitsumik pissuseqarumavugut, pingaartumik Guutimut (’qinusarnermut peqqissaarniaritsi’) taavalu inoqatitsinnut (’tamanit annerusumik asaqatigiigitsi ilungersorlusi’). — 1 Pîtruse 4:7, 8.

11. (a) ’Anersaatsigut isumaqaatitsigut nutaanngortinneq’ qanoq paasisariaqarpa? (b) Qanoq ililluta isumaliortaaseq nutaaq ikiortigalugu pitsaasumik aalajangersinnaavugut?

¹¹ Isumatsigut peqqissuussagutta ’nutaanngortittariaqarpugut anersaatsigut isumaqaatitsigut’. (Evfisumiut 4:23) Sooq nutaanngortittariaqarpugut? Naammalluinnanngissuseq kingornussimagatsigu avatangiisinilu ajortiliusuni inuugatta anersaamut tunnganngitsunik isumaqaqqajaasarpugut. Eqqarsaativut ilioriaatsivullu tamatigut nunap piinik pingaartitsivallaarnermut namminissarsiornermullu sammisinnaasarput. Inuk kristumiunngorniaruni nutaamik isumaliortaasitaartariaqarpoq, eqqarsaatini eqqortumut, anersaakkut ittunut, sammisinnaaqqullugit, imminut pilliutigeriaannaassutsimut. Taamaalilluni aalajangigassaqaleraangami, assersuutigalugu ilinniarnissaq, inuunermi anguniagassat, suliffeqarnissaq, aliikkutassaqarnissaq, qasuersaarnissaq, atisalersoriaaseq taamaattullu pineqaraangata, siullermik tamakku, timikkut namminissarsiorlunilu pinnani, anersaakkulli eqqarsaatigissavai. Isumaliortaaseq nutaaq tamanna ikiortigalugu peqqissumik isumaqarluni aalajangersinnaasassaaq eqqaamajuarlugu naggatissaq qanillisoq.

12. Qanoq ililluta ’uppersutsikkut peqqissuujuarsinnaassaagut’?

¹² Isumakkut peqqissuussagutta anersaakkut peqqissusariaqarpugut. Qanoq ililluta ’uppersutsikkut peqqissuujuarsinnaassaagut’? (Títuse 2:2) Isumarput inuussutissanik eqqortunik immertariaqarparput. (Jeremia 3:15) Akuttunngitsumik Guutip oqaasii ilumoortut inuussutigisarutsigik taassuma anersaavanik illernartumik tapersersorneqarluta anersaakkut oqimaqaatigiissuseq atatissinnaassavarput. Akuttunngitsumik nammineq atuaqqissaartarneq, oqaluussinermut peqataasarneq, qinusarneq kristumioqatinillu najorteqartarneq inuunitsinnut pingaaruteqartupilussuupput.

Isumakkut peqqissuuneq qanoq illersuutigisinnaagipput

13. Isumakkut peqqissuunerup qanoq ililluni sianiitsuliornissatsinnut illersorsinnaavaatigut?

¹³ Isumakkut peqqissuunerup sianiitsuliornissatsinnut illersorsinnaavaatigut inuunissaq naassaanngitsoq annaaqqunagu. Qanoq ililluni? Apustili Paulusip ’eqqarsaatit inatsisaat’ eqqartorsimavaa. Inuup uppernikkut peqqissup ’eqqarsaataasa inatsisaat’ imaluunniit isumaata inatsisaa iluarisaminit, tassa ’Guutip inatsisaanit’, aqunneqartarpoq. Kisianni ’ajortip inatsisaata’ isumap inatsisaa akiortarpaa. Taamaattoq Jehova ikiortigalugu kristumiu ajugaasinnaavoq. — Rûmamiut 7:21-25.

14, 15. (a) Kajungernerit marluk suut isuma naalakkersorniarpaat? (b) Isumarput pillugu akiuunnitsinni tamatumani qanoq ililluta ajugaasinnaavugut?

¹⁴ Nangilluni Paulusip takutippaa isuma timimit ajortiliusumit naalatsigititaq inuulluaannarumatooq isumalu Guutip anersaavanit naalatsigititaq Jehova kiffartuullugu imminut pilliutigeriaannaajumasoq imminnut akerliulluinnartuusut. Rûmamiut 8:5-7-imi Paulus ima allassimavoq: ’Uinimmimmi malinnittut uinngup pii kajungerisaraat, anersaamilli malinnittut  anersaap pii kajungerisaraat. Uinngulli kajungernera toqussutaavoq, anersaalli kajungernera inuussutaallunilu eqqississutaavoq, tassa uinngup kajungernera Guutimut akerartuutaammat, Guutip inatsisaanut naalattuunngimmat, massalu saperluni.’

¹⁵ Taava versi 11-mi Paulusip nassuiarpaa isuma anersaamik illernartumik suleqatiginnittoq qanoq ililuni ajugaassasoq: ’Jesusimik toqusunit makititsisup anersaata inappasi, taava Kristusip toqusunit makititsisaata ilississaaq timisi toqujasut anersaamigut ilumiugisassigut uummartikkumaarpai.’

16. Isumakkut peqqissuunerup pilerisaarutinit sunit illersorsinnaavaatigut?

¹⁶ Taamaattumik isumakkut peqqissuugutta silarsuup matuma nuannaarutitigut, nunap piisigut kanngunartuliornikkullu killeqanngitsumik inuulluaannarnermik malunnaateqartup pilerisaarutaasa tamaginniittartut tammartissanngilaatigut. Isumakkut peqqissutsitta kajumissaassavaatigut ’uersaaneq qimarratigeqqullugu’ taamaalillutalu kinguneri ajunaarutaasut pinngitsoorlugit. (1 Korintumiut 6:18) Peqqissumik isumaliortaatsip killissavaatigut Naalagaaffiup soqutigisai salliuteqqullugit eqqarsaativullu sernissussallugit suliffitsinni iluatsikkiartornissamit Jehovamut attaveqarnitsinnut sanngiillisitsisumit usserneqarutta.

17. Qatanngut arnaq pioneriusoq aningaasatigut akisussaaffini eqqarsaatigalugit qanoq ililluni isumakkut peqqissuusimava?

¹⁷ Assersuutigalugu, nunat kiattut ilaanni Asiap kujataata kangianiittumi, qatanngutip arnap inuusuttup isumakkut Naalagaaffiup soqutigisai salliutissimavai. Tamakkiisumik kiffartuussineq nuannaarutigingaarpaa. Nunami tamatumani sapaatip-akunneranut ulluni arfinilinni imaluunniit allaat arfineq-marlunni sulisarneq piumasarineqartarpoq.  Ilisimatusarfimmit soraarummeersimammat ataataata, Jehovamut nalunaajaasuunngitsup, naatsorsuutigaa ilaqutariinnut aningaasarsiungaalissasoq. Pionerinngorusoqigamili ullup ilaannaa suliffissarsivoq pionerinngorlunilu. Tamanna ataataata kamaatigeqaa, sioorasaarlugulu pigisai tamaasa aqqusinermut igissallugit. Aningaasanoortarneq pissutigalugu akiligassalerujussuuvoq ilimagalugulu panimmi akiitsuni akilissagai. Qatanngutip arnap nukaa ilisimatusarfimmi atuarpoq akiitsullu pissutigalugit atuarnerata akilernissaanut aningaasaateqanngillat. Nukaa neriorsuivoq ikiussappani suliffeqaleruni ilaqutariit isumagissallugit. Qatanngutip arnap nukkani asavaa aammali pioneritut kiffartuussineq nuannaarutigeqaa. Suut tamaasa eqqarsaatigeqqissaareeramigit aalajangerpoq pioneritut ingerlaqqissalluni allamillu suliffissarsiussalluni. Qinnutai akineqarput, pitsaasumik suliffeqalerpoq ilaquttanilu nukkanilu aningaasatigut ikiorsinnaalerlugit aammalu pioneriunini nuannaarutigisani ingerlatiinnarsinnaallugu.

Isuakkut peqqissuujuaannarumallutit Jehovamut ikiortissarsiorit

18. (a) Inuit ilaat sooq uummatikkut aliatsassinnaappat? (b) Uummatikkut aliatsattut allassimaffiit suut tuppallersaatigisinnaavaat?

¹⁸ Kristusimik malinnittut ilaasa peqqissumik isumaqarnerup atatiinnarnissaa artornartutut isigisinnaavaat. Immaqa utaqqisinnaajunnaalerput aaqqissuussaaneq ajortoq manna ilimagisaminnit sivisunerusumik atammat. Immaqa uummatikkut ajuummissutigaat. Kisianni naggatissaq nalliutissaaq. Jehova taama neriorsuisimavoq. (Títuse 1:2) Nunamilu paratiisissaq neriorsuutigisaq piviusunngorumaarpoq. Tamanna Jehovap neriorsuutigeqqissaarsimavaa. (sarĸúmersitat 21:1-5) Silarsuassaq nutaaq tamanna atuutilerpat peqqissumik isumaqartuarsimasut tamarmik ’orpik inuunartoq’ iluaqutigissavaat. — Ussatit 13:12.

19. Qanoq ililluta isumakkut peqqissuuneq atatiinnarsinnaavarput?

¹⁹ Qanoq ililluta peqqissumik isumaqarneq atatiinnarsinnaavarput? Jehovamut ikiortissarsiorutta. (Tussiaat 54:6) Taassumunnga qanittumik attaveqartuarta. Nuannaarutigisinnaavarput Jehovap ikinngutinnaarilerusummatigut! ’Guutimut palligunniaritsi, taava ilissinnut palligutissaaq,’ ajoqersugaq Jakob taama allassimavoq. (Jâko 4:8) Paulus ima kajumissaarivoq: ’Naalakkami tipaatsuttuinnaritsi; aammalu oqarpunga tipaatsugitsi. Qanilaarsusersi inunnut tamanut malunnarsili. Naalagaq qanippoq. Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (Filípimiut 4:4-7) Aaqqissuussaanerup matuma toqujartortup nanertuutigititai artornarpallaaleraangata Jehovamut tunniuttakkit, taassumalu isumagissavaatit. — Tussiaat 55:23.

20. 1 Timûtiuse 4:10-mi allassimasoq eqqarsaatigalugu qanoq iliortariaqarpugut?

²⁰ Aap, naggatissaq qanilleqimmat isumakkut peqqissuuniarta! Ukiut 1900-t matuma siorna siunnersuut tamanna pitsaasimavoq, ullumikkullu inuunissatsinnut aalajangiisuulluni. Isumakkut piginnaassutsivut peqqissut atorluartigik Jehova unnersiutiginiarlugu taassuma silarsuassaminut nutaamut isersinnaanissatsinnut ikiussavaatigut. — 1 Timûtiuse 4:10. (wD 1/6 93)

Qanoq akissavit?

□ Isumakkut peqqissuuneq qanoq paasisariaqarpa?

□ Isumakkut peqqissuuneq sooq pingaarluinnarpa?

□ Qanoq ililluta anersaatsigut isumaqaatitsigut nutaanngortisinnaavugut?

□ Isumakkut sumut akiuuttuartariaqarpugut?

□ Qanoq ililluta isumakkut peqqissuujuaannarsinnaavugut?

[Atuaqqissaarnermi apeqqutit]

[Qupp. 25-mi assiliartaq]

Qinunikkut Guutimut palligukkutta isumakkut peqqissuuneq atatiinnarsinnaavarput

[Qupp. 27-mi assiliartaq]

Isumakkut peqqissuugutta silarsuup matuma pilerisaarutaanit tammartitaassanngilagut