Jehovap ikiuinera pakatsisitsinngisaannartoq qujamasuutigalugu

OQALUTTUARTOQ: SHARON GASKINS

Paratiisi nunarsuarmi! Imminut takorloortarpunga narsami ivigalimmi pakkalussanik malersuisunga liivillu piaraanik pinnguaqateqartunga. Nuannerunaraluaqaaq! Kisianni nalornisarpunga — annertuumik nalornisarpunga. Neriunnerigaluara qasseriarlunimitaava pakatsinermik inerneqartarpa!

Eqqaamasinnaalerninniilli issiavik assakaasulik attavigiuarsimavara. Inunnguutsinnik spastikeriunera, qaratsama ilaatigut nukillaarsimanera pissutigalugu avatima nukiinik aqutsiniarninnik ajornartorsiuteqarnera, pisuulluni meeqqatut pinnguarneq sapernannginnerpaarluunniit sapersimavara taamaalillungalu meeqqatut nuannaarutissarpassuaraluakka pinngitsoortarsimallugit. Meeqqat allat qiimaqalutik sukuutserlutillu sikkilertillugit, uanga pisussinnaannginnama kiserliorlunga issiaannartarpunga. Taamaattumik anaanama uppernikkut ajorunnaarsitsiniartartumukaattalermanga tupinnartuliornikkut ajorunnaarsinneqarnissara ilungersorluta kissaatigisimagaluarparput. Tamatigulli suallannata pakatseqalluta angerlartarpugut. Uannut pakatsinartaqaaq, anaanannulli aliatsannartaqaaq!

Neriuummik piviusumik qanoq kipisagisaqartigisugut takorloorsinnaassavarsi. Taava anaanama 1964-imi siusissukkut Jehovap nalunaajaasui Biibilimik atuaqqissaaqatigisalerpai. Taamani arfineq-marlungajannik ukioqarpunga. Atuagaq Fra Det Tabte Paradis til Det Genvundne Paradis (Paratiisimit annaasamit paratiisimut utertitamut) ikiortigalugu Biibili atuaqqissaartalerparput.

Nuanneqaaq paasillugu nunarsuarmi nuanneqisumik paratiiseqalerumaartoq. Ajoraluartumimmi inuk siulleq pisuulluni Paratiisi siulleq maangaannarsimavoq, uangali aalajangerpunga Jehova Guuti, Adamimik iluarinnikkunnaarsimasoq, Adamillu attaveqarfigisimasaralua qanimut attaveqarfigilerniarlugu. Ilaannikkut kingumut takorluuisaqaanga. Qanormitaava ippa Israelikkuulluni Guutimut immikkut attaveqarluni? Imaluunniit Guutip Ernera nunamiikkallarmat inuulluni? Aamma paratiisip atuutileqqinnissaa siumut takorloortarpara. Naak ukiukikkaluarlunga uannut ersarippoq sallusuissut nanisimagipput. Ilalu uppernikkut ajorunnaarsitsiniartartut palasillu allat tunniussinnaasaannit allaanerummat!

Paratiisimut qilanaartuusissat

Anaanap Jehovap Nalunaajaasuisa ataatsimiittarfianukaqatigisalerpaatigut. Taakku ataatsimiittarneri ataatsimeersuartarnerilu oqaluffimmi takusimasatsinnit allaaneroqaat! Naak eqqartorneqartut tamaasa paasisanngikkaluarlugit tamaani inuit avatangiisillu  killitsissutigisaqaakka — paratiisimi nuannersumik qatanngutigiittut inooqatigiinnissamut qilarnaartuutitut ippoq.

Uagut meeqqat tamatta ilagaluta ataatsimiigiarniartarneq anaanatsinnut imaannaanngitsuuvoq. Meeqqammi sisamaavugut, biileqanngilagullu. Akissaqartikkaangagu taxartarpugut. Suli eqqaamavara anaanaga sapaatit ilaanni qanoq ilungersuatigisoq. Taxanik takussaasoqanngilaq. Taavali angutip usisaatilinnik biilertup uniffigeriataarpaatigut kullorsortillutalu. Aap, ataatsimiinnermut inortuigaluarpugut, apuuppugulli. Ila Jehovamut qujamasoqaagut.

Sivitsunngitsoq qatanngutit angutit arnallu sinnerseraallutik ilaatittuartalerpaatigut. Tassa kristumiutut asanninneq piviusoq. Napparsimavitsinnata ataatsimiigiartuartarnissatsinnik anaanap kajumissaarinera ’kajumissaaqatigiinniarluta katisimasarfitta qimannaveernissaata’ pingaaruteqassusianik meeraaninniilli puiuikkiuppara. (Eprîarit 10:24, 25) Ilinniakkaminit killinneqarluni anaanama inuunini Jehovamut tunniulluinnarpaa 1965-imilu kuisilluni.

Taamanikkut ataatsimiinnerit tamakkiisumik pissarsiffiginissaannut naammattumik utoqqaassuseqalereersimavunga. Brooklynimi New Yorkimiittumi Cypress Hillsimi ilagiinni Europamiut, qernertormiut, Spaniamiutut oqaasillit allallu ataasioqatigiillutik Guutimik pallorfiginnipput. Guutimik mianerinnittut taamatut — piviusumik qatanngutigiittut — inuusussaanerat ersareqaaq. — Tussiaat 133:1.

Ataatsimiinnerni oqaaseqartalernissara kissaatigigakku anaanama piareersarnissannik ilinniartippaanga. Tamanna isumakkut ajornartorsiutiginngilara, timikkulli allaavoq. Spastikeriugaanni suliassat ajornannginnerpaalluunniit ajornartorsuanngortarput. Atuagassiani Biibililersaarutaasuni akissutissanik ataatigut titartaaniartarnera ajornartorsiutigisarpara, tassami narloqqissaartumik titarsisinnaanngivikkama. Atuaqqissaarninni naammassigaangama titarniarsarisimasakka pissutaallutik atuagassiaatikka atuagassaajunnaangajassimasarput. Sungiusarnikkulli titarsisinnaanera pitsanngoriarsimavoq.

Akissutissarpassuarnik ulikkaartarpunga. Oqaatiginiarnerannili oqaasissakka paatsiveeruttarpakka. Nukikka sukappallaaqqunagit eqqissisimaniarsinnaanissara pingaartorujussuuvoq. Aamma oqaatsit tamaasa sapinngisamik ersarinnerpaamik oqaatigisinnaajumallugit tamaviaartariaqartarpunga. Tamaasa ataatsikkut naammassiniarnissaat oqitsuunngilaq. Oqaasissakka eqqorlugit oqaatiginngitsooraangakkit imaluunniit oqaatsikka allanit paasineqanngikkaangata nukillaajummersinnaasaqaanga. Qatanngutilli ilisarisimaneruleraangaminnga oqaatsikka paasisinnaanerulertarpaat. Ullullu ilaanni oqinnerusutut ittarpoq.

Qaammatit arfinillit nikallornartut

Arfineq-pingasunik ukioqarlunga ulloq manna tikillugu sunniuteqartumik misigisaqarpunga. Timikkut, sulinikkut oqaatsikkullu sungiusarneqartareeraluartunga nakorsat isummerput suli annerusumik pisariaqartunga. West Haverstrawimi New Yorkimiittumi napparsimmavimmut sungiusarfiusumut pisippaannga. Anaanaga aliasoqaaq. Ukiut arlallit tamatuma siorna nakorsat kukkullutik eqqarsartaatsikkut kinguarsimasutut nalunaarutigigaluarmannga anaanama oqarfigisimavai napparsimmavimmut unitsinngisaannassallunga. Taamaattumik massakkut aali uninngagallaannartussaasunga tamanna sapingajappaa. Kissaatigaali sapinngisamik annertuumik namminersornerulernissara, nammineq ataatagalu pisariaqartilluinnarunnaarnerulluta. Angajoqqaama isumakuluutigaat peerukkunik uanga qanoq piumaartunga.

Napparsimmavimmi atortorissaarutikka iluaraluaqaat, kisianni kisimiittutut misigaanga. Qiarujussuartarnerma kamarujussuartarnermalu ersarissumik takutippaat tamaaninnera qanoq misigiffigigiga. Angajoqqaama nalunaaquttap-akunnerini pingasuni busserlutik qaqutiguinnaq pulaarsinnaasarpaannga, ingammik anaanaga tallimassaanik naartummat. Angerlaleraangata aliasuttangaarama nakorsaq siunnersuivoq akuttunerusumik pulaartassagaluaraannga. Marloriaannarlunga angerlarnissamut akuerisaasimavunga, napparsimmavimmullu utimut ingerlaninni qiarusaarnera angajoqqaama naammagalugu tusaasariaqartarpaat.

Kiserliorpunga, uninnganinnili ilikkagaqaqaanga. Sungiusaasartut nissukka qerattaqquserlugit  oqimaalutalinnillu ajaappialerlunga pisuttarnissannik ilinniartippaannga. Aallaqqaammut ajaappissat oqimaalutallit tonsitut oqimaatsigisutut misigaakka. Oqimaalutalli uppeqqajaannginnissannut uppittuunnginnissannullu ikiorpaanga. Tamanna uppinnaveeqquteqarnanga pisuttalernissannut alloriarneruvoq siulleq.

Nerisassanik agguiniarneq, atisannik attasersuiniarneq attataajaaniarnerluunniit — assaat atorlugit suliassat suulluunniit — ajornakusoortittuaannarsimavakka saperluinnarsimallugilluunniit. Namminerli nerinissara atisalersornissaralu ilikkangaatsiarpara. Tamatumuuna nammineernerunermik misigineq kingornalu Guutimut kiffartorninni iluaqutigiligara ilikkarpara.

Sungiusarnera naammassimmat angerlarpunga. Anaanama pisinnaasarilersimasakka nutaat atorlugit ingerlaannaq suliaqartittalerpaanga. Tamanna isumakkut uannut sorsunneruvoq, tassami naak nammineersinnaanissara kissaatigigaluarlugu suliaqarniarnera nikallornermik qasulluinnarnermillu kinguneqartarpoq piffissamillu sivisuumik pisariaqartitsisarluni. Ilami ataatsimiigiarnissatsinnut atisalersornerinnara nalunaaquttap-akunnerinik marlunnik sivisussuseqarsinnaasarpoq!

Rigssalip eqqannguani ineqaleratta nammineerlunga pisullunga ataatsimiigiartalerpunga. Tamanna ajugaanerujussuartut misigaara!

Inuuninni ulloq pilluarnarnerpaaq

Anaanama anersaakkut peqqinnartunik nerisaqarnissarput isumagisarpaa. Atuaqqissaaqatigisarpaanga, naatsorsuutigaalu atuagassiat Napasuliaq Alapernaarsuiffik-p aamma Iteritsi!-p normui tamaasa atuartassagikka! Ataatsimiinnernut piareersartassaagut najuuttarlutalu. Naak tamakkunuunatigut ilisimasassarpassuarnik pissarsisaraluarlunga inuunerma Jehovamut tunniulluinnarnissaanik tamannalu takutinniarlugu imermi kuisinnissamik ilumoorullugu eqqarsaateqarneq ajorpunga. Anaanap ikiorpaanga paasitillunga naak innarluuteqaraluartunga anersaakkut nammineq Guutip akisussaaffeqartikkaanga. Naatsorsuutigisinnaanngilara anaanama silarsuassamut nutaamut isissutissagaanga, isernissaralu taassuma kisimi sulissutigissagaa.

Qamuuna uummatikkut nalunngilara tamanna ilumoortoq. Jehova Guuti asavara, imminulli nalornilersittarpunga. Qaqugumulluunniit peqqissilluinnarsinnaassanerpunga? Inuusuttuaraanera artornartorsiorfigeqaara. Innarluuteqarnerma allanit allaanerutippaanga, inuusuttuaraallunilu tamanna artornaqaaq. Pisinnasama killeqarnerat akueriuminaatsittorujussuuara. Kamattarnera ajornartorsiutigaara, kuisissagumalu kamattarnera nunusinnaaleqqaartariaqarpara. (Galâsiamiut 5:19, 20) Jehovamummi tunniulluinnarnera eqqortissinnaangikkukku qanoq iliussagaluarpunga?

Anaanama piumasaqarneratigut ilagiinni utoqqaanertap oqaloqatigaanga. Taassuma pruffiiti Eliasip Israelikkunnut apeqqutaa issuarpaa: „Qanoq sivisutigisumik kina malissanerlugu aalajangerniarusaartuassavisi?“ (1 Kunngit 18:21) Qularnanngilaq Jehovap aalajangerniarusaartuarnera iluarinngikkaa.

Anersaakkut itilerpunga ilungersorlungalu Jehova qinnuigalugu ikioqqullunga inuunermalu taassumunnga tunniulluinnarnissaanut aalajangerlunga. Ilagiinni qatanngutip arnap atuaqqissaaqatigisarpaanga. Uannit nukarliuvoq nukangasuunerminilu anaanaarussimalluni. Taamaakkaluartorli suli ukiukitsuulluni Guutimut tunniulluinnarsimavoq kristumiutullu maligassiuilluarsimalluni.

Kiisami 17-inik ukioqarlunga qularunnaarpunga. Naak timikkut piginnaanera killeqaraluartoq sapinngisara tamaat atorlugu Jehova kiffartuukkusuppara. Aggustip qulingiluaat, 1974 — ulloq kuisiffiga — inuuninni pilluarnarnerpaavoq.

Kiffartornermi nuannaarneq

Jehovap Nalunaajaasuisa ilaattut kiffartornermut peqataanera akornutissanik qaqqatut qaqiuminaatsutut ittunik naapitaqarfigisarpara. Unamminiarnarnerpaavoq allanut paasinartumik oqalunniartarnera. Sapinngisannik paasinarsaarniartarpunga. Pisariaqaraangalli oqaluusseqatima oqaatsikka pulaakkatsinnut uteqqittariaqartarpai. Ilaat pitsaanngitsumik qisuariartarput, isumaqarlutik Jehovap nalunaajaasuinit atornerlugaasunga. Oqaluussinermulli peqataanissara uanga nammineq qamannga pisumik kissaatigaara.

 Soorunami timikkut ajornartorsiutikka suli atorpakka. Allaat inissiarsuarmit inissiarsuarmut allamut ingerlaneq timikkut qasulluinnassutigisarpara. Oqaluussiffigisartakkatsinni illut ilarpassuisa majuartarfii uanga sapikkannik tummeraqartarput. Ukiukkut aqqusineq quasartillugu illumiit illumut oqaluussineq uannut ajornarluinnartarpoq. (apustilit suliait 20:20) Anersaakkulli qatanngutima assorsuaq ikiortarpaannga, maannalu Jehovap issiavimmik assakaasulimmik kallerup innitortoq pilluaqqusaatissimavaanga oqaluussininnut pisariillisaataaqisumik.

Naalagaaffimmik oqaluussissutiginnittartoorusukkama suliniarluartoq allakkakkut oqaluussisalerpunga. Assammik allakkat atorsinnaanngillat, allatakkami inunnit amerlanernit atuarneqarsinnaanngimmata. Taamaattumik skrivemaskiina kallerup innitortoq atortarpara. Arriitsuararsuarmik allattarpunga assannik aqukkuminaatsitsinera pissutigalugu. Patiffik toorniagara ataaseq ujaruusaariarlugu nanillugulu tooriaraluarnerani unioqattaartarakku sivisoqisumik allattarpunga. Qupperneq ataasiinnaq nalunaaquttap-akunnerani ataatsimi sivisunerusumiluunniit allattarpara.

Nikallujanerma piffissaq tamaat oqaluussisartuunissaraluara akornuseqqavaa. Ilaannikkulli ikiorti-pioneritut kiffartorsinnaasarpunga, qaammammut nalunaaquttap-akunneri 60-it amerlanerusulluunniit atortarlugit. Pilersaarusiorluarneq, pisarnermit annerusumik suliniarneq ulluinnarnilu uppeqatinit tapersersorneqarneq tamatumani pisariaqartarput. Taakku pionererpalaassusiat uannut aattuuttarpoq. Aamma anaana maligassiulluarsimavoq naak ilungersuanartorsiortaraluarluni, peqqinngittaraluarluni ilaqutariinnilu upperisarsiornikkut avissaaqqasuni meeqqanik arfineq-marlunnik perorsaaniarnermini unamminiarnartunik atugassaqartaraluarluni nalinginnaasumik imaluunniit ikiorti-pioneriusarnermigut.

Namminiilerneq

24-nik ukioqarlunga aalajangerpunga nammineq ineqalerniarlunga. Isumassarsiara tamanna angajoqqaama eqqissiunnaarutigaat, naammi nammineernerunissannik ilinniartissimagaluarlunga qulakkeerusuppaat toqussagaluarunik sapernanga ingerlanissara. Naak isumakulukkaluartut paasinarsivoq Bensonhurstimut Brooklynimiittumut nuunnera pilluaqqussutisiaasoq. Ilagiit Marlboromiittut ilaqutariissuartut ipput. Ilagilernerat uppernikkut ila nakussatsinnaqaaq! Naak ilagiinni marluinnarnik pingasuinnarnilluunniit biileqartoqaraluartoq anersaakkut qatanngutima ataatsimiigiarnermut ilaasorisarpaannga. Taavanili najugaqarnera sivisuallaanngilaq.

Nikallorujussuartarnermimmi eqqorneqarpunga iluatsitsinngitsoorluinnartutullu misigalunga. Ilaquttannut uterpunga ukiunilu pingasuni misigissutsikkut artorsaateqarnermik naalliuuteqarlunga. Kamannermik artorsinneqarpunga. Imminornissara eqqarsaatigisalerpara arlaleriarlungalu imminoriartaraluarlunga. Toqu avaanngunartumik eqqarsaatigiualerpara. Arriitsumilli Guuti annertoqqutiginiartalerpara neriorsorlugulu inuunermik tunissutaanik pingaartitsilerniarlunga. Utoqqaanertat asannittumik tuppallersarlungalu siunnersortarpaannga. Tamanna, qinusarnikka, atuaqqissaartarnikka, ilaquttama naammagittarnerat ilisimasalinnillu ikiorneqarnera iluaqutigalugit eqqarsaatikka aaqqikkiartuaartippakka.

Napasuliaq Alapernaarsuiffik aqqutigalugu Jehovap asannilluni isumagaa misigissutsikkut sakkortuumik artorsaateqarneq pillugu qaammarsaasoqarnissaa. Aap, innuttani isumassorpai misigissusiilu paasinniffigisarlugit. (1 Pîtruse 5:6, 7) Misigissutsikkut artorsaateqarnera piffissap ingerlanerani milliartorpoq. Ullumikkut, ukiut qulit qaangiuttut, misigissutsikkut nikallorujussuartarnerup akiornissaanut Jehovap suli ikiortarpaanga. Ilaannikkut naleqanngitsutut misiginermit tikinneqartarpunga. Qinusarnikkali, Biibilimik atuaqqissaartarnikka ilaquttakkalu anersaamut tunngasunik pingaartitsisut asanartut qanimut ikiortissariuaannarpakka.

Inissiamik allamik iluatsitsinanga ujarleraluareerlunga inuunerma sinnera tamaat ilaquttakka tamaasa allatut ajornartumik ineqatigisussanngorunarpakka. Taavali Jehovap qinnutikka akivai. Bedford-Stuyvesantimi Brooklynimiittumi inissarsivunga. 1984-imi ukiassakkut nutserpunga, taamanimiillu tassaniilerpunga.

Lafayettemi ilagiinnut ilaasut asanningaartut pitsaasaaqalutik ataatsimiinnernut ingerlattarpaannga.  Tassani ilagiit atuakkamik atuaqqissaaqatigiinnerannut ilaaqqaarnera suli eqqaamalluarpara: init quleriit sisamaanni elevatoreqanngitsumi! Aatsaat Jehovap ikiuineratigut tummerarpassui ingerlavigisarpakka. Kingusinnerusukkulli innarluutilinnut naleqquttumi pisariunnginnerusumiitinneqartalerpunga. Maannakkullu Jehovap immikkut pisinnaatitaaffimmik pilluaqqusaatissimavaanga, tassa uanga angerlarsimaffinni ilagiit atuakkamik atuaqqissaartalermata.

Ilagiinni taakkunani nuanneqisumik pionererpalaarneqarpoq. Tamaanga pigama 30-t missaanni pionereqarpoq maligassiuilluartunik, taakkualu ilaasa immikkut isumassugarisarpaannga. Ilagiinni ilaasut suliniarluartuunerata akulikinnerusumik ikiorti-pioneriunissannik kajumissisippaanga.

1990-imi apriilimi Lafayettemi Prattimilu ilagiit najukkama eqqaralannguani nutaamik rigssaliliorput. Tamanna piffissaalluartukkut pivoq, timikkut ajorseqqinnerma kingunerisaanik pisunniarnera ajorseqimmat. Taamaakkaluartorli angallatiga motoorilik qatanngutimalu angutit arnallu ikiuinerat iluaqutaallutik ataatsimiinnernut angerlamullu ingerlasarnikka ajorneq ajorput. Uppeqatima asanartut asannittumik uannik ikiuisarnerat assorsuaq qujamasuutigaara!

Guutip annertoqqusersuinera qujanartoq

Naak nissukka napassutaarpiarsinnaanngikkaluit uummatiga sanngisuujuvoq. Qanorlu ilillunga Jehova ikiuinerpassui pillugit qutsaviginiassavara? Sungiusarluarnerma inuunera oqinnerulersissimavaa, Guutilli taassumalu unnersuussutaasa napajuaannarnissannik ikiorsimavaannga. Ilaannikkut nalusarpara qanoq ilillunga ullormut inuussutissarsissanerlunga, Jehovali uannik napatitsiuartuuvoq pisariaqartitannillu Pilersuisuuvoq aalajaatsoq. Davidip oqaasii uku nuannareqaakka: „Inuusuttuusimavunga utoqqalisimallungalu maanna, takusimanngisaannarpungali iluartumik qimagaasumik kinguaavinilluunniit nerisassaminnik qinnuuloortunik.“ — Tussiaat 37:23-25.

Naak timikkut peqqinngikkaluaqalunga Jehova Guuti annertoqqutigiuaannarsimavara. Suliaritinninni aammik atuiniarnanga aalajangiusimanninnerma Biibilimik tunngaveqartup aalajangiusimaannarnissaanut arlaleriarluni ikiortarpaanga. (apustilit suliait 15:28, 29) Ungasinngitsukkut ataataga toquvoq. Taama qanitsigisamik annaasaqarneq assut artornarpoq. Taamaallaat Jehovap nakussatsitsinera iluaqutigalugu tamanna misilinneqarnerillu allat anigorsinnaasimavakka.

Siumut qiviarlunga nalornillunga eqqarsaatigisarpara anaanaga toqussagaluarpat uanga qanoq pinissara. Timikkut peqqissusera iluarsiartornaviarunanngilaq, Jehovamilli tunaartarinninnera taassumunngalu attaveqarnera isumalluutigaakka. Taassuma innuttaasa akornanniinnera annertoqqusersuineratalu pakatsisitsinngisaannartup iluaqutiginera assorsuaq pilluaatigaakka! (wD 1/6 93)