Jehovap uatsinnut iliuuserisimasai takusigit!

„TAAMATUT periarfissaqalernissarput qinnutigisarsimavarput,“ angut taama oqarsimavoq. Angut alla ullaat tamaasa sisamanut itertarsimavoq qinuniarluni. Suna qinnutiginiarlugu? „Ullut arlaanni Jehovamik ammasumik pallorfiginninnissamut kiffaanngissuseqalernissarput,“ nassuiaavoq. 1992-imi januaarimi Etiopiami Jehovap nalunaajaasui Addis Abebami ataatsimeersuarnermut „Kiffaangissutsip ikinngutai“-nut katersuummata qinnutit maniguuttut ilumoortullu tamakku akineqarsimanerat ersareqaaq.

Ataatsimeersuarnerup tamatuma Etiopiami pisinnaasimanera Afrikami pissutsit qanoq allanngorsimanerannut takussutissaalaarsinnaavoq. Jehovap Nalunaajaasuisa Afrikap nunataani 13-iniittut siornatigut inerteqquteqarfigineqarsimagaluartut imaluunniit killilersuiffigineqarsimagaluartut ukiuni kingulliunerusuni inatsisitigut akuerisaanertik nuannaarutigisinnaasimavaat. 1991-imi novembarip 11-ani Etiopiami oqartussaasut Jehovap Nalunaajaasui pisortatigoortumik akuerimmatigik akuerisaasutullu nalunaarsormatigik nunami tassani ukiuni 34-ni nalunaajaasut inerteqquteqarfigineqarnerat atorunnaarpoq. Oqaluussisartut ataatsimeersuarnissamik nunanit tamalaanit peqataaffigineqartussamik ingerlaannaq piareersaalerput, ataatsimeersuarnerlu piviusunngorpoq. Inuit 7573-it Addis Abeba City-stadionimi katersuupput, takorloorneqarsimasumillu amerlanerujussuullutik. Najuuttunut amerlanernut ataatsimeersuarnermut peqataaneq sinnattutut ippoq. Imminnut oqarfigisaqattaartuarput: „Qatanngut, Guutip Jehovap uatsinnut iliuuserisimasai takukkit!“ — Naleqqiuguk Tussiaat 66:1-5; 126:1.

Ukiuni 34-ni inerteqquteqartoqarsimanera ajornartorsiutinik naatsorsuutigineqarsimanngitsunik nassataqarpoq. Amerlanerpaat ’Naalagaaffiup erinarsuutai’ tusarnersut naluaat. Qanoq ilillutik ataatsimeersuarnerup nalliutinnginnerani ilikkarsinnaassavaat? Erinarsuutit 40-t, ilaat 17-it ataatsimeersuarnermi atorneqartussat, amhariamiusuumut nutserneqarput. Taava erinarsoqatigiiliortoqarpoq erinarsuutinik immiussisussanik. Illoqarfiit pingaarnersaanni ilagiit tamarmik immiussamik tunineqarput, ilagiillu ataatsimiinnerup siorna kingornalu nalunaaquttap-akunnerata affaani erinarsuutit sungiusartarpaat. Qanoq kinguneqarpa? Arsaattarfissuaq ataatsimeersuarfigineqartoq qamannga pisumik nuanneqisumillu erinarsorpalaamik akisuavoq.

Nunap kangisinnerusortaani eqqissiviilliornerit pissutigalugit Diredauamit Hararimillu illoqarfiit pingaarnersaannut aqqutit matuneqarsimapput. Taamaattumik angalaniaraanni timmisartornissaq periarfissatuaavoq. Qatanngutit arfineq-pingasut Hararimeersut timmisartornissaminnut akissaqanngikkaluarlutik aalajangerluinnarsimapput ataatsimeersuariarniarlutik, taamaattumik sakkutooqarfimmukarput aperalutillu sakkutuut timmisartuisa ilaannut ilaasinnaanerlutik. Tupaallaatigeqisaminnik akuerineqarput. Tassa ataatsimeersuariarlutik akeqanngitsumik angalapput!

 Qatanngutit Etiopiamiut, ukiuni qulikkaani pingasuni annikilliortitaasareersimallutillu malersugaasareersimallutillu allaat qatanngutitik uppernertik pissutigalugu toqutaasut takusareersimallugit, qinnutimik akineqarnerat takullugu qullilinngitsoorsinnaasimanngillat. Najuuttut ilaat ima oqarsimavoq: „Ataatsimeersuarneq aallartimmalli qialerpunga.“ Alla oqarsimavoq: „Uummatinik takunnissinnaasuugussi qanoq nuannaartigisunga takusinnaassagaluarparsi.“ Aap, Jehova nuannerluinnartunik nalunaajaasunut aalajaatsunut taakkununnga iliuuseqarsimavoq! — Tussiaat 66:16, 19.

Afrikami killermi qiterlermilu kiffaanngissuseqarnerulerneq

Aamma Beninimi Afrikamiittumi Jehovap innuttaasa sulinerat qanittukkut inatsisitigut akuerisaalersimavoq. Oqaluussisartut tamatumunnga qanoq qisuariarsimappat? Beninimi kristumiut ataatsimiinneranni oqalugiartoq ima akivoq: „Upperisarsiornikkut kiffaanngissuseqarneq ilumut Jehovamit tunissutaavoq.“ Aap, Jehovap kiffai qujamasuttorujussuupput pallorfiginninnerminni katersuunnissamut Jehovallu naalagaaffia pillugu inunnut allanut oqaluttuussinissamut kiffaanngissuseqaleramik — kiffaanngissutsimik ilarpassuatta taamaattussaannartut isigisaannik.

Nuannaarnertik qanoq ilillutik ersersinniarpaat? Oqalugiartup qulaani taaneqartup tamatumunnga ersersitsiniutit ilaat tikkuarpaa: „Oqaluussinermut peqataanitta — ingammik illumiit illumut tusagassamik nuannersumik oqaluussissutiginninnitta — kiffaanngissutsimik tamatuminnga pingaartitsinerput ersersippaa.“ Beninimilumi taamatorluinnaq iliortoqarpoq. Pionerit amerlassusiat takuinnariaruk. Ukiuni 14-ini inerteqqutiginninneq 1990-imi januaarimi atorunnaarsinneqarpoq. Taamanikkut oqaluussisartut 77-it pioneritut kiffartorput. Ukiut marluk qaangiummata pingasoriaataa sinnerlugu 244-nngorsimapput!

Aammali inerteqquteqarnerup nalaani Beninimi oqaluussisartut suliniarluarsimapput. Nikallujuissusiat sakkutuup oqaluussisartut parnaarunneqartarfigisimasaanni sulisup maluginiarsimavaa. Jehovamummi kiffartortuaannarniarlutik aalajangerluinnarsimanertik pissutigalugu tigusaakulasarsimapput, taamaattumillu sakkutuup taassuma takujuartarsimavai. Kiffaanngissuseqartitaagallarmatalu Biibili pillugu taakkuninnga oqaloqatiginnissutigisarsimasaminik eqqaasinneqarneranik tamanna kinguneqarpoq.

Oqaluussisartullu uppissusiata sakkutuup anersaakkut pisariaqartitai itertissimavaalusooq. Oqaluffiit assigiinngitsut pulaartarsimavai immikkooqatigiillu assigiinngitsut misissorlugit,  anersaakkulli pisariaqartitani pinngitsoortarsimallugit. Aatsaallu 1990-imi januaarimi inerteqquteqarneq atorunnaarsinneqarmat oqaluussisartut Biibili pillugu ammasumik oqaloqatigisinnaaleramigit anersaakkut pisariaqartitani pisalerpai. Maanna kuisereersimalerpoq pioneritullu kiffartorluni. Taassuminnga pisimasup Beninimi qatanngutit Saulusimik Tarsusimeersumik pisimasumik eqqaasippai, taanna pillugu ima allassimammat: ’Taassuma uatsinnik qinuginnikkaluartup upperisaq nungutinniaraluakki maanna oqaluussissutigaa.’ — Galâsiamiut 1:23.

1991-imi decembarimi Jehovap Nalunaajaasui aamma Afrika killermi Nigerimiittut peqatigiiffittut inatsisitigut akuerisaapput sulinerannullu killilersuutit atorunnaarsinneqarlutik. Aamma tamaani nuannaarneqaqaaq. Nigeriami immikkoortortaqarfik, Nigerimi sulinermik nakkutilliisuusoq, ataatsimeersuarnermeersumik ima nalunaaruteqarpoq: „Maradimi tallimanngornermi ataatsimeersuarnermi ataatsimeersuarnerup qulequtaa pillugu oqalugiartoqareersorlu qatanngutinut nalunaarutigineqarpoq Nigerimi inatsisitigut akuerisaalersimasut. Qatanngutit qiimmatsattorujussuupput minuttinilu arlalinni ersaartaallutik. Ullormi tassani ataatsimeersuarneq naammat qatanngutit imminnut eqitaaqattaallutik tusakkatillu nuannersut nuannaarutigalugit misigissutsitik ersersippaat.“ Tamanna takorloorsinnaavarput, nuannaaqatigaavullu.

Nigerimi qatanngutit kiffaanngissuseqartitaalernertik qanoq atorumavaat? Qatanngutip arnap pioneriusup tamanna qularutiginngilaa, ima allakkami: „Inernerit takutippaat Nigerimi oqaluussiffigisartakkatta ilarpassui naggatissaq nalliutsinnagu Babylonimit Angisuumit aniumaartut. Assersuutigalugu, qaammatit tamaasa pulaaqqiinerit 80-iniit 85-inut nalunaarutigisinnaasarsimavakka, naallu pulaartakkama ilimanaateqarluartut ilarpassui oqaluussisartunut allanut tunniussimagaluarlugit Biibilimik atuaqqissaaqatigiinnerit 13-14-inut aquttarpakka.“ Qatanngutip aalajaatsup taassuma oqaatsini ima ilavai: „Peqqiilliornera pissutigalugu oqaluussinermi iliuuseqarsinnaanera annertuallaarunnaarsimavoq, tamarmilli sapinngisartik tamaat iliuuseqartarput.“

Pissutsit Rwandami Afrikami qiterlermiittumi Jehovap Nalunaajaasuisa atugarisaat allanngorujussuarsimapput. 1992-imi apriilimi peqatigiiffipput kiisami inatsisitigut akuerisaavoq. Akuerisaalernermut uppernarsaat sapaatip-akunnerani eqqaaniaalluni nalliuttorsiorfiusussami qatanngutit tiguaat, Rwandamilu oqaluussisartut 1526-usut eqqaaniaanermut najuuttut 6228-unerat takullugu nuannaarutigeqaat. Qatanngutit taakkua nuannaarnertik pingaartitsinertillu nutaarsiassamik nuannersumik oqaluussissutiginninnerulernermikkut ersersikkumanerpaat? Ilaana! Apriilimi tassanerpiaq ilagiinni oqaluussisartut nalunaaquttap-akunneri agguaqatigiissillugu 27,7-it oqaluussinermut atorsimavaat, agguaqatigiissillugu 17-inik pulaaqqiisimallutik agguaqatigiissillugulu 2,4-nik Biibilimik atuaqqissaaqatigiissitsisimallutik. 40 procentiisalu missingi piffissaq tamaat kiffartornernut assigiinngitsunut peqataasimapput.

 Afrikap kujasinnerusortaani inatsisitigut akuerisaaneq

Afrikap kujasinnerusortaani nunani alianaatsuni Moçambiquemi Angolamilu kiffaanngissutsip anoraalusooq inuummarissiallannartoq supoorsimavoq. Moçambiquemi 1991-imi februaarimi inatsisitigut akuersissuteqartoqarpoq. Pissutsit najummassimanartut qaangiukkiartortillugit Napasuliaq Alapernaarsuiffiup peqatigiiffia ajoqersuiartortitanik Moçambiquemut, innuttaasut imminnut sorsuunneranni perlussiortitaasimasumut, aallartitsisalerput. Ajoqersuiartortitat paasivaat nuna naggorissuusoq. Atuagassiat Biibililersaarutit — ingammik atuagaq Unge spørger — Svar der duer — piumaneqartorujussuupput. Ajoqersuiartortitat ilaat arnaq nalunaarpoq nalunaaquttap-akunneri marluk affarluunngitsulluunniit iluanni atuakkat 50-it siaruartersimallugit.

Soqutiginninnermik ersersitsisut qisuariapallattarput. Ajoqersuiartortitap najugaq Peqatigiiffik aqqutigalugu pissarsiarisimasani ornissimavaa. Sunaaffa tassani najugaqarpoq angut sakkutooqarfimmi sulisoq. Ajoqersuiartortitap angut qanigisaalu marluk oqaloqatigilluartorujussuuai. Tullianillu pulaaqqikkami aamma taama oqaloqatigilluartigai, tamatumuunakkut tallimat najuullutik. Tamanut ammasumik oqalugiarnissamut Napasuliaq Alapernaarsuffik-millu atuaqqissaaqatigiinnissamut qaaqquneqaramik akuersipput — tamakku tamarmik pipput ullut sisamat ingerlanerinnaanni.

Angolami oqaluussisartut kiffaanngissuseqartitaanerujartuinnarnertik nuannaarutigisimavaat, sulinerallu 1992-imilu apriilimi inatsisitigut akuerisaalerpoq. Kiffaanngissuseqarnerulernertik tamanna qanoq atorpaat? Oqaluusseqataallutik! Angolami oqaluussisartut 17.000-it missaanniipput, Biibilimillu atuaqqissaaqatigiinnernik 60.000-inik aqutsipput. Tassa siunissami ineriartornissamut periarfissaqarluarpoq!

Inuusuttut oqaluusseqataapput

Inuusuttut kuisimanngitsullu nunani oqaluussinerup aatsaat qanittukkut inatsisitigut akuerisaaffigisaaniittut pingaartitsinertik oqaluussinermut peqataanermikkut ersersittarpaat. Kunngiitsuuffimmi Kap Verdemi, Jehovap Nalunaajaasuisa 1990-imi novembarimi inatsisitigut akuerisaaffigisaanni, ataatsimeersuarnermi niviarsiaraq 17-inik ukiulik uppernini tamanut nalunaarutiginiarlugu kuisippoq. Kuisereersorlu pulaartut ilaata takuaa inuppaalunnit unguneqarsimasoq. Pilluaqquniarlugu ornippaa aperalugulu inuit tamakku kikkuunersut. „Ah,“ oqarsimavoq, „Biibiliminguna atuaqqissaaqatigisartakkakka.“ Soqutiginnittunik arfineq-marlunnik atuaqqissaaqateqartarsimavoq, kuisinneranilu pilluaqquniarlugu ornissimavaat. Ikiorti-pioneritut kiffartornissamut qinnuteqaatini tunniutereersimavaa pionerinngornissanilu qilanaarilereerlugu.

Niviarsiaraq qulinik ukiulik Angolameersoq oqaluussisartuusoralugu aperineqarsimavoq. „Aap,“ akisimavoq. Biibilimik atuaqqissaaqateqartarpit? „Aap, soorunami.“ Qassit? „Arfineq-marluk,“ niviarsiaraq qulinik ukiulik taanna akisimavoq.

apustilit suliáinik agdlagkat-ni atuarsinnaavarput ’ilagiit Judæami tamarsuarmi Galilæamilu Samariamilu’ ittut ukiut hundredellit siulliit ingerlannerani ilaanni ’eqqissinartunik ineriartornartunillu’ atugaqarsimasut, ’Jehova mianeralugu saqigamik anersaarlu illernartoq illersortigalugu amerliartorlutik’. (apustilit suliait 9:31) Qatanngutivut Afrikamiittut qinnuppavut aamma eqqissinartunik atugaqalerumaartut. Ineriartortinneqarneranni nuannaaqatigaavut, qinnuppavullu ineriartortuaannarnermik kinguneqartumik kiffaanngissuseqalernerminnik iluaqutaasumik nutaarsiassamillu nuannersumik oqaluussissutiginninnermut atuinissaannut Jehovap anersaavata siulersussagai. (wD 1/11 92)

[Qupp. 30-mi nunap assinga]

(Allassimasut qanoq inissisimanersut naqitami takuneqarsinnaavoq)

Nunat makku inatsisitigut akuerisaaffiulerput, killilersuutinilluunnit atorunnaarsitsiffiullutik:

 1. Gambia, decembari 1989

 2. Benin, januaari 1990

 3. Kunngiitsuuffik Kap Verde, novembari 1990

 4. Moçambique, februaari 1991

 5. Ghana, novembari 1991

 6. Etiopia, novembari 1991

 7. Congo, novembari 1991

 8. Niger, decembari 1991

 9. Togo, decembari 1991

10. Tchad, januaari 1992

11. Kenya, marsi 1992

12. Angola, apriili 1992

13. Rwanda, apriili 1992

[Qupp. 29-mi assiliartaq]

Beninimi oqaluussisartup oqaatsit Matîuse 24:14-imiittut tumerparpaaminik ’oqaatigai’

[Qupp. 31-mi assiliartaq]

Nunat Afrikamiittut ilarpassuini kristumiut ilumoortut kiffaanngissuseqalersitaanertik atorluaqaat