Jehova oqaasiatigut ilisariuk

’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ — JUÁNASE 17:3.

1, 2. (a)„Ilisarisimanninneq“ „ilisimanninneq“-lu Biibilimi qanoq isumaqartinneqarpat? (b) Assersuutit suut tamanna ersersippaat?

QAAGINNAATIGUT ilisarisimasaqarneq ilisimanninnerlu oqaatsinit Biibilimi atorneqartunit „ilisarisimavaa“-mik „ilisimanninneq“-millu isumaqartunit kimikinnerupput. Biibili malillugu isumaqarput „misigisaqarnikkut ilisimasaqalerneq“, ilisimanninneq „inuit akornanni tatigeqatigiinneq“-mik ersersitsivoq. (The New International Dictionary of New Testament Theology) Tassa Jehova iliuuserisarsimasaasigut ilisarineqartussaavoq. Soorlu Hesekielip allagaani eqqartorneqartoq Guuti ajortuliorsimasunik eqqartuussivoq oqarlunilu: „Misigissavaallu uanga tassaasunga [Jehova].“ — Hesekiel 38:23.

² Oqaatsit „ilisarisimanninneq“-up „ilisimannineq“-ullu assigiinngitsunik atorneqartarneri assersuutitigut ersersinneqarsinnaapput. Aqqi tunaaralugu iliuuseqartorpassuarnut, Jesus oqarsimavoq: ’Ilisarinngisaannarpassi’; isumaqarpoq attaveqarfigisimanngisaannarai, imaluunniit susassarisimanngisaannarai. (Matîuse 7:23) Korintumiunut agdlagkat áipait 5:21-mi allassimavoq Jesus ’ajortimik siuneqanngitsoq’. Isumaqanngilaq ajortumik ilisimasaqanngitsoq, kisianni ajortimut inuttut atasimanngisaannartoq. Taamatuttaaq Jesus oqarmat: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu,’ tassaannaanngilaq Guutimut Kristusimullu tungasunik ilisimanninneq. — Naleqqiuguk Matîuse 7:21.

3. Jehovap Guutiunera ilumoortoq sumik uppernarsaatissaqarpa?

³ Jehovap pissusiisa ilarpassui oqaasiatigut, Biibilikkut, ilikkarsinnaavavut. Taakku ilagaat eqqorluartumik siulittuisinnaanera. Tamanna Guutimut ilumoortumut ilisarnaataavoq: „Maanna sassaritsi nalunaarfigalutalu kingorna qanoq pisoqassasoq. Pereersut nassuiarsigit uatsinnut paasiniarsinnaaqqullugit qanoq pisoqarnissaa ilisimaniassagatsigu; imaluunniit nalunaarfigitigut nalliukkumaartunik! Nalunaaritsi kingorna qanoq pisoqarumaarneranik, uatsinnut misigisinnaaqqullugu guutiususi!“ (Jesaja 41:22, 23) Oqaatsimini Jehovap oqaluttuarai nunarsuup tassanilu uumassusillit pinngortinneqarnerat. Siunerujussuatigut eqqorluartumik qanoq pisoqarnissaanik oqaluttuarsimavoq. Massakkullumi aamma ’nalliukkumaartunik nalunaarfigisarpaatigut’, ingammik ’ullussani kingullerni’ pisussanik. — 2 Timûtiuse 3:1-5, 13; 1 Moses 1:1-30; Jesaja 53:1-12; Daniel 8: 3-12, 20-25; Matîuse 24:3-21; sarĸúmersitat 6:1-8; 11:18.

4. Jehovap pissutsi pissaaneq qanoq atorsimavaa qanorlu atorumaarpaa?

⁴ Jehovap piginnaasusiisa ilagaat pissaaneq. Tamanna erserpoq ullorissat qilammi qaamanerisa kissarnerisalu ataatsimut isigineqarnerini. Inuit inngililluunniit naalasseriitsut Jehovap kisimiilluni oqartussaaneranik akerliliigaangata, ’sorsuttartutut pissarsuartut’ pissaanini atortarpaa, aqqi najoqqutassianilu naapertuilluartut illersorniarlugit. Taamaattoqartillugu pissaanini piuneerutsitsinissamut atussallugu nangaassutigineq ajorpaa, soorlu Noap ulluini ulersuaqartikkamiuk, Sodoma Gomorralu piuneerutsikkamigit Israelikkullu Imaq Aappalaartukkut ikaartikkamigit. (2 Moses 15:3-7; 1 Moses 7:11, 12, 24; 19:24, 25) Qanittukkut Guutip pissaanini atorlugu ’Satan isikkassi ataani aserorterasuassavaa’. — Rûmamiut 16:20.

5. Pissaanermut ilanngullugu Jehovap suna aamma piginnaassuseraa?

⁵ Killeqanngitsumik pissaaneqaraluarluni, makitajuitsuuvoq. Tussiaat 18:36, 37-mi (nutsigaq pisoqaq) allassimavoq: ’Makitanaveersarammalu akitsiortipparma. Inituumik alloriarfissaqartipparma.’ Guutip makitajuinnerata ’samungarsuaq isigitittarpaa! Makitittarpaa nikanartoq pujualanit, piitsorlu arsakunit’. — Tussiaat 113:6, 7.

6. Jehovap pissusia suna annassutaava?

⁶ Jehovap naakkittassusia inunnut annassutaavoq. Naak iluaatsuliorsimangaaraluarluni Mannasse isumakkeerfigineqarami naakkinninnermik nittaaffigineqarpoq! Jehova oqarsimavoq: „Uanga guutiitsoq ima oqarfigigukku: ’Ilumut toqussaatit,’ taannalu ajortuliani iperarlugit uannut saalluni iluartumik naapertuilluartumillu ilioruni. . . . Ajortuliarigaluami arlaannaannulluunniit pisuutitaassanngilaq. Iluartumik naapertuilluartumillu inuusimagami inuuginnassaaq.“ (Hesekiel 33:14, 16; 2 Israelikkut 33:1-6, 10-13) Jesus 77-eriarluni, ullormulluunniit arfineq marloriarluni, isumakkeerfiginninnissamut kajumissaarigami Jehovap pissusia ersersippaa. — Tussiaat 103:8-14; Matîuse 18:21, 22, NV; Lúkarse 17:4.

Guuti misigissusilik

7. Jehovap grækerit guutiannit suna allaassutigaa, pisinnaatitaaffillu suna uagutsinnut ammava?

⁷ Grækeritoqqat ilisimaqqissaarniarlutik isumaliuutersortartut, soorlu Epikuerikkut, guutinut uppertuupput, isumaqarlutilli guutit taakku nuna ungasippallaaramikku inuit soqutiginngikkaat misigissusiilu sunnersinnaanngikkat. Jehovap taassumalu nalunaajaasuisa aalajaatsut attaveqatigiinnerannit allaanerussusia! ’Jehovap innuttani isumagai.’ (Tussiaat 149:4) Ulersuup siorna inuit ajortuliortut peqqissimitippaat ’aliasuutissiorlugulu’. Israelikkut ilumuunnginnerminni Jehova anniaatissippaat aliasutsillugulu. Kristumiut naalasseriinnermikkut Jehovap anersaava ajuallatsissinnaavaat; aalajaatsuunermikkulli nuannaartissinnaavaat. Inuit mikisunnguit silarsuarmik Pinngortitsisoq nuannaartissinnaagaat eqqarsaatigalugu tupinnaqaaq! Isumassuilluarnera pissutigalugu, nuannaartinnissaanut immikkut pisinnaatitaaffeqarpugut nuanningaartumik! — 1 Moses 6:6; Tussiaat 78:40, 41; Ussatit 27:11; Jesaja 63:10; Evfisumiut 4:30.

8. Abrahamip oqalussinnaatitaanini qanoq atorpaa?

⁸ Guutip oqaasiani takutinneqarpoq Jehovap asanninnerata ’siooranata’ oqalussinnaatikkaatigut. (1 Juánase 4: 17) Malugiuk Jehovap Sodoma piuneerukkiartormagu Abrahamip oqalunnera. Abraham Jehovamut oqarsimavoq: „Ilumut iluartut piiassanerpigit iluaatsunut ilanngullugit? Immaqa iluartunik 50-inik illoqarfimmi tassaniittoqarpoq. Ilumut nungutinniarpigit illoqarfillu taanna isumakkeerfigiumanagu uffa 50-inik iluartortaqartoq? . . . Taamaaliorneq ajornaqaaq. Nunarsuarmik tamarmik eqqartuussisuusoq naapertuilluartumik iliussannginnerpa?“ Aali Guutimut oqaaserisat! Jehovap Sodoma 50-inik iluartunik inoqarpat annaakkumavaa. Abraham nangippoq 50-illu 20-nut appartillugit. Sapiiserpallaarsoraluni annilaangassutigilerpaa. Oqarlunilu: „[Jehova] kammaanniaqinanga suli ataasiarlunga oqaloqqilerama: Taavami quliinnaappata?“ Jehova akuersaaqqippoq: „Qulinik iluartoqarpat illoqarfik aserussanngilara.“ — 1 Moses 18:23-33.

9. Sooq Guutip Abrahamip taamatut oqalunnera akueraa, uagullu sumik ilinniarfigisinnaavarput?

⁹ Sooq Jehovap Abrahamip taama kisiitsigisumik oqalussimanera akuerisimavaa? Ataaseq pissutigalugu, tassa Jehovap nalunngilaa Abrahamip aliasunnera. Nalunngilaa Abrahamip jorngua Lot Sodomami najugaqartoq, Abrahamillu isumakuluutigigaa. Aammattaaq Abraham Guutip  ikunngutigaa. (Jâko 2:23) Sukannersumik oqaluffigineqaraangatta, misigissutsit oqaatsit tunuiniittut paasiniartarpavut pingaartillugillu, ingammik ikinngut misigissutsikkut ilaatigut ajornartorsiuteqarpat? Nuanninngila paasillugu kisiilluta oqalukkutta Jehovap paasissagaatigut, soorlu Abraham taamaaliorfigigaa?

10. Siooranata oqalussinnaatitaanitta qinunivut qanoq iluaquserpai?

¹⁰ Ingammik ’qinnutinik tusaasutut’ ujarutsigu misigissutsivut kisiilluta anittariaqarpavut, aliasukkaangatta misigissutsikkullu artorsaateqaraangatta. (Tussiaat 51:17; 65:3, 4) Oqaasissaarukkaluaraangattaluunniit ’anersaap nammineq anersaamisarnernik taassaanngitsunik illersortarpaatigut’, Jehovalu tusarnaartarpoq. Eqqarsaativut ilisimasinnaavai: „Ungasissumit allaat paasereertarpat qanoq piniartunga. Oqaaseq oqqanni pinngorianngitsoq illit [Jehova], ilisimareeraraat naammattumik.“ Taamaakkaluartoq qinujuartariaqarpugut, ujarlertuartariaqarluta kasuttortuartariaqarlutalu. — Rûmamiut 8:26; Tussiaat 139:2, 4; Matîuse 7:7, 8.

11. Jehovap ilumut isumassoraatigut qanoq takutinneqarpa?

¹¹ Jehova isumassuisuuvoq. Inuunermik pinngortitaminik isumassuisuuvoq. „Tamarmik isaat ilinnut sammipput, nerisassaannik tunisarpatit piffissaq eqqorlugu. Assatit ammartarpatit pinngortitallu tamaasa ajunngitsuutinnik qaarsillartittarlugit“. (Tussiaat 145:15, 16) Timmissat qilaap ataaniittut qanoq ililluni nerisassaqartittarai qimerlooqquneqarput. Naasut nunami qanoq kusanartigisumik naatittarai qimerlooqquai. Jesus nangippoq oqarluni Guutip annerungaartumik uagut isumagiumaaraatigut. Soormi taava isumakuluuteqassaagut? (5 Moses 32:10; Matîuse 6:26-32; 10:29-31) Pîtrusip agdlagai sujugdlît 5:7-imi imatut oqaanneqarpugut: ’Isumakuluutisi tamaasa Guutimut pisissigik, isumassormasi.’

’Naalannassusiata akisunnera qanoq-issusiatalu ersinnera’

12, 13. Jehovap pingortitaatigut iliuuserisartagaasalu Biibilimi atuarnerisigut, aamma qanoq ililluta takusinnaavarput tusarlugulu?

¹² Jehova Guutip qanoq-issusia pinngortitaagut takusinnaavarput; iliuuserisartagaasa Biibilimi allassimasut atuarnerisigut takusinnaavarput; Jesus Kristusittaaq oqaaserisarsimasaasigut iliuuserisarsimasaasigullu takusinnaavarput. Jesus nammineerluni Juánase 12:45-mi oqarsimavoq: ’Uannik takunnittup aallartitsisiga takuaa’. Aamma Juánase 14:9-mi ima allassimavoq: ’Uannik takunnittup Ataataq takuaa’. Kulorsamiut 1:15-imi allassimavoq: ’[Jesus] tassaana Guutip takussaanngitsup assinga’. Eprîarit 1:3 nalunaarpoq: ’[Jesus] tassaavoq [Guutip] naalannassusiata akisunnera qanoq-issusiatalu ersinnera.’

¹³ Jehova utertitsissummik pilersitsiniaannarnarnani erni aallartippaa, aammattaarli oqaatsitigut suliatigullu maligassaaqqullugu. Jesusip Guutip oqaasii oqaatigai. Juánase 12:50-imi ima oqarsimavoq: ’Oqalukkaangama ima oqaluttarpunga, soorlu Ataatap oqarfigigaanga’. Namminerisaminik iliunngilaq, Guutilli oqarneratut iliorpoq. Juánase 5:30-mi oqarsimavoq: ’Isummannik qanoq-iliorsinnaanngilanga’. — Juánase 6:38.

14. (a) Suut Jesus naakkinnittuliortippaat? (b) Sooq Jesusip oqaaluusseriaasia inunnit tusarnaarumaneqartarpa?

¹⁴ Jesusip inuit pupissut, iloqiaasut, tusilartut, tappiitsut, anersaapiloqartut toqusoqarlutillu aliasuttut takusartarpai. Naakkinninnermik killinneqarluni,  napparsimasut ajorunnaarsittarpai toqusullu makitittarlugit. Inuppassuit anersaakkut naalliutsinneqartut amigaateqartullu takusartarpai, sorpassuarnillu ilinniartittarlugit. Oqaatsinik eqqortuinnaanngitsunik aammattaarli killitsinnartunik uummammineersunik uummataannik killiisunik ilinniartittarpai. Tamatumalu taassumunnga kajungilersippai, nuannaarlutillu naalaffimmut tusarnaariartarput. Tusarnaarniarlugu ungusarpaat, nalunaarpullu ’inummik taassumatut oqaluttoqanngisaannartoq’. Ilinniartitseriaasia tupigusuutigeqaat. (Juánase 7:46; Matîuse 7:28, 29; Mákorse 11:18; 12:37; Lúkarse 4:22; 19:48; 21:38) Akeqqamilu oqaatsikkut pisariniaraluaraanganni oqaasii utertittarpai oqaasissaarutsillugit. — Matîuse 22:41-46; Mákorse 12:34; Lúkarse 20:40.

15. Jesusip oqaluussinerani suna pingaarnerpaava, qanorlu annertutigisumik allat oqaluussiartoqquai?

¹⁵ Nalunaarpoq ’Qilammiup naalagaaffia qanillisoq’ tusarnaartinilu ’naalagaaffimmik piniaqqaaqqullugit’ kajumissaarlugit. Allat ’naalagaaffik qanillinerarlugu’ oqaluussiartortippai, ’inuiaqatigiinnit tamaneersunik ajoqersuganngortitseqqullugit’, ’nunap isua’ tikillugu Kristusimut nalunaajaasunngortillugit. Ullumikkut Jehovap nalunaajasui 4,5 millioningajaat Jesusip tumai atuarlugit ajoqersuipput. — Matîuse 4:17; 6:33; 10:7; 28:19; apustilit suliait 1:8.

16. Jehovap asannissusia qanoq ililluni misilinneqarnermik atorneqarpa, inuiannullu qanoq sunniuteqarpa?

¹⁶ Juánasip agdlagai sujugdlît 4:8-mi allassimavoq ’Guuti asassutaasoq’. Ernitui nunami toqusussanngorlugu aallartikkamiuk piginnaaneq tamanna angingaartoq sakkortunerpaamik misilinneqaatigaa. Ernip asasap anniarnera Ataatamullu qilammiusumut qinunera Jehovamut annernangaarsimassaaq, naak Jesusip Satanip unnerluutiginninnerata, tassa Jehova nunami innuttaqarsinnaanngitsoq misilinneqalerunik Tassunga ilumoortuarsinnaasunik, ilumuunnginnera uppernarsisikkaluaraa. Jesusip pilliutaa pingaartittariaqarparput, Guutimmi uatsinnut toqusussanngorlugu aallartissimavaa. (Juánase 3:16) Toqujartorneq oqitsuinnaasimanngilaq. Guutip Jesusillu pilliutaat pingaartinniarlugit pilliutillu angissusiat paasiniarlugu, Biibilimi allassimasut misissortigik.

17-19. Jesusip misilinneqarnissani siumut qanoq oqaatigaa?

¹⁷ Ikinnerpaamik sisamariarluni Jesusip apustilini qanoq pisoqarnissaanik oqaluttuuppai. Ullualunnguit siorna oqarpoq: ’Ata, Jerusalemimut majualerpugut, inuullu ernera palasiunernut allakkanillu ilisimasunut pisitaassaaq, taakkualu toqutassaatissavaat Guutimillu nalusunut pisissavaat, mitaatigissavaallu qitserarlugulu iperartorlugulu toqullugulu.’ — Mákorse 10:33, 34.

¹⁸ Jesusip pineqarnissami ajussusissaa nalunngilaa, Romamiullu iperaataat annernangaartoq nalunngilaa. Iperaataq atorneqartartoq saviminertaqarpoq savallu saarnginik ilaqarluni; iperartorneqarnermilu tunoq nissullu aanaarsuttuinnarnik titarnerusaqalertarput. Qaammatit arlallit sioqqullugit Jesusip misilinneqarnissani siumut oqaatigaa, soorlu Lúkarse 12:50-imi atuarsinnaagipput: ’Kuisimmilli kuisittariaqarpunga, atalu qussalangaarama naammassisimatinnagu’!

¹⁹ Piffissaq qanilliartortillugu nanertisimanerujartuinnarpoq. Ataataminut qilammiusumut tamanna oqaatigaa: ’Maanna tarniga siooravoq; qanorli oqassaanga? Ataataq, nalliuttumit matumannga annaannga. Tamannali pillugu nalliuttoq tamanna tikippara’. (Juánase 12:27) Jehova Ernituami qinnutaanik killitsingaarsimassaaq! Getsemanimi, toqunissaminut akunnialuinnanngortut, aliasungaalerpoq, Peterimullu, Jakobimut Johannesimullu oqarluni: ’Tarniga aliasungaaqaaq toqumut allaat.’ Minuttialunnguit kingorna Jehovamut naalatsigitilluni qinnutini naavaa: ’„Ataataq, piumaguit ermuseq una uannit peeruk; uangali peqqusara pinnani illit peqqusat pili.“ Toqumullu annilaangaarnerup pimmani annermik qinungaalerpoq; kiagunnerili soorlu kusernerit aajusut nunamut nakkaasut.’ (Matîuse 26:38; Lúkarse 22:42, 44) Tamanna nakorsaatitigut ilisimatusarnikkut qaqutigoortorujussuuvoq, hematidrosisimik taaneqartoq, misigissutsikkut artorsarneq pissutigalugu taamaattoqarsinnaavoq.

20. Suup Jesus misilinneqarnerani ikiorpaa?

²⁰ Getsemanimi pisoq pillugu Eprîarit 5:7-mi allassimavoq: ’Taanna uineqarnermini nillingaarluni qullilillunilu qinnutinik kutsiuutinillu aatsigami issumunnga toqumit annaassisigisinnaasaminut, qussalanerminilu tusarneqarpoq’. Toquminngaaniit anaanneqanngimmat ’annaassisigisinnaasaminit tusarneqarnera’ qanoq isumaqarpa. Lúkarse 22:43-mi akissutissaqarpoq: ’Inngililli qilammit saqqummerfigaa nakussatsillugulu’. Qinnutaa akineqarpoq inngilip Guutip aallartitaata misilinneqarnermini nakussatsimmani.

21. (a) Suup takutippaa Jesusip misilinneqarnini ajugaaffigigai? (b) Misilinneqarnerput sakkortusippat, qanoq ililluta oqarsinnaajumassaagut?

²¹ Inernissaa ersarippoq. Ilumigut naalliunnini qaangeramiuk Jesus nikuippoq, Peterilu, Jakob Johannesilu uterfigalugit oqarlunilu: ’Nikuillusi aallarta’. (Mákorse 14:42) Soorlu imatut oqarniartoq: ’Kunissinikkut killuunneqariartorlanga, tigusaajartorlanga, eqqunngitsuliorfigineqariartorlanga, eqqunngitsumik eqqartuunneqariartorlanga. Mitaatigineqariartorlanga, qitserarneqariartorlanga, iperartorneqariartorlanga nappakkamullu anniartitsivimut kikiattorneqariartorlanga’. Akunnerit arfinillit tassani nivingavoq, naalliungaarluni naggatissaanut aalajaappoq. Toqulerami ajugaalluni nillerpoq: ’Naammassivoq’. (Juánase 19:30) Aalajaattuarsimavoq Jehovallu kisimiilluni oqartussaanera aalajaaffigalugu uppernarsisippaa. Jehovamit nunamut aallartinneqaatigisani tamaasa naammaassivai. Uagut toqugutta Harmagedoniluunniit nalliuppat Jehovap uatsinnut suliassiissutigisimasai pillugit oqarsinnaassanerpugut: ’Naammassivoq’?

22. Suup takutippaa Jehovamik ilisarsineq qanoq annertutigiumaartoq?

²² Qanorluunniit pisoqassagaluarpat ilisimassavarput Jehovap piffissaani qanillisumi ’Jehovamik ilisarsinerup nuna tamakkerumaaraa soorlu ermit matoqqagaat immap naqqa’. — Jesaja 11:9. (wD 1/7 93)

Eqqaamavigit?

□ „Ilisarisimanninneq“ „ilisimanninneq“-lu qanoq isumaqarpat?

□ Jehovap naakkinninnera isumakkeerfiginnikkumaneralu oqaasiani qanoq takuneqarsinnaappat?

□ Jehova oqaloqatigalugu Abrahamip oqalussinnaatitaanini qanoq atorpaa?

□ Sooq Jesus qimerloorlugu Jehovap pissusii paasisinnaassavavut?

[Atuaqqissaarnermi apeqqutit]