Kristumiu ullutsinnilu inuiaqatigiit

’Inuiaqatigiit tamarmik uumissussavaasi atera pillugu.’ — MATÎUSE 24:9.

1. Kristumiussutsip ilisarnaataasa suna ilagisussaavaat?

KRISTUMIUT siulliit ilisarnaatigisimasaat tassaavoq silarsuarmit immikkoornerat. Ataataminut qilammiusumut, Jehovamut, qinunermini Kristus ajoqersukkani pillugit ima oqarsimavoq: ’Oqaatsinnik tunivakka, silarsuullu inuisa uumissorpaat ilaginnginnamikkik, soorlu uangattaaq silarsuup inuisa ilginngikkaannga.’ (Juánase 17:14) Jesus Pontius Pilatusimut sassartinneqarami oqarsimavoq: ’Naalagaaffiga silamit matumannga pinngilaq.’ (Juánase 18:36) Kristumiut Allagaataasa Grækerisuut oqaluttuarisaanermillu ilisimatuut kristumiut siulliit silarsuarmit immikkoorsimanerat uppernarsarpaat.

2. (a) Jesusip ajoqersugaasa silarsuullu akornanni pissutsit piffissap ingerlanerani allanngortussaasimappat? (b) Jesusip naalagaaffia silarsuarmiut tamarmik kristumiunngortinneqarneratigut tikiuttussaasimava?

² Jesus ilisimatitsisimava ajoqersukkami silamiullu akornanni pissutsit kingusinnerusukkut allanngorumaartut, aammalu silarsuarmiut tamarmik kristumiunngortinneqarneratigut naalagaaffini tikiukkumaartoq? Naamik. Jesusip toqunerata kingorna ajoqersugaasa isumassarsisitaallutik allagaanni taama allassimasoqanngilaq. (Jâko 4:4 [ukiup 62-ip u.n.k. siuninngua allanneqarsimasut];  1 Juánase 2:15-17; 5:19 [ukiup 98-ip u.n.k. missaani allanneqarsimasut]) Jesusilli ’najuunnissaa’ kingornalu Naalagaaffiup pissaanerani ’tikiunnissaa’ „pissutsit aaqqissuussaanerata naggatissaa“-nut, aaqqissuussaanerup matuma ’naggaserneranik’ imaluunniit suujunnaarsinneqarneranik inerneqarumaartumut, Biibilimi atatinneqarput. (Matîuse 24:3, 14, 29, 30 NV; Daniel 2:44; 7:13, 14) Nalunaaqummi Jesusip parousiʹa-ssaminut imaluunniit najuunnissaminut atatillugu saqqummiussamini ajoqersukkani pillugit ima oqarsimavoq: ’Taava naalliunnartumut pisikkumaarpaasi toqukkumaarlusilu, inuiaqatigiillu tamarmik uumissussavaasi atera pillugu.’ — Matîuse 24:9.

Kristumiut ilumoortut ullumikkut

3, 4. (a) Katuullit qinerlerfissialiaanni kristumiut siulliit qanoq allaaserineqarpat? (b) Jehovap Nalunaajaasui kristumiullu siulliit assigiikannersumik qanoq eqqartorneqarpat?

³ Ullumikkut upperisarsioqatigiit kikkut kristumiut najoqqutassaannik maleruaasutut uumissorneqarnermillu malersugaanermillu kinguneqartumik silarsuarmit immikkoortutut tusaamasaappat? Aap, silarsuaq tamakkerlugu kristumiutut peqatigiit kikkut kristumiut siulliit oqaluttuarisaanermikkut eqqartorneqarnerannut sutigut tamatigut assinguppat? Malugeriaruk New Catholic Encyclopedia-mi kristumiut siulliit qanoq allaaserineqartut: „Naak inuiaqatigiit kristumiut aallaqqaataani juutit akornanni immikkoorniaqatigiippassuit ilaannaattut isigisaagaluarlutik paasinarsisimavoq immikkorluinnaq ittumik ajoqersuuteqartuusut, ilaasortaasullu ’Judæami tamarsuarmi Samariamilu nunallu isuanut allaat’ (ap. sul. 1:8) Kristusimut nalunaajaasusimapput ilungersuussilluartut.“ — Atuagaq 3, qupperneq 694.

⁴ Malugeriakkit oqaatsit ’immikkoorniaqatigiippassuit ilaannaattut isigisaasut’, ’immikkorluinnaq ittumik ajoqersuuteqartut’ aamma ’nalunaajaasut ilungersuussilluartut’. Malugeriarullu atuakkiami tassanerpiaq Jehovap Nalunaajaasui qanoq allaaserineqartut: „Immikkoorniaqatigiit . . . Nalunaajaasut qularutiginngilluinnarpaat ukiut ikittuinnannguit ingerlaneranni silarsuup naggatissaa nalliutissasoq. Upperneq uumassusilik tamanna qasusuillutik ilungersuussisuunerannut nakuussutaagunarpoq annerpaaq. . . . Immikkoorniaqatigiinnut ilaasut tamarmik pisussaatinneqarput Jehovamik, naalagaaffiata tikiuttussap oqaluussissutigineratigut, nalunaajaanissaminnut. . . . Uppernerat inuunerminnilu najoqqutaat taamaallaat Biibilimik tunngaveqarput. . . . Nalunaajaasuulluarumagaanni qanorluunniit ittumik oqaluussinermi suliniarluartuusariaqarpoq.“ — Atuagaq 7, qupperneq 864-65.

5. (a) Jehovap Nalunaajaasuisa ajoqersuutaat sukkut immikkooruteqarpat? (b) Jehovap Nalunaajaasuisa ajoqersuutaasa Biibilimut naapertuunnerannik assersuutinik taasaqarit.

⁵ Jehovap Nalunaajaasuisa ajoqersuutaat sutigut immikkooruteqarpa? New Catholic Encyclopedia-mi ilaat eqqaaneqarput: „[Jehovap Nalunaajaasuisa] ataasiullunilu pingasuussuseq guutimik nalusut guutipilussiornerattut assuaraat . . . Jesus Jehovap nalunaajaasuatut annerpaatut, ’guutitut’ (Juán. 1:1-imi taama nutserpaat) allanit Jehovaanngitsumit tamanit qulangersimaneqanngitsutut isigaat. . . . Taanna inuttut toqusimavoq anersaatullu toqujuitsutut makititaalluni. Taassuma anniarnera toquneralu inuiaat nunarsuarmi naassaanngitsumik inuusinnaatitaaleqqinnissaannut akiliutaavoq. Nalunaajaasut ilumoortut ’amerlangaartut’ (sarĸ. 7:9) nunami paratiisiusumi inuulernissaminnik neriugisaqarput; uppertut 144.000-it kisimik (sarĸ. 7:4; 14:1, 4) Kristus ilagalugu qilammi naalannassuseqalissapput. Ajortut suujunnaarsilluinnarneqassapput. . . . Kuisinneq (Nalunaajaasut morsulluinnarlutik kuisittarput) . . . Jehova Guutimut kiffartornermut tunniulluinnarnerminnut qallikkut takussutissaatippaat. . . . Jehovap Nalunaajaasui aalersortikkumannginnertik  pissutigalugu oqallisaasimaqaat . . . Aappariinnermut kinguaassiuutitigullu ileqqussatigut sukanneqisumik isiginnittaaseqarput.“ Imaassinnaavormi Jehovap Nalunaajaasui tamakkunuunatigut immikkut ittuusut, upperneralli Biibilimik aalajaatsumik tunngaveqarpoq. — Tussiaat 37:29; Matîuse 3:16; 6:10; apustilit suliait 15:28, 29; Rûmamiut 6:23; 1 Korintumiut 6:9, 10; 8:6; sarĸúmersitat 1:5.

6. Jehovap Nalunaajaasuisa isuma suna attattuarpaat? Sooq?

⁶ Katuullit atuakkiaanni qinerlerfissiami nangilluni allassimavoq 1965-imi (qularnanngitsumik ukiumi ilanngutassiap allanneqarfiani) „Nalunaajaasut inuiaqatigiinnut inooqataaffigisaminnut ilaanngitsutut suli isigisut“. Qularnanngitsumik atuakkiortoq isumaqarsimagaluarpoq Jehovap nalunaajaasui amerliartuinnaramik „immikkoorniaqatigiittullu pinnatik ilagiittut isikkoqaleriartuinnaramik“ silarsuarmut matumunnga ilaalissasut. Ilaalersimanngillalli. Ullumikkut Jehovap nalunaajaasuisa, 1965-imit sisamariaammik amerleriarsimasut, suli silarsuarmut matumunnga isiginnittaasiat taannaavoq. ’Silarsuup inuisa ilaginngilaat’, Soorlu Jesus ’silarsuup inuisa ilaginngikkaat’. — Juánase 17:16.

Silarsuarmit immikkooraluarlutik akeqqersimanngitsut

7, 8. Kristumiut siulliit ullumikkullu Jehovap nalunajaasui pillugit qanoq oqartoqarsinnaava?

⁷ Atuakkiamini Early Christianity and Society-mi (Itsaq kristumiussuseq inuiaqatigiillu) Robert M. Grantip Justinus Martyrip kristumiussutsimut illersuutitut allagai ukiut hundredellit aappaanneersut issuaaffigisimavai: „Kristumiut pikitsitsiniartuugaluarunik anguniagartik anguniarlugu toqqortussagaluarput. . . . Eqqissinermik torersuunermillu atatitsiniarneq pineqaraangat kaasarimut iliulluarnerpaasarput.“ Aamma ullumikkut Jehovap nalunaajaasui nunarsuarmi sumi tamaaniittut eqqissinermik nuannarisaqartutut inatsisinillu maleruaalluartutut ilisimaneqarput. Naalakkersuisut qanorluunniit ittut nalunngilaat Jehovap nalunaajaasuinut sioorassutissaqaratik.

⁸ Amerikami avannarlermi pingaarnerutitamik allattartoq ima allassimavoq: „Ilumoortuusaarniartut imaluunniit kukkusumik isummertartut kisimik isumaqarsinnaapput Jehovap Nalunaajaasui naalakkersuisunut siooranartorsiortitsisuusut; upperisarsioqatigiit taakku pikitsitsiniartooqqajanngillat eqqissinermillu nuannarisaqaqalutik.“ Jean-Pierre Cattelain atuakkiamini L’objection de conscience-mi (Nalunngeqatiginnissut pissutigalugu naaggaarneq) ima allassimavoq: „Nalunaajaasut naalakkersuisunut naalatsigitilluinnartuupput inatsisinillu maleruaalluarniartuullutik; akileraartarput naalakkersuisunillu isornartorsiuiniartuunatillu allanngortitsiniartuunatillu uppititsiniartuunatik, silarsuummi matuma suliniutaanut peqataaneq ajorput.“ Ilanngullugu eqqaavaa taamaallaat naalagaaffiup Jehovap Nalunaajaasuisa inuunerat, Guutimut tunniulluinnarsimasaat, piumasarigaangagu naalakkumasanngitsut. Tamatumuunakkut kristumiut siulliit assigilluinnarpaat. — Mákorse 12:17; apustilit suliait 5:29.

Naalagaasunit paasinerlunneqartut

9. Silarsuarmit immikkoornissaq eqqarsaatigalugu kristumiut siulliit ullumikkullu katuullit qanoq malunnartumik assigiinngissuteqarpat?

⁹ Romamiut kaasarerisarsimasaasa amerlanersaat kristumiunik paasinerluisarsimapput malersuisarsimallutillu. Diognetbrevet-imi (Diognetimut allakkat-ni), inuit ilaannit ukiut hundredellit aappassaanneersorineqartuni u.n.s., ima allassimasoqarpoq: „Kristumiut silarsuarmi najugaqarput, silarsuarmulli ilaanatik.“ Dogmatisk Konstitution om Kirken-imili allassimavoq katuullit ’silarsuarmiut suliniutaannut suleqataanermikkut Guutip naalagaaffia ujartortariaqaraluaraat’ aamma ’silarsuup iluunngaanit illernarsarneqarnissaa sulissutigisariaqaraluaraat’.

10. (a) Kristumiut siulliit naliminni nuimasortaasunit qanoq isigineqarsimappat? (b) Jehovap nalunaajaasui amerlasuutigut qanoq isigineqartarpat, qanorlu qisuariartarpat?

 ¹⁰ Oqaluttuarisaanermik ilisimatooq E. G. Hardy oqarsimavoq Romamiut kaasariisa kristumiut siulliit ’ingasaassiniapalaatut’ isigisimagaat. Oqaluttuarisaanermik ilisimatuup franskiusup Étienne Trocmép eqqartorsimavaa ’grækerit Romamiullu atorfilittaasa ilinniagartuut [kristumiunik], immikkoorniaqatigiittut eqqumiitsorujussuartut kangianeersutullu isigisaminnik, narruginnittumik pinninnerat’. Plinius Nukarliup, Romamiut Bithyniami naalagaatitaata, kaasarillu Trajanip allaffigeqatigiinneratigut erserpoq nuimarnit kristumiussutsip ilumoortup suussuserpiaanik ilisimasaqarpallaarsimanngitsut. Aamma ullumikkut Jehovap nalunaajaasui silarsuup siuttuinit paasinerlunneqartarput asissorneqartarlutillu. Tamannali tupaallaatiginalugulu nikalluutigineq ajorpaat. — apustilit suliait 4:13; 1 Pîtruse 4:12, 13.

’Sumi tamaani assortorneqarput’

11. (a) Kristumiut siulliit pillugit qanoq oqartoqarsimava, Jehovallu nalunaajaasui qanoq oqaatigineqarsimappat? (b) Sooq Jehovap nalunaajaasui politikkikkut suleqataaneq ajorpat?

¹¹ Kristumiut siulliit pillugit ima oqartoqarsimavoq: ’Immikkoorniaqatigiit taakku tamaginni assortorneqartut ilisimavavut.’ (apustilit suliait 28:22) Ukiut hundredellit aappassaanni u.n.k. Romamiu Celsus oqarsimavoq kristumiussuseq inuiaqatigiit nikanarnersaannik ilassarsiortuusoq. Aamma Jehovap nalunaajaasui pillugit oqartoqarsimavoq ’amerlanersaat inuiaqatigiit pilimannginnerusortaanneersuusut’. Ilagiit oqaluttuarisaanerannik ilisimatooq August Neander allassimavoq ’kristumiut inuttut silarsuarmut toqungasutut inuunermilu sutigut tamatigut atorsinnaanngitsutut isiginiarneqartarsimasut; . . . aperisoqartarsimavoq kikkut tamarmik taamaattuusuuppata qanoq ililluni ingerlasoqarsinnaassagaluartoq.’ Aamma Jehovap nalunaajaasui politikkimut peqataaneq ajoramik inuiaqatigiinni atorfissaqanngitsutut isiginiarneqartarput. Qanorli ilillutik Guutip naalagaaffia inuiaat neriuutissatuaattut oqaluussissutigiitigalugu politikikkut suliniuteqarsinnaassagamik? Jehovap nalunaajaasuisa apustilip Paulusip oqaasii maleruarpaat: ’Sorsulluarniassasutut Jesus Kristusip pigisaatut naallioqataaginnarit. Sorsukkiartortut sulinerit inuunerup pii isumagisarinngilaat, tassa sakkutuussarsiortumut iluareqqullutik.’ — 2 Timûtiuse 2:3, 4.

12. Sukkut allakkut pingaaruteqartukkut Jehovap nalunaajaasui kristumiut siulliit assigalugit silarsuarmit immikkoorpat?

¹² Atuakkiamini A History of Christianity-mi professori K. S. Latourette ima allassimavoq: „Sorsunnermut peqataanissaq eqqarsaatigalugu kristumiut siulliit grækerit Romamiullu silarsuaannut akerleriissuteqarsimapput. Kristumiut allagaataannik ilisimaneqartunik ukiunit hundredelinnit pingasunit siullerneersunik kristumiut sorsunnermut peqataanissaannik akuersaartunik nassaassaqanngilaq.“ Edward Gibbonip atuakkiaani Det romerske riges forfald og undergang-imi (Romamiut naalagaaffiata aseroriartornera suujunnaarneralu) allassimavoq: „Kristumiut pisussaaffimminnik allanik illernarnerusunik sumiginnaallutik sakkutuunngortarsimanissaat, pisortaasunut ilannguttarsimanissaat imaluunniit naalakkersuisunngortarsimanissaat ilimanaateqanngilaq.“ Taamatuttaaq Jehovap nalunaajaasui kalluunnaveersaarluinnartuupput Biibilimi najoqqutassiat Jesaja 2:2-4-miittut aamma Matîuse 26:52-imiittut maleruaramikkik.

13. Jehovap nalunaajaasui qanoq pasillerneqartarpat, pissutsilli piviusut qanoq takutitsippat?

¹³ Jehovap Nalunaajaasui akerartortiminnit ilaqutariinnik avissaartuutsitsisartutut pasillerneqartarput. Ilumoorpoq assersuutissaqarmat ilaqutariit ilaat ataaseq arlallilluunniit Jehovamut nalunaajaasunngoraangata ilaqutariit avissaartuussinnaasarnerannut.  Jesusip taamatut pisoqartarsinnaanera siulittuutigisimavaa. (Lúkarse 12:51-53) Kisitsisitigulli nassuiaasiatigut erserpoq tamanna pissutigalugu aappariit avittarnerat qaqutigoortuusoq. Assersuutigalugu Frankrigimi Jehovap Nalunaajaasuisa akornanni aappariit pingasuugaangata ataatsit aappaat Jehovamut nalunaajaasuuneq ajortut. Tamakku akornanni avittarnerit nuna tamakkerlugu avittartut agguaqatigiissinnerannit amerlanerunngillat. Soormitaava? Apustilit Paulusip Peterillu kristumiut uppinngitsumik aappallit pitsaasumik isumassarsiarititaasumik unnersuussimavaat, Jehovallu nalunaajaasuisa siunnersuut tamanna malinniarsaraat. (1 Korintumiut 7:12-16; 1 Pîtruse 3:1-4) Aappariit taama ittut avissagaangata amerlanertigut aappaasup Jehovamut nalunaajaasuunngitsup piumasaa malillugu pisoqartarpoq. Aappaatigulli aamma aappariinnerpassuit annaanneqarsimapput aappaasut Jehovamut nalunaajaasunngorsimammata inuunerminnilu Biibilimi najoqqutassianik maleruaalersimallutik.

Kristumiut, ataasiullunilu pingasuussutsimut tapersersuisuunngitsut

14. Kristumiut siulliit qanoq pasillerneqartarpat, soorlu tamanna quianaannarpa?

¹⁴ Quianaannarpoq Romamiut naalagaaffiata kristumiut siulliit ilaatigut Guutimik upperisaqanngitsutut pasillersimammagit. Dr. August Neander allassimavoq: „Kristumiut guutinik miserratiginnittutut inunnit oqallisigineqartarsimapput, guuteqannginneraasunillu taaneqartarsimapput.“ Ila imminut assortornerussusia guutimik nalusut guutiunngitsunik ’qisummilli ujaqqamilluunniit inuit assamminnik sanaavinik’ pallorfigisaqartut kristumiut, Pinngortitsisumik uumassusilimmik guuterpassuunngitsunillu pallorfigisaqartut, Guuteqarneranik upperisaqanngitsutut taasimammatigik. — Jesaja 37:19.

15, 16. (a) Kristumiuunerartut ilaat Jehovap Nalunaajaasui pillugit qanoq oqarsimappat, sunalu apeqqutaalerpa? (b) Sukkut erserpa Jehovap Nalunaajaasui kristumiuusut ilumoortut?

¹⁵ Aamma quianaannarpoq ullumikkut kristumiuunerartut akornanni Jehovap Nalunaajaasui kristumiuunngitsuunerarneqartarmata. Sooq kristumiuunngitsuunerarneqartarpat? Ataasiullunilu pingasuussutsimik ajoqersuut upperiumanngimmassuk. Kristumiuunerartut isummanik allanik akuersiumanatik nassuiaataasa ilaat naapertussagaanni kristumiu tassaavoq „Kristusip Guutiuneranik akuerinnittoq“. Oqaatsinilli qinerlerfissiami nutaanerusumi kristumiu tassaanerarneqarpoq „inuk Jesus Kristusimut uppertoq ajoqersuutaanillu maleruaasoq“, kristumiussuserlu tassaanerarneqarluni „upperisarsiorneq Jesus Kristusip ajoqersuutaanik taassumalu Guutip erniuneranik uppernermik tunngavilik“. Upperisarsioqatigiit sorliit nassuiaammut tamatumunnga tulluunneruppat?

¹⁶ Nassuiaammut siullermut atatillugu Jehovap Nalunaajaasuisa Jesusip kinaanerminik nammineq nalunaajaataa akueraat. Ima oqarsimavoq: ’Guutip erneraanga,’ imaanngitsoq „Guutiuvunga Erneq“. (Juánase 10:36; naleqqiuguk Juánase 20:31.) Apustili Paulusip Kristus pillugu oqaasii isumassarsiarititaasut akueraat: ’Guutip taattua taassuma pigigaluaramiuk Guutisut issutsi paggatigisatut isumaqartinngilaa.’ * (Filípimiut 2:6) Atuakkami The Paganism in Our Christianity-mi allassimavoq: Jesus Kristus taama ittumik [ataasiullunilu pingasuussutsimik naligiissumik] eqqartuisimanngisaannarpoq, oqaaserlu ’ataasiullunilu pingasuusseq’ Testamentitaami nassaassaanngilaq. Ajoqersuut tamanna Naalakkatta toquneranit ukiut 300-it qaangiuttut aatsaat ilagiinnit atulersinneqarsimavoq, guutimillu nalusunit  pilerfeqarluinnarpoq.“ Jehovap Nalunaajaasuisa Biibilip Kristus pillugu ajoqersuutaa akueraat. Taakku kristumiuupput ilumoortut, ataasiullunilu pingasuussutsimik tapersersuisuunatik.

Ilagiit assigiinngitsut suleqatigiinnerannut peqataajumanngitsut

17. Sooq Jehovap Nalunaajaasui ilagiit assigiinngitsut suleqatigiinnerannut peqataajumanngillat?

¹⁷ Jehovap Nalunaajaasuinut atatillugu naammagittaalliutaasartut ilaat marluk tassa ilagiit assigiinngitsut suleqatigiinnerannut peqataajumannginnerat, aamma ilaasa oqartarnerattut ’sukannerniakujuttumik ajoqersuiniartarnerat’. Aamma kristumiut siulliit taama unnerluutigineqartarsimapput. Kristumiuunerartut, katuullit, ortodoksit naaggaartullu ilagiivi tamarmik, assortugassaanngitsumik silarsuarmut ilaapput. Jehovap Nalunaajaasuili Jesusitut ’silarsuup inuisa ilaginngilaat’. (Juánase 17:14) Qanorlu ilillutik upperisarsioqatigiit kristumiorpalaanngitsumik ileqqullit ajoqersuutillillu ilagiit assigiinngitsut suleqatiginerisigut ilisigisinnaassavaat?

18. (a) Sooq Jehovap Nalunaajaasui kisimik upperisamik ilumoortumik ingerlatsineraanerannik assuarineqarsinnaanngillat? (b) Katuullit suna piginngilaat, naak isumaqaraluarlutik upperisaq ilumoortoq pigalugu?

¹⁸ Kia eqqortumik iliorluni Jehovap Nalunaajaasui kristumiut siulliit assigalugit kisimik upperisamik ilumoortumik ingerlassinerarnerannik  assuarisinnaavai? Aamma ilagiit katuullit, ilumoortuusaarlutik ilagiit assigiinngitsut suleqatigiinnerannut peqataanerartut, oqarput: „Upperaarput upperisarsiorneq ilumoortutuaq katuullit apustuulillu ilagiivini atajuartoq, ilagiinni Naalakkap Jesusip ima oqarluni siammarsaqqusaani: ’Aallaritsi, inuiaqatigiillu tamaasa ajoqersuganngortissigik.“ (Vatikan II, ’Upperisarsiornikkut kiffaanngissutsimik nalunaarut’.) Uppernerli tamanna ajoqersuganngortitsiortornermut atatillugu katuullinik ’qasusuitsumik ilungersuussisunngortitsinissamut’ naammassimagunanngilaq.

19. (a) Jehovap nalunaajaasuisa suna aalajangiusimavaat, suna kajumississutigalugu? (b) Ilanngutassiap tulliani suna sammineqassava?

¹⁹ Jehovalli nalunaajaasuisa akornanni ilungersuussissuseq tamanna nassaassaavoq. Nalunaajaasut taakku aalajangiusimalluinnarpaat Guutip oqarnissaa tikillugu oqaluussiuarnissartik. (Matîuse 24:14) Oqaluussinerminni ilungersuussisuupput, sukannerniakujuttuunatik. Tullermik asanninnertik, inuiannik uumissuinerunngitsoq, iliuuleqalissutigaat. Sapinngisamik amerlasuut annannissaat neriuutigaat. (1 Timûtiuse 4:16) Kristumiut siulliit assigalugit ’kikkut tamaasa eqqissiveqatiginissaat’ ilungersuutigaat. (Rûmamiut 12:18) Qanoq ilillutik taamaliornerat ilanngutassiap tulliani sammineqassaaq. (wD 1/7 93)

[Quppernerup ataani ilanngussaq]

Apeqqutit uteqqiissutissat

□ Kristumiut siulliit suna ilisarnaatigisimavaat, qanorlu ilillutik Jehovap nalunaajaasuisa assigaat?

□ Sutigut Jehovap nalunaajaasuisa ersersittarpaat innuttaalluartuullutik?

□ Kristumiut siulliit nuimanertaasunit qanoq isigineqartarsimappat, ullumikkummi aamma taamaanngila?

□ Jehovap nalunaajaasuisa sallusissummik pigisaqarnerminnik upperinninnertik qanoq iliulissutigaat?

[Atuaqqissaarnermi apeqqutit]

[Qupp. 12-mi assiliartat]

Jehovap nalunaajaasuisa aalajangiusimavaat Guutip oqarnissaata tungaanut oqaluussiuarnissartik

[Qupp. 17-mi assiliartaq]

Pilatus oqarsimavoq: ’Takussagissi inuk.’ — silarsuup inuinut ilaanngitsoq. — Juánase 19:5.

[Suminngaanneernera]

„Ecce Homo“ A. Ciserimit: Firence, Galleria d’Arte Moderna / Alinari/Art Resource, N.Y.