Silarsuarmut attaveqarnitsinni ilisimassuseqarluta saqisa
Silarsuarmut attaveqarnitsinni ilisimassuseqarluta saqisa
’Ilaginngisavut inooqatigisigik ilisimasutut iliorluta.’ — KULORSAMIUT 4:5.
1. Suut unamminiarnartut kristumiut siulliit naammattuugassarisimavaat, ilagiillu Kolossæmiittut Paulusip qanoq unnersuuppai?
ROMAMIUT naalagaaffiata atuunnerani kristumiut illoqarfinni najugaqartut guutipilussiornermik, guutimik nalusut ileqqulersuutaannik aliikkusersuutaannillu kanngunartunik naammattuugassaqartinneqartuartarsimapput. Kolossæmi Asiaaqqap qiterliup kippasinnerusortaaniittumi najugaqartut Frygiap inuiisa anersaarsiornerannik guutinillu anaanaatitanik pallorfiginninnerannik, grækerit nunasisut isumaliutersuutaannik guutimik nalusuneersunik juutillu upperisarsiornerannik qularnanngitsumik naammattuugassaqartinneqartarsimapput. Apustili Paulusip ilagiit kristumiut avataaniittut tamakku eqqarsaatigalugit ’ilisimasutut iliorlutik’ saqinissaannik kajumissaarsimavai. — Kulorsamiut 4:5.
2. Sooq ullumikkut Jehovap nalunaajaasui avataaniittut eqqarsaatigalugit ilisimassuseqartumik saqisariaqarpat?
2 Ullumikkut Jehovap nalunaajaasui ileqqunik eqqunngitsunik allarpassuarnillu naammattuugassaqartinneqartarput. Taamaattumik aamma taakku ilagiit kristumiut ilumoortut avataanniittunut attaveqarnerminni ilisimassuseqarlutik saqisariaqarput. Akerlilersorterpassuaqarput, tusagassiuutitigut aamma palasit politikerillu akornanni. Akerlilersuisut taakkua ilaasa — toqqaannartumik saassunermikkut imaluunniit, amerlanertigut, illaruaatissiinikkut — Jehovap nalunaajaasui tusaamanerlugaalersinniartarpaat paqumisuffigisaalersinniartarlugillu. Soorlulu kristumiut siulliit naapertuilluanngitsuliorfigineqarlutik ’immikkoorniaqatigiittut’ ingasaassiniatut isigineqartarsimasut taamatut Jehovap Nalunaajaasui ullumikkut amerlasuutigut paasinerlunneqartarput paqumisuffigineqartarlutillu. — apustilit suliait 24:14; 1 Pîtruse 4:4.
Paqumisunnerit ajugaaffigikkit
3, 4. (a) Sooq kristumiut ilumoortut silarsuarmit asaneqalinngisaannassappat, qanorli iliorniarsarisaqarpugut? (b) Jehovap nalunaajaasuisa ilaat nazistit katersortitsiviiniittut pillugit atuakkiortoq qanoq allassimava?
3 Kristumiut ilumoortut silarsuarmit, apustili Johannes naapertussagaanni ’iluunngarmi ajortormiusumit’, asaneqarnissartik naatsorsuutiginngilaat. (1 Juánase 5:19) Biibilimili kristumiut kajumissaarneqarput inuit ataasiakkaat Jehovamut pallorfiginninnermut minguitsumut saatsinniarnissaat ilungersuutigeqqullugu. Taamaaliortarpugut toqqaannartumik oqaluussinitsigut pissuserissaarnitsigullu. Apustili Peter allassimavoq: ’Iluartumik saqigitsi Guutimik nalusuni, taakku pinerluttuunerarlusi oqaatissuaatigigaluatik pillugit ajunngitsuliasi takullugit ullussami takusarneqarfissami Guutimik unnersiutiginneqqullugit.’ — 1 Pîtruse 2:12.
4 Atuakkiamini Forgive — But Do Not Forget-imi (Isumakkeerfiginnittarit — puiornalli) atuakkiortup Sylvia Salvesenip arnarpaaluit Jehovamut nalunaajaasuusut nazistit katersortitsivianneeqatigisimasani allaatigisimavai: „Taakkua marluk, Käthep Margarethellu, allarpassuillu, ikiortarsimaqaannga, uppernermikkuinnaanngitsoq aammali nalinginnartigut. Ikitsinnut nimissatsinnik annoraaminernik ipiitsunik siulliullutik pissarsissuttarpaatigut . . . Naatsumik oqaatigalugu inuupput uagutsinnut ajunnginnerpaamik kissaateqartut, inussiarnissutsiminnillu iliuutsimikkut ersersitsisartut.“ ’Ilaginngisatsinnut’ nalunaajaat pitsaasoq.
5, 6. (a) Suliaq suna Kristusip maannakkut ingerlappaa, sunalu puiussanngilarput? (b) Inuit silarsuarmiittut qanoq isumaqarfigisariaqarpavut, sooq?
5 Avataaniittunut pissuseqarnitta ilisimassuseqarpalaartuutinneratigut paqumisunnerit piiarniarlugit annertuumik iliuuseqarsinnaavugut. Piffissami Kunngitta aqutsisup, Kristus Jesusip, inuiannik ’savanik paarsisup savanik savaasanit avissaartiterisarneratut’ avissaartiteriffigisaani inuuvugut. (Matîuse 25:32, NV) Puiunngisaannassavarpulli eqqartuussisoq tassaammat Kristus; taassuma aalajangissavaa kikkut ’savaanersut’ kikkullu ’savaasaanersut’. — Juánase 5:22.
6 Jehovap peqatigiissortaanut ilaanngitsunut isumaqarfiginninnitsinni tamanna takuneqarsinnaasariaqarpoq. Immaqa silamiutut isigisarpavut, inuiaalli silarsuaannut ima oqaatigineqarsimasumut ilaapput: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Pitsaaneroqaaq inuit ’savanngortussatut’ isigissallugit imaaliinnarlugit ’savaasatut’ nalilernissaaninngarnit. Siornatigut sallusuissummut akerlilersuisorujussuusimagaluit maanna Jehovamut nalunaajaasuupput tunniulluinnarsimasut. Taakkualu ilarpassui aatsaat inussiarnernermik ersersitsivigineqareernermik kingorna sallusuissummik soqutiginnilersimapput toqqaannartumillu oqaluussinermut tusarnaarusulersimallutik, assersuutigalugu asseq qupperneq 19-imiittoq takuuk.
Ilungersuussisut, sukannerniakujuttuunngitsut
7. Paavi qanoq isornartorsiusimava, sunalu apeqqutaalerpa?
7 Paavi Johannes Paul II-p immikkoorniaqatigiit ataatsimut, ingammik Jehovap Nalunaajaasui, saaasuppai ima oqarami: „Ilungersuussineq sukannerniakujuppalungajattoq tamanna, ilaasa illumiit illumut angalaarlutik aqqusinermiluunniit saneqquttunik unitsitsisaqattaarlutik ilaasortassarsiornerminni ersersitaat, apustilit ajoqersuiartortitallu ilumoortut uppernermikkut ilungersussusiannik aapakoorniarpaluttumik peqquserlunnikkut allanngortitsineruvoq.“ Tamatumunnga atatillugu aperisoqarsinnaavoq: Suliarput ’apustilit ajoqersuiartortitallu ilumoortut uppernermikkut ilungersussusiannik aapakoorniarpaluttumik peqquserlunnikkut allanngortitsinerusimappat’ taava sumi iivangkiiliumik ilungersuussineq ilumoortoq nassaassaassava? Katuullit, naaggaartut upperisarsioqatigiillu ortodoksit ilaasortaasa akornanni nassaassaaqqajanngilaq.
8. Illumiit illumut oqaluussisarnitsinni qanoq pissuseqartariaqarpugut, suullu angunissaa neriuutigaarput?
8 Oqaluussinitsinni inunnut saaffiginnikkaangatta inussiarnernissarput, ataqqinnittuunissarput ilassiortuunissarpullu ilungersuutigiuaannarutsigu ittuujuisaartuunerarneqartarnivut tamaasa pakatsisissavavut. Ajoqersugaq Jakob allassimavoq: ’Kina arlarsi ilisimatuullunilu sianisuuguni taassuma ilisimatuutut piuaalluni ileqqorissutsimigut suliani nittarligit.’ (Jâko 3:13) Apustilip Paulusip kajumissaarpaatigut ’saqitsaagajuttuunnginnissatsinnik’. (Títuse 3:2) Pulaakkatta isumaa ilumoorluta soqutigisarniartigu, upperisaa toqqaannartumik assuarinagu. Taava nutaarsiassamik nuannersumik Biibilimeersumik oqaluttuussinnaassavarput. Pulaakkatsinnut ajunngitsumik isumaqarfiginninnitsigut inunnillu allamik upperisalinnik ataqqinninnitsigut inuit tusarnaarusunnerulersissinnaavavut, immaqalu Biibilimi tusarliussap naleqassusia takusinnaalissavaat. Immaqalu ilaasa ’Guutimik unnersiutiginnilernerannik’ kinguneqassaaq. — 1 Pîtruse 2:12.
9. Apustili Paulusip unnersuussutai qanoq maleruarsinnaavavut (a) Kulorsamiut 4:5-imiittoq, aamma (b) Kulorsamiut 4:6-imiittoq.
9 Apustili Paulus oqarsimavoq: ’Ilaginngisavut inooqatigisigik ilisimasutut iliorlusi, ullullu piginnaaffiusut asiutinnaveersigik.’ (Kulorsamiut 4:5) Versip naggataata tungaa J. B. Lightfootip ima allaatigisimavaa: „Guutip siunertaanut siuarsaataasinnaasumik oqaaseqarnissamut iliuuseqarnissamullu periarfissaq ataaserluunniit annaanaveeruk.“ (Uagut uingasunngortippavut.) Aap, oqaatsikkut iliuutsikkullu periarfissat tamaasa atornissaannut piareersimasariaqarpugut. Aamma ilisimassusermut tamatumunnga ilaavoq piffissatigut naleqquttutigut inunnut pulaartarnissaq. Amerlasuut tusarliussassatsinnut tusaajumannginnerat soqutiginninnginnermik imaluunniit piffissaanngitsukkut aggernitsinnik pissuteqarpa? Paulus aamma oqarsimavoq: ’Alianaatsunik oqaaseqartaannaritsi, tarajorsimasunik, kimulluunniit qanoq akissutissassinnik ilisimaqqullusi.’ (Kulorsamiut 4:6) Taamaaliussagutta eqqarsariataallaqqissuseq tullitsinnullu piviusumik asannissuseq pisariaqarput. Tamatigut ’alianaatsumik’ pissuseqarluta Naalagaaffimmik tusarliussaq oqaluussissutigisartigu.
Ataqqinnittut ’ajunngitsuliassanullu tamanut kajumittut’
10. (a) Kristumiut Kretamiittut apustili Paulusip qanoq unnersuussimavai? (b) Unnersuussutip tamatuma maleruarnissaa eqqarsaatigalugu Jehovap nalunaajaasui qanoq maligassiusimappat?
10 Biibilip najoqqutassiai pineqaraangata akueriumanngisatsinnut nakkaannarsinnaanngilagut. Aappaatigulli aamma kristumiutut assuarnaassutsitsinnik siooranartorsiortitsinngitsut akerleriissutinngortissanngilavut. Apustili Paulus allassimavoq: ’[Kristumiut Kretamiittut] eqqaasinniakkit naalagaanernut naalakkersuisunullu naalattooqqullugit, peqqussutaallu maleqqullugit, ajunngitsuliassanullu tamanut kajumeqqullugit, kimilluunnit mitalleqqunagit saqitsaagajoqqunagillu, piuaaqqullugilli inuillu tamaasa qanilaartumik pisartuaqqullugit.’ (Títuse 3:1, 2) Allassimaffik tamanna pillugu Biibilimik paasiniaasartoq E. F. Scott ima oqaaseqarsimavoq: „Kristumiut oqartussaasunut naalattussaaginnanngillat aammali qanorluunniit ajunngitsuliornissamut piareersimasuusussaapput. Tamanna . . . isumaqarpoq kristumiut periarfissaqaleraangamik innuttaaqataasutut pisussaassutsimik misigisunut siullernut ilaasariaqartut. Ikuallattoqartuartassaaq, nappaalaneqartuartassalluni assigiinngitsunillu ajunaarneqartuartassalluni innuttaalluartut tullerminnik ikiuinissaminnut periarfissaqarfigiligaannik.“ Nunarsuarmi sumi tamaani ajunaarnersuaqartarsimaqaaq, Jehovallu nalunaajaasui ikiuiniartunut siullernut ilaasarsimapput. Ilatik kisiisaanngitsoq aammali avataaniittut ikiortarsimavaat.
11, 12. (a) Kristumiut oqartussaasunut qanoq pissuseqartariaqarpat? (b) Rigssaliliorniarnermut atatillugu oqartussaasunut qanoq naalatsigitittoqarsinnaava?
11 Paulusip Titusimut allagaasa ilaani tamaani aamma oqartussaasunut ataqqinnittumik isumaqarfiginninnissap pingaaruteqassusia erseqqissarneqarpoq. Kristumiut inuusuttut kalluunnaveersaartuunertik pissutigalugu eqqartuussisunut sassartinneqartut avataaniittunut ilisimassuseqartumik pissuseqarnissartik ingammik eqqumaffigisariaqarpaat. Pissusilersornermikkut, qallikkut pikisimanermikkut oqartussaasunillu taaguinermikkut Jehovap nalunaajaasuisa tusaamasaalluarnissaannut tusaamanerlugaanissaannulluunniit annertuumik iliuuseqarsinnaapput. ’Ataqqinninnermik pisussaq ataqqinninnermik tunisariaqarpaat’, imminnullu illersornerminni ataqqinnilluinnartariaqarlutik. — Rûmamiut 13:1-7; 1 Pîtruse 2:17; 3:15.
12 ’Naalakkersuisut’, imaluunniit oqartussaasut, aamma tassaapput najugarisami atorfilittat. Ullumikkut rigssaliliortiterneqartillugu najugarisami oqartussaasunik oqaloqateqarnissaq pisariaqalersarpoq. Utoqqaanertat amerlasuutigut paqumisuttumik qisuariarfigineqartarput. Paasinarsisimavorli paqumisunnerit tamakku nungutinneqarsinnaasut ilagiinnit aallartitat oqartussaasunut ajunngitsumik attaveqarnissartik pisortaqarfinniittunillu suleqatiginninnissartik ilungersuutigigaangassuk. Amerlasuutigut Jehovap nalunaajaasuinik suliaannillu ilisimasaqaqqalaartunut ilisimasaqanngilluinnartunulluunniit ajunngitsumik nalunaajaasoqartarpoq.
’Ajornanngippat sapinngisassinnik inuit tamaasa eqqissiveqatiginiarsigik’
13, 14. Kristumiunut Romamiittunut Paulus qanoq unnersuussisimava, avataaniittunullu attaveqarnitsinni ilitsersuut tamanna qanoq maleruarsinnaavarput?
13 Kristumiut guutimik nalusoqarfiusumi Romamiittut Paulusip ima oqarfigisimavai: ’Ajortumik iliortoq ajortumik akileqinasiuk. Inuit tamarmik takkuanni ileqqorissaarniaritsi. Ajornanngippat sapinngisassinnik inuit tamaasa eqqissiveqatiginiarsigik. Nammineq akiniaaqinasi, asasakka, kamannerli assaarsiuk, allassimammat: „Akiniut uanga pigaara, uanga akiliiumaarpunga, oqarpoq Jehova.“ Taamaattumik qinngarsortit kaappat nerleruk, imerusuppallu immiguk; taamaalioruit aamat ikumasut niaquanut katersorumaarpatit. Ajortoq ilinnut ajugaatinnaveeruk, kisianni ajortumut ajunngitsoq sakkugalugu ajugaaniarit.’ — Rûmamiut 12:17-21.
14 Avataaniittunut attaveqarnitsinni kristumiutut ilumoortutut akerlilersortivut ajuallatsinngitsoorsinnaanngilavut. Versimi qulaani issuarneqartumi erserpoq ilisimassuseqarluni saqinermut ilaasoq inussiarnersumik pissusilersornikkut akerlilersuinermik ajugaaffiginninniarnissaq. Aamat ikumasut assigalugit inussiarnernerup tamatuma akeqqersimaarneq aatsissinnaavaa akerlilersuisorlu Jehovap innuttaanut akuersaarnerulersissinnaallugu, immaqalu allaat nutaarsiassamut nuannersumut soqutiginnilersissinnaallugu. Taama pisoqaraangat ajortoq ajunngitsumik ajugaaffigineqartarpoq.
15. Ingammik qaqugukkut kristumiut avataaniittunut ilisimassuseqartumik pissuseqarnissartik eqqarsaatigisariaqarpaat?
15 Ingammik angerlarsimaffinni aappap kisimi sallusuissuummiiffigisaani pingaartorujussuuvoq avataaniittunut ilisimassuseqartumik pissusilersornissaq. Biibilip najoqqutassiaanik maleruaaneq uitut, nuliatut, ataatatut anaanatullu pitsaanerulissutaasarpoq, meeqqallu atuarfimmi naalannerulerlutillu eqiasuinnerulersarput. Uppinngitsup Biibilip najoqqutassiaasa uppertumut ajunngitsumik sunniutai ersarissumik takusinnaasariaqarpai. Taamaattumik ilaat ilaquttamik tunniulluinnarsimasut ’saqineratigut oqaaseqanngitsukkut ilataarineqarsinnaapput’. — 1 Pîtruse 3:1, 2.
’Tamanut ajunngitsuliorta’
16, 17. (a) Pilliutit suut Guutip iluarai? (b) Qanoq ililluta qatanngutitsinnut avataaniittunullu ’ajunngitsuliortarsinnaavugut’?
16 Oqaatsinik inuussutaasunik tusarliineq Jesus Kristusilu aqqutigalugu Jehovap saammaassissutaanik ilinniartitsineq tullitsinnut iliuuserisinnaasatta pitsaanerpaartaraat. (Rûmamiut 5:8-11) Taamaattumik apustilip Paulusip ima kajumissaarpaatigut: ’Taamaattumik soraarata taassumuuna pilliutinik qujaniutinik Guuti aatsivigisigu, tamassa qarlut taassuma aqqanik nassuerutiginnittut anitaannik.’ (Eprîarit 13:15) Imalu ilavaa: ’Puioqinasili avaaginnittassagassi tukkorlusilu, pilliutit taamaattut Guutip iluarimmagit.’ (Eprîarit 13:16) Tamanut oqaluussinitta saniatigut ’avaaginnittarnissarput’, imaluunniit ajunngitsuliortarnissarput, puiussanngilarput, taamaaliornerlu pilliutinut Guutip iluarisaanut ilaalluinnarpoq.
17 Soorunami anersaakkut qatanngutivut, immaqa misigissutsikkut, anersaakkut, timikkut imaluunniit atortussatigut annikilliortut ajunngitsuliorfigisarpavut. Tamanna Paulusip ima eqqaavaa: ’Taamaattumik piginnaaffissaqartilluta tamanut ajunngitsuliorta, pingaartumilli uppeqatitsinnut.’ (Galâsiamiut 6:10; Jâko 2:15, 16) ’Tamanulli ajunngitsuliornissamik’ kajumissaarut puiussanngilarput. Qanigisanut, sanilinut suleqatinulluunniit inussiarnersumik iliuuseqarneq uagutsinnut paqumisunnerata nungutinnissaanut sallusuissummullu uummamminnik ammaanissaanut iluaqutaasinnaasorujussuuvoq.
18. (a) Navianaatit suut ingalassimasariaqarpavut? (b) Kristumiutut pissutsit ajunngitsut qanoq ilillutik tamanut oqaluussinitsinni iluaqutaasinnaappat?
18 Tamannali isumaqanngilaq avataaniittut qanimut ikinngutigissagivut. Ikinngutigiinneq taamaattoq ulorianarsinnaavoq. (1 Korintumiut 15:33) Silarsuarmiut ikinngutigisussaanngilavut. (Jâko 4:4) Kristumiutulli pissutsinik ajunngitsunik ersersitsisarutta oqaluussinitsinnut iluaqutaasinnaavoq. Nunat ilaanni inuit najugarisaanni oqaluunnissaat ajornarsiartuinnarpoq. Inissiarsuit ilaanni isumannaarsuuteqangaarmat ineqartulluunniit pulaarneqarsinnaanngillat. Nunani pigissaarnerusuni oqaluussinermi oqarasuaatip atornissaanut periarfissaqarpoq. Nunallu amerlanersaanni aqqusinerni oqaluussisoqarsinnaavoq. Inunnut allanut inussiarnisaartuullunilu ilassiortuullunilu ikiuiumatuugaanni sumiluunniit najugaqaraluaraanni paqumisunnerpassuit ajugaaffigiuminarnerusarput nalunaajaalluarsinnaanerullunilu.
Akerlilersuisut nipangersinneqartarput
19. (a) Inunnut iluaritinniartuunnginnatta suna naatsorsuutigisinnaavarput? (b) Danielip maligassiaa Peterillu unnersuussutaa malinniarlugit qanoq ilungersortariaqarpugut?
19 Jehovap nalunaajaasui inunnut siooranngillat inunnullu iluaritinniartuunatik. (Ussatit 29:25; Evfisumiut 6:6) Nalunngilluinnarpaat inatsisinik maleruaalluarniartuullutillu maligassiuillutik akileraartartuulluarniartuugaluarunilluunniit akerlilersortimik nikanarsaataasunik oqalligisassagaatik salluliuutinillu siaruarterisassasut. (1 Pîtruse 3:16) Tamanna eqqarsaatigalugu Daniel malinniarpaat, taanna akeqqaminit ima oqaatigineqarsimasoq: „Danielip guutisiornera eqqaanngikkutsigu pasillerneqaatigisinnaasaanik allamik nassaarfigisinnaanngilarput.“ (Daniel 6:6) Inunnut iluaritinniaannarluta Biibilip najoqqutassiaanut akerliusumik iliunngisaannarumavugut. Aappaatigulli marteeriunissarput ujartunngilarput. Qanilaarluta inuunissarput apustilillu unnersuussutaata maleruarnissaa manna ilungersuutigaarput: ’Tassaammat Guutip peqqusaa ajunngitsuliortarlusi inuit sianiitsut oqaasissaarutissagisi siuneqannginneranni.’ — 1 Pîtruse 2:15.
20. (a) Suna qularutiginngilluinnarparput, Jesusilu qanoq qiimmassaava? (b) Avataaniittut eqqarsaatigalugit qanoq ililluta ilisimassuseqartumik saqiuaannarsinnaavugut?
20 Qularutiginngilluinnarparput silarsuarmit immikkoorneq Biibilip unnersuussutaanut naapertuulluinnartuusoq. Isuma tamanna kristumiut siulliit maligassiaannit tunngavilerneqarsimavoq. Jesusip oqaasii uku qiimmatsaatigaavut: ’Silarsuarmi naalliussaasi; tuppalleritsili, silarsuarmut ajuagaagama.’ (Juánase 16:33) Sioorassutissaqanngilagut. ’Kinaanerpalu ajunngitsoq ilungersuutigigussiuk ilissinnik innarliortitsissasoq? Kisianni iluarneq pillugu naalliukkaluarussi pilluarpusi. Taakkuali ersiornerannik ersiornaveeritsi, annilaaqinasilu; Naalagarli Kristus uummatissinni illernartissiuk, piareertuinnarlusi kikkunnulluunniit neriuutigisaq ilissinniittoq pillugu ilissinnik nassueqqusisunut illersuutissaqarniarlusi, kisianni piuaallusi mianerinnillusilu.’ (1 Pîtruse 3:13-15) Taamaaliornitsigut avataaniittut ilisimassuseqartumik pissuseqarfigiuaannarsinnaavavut. (wD 1/7 93)
Apeqqutit uteqqiissutissat
□ Sooq Jehovap nalunaajaasui avataaniittunut ilisimassuseqartumik pissuseqartariaqarpat?
□ Sooq kristumiut ilumoortut naatsorsuutiginngisaannassavaat silarsuarmit asaneqarnissartik, qanorli iliorniartariaqarpat?
□ Inuit silarsuarmiittut qanoq isumaqarfigisariaqarpavut, sooq?
□ Sooq qatanngutitsinnut avataaniittunullu ’ajunngitsuliortariaqarpugut’?
□ Avataaniittunut ilisimassuseqartumik pissuseqarnerput qanoq ililluni tamanut oqaluussinitsinnut iluaqutaasinnaava?
[Atuaqqissaarnermi apeqqutit]
[Qupp. 19-mi assiliartaq]
Frankrigimi kristumiut ilumoortut qarsutsinersuaqareernerani tullerminnik ikiuisut
[Qupp. 20-mi assiliartaq]
Kristumiut inussiarnersumik pissuseqarnermikkut paqumisunnernik nungutitsinissamut iliuuseqarluarsinnaapput
[Qupp. 24-mi assiliartaq]
Krisumiut ’ajunngitsulianut tamanut kajumittuusariaqarput’