Guutip neriorsuutai uppernermik ersersitsinikkut qisuariarfigikkit

’Unnersuutinik qujanartunik annernillu [Jehova Guutip] tunivaatigut.’ — 2 PÎTRUSE 1:4.

1. Suup uppernermik pivisumik ersersitsisinnaalersittarpaatigut?

JEHOVAP kissaatigaa neriorsuutini upperissagivut. ’Uppernerli tassaanngilaq tamarmik pigisaat.’ (2 Tásalûníkamiut 3:2) Upperneq Guutip anersaavata, pissaanerata sulissutiginnittartup, inerititaraa. (Galâsiamiut 5:22, 23) Taamaattumik Jehovap anersaavanit siulersortittut kisimik uppernermik ersersitsisinnaapput.

2. Apustili Paulusip „upperneq“ qanoq nassuiarpaa?

² Uppernerli sunaava? Apustilip Paulusip tassaanerarpaa ’takunngisanik nalorninarinninnginneq’. Piviusunut takussaanngitsunut uppernarsaatit ima ersaritsigimmata allassimavoq upperneq assigigaat. Upperneq aamma tassaanerarneqarpoq ’neriugisanik nakimassutiginninnginneq’, tassa uppernermik pigisaqartut Jehova Guutip neriorsuutai tamaasa qularinngingaaramikkik eqquutereersimasutullusooq isigisarmatigik. — Eprîarit 11:1.

Upperneq Jehovallu neriorsuutai

3. Kristumiut tanitaasut uppissuseqarunik suna misigiumaarpaat?

³ Jehovamit iluarisaassagutta neriorsuutaanut uppernermik ersersitsisariaqarpugut. Apustilip Peterip allakkami isumassarsiarititaasut aappaanni, ukiup 64-ip u.n.k. allassimasamini, tamanna ersersippaa. Tikkuarpaa kristumioqatimi tanitaasut uppernermik ersersitsigunik Guutip neriorsuutaasa ’qujanartut angisuullu’ eqquunerat takujumaaraat. Tamatuma kingunerisaanik Jesus Kristusimik qilammi naalagaaffiani kingornusseqataasutut ’Guuti qanoq-issusiatigut peqatigilissavaat’. Upperlutik Jehova Guutimillu ikiorneqarlutik silarsuup ajortunngorsimasup ileqqupalaavinit iliuusiinillu ajortunit aniguisimapput. (2 Pîtruse 1:2-4) Eqqarsaatigeriaruk! Ullumikkut uppernermik ilumoortumik ersersitsisut kiffaanngissutsimik nalissaqanngitsumik taama ittumik nuannaarutiginnipput.

4. Pissutsit suut uppernitsinnut ilaatittariaqarpavut?

⁴ Jehovap neriorsuutaanut uppernitta kiffaanngissutsitsinnillu Guutimeersumik qujamasuutiginninnitta sapinngisarput tamaat kristumiutut maligassiuisuunissatsinnut kajumissisittariaqarpaatigut. Peter oqarsimavoq: ’Tamannami ilungersuutigingaarlugu uppersutsissigut ileqqorissiartorniaritsi, ileqqorillusilu ilisarsiartorniaritsi, ilisarsillusilu illigutsannaveersaaritsi, illigutsannaveerlusilu nikallujuigitsi, nikallujuillusilu [Guutimut tunniusimaniaritsi, Guutimullu tunniusimallusi, NV] qatanngutisi asaniarsigik, qatanngutisilu asallugit tamanik asanninniaritsi.’ (2 Pîtruse 1:5-7) Taava pissutsit puiuikkiuttariaqakkavut Peterip eqqartorpai. Atagu pissutsit tamakku sammeriartigik.

Uppernerup ilai pingaartut

5, 6. Ileqqorissuseq sunaava, qanorlu ililluta uppernitsinnut ilaatissinnaavarput?

⁵ Peter oqarpoq ileqqorissuseq, ilisimassuseq,  imminut naalakkersinnaassuseq, nikallujuissuseq, Guutimut tunniusimaneq, qatanngutinut asanninneq asanninnerlu imminnut uppernitsinnullu atasariaqartut. Pissutsit tamakku uppernitsinnut ilaalernissaat assoruulluta sulissutigisariaqarparput. Assersuutigalugu ileqqorissuseq uppernermit avissaaqqatissinnaanngilarput. Qinerlerfissialiortartup W. E. Vinep 2 Pîtruse 1:5 tikkuarsimavaa oqarluni „ileqqorissuseq pissusiusoq uppernermik ersersitsinermi pingaaruteqartorujussuaq“. Pissutsit Peterip eqqartugaasa sinneri tamarmik aamma uppernermut ilaatinneqartariaqarput.

⁶ Siullertut taaneqartoq ileqqorissuseq uppernitsinnut ilaatittariaqarparput. Ileqqorissuseq isumaqarpoq Guutip isaani ajunngitsumik iliorneq. Oqaaseq grækerisooq maani ’ileqqorissuseq’-mik nutserneqarsimasoq nutsikkat ilaanni „ajunngissuseq“-mik nutserneqarsimavoq. (New International Version; The Jerusalem Bible; Today’s English Version) Ileqqorissutsip ajortumit ingalassimatittarpaatigut inoqatitsinnilluunniit ajoqusiinaveersaartittarluta. (Tussiaat 97:10) Aamma inunnut allanut anersaakkut, timikkut misigissutsikkullu iluaqutaasumik sapiitsumik iliuuseqarasuarnissamut killittarpaatigut.

7. Sooq ilisimassuseq uppernitsinnut ileqqorinnitsinnullu ilaatittariaqarparput?

⁷ Sooq Peterip kajumissaarpaatigut uppernitsinnut ileqqorissutsitsinnullu ilisimassuseq ilaatissagipput? Uppernitsinnut atatillugu unamminiarnartunik naapitassaqartuartilluta ilisimassuseq eqqortumik eqqunngitsumillu immikkoortitsisinnaassagutta pisariaqartipparput. (Eprîarit 5:14) Biibilimik atuaqqissaartarnitsigut, Guutip oqaasianik atuinikkut misilittagaqarnitsigut ulluinnarnilu inuunitsinni nalinginnartigut ilisimassusermik ersersitsisarnitsigut ilisimassuserput alliartortittarparput. Tamanna iluaqutigalugu misilinneqaraangatta uppernerput illersorsinnaasarparput ileqqorissumillu iliuuseqartuaannarsinnaalluta. — Ussatit 2:6-8; Jâko 1:5-8.

8. Imminut naalakkersinnaaneq sunaava, qanorlu ililluni nikallujuissutsimut atava?

⁸ Misilinneqarnivut upperluta atorsinnaajumallugit ilisimassuserput imminut naalakkersinnaassutsimik ilaqartittariaqarparput. Oqaaseq grækerisooq „imminut naalakkersinnaassuseq“-mik nutserneqartoq aamma isumaqarsinnaavoq imminut sukannerfigiummerneq. Guutip anersaavata inerititaata tamatuma eqqarsaatitsigut, oqaatsitsigut pissusilersornitsigullu imminut aqunnissatsinnut ikiortarpaatigut. Imminut naalakkersinnaanerup ilungersuutigiuarneratigut aamma nikallujuissuseq pigiliutissavarput. Oqaaseq grækerisooq „nikallujuissuseq“-mik nutserneqartoq aamma isumaqarsinnaavoq anusinngujuissuseq imaluunniit uteriarumanngissuseq, tassaanngitsoq naalliunnartumut allaqquttussaanngitsumut aliasulluni nakkaannarneq. Nuannaarneq siunerminiittoq pissutigalugu Jesusip qisummi nappakkami anniartitaanini nikallujuilluni atorsimavaa. (Eprîarit 12:2) Guutimit nakussatsinneqarnerup nikallujuissutsimik ilallip uppernerput aalajaallisittarpaa annikilliornitsinnilu nuannaarnerup pigiuaannarnissaanut, ussernartup tunuartinnissaanut malersorneqarnitsinnilu aalajangiusimasatta akerlianik iliunnginnissatsinnut ikiortarluta. — Filípimiut 4:13.

9. (a) Guutimut tunniusimaneq sunaava? (b) Sooq qatanngutinut asanninneq Guutimut tunniusimanitsinnut ilaatittariaqarparput? (c) Qanoq ililluta asanninneq qatanngutinut asanninnitsinnut ilaatittariaqarparput?

⁹ Nikallujuinnitsinnut Guutimut tunniusimaneq — Jehovamik ataqqinnilluni mianerinninneq, pallorfiginninneq kiffartornerlu — ilaasariaqarpoq. Guutimut tunniusimasumik iliuuseqaraangatta Jehovallu innuttaminut iliuusii takugaangatsigik uppernerput alliartortarpoq. Guutimulli mianerinnittuussagutta qatanngutinut asannissuseqartariaqarpugut. Tassami ’qatanngumminik takusaminik asanninngitsoq Guutimik takusaminik asannissinnaanngilaq’. (1 Juánase 4:20) Jehovap kiffaanut allanut asanninnermik  ilumoortumik ersersitsinissatsinnut tamatigullu taakkua iluaqutissaannut iliuuseqartarnissatsinnut uummatitta killittariaqarpaatigut. (Jâko 2:14-17) Soorli peqquneqarpugut qatanngutinut asanninnitsinnut asanninneq ilaateqqullugu? Peter isumaqarunarpoq inunnut tamanut, qatanngutitsinnuinnaanngitsoq, asanninnermik ersersitsisariaqartugut. Asanninnerput tamanna ingammik ersersissinnaavarput nutaarsiassamik nuannersumik oqaluussisarnitsigut inunnillu anersaakkut ikiuinitsigut. — Matîuse 24:14; 28:19, 20.

Kingunissat assigiinngitsut

10. (a) Ileqqorissuseq, ilisimassuseq, imminut naalakkersinnaassuseq, nikallujuissuseq, Guutimut tunniusimaneq, qatanngutinut asanninneq asanninnerlu uppernitsinnut ilaatikkutsigik qanoq kinguneqassava? (b) Pissutsit tamakku kristumiup amigaatigippagit qanoq pisoqassava?

¹⁰ Ileqqorissuseq, ilisimassuseq, imminut naalakkersinnaassuseq, nikallujuissuseq, Guutimut tunniusimaneq, qatanngutinut asanninneq kiisalu allanut asanninneq uppernitsinnut ilaatikkutesigik Guutip iluarisaanik eqqarsartarlutalu oqaluttarlutalu iliuuseqartassaagut. Kristumiu pissutsinik tamakkuninnga pigisaqanngikkuni anersaakkut tappiillissaaq. Qaamanermut Guutimeersumut ’sequnngissaaq’ ajortuliarisimasaminillu minguiarneqarsimanini puiussallugu. (2 Pîtruse 1:8-10; 2:20-22) Taamatut ingerlalinngisaannarta Guutillu neriorsuutaanut uppernerput katannaveersaartigu.

11. Tanitat aalajaatsut qanoq ilimasuffigissallugit ingasaassinerunngila?

¹¹ Kristumiut tanitat ilumoortut Jehovap neriorsuutaanut upperput taassuminngalu qaaqquneqarnertik qinigaanertillu aalajaallisikkumallugu ilungersorlutik suliniuteqarlutik.  Naak inuunerminni ajornakusoortunik naapitaqartaraluarlutik pissutsinik Guutimeersunik ersersitsisarnissaat naatsorsuutigisinnaavarput. Tanitat aalajaatsut qilammi inuunermut makitinneqarunik ’Naalakkatta annaassisitta Jesus Kristusip naalagaaffianut naassaanngitsumut iserfissarsisinneqangaarumaarput’. — 2 Pîtruse 1:11.

12. Oqaatsit Pîtrusip agdlagaisa áipait 1:12-15-imiittut qanoq paasisariaqarpat?

¹² Peterip nalunngilaa erniinnaq toqusussaalluni, qilammilu inuunermut makititaanissani naatsorsuutigaa. ’Tupermili matumani’ — inuttut timimini — inuutilluni uppeqatini uppernikkut nakussatsinniarsarai Guutimillu iluarisaajuassagunik pisariaqartunik eqqaasittarnerisigut kajumissisinniartarlugit. Toqukkut qimagutereernerata kingorna Peterip anersaakkut qatanngutaasa angutit arnallu oqaasiisa eqqaasarnerisigut uppernertik nakussatsittarpaat. — 2 Pîtruse 1:12-15.

Siulittuutinut upperneq

13. Qanoq ililluni Guuti Kristusip tikiunnissaanut uppernikkut nakussatsinnartumik uppernarsaatissiiva?

¹³ Jesusip ’pissarsuulluni naalannartorsuullunilu’ tikiunnissaanut Guuti nammineq uppernikkut nakussatsinnartunik nalunaajaatissaqartitsisimavoq. (Matîuse 24:30; 2 Pîtruse 1:16-18) Guutimik nalusut palasii guutitik pillugit uppernarsaatissaqanngitsunik oqalugiartuartannguartillugit Peter, Jakob Johannesilu Kristusip allanngortitaalluni nallannassusianut takunnittuusimapput. (Matîuse 17:1-5) Naalannassusia takuaat Guutillu nammineq nipaa Jesusimik ernermisut asasamisut akuerinnittoq tusarlugu. Uppernarsaaffigineqarneq tamanna, qaamasumillu pissuseqalersitaanera, ataqqinassutsimik naalannassutsimillu tigusaqarneranut uppernarsaatissaapput sakkortuut. Saqqummersitsineq Guutimeersoq tamanna pissutigalugu Peterip sumiiffitsik ’qaqqamik illernartumik’ taavaa, qularnanngitsumik qaqqap Hermonip ataa. — Naleqqiuguk 2 Moses 3:4, 5.

14. Jesusip allanngortitaanera uppernitsinnut qanoq sunniuteqartariaqarpa?

¹⁴ Jesusip allanngortitaasimanera uppernitsinnut qanoq sunniuteqartariaqarpa? Peter oqarpoq: ’Pruffiitillu oqaasiat aalajaallivarput; iluartumillu piumaarpusi, tamanna naneruutitut taartumi qaamasutut itillugu sianiginiarussiuk, ulloq qaalerserlugu qaasiullu uummatissinni nuilerserlugu.’ (2 Pîtruse 1:19) ’Pruffiitit oqaasiat’ tassaannaagunanngilaq Allakkani Hebriiarisuuni siulittuutit, aammali tassaalluni Jesusip ’pissarsuulluni naalannartorsuullunilu’ tikiunnissaminik oqaasii. Qanoq ililluni Jesusip allanngortitaaneratigut oqaaseq ’aalajaallisimava’? Pisimasup tamatuma oqaatsit Kristusip naalannassuseqarluni Naalagaaffimmi tikiunnissaanik siulittuutaasut uppernarsarpaat.

15. Oqaatsinik siulittuutaasunik qisuariarfiginninneq sunik nassataqarpa?

¹⁵ Uppernerput nakussatsinniarlugu oqaatsit siulittuutaasut qisuariarfigisariaqarpavut. Qisuariarnermut tamatumunnga ilaapput oqaatsinik tamakkuninnga atuaqqissaarneq, kristumiut ataatsimiinnerini oqaatsinik tamakkuninnga oqaluuserinninneq kajumissaarutaannillu maleruaaneq. (Jâko 1:22-27) ’Naneruutitut taartumi qaamasutut itillugit’ ’uummatitta isaanut qaammarsaasuutittariaqarpavut.’ (Evfisumiut 1:18) Taamaaliorutta aatsaat ’qaasiutip’, imaluunniit ’ullorissap qaasiutip qaammarissup’, Jesus Kristusip naalannassuseqarluni imminut saqqummersinnissaata tungaanut siulersorsinnaavaatigut. (sarĸúmersitat 22:16) Saqqummerneq tamanna uppinngitsunut suujunnaarsitaanermik uppernermillu ersersitsisunut pilluaqqusaanermik kinguneqassaaq. — 2 Tásalûníkamiut 1:6-10.

16. Sooq upperisinnaavarput Guutip oqaasiani neriorsuutit siulittuutaasut eqquukkumaartut?

¹⁶ Guutip pruffiitii tassaannaanngillat angutit ittannerusut silatuunik siulittuisartut, Peterimi oqarpoq: ’Manna pingaarlugu  nalussanngilarsi pruffiitip oqaaserisaa allakkaniittoq imminit nassuiaatissaqarnavianngilaq. Inuummi piumasaagut pruffiitip oqaaserisaa pinngisaannarpoq, anersaalli illernartup pisimmatik inuit Guutimit oqalupput.’ (2 Pîtruse 1:20, 21) Soorlu David oqarsimavoq: „Uakkut oqaluppoq [Jehovap] anersaava.“ (2 Samuel 23:1, 2) Aamma Paulus allassimavoq: „Allakkat tamarmik Guutip anersaavanit isumassarsiarititaapput.“ (2 Timûtiuse 3:16, NV) Guutip siulittuutai taassuma anersaava ikiortigalugu isumassarsiarititaammata upperisinnaavarput Oqaatsimini neriorsuutai tamarmik eqquukkumaartut.

Guutip neriorsuutaanut uppertuusimapput

17. Neriorsuut suna Abelip upperneranut tunngavissiiva?

¹⁷ Jehovap neriorsuutai itsaq nalunaajaasuisa kristumiuusut ’eqimaqisut’ uppernerannut tunngaviusimapput. (Eprîarit 11:1–12:1) Assersuutigalugu Abel ’kinguaassaq pulateriaarsuup niaquanik aserorterisussaq’ pillugu Jehovap neriorsuutaanut uppissuseqarsimavoq. Abelip takusinnaasimavaa angajoqqaaminut Guutip eqqartuussutini naammassisimagai. Edenip avataani Adamikkut ilaquttanilu kiakkiullugu inuussutissarsiortarput nuna perloqqusaasimasoq kapinartulinnik naasupilunnillu naasoqarmat. Qularnanngitsumik Abelip ajortuliornerup kingorna Guutip anaanaminut oqaaserisimasai tusarsimassavai, eqquuttullu takusimassallugit. Takusinnaasimassavaa ’naartunerani Guutip amerlaqisunik ippigusuuteqartissimagaa’, uinilu pilerissuseqarfigigaa ’uiatalu naalagaaffigigaa’. Edenimullu isertarfik kerubinit pananillu ikumasunit paarineqarpoq. (1 Moses 3:14-19, 24) Tamakku tamarmik Abel qularunnaarsissimassavaat annassutissaq kinguaassakkut neriorsuutigisaasukkut pissasoq. Taamaattumik uppernermigut iliuuseqarluni Abel Guutimut pilliuteqarpoq Kainip pilliutaanit naleqarnerusumik. — Eprîarit 11:1, 4.

18, 19. Abraham Saralu uppernermik qanoq ersersitsisimappat?

¹⁸ Aamma ataataalluartut Abraham, Isak Jakobilu Jehovap neriorsuutaanut uppissuseqarsimapput. Abraham immigut nunami eqqarleriit tamaasa pilluaqqunarsinissaannik kinguaamilu nunamik pigisaqalernissaannik Guutip neriorsuutaanut uppernermik ersersitsisimavoq. (1 Moses 12:1-9; 15:18-21) Ernerata Isakip ernutaatalu Jakobip ’unnersuummik tamatuminnga kingornusseqatigisimavaat’. Uppernermigut Abraham ’nunamut unnersuutigisamut takornartatut’ nunassissimavoq ’illoqarfillu tunngavilersugaq’, Guutip qilammi naalagaaffia nunami inuunermut makititaaffissamini atuuttussaq, utaqqisimallugu. (Eprîarit 11:8-10) Illit taamatut uppissuseqarpit?

¹⁹ Abrahamip nulia Sara 90-it missaanni ukioqarpoq erninissaminullu utoqqaavallaalereersimalluni Guutip neriorsuutaanut upperluni ’naartusinnaanngortitaagami’ Isakilu meerartaaralugu. Abraham 100-nik ukiulik, kinguaassiorsinnaassuseq eqqarsaatigalugu ’unnit toqulereersoq’, aqqutigalugu ’qilaap ulloriaasut amerlatigisut immallu sioraasut kisissaanngitsigisut’ erniarineqarsimapput. — Eprîarit 11:11, 12; 1 Moses 17:15-17; 18:11; 21:1-7.

20. Ataataanerpaat naak Guutip imminnut neriorsuutaasa eqquunniviat takunngikkaluarlugu qanoq iliorpat?

²⁰ Ataataalluartut aalajaatsut Guutip imminnut neriorsuutaasa eqquunniviat suli takunagu toqusimapput, ’ungasissumilli takuaat ilassillugillu, nassuerlutillu nunami tikeraagamik takornartaallutillu’. Aatsaat kinguaariit arlallit ingerlareerpata nuna neriorsuutigisaasoq Abrahamip kinguaavinit tiguneqartussaasimavoq. Ataataalluartulli Guutimik mianerinnittut inuunertik tamaat Jehovap neriorsuutaanut uppernermik ersersitsisarsimapput. Uppernertik katanngisaannarsimagamikku  qanittukkut nunarsuarmi ’illoqarfiup’ Guutip imminnut piareersarsimasaata, Messiasikkut naalagaaffiup, ataani inuunermut makitinneqassapput. (Eprîarit 11:13-16) Taamatuttaaq uagut uppernerup Jehovamut ilumoortuaannarnissatsinnik ikiorsinnaavaatigut, neriorsuutai nuanningaartut tamarmik ingerlaannaq eqquuttut takunngikkaluarutsigilluunniit. Uppernitta Guutimut naalannissatsinnik killissavaatigut, soorlu Abraham taamaassimasoq. Soorlulu taassuma kinguaani anersaakkut kingornutassissimagai taamatuttaaq uagut meeqqavut Jehovap neriorsuutaanut erlinnangaartunut uppissuseqalernissaannik ikiorsinnaavavut. — Eprîarit 11:17-21.

Uppernerup kristumiunut pingaaruteqassusia

21. Ullumikkut Guutimut iluarisaajumagutta uppernitsinnut suut ilaatittariaqarpavut?

²¹ Soorunami upperneq tassaannaanngilaq Jehovap neriorsuutaasa eqquunnissaannut tatiginninneq. Oqaluttuarisaanerup ingerlanerani pisariaqartarsimavoq Guutimut iluarisaalerumalluni assigiinngitsutigut uppernermik ersersitsinissaq. Paulusip tikkuarsimavaa ’uppissuseqarnani Guutimut iluaritinneq ajornartoq, Guutimut orniguttup upperisassarimmagu tassaasoq, ujarlersinilu akilerumaarai’. (Eprîarit 11:6) Ullumikkut Jehovamut akuerisaajumalluni Jesus Kristusimut taannalu aqqutigalugu Guutip utertitsissutissatut pilliutaanut uppissuseqartariaqarpoq. (Rûmamiut 5:8; Galâsiamiut 2:15, 16) Soorlumi Jesus nammineq oqarsimasoq: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu. Ernermut uppertoq naassaanngitsumik inuussuteqarpoq; ernermulli naalasseriitsup inuussut takussanngilaa, Guutilli kamannerata qulangersimajuassavaa.’ — Juánase 3:16, 36.

22. Neriorsuut suna Messiasikkut naalagaaffiup eqquutitissavaa?

²² Naalagaaffik, tikiuteqqullugu kristumiut qinnutigisartagaat, pillugu Guutip neriorsuutaasa eqquunnissaanni Jesus qitiusumik pingaaruteqarpoq. (Jesaja 9:6, 7; Daniel 7:13, 14; Matîuse 6:9, 10) Soorlu Peterip ersersikkaa ’allanngortitaanerup’ Jesusip naalagaaffiup pissaanerani naalannassusianilu tikiunnissaanik siulittuutit aalajaallisippai. Messiasikkut naalagaaffiup Guutip neriorsuutaasa ilaat alla aamma eqquutittussaavaa, Peterimi ima allappoq: ’Unnersuutaa naapertorlugu ilimagisaqarpugut qilassanik nutaanik nunassamillu nutaamik iluarsuseqarfissanik.’ (2 Pîtruse 3:13) Siulittuut tamatumunnga assingusoq eqquussimavoq juutit Babylonimut qimaatitaasimasut 537-mi u.n.s. nunavimminnut utertitaammata, Zerubbabel landshøvdinginngortitaalluni Josualu palasiuninngortitaalluni. (Jesaja 65:17) Peterilli tikkuagaa tassa piffissaq ’qilaat nutaat’ — Messiasikkut naalagaaffiup qilammiittup — ’nunamut nutaamut’, nunarsuarmi maani inuiannut naapertuilluartunut, naalakkersuilerfissaa. — Naleqqiuguk Tussiaat 96:1.

23. Ileqqorissuseq pillugu apeqqutit suut tulliani sammissavavut?

²³ Jehovap kiffaasut ilumoortutut erneranullu  asangaagaanut, Jesus Kristusimut, ajoqersukkatut Guutip silarsuassaa nutaaq neriorsuutigisaasoq erinigeqaarput. Nalunngilarput qanittuararsuusoq, upperaarpullu Jehovap neriorsuutai naleqangaartut tamarmik eqquukkumaartut. Guutimit akuerineqarsinnaasumik saqiumalluta uppernitsinnut ilaatittariaqarpavut ileqqorissuseq, ilisimassuseq, imminut naalakkersinnaassuseq, nikallujuissuseq, Guutimut tunniusimaneq, qatanngutinut asanninneq asanninnerlu, taamaalillutalu uppernerput nakussatsillugu. * Immaqa ilaat ima aperiumassapput: Ileqqorissuseq qanoq ililluni ersersinneqarsinnaava? Qanorlu ililluni uagutsinnut allanullu, ingammik kristumioqatitsinnut uppernermikkut Guutip neriorsuutaanut qisuarfiginnissimasunut, iluaqusiisinnaava?

[Quppernerup ataani ilanngussaq]

Qanoq akissavit?

□ „Upperneq“ qanoq nassuiarneqarsinnaava?

□ Pîtrusip agdlagaisa áipait 1:5-7 naapertussagaanni pissutsit suut uppernermut ilaatittariaqarpat?

□ Jesusip allanngortitaanera uppernitsinnut qanoq sunniuteqartariaqarpa?

□ Abel, Abraham, Sara itsarlu inuusimasut allat upperneq eqqarsaatigalugu qanoq maligassiuisimappat?

[Atuaqqissaarnermi apeqqutit]

[Qupp. 11-mi assiliartaq]

Jesusip allanngortitaanera ataasiakkaat uppernerannut qanoq attuumassuteqarpa?