Ileqqorissuseq qanoq ililluta uppernitsinnut ilaatissinnaavarput?
Ileqqorissuseq qanoq ililluta uppernitsinnut ilaatissinnaavarput?
’Tamanna ilungersuutigingaarlugu uppersutsissigut ileqqorissiartorniaritsi.’ — 2 PÎTRUSE 1:5.
1, 2. Sooq naatsorsuutigineqarsinnaava Jehovap innuttai ileqqorissuussasut?
JEHOVA tamatigut ileqqorissumik iliuuseqartarpoq. Naapertuilluartumik ajunngitsumillu iliortarpoq. Taamaattumik apustili Peterip Guuti ’naalannassutsimigut ajunngingaarsutsimigullu’ kristumiunik tanitanik qaaqqusisutut eqqartorsimavaa. Ataatartik qilammiusoq pillugu eqqorluartumik ilisimassuseqarnerata paasitissimavaat Guutimut piviusumik tunniusimalluni inuuniaraanni suut pisariaqartut. — 2 Pîtruse 1:2, 3.
2 Apustilip Paulusip kristumiut kajumissaarsimavai ’Guuti qitornatut asanartutut maleqqullugu’. (Evfisumiut 5:1) Taamaattumik Ataatamittut qilammiusutut Jehovap kiffaasa sutigut tamatigut ileqqorissutsimik pigisaqanertik ersersittariaqarpaat. Biibililli oqaatsimik atuinera naapertorlugu ileqqorissuseq sunaava?
Ileqqorissuseq sunaava?
3. „Ileqqorissuseq“ qanoq nassuiarneqarsimava?
3 Oqaatsinik qinerlerfissiani nutaaliaasuni oqaaseq „ileqqorissuseq“ tassaanerarneqarpoq „ileqqussatigut pitsaalluassuseq; ajunngissuseq“. Tassaavoq „peqqusersuitsumik ilioriaaseq eqqarsariaaserlu; pissuserissaarneq“. Inuk ileqqorissuseqartoq naapertuilluartuuvoq. Ileqqorissuseq aamma tassaanerarneqarsimavoq ’eqqortumut najoqqutassiamik malinninneq’. Kristumiut eqqortumut najoqqutaat soorunami Guutimit aalajangigaavoq oqaasianilu illernartumi, Biibilimi, allanneqarsimalluni.
4. Pîtrusip agdlagaisa áipait 1:5-7 naapertorlugu inuttut pissutsit suut kristumiut ilungersorlutik imminni ineriartortinniartariaqarpaat?
4 Kristumiut ilumoortut Jehovap najoqqutassiai naapertuilluartut malippaat uppernermillu ersersitsinermikkut taassuma neriorsuutai naleqangaartut qisuariarfigalugit. Aamma Peterip oqaassutaa naalappaat: ’Tamanna ilungersuutigingaarlugu uppersutsissigut ileqqorissiartorniaritsi, ileqqorillusilu ilisarsiartorniaritsi, ilisarsillusilu illigutsannaveersaaritsi, illigutsannaveerlusilu nikallujuigitsi, nikallujuillusilu [Guutimut tunniusimaniaritsi, Guutimullu tunniusimallusi, NV] qatanngutisi asaniarsigik, qatanngutisilu asallugit tamanik asanninniaritsi.’ (2 Pîtruse 1:5-7) Pissutsit tamakku immini ineriartortinniarlugit kristumiu ilungersortumik iliuuseqartariaqarpoq. Ullualuinnarni ukiualuinnarniluunniit pinnani inuunerli tamaat iliuuseqartariaqarpoq. Ileqqorissutsimik uppernermut ilanngussiniarneq ilumut unamminiarnartuuvoq!
5. Ileqqorissuseq Biibilimit isigalugu sunaava?
5 Oqaatsinik qinerlerfissialiortartoq M. R. Vincent oqarsimavoq oqaatsip grækerisuup „ileqqorissuseq“-mik nutserneqartup isumavigigaa „pitsaalluassuseq qanorluunniit ittoq“. Peterip qasseersiuk atorpaa oqarami kristumiut Guutip ’ajunngingaarutai nalunaarutigissagaat’. (1 Pîtruse 2:9) Biibilip tungaanit isigalugu ileqqorissuseq pissusiunngilaq uninngaannartoq, tassaallunili „ileqqussatigut sulisinnaassuseqarluarneq, anersaakkut nakuussuseq“. Peterip ’ileqqorissuseq’ taagamiuk ileqqussatigut pitsaalluassuseq Guutip kiffaasa sapiillutik ersersitassaattut ataavartitassaattullu naatsorsuutigineqartoq eqqarsaatigaa. Kisianni naammalluanngitsuusugut Guutip isaani ileqqorissumik iliorsinnaavugut?
Naammalluinnanngitsut ileqqorissulli
6. Naak naammalluinnanngitsuugaluarluta qanoq ililluta Guutip isaani ileqqorissumik iliorsinnaavugut?
6 Naak kingornussaasumik ajortiliugaluarluta naamalluinnanngitsuugaluarlutalu Guutip isaani ileqqorissumik iliorsinnaavugut? (Rûmamiut 5:12) Eqqarsaatinut, oqaatsinut iliuutsinullu ileqqorissunut aallaaviusinnaaqqullugu uummatitta minguitsuutittuaannarnissaanut Jehovamit ikiorneqarnissarput pisariaqartilluinnarparput. (Naleqqiuguk Lúkarse 6:45.) Batseba ajortulioqatigereerlugu tussiaasiortoq peqqissimisoq David ilungersungaarluni ima qinusimavoq: „Uummammik minguitsumik pinngortitsivinnga, Guuti, anersaamik nutaamik ataavartussamillu tuninnga.“ (Tussiaat 51:12) David Guutimit isumakkeerfigineqarpoq ileqqorissumillu inuunissaminut pisariaqartitaminik ikiorneqarluni. Ingasattumik ajortuliorsimagutta peqqissimillutalu Guutimit ilagiinnilu utoqqaanertanit ikiorneqarnissarput akuerisimagutsigu ileqqorissutsip aqqutaatigut ingerlaqqilersinnaavugut. — Tussiaat 103:1-3, 10-14; Jâko 5:13-15.
7, 8. (a) Ileqqorissuseq pigiuaannassagutsigu suna pisariaqarpa? (b) Kristumiut ileqqorinnissaminnut suna iluaqutigaat?
7 Ileqqorissumik saqisinnaajumalluta ajortiliussuserput kingornussaasoq pissutigalugu ilutsigut sorsuttuartariaqarpugut. Ileqqorissuseq pigiuaannassagutsigu ajortimut inussiaatinngunngisaannartariaqarpugut. Akerlianilli ’iluarnermut kiffaasariaqarpugut’ tamatigullu ileqqorissumik eqqarsartarlutalu, oqaluttarlutalu iliortarluta. (Rûmamiut 6:16-23) Timikkut kissaativut ajortilittullu ilioriartarnivut soorunami sakkortupput, taamaattumillu ilioriartarnerit tamakku Guutillu uagutsinnut piumasaasa akornanni akerleriinneqarpoq. Tamanna qanoq iliuuseqarfigisinnaavarput?
8 Jehovap anersaavanit illernartumit, Guutip pissaaneranit sulissutiginnittumit, siulersortittariaqarpugut. Taamaattumik Paulusip unnersuussutaa malittariaqarparput: ’Anersaaq najortigalugu saqigitsi, uinngullu pilerissusii naammassinagit. Uinimmi pileritsappoq anersaaq assortorlugu, anersaarlu pileritsappoq uinik assortorlugu, taakkulu akerleriipput piumasassinnik iliorneq ajulersillusi.’ (Galâsiamiut 5:16, 17) Aap, Guutip anersaava tassaavoq nukik uagutsinnik naapertuilluartumik iliulersitsisartoq, Guutillu oqaasia tassaalluni najoqqutassaq eqqortumik ileqqoqarnissatsinnik ikiuisoq. Aamma Jehovap peqatigiissortaanit asannittumik ikiorneqartarpugut ’inussiamillu aalajaallunilu silatuumit’ unnersuunneqartarluta. (Matîuse 24:45-47, NV) Tassa ajortilittut ilioriartarnerit ajugaaffiginissaat ajornanngilaq. (Rûmamiut 7:15-25) Minguttuumik eqqarsaateqaleriataassagaluarutta soorunami tunuartikkasuartariaqarparput Guutilu qinnuigalugu eqqunngitsuliornissamut ussernartut suulluunniit akiornissaannut ikioqqulluta. — Matîuse 6:13.
Eqqarsaatit ileqqorissut
9. Eqqarsariaaseq qanoq ittoq ileqqorissumik iliorsinnaassagutta pisariaqarpa?
9 Ileqqorissuseq eqqarsaatini aallaaveqarpoq. Guutimut iluarisaajumagutta eqqarsaativut naapertuilluartunut, ajunngitsunut ileqqorissunullu sammisuusariaqarput. Paulus oqarsimavoq: ’Qatanngutikka, ilumoortut suulluunniit, assuarnaatsut suulluunniit, iluartut suulluunniit, minguitsut suulluunniit, asanartut suulluunniit, nersornartut suulluunniit, suut ileqquulluartuunersut, suut ataqqinartuunersut, tamakku eqqarsaatiginiarsigik.’ (Filípimiut 4:8) Eqqarsaatitsigut naapertuilluartut minguitsullu kaaviiaarfigisariaqarpavut eqqarsaatillu ileqqorluttut tunuartittariaqarlugit. Paulus ima oqarsinnaasimavoq: ’Suut uanni ilikkakkasilu pigilikkasilu tusakkasilu takusasilu maleruarsigik.’ Paulusitut ileqqorissumik eqqarsartarlutalu, oqaluttarlutalu iliortarutta ilagisartagassaqqissuussaagut, kristumiutut inooriaatsimi maligassaaluartuussalluta ’Guutillu eqqissisaasup najussavaatigut’. — Filípimiut 4:9, (NV).
10. Oqaatsinik Korintumiunut agdlagkat sujugdlît 14:20-mi allassimasunik malinninneq qanoq ililluta ileqqorissuujuaannarnissatsinnut iluaqutigisinnaavarput?
10 Ileqqorissumik eqqarsartaaseqartuaannarnissarput taamaalillutalu Ataatatta qilammiusup iluarisaanik iliortuaannarnissarput kissaatigigutsigu Paulusip oqaassutaata naalannissaa pisariaqarpoq: ’Silaqarsutsissigut merlertunngornaveeritsi, kisianni ajorsutsissigut merlertuugitsi.’ (1 Korintumiut 14:20) Tassa kristumiut ajortunik ilisimasaqalernissaq misilittagaqalernissarlu ujartortussaanngilaat. Isumatta ajortunngortinnissaanut taarsiullugu ajortup tungaatigut misilittagaqanngitsuunissarput naalungiarsuttullu minguitsuunissarput piumanerusariaqarpavut. Tamannalu ilutigalugu eqqaamalluinnartariaqarparput kanngunartuliorneq unioqqutitsinerillu allat Jehovap isaani ajortuliornerusut. Ileqqorissuunitsigut Jehovap iluarisaanik iliornissarput ilumoorluta kissaatigigutsigu iluaqutigissavarput, taamaakkuttami aliikkutassiat minguttuut silarsuarmillu matumannga Satanip pissaaneqarfigisaanit sunniinerit isumakkut ajortunngornartut ingalassimaniassavavut. — 1 Juánase 5:19.
Oqaatsikkut ileqqorissuuneq
11. Ileqqorissuseqaraanni oqaatsikkut tamanna qanoq ersertarpa, amatumunngalu atatillugu Jehova Guuti Jesus Kristusilu qanoq maligassiusimappat?
11 Ileqqorissumik eqqarsartaaseqarutta oqaatsitsinnut annertuumik sunniuteqassaaq. Ileqqorissuujumagaanni minguitsunik, peqqinnartunik, ilumoortunik ineriartornartunillu oqalliseqartariaqarpoq. (2 Korintumiut 6:3, 4, 7) Jehova tassaavoq „Guuti unneqqarissoq“. (Tussiaat 31:6) Iliuutsimini tamani tatiginartuuvoq; neriorsuutaalu unneqqarissuupput, sallusinnaannginnamimi. (4 Moses 23:19; 1 Samuel 15:29; Títuse 1:2) Guutip ernera, Jesus Kristus, ’saammaannermik sallusuissummillu ilumioqangaarpoq’. Nunamiikkallarami sallusuissut Ataataminit tusarsimasani naapertorluinnarlugu ingerlateqqittarpaa. (Juánase 1:14; 8:40) Aamma Jesus ’ajortulinngilaq, salloqittaammilluunniit qanermiugisaqarnani’. (1 Pîtruse 2:22) Guutimut Kristusimullu kiffaagutta ilumoortut ilumoortumik oqaluttassaagut eqqortumillu pissuseqassalluta, ’qititsigut ilumoornermik qiterusersimalluta’. — Evfisumiut 5:9; 6:14.
12. Ileqqorissuujuaannassugutta oqaatsit suut ingalattariaqarpavut?
12 Ileqqorissuseq pigigutsigu aamma ippinnartunik oqalunnaveersaartassaagut. Paulusip unnersuussutaa maleruassavarput: ’Ajuallatsitsinerit narrannerillu kamannerillu nillianerillu mitallernerillu tamarmik ilissinnit peerlit iluaatsuliornerillu tamaasa ilanngullugit.’ ’Uersaaneq mingunnartullu nalinginnaat piumatuunerlu taaneqassanngillalluunniit ilissinni, iluartut taama ileqqussaqarmata, kanngunartullu oqaatsillu sianiitsorpallattut quiasaarnipalaallu tamakku atugassaanngitsut; qujallusili pigitsi.’ (Evfisumiut 4:31; 5:3, 4) Uummatitta naapertuilluartup kristumiorpalaanngitsumik oqalunnissarput ingalassimatimmagu allat ilaginissarput nutaannguallaatigissavaat.
13. Sooq kristumiut oqartik paarisariaqarpaat?
13 Guutip iluarisaanik iliornissatsinnik ileqqorissunillu oqaluttarnissatsinnik kissaateqarnitta oqqatta paarinissaanut ikiussavaatigut. Ajortilittut ilioriartarnerput pissutaalluni ilaannikkut oqaasissarinngisaraluatsinnik oqartoorsinnaasarpugut. Taamaattoq Jakob oqarpoq ’qimuttuarsuit kimmisseraangatsigik’ piumasatsinnut naalatsittarivut. Taamaattumik oqarput paariniarlugu ilungersortumik suliniuteqarsinnaavugut ileqqorissuinnarmillu atorniarsaralugu. Oqqap aqukkuminaatsup ’timi iluunngarlugu mingutsittarpaa’. (Jâko 3:1-7) Oqaq saqitseriitsoq silarsuarmi matumani ajussutsinut sorpassuarnut pisuusimavoq, ilaatigut aserornartunut soorlu sallulluni nalunaajaanernut, mitalliinernut mamarliinernullu. (Jesaja 5:20; Matîuse 15:18-20) Oqarlu aqukkuminaatsoq nikanarsaataasunik, annernartunik mamarliisunilluunniit anitsigaangami toqunartumik toqunaqisumik ulikkaartarpoq. — Tussiaat 140:4; Rûmamiut 3:13; Jâko 3:8.
14. Qanoq ililluni kristumiup marloqiusamik oqaqarneq ingalassinnaavaa?
14 Soorlu Jakobip ersersikkaa ajunngitsumik oqaluuserineratigut ’Jehovamik pilluaqqusiitigaluni’ ajortumik oqaluuserinerisigut ’inunnik pilloqqusineq’ imminnut akerliusunik iliornerusoq. Ataatsimiinnerni Guuti unnersiutigalugu erinarsoriarluni kingornatigut uppeqatinik ajortumik oqaluuserinninneq eqqunngilluinnartuuvoq. Imeq minguitsoq minguttoorlu qorlortumit ataatsimit ataatsikkut kuussinnaanngillat. Jehova kiffartuukkutsigu allat eqqortumik iliorlutik naatsorsuutigissavaat ileqqorissunik ajunngitsunillu, ajortunngornartuniunngitsoq, oqaluuserisaqartarnissarput. Taamaattumik oqaasipalaat nigortertarniartigik tamakkununngalu taarsiullugit uppeqatitsinnut iluaqutaasinnaasut anersaakkullu ineriartornartut oqaluuserisarniartigik. — Jâko 3:9-12.
Iliuutsikkut ileqqorissuuneq
15. Peqqusersusaannginnissarput sooq taama pingaartigaa?
15 Kristumiut eqqarsariaatsimikkut oqaatsimikkullu ileqqorisuusariaqarput, ileqqutsigummi? Aatsaat ileqqorissuugutta Guutimut iluarisaanissaq angusinnaavarput. Jehovamut kiffaq kinaluunniit ileqqorissumik ingerlajunnaaruni namminerlu piumasani anguniaannarlugu peqqusersiortaleruni isumaqarsinnaanngilaq Guutip iluarisaanik iliorluni. Ussatit 3:32-imi allassimavoq: „Tunussisoq [Jehovamut] maajunnartuuvoq, peqqusersuitsulli [Jehova] ilagiiffigaat.“ Jehova Guutimut attaveqarnerput qujamasuutigigutsigu oqaatsit eqqarsaatissarsinartut tamakku ajortumik pilersaaruteqalinnginnissatsinnut allatulluunniit ililluta peqqusersiulinnginnissatsinnut iluaqutiginiartariaqarpavut. Jehovap tarninganut maajunnartut arfineq-marluk ilagaat „uummat pilersaarutipiloqartoq“. (Ussatit 6:16-19) Taamaattumik iliuutsit taamaattut ingalanniartigik ileqqussatigullu eqqortunik iliortarniarta, inoqatitsinnut iluaqutaasumik Ataatatsinnullu qilammiusumut ataqqinaataasumik.
16. Sooq kristumiut ilumoortuusaarniartumik iliortussaanngillat?
16 Unneqqarissuseq ileqqorissutsimut ilaavoq. (Eprîarit 13:18) Ilumoortuusaarniartoq, oqaatsiminut naapertuutinngitsumik iliortartoq, pissuserissuunngilaq ileqqorissuunaniluunniit. Oqaaseq grækerisooq (hypokritēsʹ) „ilumoortuusaarniartoq“-mik nutserneqartoq isumaqarpoq „akisoq“, isiginnaartitsisartumullu atorneqartarluni. Grækerit Romamiullu isiginnaartitsisartui kiinarpaqartarmata oqaaseq taanna pisuusaartumut atorneqarpoq. Ilumoortuusaarniartut ’ilumuunngitsuupput’. (Lúkarse 12:46 aamma Matîuse 24:50, 51 imminnut naleqqiutikkit.) Ilumoortuusaarniarneq (hypoʹkrisis) peqqusersusaarnermut ajussutsimullu atavoq. (Matîuse 22:18; Mákorse 12:15; Lúkarse 20:23) Inuk tatiginartoq qungujummik, iluareqqusaarnermik iliuutsinillu pisuusaarnerinnaasunik salloqittarneqaraangat ajuusaarnartaqaaq! Akerlianilli kristumiunik tatigisassaasunut attaveqarneq nuanneqaaq. Guutillu ileqqorissut ilumoortuusaarniartuunngitsullu pilluaqqusarpai. ’Qatanngutigiissutut asaqatigiinnermik peqqusersuitsumik’ ersersitsisut ’pisuusaarnerunngitsumillu uppissuseqartut’ iluarai. — 1 Pîtruse 1:22; 1 Timûtiuse 1:5.
Ileqqorissuseq tassa iliuuseqarnikkut ajunngissuseq
17, 18. Anersaap inerititaa ajunngissuseq pigigutsigu allanut qanoq pissusilersortassaagut?
17 Ileqqorissuseq uppernitsinnut ilaatikkutsigu Guutimit akuerineqarsinnaanngitsumik eqqarsarumanatalu oqalukkumanatalu iliuuseqarumassanngilagut. Aammali kristumiutut ileqqorissuseq iliuuseqarluni ajunngitsuliornikkut ersertariaqarpoq. Ileqqorissusermi nassuiarneqarsimavoq tassaanerarneqarluni ajunngissuseq. Ajungissuserlu Jehovap anersaavata illernartup inerititaraa, tassaannaanani inuit ilungersuuteqarnermikkut pilersitaat. (Galâsiamiut 5:22, 23) Anersaap inerititaa ajunngissuseq ersersittarutsigu inuit allat ajunngitsumik eqqarsaatigisassavavut naallu naammalluinnanngitsutut ilioriataartaraluartut pissusiinik ajunngitsunik nersualaartassallugit. Ukiorpassuarni aalajaallutik Jehova kiffartuussimavaat? Taamaattumik ataqqinninnermik ersersitsivigisariaqarpavut inuttaalu Guutimullu kiffartornerat ajunngitsumik oqaluuserisarlugit. Ataatatta qilammiusup nammineq aterminut asanninnerat uppernermikkullu suliaat malugisarpai, uaguttaarlu taamaaliortariaqarpugut. — Nehemja 13:31b; Eprîarit 6:10.
18 Ileqqorissuseq pigigutsigu naammagittartuullutalu, paasinnittuullutalu misiginneqataasuussaagut. Jehovamut kiffaqatitta ilaat aliasuppat imaluunniit isumatsassimappat tuppallersarlugulu qiimmassartassavarput, soorlu Ataatatta qilammiusup tuppallersartaraatigut. (2 Korintumiut 1:3, 4; 1 Tásalûníkamiut 5:14) Aliasuttut, immaqa toqusoorsimasut, misiginneqatigisarpavut. Allat aliasunnerannik millisitsisumik iliuuseqarsinnaagutta taamaaliorumassaagut, ajunngissutsimmi ileqqorissutsillu asannilluta allanik ikiuinissatsinnut kajumissisittarmatigut.
19. Eqqarsaatitsigut, oqaatsitsigut iliuutsitsigullu ileqqorissuugutta qularnanngitsumik allat qanoq pissavaatigut?
19 Soorlu Jehova ajunngitsumik oqaluuserineratigut pilluaqqusaripput, uagut eqqarsaatitsigut, oqaatsitsigut iliuutsitsigullu pissuserissuugutta qularnanngitsumik allat pilluaqqussavaatigut. (Tussiaat 145:10) Silatuumik ima ussateqarpoq: „Iluartoq [Jehovamit] pilluaqquneqartarpoq, iluaatsulli nakuuserneq qanermini toqqortaraa.“ (Ussatit 10:6) Inuup ajortup nakuusertullu ileqqorissuseq, inuttut pissuseq inunnit allanit nuannarisaassutissaraluani, amigaatigaa. Siaruartikkani naapertorlugit katersuisarpoq; inuit unneqqarillutik ajunngitsumik oqaluuseralugu pilluaqqusinnaanngilaat. (Galâsiamiut 6:7) Jehovap kiffaasut ileqqorissumik eqqarsartarlutillu, oqaluttarlutillu iliuuseqartartut ajunnginnerujussuarmik ingerlapput! Allanit asaneqarlutillu, tatigineqarlutillu ataqqineqarput, inoqataasalu pilluaqqussavaat ajunngitsumillu oqaluuseralugit. Guutimeersumik ileqqorissuseqarnerat aamma Jehovamit pilluaqqussutissarpassuarnik kinguneqassaaq. — Ussatit 10:22.
20. Ileqqorissumik eqqarsartarlutalu, oqaluttarlutalu iliortarutta Jehovap innuttaasa ilagiivinut qanoq sunniuteqassava?
20 Ileqqorissumik eqqarsartarlutalu, oqaluttarlutalu iliortarutta Jehovap innuttaasa ilagiivinut iluaqutaalluinnassaaq. Uppeqatigiit asannittumik eqqarsaatigeqatigiittarpata ataqqeqatigiinnermillu ersersitsisarpata qatanngutigiittut asanninneq akornanni ingerlalluassaaq. (Juánase 13:34, 35) Ajunngitsumik ileqqorissumillu oqaluuserisaqartarneq, ilaatigut nersualaarilluni qiimmassaallunilu, ataasiussuseqalernarpoq suleqatigiilluarnissamullu tunngavissiuisarluni. (Tussiaat 133:1-3) Uummammit pisumik ileqqorissumillu iliuutsit allat ileqqorissumik oqaluuserisaqarnissaannut aamma kaammattuutaasarput. Pingaarnerpaamillu kristumiutut ileqqorissuseq Ataatatta qilammiusup, Jehovap, akuerinninneranik pilluaqqusineranillu nassataqartarpoq. Taamaattumik uppernermik ersersitsisarnitsigut Guutip neriorsuutai naleqangaartut qisuariarfiginiartigik, ileqqorissuserlu uppernitsinnut ilaalersinniarlugu ilumoorussamik iliuuseqarluta. (wD 15/7 93)
Qanoq akissavit?
□ „Ileqqorissuseq“ qanoq nassuiassaviuk, aamma sooq inuit naammalluinnanngitsut ileqqorissuusinnaappat?
□ Ileqqorissuseqartoq qanoq eqqarsartarpa?
□ Ileqqorissutsip oqaatsivut qanoq sunnissavai?
□ Ileqqorissuseq pissuserissuserlu iliuutsitsinnut qanoq sunniuteqartariaqarpat?
□ Ileqqorissuugutta qanoq iluaqutaassava?
[Atuaqqissaarnermi apeqqutit]
[Qupp. 18-mi assiliartaq]
Qorlortumit ataatsimit imeq minguitsoq minguttoorlu ataatsikkut qorlorsinnaanngimmata allat eqqortumik iliorlutik naatsorsuutigisinnaavaat Jehovap kiffai ileqqorissumik oqaluttassasut