Jehova — Guuti ilumoortoq uumasoq

EGYPTENIP kunngia Farao unammillerlunilu asissuivoq ima aperigami: „[Jehova] taanna kinaammat?“ (2 Moses 5:2) Soorlu ilanngutassiap matuma siuliani takutinneqartoq isumaqarneq tamanna Egyptenimiunut perlunnik toqumillu, naggataatigullu Faraop sakkutoorpassuisalu masattumi iliveqarnissaannik, kinguneqarsimavoq.

Egyptenitoqqami Jehova Guutip guutipilunnit pissaaneqarnerungaarnini takutissimavaa. Taannali pillugu amerlanerungaartunik ilinniarsinnaavugut. Kinaassusia qanoq ittuua? Sunillu piumaffigaatigut?

Aqqa tusaamasaassusialu

Guutip piumasaa Egyptenimi Faraomut saqqummiukkamiuk Moses ima oqaannarsimanngilaq:  „Naalagaq ima imalu oqarpoq.“ Faraop Egyptenimiullu allat guutigisatik amerlasoorpassuit naalakkatut isigaat. Aap, Mosesip Guutip aqqa, Jehova, atorpaa. Ateq taanna taaneqarpoq nunami Midjanimi kakillarnaqutini ikumasuni nammineq tusarsimavaa. Oqaluttuaq isumassarsiarititaq imaappoq:

„Guutip Moses ima oqarfigaa: ’Uanga tassa [Jehova]. . . . Maannalu tusaavara Israelikkut Egyptenimiunit inussiaataanertik pillugu kappialanerat, angeruseralu eqqaavara. Taamaattumik Israelikkut ima oqarfigissavatit: „[Jehova] oqarpoq: ’Uanga tassaavunga [Jehova]! Talermik isaassimasumik eqqartuussinikkullu pillaatit sakkortungaartut atorlugit aniguisissavassi Egyptenimi inussiaataanissinnit pinngitsaalisaallusilu sulisitaanissinnit. Taava innuttarilerumaarpassi, Guutigissavassingalu; misigissavarsilu uanga tassaasunga [Jehova] Guutersi, Egyptenimiut pinngitsaaliillutik sulisitsinerannit ilissinnut nanertuutaasumit aniguisitsisoq; isertikkumaarpassilu nunamut Abrahamimut Iisaamullu Jaakumullu tunniukkumallugu uppernarsaassutigisannut, ilissinnullu tunniukkumaarpara pigisassassitut. Uanga tassa [Jehova].’“’“ — 2 Moses 6:1-8.

Jehova taamatorluinnaq iliorpoq. Israelikkut Egyptenimi inussiaataanermit aniguisippai Kana’anillu nunaanik tiguaasinnaangortillugit. Neriorsuutini malillugit Jehovap tamakku tamaasa pilersippai. Taamaattumik naleqqulluartuuvoq aqqa, Jehova, isumaqarmat „pisitsisoq“, imaluunniit „naammassisitsisoq“. Biibilimi taaguutit „Guuti“, „Naalagaq kisimi oqartussaasoq“, „Pinngortitsisoq“, „Ataataq“, „Ajugaqanngitsoq“ aamma „Qutsinnerussaartoq“ tamarmik Jehova pillugu atorneqartarput. Aqqatali Jehova-p Guutitut ilumoortutut siunertaminik angingaartumik naammassinnikkiartortutut ilisaritippaa. — Jesaja 42:8.

Biibili oqaatsit allassimaqqaarfii atorlugit atuarsinnaagutsigu Guutip aqqa tuusintileriarluta nassaarissavarput. Hebriiarisuumi naqinnerit aappersarissat sisamat jōdh, he, waw, he (יהוה), atorlugit allanneqartarpoq. Talerpiup tungaanit saamiup tungaanut atuarneqarput. Hebriiarisut oqaluttut atuaraangamik naqinnerit ersiutit nammineq ilannguttarpaat, ullumikkulli ersiutit suusimanersut ilisimaneqarluanngillat. Ilaasa allattaaseq Jahve pingaarnerutippaat, allattaaserli Jehova nalinginnaaqaaq Pinngortitsisittalu kinaassusersinissaanut naleqqulluarluni.

Atip Jehova-p atornerata aamma Guuti Tussiaat 110:1-imi Naalakkamit taaneqartumit immikkoortippaa. Tassani ima allassimasoqarpoq: „Naalagaq [hebriiarisooq, יהוה] naalakkannut oqarpoq: ’Talerpimma tungaanut inginniarit, akeqqatit uanga tummarfiliunniassagakkit illit isikkannut!’“ Allassimaffimmi tamatumani Guutip aqqa atorneqarmat Ny Verden-nutsikkami ima allassimasoqarpoq: „Jehovap naalakkannut oqaasii imaapput: „Talerpimma tungaanut inginniarit akeqqatit uanga tummarfiliunniassagakkit illit isikkannut.“ Jehovap oqaasii taakkua siulittuutitigut Jesus Kristus, allattup ’naalagaara’-mik taasaa tikkuarpaat.

Faraop nalaani Jehovap aqqi ilisaritissimavaa. Moses aqqutigalugu Guutip kunngi killisseriitsoq ima oqarfigaa: „Tamatumuuna perluit nalliutitassakka tamaasa ilinnut namminermut, atorfilittannut innuttannullu nalliutitikkumaarpakka misigeqqullugu uattut ittoqanngitsoq nunarsuarmi tamarmi. Assaga isatsillugu illit innuttatillu toqoraataasumik nappartissimagaluarussi qangali nunamit piiagaareersimassagaluarputit. Mannali pillugu atatikkallarpakkit: Pissaanera ilinnut takutikkumagakku ateralu nalunaarutigineqaqqugakka nunarsuarmi tamarmi.“ — 2 Moses 9:14-16.

Israelikkut Egyptenimit aniguisitaanerat Kana’animilu kunngit ilaasa uppitinneqarnerat eqqarsaatigalugit arnap Jerikomiup Rahabip hebriiarit alapernaarsuiartortut marluk ima oqarfigai: „Nalunngilara [Jehovap] nuna manna ilissinnut tunniussimagaa. Nunami maani najugaqartut tamarmik annilaarsimasorujussuupput ersigalusi. Tusarsimavarpummi Egyptenimit anigassi [Jehovap] Immami  Aappalaartumi aqqutissassinni imaq tissortissimagaa, aamma Sihon Ogilu, Amorikkut kunngii Jordanip kangiani najugaqartut, toqussimagisi. Tamanna tusaratsigu annilaartorujussuuvugut, ilissilu pisuullusi tamatta sapiissuseerussimavugut. [Jehova] Guutersi Guutiuvoq pavani qilammi maanilu nunami.“ (Josva 2:9-11) Aap, Jehova tusaamasaasorujussuanngorsimavoq.

Jehova pissusiilu

Tussiaasiortoq qamannga pisumik ima kissaateqarpoq: „[Inunnut] paasitserlugu illit kisivit — aqqit tassaasoq [Jehova] — qutsinnerussaartutit nunarsuarmi tamarmi.“ (Tussiaat 83:18) Jehova tassaammat qilammilu nunamilu kisimi oqartussaasoq Jesusip malinnittai malersorneqarnerminni ima qinusinnaapput: ’Naalagaq-aa, qilammillu nunamillu immamillu taakkunaniittunillu tamanik Pinngortitsisutit.’ (apustilit suliait 4:24) Nalunnginnatsigu Jehova ’qinnutitsinnik tusartartoq’, ila tuppallernassusia! — Tussiaat 65:3.

Jehovap pissusiisa pingaarnersaat tassaavoq asanninneq. Aap, ’Guuti asassutaavoq’ — tamatigut asannilluinnartuulluni. (1 Juánase 4:8) Aammalu ’ilisimassuseqarneq pissaanerlu pigai’. Jehova sunik tamanik ilisimassuseqarluni ajugaqanngilaq, pissaaninili atornerlunngisaannarlugu. (Job 12:13; 37:23) Qularisariaqanngilarput Jehovap tamatigut naapertuilluartumik iluartuliorfigissagaatigut, tassami „iluarneq innarluissullu issiavissaarsuata tunngavigai“. (Tussiaat 97:2) Eqqunngitsuliorutta peqqissimillutali tuppallersaatigisinnaavarput nalunnginnatsigu Jehova Guutiusoq „nallittuisoq, saammaasoq, kamajasuunngitsoq, isumassuingaartoq unneqqaringaartorlu“. (2 Moses 34:6) Aap, tupinnanngilaq Jehova nuannaarluta kiffartuussinnaagatsigu. — Tussiaat 100:1-5.

Kunngi qilammiusoq asseqanngitsoq

Jehovap ernera Jesus Kristus ima oqarsimavoq: ’Guuti anersaajuvoq.’ (Juánase 4:24) Taamaattumik Jehova inunnut takussaanngilaq. Aap, Jehovap Moses ima oqarfigaa: „Kiinara takussanngilat, uannik takunnittoq inuuginnarsinnaanngimmat.“ (2 Moses 33:20) Kunngi qilammiusoq taanna ima naalannangaartigimmat inuit takussallugu saperpaat.

Naak Jehova isitsinnik takussaanngikkaluartoq Guutitut Ajugaqanngitsutut piuneranik nalunaajaatissarpassuaqarpoq. Ilumut, ’takussaanngissusiami pissaanera ittuinnartoq Guutiussusialu silarsuup pinngortitaaqqaarneranit malunnarmata suliaanit paasinarlutik, taamaattumik patsisissaqanngillat.’ (Rûmamiut 1:20) Nunarsuaq, ivikkat, orpiit, paarnat, nerisassat naatitat naasullu Jehovap Guutiussusianik takutitsipput. Guutipiluit naleqanngitsut assiginagit Jehova siallersitsisarpoq naggoriffiusoqartitsisarlunilu. (apustilit suliait 14:16, 17) Qilak ulloriarpassualik qimerlooriaruk. Ila, Jehovap Guutiussusianut aaqqissuillaqqissusianullu ersiutaavoq angingaartoq!

Jehovap aamma qilammi pinngortitani illernartut sianissusillit anersaajusut aaqqissuussiffigisimavai. Peqatigiiffittut suleqatigiilluartutut  Guutip piumasaa naammassisarpaat, soorlu tussiaasiortup eqqartoraa: „[Jehova] nersorsiuk, ilissi inngilii, ilissi pissarsuit peqqusaanik naammassisitsisartut oqaasii tusaannaraangassigit. [Jehova] nersorsiuk, katersai tamassi, ilissi kiffai naammassisitsisartut piumasaanik.“ (Tussiaat 103:20, 21) Jehovap nunarsuarmi innuttani aamma aaqqissuussiffigisimavai. Inuiaqatigiit Israelikkut aaqqissuunneqarluarsimapput, Guutillu ernerata malinnittai siulliit aamma taamaassimapput. Ullumikkut tamatumunnga assingusumik Jehova nunarsuaq tamakkerlugu peqatigiiffeqarpoq nalunaajaasunik ilungersortunik, Naalagaaffiata qanillineranik tusarliisunik. — Matîuse 24:14.

Jehova Guutiuvoq ilumoortoq uumasorlu

Jehovap Guutiussusia assigiinngitsorpassuartigut uppernarsarneqarsimavoq! Egyptenimi guutipiluit nakinarsarsimavai Israelikkullu isumannaatsumik nunamut neriorsuutigisamut pisillugit. Pinngortitat Jehovap Guutiussusianik ersiutinik ulikkaarput. Taannalu eqqunngitsumik upperisarsiornermi guutipilunnut naleqanngitsunut naleqqiunneqarsinnaanngivippoq.

Pruffiiti Jeremiasip takutissimavaa Jehova Guuti uumasoq guutipiluillu inuit sanasimasaat qanoq assigiinngitsigisut. Jeremiap allagai kapitali 10-mi assigiinngissuseq tamanna allaatigineqarluarpoq. Jeremias ilaatigut ima allassimavoq: „[Jehova] ilumut Guutivoq, Guutiuvoq uumasoq naassaanngitsumullu kunngiusoq.“ (Jeremia 10:10) Guutip ilumoortup uumasup Jehovap suut tamaasa pinngortissimavai. Israelikkut Egyptenimi inussiaanermi naalliukkaluttuinnartut anigusissimavai. Taassumunnga ajornartoqanngilaq.

Jehovap, ’naassaanngitsumik kunngiusup’ qinnut manna akiumaarpaa: ’Ataatarput, qilammiusutit, aqqit illernarsili; naalagaaffiit tikiulli; peqqusat qilammisut nunamissaaq pili.’ (1 Timûtiuse 1:17; Matîuse 6:9, 10) Jesus Kristusip erniinnaq Naalagaaffik qilammiusoq Messiasikkoortoq aqqutigalugu ajussuseq iliuuseqarfigissavaa Jehovallu akerai tamaasa suujunnaarsillugit. (Daniel 7:13, 14) Naalagaaffiup silarsuaq nutaaq inuiaat naalattut naassaanngitsumik pilluaqquneqarnissaannut pilersissavaa. — 2 Pîtruse 3:13.

Jehova taassumalu siunertai pillugit suli ilinniagassaqaqaagut. Aalajangerniarit tamakkuninnga ilinniassallutit ilinniakkatillu naapertorlugit iliuuseqassallutit. Taamaalioruit Naalagaaffiup ataani nunami paratiisiusumi inuuneq naassaanngitsoq nuannaarutigiumaarpat. Aliasunneq, anniarneq allaallu toqu peerneqassapput, Jehovamillu ilisarsinerup nunarsuaq tamakkissavaa. (Jesaja 11:9; sarĸúmersitat 21:1-4) Tamanna misigiumaarpat apeqqummut matumunnga akissut Biibilimiittoq ujarlugulu, nanillugulu maleruarukku: ’Jehova taanna kinaammat?’ (wD 15/7 93)

[Qupp. 7-mi suminngaanneernera]

Pictorial Archive (Near Eastern History) Est.