Jehovap napparsimasut utoqqalisullu eqqaamavai

’ULLUT ajortut’ inuuffigalugit artornarsinnaavoq. (tugsiaut 37:18, 19) Utoqqanngorluni sanngiilligaanni aamma ullut taamaassinnaapput. Ilaasa ullut ajortut misigisarpaat sivisuumik napparsimanerminni. Misigisinnaapput soorlu nappaatip inuunertik aqukkaa, eqqarsaatitik qanoq-iliornertillu tamaasa naalagaaffigalugit.

Tuppallernarporli eqqaamallugu Jehovap kiffani isigigai. Utoqqanngoraluarlutik napparsimagaluarlutik allatigulluunnit misilinneqaraluarlutik kiffaasa tunniusimasut ilumoortuarunik ilisimassuseqarunillu  uummataa nuannaartissavaat. (2 Israelikkut 16:9a; Ussatit 27:11) Kunngi David ima neriorsueqqissaarsimavoq: „[Jehova] qanippoq torlorfigisiminut tamanut, . . . annikilliornerminni nillianerat tusartarpaa annaattarlugillu.“ (Tussiaat 145:18, 19) Uagummi? Uaguttaaq Jehovatut napparsimasut utoqqalisullu eqqaamasarpavut?

Napparsimaneq utoqqanngornerlu pissutigalugit sanngiissutit aaqqissuussaanermi matumani inuunermut atapput. Piviusut tamakku allatut ajornartumik akuerisariaqarpavut Jehovap nunarsuarmik inunnillu siunertaminik naammassinninnissaata tungaanut. Ullumikkut inuit amerliartuinnartut utoqqarsuanngortarput, taamaattumillu amerlasuut tamatumunnga atatillugu sanngiissutit nalunngilaat. Aammalu amerlasuut suli inuusunnerutillutik nappaammit ajutoornermilluunniit inuunerminnik ulorianartorsiortitsisumit innarluuteqalersitsisumilluunniit eqqugaasimapput. Silarsuartoqaq manna atuutsillugu nappaatit utoqqalinerlu tassaajuassapput unamminiarnartut annertuut.

Napparsimasut utoqqalisullu akornatsinniittut ’naalliussutsikkut erinitsajuissutsikkullu’ maligassaalluartut pingaartingaarpavut! Aap, ’ilalaartut pilluarneraraavut’. (Jâko 5:10, 11) Utoqqalisut amerlasuut maanna nukissaqarluarunnaartut maannakkut ilagiinni siulersuisunik ukiorpassuarni ajoqersueqataallutillu sungiusaaqataasimapput. Aamma utoqqalisorpassuit nuannaarutigaat meeqqatik piffissaq tamaat kiffartornermut peqataammata. — Tussiaat 71:17, 18; 3 Juánase 4.

Aammalu akornatsinni sualuttumik nappaatillit naalliuuteqaraluarlutik aalajaannermikkut uatsinnut kajumissaarisut pingaartippavut. Nikallornatik neriuutimminnik aalajangiusimannittuarnerat uppernikkut nakussatsinnarlunilu qiimmatsannarpoq. Isumakkut eqqissisimagamik nalerisimaaramillu uppernikkut maligassaalluartuupput.

Kræftimik, uummammik unittoornermik imaluunniit allamik inuunermut allanngorluinnartitsisumik tassanngaannartumik eqqorneqarneq tupannaqaaq. Meeqqallu napparsimalernerat ajortumeerneralluunniit angajoqqaanut misilinneqaataasarpoq. Allat qanoq ilillutik ikiuisinnaappat? Ullut ajortut taamaattut kristumiut qatanngutigiinnerannut tamarmut misilinneqaataasarput. Taama pisoqaraangat uppernarsarsinnaavarput ’eqqarliusoq erniusimasoq annikilliornermi ikiortissaalluni’. (Ussatit 17:17) Soorunami nappaatillit utoqqalisullu tamarmik ilimagisinnaanngilaat ilagiinniittut tamavimmik ataasiakkaarlutik imminnik inuttut ikiuinissaat. Jehovalli anersaani illernartoq ikiortigalugu arlallit kajumissaassavai assigiinngitsutigut ikiueqqullugit. Utoqqaanertallu isumagisinnaavaat ilagiinni arajutsineqartoqannginnissaa. — Takuuk 2 Moses 18:17, 18.

Paasinninniarit

Allat ikiussagutsigik attaveqatigiilluarneq pingaartorujussuuvoq, piffissarlu, naammagittarneq misiginneqataanerlu pisariaqarput. Soorunami ikiortitut ’oqalunnikkut nakussassaarusupputit’; kisianni oqalutsinnatit iliuuseqartinnatillu tusarnaaqqissaartarit, ’erloqisitsiinnartumik tuppallersaasuujumanak’. — Job 16:2, 5.

Napparsimasut utoqqalisullu ilaannikkut pakatsinertik toqqortoruminaatsittarpaat. Neriuttuarsimapput annikilliornartussarsuaq anigussallugu, maannakkulli tamanna nalliutsinnagu toqunissartik isumakuluutigilerlugu. Nappaatertillu imaluunniit utoqqalillutik sanngiillinertik pissutigalugu qasoqqagajupput ernumasarlutillu. Upperneq uumasoq sakkortoorlu atatissagaanni akiuuttariaqarpoq, ingammik kissaatigisaagaluatut kristumiutut kiffartuussinermi  tamakkiisumik peqataasinnaajunnaaraanni. Kristumiup utoqqaanertap qatanngut arnaq utoqqalisoq pulaarsimavaa; qinoqatiginerani Jehova qinnuigaa ajortuliatsinnik isumakkeerfigeqqulluta. Qinoreerami malugaa qatanngut arnaq qullilisoq. Nassuiaavoq misigaluni Jehovap immikkut isumakkeerfiginninnissaa pisariaqartillugu illumiit-illumut oqaluussinermi peqataasinnaajunnaarami. Aap, atorsinnaanngitsutut naammanngitsutulluunniit misigineq, pissutissaqanngikkaluartorluunniit, aliasunnartaqaaq.

Eqqarsaatigissavarputtaaq ernumaneq qasoqqanerlu isumakkut allanngorarnermut pisuusinnaammata. Utoqqalilluni imaluunniit napparsimalluni sanngiinnermini inuk Jehovamit qimagaasutut misigisinnaavoq, immaqa ima aperissalluni: „Qanoq iliorama? Sooq uangarpiaq naalliussaanga?“ Ussatit 12:25-mi allassimasoq eqqaamajuk: „Isumakuluuteqarnerup inuk artorsaatissittarpaa, inussiarnersumilli oqaaserisat nuannaalersittarpaat.“ Oqaatsinik ajunngitsunik tuppallernartunik nassaarniartarit. Utoqqalisut anniaateqartut allaat Jobitut toqunissartik kissaatigisinnaavaat. Tamanna tupassutaasariaqanngilaq; paasinninniarit. Nimaarnerit taamaattut isumaqartariaqanngillat upperneq tatiginninnerlu amigaataasut. Job qinusimavoq ’toqusut inaanni toqqorneqaqqulluni’, nangillunili takutippaa Jehovap makitissagaani upperilluarlugu. Upperneq nukittooq ikiortigalugu annikilliorfiit isumatsangaarsimaanerlu nikallujuilluta atorsinnaavavut taamaattorli Jehovamut qanittumik attaveqartuarluta. — Job 14:13-15.

Napparsimasut utoqqalisullu ataqqillugit

Napparsimasut utoqqalisullu ataqqinissaat pingaartorujussuuvoq. (Rûmamiut 12:10) Siornatigutut sukkatigisumik qisuariartarunnaarsimappata imaluunniit siornatigutut annertutigisumik iliuuseqarsinnaajunnaarsimappata naammagittarfiginiaannassavatit.  Tuaviupilullutik akuliuffigisassanngilatit qalliuniarfigissanagilluunniit. Ajunngitsumik siunertaqaraluarluta qalliuniarfigivallaartarutsigik imminut ataqqinerannik arsaartoorsinnaavavut. Paasiniaasartup Jette Ingerslevip ilisimatusaatitut allakkamini 1988-imi naqiterneqartumi nassuiarpaa 85-inik ukiullit ilaasa namminneq inuunerminnik naleqartitsisut qanoq nalileraat: „Pingasut pingaartinneqarnerupput: qanigisanik najuineq; peqqissuseq; minnerunngitsumillu nammineq aalajangersinnaaneq.“ Malugeriaruk ataataanerpaaq Jakob utoqqalimmat ernerisa nikanarsanngikkaat; kissaatigisai ataqqivaat. — 1 Moses 47:29, 30; 48:17-20.

Napparsimasuttaaq ataqqineqartariaqarput. Utoqqaanertaq pilattaanikkut kukkusimaneq pissutigalugu oqalussinnaajunnaarlunilu atuarsinnaajunnaarlunilu allassinnaajunnaarsimavoq. Eqqorneqarnera alianaqaaq, atorfissaqanngitsutulli misigeqqunagu utoqqaanertaqatai aalajangerput sapinngisamik iliuuseqarniarlutik. Ilagiinnut allakkanik tamanik atuffattarpaat ilagiinnilu pilersaarusiornermut peqataatittarlugu. Utoqqaanertat ataatsimiikkaangamik paasiniartarpaat qanoq isumaqarnersoq. Paasitippaat suli utoqqaanertaqataasutut isigalugu peqataaneralu pingaartillugu. Ilagiinni kristumiuusuni tamatta iliuuseqarsinnaavugut napparsimasut utoqqalisullu ’atorfissaaruttutut’ qimagaasutullu misigeqqunagit. — Tussiaat 71:9.

Anersaakkut nakussatsinnissamut ikiuineq

Uumasumik sakkortuumillu uppersuseqassagutta tamatta anersaakkut inuussutissat pisariaqartippavut. Taamaattumik kajumissaarneqartarpugut ullut tamaasa Biibili Biibililersaarutillu atuartaqqullugit, ilagiillu ataatsimiinneri oqaluussisarnerlu peqataaffigeqqullugit. Amerlanertigut napparsimasut utoqqalisullu taamaaliornerminni ikiorneqartariaqarput, tamarmillu atukkatik naapertorlugit eqqortumik ikiorneqarnissaat pingaartuuvoq. Qujanartumik  amerlasuut rigssaliliarnermi ilaatinneqartarunik rigssalimilu ikiorneqartarunik suli ataatsimiinnerit najuuffigisinnaasarpaat. Ataatsimeeqataanerat iligiinnut tamanut kajumissaataasaqaaq. Taakkua nikallujuinnerat uppernikkut nakussatsinnaqaaq kaammattuutaaqalunilu.

Napparsimasut utoqqalisullu amerlanertiguttaaq kristumiutut kiffartuussinermi siunertaqarluartumik peqataasinnaapput. Ilaat gruppit nalunaajaaqatigiinnerannut ilaasarput, qularnanngitsumillu allaat ikittuinnarnut pulaarnissaminnut nukissaqartaraluarlutik qiimmassaatigisaqalugu. Taamaaliornissartik ajornarsippat ulluinnarni attaveqarfigisartakkaminnut nalunaajaaneq nuannaarutigisinnaavaat. Qatanngut arnaq kræftimik eqqorneqartoq aalajangerpoq inuunermi sinnera tusagassaq nuannersoq siuarsarlugu immikkut suliniuteqassalluni. Nakimanngissusia allanut kajumissaataalluarpoq. Allaat ilineqarnissani pilersaarusiorpaa eqqarliminut uppinngitsunut, suleqatiminut saniliminullu nalunaajaataalluartumik. Atugai erloqinartut taamaalillutik ’iivangkiiliup siumukarneranut iluaqutaalerput’, uppernermillu tatiginninnermillu ersersitsiniarluni aalajangernermigut ullut inuuffigisami sinneri immikkut imaqarluartippai. — Filípimiut 1:12-14.

Napparsimasut utoqqalisullu anersaakkut nakussatsinneqarnissaannut ikiussallugit pitsaassaaq. Ilaqutariit napparsimasunik utoqqalisunillu qaaqqusisinnaapput imaluunniit allamut nikissinnaanngitsut angerlarsimaffiini ilaqutariittut atuaqqissaaqatigisinnaallugit. Assersuutigalugu, anaanaasup meeqqani minnerit marluk qatanngummut arnamut utoqqalisumut ilagisarsimavai, atuagaq bîbilimik oKalugtuautíka atuaqatigiissutiginiarlugu. Soorunami qatanngutip arnap utoqqalisup tamanna nuannaarutigeqaa, meeqqallu taassuma soqutiginninnera nuannaarutigaat.

Soorunami imaassinnaavoq inuk sanngiitsoq akornusersorneqarpallaartariaqanngitsoq, taamaappallu ilaannikkuinnaq taassumunnga atuffassinissaq ajunnginnerussaaq. Eqqaamajulli naak inuup oqaloqatigiinnissamut timikkut nukissaqarluarunnaarsimagaluarluni anersaakkut peqateqarnissani kissaatigalugulu pisariaqartissinnaagaa. Qinoqatigisinnaavavut, atuffassinnaallugit imaluunniit misilittagalikkersaarfigisinnaallugit; sivisuallaannginnissaali sianigisariaqarpoq.

Kiffartuusseriaaseq illernartoq ataaseq napparsimasut utoqqalisullu attattuaannarsinnaavaat: allat iluaqutissaannut qinnussineq. Ajoqersukkat siulliit kiffartuussineq tamanna pingaartissimaqaat. Ilaanni suliassat ilagiinni agguataarpaat apustilit qinuneq aallulluarsinnaaniassammassuk. Epafras aalajaatsoq eqqartorneqarpoq allat ’assoruulluni qinnuttuinnartarsimagai’. (Kulorsamiut 4:12; apustilit suliait 6:4) Qinnutit tamakku pingaartorujussuullutillu iluaqutaasorujussuupput. — apustilit suliait 6:4; Lúkarse 2:36-38; Jâko 5:16.

Jehovap napparsimasut utoqqalisullu eqqaamavai, ullunilu annikilliorfiini takusartarlugit. Naatsorsuutigaalu aamma uagut eqqarsaatigigipput qanoq ililluta taakku ikiorsinnaallugillu annertoqqusersorsinnaagivut. Isumaginninnitta takutissavaa assuarnaassuserput aalajangiunniarlugu qanoq ilungersortigisugut. Nuannaarluta kunngip Davidip oqaasii eqqarsaatigaavut: „[Jehovap] paarai peqqusersuitsut ullui, kingornussisussaanerat atattuinnassaaq.“ — Tussiaat 37:18. (wD 1/8 93)

[Qupp. 30, 31-mi ungalusaq]

Nalinginnartigut ikiuisarit ilisimassuseqarlutit

ILAQUTAASUT ikinngutaasullu napparsimasunik utoqqalisunillu isumaginninnissamik tunngaviusumik ilisimasaqartariaqarput. Ingammik inuuneq isumalluarfigeqqullugu, atorfissaqartitaasutut misigeqqullugit imminnullu ataqqeqqullugit kajumissaarneqarsinnaapput. Taamaalillutik siunertaqarluartumik inuusinnaapput Jehovamilu nuannaarnertik attattuaannarsinnaallugu, naak anniaateqaraluarlutik. Malugisariaqartuuvoq Jehovap nalunaajaasuisa ilarpassui utoqqarsuanngortartut. Tamatumunnga pissutaasut ilaat qularnanngitsumik tassaapput siunissamut neriuut, isumalluarnerat sapinngisamillu Naalagaaffimmik suliassanut peqataanerat. Napasuliaq Alapernaarsuiffiup Peqatigiiffiata præsidentigigalua, Frederick W. Franz, ukiuni 99-ini nuannaarluni angusaqarluarlunilu inooreerluni eqqissilluni toqusoq, tamatumunnga maligassaalluarpoq. — Naleqqiuguk 1 Israelikkut 29:28.

Amerlanertigut ulluinnarni nalinginnartigut annikitsualutsigut isumagineqarneq pingaartinneqarnerpaasarpoq: eqqiluisaarneq, eqqortunik nerisaqarneq, imermik taratsunillu pisariaqartunik pisarneq, timigissarneq, silaannarissarneq, eqqissilluni tagiartortinneq inuutsannartumillu oqaloqatigiinneq. Eqqortunik nerisaqarneq isigisinnaassutsimik, tusarsinnaassutsimik, isummap sulineranik, timikkullu iluarusussutsimik pitsanngorsaaqataasinnaavoq nappaatinullu akiuussutissamik annertusisitsinnaalluni. Eqqunngitsumik nerisaqartarnerinnaq imermillu naammattumik pisannginnerinnaq siusinnerusukkut utilissutaasinnaavoq. Timigissarneq inummut aalajangersimasumut naleqqulluartoq qanoq anguneqarsinnaanersoq eqqarsaatigineqartariaqarpoq. Qatanngutip arnap qatanngut arnaq alla utoqqaq tapiingajattoq pulaartarpaa atuffattarlugulu, sapaatillu-akunneranut pulaarnini tamaasa ilungersuuterujussuanngikkaluarlugu qiteqatigiinnermik aallarnerlugillu naggasertarpai. Immiussissut tamatigut nipilersukkanik qinikkanik piareeqqasarpoq, tamarmillu „eqaarsaarneq“ tamanna nuannaarutigisaqaat.

Nunani amerlasuuni peqatigiiffiit assigiinngitsut iluaqutaasunik siunnersuisinnaapput paasissutissiisinnaallutillu. (Soorunami kristumiu mianersortariaqarpoq kristumiutut kiffartuussinitsinnit suliniutinut allanut saatsinneqaqqunani.) Ilaannikkut ikiuutissat assigiinngitsut atorneqarsinnaapput, soorlu napparsimmaviup siniffia, ajaappissat, issiavik kaamisartagaq, tusartaat ilaallu ilanngullugit. Utoqqaat ilaat isumaqartarmata amigaateqaratik imaluunniit tamakkuninnga nutaanik pissarsinissaq iluaqutaanngitsoq, qanigisaasut isumatusaartariaqarput immaqalu kajumissaarisariaqarlutik. Uffarfimmut tigummivik atorluarsinnaasoq naasunit qilertalianit nuannaarutigineqarnerusinnaavoq.

Utoqqarnik paarsineq isumakkut qasunarsinnaaqaaq, ingammik utilersimappata. Utilerneq sallaatsumik malunniukkiartorajuttarpoq. Tamanna akiorneqarsinnaasarpoq utoqqalisup uninngaannartippallaarnaveersaarneratigut. Utertup inuk asasimasaraluani kamaassoraattaleriataarsinnaavaa. Qanigisaasut allaat piareersimasariaqarput utertup sallusuissummut tunngasut tamaasa puigorsinnaammagit — tamannali tassaavoq timikkut peqqiilliartorneq alianartoq, tassaananilu upperisamik katatsineq.

Napparsimasoq napparsimmavimmiippat imaluunniit utoqqaat illuanniippat tassani sulisut attaveqarfigineqarluartariaqarput paasisinnaaqqullugit inuuissiornerit, juullisiorneq nalliuttorsiornerillu allat eqqarsaatigalugit qanoq iliussasut. Pilattaanissaq pisariaqarpat napparsimasup inuunini naallugu aalersortinneq pillugu isumaa qanigisaasut nassuiarsinnaavaat uppernarsarsinnaasinnaallugulu.