Attaveqatigiinneq oqaloqatigiinnerinnaanngilaq

TAKORLOORIAKKIT takornariarpaaluit isikkivimmik alianaatsumik isiginnaartut. Tamarmik isikkivik ataaseq isiginnaarpaat, taamaattorli tamarmik immikkut assigiinngitsunik isigisaqarput. Sooq? Tamarmik isikkivik sammivinnit assigiinngitsunit isigigamikku. Tamarmik immikkut inissisimaffeqarput. Immaqalu tamarmik immikkut isiginiagaqarput. Tamarmik immikkut assigiinngitsunik isigisaminni tiguartiffigisaqarput.

Aamma aappariinnermi taamaappoq. Aappareeqanngilaq qanorluunniit isumaqatigiitsigigaluarlutik pissutsinik assigiilluinnartumik isiginittaasilinnik. Misigissutsit, meeraanermi misigisimasat ilaquttanillu sunnerneqarneq eqqarsaatigalugit uiusoq nuliaasorlu assigiinngissuteqartarput. Assigiinngissutit tamakku akiuunnermut nuanniitsumut pissutaasinnaasarput. Apustili Paulus erseqqissumik ima oqarsimavoq: „Katittut aliasuuteqalerumaarlutillu anniaateqalerumaarput.“ — 1 Korintumiut 7:28, The New English Bible.

Attaveqatigiinnerup ilagaa assigiinngissutinik tamakkuninnga uinimmut  ataatsimut ataqatigiilersitsiniaalluni ilungersorneq. Tamatumani oqaloqatigiinnissamut piffissaqartarnissaq pisariaqarpoq. (Takuuk quppernermi 7-imi siniligaq.) Allarpassuilli aamma pisariaqarput.

Siuneqassutsip pingaaruteqassusia

Biibilimi ima ussateqarpoq: „Uummatikkut ilisimassuseqarnerup silatuumik oqalunneq pilersikkaangagu inuup ilisimasai annertunerujartuinnartarput.“ (Ussatit 16:23) Oqaaseq hebriiarisooq tassani ’silatuumik pilersitsineq’-mik nutserneqartoq isumaqavippoq sianisooq, eqqarsaatiginneqqissaartartoq. Taamaattumik attaveqatigiinnerup aallaavia pingaarneq tassaavoq uummat, tassaanani qaneq. Attaveqatiginnilluartartoq oqaloqatiginnilluarsinnaasuuginnarani aamma misiginneqataalluni tusarnaarsinnaasariaqarpoq. (Jâko 1:19) Nalilersinnaasariaqarpaa aapparmi qallikkut pissusianut misigissutsit eqqarsaatillu suut tunuliaqutaanersut. — Ussatit 20:5.

Qanoq ililluni taamaaliortoqarsinnaagami? Ilaannikkut akerleriissuteqarnermi pisut qimerluuinnarneqarsinnaapput. Aappaasoq misigissutsikkut timikkulluunniit annertuumik tatisimaneqarpa? Isumaa nappaatiminit sunnerneqarsimava? „Ila ajunngittassusia oqaasissat piffissaasigut anillugit.“ (Ussatit 15:23) Pissutsit qanoq innerat eqqarsaatigisaraanni naleqquttumik iliuuseqartoqarsinnaavoq. — Ussatit 25:11.

Akerleriinnermulli pissutaasut amerlasuutigut maannakkut pissutsinit atukkanit aallaaveqarneqarneq ajorput.

Qanga inuunerisimasamut paasinnittuugit

Meeraanermi misigisat inersimasutut qanoq eqqarsariaaseqarnermut aalajangiisuusorujussuupput. Aappariit ilaqutariinnit assigiinngitsuneersuugamik pinngitsooratik pissutsinik isiginnittaatsimikkut assigiinngissuteqartarput.

Biibilimi oqaluttuat ilaannit tamanna takutinneqarpoq. Angerutsip illerfia Jerusalemimut oqqunneqarmat Davidip tamatuminnga nuannaarutiginninnini ersersippaa. Nuliatami Mikalip? Biibilimi oqaluttuarineqarpoq: „Mikalip Saulip paniata igalaakkut itsuarluni takugamiuk Daavi [Jehovap] saani pississaartoq qamuuna narrutsaappaa.“ — 2 Samuel 6:14-16.

Mikal ataatamisut iluaatsutut Saulitut isummamik ilumuunngitsumik ersersitsivoq. Biibilimik nassuiaasartut C. F. Keil aamma F. Delitzsch isumaqarput tamannarpiaq pissutaasoq Mikalip versi 16-imi Davidip nuliatut pinnani „Saulip pania“-tut eqqaaneqarneranut. Aammami Davidip Mikalillu oqaloqatigiinneratigut erserpoq pisumut nuannersumut assigiimmik isiginninngitsut. — 2 Samuel 6:20-23.

 Tassuunakkut erserpoq alliartornermi sunnerneqarsimaneq uiusup nuliaasullu pissutsinik assigiinngitsumik isiginnittaaseqarnerannut pissutaasinnaasoq. Aamma taamaappoq tamarmik Jehovamut kiffaagaluarunilluunniit. Assersuutigalugu nuliaasoq meeraagallarami misigissutsikkut naammattumik annertoqqusersugaasimanngitsoq paasineqarnissaminik asaneqarlunilu misigitinneqarnissaminik pisariaqartitsisorujussuusinnaasarpoq. Tamanna uiusup paasiuminaatsissinnaavaa. Immaqa oqartarpoq: „Minnerpaamik hundrederiarlunga oqarfigisinnaasarpara asallugu, naammannerli ajorpoq!“

Tamatumunnga atatillugu attaveqatigiinnermut ’namminissaq pinnagu, kisianni allattaaq iluaqutissaannik pisarnissaat’ ilaavoq. (Filípimiut 2:4) Attaveqatigiissinnaajumallutik uiusup nuliami, namminiunngitsoq, inuunerisimasaa tunngavigalugu isigisinnaasariaqarpaa. Soorunami aamma nuliaasoq uiminut taamaaliorsinnaasariaqarpoq. — 1 Korintumiut 10:24.

Aappaasoq atornerlunneqarsimappat

Ingammik aappaasoq meeraatilluni pinngitsaalisaalluni atoqatigineqarsimappat kinguaassiuutitigulluunniit atorneqarlunneqarsimappat, ajoraluartumimmi ullutsinni tamanna suli ajornartorsiutaaqimmat, inuttut soqutiginninnermik ersersitsivigisarnissaa pingaaruteqartorujussuuvoq. Imaassinnaavoq nuliaasup uinilu atoqatigiinnerminni qanga pisimasut maannakkullu pisut, uini imminillu arneriffiginnissimasoq, imaluunniit uinilu atoqatigiinnertik kinguaassiuutitigullu atornerlunneqarsimanini immikkoortissinnaajunnaartarai. Tamanna, ingammik uiusup nuliani paasinniffiginngippagu, isumatsannarsinnaasorujussuuvoq. — 1 Pîtruse 3:8.

Qanga pisimasut allanngortinneqarsinnaanngillat kinguneriluunniit peerluinnarneqarsinnaanatik, aapparli aliasuttoq tuppallersarniarlugu iliuuseqartoqarsinnaasorujussuuvoq. (Ussatit 20:5) Qanoq? „Ilissi uiususi nuliasi inooqatigisasi paasinniffiginiartariaqarpasi,“ Peter allassimavoq (1 Pîtruse 3:7, Phillips) Aapparisap inuunerisimasaanik paasinninneq attaveqatigiinnermut ilaavoq pingaartoq. Qamannga misiginneqatiginnissuseqanngikkaanni oqaatsit naleqarnavianngillat.

Jesusip inuit napparsimasut takuleramigit ’nalligingaalersimavai’, naak nammineq timimigut taakkua nappaataat misigisimanngisaannarluarlugit.  (Matîuse 14:14) Immaqa aamma illit paarinerlugaanermik atornerlunneqarnermilluunniit misigisaqartinneqarsimanngilatit, nulialli taamatut misigisaqarsimappat aliasuutai nikassaaviginiassanngilatit, qangali inuunerisimasaa pillugu paasinniffiginiaruk annertoqqusersorlugulu. (Ussatit 18:13) Paulus ima allassimavoq: ’Uagulli sanngisuusugut sanngiitsut qajannassusiisigut kamagissavavut namminerlu nuannarisatsinnik iliornata.’ — Rûmamiut 15:1.

Puttarsisaqarnerup navianaataa

Aappariinneq naasulivittut taarserneqarsinnaanngitsutut ippoq. Allasiornerup kikineqalersissavaa, asuinerlu tamanna annertoorujussuuvoq. (Ussatit 6:32) Aappaasoq pisuussuteqanngitsoq isumakkeerfiginninniarluni aalajangerpat aappariit saammaateqatigiinneratigut kikineq nipitinneqarsinnaavoq. Quppaali takuneqarsinnaajuassapput, oqqannermilu quppat tamakku eqqaaqqajaaneqarsinnaasarput qangalu pisimasut sakkutut atorneqaqqajaasarlutik.

Aappap allasiorneranik anniaatiginninneq qisuarneruvoq pissusissamisoortoq. Aappalli isumakkeerfigereersimagukku isumakkeerfiginninnikkut angusimasarsi pitsaasoq kamassimaninnik aserortoornissaa sianigisariaqarpat. Kamannerit malugineqarnak illit nammineq pigiinnaraluarukkuluunniit imaluunniit aqussinnaanagu anikkaluarukkuluunniit kingusinnerusukkut tamassinnut ajoqutaaginnassaaq. Sooq? Nakorsap isuma manna saqqummiussimavaa: „Aappannit annersinneqartutut misigiguit, taava suli asasimassavat. Taamaattumik aappat matuffigigukku imaluunniit akiniarukku ajuallatsiinnassanngilat aammali imminut aseruutissiinnassaatit. Ataqatigiinnerup aseqqoqartikkusunngisaraluavit suli aseqqoqarnerulernissaanut pisooqataassaatit.“

Aap, kamanneq nunusinnaanngikkaanni aappariinnermi assigiinngissutit naapiffissarsinissaat ajornarluinnarpoq. Taamaattumik, piffissami aappariit tamarmik saammisaarfianni, qanoq misigineq oqaloqatigiissutigisariaqarpoq. Nassuiaruk sooq ikilerneqartutut misiginerlutit, suut pingaartinneqartutut misigitissinnaagaatsit, aappariinersilu sernissorniarlugu qanoq iliuuseqalersaarnerlutit. Qanga pisimasut oqqannermi sakkutut atunngisaannakkit.

Attaveqatigiinnerliortitsisut

Aappaasoq ikiaroornartumik imaluunniit imigassamik atornerluisuuppat aappariinneq artorsartinneqartarpoq. Aappaasoq atornerluisuunngitsoq immaqa Abigajilitut, Biibilimi eqqaaneqartutut, atugaqarpoq. Uini Nabal ’aalakooqisoq’ Abigajilip ilungersoqaluni uimi ileqqupalaavata kingunipilussai pinaveersimatinniarsarisimagaluarpai. (1 Samuel 25:18-31, 36) Aappaasoq atornerluisuuppat  aappaalu aapparmi ileqqupalaavanik allanngortitsiniaalluni ilungersortuuppat, Nabalip Abigajilillu atugaannut eqqaanartumik atugaqarsimassapput. *

Soorunami atornerluisoq iluarsiartuleraangat oqiliallannartaqaaq. Tamannali aallaqqaataannaavoq. Takorlooriaruk anorersuaq kaavittuliortoq illoqarfeerannguamik aseruisoq. Illut uppikaapput, orpiit sorlatik ilanngullugit uppikaapput, oqarasuaatit aqqutaat uppikaapput. Anorersuaq qaangiummat nuannaarneqaqaaq. Kingornatigulli iluarsagassarpassuaqarpoq. Aamma taamaappoq aappaasup atornerluinini taamaatikkiartuaaraangagu. Ataqatigiinneq aserorneqarsimasoq sanaqqinneqartariaqarpoq. Tatigeqatigiinneq pilerseqqinneqartariaqarpoq. Attaveqaatit kittorarsimasut iluarsaanneqartariaqarput. Atornerluisumut ilorraap tungaanut ingerlalersimasumut allanngoriartuaarneq taamaattoq tassaavoq ’inuttaap’, kristumiut ineriartortitassaattut Biibilimi piumasarineqartup, ilaa. Inuttaamut tamatumunnga ’isumakkut ingerlatitsisoq’ ilaasariaqarpoq. — Evfisumiut 4:22-24, (NV).

Biibilimik atuaqqissaartalernertik iluaqutigalugu Leonardip Elainellu ikiaroornartumik atornerluinertik taamaatissinnaasimavaat, isumakkulli ingerlatitsisumut atatillugu suli amigaateqarput *. Sivitsunngitsoq atornerluinerit allat qaffakaapput. „Ukiuni 20-ni Biibilimi najoqqutassiat malinniarsarisimagaluarpavut, iluatsilluanngisaannarporli,“ Elaine oqaluttuarpoq. „Pinngitsoorsinnaasimanngisavut uatsinni sorlanilluinnarsimagamik. Qinunikkut atuaqqissaarnikkulluunniit katassinnaasimanngilavut.“

Atornerluinerminnut assigiinngitsunut suna pissutaanersoq paasiniarlugu Leonard Elainelu siunnersuutinik unnersuussutinillu ujaasilerput. Meeqqanik atornerluineq, imerajuttuuneq arnanillu ataqqinninneq pillugit ’inussiaq aalajaallunilu silatuumit’ piffissaasukkut paasissutissat ingammik iluaqutigisimavaat. * (Matîuse 24:45-47) „Ajoqusikkat iluarsaannissaannut ataqatigiinnittalu sanaqqinnissaanut ikiuutissanik pissarsisimavugut,“ Elaine oqaluttuarpoq.

Ajornartorsiutit aaqqinniartarsigik

Rebekkap ernermi Esauip nuliarpassui aliasuutigisimaqai. Annilaanngatigaa ernermi aappaata, Jakobip, Esauip maligassiaa malissagaa, tamannalu pillugu Isakimut ima oqarsimavoq: „Hetikkut arnartaat pissutaallutik inuunera uannut avaanngunarsilerpoq. Taamaattumik aamma Jaaku Hetikkut maanimiut paniisa ilaannik nuliartaaraluarpat taava toquinnaruma pitsaanerussaaq.“ — 1 Moses 27:46.

Malugiuk Rebekkap misigissutsini isertuanngivilluni oqaluttuarigai, taamaattorli Isak saassunnagu. Oqanngilaq: „Aamma illit pisuussutigaat!“ imaluunniit „Iliuuseqarnerusimasariaqaraluarputit!“ Aap, ajornartorsiutip imminut qanoq attuinera ’uanga’-mik oqartarluni oqaluttuaraa. Taamatut periuseqarneratigut Isakip nikanarsarneqarnissaminik pinaveersimatitsinissaa pisariaqanngilaq; akerlianilli misiginneqatigaa. Isak saassunneqartutut misiginngilaq qularnanngitsumillu Rebekkap kajumissaarineratigut erniinnaq qisuariarluni. — 1 Moses 28:1, 2.

Uiusut nuliaasullu Rebekkap maligassiaa ilinniarfigilluarsinnaavaat. Ajornartorsiummik takkuttoqaraangat ajornartorsiut  saassuttariaqarparsi, immissinnut saassunnasi. Rebekkatut nammineq ajornartorsiummit qanoq attorneqarneq ersersittariaqarpoq. „Pakatseqaanga, pissutigalugu . . .“ imaluunniit: „Misigivunga paasinerlunneqarlunga, pissutigalugu . . .“ imatut oqarnissamit pitsaanerupput: „Pakatsiseqaarma!“ imaluunniit: „Paasinngisaannarparma!“

Peqatigiilluarnerinnaq naammanngilaq

Inuit siulliit, Adam Evalu, ukiuni hundredelikkuutaani aappariittut inooqatigiissimapput, ernertaartarlutillu panissaartarlutillu. (1 Moses 5:3-5) Tamannali immini isumaqanngilaq maligassaalluartumik aappariissimasut. Siusissukkut naalagaaffigineqarusunngissutsip anersaava Pinngortitsisullu inatsisaanut ataqqinninnginneq aappariinnerannik aserueqataasimapput.

Taamatuttaaq ullumikkut aappariinneq attaveqatigiinnikkut pingaaruteqartunik amigaateqarfiugaluartoq immaqa atasinnaasarpoq. Tamanna pitsanngorsassagaanni isummat pigiliutiinnarsimasat pissusiluutillu allanngortinniartariaqarput. (Naleqqiuguk Korintumiunut agdlagkat áipait 10:4, 5.) Tamanna tassaavoq ilinniagassaq ataavartoq. Imminulli akilersinnaavoq. Jehovap aappariinneq, nammineq pilersissimasani, soqutigisorujussuuaa. (Malaki 2:14-16; Eprîarit 13:4) Taamaattumik nammineq iliuuseqarutta qularutigissanngilarput ilungersornivut akuersaarluni isigiumaarai, aappariinnittalu iluani attaveqatigiinnikkut ajornartorsiuteqarutta aaqqinniarnissaanut nakussatsillutalu ilisimassummik tuniumaaraatigut. — Naleqqiuguk Tussiaat 25:4, 5; 119:34. (wD 1/8 93)

[Quppernerup ataani ilanngussat]

[Qupp. 6-mi ungalusaq]

„Piffissarput igitassanut atornerusimavarput!“

AAPPARIIT aappariinnerminni ajornartorsiuteqartut missiliuusseqquneqarsimapput sapaatit-akunneri tamaasa eqqaavimmik igitsiartornermut piffissaq qanoq annertutigisoq atortarneraat. Akisimapput sapaatip-akunneranut 35 minuttit missaanniittartoq, imaluunniit ullormut 5 minuttit. Taava aperineqarsimapput piffissaq qanoq annertutigisoq oqaloqatigiinnermut atortarneraat. Uiusoq tupaallalluni nillersimavoq: „Piffissarput igitassanut atornerusimavarput! Immitsinnut salloqittassaagut isumaqarutta ullormut minuttit tallimat aappariinnitta atatiinnarnissaanut naammattut. Aappariinnerup pitsanngortinnissanulluunniit naammaqqajanngillat.“

[Qupp. 7-mi ungalusaq]

Tunngaviusunik maleruagassalioritsi

□ Oqaluuserisassat ataasiakkaarlugit oqaluuserisarsigit (1 Korintumiut 14:33, 40)

□ Isummatit saqqummiuttakkit; pisuutitsiniaanaveersaartarit (1 Moses 27:46)

□ Patittaanaveersaartarit (Evfisumiut 5:28, 29)

□ Nikassaataasunik aappat aterusersortassanngilat (Ussatit 26:20)

□ Isumaqatigiinnissarsi anguniartarsiuk, aappassinnut ajugaanissarsi pinnagu (1 Moses 13:8, 9)

[Qupp. 4-mi assiliartaq]

Ajornartorsiummik takkuttoqarpat immissinnut saassunnasi ajornartorsiut saassunniarisiuk

[Qupp. 9-mi assiliartaq]

Misigissutsitit isummatillu saqqummiuttakkit; pisuutitsiniaanak