Ilisimasaqarnikkut alliartorniaritsi

„Uppersutsissigut . . . ilisarsiartorniaritsi.“ — 2 PÎTRUSE 1:5.

1, 2. (a) Qilak qiviarukku sumik illiniarsinnaavit? (Rûmamiut 1:20) (b) Inuit ilisimasaqarnikkut qanoq siumukartigisimappat?

UNNUAMI allaaqqissumi qaammatigik ullorissallu kisissaanngitsut qimerloorukkit sumik ilikkagaqassavit? Tamakkuninnga tamanik Pinngortitsisoq pillugu ilikkagaqarsinnaassaatit. — Tussiaat 19:2-7; 69:35.

² Ilikkagaqarnerorusukkuit illorpit qaavanut majuassavit qaninnerusumit isiginnaarumallugit? Naamik. Albert Einstein  ilaanni taama assersuusiorsimavoq takutinniarlugu ilisimatuut ilumut silarsuaq avataaniittullu pillugit ingammillu tamakkuninnga Pinngortitsisoq pillugu ilisimasatik qanoq annikitsigigumik allisissimagaat. * Tamatumunnga assingusumik Dr. Lewis Thomas ima allassimavoq: „Ukiuni hundrelinni makkunani ilisimatuussutsikkut angusaqarluarfiunerpaasuni ilisimatuut paasisimasaasa pingaarnerpaartaat tassaavoq qanoq ilisimasakitsigisugut; pinngortitat pillugit ilisimasakeqaagut tamakkuninngalu paasinninnerput suli minnerulluni.“

3. Ilisimasaqarnerulerneq qanoq ililluni erloqinermik nassataqarsinnaava?

³ Allaat inuunerpit sinnera ilisimasassarsiornermut atoraluarukku paasiinnassavat inuuneq qanoq sivikitsigisoq. Paasilissavat inuup ilisimasaminik atuinissaminut periarfissai naammalluinnanngissutsiminit silarsuullu matuma ’ajorsusianit’ killilerneqartartut. Salomonip tamanna tikkuarpaa ima allakkami: „Ilisimassuseqarpallaarnermi naalliunnartorpassuarnik nassataqaannartarpoq ilisimasaqarnerulernerlu erloqinermut ilasaataaginnarluni.“ (Nalunaajaasup oqaasii 1:15, 18) Aap, Guutip siunertaa nalullugu ilisimasaqarnerulerniarneq naalliunnermik erloqinermillu nassataqarajuttarpoq. — Nalunaajaasup oqaasii 1:13, 14; 12:12; 1 Timûtiuse 6:20.

4. Sumik ilisimasaqarnerujumasariaqarpugut?

⁴ Ima paasisariaqarpa ilisimasaqarnerulerniarneq Biibilimi siunnersuutigineqanngitsoq? Apustili Peter ima allassimavoq: ’Naalagarpulli annaassiserput Jesus Kristus ilisimajartorlugulu saammaanneqarfigiartorsiuk. Taassuma naalannassuseq pigaa maannalu ullorlu naassaanngitsoq tikillugu.’ (2 Pîtruse 3:18) Ilisimasaqarnerujartornissamut kajumissaarut tamanna maleruarsinnaallugulu maleruartariaqarparput. Ilisimasaqarnerli suna pineqarpa? Qanoq ililluta ilisimasaqarnerulersinnaavugut? Taamaaliulereernerpugullu?

5, 6. Peterip qanoq erseqqissarpaa ilisimasaqartariaqartugut?

⁵ Silarsuarmik avataaniittunillu Pinngortitsisoq Jesusilu pillugit, ilisimasaqarnerujartornissaq tassaavoq Pîtrusip agdlagaisa áipait-ni eqqartorneqartut pingaarnerusut ilaat. Aallaqqaasiutitut ima allassimavoq: ’Saammaannarsingaarlusi eqqissingaaritsi Guutimik Naalakkatsinnillu Jesusimik ilisarsinikkut. Taassuma Guutiusup pissarsuup inuussutissanillu mianerinnissutissanillu tamanik tunimmatigut naalannassutsimigut ajunngingaarsutsimigullu qaaqqusisitsinnik ilisarsinikkut.’ (2 Pîtruse 1:2, 3) Taamaalilluni saammaanneq eqqissinerlu Guuti taassumalu ernera pillugit ilisimasaqarnermut Peterip attuumassuteqartippai. Tamanna pissusissamisuuginnarpoq Pinngortitsisoq, Jehova, ilisimasaqarnermut piviusumut aallaaviummat. Guutimik mianerinnittup pissutsit eqqortumik paasisinnaavai eqqortumillu isummersinnaalluni. — Ussatit 1:7.

⁶ Nangilluni Peter ima kajumissaarivoq: ’Tamannami ilungersuutigingaarlugu uppersutsissigut ileqqorissiartorniaritsi, ileqqorillusilu ilisarsiartorniaritsi, ilisarsillusilu illigutsannaveersaaritsi, illigutsannaveerlusilu nikallujuigitsi, nikallujuillusilu Guutimik mianerinninniaritsi, Guutimillu mianerinnillusi qatanngutisi asaniarsigik, qatanngutisilu asallugit tamanik asanninniaritsi. Tamakkumi ilissinniippata alliartorlutillu Naalakkatsinnik Jesus Kristusimik ilisarsinissigut eqiattarniassanngilasi pilussinnarnaviassanasilu.’ (2 Pîtruse 1: 5-8) * Kapitalimi tulliuttumi atuarpugut ilisimasaqalerniarneq iluaqutigalugu inuit silarsuup mingunnartuinik ingalassimanninniarsinnaasut. (2 Pîtruse 2:20) Taamaalilluni Peterip erseqqissarpaa kristumiunngortut Jehovamillu kiffartortunngoreersimasut tamarmik ilisimasaqalernissartik pisariaqartikkaat. Illit taakkua ilagaatsit?

Ilinniarit, uteqqiigit, atuigit

7. Inuppassuit qanoq ilillutik ilumoortut tunngaviunerusut Biibilimeersut pillugit eqqortumik ilisimasaqalersimappat?

⁷ Immaqa Jehovap nalunaajaasuinik Biibilimik atuaqqissaaqateqartarputit, misigigavit tusarliussaat ilumoortuusoq. Immaqa sapaatit-akunneri tamaasa nalunaaquttap-akunnerata ataatsip missaani sammisassaq aalajangersimasoq Biibilimut tunngasoq misissortarpat atuagaq Biibililersaarut, soorlu pâratîsime nuname nâgssáungitsumik inûsínauvutit, ikiortigalugu. Ajunngeqaaq! Jehovap nalunaajaasuisa atuaqqissaaqatigisimasaat amerlasuut eqqortumik ilisimasaqalersimapput. Qanorli iliorsinnaavit ilisimasaqarnerulerumallutit? Aajuku siunnersuutit ilaat: *

8. Atuaqqissaaqatigiinnissamut piareersarniaraanni qanoq ililluni ilikkagaqarnerusinnaava?

⁸ Atuaqqissaaqatigiinnissamut piareersaraangavit sammineqartussaq tamakkerlugu qimerluuataaqqaartaruk. Kapitalip qulequtaa, immikkoortunut qulequtat assilissallu misissortakkit. Taava immikkoortoq atuaraangakku eqqarsaatit pingaarnerit allassimaffiillu uppernarsaataasut nanisakkit, ataatigullu titarlugit. Paasiniarlugu ilumoortut sammineqartut paasisimanerlugit immikkoortunut apeqqutissat akiniartakkit. Nammineq oqaatsitit atorlugit akiniartarit. Kiisalu naggataatigut atuarsimasatit uteqqittakkit eqqarsaatit pingaarnersat tunngavigisallu eqqaaniarsaralugit.

9. Atuaqqissaarnermut tunngatillugu siunnersuutit maleruaraanni qanoq ilinniarnissamut ikiuutaassava?

⁹ Siunnersuutit tamakku maleruarukkit ilisimasaqarnerulernissat ilimagisinnaavat. Sooq? Ilaatigut atuagassatit sammigakkit ilumoorlutit ilinniarusussuseqarlutit, ilinniarnissannut piareerssimalluarlutit. Atuagassat ataatsimut qimerluuataareeraangakku taamaalillutillu pingaarnersat tunngaviillu nanillugit takusinnaalissavat qanoq immikkuualuttut qulequttamut inaarutaasumillu isummernermut attuumassuteqartut. Naggataatigut uteqqiinerup ikiussavaatit atuarsimasatit eqqaamaqqullugit. Taavami kingorna, Biibilimik atuaqqissaarnermi?

10. (a) Paasissutissat nutaat alanngaarlugit oqaatiginerat sooq iluaqutaavallaanngila? (b) Akuttoriartortumik eqqaamanninniarneq qanoq paasisariaqarpa? (c) Israelikkut akornanni ernerit qanoq uteqqiineq iluaqutigisinnaasimavaat?

¹⁰ Ilinniartitsinermik suliaqartut nalunngilaat uteqqiinerup siunertaqarluartup iluaqutaassusia. Tassaannaanngilaq oqaatsinik alanngaarniarneq, soorlu immaqa atuarfimmi atuarallaravit atit paasissutissallu alanngaarnissaat ilinniarniartarsimagitit. Immaqa taamanikkut alarlugit ilinniarsimasatit erniinnaq puiortarpatit. Sooq taamaappa? Oqaatsinik paasissutissanillu nutaanik alanngaarlugit ilinniarneq qasunarsinnaammat, inerneralu sivikittarmat. Tamanna qanoq ililluni allanngortinneqarsinnaava? Ilumoorluni ilinniarusussuseq alliartortinneqarsinnaavoq. Aamma siunertaqarluartumik  uteqqiisarneq iluaqutaassaaq. Ilikkakkat aalajangersimasoq puioriartuaalinnginnerani minuttialuit kingorna eqqaamaniarlugu uteqattaartaruk. Ilikkagaq akuttunngitsumik uterfigeqqittarneratigut sivisunerusumik eqqaamaneqarsinnaavoq. Israelitoqqami ataataasut Guutip peqqussutai ernerminnut nangeqqittuartartussaasimavaat. (5 Moses 6:6, 7) ’Nangeqqiiuarneq’ tassaavoq uteqqiilluni ilinniartitsineq. Qularnanngitsumik ataataasut taakkua ilarpassuisa siullermik inatsisit ernerminnut saqqummiuttarpaat; kingorna paasissutissat tamakku uteqqittarpaat; taavalu ernertik ilinniarsimasai pillugit apersortarpaat.

11. Biibilimik atuaqqissaaqatigiinnerup ingerlanerani qanoq ililluni ilikkagaqarnerusoqarsinnaava?

¹¹ Nalunaajaasup Biibilimik atuaqqissaaqatigisarunisit ilinniarnissannut ikiorsinnaavaatit atuaqqissaaqatigiinnerup ingerlanerani ilinniarsimasatit siuariartortumik ataatsimut eqikkartarlugit. Taamaaliorneq meerarpalunnerunngilaq. Tassaavoq ilinniartitsineq pitsaanerulersinniarlugu periaaseq, taamaattumik uteqqiinerit nuannaarlutit peqataaffigisakkit. Taava atuaqqissaaqatigiinnerup naalernerani uteqqiinermi eqqaamasatit malillugit akisarit. Nammineq oqaatsitit atorlugit sammisimasatit nassuiarsinnaavatit, inuk alla ilinniartillugulusooq. (1 Pîtruse 3:15) Taamaalillutit ilinniarsimasatit sivisuumik eqqaamasinnaassavatit. — Naleqqiukkit Tussiaat 119:1, 2, 125; 2 Pîtruse 3:1.

12. Atuartup qanoq ililluni eqqaamasinnaanini pitsaanerulersissinnaavaa?

¹² Aamma iluaqutigissavat aqaguani aqaguaguaniluunniit ilinniarsimasatit inummut allamut, soorlu atuaqatinnut, suleqatinnut sanilinnulluunniit, oqaluttuarisarukkit. Eqqartorsimasarsi taasinnaavat taavalu oqarsinnaallutit paasiniaannarlugu tunngavilersuutit pingaarnerusut allassimaffiillu Biibilimeersut tunngaviusut ilinniarsimasatit eqqaamasinnaanerlugit misiliinnarlugu. Tamatuma alla soqutiginnittunngortissinnaavaa. Taamaanngippallu ullualuit kingorna paasissutissanik nutaanik uteqqiinerpit eqqaamasinnaatissavaatit. Taava ilikkarluarsimassavatit, soorlu 2 Pîtruse 3:18-imi kajumissaarineqartoq.

Ilinniarniarluni iluuseqarneq

13, 14. Sooq paasissutissanik ilikkarneq eqqaamanninnerlu naammaginagit siumukarniartariaqarpugut?

¹³ Ilinniarneq tassaannaanngilaq paasissutissanik ilikkagaqarneq imaluunniit eqqaamasinnaaneq. Jesusip nalaani upperisarsiornikkut siuttut taamaaliortarsimapput qinoqattaarlutik. (Matîuse 6:5-7) Paasissutissanilli qanoq sunnertippat? Naapertuilluartunik inerititaqarnerpat? Naamik. (Matîuse 7:15-17; Lúkarse 3:7, 8) Ilaatigut ajornartorsiutaavoq ilinniakkatik pigiliutinnginnamikkik taamaattumillu uummatimikkut ajunngitsumik sunnertinnatik.

¹⁴ Peterip oqaasii naapertorlugit kristumiut taamaassanngillat, taamanikkut maannakkullu. Taassuma kajumissaarpaatigut uppernitsinnut ilisimasaqarneq ilannguteqqullugu, ’eqiattaqqunata pilussinnaqqunatalu’. (2 Pîtruse 1:5, 8) Taamaaliussagutta ilisimasaqarnerulerumasariaqarpugut ilutsigut sunnertilluta. Immaqali tamatigut taammaattanngilaq.

15. Hebriiarit kristumiuusut ilaat suna ajornartorsiutigisimavaat?

¹⁵ Paulusip nalaani kristumiut hebriiarit tamanna ajornartorsiutigaat. Juutiugamik Allakkat nalunngikkaluarpaat. Jehovamik taassumalu peqqussutaanik ilisimasaqarput. Kingorna Messias pillugu ilisimasaqalerput, upperlutillu kristumiutut kuisillutik. (apustilit suliait 2:22, 37-41; 8:26-36)  Qaammatit ukiullu ingerlaneranni kristumiut ataatsimiinnerinut najuuttarsimapput, tassani allassimaffiit atuarneqarnerat oqaaseqarfigineqarnerallu peqataaffigisinnaasarlugit. Kisianni taakkua ilaat ilisimasaqarnikkut alliartorsimanngillat. Paulus ima allassimavoq: ’Qangalimi ajoqersuisunngorunnarsissagaluarlusi Guutip oqaasiisa ilinniaqqaariaqartortaannik kingumut ajoqersoriaqalerpusi immummillu pisariaqalerlusi, nerisassaq mattusooq sapilerassiuk.’ (Eprîarit 5:12) Sooruna? Uaguttaaq taama pisinnaavugut?

16. Issoq qeriuaannartoq sunaava, naasullu tamatumannga qanoq sunnertittarpat?

¹⁶ Assersuutigalugu, nunami issittumi issoq qeriuaannartoq eqqarsaatigeriaruk. Issoq, qaarsut nunallu iluata ernga qajannaatsunngorlutik qeripput, ilaannikkut 900 meterinik itissuseqartumut allaat. Aasakkut qaava kisimi aattarpoq, kisianni issoq qalliusoq issunngitsoq tamanna amerlanertigut masarsuusarpoq erngup issoq alleq qerisimasoq pitarsinnaanngimmagu. Issumi tamatumani naasut amerlanertigut mikisuusarput naggorlullutilluunniit; sorlaasa issoq qerisimasoq pitarsinnaanngimmassuk. Immaqali oqarumassaatit: ’Issup qerisimanera uanga Biibilimik ilisimasaqarnikkut alliartorninnut qanoq attuumassuteqarami?’

17, 18. Issoq qerisoq qallersaalu qanoq assersuutigineqarsinnaava hebriiarit kristumiuusut ilaasa pissuserisimasaannut?

¹⁷ Issumik qerisimasumik assersuusiakkut paasilluarneqarsinnaavoq qanoq ililluni inuk eqqortumik ilisimasaqalerniarluni, tamakkuninngalu eqqaamanninniarluni atuiniarlunilu iliuuseqarluanngitsoortartoq. (Naleqqiuguk Matîuse 13:5, 20, 21.) Inuk taanna assigiinngitsut, aamma sallusuissut Biibilimeersoq, ilinniassallugit piginnaassuseqaraluarpoq. ’Guutip oqaasiisa ilinniaqqaariaqartortai’ misissorsimavai kuisinnissamullu piukkunnarsisimalluni, soorlu hebriiarit kristumiut taamaaliorsimasut. Immaqali ’Kristusimik ajoqersuutaasut aallaqqaataat qaangiinnarlugit inersimassummut ingerlasimanngilaq’. — Eprîarit 5:12; 6:1.

 ¹⁸ Takorlooriakkit taamanikkut kristumiut ilaat ataatsimiittut. Najuupput eqqumallutillu, aallussillutilli ilinniarpat? Ilungersorlutik ilisimasaqarnerujartorpat? Immaqa naamik. Inersimalluanngitsut ataatsimiinnerni peqataagaluaraangamik isumap qallersaa ’qerisimanngitsoq’ kisiat atortarpaat. Itinerusumi isuma qerisimasutut ippoq. Ilumoortut paasiuminaannerusut sorlaat isumamut qerisimasumut isersinnaanngillat. — Naleqqiuguk Jesaja 40:24.

19. Ullumikkut kristumiu misilittagalik qanoq ililluni hebriiarit kristumiuusut ilaattut ilersinnaava?

¹⁹ Ullumikkuttaaq kristumiu taamaassinnaavoq. Ataatsimiinnerit najuuffigisaraluarlugit immaqa ilisimasaqarnerulernissaminut periarfissat tamakku atorneq ajorpai. Sooq tamaviaarluni peqataasanngila? Soqutiginnittunngorlaamut inuusuttumulluunniit allassimaffimmik atuaaniarluni nappaaneq imaluunniit allassimasut maliinnarlugit akineq imminut naalakkernermik pisariaqartitsisinnaavoq ersiutaassallunilu piginnaasaminik ajunngitsumik nersornartumillu atuineranut. Paulusilli takutippaa sivisuumik kristumiooreersimasut ilisimasaqarnerujartuinnarumagunik aallartiffik qaangertariaqarpaat. — Eprîarit 5:14.

20. Tamatta qanoq imminut misissortariaqarpugut?

²⁰ Kristumiu misilittagaqartoq allassimaffimmik atuffassiinnartaruni imaluunniit akissutissaminik atuaaginnartaruni immaqa isummami ’qaaginnaa’ atussavaa. Ataatsimiinnerpassuit najuuffigisaraluarlugit isumaata itinerusortaa qerisimajuaannarporlusooq, issumik qerisimasumik assersuut eqqartussagutsigu. Immitsinnut ima aperisinnaavugut: ’Uanga taamaappunga? Isumakkut qerisimavunga? Isumakkut eqqumavunga ilinniarusussuseqarlungalu?’ Naak tamakkununnga akissutissavut ilumoortut iluarinngikkaluarlugit ilisimasaqarnerunissatsinnut iliuuseqalersinnaavugut.

21. Ataatsimiinnernut piareersarneq peqataanerlu eqqarsaatigalugit siunnersuutit suut sammisimavavut?

²¹ Tamatta immikkoortoq 8-mi siunnersuutit maleruarsinnaavavut. Qanorluunniit sivisutigisumik ilagiinnut ilaasimagaluarutta aalajangersinnaavugut inersimalluarnissamut ilisimasaqarnerunissamullu siumukarniarluta. Immaqa eqiasuinnerulluta ataatsimiinnissanut piareersartalersinnaavugut, ukiullu arlallit matuma siorna ileqqorisimagaluakkavut pitsaasut immaqa katakkiartuaarsimasavut nangeqqillugit. Piareersartillutit suut pingaarnerunersut allassimaffiillu nalusatit atorneqaraangata paasiniartakkit. Atuagassanni eqqarsaatit nutaat ujarniakkit. Aammalu ataatsimiinnerup ingerlanerani immikkoortoq 10-mi 11-milu siunnersuutit maleruarniakkit. Isumakkut eqqumaniarit, isumat ’kiassaruk’. Taamaalillutit isumavit ’qerisimanera’ akiorsinnaavat ’qerineralu’ aatsikkiartulersinnaallugu. — Ussatit 8:12, 32-34.

Ilisimasaqarneq, inerititaqarnissamut ikiuut

22. Ilisimasaqarnerujartornissatsinnut suligutta qanoq iluaqutigiumaarparput?

²² Naalagarput annaassiserpullu Jesus Kristus saammaanneqarfigiartorutsigu ilisimajartorlugulu qanoq iluaqutigiumaarparput? Tamaviaarluta isumakkut eqqumagutta, ilisimasaqarnissatsinnut piareersarutta Biibilip ilumoortortai paasiuminaannerusut isumatsinni sorlanilluassapput paasisaqarnerpullu alliartussaaq atajuassallunilu. Tamanna Jesusip assersuusiami allami uummatit pillugit oqaatigisaanut naleqqiunneqarsinnaavoq. (Lúkarse 8:5-12) Naatsiiassat issorissumut tussimasut sorlanilluarsinnaapput naagunillu  inerititaqarluarsinnaallutik. — Matîuse 13:8, 22.

23. 2 Pîtruse 3:18 maleruarutsigu qanoq kinguneqarsinnaava? (Kulorsamiut 1:9-12)

²³ Jesusip assersuusiaani tassani alla pineqaraluarpoq, kingunerili ajunngitsut Peterip neriorsuutigisimasaanut assingupput: ’Tamannami ilungersuutigingaarlugu uppersutsissigut ileqqorissiartorniaritsi, ileqqorillusilu ilisarsiartorniaritsi . . . Tamakkumi ilissinniippata alliartorlutillu Naalakkatsinnik Jesus Kristusimik ilisarsinissigut eqiattarniassanngilasi pilussinnarnaviassanasilu.’ (2 Pîtruse 1:5-8) Aap, ilisimasaqarnerulerutta inerititaqassaagut. Misigiumaarparput ilisimasaqarnerulerniarneq nuannersuusoq. (Ussatit 2:2-5) Ilinniarsimasatit eqqaamalluassavatit, iluaqutigissallugillu allat ajoqersuganngortinniarlugit ilinniartikkaangakkit. Taamaalillutittaaq inerititaqarluarnerussaatit Guutip erneratalu ataqqinnaatissaannut. Peterip allakkami aappai naavai ima allalluni: ’’Naalagarpulli annaassiserput Jesus Kristus ilisimajartorlugulu saammaanneqarfigiartorsiuk. Taassuma naalannassuseq pigaa maannalu ullorlu naassaanngitsoq tikillugu.’ — 2 Pîtruse 3:18. (wD 15/8 93)

[Quppernerup ataani ilanngussat]

Eqqaamasinnaavigit?

□ Sooq ilisimasaqarnerunissat soqutigisariaqarpiuk?

□ Biibilimik atuaqqissaartalerlaap qanoq ililluni atuaqqissaarnini pissarsiffiginerusinnaavaa?

□ Issumik qerisimasumik assersuut eqqarsaatigalugu suna pinngitsoorusuppiuk?

□ Sooq ilisimasaqarsinnaanerit pitsaanerulersissallugu aalajangertariaqarpit?

[Atuaqqissaarnermi apeqqutit]

[Qupp. 18-mi assiliartaq]

Isumakkut qerineq ajornartorsiutigaara?