Imerajuttuuneq akiorlugu iluatsitsigit

„Ullaap tungaanut qulinngortoq sulitillunga imigassaq eqqarsaatigilertarpara. Ullup qeqqanut ataasinnguartoriartortarpunga. Pingasunut timera sajulertarpoq. Sulereerlunga soraarnissara erinigisaqaara najorseqqilaarniassagama. Angerlartillunga ataasinnguartoriartoqqittarpunga. Arfineq-marlunngulerpat imerusoqqilertaraanga. Imertarpunga silaarunnissara tikillugu, issiavimmit nakkartarlunga, qarlinnut quisarlunga ullaakkullu aatsaat itertarlunga. Ullut tamaasa, sapaatit akunnera naallugu, ukioq naallugu, ukiuni 29-ni taamaattuarsimavunga.“

QULAANI pineqartoq imerajuttuuvoq. Kisimiunngitsorlu imerajuttuuvoq. Silarsuaq tamakkerlugu inuit millionilikkuutaat taamatut inuunermut ulorianartumik pinngitsoorsinnaajunnaarneq, Dr. Vernon E. Johnson naapertorlugu inummut tamarmiusumut, timikkut, isumakkut anersaakkullu sunniuteqartoq, akiortarpaat.

Ilisimasakkaat amerlasuut isumaqarput imerajuttuuneq nakorsarneqarsinnaanngitsoq, inuunerli naallugu imernaveersaartuunikkut unitsinneqarsinnaalluni. Tamannalu tassaanngilaq piumasarisaq ingasappallaartoq,  imigassarmi inuunermut pisariaqavissuunngilaq. Imaappoq, imigassamik atornerluisut Guutip iluarinngilai. (1 Korintumiut 6:9, 10) Pitsaanerussaaq inuup Guutip silarsuassaa nutaaq imernaveersaartuulluni iserfigissappagu imigassanut nakkaannarluni inuuneq naassaanngitsoq annaanagu. — Matîuse 5:29, 30.

Imigassamik atornerluiunnaarniarneq artornarsinnaasorujussuuvoq. (Naleqqiuguk Rûmamiut 7:21-24.) Suut iluaqutaasinnaappat? Siunnersuutit ilaat sammeriartigik. Naak immaqa allaat imernerluunniit ajoraluarlutit siunnersuutit tamakku iluaqutigisinnaavatit qanigisannik ikinngutinnilluunniit imerajuttoqarpat akiuunnerani ikiuunnissannut.

Imminut ilumoortumik misissorneq

Akornutit ajugaaffigineqartussat ilaasa annerpaartaat tassaavoq imerajuttuunermik miserratiginninneq. Miserratiginninneq ilumuunnginnertut ippoq. Imersinnaanissat illersorniarlugu miserratiginninneruvoq. ’Ajornartorsiutigerujussuanngilara,’ immaqa imerajuttoq taama eqqarsartarpoq. ’Suli ilaqutaqarpunga. Suli suliffeqarpunga.’ Ilungersunarnerpaarli tassa: suli imigassamik ajornartorsiuteqarputit.

Miserratiginninnikkut immaqa ikinngutitit ikiuerusukkaluartut tusaanngitsuusaartarpatit. Robertip malugilersimavaa nuliami angutissaata imerpallaarneq ileqqorileraa soqqusaallillunilu. „Ullualuit tamatuma kingorna toqqaannartumik tamatuminnga oqarfigaara,“ Robert oqaluttuarpoq, „aperaaralu isumaqarnersoq imertarnera pissusilersortarneranut sunniuteqannginnersoq.“ Qanoq qisuariarpa? „Miserratigilluinnarpaa, ima oqarluni: ’Uppernarsaatissaqanngilatit’ aamma ’Qanoq misiginersunga naluippat.’“

Qanigisavit ikinngutivilluunniit imertarnerit isumakuluutigalugu ornippatit, imminut ilumoorfigalutit misissorniarna. (Ussatit 8:33) Imigassartornak sapaatip-akunnera ataaseq, qaammat ilivitsoq imaluunniit qaammatit arlallit atorsinnaavigit? Saperuit, taava sooq? Utoqqatsissutipalaat atorlugit imminut salloqittaqinak. Taamaaliortoq pillugu Jakob ima allassimavoq: ’Taassuma angut kiinnaminik inuuserisaminik tarrarsuutikkut qimerluuisoq assigeqqajarpaa; qimerloorsimallunimi aallararaaq  qanoq-issutsilu erniinnaq puigorlugu.’ — Jâko 1:22-25.

Allaat imertarunnaareeraluaruilluunniit miserratiginninnissat sianigisariaqarpat. Atuakkami Willpower’s Not Enough-imi (Piumassuseqarneq naammanngilaq) ima nassuiarneqarpoq: „Inuk imernaveersaartunngorlaaq — immaqalu aatsaat siullermeerluni — kukkusumik isumaqarsinnaavoq sivikitsumik imernaveersaarsinnaagami ajorunnaavissimalluni.“ Tamannali tassa imerajuttutut eqqarsaariaaseq, nakkaannarnissamullu aalloriarneq siulleq. Miserratiginninneq tamanna akiussagukku kisimiittariaqanngilatit.

Ikiortissarsiorit

Paasigamiuk imerajuttuunini nammineerluni ajugaaffigisinnaanagu angut Leomik taasinnaasarput tamatuminnga atorfilinnik ikiortissarsiorpoq. Sakkortuumik katsorsarneqareerluni ajorunnaariartulerpoq. Leo isumaqarpoq ilisimasalimmik ikiortissarsiornerup iluaqutaassusia oqaasiinnakkut ersersinneqarsinnaanngitsorluunniit. * Najukkanni tamatumunnga periarfissaqarpat illittaaq iluaqutigisinnaavat.

Paasiumaarpalli imernaveersaartunngorneq tassaanngitsoq ajorunnaarneq. Imerajuttuunerup tunuani amerlanertigut ajornartorsiutit allat toqqoqqasarput. Tamakku sumiginnarukkit navianarsinnaavoq. Dr. Charlotte Davis Kasl ima allassimavoq: „Apersorsimavakka inuit allaat 14-eriarlutik imerajukkunnaarniarlutik katsorsartissimagaluartut, ajornartorsiutigisaviit, soorlu atornerluisimaneq, pinngitsuuisinnaannginneq, miserratiginninnerlu iliuuseqarfigineqarsimanngimmata iluatsitsisimanngitsut.“

Dennisip paasisimavaa tamanna ilumoortoq. „Uanga imerajuttuusimavunga putumanngitsoq, sulilu ajornartorsiuteqaqalunga,“ taama allappoq. „Imertarunnaarneq naammanngilaq. Inuunerisimasara eqqarsaatigeqqissaartariaqarsimavara, meeraaninnit misigisimasat eqqarsaatigeqqissaarlugit paasiniarlugu tamakkunannga qanoq sunnertissimanerlunga, taavalu ileqqora allanngortinniartariaqarsimallugu.“

Tamatumunnga assingusumik Leo imminut misissoqqissaartariaqarsimavoq katsorsarneqarnissani anguniarlugu. „Sinngatoorujussuullungalu  nakuuserniartorujussuusimavunga,“ taama oqarpoq. „Ilaannikkut imminut ataqqinngivittarpunga ilaannikkullu imminut sorsuartut isigilersarlunga.“ Leop siunnersuut Biibilimeersoq Evfisumiut 4:22-miittoq malerualerpaa: ’Inutoqaq siornagut angalaaserisarsi iparassavarsi.’ Aap, ’siornagut angalaaserisarput’ inuttut pissutsitsinnut sunniuteqarsimaqaaq. Soorlu kuisassat kuitsivimmit ilusilersorneqartartut inuttut pissutsit siornatigut inuusimaninnit ilusilersorneqarsimavoq. Eqqunngitsumik ilioriaaseq peerneqaraangat suna sinneruttarpa? Inuttut pissuseq immaqa ukiorpassuit ingerlaneranni ilusilersorneqariartuaarsimasoq. Taamaattumik iluarsaassiniaraanni inutoqaq siornatigut pissuserisimasaq aamma allanngortinniartariaqarpoq.

Guutimut attaveqalerit

Leo ajorunnaariartussaguni aamma Guutimut attaveqaleriartuaartariaqarsimavoq. „Jehovamik tatiginninneq ilinniarakku eqqarsaariaasera, ileqqora isumaqarfiginninneralu allanngorluinnarput,“ taama oqarpoq.

Tamannali imaaliallaannaq anguneqarsinnaanngilaq. Kimulluunniit attaveqarniaraanni — Guutimut inunnulluunniit — isertuanngissuseq, unneqqarissuseq tatiginninnerlu pisariaqarput. Pissutsit taakkorpiaat imerajuttuunerup aseroriartortarpai. Ineriartorteqqinneqarsinnaapput, sivisunaartumilli.

Imerajuttuuguit immaqa allanut qanimut attaveqarneq naluat. lmmaqa siornatigut misigisimanngisaannarpat. Taamaattumik naammagittartariaqarputit. Tuaviussanngilatit isumaqarlutit imernaveersaalernerup ingerlaannaq Guutimut attaveqarneq nassatarissagaa. Guuti taassumalu pissusii ilisariniaraanni iliuuseqartariaqarpoq. Akuttunngitsumik eqqarsaatigisariaqarpatit, immaqa tussiaatit Biibilimiittut Jehova taassumalu aqqutigeqqusai pillugit qamannga pisumik misigissutsinik ersersitsisut atuaqqissaarlugit. *

’Pissaaneq angingaartoq uatsinnit pinngitsoq’

Guuti tatigalugu attaveqarfigilerukku sunnertilluarsinnaavutit. Jehovap ajorunnaariartorniarnissanni tapersersussavaatit. (Naleqqiukkit Tussiaat 51:12-14; 145:14.) Qaquguluunniit qamannga pisumik qinnuigisinnaavat tatigalugu ’pissaanermik angingaartumik uatsinnit pinngitsumik’ ikiussagaatit. — 2 Korintumiut 4:7; Filípimiut 4:6, 7.

Pinngortitsisup illit inuttut pissutsitit allanit tamanit ilisimaneruai. (Tussiaat 103:14) Inuit siunnersuisut inuttuinnaq ilisimassuseqartut ikiuisinnaagaluarput; inunnilli Pinngortitsisup akiuunninni ikiorluarnerusinnaassavaatit! (Jesaja 41:10; 48:17, 18) Kristumiut ilagiissaanni asannittumik annertoqquteqarnissaq pilersissimavaa.

Annertoqqutissat

Kristumiut ilagiissaanni utoqqaanertat anersaakkut inersimalluartut ikiuilluarsinnaapput. Taakkua ilaat ikittuinnaat nakorsatut imaluunniit tarnip pissusiinik ilisimasalittut ilinniarsimapput, Guutilli oqaasia najoqqutassiaalu  tatigalugillu nalunngilluarpaat. Taakku ’assigissavaat anorersuarmut oqquiffik sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa’. (Jesaja 32:2) Ikiuinerat iluaqutiginiaruk. *

Soorunami kristumiut utoqqaanertat, qanigisavit ikinngutivillu illit iliuuserisimasavit kingunipiluinut sernissorsinnaanngilaatsit. Naqitami Coming Off Drink-imi (Imerajuttuunermit aniguineq) ima nassuiarneqarpoq: „Imerajuttut ikiorniaraanni pisariaqarluinnarpoq taakkua imigassanik pinngitsuuisinnaannginnerup kingunerisa aserornassusiannik paasinninnissaat namminerlu iliuuserisimasaminnut akisussaallutik akuerinninnissaat.“ Taamaattumik utoqqaanertat ikiorniarlutit inussiarnersumik ilumoorfigissavaatsit, kajumissaarlutit piviusut akuereqqullugit imerajuttuunerillu ajugaaffiginiarlugu katsorsartinnissat qanorlu-iliornissaq pisariaqartut ilasseqqullugit.

Nammineq akisussaaffigaat

Naak utoqqaanertanit annertoqquteqarsinnaagaluarlutit paasissavat imerajuttuuninnik katsorsartinnissannik kialuunniit pinngitsaalisinnaanngimmatit. Illit piumasannik iliorsinnaassuseqarputit. Ajorunnaarnissat illit akisussaaffigaat. (Naleqqiukkit 1 Moses 4:7; 5 Moses 30:19, 20; Filípimiut 2:12.) Akisussaaffik tamanna tiguniaruk, Jehovallu pilluaqqussavaatit. 1 Korintumiut 10:13-imi ima neriorsoqqissaarneqarpugut: ’Allamik usserneqanngisaannarpusi kisianni inuit atortagaannik; Guutili ilumoorpoq; taassuma artukkassinnik ussersinnavianngilaasi, kisianni aniguinissaq ussernartumut aappiullugu pinngortissavaa ilissinnut artornarunnaarsillugu.’ Taamaattumik isumalluarit — imerajuttuuneq ajugaaffigisinnaavat. (wD 15/8 93)

[Quppernerup ataani ilanngussat]

[Qupp. 28-mi ungalusaq]

Immaqa imerajuttuunerup kingunipiluinik naalliuteqarputit. Neriuulli katassanngilat. Ikiortissaqarputit.

[Qupp. 31-mi ungalusaq]

NAKKAANNARUIT

„Nakkaannarnissamut sillisimaffiginninneq ikuallattoornissamut sungiusarnermut assinguvoq,“ atuakkami Willpower’s Not Enough-imi (Piumassuseqarneq naammanngilaq) taama allassimavoq. „Isumaqartariaqanngilaq ikuallattoornissaq ilimagigit, kisianni ikuallattoqalissagaluarpat akisussaallutit iliuuseqarnissannut piareersimavutit.“ Nakkaannaruit, taava:

□ Jehova qinnuigiuk. Tatigisinnaavat taassuma ajornartorsiutit paasissagaa ikiussagaatillu. — Tussiaat 103:14; Jesaja 41:10.

□ Kristumiu utoqqaanertaq tatigalugu oqaloqatigiuk. Siumut aalajangerniarit pisariaqalerpat kina saaffigissallugu. Qanoq pisoqarsimasoq ilumoorlutit oqaluttuariuk, unnersuussutaalu Biibilimeersut tusarnaaqqissaarniakkit.

□ Isumatsaqinak. Imminut uumiginerup nakkaannarnissamut ingerlatissavaatit, taamaattumik kukkusimanerit eqqortumik isumaqarfiginiaruk. Ataasiarlutit nakkaruit imaanngilaq ajorsartutit. Marathonimik arpattartoq orlugaluaruni aallartiffimmut utertariaqanngilaq nikueqqittarporli arpaqqilerlunilu. Illittaaq taamaaliorniarit. Suli ingerlavutit. Sapaatip-akunneri, qaamatit ukiulluunniit imernaveersaarfigisimasatit suli atuupput.Immaqa imerajuttuunerup kingunipiluinik naalliuteqarputit. Neriuulli katassanngilat. Ikiortissaqarputit.

[Qupp. 29-mi assiliartaq]

Miserratiginninneq akiorlugu imminut ilumoortumik misissoqqissaarniarit