Imminut naalakkersinnaanerit atatillugulu alliartortiguk

„Uppersutsissigut . . . imminut naalakkerniaritsi.“ — 2 PÎTRUSE 1:5, 6, NV.

1. Pissutsini immikkut ittuni suni kristumiu nalunaajaasariaqarsinnaava?

JESUS ima oqarsimavoq: ’Naalagarsuarnut kunnginullu pisikkumaarpaasi uanga pillunga taakkualu inuiaqatigiillu nalujunnaarutissaannik.’ (Matîuse 10:18) Illit naalakkersuisumut, eqqartuussisumut præsidentimulluunniit pisinneqaruit suna nalunaajaassutigissaviuk? Immaqa siullermik sooq tassunga pisinneqartutit, ilinnut unnerluutit pillugit, oqalussaatit. Guutip anersaavata taamaaliorninni ikiussavaatit.  (Lúkarse 12:11, 12) Takorloorsinnaaviuk imminut naalakkersinnaaneq pillugu oqalulersutit? Isumaqarpit tassaasoq kristumiutut tusarliussatta ilaa pingaartoq?

2, 3. (a) Paulus qanoq ililluni Felix Drusillalu nalunaajaaffigissallugit periarfissaqarsimava? (b) Sooq naleqqulluartuua Paulusip tamatumani imminut naalakkersorsinnaaneq pillugu oqalummat?

² Pisimasuik manna eqqarsaatigeriaruk: Jehovap nalunaajaasuisa ilaat tigusaalluni eqqartuussivimmut pisinneqarpoq. Oqaloqquneqarami kristumiutut, nalunaajaasutut, upperisani nassuiarumavaa. Tamatuminnga oqaluttuaq misissorukku paasissavat eqqartuussivimmut tulluartumik ’iluarnermik piitaajuinnermillu eqqartuussummillu piumaartussamik’ oqaluttoq. Tassa apustili Paulusip Cæsareami misigisimasaa eqqortorparput. Aallaqqaatigalugu killisiorneqarpoq. Ullut ilaanni tamatuma kingorna Felix nuliani Drusilla juutiusoq ilagalugu aggerpoq Paulusilu qaaqqullugu taannalu Jesus Kristus pillugu oqaluttuartoq tusarnaarlugu. Oqaluttuarisaanermik ilisimasallit eqqartorpaat Felix „sutigut tamatigut naakkittaatsuliortarluni pilerissuseqartartoq, kunngitut peqqarniitsumik naalakkersuisarluni inussiaatilittullu iliorajulluni“. Marloriarluni katereersimavoq Drusilla kajumissaaramiuk (Guutip inatsisaanik unioqqutitsilluni) uiminit aveqqullugu aappartaareqqullunilu, nuliami pingajuattut. Immaqa upperisaq nutaaq tamanna pillugu paasisaqarusuttoq tassaavoq Drusilla.

³ Paulusip nangilluni ’iluarneq piitaajuinnerlu eqqartuussullu piumaartussaq’ eqqartorpai. (apustilit suliait 24:25) Tamatuma takutilluarpaa Guutip assuarnaassutsimik najoqqutassiai aamma naakkittaassuseq naapertuilluannginnerlu Felixikkut peqataaffigisaat qanoq assigiinngitsigisut. Imaassinnaavoq Paulus neriuttoq Felixip tamatumani naapertuilluartumik eqqartuussinissaanut killissinnaallugu. Sunali pillugu ’piitaajuinneq eqqartuussullu piumaartussaq’ eqqartorpai? Aappariit kanngunartuliortut taakkua apersorpaat ’Kristusimik upperneq’ sumik nassataqarnersoq. Paasisariaqarpaat Kristus malissagaanni eqqarsaatiminik, oqaatsiminik iliuutsiminillu naalakkersinnaasariaqartoq, aap, imminut naalakkersinnaasariaqarpoq. Inuit tamarmik eqqarsaatitik, oqaatsitik iliuuserisimasatillu pillugit Guutimut nassuertussaapput. Taamaattumik Felixip Paulusimut eqqartuussinissaanit taassuma nuliatalu Guutimit eqqartuunneqarnissaat pingaarneroqaaq. (apustilit suliait 17:30, 31; Rûmamiut 14:10-12) Paasinarpoq Paulusip tusarliusaa tusaramiuk Felix ’siooralersoq’.

Pingaarpoq imaannaananili

4. Imminut naalakkersinnaaneq sooq tassaava kristumiussutsip ilaa pingaartoq?

⁴ Apustilip Paulusip nalunngilaa imminut naalakkersinnaaneq tassaasoq kristumiussutsip ilaa pingaartoq. Apustili Peterip, Jesusip qaniginerusimasaasa ilaata, tamanna uppernarsarsimavaa. Qilammi ’Guutimut qanoq-issusiatigut peqataasussat’ allaffigigamigit Peterip kajumissaarilluni pissutsit aalajangersimasut pingaartutut eqqartorpai, ilaatigut upperneq, asanninneq imminullu naalakkersinnaaneq. Taamaattumik imminut naalakkersinnaaneq neriorsueqqissarnermi matumani aamma eqqarsaatigineqarpoq: ’Tamakkumi ilissinniippata alliartorlutillu Naalakkatsinnik Jesus Kristusimik ilisarsinissigut eqiattarniassanngilasi pilussinnarnaviassanasilu.’ — 2 Pîtruse 1:1, 4-8.

5. Suna pillugu imminut naalakkersinnaaneq immikkut soqutigisariaqarparput?

 ⁵ Nalunngilalli imminut naalakkersinnaasariaqarnitsinnik oqaannarneq ulluinnarni naammassisaqarnissamit ajornannginnerusartoq. Taamaappoq ilaatigut imminut naalakkersinnaaneq pissusiummat qaqutigoortoq. 2 Timûtiuse 3:1-5-imi Paulusip ullutsinni ’ullussani kingullerni’ pissutsit sualutsikkiartussasut eqqaavai. Ullutsinnut ilisarnaatit ilaat tassaavoq inuit ’nunujuitsut’. Tamanna sumiluunniit takusimavarput, ila?

6. Avatangiisitsinni nunujuinneq qanoq takuneqarsinnaasarpa?

⁶ Inuppassuit isumaqarput nununani misigissutsinut nakkaannarneq imaluunniit kamalluni nakuuserluni qisuariarneq peqqinnarsinnaasoq. Isuma tamanna ingasannerusarpoq inuit tusaamasat kikkut tamarmik takkuanni nunusinnaanngivimmata, pilerissutsitik maliinnarlugit. Assersuutigalugu timersortartut unamminerannik isiginnaartut takusarpaat timersortartut misigissutsimminnut nakkaannartut, allaat sualuttumik kamannermit nakuusertut. Illittaaq TV-mi aviisinilu takusimannginnerpigit unamminerit inuit  sorsuunnerannit kipitinneqartut? Imminut naalakkersinnaanermik amigaateqarnermik ersiutit sivisuumik misissortariaqanngilavut. Imminut naalakkersinnaaneq pissutsini amerlasuuni pisariaqarpoq — nerineq, imerneq, angutaaguni arnanut ilioriaaseq arnaagunilu angutinut ilioriaaseq, aammalu piffissaq aningaasallu sulinngiffimmi sukisaarsaatinut atorneqartut eqqarsaatigalugit. Taakkorpassuilli qarsupittumik pinnagit naalakkersinnaasariaqarfigisaq ataaseq pingaartoq misissoriartigu.

Misigissutsikkut imminut naalakkersinnaanneq

7. Imminut naalakkersinnaaneq eqqarsaatigalugu ingammik suna misissortariaqarparput?

⁷ Ilavut amerlasuut iliuutsiminnik naalakkersuiniarnerminni iluatsitsisarput. Tillinneq, kanngunartuliorneq toqutsinerlu ajorpugut; eqqunngitsuliornerit tamakku pillugit Guutip inatsisai nalunngilluarpavut. Misigissutsivulli naalakkersorniarlugit qanoq iluatsitsitigisarpugut? Misigissutsikkut naalakkersinnaaneq ineriartortinngikkutsigu ilimanarpoq piffissap ingerlanerani qanoq-iliornissatsinnittaaq naalakkersunngitsuussasugut. Taamaattumik misigissutsivut misissoriartigik.

8. Misigissutsivut eqqarsaatigalugit Jehovap suna kissaatigaa?

⁸ Jehovap kissaatiginngilaa inuusaliatut ittuussasugut, tassa misigissuseqanngivissutut imaluunniit misigissutsitsinnik ersersitsisinnaanngitsutut. Lazarusip ilerrani Jesus ’anersaamigut ajuallassimavoq aliatsallunilu’. Taava ’qullililersimavoq’. (Juánase 11:32-38) Allaalluinnartumillu misigissuseqarpoq qanoq-iliornini naalakkersorluarlugu aningaasanik taarsiisut naalaffimmit anisikkamigit. (Matîuse 21:12, 13; Juánase 2:14-17) Ajoqersugaasa aalajaatsut aamma misigissutsitik takutittarpaat. (Lúkarse 10:17; 24:41; Juánase 16:20-22; apustilit suliait 11:23; 12:12-14; 20:36-38; 3 Juánase 4) Taamaattoq paasivaat imminut naalakkersinnaaneq pisariaqartoq misigissutsit tamakku ajortuliornissamik kinguneqaqqunagit. Evfisumiut 4:26-mi tamanna erseqqissarneqarpoq: ’Kamatsillusi ajortulinnginniaritsi; seqineq tarrisinaveersiuk narrutsassimanissinni.’

9. Misigissutsinik naalakkiisinnaaneq sooq taama pingaaruteqartigaa?

⁹ Kristumiu imminut naalakkersinnaarpasissinnaavoq taamaattorli misigissutsini nunusinnaajunnaartarlugit. Eqqaamajuk Guutip Abelip pilliutaa iluarimmagu: „Taava Kain ajuallappoq kiinarlerlunilu. [Jehovap] taava Kain oqarfigaa: ’Sooq ajuallappit? Sooq kiinarlerpit? Imaannginnerpa ajunngitsulioraangavit nakimanak niaqqut makitissimasarit, ajunngitsuliunngikkaangavilli ajorti matup killingani qamasartoq.’“ (1 Moses 4:5-7) Kain misigissutsini naalakkersinnaannginnamigit Abel toquppaa. Misigissutsit nununeqanngitsut iliornissamik nununeqanngitsumik kinguneqarsimapput.

10. Qanoq ililluta Haman ilinniutigisinnaavarput?

¹⁰ Aamma Mordokajip Esterillu nalaanni pisimasoq eqqarsaatigeriaruk. Naalagaaffimmi atorfillip Hamanip Mordokaj kamaappaa seeqqumiarfigiumanngimmani. Tamatuma kingorna Haman kukkulluni isumaqarpoq ataqqinaaserneqassalluni. „Ulloq taanna Haman nuannaarluni isumagissaarlunilu angerlarpoq. Kisianni Mordekaj takugamiuk illussaarsuup isaaffiata sioraani issiasoq aammalu nikuiffiginanilu aalarianngitsoq uumitsaattorujussuuaa, uumitsanninili nunuinnarpaa angerlarlunilu.“ (Ester 5:9, 10) Erniinnarluinnaq nuannaaleriataarsinnaavoq, aammali imminut iluarinnippallaanngitsumik  naammattoorsimagaangami kamaleriataartarluni. Biibilimi allassimammat ’nunuinnartoq’ isumaqarpa Haman imminut naalakkersinnaalluni maligassaalluartoq? Naamik. Sivikitsumik Haman misigissutsini takutinnagit nunusinnaavoq kamanninili sinnganinilu nunusinnaajunnaartarlugit. Misigissutsiminit killinneqarluni toqutitsinissaq pilersaarusiorpaa.

11. Ilagiinni Filippimiittumi sumik ajornartorsiuteqarsimava, sumillu pissuteqarsinnaava?

¹¹ Ullumikkut tamatumunnga assingusumik misigissutsit nununeqanngitsut kristumiunut ajoqutaasinnaaqaat. Immaqa ilaat oqassapput: ’Naamik, ilagiinni kristumiuni tamanna ajonartorsiutaasimanavianngilaq.’ Taamaassimavorli. Filippimi kristumiut tanitaasut ilaat marluk sualuttumik isumaqatigiinngissuteqalersimapput, sunarpiaasoq Biibilimi eqqartorneqanngitsumik. Imaassinnaavorli: Evodiap qatanngutit ilaat qaaqquai neriartoqqullugit imaluunniit ilorrisimaarnartumik katerisimaaqqullugit. Syntykeli qaaqquneqarsimanngilaq, ajuallallunilu. Immaqa arlaanni taassuma akiniaalluni Evodia qaaqqunngilaa. Taava imminnut kukkunersiulerput; piffissallu ingerlanerani oqaloqatigiinneq ajulerput. Ajornartorsiut tassaanerpa qaaqqusinngitsoorsimaneq? Naamik. Tamanna aallarniutaannaavoq. Qatanngutit arnat tanitaasut taakkua marluk misigissutsitik nununngitsooramikkik ajornartorsiutimininnguaq atajuartilerpaat alliartortilerlugulu, kiisalu naggataatigut apustili akuliuttariaqalerluni. — Filípimiut 4:2, 3.

Qatanngutinnut misigissutsitit

12. Sooq Guutip Nalunaajaasup oqaasii 7:9-mi allassimasutut siunnersorpaatigut?

¹² Ilumut, ajattugaalluni, ajuallalluni imaluunniit paqumisuttumik iliorfigineqarluni misigigaanni misigissutsit nununissaat artornarsinnaaqaaq. Jehovap tamanna nalunngilaa, pinngortikkamigilli inuit imminnut attaveqarnerat isiginnaarsimagamiuk. Guuti ima siunnersuivoq: „Kamaammernaveersaartarniarit sianiitsut kisimik kamaammiasuusarmata.“ (Nalunaajaasup oqaasii 7:9) Malugeriaruk Guutip misigissutsit, iliuutsit pinnagit, eqqartorai. (Ussatit 14:17; 16:32; Jâko 1:19) Imminut apereriarit: ’Misigissutsikka nununiarlugit iliuuseqarnerusariaqarpunga?’

13, 14. (a) Silamiut akornanni misigissutsikkut nunujuinneq sunik kinguneqartarpa? (b) Kristumiut suut pissutigalugit iluarinngisaqalersinnaappat?

¹³ Silamiorpassuit misigissutsitik naalakkersorsinnaanagit akiniaasarput — kamallutik nakuuserlutillu imminnut eqqarliminnulluunniit eqqunngitsuliornerit piviusut, imaluunniit piviusuusorisat, pissutigalugit akiuuttarput. Misigissutsit nununeqarunnaaraangamik sivisuumik ajoqusiisinnaapput. (Naleqqiukkit 1 Moses 34:1-7, 25-27; 49:5-7; 2 Samuel 2:17-23; 3:23-30; Ussatit 26:24-26.) Ingammik kristumiut, qanorluunniit inuiaqatigiittut kulturikkullu tunuliaqutaqaraluarunik, assortuunnerit iluarinninnginnerlu eqqunngitsutut angalanneqartariaqartutullu isigisariaqarpaat. (3 Moses 19:17) Misigissutsitit naalakkersorniarlugit assortuunneq ingalattarpiuk?

¹⁴ Soorlu Evodiamik Syntykemillu pisimasumi takuneqarsinnaasoq misigissutsinik naalakkiinngitsoorneq ajornartorsiutinik kinguneqartarpoq. Qatanngut arnaq katittorsiornermut qaaqquneqarsimanngikkuni imaluunniit meeraa qanigisaniluunniit alla qaaqquneqarsimanngippat immaqa qaangiinnarneqartutut misigisinnaavoq. Immaqaluunniit qatanngut angut kristumioqatiminit biilimik atornikumik pisivoq, erniinnarli aserorpoq. Sunaluunniit pissutaagaluarpat misigissutsit taamaattut  pilersinnaapput, misigissutsit nununeqaratik kamaattoqalerlunilu. Qanoq kinguneqartarpa?

15. (a) Kristumiut iluarinngisaqarpata sunik alianartunik kinguneqarsinnaava? (b) Allanik iluarinngisaqarneq pillugu Biibilimi sumik siunnersuuteqarpa?

¹⁵ Inuup narrujuummisup misigissutsini naalakkersunngippagit sulissutiginagillu qatanngunnilu eqqisseqatiginngippagu uumissuineq ineriartorsinnaavoq. Ilaanni ima pisoqartarpoq nalunaajaasoq atuaqqissaaqatigiinnut aalajangersimasunut peqataajumanngitsoq tassaniittoqarmat kristumiumik ilaqutariinnilluunniit „iluarinngisaminik“. Ila, alianassusia! Biibilimi allassimavoq kristumiut imminnut eqqartuussivimmut pisippata kukkunerusoq, aamma kukkunerussaaq uatsinnut ilaquttatsinnulluunniit oqaatsikkut iliuutsikkulluunniit eqqunngitsuliornermininnguaq pissutigiinnarlugu qatanngut alla ingalakkutsigu. Misigissutsitta takutinnerpaat anersaakkut qatanngutitsinnik eqqisseqatiginninnissamit eqqarleriittut ataqatigiissuseq pingaartinnerugipput? Qatannguterput pillugu toqusinnaalluta oqartarnerpugut, maannakkulli misigissutsivut pissutigalugit oqaloqatigiumanagu? (Naleqqiuguk Juánase 15:13.) Guuti ersarissumik ima oqarsimavoq: ’Ajortumik iliortoq ajortumik akileqinasiuk. . . . Ajornanngippat sapinngisassinnik inuit tamaasa eqqissiveqatiginiarsigik. Nammineq akiniaaqinasi, asasakka, kamannerli assaarsiuk.’ — Rûmamiut 12:17-19; 1 Korintumiut 6:7.

16. Abraham misigissutsinik naalakkiisinnaanermi qanoq ililluni maligassaalluarpa?

¹⁶ Akerariittut iliorneq atatinnagu eqqissisitsisarutta imaluunniit unnerluussummut pissutaasoq aaqqinniartarutsigu misigissutsitsinnik naalakkersuisinnaalissaagut. Eqqaamajuk Abrahamip nalaani Abrahamip Lotillu nersutaataat amerlavallaarmata nunaammut ivigartorfissamut amerlavallaarlutik nersutinik paarsisut saqitsaatilersut. Abraham misigissutsiminit ajugaaffigineqarpa? Imaluunniit imminut nunua? Inuussutissanik ajornartorsiummut tamatumunnga eqqissinartumik aaqqiinissaq siunnersuutigaa; tamarmik immikkut nunaateqalerlutik. Lotilu qinerseqqaartippaa. Narrutsassimannginnini Lotimullu akeqqersimannginnini takutinniarlugu kingorna taanna annaanniarlugu sorsukkiartorsimavoq. — 1 Moses 13:5-12; 14:13-16.

17. Paulus Barnabasilu ilaanni qanoq kukkuluttorsimappat, tamatumali kingorna susoqarsimava?

¹⁷ Aamma Paulusip Barnabasillu nalaanni pisimasoq atorlugu imminut naalakkersinnaaneq pillugu ilinniarsinnaavugut. Ukiuni arlalinni angalaqatigereerlutik Markus angalaqatigissanerlugu angalaqatigissannginnerluguluunniit isumaqatigiinngissutigilerpaat. ’Assortuutingaaleramillu avissaarput, Barnabasillu Markus ilaseraa, umiarsuakkullu Kypernimut aallarpoq.’ (apustilit suliait 15:39) Angutit inersimalluartut taakkua taamanikkut misigissutsiminnik nunusinnaajunnaarnerat uatsinnut mianersoqqussutaavoq. Taakkununnga pisimasinnaappat uatsinnuttaaq pisinnaavoq. Taamaattorli isumaqatigiinnginneq atatissimanngilaat akiniaanatillu. Oqaluttuap takutippaa qatanngutit taakku misigissutsiminnik naalakkiisinnaaleqqittut eqqisseqatigiillutillu. — Kulorsamiut 4:10; 2 Timûtiuse 4:11.

18. Ajuallattoqaraangat kristumiut inersimalluartut qanoq iliorsinnaappat?

¹⁸ Guutip innuttaasa akornanni ajuallattoqartarnissaa narrutsattoqartarnissaalu ilimagisinnaavarput. Hebriiarit nalaanni apustilillu nalaanni taamaattoqarsimavoq. Aamma ullutsinni Jehovap kiffaasa akornanni  taamaattoqarsimavoq, tamatta naammalluinnanngitsuugatta. (Jâko 3:2) Jesusip malitsini kajumissaarsimavai qatanngutit akornanni ajornartorsiutit taamaattut erniinnaq aaqqinniartaqqullugit. (Matîuse 5:23-25) Ajunnginnerussaarli tamakku pinngitsoortivissinnaagutsigik imminut naalakkersinnaaneq ineriartortillugu. Qatanngutit oqaasii iliuusiiluunniit pingaanngikkaluartut ajuallaatigigukkit misigissutsitit nunullugit puigorniarniaruk. Pisariaqarnerpa inuk taanna nassueqqugukku, aatsaat utoqqatserpat saammaatissallugulusooq? Ilumut misigissutsitit naalakkersorsinnaanerpigit?

Ajornanngilaq!

19. Sooq tulluarpa pingaartumik misigissutsitsinnik naalakkiisinnaaneq sammigatsigu?

¹⁹ Imminut naalakkersinnaaneq eqqarsaatigalugu pingaartumik ataaseq misissorsimavarput, tassa misigissutsikkut naalakkersinnaaneq. Tamannalu immikkut pingaaruteqarpoq, tassami misigissutsivut naalakkersorsinnanngikkutsigik aamma oqarput, kinguaassiuutitigut pilerissuserput, nerinerput inuunitsinnilu allarpassuit naalakkersorneqartariaqartut naalakkersorsinnaassanngilavut. (1 Korintumiut 7:8, 9; Jâko 3:5-10) Isumalluarniarilli, imminut naalakkersinnaanikkut siumukarsinnaagavit.

20. Suna pillugu qularisariaqanngilarput siumukarnissaq ajornanngitsoq?

²⁰ Jehovap ikiorumavaatigut. Qanoq tamanna nalunngissinnaavarput? Imminut naalakkersinnaaneq tassaavoq anersaavata inerititaasa ilaat. (Galâsiamiut 5:22, 23) Taamaattumik anersaaq illernartoq Jehovamit pisinnaajumallugu suliniuteqarutta tamatuminngalu inerititaqarniarutta ilimagisinnaavarputtaaq imminut naalakkersinnaalissalluta. Jehovap neriorsueqqissaarutaa manna puigoqinagu: ’Ataatap qilammiusup imminit qinusut anersaamik illernartumik tunissavai.’ — Lúkarse 11:13; 1 Juánase 5:14, 15.

21. Illit siunissami misigissutsinik naalakkiisinnaaneq eqqarsaatigalugu qanoq iliussallutit aalajangerpit?

²¹ Isumaqassanngilatilli ajornanngitsuaraassasoq. Aamma inuit misigissutsikkut nunujuitsut akornanni alliartorsimagaanni, ajuallajasuugaanni imaluunniit imminut naalakkersinnaaneq misilissimanngikkaanni artornarnerussaqaaq. Kristumiunut taakkununnga imminut naalakkersinnaanermik atatitsiniarneq alliartortitsiniaanerlu unamminiarnartuusinnaavoq angisooq. Ajornanngilarli. (1 Korintumiut 9:24-27) Pissutsit aaqqissuussaanerata matuma naggatissaa qanilliartortillugu tatisineq alliartuinnassaaq. Imminut naalakkersinnaaneq pisariaqartikkaluttuinnarparput! Imminut naalakkersinnaaneq eqqarsaatigalugu imminut misissorniarit. Sukkut aalajangersimasukkut siumukartariaqaruit tamanna sulissutiginiaruk. (Tussiaat 139:23, 24) Guuti anersaavanik qinnuivigiuk. Tusassavaatit ikiussallutillu imminut naalakkersinnaaneq atateqqullugu alliartorteqqullugulu. — 2 Pîtruse 1:5-8. (wD 15/8 93)

Eqqaamasassat

□ Misigissutsinik naalakkiisinnaaneq sooq taama pingaaruteqartigaa?

□ Haman, Evodia Syntykelu qanoq ilinniutigisimavigit?

□ Ajuallakkuit qanoq iliussavit?

□ Imminut naalakkersinnaaneq ikiortigalugu qanoq ilillutit ajuallaqqajuarneq ingalassinnaaviuk?

[Atuaqqissaarnermi apeqqutit]

[Qupp. 22-mi assiliartaq]

Paulusip Feliximut Drusillamullu naapertuilluarneq immunullu naalakkersinnaaneq eqqartorpai