Sooq kristumiut ataatsimiittarnerinut ilaasarneq pisariaqartikkit

ROSARIOP, Amerikami kujallermi najugaqartup, Elizabethilu qaammaterpaaluit Biibilimik atuaqqissaartarnertik nuannaarutigisimavaa. Rosariop Guutip naalagaaffianik taassumalu nunamik paratiisinngortitsinissaanik ilinniarnini killitsissutigeqaa. Taamaakkaluartoq Elizabethip rigssalimi ataatsimiinnernut qaaqqugaangani, piumaneq ajorpoq. Misigisimavoq ilagiit ataatsimiittarnerinut ilaanngikkaluarluni Biibilimik atuaqqissaartarnini angerlarsimaffimmini ingerlassinnaallugu ilinniakkanilu maleruarsinnaallugit. Kristumiut ataatsimiinneri iluaqutigisinnaanerlugit aamma illit eqqarsaatigisimaviuk? Sooq Guutip innuttami ataatsimoortarnissaat aaqqissuussimavaa?

Ukiuni hundredelinni siullerni kristumiut inunnit allanit allaanerunerat pissutigalugu, eqqortunik ilagisartagaqarneq inuunerminni tatineqarnernut akiuunnissaannut pingaarutilerujussuuvoq. Apustili Paulus kristumiut ilagiivinut siullernut allassimavoq: ’Assuarnaaqqullusi peqqusersueqqullusilu . . . eqqarleriit ukua killormoortut mumingasullu akornanni. Taakkunani silarsuarmi qaammaqqutaasutut qaamavusi.’ (Filípimiut 2:15) Kristumiut Judæami atugarliorsimapput, taakkununngalu Paulus imatut allappoq: ’Misissoqatigiinniartalu asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata; kisianni oqaaqqissaaqatigiilluta pisa; annerusumilli taamaassaagut ullussaq  qanillilersoq malugilerassiuk.’ (Eprîarit 10:24, 25) Qanoq illilluta katerisimaarnitsinni asanninnermut ajunngitsuliornermullu kajumissaaqatigiissinnaavugut?

Kristumiut qanoq illillutik imminnut ’ipissaqatigiittartut’

Grækerit oqaasiat Paulusip atugaa ’kajumissaaqatigiinnermik’ nutserneqarsimasoq isumaqarpoq ’ipissaqatigiinneq’. Biibilimi ussatip nassuiarpaa kristumiut qanoq ilillutik imminnut ’ipissaqatigiissinnaasut’, imatut allassimagami: „Savimineq saviminermik ipissarneqartarpoq, inuillu imminnut ipissaqatigiittarpullusooq.“ (Ussatit 27:17; Nalunaajaasup oqaasii 10:10) Sakkutut ipissartariaqartartutut ippugut. Jehovamut asanninnitta uppernerpullu tunngavigalugu inuunitsinni aalajangiisarnitta silamiunit allaanerutimmatigut, aqqutigisassarput inunnit amerlanerusunit allaanerusoq qinertariaqartarparput.

Allanit allaaneruniartuarnitta ajunngitsuliornissamut kajuminnerput millisissinnaavaa. Jehovamulli asannittut allat ilagisarutsigik ipissaqatigiittutut issaagut asanninnermut ajunngitsuliornermullu kaammattoqatigiilluta. Aappaatigulli kisimiikkutta imminuinnaq eqqarsaatiginerulissaagut. Ileqqorluttunik, namminissarsiortunik sianiitsorpallattunilluunniit eqqarsaateqalersinnaavugut. „Inuk inoqatiminit immikkoorniartuusoq nammineq piumasani malillugu iliortarpoq, saqitsaassisarpoq allat eqqortuusorisaat soqutiginagit.“ (Ussatit 18:1) Tamanna pissutigalugu Paulusip ilagiit Thessalonikamiittut ima allaffigai: ’Taamaattumik oqaaqqissaaqatigiissarlusi ineriartoqatigiigitsi tamassi immikkut, soorlumi pisartusi.’ — 1 Tásalûníkamiut 5:11.

Rosariop Biibilip tunngaviusumik ajoqersuutai ilinniareerlugit ilagiit ilaginissaat suli tunuarsimaarfigaa. Taamaattumik ikioriaqqissinnaanagu, Elizabethip pulaartarunnaarpaa. Qaammatialuit kingorna angalalluni nakkutilliisup pulaarpaa aperalugulu: „Takorlooriakkit ilaqutariit tamarmik immikkut peqqinnartunik nerisassaatilinni neriniartarfeqartut. Angerlarsimaffimmi nereqatigiittanngikkunik ilaqutariinnut ilaasortaasut suna pinngitsuussavaat?“ Rosario akivoq: „Ilaqutariinni ataqatigiinneq pinngitsuussavaat.“ Suna pineqarnersoq paasivaa ataatsimiinnernullu aalajangersimasumik ilaasalerluni. Iluaqutigalugu misigigami taamanili ataatsimiinnerit tamaasa ilaaffigisalerpai.

Allat upperisattulli upperisaminnik oqaatiginnittut tusaallugit takullugulu taamatut upperisaqarnerup inuunerat allanngortissimagaat kaammattuutaasorujussuuvoq. Paulusip tamanna nammineerluni misigisimavaa, ilagiinnullu Romamiunut allalluni: ’Kajungeqaangami takujumallusi saammaannermit tunissummik anersaap pianik ilangiisikkumallusi nakussatseqqullusi, tassa ilissinni kajumissaaqatigeeqqulluta uppeqatigiissutsitsigut, ilissilu uangalu pigisatsigut.“ (Rûmamiut 1:11, 12) Romamut tikinnissani ukiut arlallit sioqqullugu taamatut allappoq, kiisamilu tikikkamiuk Romamiunit parnaarussatut tikippoq. Qatanngutilli Romamiut kilometerit 60-t naapigiarluni angalasimasut takugamigit, ’Guuti qutsavigaa tuppallerlunilu’. — apustilit suliait 28:15.

Ulluni ajornartuni anersaakkut inuussutissaqarniarneq

Romami parnaarussaatilluni, Paulusip Hebriiarit allaffigai katisimasarfitsik qimannaviissagaat. Nangilluni oqaasii uagutsinnut pingaaruteqarput: ’Annerusumilli taamaassagut ullussaq qanillilersoq malugilerassiuk.’ (Eprîarit 10:25) Jehovap nalunaajaasuisa Biibili atorlugu takutittuarsimavaat silarsuup matuma naggatissaa  1914-imi aallartittoq ’ullorlu inuit iluaatsut eqqartuutiffissaat aserorfissaallu’ qanillisoq. (2 Pîtruse 3:7) Biibilimi sarĸúmersitat naapertorlugit naggatissap aallartinnerani Diaavulu qilammit igitaagami, kamattorujussuuvoq ’amiakkuilu taakku Guutip inassutaanik maleruaasut Jesusillu nalunaajaataanik piginnittut sorsukkumallugit’. (sarĸúmersitat 12:7-17) Taamaattumik Guutip inassutaanik maleruaaniarneq maannakkut oqimaanneruvoq; uppeqatitsinnik ataatsimeeqateqarnissaq pisariaqartipparput. Ataatsimiinnittalu uppernerput Guutimullu asanninnerput allisissavaa Diaavulup saassussinera akiorsinnaatillugu.

Guutimut asanninneq uppernerlu illuliatulli sananeqareeraangamik ataavartuartutut inngillat. Uumasutut innerupput nerisaqartuartillutik arriitsumik alliartortarput kaatsinneqartillutilli nukeerukkiartortarput toqusarlutillu. Taamaattumik Jehovap inuttami anersaakkut nerisassaat isumagiuarpai. Tamatta inuussutissat taamaattut pisariaqartippavut, sumili allami Guutip peqatigiissortaaniinngitsoq ataatsimiinneriniunngitsorlu pisinnaavavut? Allami pisinnaanngilavut. — 5 Moses 32:2; Matîuse 4:4; 5:3.

Jesusip apeqqutaatigut paasisinnaavarput kristumiut ilagiivi qanoq inuussutissaqartinnerai. Imatut aperivoq: ’Kinami taava inussiaava aalajaallunilu silatooq naalagaata illumini kiffaminut paarsisunngortitaa, piffissaq eqqortoq nalliuttaraangat nerisasaannik tunisaqqullugit? Pilluarpoq inussiaq taamaaliortilluni naalakkaminit tikinneqartoq.’ (Matîuse 24:45, 46, NV) Ukiuni hundredelinni siullerni Jesusip malitsiminut nerisassaqartitsisussatut kikkut toqqarpai, Naalagaaffimmilu uterami kikkut aalajaallutik nerisassaqatitsisut naammattoorpai? Soorunami inunnik ukiuni hundredelinni taakkunani inuuginnartoqarsimanngilaq. Ersarippoq anersaamik tanitat kristumiut ilagiivi tassaasut inussiaq, soorlu Kristusip siornagut Israelikkut Guutip kiffarigai. (Jesaja 43:10) Aap, silarsuarmi tamarmi kristumiut anersaamik tanitat aqqutigalugit Jesusip anersaakkut nerisassat isumagisarpai, ullumikkullu taakkua Jehovap nalunaajaasuisa ilagiivi aqqutigalugit ingerlateqqinneqartarput.

Jesusip anersaakkut inuussutissanik pilersuinermigut aqqutigisartagai Paulusimit ima allaatigineqarsimapput: ’Qutsissumut pavunnarluni tigusat aallaruppai, inuillu tunissutinik tunivai. . . . Ilaallu taassuma apustilinngortippai, ilaat pruffiitinngortippai, ilaat iivangkiiliulersaartunngortippai, ilaat paarsisunngortippai ajoqersuisunngortillugillu, iluartut naammattunngoqqullugit, kiffartuutissaq suliareqqullugu, Kristusip timaa ineriartorteqqullugu, tamatta apuutserluta ataaasiussusissamut, uppeqatigiilluta Guutillu erneranik ilisarseqatigiilluta, angut inersimasoq nallersimallugu, Kristusip tamakkigaasa angissusiat nallersimallugu.’ — Evfisumiut 4:8, 11-13.

Pingaarnerusumik ilagiit ataatsimiinnerit aqqutigalugit ’inuit tunissutit’ qatanngutitik nakussassartarpaat. Assersuutigalugu Antiochiami ’Judasip Silasillu namminneq pruffiitiugamik qatanngutigiit  oqaatsinik amerlasuunik kajumissaarpaat nakussatsillugillu’. (apustilit suliait 15:32) Taakku assigalugit ullumikkut angutit anersaakkut piginnaassusillit oqalugiaatitigut uppernerput nakussassavaat uppernikillinnginnerussagatta unittoornataluunniit.

Ilumooraluarpoq ataatsimiittarnernut ilaasanngikkaluarlutit ilagiit ilaasortaasa ilaannik ikiorneqarlutit siumukariartorluarsinnaasutit. Biibilimi allassimavoq piffissaqarumaartoq ’Guutip oqaasiisa ilinniaqqaariaqartortaannik ajoqersorneqartariaqarneq immummillu pisariaqarneq, nerisassaq mattusooq saperlugu’. (Eprîarit 5:12) Immuttortuaannartoqarsinnaanngilarli. Kristumiut ataatsimiittarnerini Guutimut asannittuarnissamik tatiginnittuarnissamillu siunertaqartumik siumukartunik Biibilimeersumik ajoqersuineq isumagineqartarpoq aammattaaq ’Guutip siunertaanik tamanik’ maleruaaniarnermut iluaqutaasinnaasut isumagineqartarput. (apustilit suliait 20:27) Tamannalu ’immummik’ kimittuneruvoq. Biibilimilu aamma ima allassimavoq: ’Inersimasulli nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit.’ (Eprîarit 5:14) Ataatsimiinnerni sorpassuit eqqartorneqartarput immaqa angerlarsimaffimmi Biibilimik atuaqqissaartarnermi eqqartorneqarneq ajortut, soorlu versikkuutaarlugit Biibilip siulittuutaanik misissuineq inuunitsinnilu Guuti qanoq ililluta malinniarsinnaanerlutigu oqaloqatigiinneq.

Jehovap eqqaasitsisarnera — soorlu tunutsinni nipi

Ilagiit atuaqqissaaqatigiinneratigut Jehovap eqqaasittarpaatigut inuttut qanoq ittuussanersugut. Eqqaasinneqarnerit taamaattut pingaartorujussuupput. Taamaattoqanngippat namminissarsiornermut, pingaarniarnermut piumatunermullu sangoqqajaasinnaavugut. Biibilimit eqqaasinneqartarnitta inoqatitsinnut Guutimullumi attaveqarluarnissatsinnut ikiussavaatigut. „Aqqutigisakka eqqarsaatigeqqissaarpakka, allornikkalu toraartissavakka inatsisinnut“, Tussiaat 119:59-imik allattoq nassuerpoq.

Kristumiut ataatsimiittarnerinut najuutikulalernitsigut, Jehovap Esajas aqqutigalugu siulittuutaa misigissavarput, ima allassimasoq: „Ajoqersortersili isertorunnaassaaq, namminerlu isigissavarsi. Talerpiup saamiulluunniit tungaanut sanguleraangassi siutissi tusaassavaat kingunissinni ima oqartoqartoq: ’Aqqut aana ingerlavigisassarsi’“. Jehovap ingerlanerput isiginnaarpaa kukkussuteqaraangattalu asannittumik perorsartarluta. (Jesaja 30:20, 21; Galâsiamiut 6:1) Iluaqutissanilli taakkuinnaanngitsunik isumassuisarpoq.

Ilagiit aqqutigalugit anersaamik illernartumik pineq

Jehovap nalunaajaasuini kristumiut ataatsimiinnerinut najuutikulanikkut, Guutip anersaavatigut illernartukkut, innuttaaniittumi, nakussatsinneqartarpugut. (1 Pîtruse 4:14) Aammattaaq kristumiut ilagiivini nakkutilliisut anersaamik illernartumik toqqarneqartarput. (apustilit suliait 20:28) Taanna pissaaneq sulissussisoq Guutimeersoq kristumiuusumut sunniuteqangaarpoq. Biibilimi allassimavoq: ’Anersaalli inerititai tassa asanninneq tipaatsunnerlu eqqissinerlu kamajuinnerlu avaaginninnerlu angajoqqaatsernerlu ilumoornerlu qanilaarnerlu piitaajuinnerlu’. (Galâsiamiut 5:22, 23) Anersaallu illernartup, Guutip peqatigiiffiatigut sulissussisup, nuanningaartumik paasitissavaatigut Guutip asannitsini sumik pissaqartikkai.  Aaqqissuussinermi matumani inuit nuimasut Guutip siunertaanik paasinnissinnaanngitsut nassuiareerlugu, Paulus ima allappoq: ’Guutip anersaamigut uatsinnut saqqummersippai’. — 1 Korintumiut 2:8-10.

Uppernikkut nakussatsinnartunik anersaakkut inuussutissaqarnerup saniatigut, ilagiit sulissutigisaannut pingaarnerpaamut ilaarusuttunut ilagiit sungiusaasarput. Sulissutigisaat suugami?

Ilagiit aqqutigalugit sungiusarneqarneq

Kristumiut ilagiivi sukisaarsaarfiunngillat nuannaariarfiit immaqalu ajunnginnerusumik inuunissamut kajumissarfiit. Jesusip ilagiit nutaarsiassamik nuannersumik Naalagaaffik pillugu anersaakkut taartumiittunut ingerlatitsisussatut suliassippai. (apustilit suliait 1:8; 1 Pîtruse 2:9) Ukiumi 33-mi u.n.k piinsimi aaqqissuussaasumik oqaluussisarneq tunngavilerneqarpoq. (apustilit suliait 2:4) Jehovap siunertaanik oqaluussillutit oqaluussalli qularunnaarsinngitsoorlugu misiginikuuviuk? Ilagiit ataatsimiinnerini oqaluussisarneq ilinniartitsissutaasarpoq. Biibilimi assersuutit atuaqqissaarnerisigut tunngaveqatigiinneq, Biibili tunngavigalugu saqqummiussisinnaaneq, apeqqutillu assersuutillu atorlugit eqqarsartitsilluarsinnaaneq ilinniartarpavut. Taamaattunik piginnaasuseqarnerup allat Biibilip sallusuissutaanik paasinninnissaannik ikiuisinnaanermik nuanningaartumik misigitissavaatit.

Silarsuarmi saqitsaassigajuttumi ileqqorluttumilu kristumiut ilagiivi anersaakkut qimarnuffiupput. Naak naammalluinnanngitsunik ilaasortaqaraluarlutik, eqqissisimaffiupput asannittumillu pissuseqartuullutik. Taamaattumik ataatsimeeqataagajuttunngorit tussiaasiortullu oqaasii nammineerlutit misigikkit: „Iluarlunilu nuannillaraaq qatanngutigiit isumaqatigiillutik najortigiileraangata. . . . [Jehovap] tassunga tunniussimavaa pilluaqqussut — inuussutissaq soraajuitsoq.“ — Tussiaat 133:1, 3. (wD 15/8 93)