Nikallujuissuseq – kristumiunut pingaarluinnartoq

’Uppersutsissigut . . . nikallujuigitsi.’ — 2 PÎTRUSE 1:5, 6.

1, 2. Sooq tamatta naggatissamut allaat nikallujuittariaqarpugut?

NAKKUTILLIISUP angalasartup nuliatalu kristumioqatimik ilaat 90-t sinnerlugit ukiulik pulaarsimavaat. Taanna ukiorpassuit tamakkiisumik kiffartuussisimavoq. Oqaloqatigiitsillutik qatanngutip utoqqalisup ukiut ingerlaneranni immikkut pisinnaatitaaffimmi ilaat eqqartulerpai. Qullililluni ajuusaarpasilluni oqarpoq: „Maannakkulli iliuuseqarpiarsinnaajunnaarpunga.“ Nakkutilliisup angalasartup biibiliutini qupperlugu Matîuse 24:13-imi Jesusip oqaasii atuarpai: ’Naggatissamulli aalajangersoq annakkumaarpoq.’ Taava nakkutilliisup qatanngut asanartoq isigalugu ima oqarfigaa: „Qanoq annertutigisumik annikitsigisumilluunniit iliuuseqarsinnaanerput apeqqutaanani tamatta anguniagassarput pingaarneq, tassa naggatissamut aalajaannissaq.“

² Aap, kristumiuugatta tamatta aaqqissuussaanerup matuma naggatissaanut imaluunniit inuunitta naggatissaanut aalajaattariaqarpugut. Aatsaat taamaaliorutta Jehovamit iluarineqarsinnaavugut annanneqassallutalu. Inuunerput pillugu arpappugullusooq, ’nikallujuerlutalu arpattariaqarpugut’ apuuffissaq tikivillugu. (Eprîarit 12:1) Apustilip Peterip pissutsip tamatuma pingaaruteqassusia erseqqissarpaa kristumioqatini ima kajumissaarlugit: ’Uppersutsissigut . . . nikallujuigitsi.’ (2 Pîtruse 1:5, 6) Nikallujuissuserli sunarpiaava?

Nikallujuissuseq — sunaava?

3, 4. Nikallujuissuseq qanoq paasisariaqarpa?

³ Nikallujuilluni atugaqarneq qanoq paasisariaqarpa? Grækerit oqaasiat hy·po·meʹno nikallujuinnermik nutserneqartartoq eqqortumik isumaqarpoq „atajuarpoq“. Biibilimi oqaaseq tamanna 17-eriarluni atorneqarpoq. Qinerlerfissialiortut W. F. Arndt, F. W. Gingrich aamma F. Danker naapertorlugit isumaqarpoq „qimaanani uninngavoq, uterianngilaq, qasujuisaarpoq“. Grækerit taggisaat hy·po·mo·neʹ, nikallujuinneq, 30-eriarluni atorneqarpoq. William Barclayp atuakkiaani A New Testament Wordbook-mi ima allassimasoqarpoq: „Tassaavoq attassisinnaassuseq, naammaginniinnarfiunngitsoq aammali tunuarnani neriuuteqarluarfiusoq . . . Taama pissusilik anorimut assorsinnaavoq atajuarluni. Allaat sualuttumik misilinneqarneq ataqqinaatinngortissinnaavaa naalliunnerup siornani anguniakkani takusinnaagamiuk.“

⁴ Nikallujuissuseq ikiortigalugu ataannarsinnaavugut akornutit artornartullu pissutigalugit neriuutaarunnata. (Rûmamiut 5:3-5) Maannakkut naalliunnitta siorna anguniagarput — tassa akissarsiaq, qilammi nunamiluunniit inuunermik naassaanngitsumik tunissut — takusinnaassavarput. — Jâko 1:12.

 Nikallujuissuseq — sooq?

5. (a) Sooq kristumiutut tamatta nikallujuinnissaq pisariaqartipparput? (b) Misilinneqarnivut immikkoortunut marlunnut qanoq avinneqarsinnaappat?

⁵ Kristumiuugatta tamatsinnut ’ilalaarneq pisariaqarpoq’. (Eprîarit 10:36) Sooq? Pingaartumik ’tamalaanik misilinneqartaratta’. Jâko 1:2-mi grækerit oqaasiat isumaqarsinnaavoq naammattuugaq ilimaginngisaq kissaatiginngisarluunniit, soorlu inuup ujajaasoq naammattoorpagu. (Naleqqiuguk Lúkarse 10:30.) Marlunnik assigiinngitsunik misilinneqartarpugut: misilinneqarnerit ajorti kingornussaasoq pissutigalugu inunnut nalinginnaasut taavalu Guutimut tunniusimanerput pissutigalugu misilinneqarnerit. (1 Korintumiut 10:13; 2 Timûtiuse 3:12) Misilinneqarnerit soorlu suut?

6. Nalunaajaasoq ataaseq nappaammik annertuumik nalaanneqarami qanoq nikallujuittariaqarsimava?

⁶ Perulunnartumik nappaateqarneq. Timoteusitut kristumiut ilaat ’ajukuluttarput’. (1 Timûtiuse 5:23) Ingammik ataavartumik, immaqalu anniaateqarnaqisumik, nappaateqarutta Guuti ikiortigalugu nikallujuittariaqartarpugut, kristumiutut neriuuterput tammaqqunagu. Eqqarsaatigeriaruk nalunaajaasut ilaat 50-it sinnilaarlugit ukiulik sivisuumik kræftimut akiuuttoq. Marloriarluni pilatsinnermini aalersortikkumannginnini aalajangiusimavaa. (apustilit suliait 15:28, 29) Kræftili naavata iluani naaqqippoq qiteraliilu angullugit siaruaalluni. Timikkut anniarnerit nipaallisarneqarsinnaangitsut oqaluttuarineqarsinnaanngitsut misigisarpai. Taamaattorli anniarnermi siornani silarsuassami nutaami inuunissamik akissarsiassani siumut isigiuarpaa. Nakorsat, napparsimasunik paarsisut pulaartullu neriuutiminik nalunaajaaffigisarpai. Toqunini tikivillugu nikallujuippoq. Immaqa illit taassumatut asanartuusutut toqussutaasumik anniaateqarnartumilluunniit nappaateqanngikkaluarputit, taamaattorli nikallujuinnerit annertuumik misilinneqariaannaavoq.

7. Anersaakkut qatanngutitta anniarneq qanoq ittoq nikallujuillutik atortariaqartarpaat?

⁷ Misigissutsikkut anniarneq. Ilaannikkut Jehovap innuttaasa ilaat ’uummatikkut aliasullutik nikallungasarput’. (Ussatit 15:13) Ulluni makkunani ’ajornartuni’ isumatsangaarsimaneq nalinginnaaqaaq. (2 Timûtiuse 3:1) Science News-imi, 1992-imi decembarip 5-anneersumi, ima allassimavoq: „Isumatsangaarsimaneq, ilaatigut sulisinnaajunnaarsitsisartoq, kinguaariit 1915-imiit inunngorsimasut tamarmik atortorujussuuaat.“ Isumatsanneq assigiinngitsunik pissuteqartarpoq, ilaannikkut timikkut pissuteqarluni, ilaannikkut misigisimasanik annernartunik nuanniitsunillu pissuteqarluni. Kristumiut ilaasa ullut tamaasa misigissutsikkut anniarneq nikallujuiffigisariaqartarpaat. Nakkaannanngillalli. Qullilisaraluarlutik Jehovamut ilumoortuarput. — Naleqqiuguk Tussiaat 126:5, 6.

8. Aningaasatigut misilinneqarneq suna nikallujuinniarfigisinnaavarput?

⁸ Aamma aningaasanik ajornartorsiuteqangaarnermit eqqorneqarsinnaavugut. USA-mi New Jersey-mi qatanngut angut tassanngaannaq suliffissaaruppoq soorunamilu ilaquttami pilersorneqarnissaat angerlarsimaffeerunnissanilu isumakuluutigilerlugit. Taamaattoq Naalagaaffimmik neriuutini katanngilaa. Allamik suliffissiuutigaluni periarfissani atorlugu ikiorti-pioneritut kiffartorpoq. Kiisamilu suliffissarsivoq. — Matîuse 6:25-34.

9. (a) Asasamik toqukkut annaasaqarneq qanoq ililluni nikallujuinniarnartuusinnaava? (b) Allassimaffiit suut ersersippaat aliasulluni qianeq kukkunerunngitsoq?

⁹ Asasavit ilaat toquppat eqqanniittunit sivisuneroqisumik nikallujuissuseq pisariaqartissavat. Immaqalu ukiut tamaasa ullup toquffiata nalaani artorsartarputit. Annaasaqarnermik taama ittumik nikallujuilluni atuineq isumaqartariaqanngilaq aliasulluni qullilisarnissaq eqqunngitsuusoq. Asasatta  toquneranik aliasuutiginninneq pissusissamisoorpoq, tassaananilu makinnissamik neriuuteqarluannginneq. (1 Moses 23:2; naleqqiuguk Eprîarit 11:19.) Lazarus toqummat Jesus ’qullilisimavoq’, naak Marta ima oqarfigalugu: ’Qatanngutit makissaaq’. Lazarusilumi makissimavoq! — Juánase 11:23, 32-35, 41-44.

10. Sooq Jehovap innuttai nikallujuinnissaminnut asseqanngitsumik pisariaqartitsippat?

¹⁰ Misilinneqarnerit inunnut tamanut nalinginnaasut saniatigut Jehovap innuttai immikkut nikallujuittariaqarput. ’Inuiaqatigiit tamarmik uumissussavaasi atera pillugu,’ Jesus taama mianersoqqusisimavoq. (Matîuse 24:9) Aamma ima oqarsimavoq: ’Uanga qinugigaminnga ilississaaq qinugiumaarpaasi.’ (Juánase 15:20) Uumissuineq malersuinerlu sooq pisarpat? Guutimut kiffaagatta nunarsuarmi sumiluunniit inuugaluarutta Satanip Jehovamut assuarnaakkunnaartinniarmatigut. (1 Pîtruse 5:8; naleqqiuguk sarĸúmersitat 12:17.) Taamaaliorniarluni Satanip akulikitsumik malersuineq pilersittarpaa, nikallujuissuserput misilinniarlugu.

11, 12. (a) Jehovap Nalunaajaasui meeraallu 1930-kkunni 1940-kkullu aallartinneranni qanoq misilinneqarsimappat? (b) Sooq Jehovap nalunaajaasui nunap ilisarnaataanik ilannikkumanngillat? (Ataani ilanngussaq takuuk.)

¹¹ Assersuutigalugu, 1930-kkunni 1940-kkullu aallartilerneranni USA-mi Candamilu Jehovap nalunaajaasui meeraallu annertuumik malersorneqalersimapput nalunngeqatiginnissusertik pissutigalugu nunap ilisarnaataanik ilassinnikkumannginnamik. Nalunaajaasut nunamut inuuffigisaminnut ilisarnaatit ataqqivaat, najoqqutassiarli Guutip oqaasiani 2 Moses 20:4, 5-imi maleruarpaat: „Ilinnut guutiliuutissanngilatit qiperukkanik assilissanilluunniit, suulluunniit qilammi pavani nunamiluunniit maani imersuarmiluunniit nunap ataani ittut assinginik. Tamakku pallorfigissanngilatit guutisiorfiginagillu, uanga [Jehova] Guutit Guutiugama ilungersortoq.“ Jehova Guuti kisiat pallorfigerusukkamikku atuartut ilaat nalunaajaasuusut atuarfinnit anisitaammata, nalunaajaasut namminneq taakkununnga atuarfiliortalerput. USA-mi eqqartuussisut qullersaasa taakkua upperisarsiornikkut aalajangiusimasaat akueriartulermassuk, soorlu inuiaqatigiit qaammarsagaasut ullumikkut taama  iliortartut, atuartut taakku atuarfinnut nalinginnaasunut uteqqipput. Inuusuttut taakkua sapiillutik nikallujuinnerat maligassaalluartuuvoq, ingammik inuusuttunut kristumiuusunut Biibilip najoqqutassiaanik noqqaassutiginnittunut illaruaatigineqartunullu. — 1 Juánase 5:21.

¹² Misilinneqarnerit assigiinngitsut naammattoortakkavut — inunnut tamanut nalinginnaasut aamma kristumiutut upperisatsinnik pissuteqartut — pissutigalugit nikallujuinneq pisariaqartipparput. Qanorli ililluta nikallujuissinnaavugut?

Naggatissamut nikallujuinneq — qanoq ililluni?

13. Qanoq ililluni Jehovap nikallujuissuseq ilasarpaa?

¹³ Jehovamik pallorfiginninngitsunut naleqqiutissagaanni Guutip innuttai iluaqutissaqarput. ’Guuti erinitsannaveersaasoq’ ikioqqulluta qinnuigisinnaavarput. (Rûmamiut 15:5) Jehovali qanoq ililluni ’erinitsannaveersaava’? Ilaatigut taamaaliorsimavoq naammaggittarnermik maligassaalluartut Oqaatsimini Biibilimi allaatigineqartut aqqutigalugit. (Rûmamiut 15:4) Taakku eqqarsaatigisarutsigik nikallujuinnissatsinnut kajumissisinneqassaagut qanorlu ililluta taamaaliornissarput ilikkarlugu. Immikkut maligassaalluartut ilaat marluk eqqarsaatigeriakkit — Jobip sapiilluni nikallujuinnera taavalu Jesus Kristusip naammalluinnartumik nikallujuinnera. — Eprîarit 12:1-3; Jâko 5:11.

14, 15. (a) Job qanoq misilinneqartarsimava? (b) Jobip misilinneqarnini qanoq nikallujuilluni atortarsimavai?

¹⁴ Jobip suut naammagalugit atortariaqarsimavai? Pigisani tamangajaasa annaagamigit aningaasatigut ajornartorsiulerpoq. (Job 1:14-17; naleqqiuguk Job 1:3.) Annaasaqarnerup annernassusia misigaa meeqqani qulit tamarmik anorersuarmi toqutaammata. (Job 1:18-21) Peruæunnartumik anniaateqarnangaartumillu nappaateqalerpoq. (Job 2:7, 8; 7:4, 5) Nuliatalu Guutimik tunussitinniarsaraa. (Job 2:9) Ikinngutigisimasaasa ajuallannartumik, inussiarniitsumik ilumuunngitsumillu oqaluffigaat. (Naleqqiukkit Job 16:1-3 aamma 42:7.) Taamaattorli Job aalajaattuarluni assuarnaappoq. (Job 27:5) Nikallujuilluni atorsimasai Jehovap innuttaasa ullumikkut nikallujuillutik atortariaqartagaannut assingupput.

¹⁵ Jobip qanoq ililluni misilinneqarnerit tamakku tamaasa nikallujuilluni atorsinnaasimavai? Ingammik neriuumminit atatinneqarpoq. „Orpik neriuutissaqarpoq,“ taama nalunaarpoq. „Kipineqaraluaruni naaqqilersinnaavoq, avalequtitaassaminik uummaasunik amigaateqanngilaq.“ (Job 14:7) Job sumik neriuuteqarami? Versit kinguliisa ilaanni ima allassimavoq: „Toqusoq uummaqqissinnaanerpa? . . . Oqaluffigiumasuugumma akissagaluarpakkit, taava pinngortitat kipilerfigissagaluarpat.“ (Job 14:14, 15) Aap, Jobip maannakkut anniarnermi siornani misigiumaagassani siumut isugai. Nalunngilaa misilinneqarnerit naajumaartut. Annerpaamik toqu tikillugu nikallujuittariaqarpoq. Neriulluarluni ilimagaa Jehovap, toqusimasut makitissallugit kissaateqartup, inuunissamut makitikkumaaraani. — apustilit suliait 24:15.

16. (a) Nikallujuinnissaq pillugu Jobip maligassiaatigut qanoq ilikkagaqarpugut? (b) Naalagaaffimmik neriuut qanoq uagutsinnut piviusuutigisariaqarpa, sooq?

¹⁶ Jobip nikallujuissusiatigut suna ilikkarparput? Naggatissaq tikillugu nikallujuittariaqartugut, neriuuterput attattuartariaqaripput. Aammattaaq eqqaamajuk Naalagaaffimmik neriuutitsinnik tatiginassuseqartitsisoq tassaammat naalliuutit nalaattakkavut ’sivikitsuinnaassammata’. (2 Korintumiut 4:16-18) Neriuutitta nuanningaartup aalajaatsumik tunngavia tassaavoq Jehovap neriorsuutaa — siunissaq qanittoq ’qullernik tamanik isitsinnit allarteriffissaa, toqup peqarunnaarfissaa, aliasuttoqarunnaarlunilu nilliasoqarunnaarlunilu anniartoqarunnaarfissaq’.  (sarĸúmersitat 21:3, 4) Neriuutip tamatuma ’pakatsinanngitsup’ eqqarsaativut sernissortariaqarpai. (Rûmamiut 5:4, 5; 1 Tásalûníkamiut 5:8) Neriuuterput uagutsinnut piviusuulluinnartariaqarpoq — ima piviusuutigisariaqarluni uppernerup isaanit silarsuarmi nutaami immitsinnut takorloorsinnaalluta — nappaatinik isumakuluutinillu naalliuutaarulluta ullullu tamaasa peqqilluinnarluta isumatsigullu eqiingalluarluta itertarluta; aningaasatigut annertuunik ernumassuteqarunnaarluta isumannaatsumilli inuulluta; asasatsinnik toqusoortarunnaarluta makinneralli nuannaaqaluta misigisinnaassallugu. (Eprîarit 11:1) Tamakkuninnga neriuuteqanngikkutta misilinneqarnitsinnit artorsinneqarsinnaavugut akiuukkunnaarlutalu. Neriuuterput akiuuttuaannarnissatsinnik, naggatissamut allaat nikallujuinnissatsinnik, kajumississutissaalluinnartuuvoq!

17. (a) Misilinneqarnerit suut Jesusip nikallujuilluni atorsimavai? (b) Jesusip naalliungaarnera nikallujuilluni atortariaqarsimasaa sumik pissuteqarpa? (Ataani ilanngussaq takuuk.)

¹⁷ Biibilimi kajumissaarneqarpugut Jesus ’aarlorfigeqqullugu’ aamma ’misissorluaqqullugu’. Misilinneqarnerit suut tamaasa nikallujuilluni atorsimavai? Misilinneqarnerisa ilaat ajortimit allallu naammalluinnanngissusiannit aallaaveqarput. Jesusip ’ajortuliortut assortuinerat’ kisiaanngitsoq aammali ajoqersukkami akornanni ajornartorsiutit, ilaatigut kina arlartik annerunersoq pillugu assortuuttuarneri, nikallujuilluni atortariaqartarsimavai. Ingammillu, nalissaqanngitsumik uppernikkut misilinneqarsimavoq. ’Qisuk anniartitsivik nikallujuilluni atorsimavaa.’ (Eprîarit 12:1-3, NV; Lúkarse 9:46; 22:24) Kikiattorneqarluni Guutimillu mitallersutut eqqartuunneqarluni timikkut isumakkullu anniarneq takorluuinnassalluguluunniit ajornakusoorpoq. *

18. Apustili Paulus naapertussagaanni suut marluk Jesusimik nakussatsitsisuusarsimappat?

 ¹⁸ Suna Jesusip naggataanut allaat nikallujuissutigaa? Marluk Jesusimik napatitsisut apustili Paulusip taavai: ’qinnutit kutsiuutillu’ aammalu ’tipaatsuutissaq imminut saqqangiussaq’. Jesusip, Guutip Ernerata naammalluinnartup, ikioqqunissani kanngusuutiginngilaa. ’Nillingaartarluni qullilillunilu’ qinusarsimavoq. (Eprîarit 5:7; 12:2) Ingammik misilinneqarnini ingasappallaaleraangata nakussatsinneqarnissaminik ilumoorluni qinusaqattaarnissani pisariaqartutut isigisarsimavaa. (Lúkarse 22:39-44) Jesusip qinnutaanut akissutitut misilinneqarneri Jehovap peertarsimanngilai, nikallujuillunili atornissaanut nakussatsittarsimallugu. Aamma Jesus nikallujuissinnaasimavoq qisuk anniartinneqarfini qulaallugulusooq siumut isigaluni akissarsiassani eqqarsaatigisimagamiuk — nuannaarutissani, Jehovap aqqanik illernarsisitseqataanissani inuiannillu toqumit utertitsinissani, eqqarsaatigisimagamigit. — Matîuse 6:9; 20:28.

19, 20. Nikallujuinnissap qanoq nassataqarnera pillugu piviusorsiortumik isiginninnissatsinnut Jesusip maligassiaata qanoq ililluni ikiorpaatigut?

¹⁹ Jesusip maligassiaatigut nikallujuissutsip qanoq nassataqarneranik piviusorsiortumik isiginninnissatsinnut iluaqutigisinnaasavut ilikkarpavut. Nikallujuinnissamik ilinniarneq oqitsuunngilaq. Oqimaatsumik misilinneqarutta iluaqutigissavarput nalunnginnatsigu aamma Jesusimut artornarsimasoq. Naggataanut allaat nikallujuinniarluta nukissatsinnik qinusaqattaartuartariaqarpugut. Misilinneqarnitsinni ilaannikkut misigisarpugut qinunissatsinnut qinngaqqunnarluta. Jehovalli uummatitsinnik ammaanissatsinnik kajumissaarpaatigut soqutigigamisigut. (1 Pîtruse 5:7) Oqaatsiminilu neriorsuinini pissutigalugu uppernermikkut imminut torlulaffiginnittunik ’pissaanermik angingaartumik’ nakussatsitsinissaminnut imminut pisussaatippoq. — 2 Korintumiut 4:7-9.

²⁰ Ilaannikkut qiartalertaraluarlugu nikallujuinniartarpugut. Qisummi anniartitaaneq immini Jesusimut nuannaarnissamut pissutissaanngilaq. Nuannaarnissaanulli pissutissiisoq tassa akissarsiassaq siornaniittoq. Uagut misilinneqarnitsinni nuannaartuaannarnissarput naatsorsuutigissallugu piviusorsiornerunngilaq. (Naleqqiuguk Eprîarit 12:11.) Taamaakkaluartorli akissarsiassap siumut eqqarsaatigineratigut allaat misilinneqarnerni annertuuni ’tipaatsuinnarsinnaassaagut’. (Jâko 1:2-4; apustilit suliait 5:41) Pingaaruteqartoq tassaavoq aalajaattuaannarnissarput — allaat qiartaqartassagaluarpalluunniit. Jesusimi oqanngilaq ’qianikinnerusoq annakkumaartoq’ oqarlunili ’naggatissamut aalajangersoq annakkumaartoq’. — Matîuse 24:13.

21. (a) Nikallujuissutsimut suna ilaateqqullugu 2 Pîtruse 1:5, 6-imi kajumissaarneqarpugut? (b) Apeqqutit suut ilanngutassiami tulliuttumi sammineqassappat?

²¹ Nikallujuissuseq annannissamut pingaaruteqartorujussuuvoq. Ny Verden-nutsigaq naapertussagaanni 2 Pîtruse 1:5, 6-imi kajumissaarneqarpugut Guutimut tunniusimaneq nikallujuissutsitsinnut ilaateqqullugu. Guutimut tunniusimaneq sunaagami? Nikallujuissutsimut qanoq ililluni atassuteqarami? Ilanngutassiami tulliuttumi tamanna sammineqassaaq. (wD 15/9 93)

[Quppernerup ataani ilanngussaq]

Qanoq akissavit?

□ Nikallujuissuseq qanoq paasisariaqarpa?

□ Sooq Jehovap innuttaasa nikallujuinnissaq asseqanngitsumik pisariaqartippaat?

□ Job qanoq ililluni nikallujuissimava?

□ Nikallujuissutsip piviusorsiortumik isiginissaanut Jesusip maligassiaata qanoq ililluni ikiorpaatigut?

[Atuaqqissaarnermi apeqqutit]

[Qupp. 10-mi assiliartaq]

Naalagaaffimmik atuarfiit 1930-kkunni 1940-kkunnilu pilersinneqarput meeqqat nunap ilisarnaataanik ilassinnikkumannginnertik pillugu atuarfimmit anisitaasimasut ilinniartinniarlugit

[Qupp. 12-mi assiliartaq]

Ataatami ataqqinartinnissaa aalajangiusimallugu Jesus nikallujuissinnaajumallugu nakussatseqqulluni qinusarsimavoq