Nikallujuissutsinnut Guutimut tunniusimaneq ilaatiguk

’Uppersutsissigut . . . nikallujuillusilu Guutimut tunniusimaniaritsi.’ — 2 PÎTRUSE 1:5, 6, NV.

1, 2. (a) 1930-kkunni 1940-kkunnilu Jehovap nalunaajaasui nunani nazistit pissaaneqarfigisaanniittut qanoq pineqartarsimappat, sooq? (b) Taamatut peqqarniitsumik pineqarnertik Jehovap innuttaasa qanoq atorpaat?

1900-kkut oqaluttuarisaanerata ilagaa avaanngunartuuvoq. 1930-kkut aallartinneranni Jehovap nalunaajaasui nunani nazistit pissaaneqarfigisaanniittut tuusintilikkuutaat pissutissaqanngitsumik tigusarineqartarput katersuutsitsivinnullu isertinneqartarlutik. Sooq? Sapiillutik akulerukkumannginnamik Hitlerimillu ilassinnikkumannginnamik. Qanoq iliorfigineqarpat? „Parnaarussat allat . . . Biibilimik Atuaqqissaartutulli [Jehovap nalunaajaasuisulli] SS-sakkutuunit peqqarniitsigisumik pineqarneq ajorput. Timikkut peqqarniilluinnartumik anniartitaallutillu isumakkut naalliutsitaasarput nunarsuarmi oqaatsinit sunilluunniit nassuiarneqarsinnaanngitsumik.“ — Karl Wittig, naalakkersuisut officererisimasaat.

² Nalunaajaasut qanoq pippat? Atuakkiamini Nazi State and the New Religions: Five Case Studies in Non-Conformity-mi Dr. Christine E. King ima allassimavoq:“Taamaallaat Nalunaajaasunut [upperisarisortut allat eqqarsaatigissagaanni] naalakkersuisut iluatsitsinngillat.“ Aap, Jehovap Nalunaajaasui ataatsimut isigalugit aalajaattuaannarput, naak ilatik hundredelikkuutaat toqu tikillugu nikallujuittariaqarsimasut.

3. Jehovap nalunaajaasui sakkortuumik misilinneqarneranni suup nikallujuitsippai?

³ Suup Jehovap nalunaajaasui nazistit nalaanni Tysklandimiinnaanngitsoq nunarsuarmili tamarmiittut misilinneqarnerni taamaattuni nikallujuitsissimavai? Guutimut tunniusimanerat pillugu Ataataata qilammiusup nikallujuinnissaannik ikiorsimavai. ’Jehovap mianerinnitsini ussernartumit annaanneq nalunngilaa,’ apustili Peter nassuiaavoq. (2 Pîtruse 2:9) Allakkamini taakkunani siusinnerusukkut Peterip kristumiut ima unnersuuppai: ’Uppersutsissigut . . . nikallujuillusilu Guutimut tunniusimaniaritsi.’ (2 Pîtruse 1:5, 6, NV) Tassa nikallujuissuseq Guutimut tunniusimanermut atalluinnarpoq. Taamaattumik naggatissamut allaat nikallujuikkumagutta Guutimut tunniusimaneq noqqaassutigisariaqarparput. (1 Timûtiuse 6:11, NV) Guutimulli tunniusimaneq qanorpiaq paasisariaqarpa?

4, 5. Guutimut tunniusimaneq suua?

⁴ Oqaaseq grækerisooq „Guutimut tunniusimaneq”-mik nutserneqartoq (eu·seʹbei·a) aamma toqqaannartumik nutserneqarsinnaavoq „ataqqinnilluarneq“-mik. * (2 Pîtruse 1: 6) Tassaavoq Guutimut qamuuna asannittumik misigissuseqarneq. W. E. Vine naapertussagaanni pissusilerissut eu·se·besʹ toqqaannartumik isumaqarpoq „ataqqinnilluartoq“, assigaa „ilungersuussineq, Guutimik ataqqinningaarnermit pisoq, tunniusimalluni suliaqarnikkut ersertartoq.“ — 2 Pîtruse 2:9.

⁵ Taamaattumik oqariaaseq „Guutimut tunniusimaneq“ isumaqarpoq Jehovamut mianerinnilluni ataqqinninneq imaluunniit pallorfiginninneq taassuma iluarisaanik iliornissamut killiisoq. Naak artornartunik misilinneqaraluarluta tamanna ersersissinnaavarput Guuti uummatitsigut asagatsigu. Tassaavoq Jehovamut ilumoorluni inuttut tunniusimaneq inooriaatsitsigut ersersittagarput. Kristumiut ilumoortut kajumissaarneqarput qinusaqqullugit ’ersiornaatsumik eqqissisimaarnartumillu inooqqullutik Guutimut tunniusimajuarlutik’. (1 Timûtiuse 2:1, 2, NV)) Oqaatsinik qinerlerfissialiortut J. P. Louw aamma E. A. Nida naapertussagaanni“oqaatsit ilaannut [eu·seʹbei·a] 1 Tm 2.2-mi naleqquttumik nutserneqarsimavoq ’Guutip piumasaatut inuuneq’ imaluunniit ’Guutip oqarneratut inuuneq’.“

6. Nikallujuissuseq Guutimullu tunniusimaneq qanoq imminnut atassuteqarpat?

⁶ Nikallujuissutsip Guutimullu tunniusimanerup imminnut atassuteqarnerat maanna paasisinnaalerulerparput. Guutip piumasaatut inuugatta — Guutimut tunniusimalluta — silarsuarmit uumissorneqartarpugut uppernitsinnut misilinneqaataanngitsoortanngitsumik. (2 Timûtiuse 3:12) Inuttulli Ataatatsinnut qilammiusumut tunniusimasumik attaveqanngitsuugutta misilinneqarnerit taamaattut nikallujuilluta atornissaannut kajumississutissaqassanngikkaluarpugut. Ingammillu, Jehovap qamuuna uummatimikkut tunniusimasut qisuariarfigisarpai. Takorlooriaruk qanormita misigisarpa qanorluunniit akerlilersorneqaraluarlutik imminut tunniusimanertik pissutigalugu nammineq iluarisaminik iliornissaminnik ilungersuutiginnittut qilammit isiginnaaraangamigit. Tupinnanngitsumik inuit imminut tunniusimasut misilinneqarneranni annaakkumassaqai!

7. Sooq Guutimut tunniusimaneq ineriartortinneqartariaqarpa?

⁷ Guutimulli tunniusimaneq inunnguuserinngilarput, angajoqqaatsinnilluunniit kingornussinnaanagu. (1 Moses 8:21) Ineriartotinneqartussaavorli. (1 Timûtiuse 4:7, 10) Guutimut tunniusimaneq nikallujuissutsitsinnut uppernitsinnullu ilaliutitinniarlugu iliuuseqartariaqarpugut. Peterip oqarneratut ’ilungersuutigingaarlugu’. (2 Pîtruse 1:5) Qanorli ililluta Guutimut tunniusimaneq ineriartortissinnaavarput?

Guutimut tunniusimaneq qanoq ineriartortissinnaavarput?

8. Apustili Peter naapertussagaanni suna Guutimut tunniusimanermik ineriartortitsissutaasinnaava?

⁸ Apustili Peterip Guutimut tunniusimanermik ineriartortitsissutissaq nassuiarpaa: ’Saammaannarsingaarlusilu eqqissingaaritsi Guutimik Naalakkssinnillu Jesusimik ilisarsinikkut. Taassuma Guutiusup pissarsuup inuussutissanillu mianerinnissutissanillu tamanik tunimmatigut naalannassutsimigut ajunngingaarsutsimigullu qaaqqusisitsinnik ilisarsinikkut.’ (2 Pîtruse 1:2, 3) Uppernitsinnut nikallujuissutsitsinnullu Guutimut tunniusimaneq ilaliutitinniarlugu Jehova Guuti Jesus Kristusilu pillugit eqqorluartumik, tamakkiisumik ilisimasaqalertariaqarpugut.

9. Guutimik Kristusimillu eqqorluartumik ilisarsineq tassaannaanngitsoq kikkuunerannik ilisimanninneq qanoq ililluni assersuusiorfigineqarsinnaava?

⁹ Guuti Kristusilu pillugit eqqorluartumik ilisarsineq qanoq paasisariaqarpa? Soorunami taakkuninnga ilisarisimanninnerinnaq pineqanngilaq. Manna assersuutigeriartigu: Qularnanngitsumik sanilit kinaasoq  nalunngilat aqqalu taallugu ilassisimallugu. Aningaasarpassuarnilli atortikkumassagaluarpiuk? Soorunami inuttut ilisarisimalluinnarukku aatsaat atortikkumassagaluarpat. (Naleqqiuguk Ussatit 11:15.) Taamatuttaaq Jehovamik Jesusimillu ilisarisimannilluinnarneq tassaannaanngilaq piunerannik upperinninneq aqqinillu ilisimanninneq. Misilinneqarnitsinni toqumut allaat taakku pillugit nikallujuittuaannarnissatsinnut piumassuseqassaagut aatsaat qanimut ilisarisimalluinnarutsigik. (Juánase 17:3) Taakkuninnga ilisarisimannilluinnarneq sunik nassataqarpa?

10. Jehovamik Jesusimillu eqqorluartumik ilisarsinermut suut marluk ilaappat, sooq?

¹⁰ Eqqorluartumik, imaluunniit tamakkiisumik, Jehovamik Jesusimillu ilisarisimanninneq tassaavoq: (1) kinaassusilittut ilisarisimallugit — pissusii, misigissusii, ilioriaasiilu — aamma (2) tamakku ilaarlugit. Guutimut tunniusimaneq tassaavoq inuttut qamuuna Jehovamut atasutut misigineq inooriaatsikkut ersarissumik takussaasoq. Taamaattumik Guutimut tunniusimaneq ineriartortissagutsigu Jehova kinaassusilittut ilisarisimasariaqarparput aammalu piumasaa ilioriaasiilu inuup pisinnaasaa naapertorlugu sapinngisamik paasiniarluartariaqarlugit. Jehova assilillugu pinngortitaagatta ilisimassut taamaattoq atortariaqarparput pissuseqatiginiartiaqarlugulu. (1 Moses 1:26-28; Kulorsamiut 3:10) Jesusillu Jehova oqaatsikkut iliuutsikkullu ilaaqqissaarsimammagu Jesusimik ilisarisimannilluarneq Guutimut tunniusimanermik ineriartortitsinissamut iluaqutaalluassaaq. — Eprîarit 1:3.

11. (a) Guutimik Kristusimillu eqqorluartumik ilisarsinitsigut qanoq siumukarsinnaavugut? (b) Sooq atuakkatsinnik eqqarsaatiginneqqissaarnissarput pingaaruteqarpa?

¹¹ Qanorli ililluta Guutimik Kristusimillu eqqorluartumik ilisarisimanninnitsigut siumukarsinnaavugut? Biibilimik Biibililersaarutinillu atuaqqissaartarnikkut. * Biibilimillu atuaqqissaartarnerput Guutimut tunniusimanermik kinguneqassappat pingaaruteqartorujussuuvoq atuakkatta eqqarsaatigeqqissaartarnissaannut piffissalertarnissarput. (Naleqqiuguk Josua 1:8.) Sooq tamanna pingaaruteqarpa? Eqqaamajuk Guutimut tunniusimaneq tassaammat Guutimut qamuuna asannittumik misigissuseqarneq. Eqqarsaatiginneqqissaarneq Biibilimi assersuutaasumik uummammut — ilukkut kinaassutsimut — atassuteqartinneqartuartarpoq. (Tussiaat 19:14; 49:4; Ussatit 15:28) Atuakkavut pingaartillugit eqqarsaatigeqqissaartarutsigik qamuuna kinaassutsitsinnut anngutissapput, misigissutsikkut attorneqarlutalu killitsissaagut eqqarsaatitsigullu sunnerneqassalluta. Aatsaat taamaaliortarutta atuaqqissaartarnerput Jehovamut qanittutut misigisimanitsinnut nakussatsissutaassaaq aammalu unamminiarnartunik nalaanneqaraluaraangattaluunniit imaluunniit assiginngitsunik misilinneqaraluaraangattaluunniit Jehovap iluarisaanik iliortuaannarnissatsinnut killissutigissallugu.

Angerlarsimaffimmi Guutimut tunniusimaneq

12. (a) Paulus naapertussagaanni kristumiup qanoq ililluni angerlarsimaffimmini Guutimut tunniusimaneq atortariaqarpaa? (b) Sooq kristumiut ilumoortut angajoqqaaminnik isumassuisarpat?

¹² Guutimut tunniusimaneq siullermik angerlarsimaffimmi atorneqartariaqarpoq. Apustili Paulus ima oqarsimavoq: ’Uillarneqarpalli qitornalimmik ernutalimmilluunniit, taakku ilinniaqqaarallarlit inoqutiminnut [Guutimut tunniusimasutut] iliussallutik angajoqqaatillu akiniarluassallugit, tamannami Guutimi iluarisaammat.’ (1 Timûtiuse 5:4) Angajoqqaanik utoqqalisunik isumassuineq  Paulusip oqarneratut Guutimut tunniusimanermik ersersitsineruvoq. Kristumiut ilumoortut taamatut isumassuisarput imaanngitsoq pisussaaffiinnartut isigigamikku aammali angajoqqaaminnik asanninnertik pissutigalugu. Aammalu . . . nalunngilluinnarpaat angajoqqaaminnik pisariaqartitsiffiini ikiuiumanngikkunik assigiinnassagaa ’uppernermik soraarussineq’.— 1 Timûtiuse 5:8.

13. Sooq angerlarsimaffimmi Guutimut tunniusimanermik atuiniarneq unamminiarnartuusinnaava, angajoqqaanilli isumassuineq qanoq nalerisimaarnartumik kinguneqartarpa?

¹³ Nassuerutigisariaqarporli angerlarsimaffimmi Guutimut tunniusimanerup atornissaa oqitsuinnaasanngitsoq. Immaqa ilaqutariinnut ilaasortat imminnut qaninngitsuni najugaqarput. Immaqa qitornat inersimasut meeqqiorput aningaasatigullu artornartorsiorlutik. Angajoqqaat isumassorneqarnissaminnik pisariaqartitaat ima annertutigisinnaapput isumassuiniartumut timikkut, isumakkut misigissutsikkullu artorsiisinnaallutik. Taamaakkaluartorli nalerisimaarnartuuvoq nalunagu angajoqqaanik isumassuineq tassaannaangitsoq ’akiniaalluarneq’ aammali ’qilammi nunamilu ataataasut tamarmik ateqaatigisaannut’ nuannaartitsisoq.’ — Evfisumiut 3:14, 15.

14, 15. Qitornat Guutimut tunniusimallutik angajoqqaaminnik isumassuisimasut oqaluttuarikkit.

¹⁴ Maligassiaq attortinnaqisoq eqqarsaatigeriaruk. Ellisip qatanngutaasalu tallimat unamminiarnartoq suliarisussanngorpaat, tassa ataatartik imminni paarisussanngoramikku. „1986-imi ataataga nappaammit eqqorneqarami timaa tamarmi nukillaarpoq,“ Ellis nassuiaavoq. Qitornaasa ataatsimut ataatartik pisariaqartitaanik isumagisarpaat, nikittaallutik uffartarlugu nalaannarnerminilu pussortunnginnissaa pillugu innanganera nikiseqattaartarlugu. „Atuffattarparput, oqaluuttarlugu nipilersukkanillu tusarnaartittarlugu. Avatangiisimini qanoq pisoqarnera qanoq ilisimatigineraa naluarput, ilisimalluinnartutulli pisarparput.“

¹⁵ Sooq ataatartik taamatut isumassorpaat? Ellis nangippoq: „1964-imi anaanatta toqunerata kingorna ataatap kisimiilluni perorsalerpaatigut. Taamanikkut 5-iniit 14-inut ukioqarpugut; najortuaannarpaatigut; maannalu uagut najorparput.“ Soorunami taamatut isumaginninneq oqitsuunngilaq, ilaannikkullu qitornaasut qanoq iliornissartik nalulersinnaasarpaat. „Nalunngilarpulli ataatatta atugai taamaattuaannarnavianngitsut,“ Ellis oqarpoq. „Piffissaq ataatatta peqqisseqqiffaa anaanatsinnillu takunneqqiffissarput qilanaareqaarput.“ (Jesaja 33:24; Juánase 5:28, 29) Taamatut imminut pilliutigeriaannaalluni angajoqqaamik isumassuineq meeqqanik angajoqqaaminnik ataqqinneqqusisimasumut ilumut uummatikkut nuannaartitsissaaq! — Evfisumiut 6:1, 2.

Guutimut tunniusimaneq kiffartornerlu

16. Kiffartornermi iliuuseqarnitsinnut suna pingaarnerusumik pissutaasariaqarpa?

¹⁶ Jesusip imminik ’malinninnissamut’ qaaqqusissutaa ilassigatsigu Guutip Naalagaaffik pillugu nutaarsiassamik oqaluussissutiginneqqusissutaa ajoqersuganngortitsiortoqqusissutaalu naammassiniagassarilerparput. (Matîuse 16:24; 24:14; 28-19, 20) Ersarippoq kiffartoqataaneq tassaasoq ’ulluni kingullerni’ makkunani kristumiut pisussaaffiat. (2 Timûtiuse 3:1) Oqaluussinerpulli ilinniartitsinerpullu pisussaaffiinnartut isigisariaqanngilarput. Jehovamik asannilluinnarneq kiffartornermi qanoq iliuuseqarnitsinnut qanorlu annertutigisumik iliuuseqarnitsinnut pissutaasariaqarpoq pingaarneq. ’Uummatimmi ulikkaarutaanit qaneq oqaluttaraaq,’ Jesus oqarsimavoq. (Matîuse 12:34) Aap, uummaterput Jehovamik asanninnermik ulikkaarpat aallanut nalunaajaassutiginissaanut kajumississaagut.  Iliuuseqarnitsinnut Guutimik asanninninneq pissutigigutsigu kiffartornerput Guutimut tunniusimanitsinnut ersiutaalluassaaq piviusoq.

17. Kiffartornermut pissutissaq eqqortoq qanoq ililluta ineriartortissavarput?

¹⁷ Qanoq ililluta kiffartornermut eqqortumik pissuteqarneq ineriartortissinnaavarput? Jehovap imminik asanninnissaminut pissutissiissutai pingasut eqqarsaatigeriarikkit. (1) Jehova asavarput uagutsinnut iliuusereriigai pissutigalugit. Utertitsissutissamik pilersitsinermigut asanninneq ersersitaa allanit nallernissaqanngilaq. (Matîuse 20:28; Juánase 15:13) (2) Jehova asavarput maannakkut uagutsinnut iliuuserisai pillugit. Jehovap qinnutitsinnik akisisartup oqaloqatiginissaanut kiffaanngissuseqarpugut. (Tussiaat 65:3; Eprîarit 4:14-16) Naalagaaffiup soqutigisai salliutikkutsigik inuunermi pisariaqartut nuannaarutiginerulissavavut. (Matîuse 6:25-33) Ajornartorsiutinik nammanniarnitsinni iluaqutissatsinnik anersaakkut inuussutissalersorneqartuarpugut. (Matîuse 24:45) Aammalu pilluaqqussutisiaavoq nunarsuaq tamakkerlugu kristumiutut qatanngutigiinnut ilaanerput, tamannalu silarsuarmut ilaannginnissatsinnut iluaqutaavoq. (1 Pîtruse 2:17) (3) Jehova aamma asavarput uagutsinnut iliuuseriumaagassai allat pillugit. Taassuma asanninnera pisuulluni ’inuuneq piviusoq tigusinnaavarput’ — siunissami inuuneq naassaanngitsoq. (1 Timûtiuse 6:12, 19) Uagutsinnut ajunngitsussaq pillugu Jehovap asanninnera eqqarsaatigisarutsigu ilumut uummativut killinneqassapput inoqatitsinnut taassuminnga siunertaanillu nuanningaartunik oqaluuserinninnissatsinnut! Kiffartornitsinni qanoq iliuuseqarnissatsinnik allanit kajumissaarneqarnissarput pisariaqassanngilaq, uummatittami killissammatigut sapinngisatsinnik iliuuseqarnissatsinnut.

18, 19. Qatanngutip arnap kiffartoqataanissaminut suna akornutigisimagaluarpaa?

¹⁸ Allaat unamminiarnartunik atugaqarnitsinni uummatitta Guutimut tunniusimasup  oqalunnissatsinnut kajumissisissavaatigut. (Naleqqiuguk Jeremia 20:9.) Tamanna takuneqarsinnaavoq Stellami, arnami kristumiumi ittoortorujussuarmi. Biibilimik atuaqqissaartalerami eqqarsarsimavoq: ’Illumiit illumut angalaarsinnaalernavianngilanga!’ Nassuiaavoq: „Nipaatsorujussuusimavunga. Allanik siulliullunga oqaloqateqarnianngisaannarsimavunga.“ Atuaqqissaartarnini ingerlatillugu Jehovamik asanninnera alliartulerpoq, taassuminngalu allanut oqaluuserinnerusussusia alliartortorujussuanngorluni. „Eqqaamavara uannik Biibilimik atuaqqissaaqatiginnittoq oqarfigalugu: ’Oqaluusserusukkaluaqaanga, kisianni saperluinnarpara, tamannalu aliasuutigeqaara.’ Oqaasia puiunngisaannarpara: ’Stella, qujamasunniarit oqaluusserusussuseqaravit.’“

¹⁹ Sivitsunngitsoq Stella pileriallarami saniliminut oqaluussilluni. Taamaalilluni alloriarnerujussuaq naammassivaa — illumiit illumut oqaluussilluni kiffartornermut peqataaqqaarpoq. (apustilit suliait 20:20, 21) Eqqaamasalikkersaarpoq: „Saqqummiussassara allappara. Naak allattukkakka isigiitigalugit saqqummiunniaraluarlugu annilaangangaarama ammulluunniit qiviarsinnaanngilakka!“ Ullumikkut, ukiut 35-t qaangiuttut, Stella ileqqumisut suli ittooqaaq, oqaluussisarninili nuannarisorujussuuaa siunertaqarluartumillu tamatumani suliaqartuarluni.

20. Misigisap suup ersersippaa allaat malersugaaneq parnaarussaanerluunniit Jehovap nalunaajaasuisa qarnanik matusisinnaanngitsut?

²⁰ Allaat malersugaanerup parnaarussaanerulluunniit Jehovap nalunaajaasuisa tunniusimasut qarni matusinnaanngilaat. Ernst aamma Hildegard Seligerikkut Tysklandimeersut misigisimasaat tusariassagit. Uppernertik pissutigalugu ataatsimut ukiut 40-t nazistit katersuutsitsiviini kommunistillu parnaarsussiviini atorsimavaat. Allaat parnaarussivimmi parnaarussanut oqaluussiuarsimapput. Hildegard eqqaamasalikkersaarpoq: „Parnaarussiviup qullersaasa navianarluinnartutut isigaannga, arnap paarsisup oqarneratut, ulloq naallugu Biibili oqaluuserisarakku. Taamaattumik naqqup ataani ineeqqamut inissinneqarpunga.“ Kiisami iperagaagamik qatanngutit Seligerikkut kristumiutut kiffartornermut piffissartik tamaat atulerpaat. Tamarmik toqussartik tikillugu aalajaallutik kiffartorput, qatanngut Seliger 1985-imi nulialu 1992-imi.

21. Nikallujuissutsitsinnut Guutimut tunniusimaneq ilaliutitinniarlugu qanoq iliortariaqarpugut?

²¹ Guutip oqaasianik sukumiisumik atuaqqissaartarnitsigut pingaartitsillutalu ilikkakkatsinnik eqqarsaatiginneqqissaartarnitsigut Jehova Guutimik Jesus Kristusimillu ilisarsinerput alliartuinnassaaq. Tamatuma kingunerissavaa pissutsimik nuannerluinnartumik — Guutimut tunniusimanermik — annertunerujartuinnartumik pigisaqalernerput. Guutimut tunniusimaneq piginngikkutsigu kristumiutut misilinneqarnerpassuavut artussavavut nikallujuissuseqarnaviannginnatta. Taamaattumik apustilip Paulusip unnersuussutaa maleruarniartigu ’uppernitsinnut nikallujuissuseq ilaliutititsigu nikallujuissutsitsinnullu Guutimut tunniusimaneq ilaliutitillugu’. — 2 Pîtruse 1:5, 6. (wD 15/9 93)

[Quppernerup ataani ilanngussat]

Qanoq akissavit?

□ Guutimut tunniusimaneq suua?

□ Nikallujuissuseq Guutimullu tunniusimaneq qanoq ilillutik imminnut atassuteqarpat?

□ Suna Guutimut tunniusimalissutissaava?

□ Qanoq ililluni kristumiup angerlarsimaffimmini Guutimut tunniusimaneq atorsinnaavaa?

□ Kiffartornermi iliuuseqarnitsinnut suna pissutissaava pingaarneq?

[Atuaqqissaarnermi apeqqutit]

[Qupp. 18-mi assiliartaq]

Ravensbrückimi nazistit katersuutsitsivianni parnaarussaallutik nikallujuissuseq Guutimullu tunniusimaneq pissuserisarpaat