Sooq tullit asasariaqarpiuk?

GUUTIMUT tullitsinnullu asanninnerput naassaanngitsumik inuusinnaanissatsinnut aalajangiisuuvoq. Tamanna ukiut 2000-ingajaat matuma siornagut oqaloqatigiinnerup tunngavigisimavaa.

Angutip juutiusup Mosesip inatsisaanik ilisimasup Jesus Kristus aperaa: ’Qanoq iliussaanga inuuneq naassaanngitsoq kingornussariumallugu?’ Jesus akivoq: ’Inatsisini qanoq allassimava? Qanoq ittut atuarpigit?’ Inatsisit issuarlugit, oqarpoq: ’Guutit asassavat uummatikkut iluunngarlutit tarnikkullu iluunngarlutit nukisillu tamakkerlugit isumakkullu iluunngarlutit; tullullu ilittut asassavat.’ ’Akilluarputit,’ Jesus oqarpoq. ’Taamaaliorit, taava inuussaatit.’ — Lúkarse 10:25-28.

Tassungalu Jesusimik apersuisoq aperivoq: ’Kinami tulleraara?’ Jesus toqqaannartumik akinani assersuusiorpoq angummik juutimik ujajaaffigineqartumik, unataneqartumillu, toqungajallugulu qimanneqartumik. Juutit marluk sanioqqupput — siullermik palasi taava Liivikkuusoq. Marluullutik juuteqatimik qanoq pineqarsimanera takuaat ikiorniarnaguli. Tulliulluni Samariamiu takkuppoq. Naakkinnilluni aqqunarneqarsimasoq mattusersorpaa, akunnittarfiliaallugulu, paarineqarnissaalu isumagalugu.

Jesusip apersuisini aperaa: ’Taakkua pingasut ilaat sorleq taassuma piiaasut qaninngagaata tulleraa?’ Ersarippoq Samariamiu nallittuisoq. Taamaalilluni Jesusip takutippaa tullermik asanninneq inuiaqatigiit nagguigisaannit akornuserneqarneq ajortoq. — Lúkarse 10:29-37.

Tullermik asanninnginneq

Ullumikkut inuiaqatigiit assigiinngitsut akornanni uumissuineq alliartorpoq. Assersuutigalugu qanittukkut nazistit nutaat Tysklandimi angut nunamut uppitillugu kamippaminnik oqimaatsunik isimmittarsimavaat najungasui tamangajaasa nallorlugit. Imigassamillu kimittuumik kuerariarlugu ikikkarsimavaat. Angut toqungajallugu qimataq saassunneqarsimavoq juutiusorineqarami. Pisimasumilu tassunga tunnganngitsumi Hamburgip eqqaani illu ikuallanneqarsimavoq, inuillu Tyrkiameersut pingasut ikuallagussaallutik — ataaseq niviarsiaraq qulinik ukiulik.

Taamaannerani Balkanimi kangianilu inuiaqatigiit akornanni sorsuunnerni  tusindilikkuutaat toqusarput. Allallu Bangladeshimi, Indiami Pakistanimilu tunuliaqutat assigiinngitsuuneri pissutigalugit akersuunnerni toqusarput. Afrikamilu naggueqatigiit assigiingitsut akornanni akersuunnerni suli allat toqutaasarput.

Inuit amerlanerit taamatut persuttaanerit annilaarnartutut isigaat tullimillu ajortumik pinissat eqqarsaatiginngisaannarlugu. Tysklandimimi inuiaqatigiit assigiinngissutaat pissutigalugu akerliussutsimik takutitsinersuarni persuttaanerit avoqqaarineqarput. Taamaakkaluartoq The New Encyclopædia Britannica-mi allassimavoq: „Silarsuarmi kulturit tamangajammik ilaasortaasa nammineq inooriaasertik ajunnginnerusutut isigaat kulturinilluunniit qaninnerpaasaminnit.“ Taamatut isumaqarneq tullermik asanninnermut ajoqutaavoq. Tamanna arlaatigut iliuuseqarfigineqarsinnaava, ingammik Jesus oqarsimammat Guutimut tullermullu asanninneq inuunissamut aalajangiisuusoq? (wD 15/9 93)

 [Qupp. 2-mi suminngaanneernera]

Saqqaa: Jules Pelcoq/Die Hellige Schrift

[Qupp. 3-mi suminngaanneernera]

Samariamiu ajunngitsoq/The Doré Bible Illustrations/Dover Publications, Inc.