Tullermik asanninneq ajornanngilaq

JESUS KRISTUSIP Samariamiumik assersuutaata takutippaa tullermut asanninneq ilumoortoq qanoq isumaqarnersoq. (Lúkarse 10:25-37) Jesus imatuttaaq ilinniartitsivoq: ’[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit. Tassa inassut siulleq annerusorlu. Aappaatalu taamaaqatigaa: tullit ilittut asassavat.’ — Matîuse 22:37-39.

Inuppassuartulli tullit inuiaqatigiinnit allaneersoq asassallugu ajornakusoortippiuk? Immaqa taamaappoq immikkoortitsineq  eqqunngitsuliorfigineqarnerlu ilinniarsimagakkit nammineerluunniit misigisimagakkit. Imaassinnaavoq illit asasalluunniit inuiaqatigiinnit allaneersunit atornerlunneqarsimasusi.

Jesusip nalunaarmagu tullermut asanninnissarput Guutip inassutaasa ilagigaat, misigissutsit sakkortuut taamaattut anigorneqarsinnaassapput. Taamaakkusunnermut Guutip Kristusillu inunnik isiginninnerisut isiginninneq aqqutaavoq. Taamaammat Jesusip Kristumiullu siulliit maligassiuinerat misissoriartigu.

Jesusip maligassiuilluarnera

Ukiuni hundredilinni siullerni juutit Samaariamiunut, Judæap Galilæallu akornanni inuusunut, uumissuisimaqaat. Ilaanni juutip akerliusup uumissuerpasilluni Jesus oqarfigaa: ’Aarit oqarluarpugut. Samariamiuuvutit anersaapiloqarlutillu.’ (Juánase 8:48) Samariamiunik uumissuineq ima sakkortigisimavoq allaat juutit ilaasa naalaffimmi Samariamiunit perloqqusisarsimallutik ullullu tamaasa Samariamiut inuunermik naassaanngitsumik pinnginnissaat qinnutigisarsimallugu.

Qularnanngitsumik uumissuingaarneq tammanna nalunnginnamiuk Jesus Samariamiumik juutimut ujajaasunit unatartissimasumut isumassuinermigut ilumut tulliusutut iliuuseqarsimasumik assersuusiorsimavoq. Jesus qanoq akisinnaasimava juutimit Mosesip inatsisaanik ilisimasumit aperineqarami: ’Kinami tulleraara?’ (Lúkarse 10:29) Aap, Jesus toqqartumik oqarsinnaagaluarpoq: ’Juuteqatitit kisiisaanngitsoq aammattaarli inuit allat, allaat Samariamiut, tulleraatit.’ Juutilli tamanna akueriuminaatsissagaluarpaat. Taamaattumik assersuusiorpoq juutimik Samariamiumit nallittorneqartumik. Taamaalilluni Jesusip juutit tusarnaartini ilinniartippai tullermut ilumoortumik asanninnerminni juutiunngitsut ilannguttariaqaraat.

Jesus Samariamiunik uumissuinngilaq. Ilaanni Samariakkut angalatilluni, puilasup eqqaani qasuerserpoq ajoqersukkani illoqafimmut qanittumiittumut nerisassarsiortillugit. Arnaq Samariamiu imertartoq oqarfigaa: ’Imminnga.’ Juutit Samariamiunik oqaloqateqarneq ajormata aperivoq: ’Sooq juutiullutit uannut immisseqqusinnaavit, uangalu Samariamiut ilagigaannga?’ Jesusip nalunaajaaffigaa, allaat Messiasiunerminik toqqartumik oqarfigalugu. Illoqarfiliarnermigut allanillu tusarnaariartoqqusinermigut qisuariarpoq. Qanoq kinguneqartumik? ’Samariamiut tassani nunaqartut ilarpassuisa arnap oqaasii pillugit upperfigilerpaat.’ Juutit ummissortimi nalinginnaanerusumik ileqquisa sunninngimmanni Jesus angusaqarluarpoq! — Juánase 4:4-42.

Guuti kinaassusersiortuunngilaq

Guutip siunertarisimavaa Jesusip juutit siulliullugit oqaluussiffigissagai, ’savat tammarsimasut Israelip inoqutaasa ilagiissai.’ (Matîuse 15:24) Taamaattumik Jesusip malittai siulliit juutiupput. Anersaalli illernartup ukiumi 33-mi kuineqarnerata kingorna ukiut pingasut qaangiutiinnartut, Jehovap erseqqissarpaa juutit uppertut ajoqersuganngortitsinerminni inuiaat allat, Guutimik nalusut, ilanngutissagaat.

Juutit isumaanni Samariamiut immisut asassallugit ajornakusoortorujussuussaaq. Sulili ajornarnerussaaq Guutimik nalusut kipineqanngitsut, inuit juutit Samariamiunit assiginnginnerusatik,  tullertut asassallugit. Juutit Guutimik nalusunut pissusiat pillugu The International Standard Bible Encyclopaedia-mi ima oqaasertalerneqarsimavoq: „[Tastamantitaap] nalaani ajorinninnerit, mamiatsatsitsinerit uumissuinerillu sakkortunerpaat takuavut. [Guutimik nalusut] minguttuutut isigineqarput, taakkualu inussiarnisaartumik ilageqqusaanngillat. Guutimut inuttaanullu akeraapput, juutinullu ilanngutinngikkunik Guutimik ilisimassut taakkununnga inerteqqutaavoq, ilanngukkaluarunilluunniillu, itsartulli, ilaavissutut isigineqarsinnaanngillat. Juutinit apersoqqusaanngillat, guutimullu tunngasunik aperigunik perloqqusaassapput.“

Amerlasuut taamatut isumaqartillugit, Jehovap apustili Peter takorluuisillugu oqarfigaa ’Guutip minguersagaa nalinginnaatissanngikkai’. Guutillu Guutimik nalusumut Korniliusimukartippaa. Peterip Kornilius ilaqutaalu, Guutimillu nalusut allat, Kristus pillugu nalunaajaaffigai. ’Ilumut,’ Peter oqarpoq, ’paasilerpara inuup kinaassusia Guutip pinngikkaa, kisianni inuiaqatigiinni tamani kinaluunniit mianerinnitsini iluarnermillu sulisoq nuannarigaa.’ Peter oqaluussitillugu anersaaq illernartoq uppilerlaanut pivoq, kuisippullu Guutimillu nalusunit siulliullutik Kristusimut malittaalerlutik. — apustilit suliait kapitali 10.

Juutit malinnittut siumukarneq tamanna akueraat, Jesusip peqqussutaa ’inuit inuiaqatigiinnit tamaneersut ajoqersuganngortinnissaat’ juutinuinnaq tunnganani Guutimulli nalusunut aamma tunngasoq paasivaat. (Matîuse 28:19,20; apustilit suliait 11:18) Guutimik nalusunik uumissuinerusinnaasoq anigorlugu inuiaqatigiinnit tamaneersunit ajoqersuganngortitsiniarlutik oqaluussinermik aallussilluarlutik aaqqissuussimassapput. Ukiut 30-t qaangiutinngitsut,  oqarsinnaasimapput nutaarsiassaq nuannersoq ’pinngortitani tamani qilaap ataaniittuni’ oqaluussissutigineqarsimasoq. — Kulorsamiut 1:23.

Apustili Paulus, kristumiu juutinit tunuliaqutalik, oqaluussinermi siulersuisuusimavoq. Kristusimut malinnittuunngikkallarami, upperisarsiortunut farisiiarinut ilaasortaasimavoq aallussilluartoq. Guutimik nalusuinnaat pinnagit nunaqqatitilli aamma ammut isigisimavaat. (Lúkarse 18:11, 12) Taamatulli isiginninneq Paulusip tullermut asanninnermik nittaanissaminut akornutiginngilaa. Taamani ’Guutimik nalusunut apustiliuvoq’ Immap Akullersuup nunataani ajoqersuganngortitsiniarnerminut inuunini tunniussimavaa. — Rûmamiut 11:13.

Ajoqersuinermi nalaani Paulus ujaqqanik milloorneqartarpoq, unatarneqartarluni parnaarussaasarlunilu. (apustilit suliait 14:19; 16:22, 23) Taama ajortigisumik misigisaqarnini ajuallassutiginerpaa isumaqalersillugulu inuiaqatigiit aalajangersimasut akornanni piffissani asuliinnarlugu? Naamerluinnaq. Nalunngilaa nalimini inuiaqatigiippassuarni naapertuilluartumik uummateqartoqartoq.

Guutimik nalusunik Guutip aqqutigeqqusaanik ilinniarusuttunik Paulus nassaaraangami asalersarpai. Assersuutigalugu Thessalonikamiunut allappoq: ’Saamalluta akornassinniippugut; soorlu arnap qitornani milutsittarai, taama asangaarlusi nuannarisaqarpugut aviffigiumallusi, Guutip iivangkiiliuinnaanik pinnata, inuunitsinnilli allaat, tassa uatsinnut asanarsigassi.’ (1 Tásalûníkamiut 2:7, 8) Oqaatsit asannittut taakkua takutippaat Paulusip Guutimik nalusut Thessalonikamiut ilumut asagai attaavigilluarnerilu ajoqusertinnaveersaaraa.

Tullermik asanninnerup sulinera

Ullumikkut, ukiuni hundrelinni siullernitulli, Kristumiut ilagiivinut ilaarusuttut inuiaqatigiinnit tamaneersut tullermittut asanissaat ineriartortinniartarpaat. Isummamik ajunngitsumik ineriartortitsinermikkut Naalagaaffimmillu tusagassamik nuannersumik aveqatigiinnermikkut, kristumiut inuit ilisarisimanngisassaraluatik ilisarisimalerpaat. Allaat qatanngutitut asasarpaat. (Juánase 13:24, 35) Illittaaq tamanna misigisinnaavat.

Asanninneq taamaattoq Jehovap Nalunaajaasuisa akornanni nassaassaavoq, naak nunani 229-ni najugaqaraluarlutik ’inuiaqatigiillu immikkut naggueqatigiissut, immikkut inuiaasut immikkullu oqaaseqartuneeralutik’. (sarĸúmersitat 7:9) Silarsuarmi qatanngutigiissutut, Jehovamut pallorfiginninnertik, inuiaqatigiillu assigiinngitsut akornanni akersuunnernut ilaajumannginnertik, kinaassusersiornermillu nuannersumik inooqatigiinnissaraluamik akornusiisartumik itigartitsinertik ataasiussuseqaatigaat.

Nalunaajaasunut ilanngugit, taava misigissavat inuiaqatigiinnit tamaneersut assigiinngitsunik tunuliaqutallit Guutip piumasaanik iliortut. Tullerminnillu asaninnerat Guutip Naalagaaffianik nutaarsiassamik nuannersumik tusarliussinerattut takussavat. Aap, ilagiivinilu inuit inussiarnersut ilumoortullu inooriaatsimikkut tullerminnut asanninnermik ilumoortumik ilinniarsimasut naammattuussavatit. (wD 15/9 93)

[Qupp. 6-mi assiliartaq]

Jehovap Nalunaajaasuisa ilagiivini inuit inuiaqatigiinnit tamaneersut nuannaartut naammattoorsinnaavatit.

[Qupp. 4-mi suminngaanneernera]

Samariamiu ajunngitsoq akunnittarfimmut tikiuttoq/The Doré Bible Illustrations/Dover Publications, Inc.