Aqqit annerpaartaannik isertugaq qulaarneqarpoq

Soqutiginarpoq musliimit Koranianni kristumiullu Biibilianni aqqit annerpaartaat innersuussutigineqarmat. Aqqit annerpaartaata isumaa pingaaruteqassusialu maani sammineqarpoq. Aamma ersersinneqarpoq ateq tamanna qanoq ililluni inuiannut tamanut maanilu nunarsuarmi siunissaannut atuumassuteqartoq.

ANGUTIT arnallu millionilippassuit nunarsuarmi inuusimallutillu toqusimapput. Amerlanerit atitik ilanngullugit puiugaasimapput. Pingaaruteqarsimasulli aqqi — soorlu Avicenna, Edison, Pasteur, Beethoven, Gandhi Newtonilu — suli eqqaamaneqarput. Aqqit taakku taaneqaraangata inuttaasa naammassisimasaat, paasisimasaat nassaavilu eqqaaneqartarput.

Ateqarporli aternit taakkunannga tamanit annerungaartumik. Itsaq ullumikkullu tupinnartuliat tassunga attuumapput. Ilami inuiaat tamarmik sivisuumik pilluarnartumillu inuunissaat atermut tassunga attuumassuteqarpoq!

Inuppassuit atermik taassuminnga paasisaqarnissartik kissaatigisimavaat. Ujarsimavaat apeqqutigisarlugulu, nanisimanaguli. Taakkununnga tassaasimavoq isertugaq. Aterli taanna inuup paasisinnaanngilaa Ateqartup nammineq imminut qulaanngippagu. Qujanartumillu atermik asseqanngitsumik tamatuminnga isertugaq qulaarneqarsimavoq. Guuti nammineq taamaaliorsimavoq uppertimi ilisarisimalerniassammanni. Ateq taanna siullermik Adamimut, taava Abrahamimut, Mosesimut itsarlu kiffaminut aalajaatsunut allanut saqqummersissimavaa.

Atermik annerpaamik ujaasineq

Koranimi „Allakkanik ilisimasalik“ eqqartorneqarpoq. (27:40) Versi taanna nassuiarlugu atuakkami Tafsīr Jalālayn-imik taaguutilik ima allassimavoq: „Asaf Barkhiyā-p ernera angutaasimavoq naapertuilluartoq. Guutip aqqa angisooq nalunngilaa, aqqatigullu torlulanerit tamaasa akineqartarpoq.“ Tamatuma Biibilimik allaqataasumik Asafimik eqqaasippaatigut, taassuminnga Tussiaat 83:19-imi ima oqartumik: „Paasitserlugu illit kisivit — aqqit tassaasoq [Jehova] — qutsinnerussaartutit nunarsuarmi tamarmi.“

Koran 17:2-mi allassimavoq: „Allakkat Mosesimut tunniuppavut Israelikkunnullu najoqqutassanngortillugit.“ Atuakkami pineqartumi Moses ilaatigut Guutimut ima oqarsimavoq: „Israelikkut ornillugit oqarfigigukkit siuaasaasa Guutiata aallartikkaanga, taakkualu Guutip aqqa apeqqutigippassuk taava qanoq akissavakka? . . . Guutip Moses ima oqarfigaa: Israelikkut ima oqarfigissavatit: ’Uannik ilissinnut aallartitsisoq tassa [Jehova] siuaasassi Guutiat, Abrahamip Iisaallu Jaakullu Guutiat.’ Tassa atera naassaanngitsumut aterisara.“ — 2 Moses 3:13, 15.

Itsaq Israelikkut Guutip aqqa angisooq tamanna nalunngilaat. Allaat aterminnut ilaatittarsimavaat. Soorlu ullumikkut ateq Abdullah isumaqartoq „Guutip kiffaa“, itsaq Israelikkunni aterineqartoq Obadias isumaqarpoq „Jehovap kiffaa“. Pruffitip Mosesip anaanaa Jokebedimik ateqarsimavoq, isumaqartumik „Jehova naalannassusiuvoq“. Ateq Johannes isumaqarpoq „Jehova saammaasimavoq“.  Pruffiitillu Eliasip aqqa isumaqarpoq „Guutiga tassa Jehova“.

Ateq tamanna pruffiitit ilisimasimavaat ataqqinningaartumillu atortarsimallugu. Allakkani Illernartuni 7000-t sinnerlugit nassaassaavoq. Jesus Kristusip Mariap ernerata ateq tamanna qutsissisimavaa Guutimut qinunermini ima oqarami: ’Inuit unannut tunniussatit aternik nalujunnaarsippakka . . . Aqqillu taakkununnga nalunaarpara nalunaaqqikkumaarlugulu, uannut asannissutsit taakkunaneeqqullugu, uangalu taakkunaneeqqullunga.’ (Juánase 17:6, 26) Koran pillugu oqaaseqaatimini tusaamasaasumi Bayḍāwī Koran 2:87 pillugu oqarsimavoq Jesusip ’toqungasut uummartinniarlugit Guutip angisooq aqqa’ atortarsimagaa.

Qanorli ililluni ateq tamanna isertuganngorsimava? Ateq tamanna tamatta immikkut siunissatsinnut attuumassuteqarpa?

Ateq qanoq ililluni isertuganngorsimasoq

Ilaat isumaqarput „Jehova“ hebriiarisut tassaasoq „Allah“ (Guuti). „Allah”-lli assigaa oqaaseq hebriiarisooq ’Elo·himʹ, qasseersiut ataqqinninniutitut atorneqartartoq, ataasersiutaa tassa ’elohʹah (guuti). Juutit akornanni upperisapalaaqartoqalersimavoq Guutip aqqata, Jehovap, atorneqarunnaassutigisaanik. Allakkanik Illernartunik atuartillutik ateq Jehova naammattooraangamikku oqaannartalersimapput ’Adho·naiʹ, isumaqartoq „Naalagaq”. Allaat allassimaffiit ilaanni allassimaqqaarfiani hebriiarisut allassimasoq „Jehova“ ’Adho·naiʹ-mik taarsersimavaat.

Kristumiuunerartuni upperisarsiornikkut pisortat aamma taamaaliorsimapput. Ateq Jehova „Guuti“-mik (arabiamiusut „Allah“) aamma „Naalagaq”-mik taarsersimavaat. Tamanna ataasiullunilu pingasuussutsimik ajoqersuummik eqqunngitsumik, Allakkani Illernartuni tunngaveqanngitsumik, siuarsaaqataasimavoq. Tamatuma kinguneraa inuit millionilippassuit paasinerluillutik Jesusimik anersaamillu illernartumik pallorfiginnilersimanerat taakkuninngalu Guutimut naligititsilersimanerat. *

Taamaalillutik juutiussutsimik upperisallit kristumiuunerartullu siuttui aqqit annerpaartaannik sumiginnaanermut annertuumut pisooqatigiipput. Guutili ima siulittuisimavoq: „Atera naalannartoq ilissi inuiaat taakkua akornanni narrunarsagarsi illernartissavara. Illernassusera inuianni takutikkukku misigissavaat uanga tassaasunga [Jehova].“ Aap, Jehovap aqqi inuiaat tamarmik akornanni nalujunnaarsissavaa. Sooq? Juutiinnaanngitsut imaluunniit inuiaat inuilluunniit ataasiakkaaginnaanngitsut Guutigimmanni. Jehova inuiaat tamarmik Guutigaat.— Hesekiel 36:23; 1 Moses 22:18; Tussiaat 145:21; Malaki 1:11.

Ateq annerpaaq siunissarpullu

Allakkani Illernartuni allassimavoq: ’Kinaluunniit Jehovap aqqanik torlorfiginnittoq annakkumaarpoq.’ (Rûmamiut 10:13) Ullormi eqqartuutiffimmi annaanneqarnissatsinnut Guutip aqqanik ilisimanninnerput aalajangiisuussaaq. Aqqanik ilisimanninnermut ilaavoq pissusiinik, suliaanik siunertaanillu ilisimanninneq, taassumalu najoqqutassiai qutsissut naapertorlugit inuuneq. Assersuutigalugu, Abrahamip ateq taanna nalusimanngilaa torlorfigisarsimallugulu. Tamatuma kingunerisaanik Guutimut pitsaasumik attaveqarsimavoq, upperfigisimallugu, tunaarisimallugu naalassimallugulu. Taamaattumik Abraham Guutimut ikinngutaalersimavoq. Taamatuttaaq uagut Guutip aqqa ilisimagutsigu taanna qaninnerulissavarput, inuttut qanimut attaveqarfigilissallugu asanninneralu ataffigilissallugu. — 1 Moses 12:8; Tussiaat 9:11; Ussatit 18:10; Jâko 2:23.

Biibilimi allassimavoq: „[Jehova] naalaarpoq tusarnaarlunilu. Atuakkallu allanneqarput [Jehovap] aqqanik ataqqinnittut [Jehovamit] eqqaaneqaatissaannik.“ (Malaki 3:16)  Sooq aqqit annerpaartaat ’ataqqisariaqarparput’? Ateq Jehova isumaqavippoq „Pilersitsivoq“. Tassuuna erserpoq Jehova tassaasoq neriorsuutimi naammassinissaannut pisuusartoq. Neriorsuutini tamatigut piviusunngortittarpai. Guutiuvoq ajugaqanngitsoq, Pinngortitsisutuaq, pissutsinik ajunngitsunik tamanik pigisaqartoq. Oqaatsimik ataatsimik Guutip guutitut pissusianik tamakkiisumik nassuiaasumik nassaassaqanngilaq. Guutili imminut annerpaamik atsersimavoq — Jehovamik — pissusiinik tamanik siunertaanillu eqqaasitsisumik.

Inuiaat pillugit siunertaminik Guutip Allakkani Illernartuni oqaluttuuppaatigut. Jehova Guutip inuk pinngortissimavaa Paratiisimi naassaanngitsumik pilluarlunilu inuusussanngorlugu. Inuiannut tamanut piumasaa tassaavoq inuit tamarmik ilaqutariissuanngussasut ataatsit, ataasiussuseqarlutik asaqatigiittut eqqisseqatigiittullu. Siunertaq tamanna asanninnerup Guutiata ungasinngitsukkut naammassissavaa.— Matîuse 24:3-14, 32-42; 1 Juánase 4:14-21.

Inuiaat naalliuutaannut pissutaasut Guutip nassuiarpai ersersillugulu aniguinissaq pisinnaasoq. (sarĸúmersitat 21:4) Tussiaat 37:10, 11-mi allassimavoq: „Guutiitsoq erniinnaq peeruttussaavoq, inaani takuniaraluarukku peerutereersimassaaq. Kisianni qanilaartut nuna kingornutissavaat, pilluangaarlutillu inuussapput.“ — Takujuttaaq Koran 21:105.

Aap, Guuti atermigut angisuukkut ilisimaneqalissaaq. Inuiaat paasissavaat tassaasoq Jehova. Aqqit annerpaartaannik ilisimanninnillunilu nalunaajaallunilu attaviginninneq ilumut pisinnaatitaaffissuuvoq! Taamaalilluni Guutip siunertaa nuanningaartoq tamatsinnut tamanut eqquutissaaq: „Attavigimmanga annaatissavara, sernigissavara atera ilisarimmagu. Torlorfigippanga akiumaarpara. . . . Ullorpassuarnik qaarsillaatississavara annaassininnillu takutillugu.“ — Tussiaat 91:14-16. (wD 1/11 93)

[Quppernerup ataani ilanngussaq]

[Qupp. 5-mi assiliartaq]

Kakillarnaqutinit innermit ikualasunit Guuti Mosesimut ilisaritippoq ’Jehovatut, Abrahamip Guutiatut’

[Suminngaanneernera]

Moses kakillarnaqutillu innermik ikualasut, W. Thomas angajulleq-mit