Asanninneq (agape) — Sunaanersoq sunaannginnersorlu

’Qatanngutisilu tunniusimaffigalugit asaniarsigik.’ — 2 PÎTRUSE 1:5, 7, NV.

1. (a) Pissuseq suna Biibili naapertorlugu pingaarnerpaava? (b) Griikerit oqaasii sisamat suut ”asanninnermik” nutserneqarajuttarpat, sorlerlu 1 Juánase 4:8-mi atorneqarpa?

PISSUSEQ imaluunniit ileqqorissuseq Guutip oqaasiani Biibilimi pingaartillugu taakkartorneqartoq tassaavoq asanninneq. Griikerit oqaasiini, Kristumiut Allagaasa allassimaqqaarutaanni, oqaatsit sisamat „asanninnermik“ nutserneqarajupput. Asanninneq matumani eqqartugarput tassaanngilaq eʹros (oqaaseq Kristumiut Allagaanni Griikerisuuni atorneqanngivissoq), angutit arnallu kinguaassiuutitigut kajungerfigeqatigiinnerannik aallaaveqartoq. Aamma tassaanngilaq asanninneq griikerisut stor·geʹ-mik taaneqartoq, aakkut ilaqutariissutsimut atatinneqartoq. Tassaanngilartaaq phi·liʹa, ikinngutigiittut asanninnermut inuit imminnut pingaarteqatigiinnerannik tunngaveqartumut aammalu allaaserisap matuma siuliani sammineqartumut taaguutaasoq. Asanninneq maanna eqqartorniagarput tassa a·gaʹpe — asanninneq tunngaviusutigut najoqqutassaasoq, namminissarsiunngissutsimik aamma isumaqarsinnaasoq. Tassa asanninneq taamaattoq apustilip Johannesip innersuussutigaa ima allakkami: ’Guuti asassutaavoq.’ — 1 Juánase 4:8.

2. Asanninneq (aga’pe) pillugu qanoq oqartoqarsimava?

² Asanninneq taamaattoq (a·gaʹpe) pillugu professor William Barclay ujarlerfissialiamini New Testament Words-imi allappoq: „Agapē tunngassuteqarpoq silaqarsutsimut: tassaaginanngilaq misigissuseq nammineerluni uummammi pinngortartoq [soorlumi phi·liʹa taamaassinnaasoq]; tassaavorli tunngaviusutigut najoqqutassaq isumaliutigalugu maleruarniagarput. Agapē piumassutsimut tunngassuteqarneruvoq. Suliniutigisaq, angorusutaq, ajugaassutigisaq. Inuk kinaluunniit  akeqqaminut pissusissamisoortumik asannissimanngilaq. Akeqqani asaniassagunigit misigissutsini pissusissamisoortut ileqqunilu tamaasa ajugaaffiginiaqqaartariaqarpai. Agape . . . tassarpiaavoq asaneqarumanngitsumut asanninnissamut piginnaassuseq, nuannarinngisatsinnik asannissinnaassuseq.”

3. Jesus Kristusip Paulusillu asanninneq qanoq pingaartitsigaat?

³ Aap, Guutimut Jehovamut pallorfiginninnerup ilumoortup guutisiornernit allanit tamanit immikkoorutigisaa tassaavoq asanninneq taamaattoq pingaartikkamiuk. Jesus Kristusip inatsisit siulliit marluk eqqortumik ima saqqummiuppai: ’Siullersaat tassa imaattoq: . . . „Asassavallu Jehova Guutit uummatikkut iluunngarlutit tarnikkullu iluunngarlutit isumakkullu iluunngarlutit nukisillu tamakkerlugit.“ Aappaalu tassaavoq: „Tullit ilittut asassavat“. Tamakkunannga annerusumik allamik inatsiseqanngilaq.’ (Mákorse 12:29-31) Korintumiunut agdlagkat sujugdlît kapitali 13-imi apustilip Paulusip taamatuttaaq eqqaavaa asanninnerup pingaarutaa. Asanninneq inuup pissusaani pingaarnerpaasutut taarserneqarsinnaanngitsutullu eqqartoriarlugu Paulus ima naggasiivoq: ’Maannali uku pingasut atapput: upperneq neriunnerlu asanninnerlu; asanninnerli taakkua annersaraat.’ (1 Korintumiut 13:13) Jesusilu eqqortumik oqarsimavoq ajoqersukkami asanninneq ilisarnaatigissagaat. — Juánase 13:35.

Asanninneq sunaannginnersoq

4. Asanninnerup sunaaneri sunaannginnerilu qassit Paulusip eqqartorpai Korintumiunut agdlagkat sujugdlît 13:4-8-mi?

⁴ Oqartoqarsimavoq asanninneq sunaannginnersoq nassuiaruminarnerusoq sunaanerata nassuiarnissaaninngarnit. Tamanna ilumoortortaqarunarpoq, tassami ’asanninnerup kapitaliani’  Korintumiunut agdlagkat sujugdlît kapitali 13-imi versit 4-8, apustilip Paulusip taagorpai asanninnerup sunaannginneranik assersuutissat arfineq-pingasut aammalu sunaaneranik assersuutissat arfineq-marluk.

5. Sinnganeq sunaana, sumullu tunngatillugu Biibilimi ajunngitsumik eqqartorneqarpa?

⁵ Asanninnerup sunaannginneranik assersuutissaq siulleq Paulusip ima taavaa: ’Asannittoq sinngasarinngilaq’. Tamanna nassuiartariaqarpoq, tassami sinnganeq ajunngitsuusinnaallunilu ajortuusinnaagami. Oqaatsinik ujarlerfissiat ilaanni sinnganeq nassuiarneqarpoq „ingiaaniartumik iluarisaqanngivinnermik“ aammalu „tunniusimalluinnarnissamik piumasaqarnermik“. Tamatumunnga tunngatillugu Moses oqarpoq Mosesimik allakkat aappaanni 34:14-imi (NV): „Guutimik allamik guutisiorfigisaqassanngilasi uanga atera imaammat Sinngasoq, taassami Guutiugama uangaanngitsumik guuteqaqqusinngitsoq.“ Aamma Mosesimik allakkat aappaanni 20:5-imi (NV): „Uanga, Jehova Guutit, Guutiugama tunniusimalluinnarfigeqqusoq.“ Eqqarsaatip tamatuma assinga Paulusip ersersippaa allakkami: „Guutimmi sinnganeratut ittumik sinngallunga piggappassi.“ — 2 Korintumiut 11:2, NV.

6. Biibilimi assersuutissanik taasaqarit ’asannittup sinngasarinnginneranik’ takutitsisunik.

⁶ Kisiannili sinnganeq amerlanertigut ajortumik isumaqartinneqartarmat Galâsiamiunut agdlagkat 5:20-mi uinngup suliaasa ilaattut taaneqarpoq. Ilumummi, sinnganeq taamaattoq namminissarsiorneruvoq uumissuilersitsisarlunilu; uumissuinerlu asanninnerup akerleraa. Sinnganerup Kain Abelimut uumissuilersippaa, naggataatigullu toquppaa. Sinnganeruttaaq Josefip qatanngutai qulit Josefimut uumissuilersippai allaat peernissaanik kissaateqalersillugit. Asanninneq sinngaginnilersitsisanngilaq inuit allat pii imaluunniit ajunngitsorsiaat pillugit, soorlumi kunngip Akabip Nabot sinngagisimagaa viinnissanik naatitsivia pillugu. — 1 Kunnginik allakkat 21:1-19.

7. (a) Pisimasup suup takutippaa Jehova oqarissaartunik nuannarisaqanngitsoq? (b) Sooq asannittoq isumaallioraluarluniluunniit oqarissaarneq ajorpa?

⁷ Taava Paulus asanninneq pillugu ima allappoq: ’Asannittoq (usorsitsaartuunngilaq.)’ ’Usorsitsaarneq’ isumaqarpoq oqarissaarneq; tamanna asanninnikinnermut ersiutaavoq, tassami imminut allanit pingaarnerutinnermik isumaqarami. Oqarissaartut Jehovap nuannarinngilai. Tamanna erserpoq taamani kunngi Nebukadnezar oqarissaarmat naakkinarsaramiuk. (Daniel 4:30-35) Oqarissaarneq pissuteqarajuttarpoq isumaassusermik aammalu nammineq piginnaassuserisanik pigisanillu tulluusimaarutiginninnermik. Ilaat immaqa kristumiutut kiffartuussinerminni naammassisaminnik oqarissaaruteqaqqajaasarput. Allallu immaqa kristumiut utoqqaanertat ilaattut ataatsitut pissuseqarput, taanna misigisimammat ikinngutiminut sianeqattaartariaqarluni akisuumik biilitaarsimanini tusarliunniarlugu. Oqarissaarneq sunaluunniit asanninnerunngilaq, oqarissaartup tusarnaartiminit qaffasinnerunissaanik siunertaqarmat.

8. (a) Jehovap anneruniartunut isumaa qanoq ippa? (b) Sooq asannittoq taama pissuseqassanngila?

⁸ Taava asanninneq pillugu ima oqartoqarpoq: ’Asannittoq annerujumatuusarinngilaq.’ Annerujumatooq asanninngitsumik pissuseqarluni imminut angisuutippoq. Isummakkut pissuseq taamaattoq isumatusaarnerunngivippoq, tassami ’anneruniartut Guutip (akerartormagit), nikanartittulli (saammaattarlugit).’ (Jâko 4:6) Asanninneq tamatuma akerlerluinnaanik sunniuttarpoq. Tamatuma sunniunneratigut allat imminit ataqqineqarnerulertarput, soorlumi Paulus Filípimiut 2:2, 3-mi allattoq: ’Taava tipaatsussusera naammatsissiuk ataasiusumik isumaliorlusi, ataasiusumik asannissuseqarlusi, tarnissigut ilagiillusi isumaqatigiillusi; saqitsaagajunnermit piunngitsumillu ataqqineqarumanermit pinnasi, kisianni qanilaarlusi ilasi immissinnit annerutinniarsigik.’ Taama isummertaraanni allat toqqissisimalersinneqartarput, kisiannili anneruniartut saqitsaassigajunnermikkut allat toqqissisimajunnaartittarpaat.

9. Sooq asannittoq kanngunartumik pissuseqassanngila?

⁹ Paulus aamma asanninneq pillugu ima oqarpoq: ’Asannittoq [kanngunartumik, NV] iliortarinngilaq.’ Oqaatsinik ujarlerfissiami ’kanngunartoq’ nassuiarneqarpoq „naleqqutinngivissumik ippinnartumillu ileqqoqartoq.“ Kanngunartumik (asanninngitsumik) iliortoq allat misigissusiinik sumiginnaasarpoq. Griikerit oqaasiat tassani atorneqartoq Biibilimik nutsikkat ilarpassuini „assuarnartumik“ nutserneqarpoq.  Assuarnartumik ileqqulersortoq inuit allat naleqquttutut pissuserissaarnertullu isigisaannik suusupaginnippoq. Taamaattumik inunnik allanik asannittumik isumaginnittup suulluunniit naleqqutinngitsut kanngunartullu, assuarnartut quarsaarnartullu, pinaveersaartussaavai.

Asanninnerup sunaannginneranik assersuutissat allat

10. Asannittoq sutigut namminissarsiortuussanngila?

¹⁰ Taava ilisimatinneqarpugut asannittoq ’namminissaminik piniartarinngitsoq’ — tassani pineqarlutik nammineq soqutigisat allat soqutigisaannut illuatungiliullugit. Apustili allassimaffimmi allami ima oqaraluarpoq: ’Inummi uinimminik qinngarsuinngisaannarpoq, nerisittarluguli paaqqisarpaa.’ (Evfisumiut 5:29) Kisiannili uagut nammineq soqutigisatta allallu soqutigisaasa akornanni akerleriinneqalerpat, Biibilimilu najoqqutassianik allanik toqqammavissaqanngikkutta, taava Abrahamip Lotimut iliorsimaneratut iliortariaqarpugut, tassa assortuuteqatigisarput sallinngortillugu. — 1 Moses 13:8-11.

11. Asannittup narrutsajasuunnginnissaa qanoq isumaqarpa?

¹¹ Aammali asannikkaanni narrajasuusariaqanngilaq. Soorlumi Paulusip manna malugeqqugaa: ’Asannittoq . . . narrutsattarinngilaq.’ Asannittoq ajuallajasuunngilaq. Imminut naalakkersorsinnaavoq. Pingaartumik aappariit tamannaa uummammiugilertariaqarpaat, nununeq sapilerluni sukannersumik oqalulernissaq imaluunniit suanngassuilernissaq mianersorfigalugit. Ilaannikkut narrutsatsinneqarnissaq ajornanngitsuararsuusinnaasarpoq. Tamanna pillugu Paulus misigisimavoq Timoteus ima siunnersortariaqarlugu: ’Naalakkamulli kiffaasoq assuarisassarsiorajussanngilaq, tamanulli inussiarnersuussaaq ajoqersuineq sapinngitsuulluni, ilalaarsinnaallunilu naalliukkuni; [iluarinninngitsullu, NV] qanilaarluni ajoqersorniassavai.’ Aap, narrutsatsinneqarusunngilaq. — 2 Timûtiuse 2:24, 25.

12. (a) Asannittup ajortumik isumaqannginnera qanoq paasisariaqarpa? (b) Sooq ’ajortumik isumaqarneq’ isumatusaarnerunngila?

¹² Paulusip asanninnerup qanoq ittuunnginneranik nalunaarsuinini nangillugu ima oqarpoq: ’Asannittoq . . . ajortumik isumaqartarinngilaq.’ Imaanngikkaluarpoq asanninnerup eqqunngitsuliorfigineqarnerit malugineq ajorai. Jesusip takutippaa qanoq iliussasugut eqqunngilluinnartumik pineqarutta. Kisiannili asanninnerup akuerinngilaatigut puttarsisaqarluta uumissuinissatsinnut imaluunniit oqaatiginiarnagulu narrassimaaruteqarnissatsinnut. ’Ajortumik isumaqannginneq’ isumaqarpoq isumakkeerfiginnissasugut pisimasorlu puigussagipput Biibilimi ajoqersuussutaasoq naapertorlugu saqitsaakkunnaassutaareerpat. Aap, eqqunngitsumik pineqarsimanerit ’ajortumik isumaqarfigiuarlugu’ imminut anniartikkunnaarniarit imminullu aliasutseqattaarunnaarniarit!

13. Naapertuilluannginnermik tipaatsuuteqannginnissaq qanoq isumaqarpa, aammalu sooq asannittoq taamaanneq ajorpa?

¹³ Aammattaaq asanninneq pillugu ima allassimasoqarpoq: ’[Naapertuilluannginneq, NV] tipaatsuutigisarinngilaa.’ Erseqqippoq naapertuilluannginneq silarsuarmiut tipaatsuutigisaraat. Tamanna takuneqarsinnaavoq atuakkat, filmit TV-kkullu aallakaatitat nakuusernermik pornografiimillu imaqartut nuannarineqarneratigut. Taamaattunik tipaatsuutiginninneq namminissarsiorniviuvoq ersersitsisuullunilu Guutip najoqqutassiaanik naapertuilluartunik imaluunniit inoqatit iluaqutissaannik soqutigisaqannginnermik. Tamakkuninnga tipaatsuutiginnittoq uinini pillugu siaruarterivoq kingornalu uinimmit aserujassummik katersuiumaarluni. — Galâsiamiut 6:8.

14. Sooq qularutiginagu oqartoqarsinnaava asanninneq soraassanngitsoq?

¹⁴ Kiisalu Paulus oqarpoq: ’Asanninneq soraarnavianngilaq.’ Tamatumunnga pissutaaneruvoq Guutip asassutaanera aammalu ’naassaanngitsumik Kunngiunera’. (1 Timûtiuse 1:17) Rûmamiunut agdlagkat 8:38, 39-mi qularunnaarsinneqarpugut Jehovap asanninnerata sumiginnanngisaannassagaatigut: ’Nakimanaveerpungami toqulluunniit inuunerulluunniit, inngililluunniit naalagaanerilluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit, suulluunniit pinngortitap allaasup avissaartinnaviassanngikkaatigut Guutip asannissusianit Kristus Jesusimi Naalakkatsinni.’ Asanninneq amigartoornikkulluunniit sumiginnaanavianngilaq. Asanninneq qaqugukkulluunniit, unamminiarnartunut sunulluunniit, naammappoq.

 Asanninneq sunaanersoq

15. Sooq Paulusip kamajuinneq siulliullugu taavaa asanninneq nassuiaramiuk?

¹⁵ Maanna takussavarput asanninneq sunaanersoq, sunik kinguneqartarnersoq. Siullermik Paulus oqarpoq ’asannittoq kamajuitsuusoq.’ Oqartoqarsimavoq kristumiut peqatigiinnerat atasinnaanngilluinnassasoq kamajuissuseq piginagu, imaappoq inuit imminnut naammagittarfigalutik erinitsajuiffigalutillu pinngippata. Tamatumunnga pissutaavoq tamatta naammalluinnanngitsuunerput aammalu naammalluinnanngitsuussutitta kukkusarnittalu inunnut allanut ilungersunartarnerat. Tupinnanngilarlumi apustilip Paulusip tamanna siulliullugu taammagu.

16. Qanoq iliorlutik ilaqutariit inussiarnerfigeqatigiissinnaappat?

¹⁶ Paulus allappoq asannittoq aamma ’inussiarnersuusoq.’ Tamanna isumaqarpoq asannittoq ikiuiumatullunilu allanik pingaartitsisuusoq. Inussiarnerneq angisuutigut mikisutigullu saqqummeraraaq. Samariamiu naakkinnittoq inussiarnernerujussuarmik takutitsivoq angummut piiaasunit unatarneqarsimalluni aqqusernup killinganiittumut. (Lúkarse 10:30-37) Asannittup tipaatsuutigisarpaa inoqatiminut inussiarnersumik ataqqinnittumillu ilassinnittarnini. Oqaraanni „Iffiamik tuninnga!“ tamanna naalakkiineruvoq. Oqaraannili: ”Iffiamik tunilaarsinnaavinga?”, tamanna ataqqinnittumik qinnuteqarneruvoq. Uiusut nuliaminnut inussiarnersuussapput Pîtrusip agdlagai sujugdlît 3:7-imi siunnersuut maleruarunikku: ’Angutaasusi nuliasi silalimmik inooqatigisigik, pisattatut qajannarnerusutut iliorlugit, ataqqisigillu saammaannermik inuunerup pianik kingornusseqataasutut itillugit, qinusarnisi akornuseqqunagit.’ Nuliaasut uiminnut inussiarnersuussapput ’uitik mianerigunikkit’. (Evfisumiut 5:33) Ataataasut meeqqaminnut inussiarnersuussapput Evfisumiunut agdlagkat 6:4-mi siunnersuut malikkunikku: ’Ilissilu [ataatat, NV], qitornasi narrutsatseqinasigik, paariniarsigilli perorsarlugit inertertarlugillu Jehovamit.’

17. Sutigut marlutsigut asannittup sallusuissut tipaatsuutigaa?

¹⁷ Asannittup naapertuilluannginneq tipaatsuutigineq ajorpaa, ’sallusuissulli tipaatsuutigisaraa’. Asanninneq sallusuissullu tasiorlutik ingerlaqatigiipput — Jehova asanninnerup Guutigaa, aammali ’sallusuissutip Guutigaa’. (Tussiaat 31:5, NV) Asannittoq tipaatsuttaraaq sallusuissutip eqqunngitsoq ajugaaffigigaangagu qulaajarlugulu. Tamanna pissutaasut ilagaat Jehovamut pallorfiginnittut amerliartupiloornerannut. Asanninnerli naapertuilluannginnermut illuatungiliuttuutinneqarmat taamattaaq asannittoq naapertuilluarnermik tipaatsuutiginnittassaaq. Asannittoq naapertuilluarnerup  ajugaaneranik nuannaarutiginnittassaaq. Taamaattumillu Jehovamut pallorfiginnittut inanneqarputtaaq Babylonip Angisuup uppinnera nuannaarutigeqqullugu. — sarĸúmersitat 18:20.

18. Asannittoq qanoq ililluni tamatigut kamaginnittarpa?

¹⁸ Paulus oqarportaaq asannittoq ’tamatigut kamaginnittuusoq’. Nutsikkap Kingdom Interlinear-ip takutippaa tamatumani isumagineqartoq tassaasoq asanninnerup sunik tamanik qalliisarnera. Asannittup ’qatanngutini mamarlernavianngilaa kanngunarsarlugu’, soorlumi ajortut taamaalioqqajaasartut. (Tussiaat 50:20; Ussatit 10:12; 17:9) Tamanna aamma erseqqissarneqarpoq Pîtrusip agdlagai sujugdlît 4:8-mi, tassani allassimagami ’asanninnerup ajorterpassuit matoortarai’. Unneqqarissup soorunami ajortuliani angisuut matoorniarnavianngilai Jehovamut ilagiinnullu kristumiunut isertorlugit.

19. Qanoq ililluni asannittoq tamatigut upperpa?

¹⁹ Asannittoq ’tamatigut upperaraaq’. Asanninneq ajunngitsuuvoq, ajortuunngilaq. Tamanna isumaqanngilaq asannittoq uppiasuusoq. Oqaatsit uissuumminartut upperiniapallannavianngilai. Guutimulli upperniaraanni uppernissamut piumassuseqartariaqarpoq. Taamaattumik asannittoq sunik tamanik qularutiginnittutut pissuseqanngilaq. Uppernermut naaggaartuunngilaq, soorlumi ateistip Guuteqannginneraanini aalajangiusimagaa. Aamma agnostikeritut inngilaq, agnostikerip aalajangiusimammagit qanoq pinngorsimanitsinnik, sooq maanna inuunitsinnik qanorlu siunissaqarnitsinnik ilisimasaqartoqannginneraasarnini. Guutip oqaasii apeqqutinut taakkununnga tamanut tutsuiginartunik akissuteqarput. Asannittoq aamma uppernissaminut piareersimavoq, tatiginnittuugami ingasattumillu pasinninniartuunani.

20. Asanninneq neriunnerlu sukkut attaveqarpat?

²⁰ Apustilip Paulusip taava erseqqissaavigaatigut asannittoq ’tamatigut neriuttuusoq’. Asanninneq ajunngitsuugami neriuummut sakkortuumut Guutip oqaatsimini neriorsuutaanik tamanik tunngaveqartumut attaveqarpoq. Soorlu allassimasoq: ’Issumik assallatserisoq neriulluni assallatserissammat tukkartuisorlu aamma neriulluni pissammat ilangiiumalluni.’ (1 Korintumiut 9:10) Asannittoq tatiginnillunilu neriuummik ulikkaarpoq, pitsaanerpaamik neriuuteqartuaannarami.

21. Biibilimi qanoq ililluta neriorsoqqissaarneqarpugut asanninneq tamatigut qasusuitsuussasoq?

²¹ Kiisalu erseqqissaavigineqarpugut asannittoq ’tamatigut [qasusuitsuusoq, NV]’. Tamatuma anguneqarsinnaaneranut pissutaasoq apustilip Paulusip Korintumiunut agdlagkat sujugdlît 10:13-imi oqaatigaa: ’Allamik usserneqanngisaannarpusi kisianni inuit atortagaannik; Guutili ilumoorpoq; taassuma artukkassinnik ussersinnavianngilaasi, kisianni aniguinissaq ussernartumut aappiullugu pinngortissavaa ilissinnut artornarunnaarsillugu.’ Asanninnerup eqqaasissavaatigut Guutip kiffaasa qanoq ajornartorsiutiminnik aniguisarsimanerannik, tamakkuninnga assersuutissat amerlasuut Biibilimiittut atorlugit. Taakkua soorunami pingaarnersaraat Jesus Kristus, soorlumi eqqaasinneqartugut Eprîarit 12:2, 3-mi.

22. Pissuseq pingaartoq suna uagut Guutip qitornaasut sulissutigiuartariaqarparput?

²² Ilumut, pissuseq asanninneq (a·gaʹpe) pissutsinit allanit tamanit uagut Jehovap nalunaajaasuisut kristumiutut ineriartortittariaqakkatsinnit sallersaavoq — eqqarsaatigalugit asanninnerup sunaanera aammalu sunaannginnera. Guutip meeraasut sulissutigiuartariaqarparput Guutip anersaavata inerititaata taassuma takutinnissaa. Taamaaliorutta Guuti ilaassavarput, ’Guuti asassutaammat’. (wD 15/10 93)

Eqqaamavigit?

□ Jesus Kristusip Paulusillu qanoq ilillutik asanninneq pingaarnerunerarpaat?

□ Asannittup sinngasarinnginnera qanoq paasisariaqarpa?

□ Asannittoq qanoq ililluni tamatigut kamaginnippa?

□ Sooq oqartoqarsinnaava asanninneq soraassanngitsoq?

□ Asannittoq sutigut marlutsigut sallusuissummik tipaatsuutiginnippa?

[Atuaqqissaarnermi apeqqutit]

[Qupp. 21-mi ungalusaq]

ASANNINNEQ (AGAPE)

Sunaannginnersoq Sunaanersoq

1. Sinnganani 1. Kamajuilluni

2. Usorsitsaarnani 2. Inussiarnerluni

3. Anneruniarani 3. Sallusuissut tipaatsuutigalugu

4. Kanngunartuliorani 4. Tamatigut kamaginnilluni

5. Namminissarsiorani 5. Tamatigut upperluni

6. Narrutsajanani 6. Tamatigut neriulluni

7. Ajortumik isumaqarani 7. Tamatigut qasusuilluni

8. Naapertuilluannginneq tipaatsuutiginagu

9. Soraarnaviarani

[Qupp. 18-mi assiliartaq]

Jehovap Nebukadnezar oqarissaarmat naakkinarsarpaa