Guutip naakkinninnera eqqortumik isigiuk

NAKORSAQ pitsaaqaaq tusarnaaqqissaarlunilu. Nakorsiartumut ajunnginnerpaassaq pillugu isumaqarpoq inuunera annaanneqassapput pilanneqartariaqarluinnartoq. Nakorsiartup akunnattuuallalluni aalersortinnissamik apeqqut saqqummiummagu tupaallaatigaa. Nassuiaalermat upperisani pissutigalugu pilatsinnissamut aalersortinnertalimmut akuersisinnaanani, suli tupaallanneruvoq. Eqqarsartorujussuanngorpoq, ikiorusukkaluaqigamiummi. Kiisami oqarpoq: „Takuuk, aalersortikkumanngikkuit toqussaatit. Toqorusunngilat, ilaa?“

„Soorunami, naamik,“ nakorsiartoq akivoq.

„Kisianni, ilaa, aalersortikkaluaruit upperisannut akerliusumik iliussaatit. Takuuk, siunnersuutissaqarpunga. Aalersortinnissat akueriniaruk inuunerillu annaallugu. Taava ajortuliorsimanerit Guutimut anngiiaatigiumaarpat, peqqissimillutillu. Taamaalillutit aamma upperisarsiornikkut atukkatit iluarseqqissapput.“

Nakorsaq ajunngitsussamik eqqarsartoq isumaqaraluarpoq aaqqiissutissamik pitsavimmik nassaarsimalluni. Qularutiginngilaa nakorsiartup Guuti naakkinnittoq upperigaa. Isumaqarporlu manna Guutip naakkinnissusianik atorluaaffissaqqilluinnaraluartoq! Siunnersuutaali eqqortuua?

Taamatut eqqarsartarpugut?

Immaqa ilaannikkut nakorsatut taassumatut eqqarsartarpugut. Immaqa atuarfimmi suliffitsinniluunniit ilimaginngisatsinnik akerlilersorneqalersimavugut. Immaqaluunniit nalunngeqatiginnissutitsinnik ajoqusiisinnaasumik iliornissamut pinngitsaalineqartutut misigaluta peqqusileqivugut. Pakasarneqarnerput pissutigalugu immaqa ajornannginnerpaamik aniguiffissarsiortoorpugut eqqunngitsumik iliorluta, kingorna isumakkeerfigineqarnissamik qinunissarput siunertaralugu.

Imaluunniit sanngiissutitsinnit ajortunit ussernartorsiortinneqalersinnaavugut. Assersuutigalugu, angut inuusuttoq  kanngunartuliornissaminut ussernartorsiortorujussuanngorpoq. Kissaat eqqunngitsoq akiorniarnagu nakkaannarpoq, kingorna Guutimut saqqummiunnissaa siunertaralugu. Allaat ilaat ima ingasatsigisumut pisimapput ajortuliorujussuarsimallutik, nalunngikkaluarlugu ilagiinnut kristumiunut ilaasortaajunnaarsitaassutigisinnaallugu. Qularnanngitsumik eqqarsarlutik, ’Sivitsulaarpat peqqissimiinnarumaarpunga ilaasortanngortitaaqqillungalu’.

Pissutsit tamakku tamarmik marlunnik assigiissuteqarput. Siullermik, eqqortumik iliornissap sorsuutiginissaanut taarsiullugu nakkaannarput. Aappassaanillu, eqqarsarput ajortulioreerunik Guutimut isumakkeerfigeqquinnarunik ingerlaannaq isumakkeerfigissagaatik.

Eqqortumik isiginninneq sunaava?

Guutip naakkinninneranik eqqortumik pingaartitsineq ersersinneqarpa? Atagu, naakkinninneq tamanna eqqarsaatigilaariaruk. Jesus ima oqarsimavoq: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Naakkinninnerup tamatuma qanoq pisarnera apustilip Johannesip nassuiarsimavaa: ’Tamakkuninnga  ilissinnut allappunga ajortulioqqunasi; ajortuliortoqaraluarpallu Ataatami illersuisoqarpugut, Jesus Kristusimik iluartuusumik.’ (1 Juánase 2:1) Tassa naammalluinnanngissuserput pissutaalluni ajortuliorutta Guuti qinnuigisinnaavarput Jesusip pilliutaa tunngavigalugu isumakkeerfigeqqulluta.

Tamanna isumaqarpa ajortulioraluarutta soqutaanngitsoq, kingornatigut isumakkeerfigeqqulluta qinuinnartarutta? Naamik. Apustilip Johannesip oqaasii eqqaamakkit: ’Tamakkuninnga ilissinnut allappunga ajortulioqqunasi.’ Versimi tassani Jehovap naammalluinnanngissutsitsinnut atatillugu asannittumik aaqqissuussaa aamma Johannesip eqqaavaa. Taamaakkaluartorli ajortuliunnginnissarput sapinngisarput tamaat ilungersuutigisariarparput. Taamaaliunngikkuttami Guutip inatsisaanut kusanaatsumik ataqqinninngitsuliussaagut, Judasip tikkuagai Guutip saammaannera pisassarinngisaraluarput utoqqatsissutigalugu inuunerluttuliorluta. — Jûtarse 4.

Guutip naakkinninnera annanniutitut qanorluunniit ilioraluallarutta annassutigisinnaasatsitut isigigutsigu suusupagissavarput ajortuliornerlu ilungersornanngitsutut isikkoqalersissallugu. Ajortuliornerli taamatut isigineqartussaaqqajanngilaq. Apustilip Paulusip Titus ima oqarfigisimavaa: ’Guutimmi saammaannera annassutaasoq inunnut tamanut erserpoq; tamatumalu perorsarpaatigut, Guutimut naalanngitsuujunnaarluta silamiullu kajungerisaat atorunnaarlugit silami matumani inuuniassasugut piitaajuilluta iluartumillu ileqqoqarluta Guutilu mianeralugu.’ — Títuse 2:11, 12.

Paulusip Guutip naakkinninneranik pingaartitsinini ersersippaa nammineq naammalluinnanngissutsiminut akiuunnermigut. Taanna ima oqarsimavoq: ’Timiga artorsartippara kiffaasutut ilillugu, allanut oqaluussisartunga nammineq angiluttoqqunanga. (1 Korintumiut 9:27) Kukkuluttoriataartarnini Paulusip taamaattussaannartut isiginngilaa. Uagummi?

Jesusip isiginninnera

Ilaanni Jesusip ersersissimavaa naalliunnissaq pinngitsoorniaannarlugu eqqortup akerlianik iliorneq qanoq isumaqarfigigini. Pilliutitut toqunissani ajoqersukkaminut oqaluttuarilermagu Peterip nangartalersimavaa, oqarluni: ’Sernigilisit, Naalagaq, taamaalineqarnaveerit.’ Jesus qanoq qisuariarpa? ’Tununnut nigorit, Sataniaa, mamiatsaatigaakkit, Guutip pii pinnagit inuit pii isumagigakkit.’ — Matîuse 16:22, 23.

Jesusip Peterimik sukannersumik naveersinermigut ersersippaa ajornanngitsumik aniguiniaannarluni Guutip piumasaata akerlianik iliornissaq piumanngilluinnarini. Aalajangersimalluinnarluni aqqut eqqortoq ingerlaviginiarpaa, Satanillu nakkartitsiniaaneri akiortuarlugit. Naggataatigut mitaatigisaavoq, unatarneqarluni annernaqisumillu toqutaalluni. Eqqortup akerlianut nakkaannanngilaq, taamaattumillu inuunini utertitsissutissatsitut pilliutigisinnaasimavaa. Tamakku tamaasa nikallujuilluni atorsimavai ajornartorsiulileraangatta usserniarneqaleraangattaluunniit imminut ’sernigisarnissarput’ siunertarinagu!

Jesus ima eqqaaneqarsimavoq: ’Iluarneq asavat iluaannerlu uumigalugu.’ (Eprîarit 1:9) Ajornanngitsumik aniguiniarneq inatsisaannermik nassataqarajuttarpoq. Taamaattumik Jesusitut inatsisaanneq uumigigutsigu eqqortup akerlianut nakkaannarnissarput tamatigut tunuartittassavarput. Ussatini Jehova ima oqarsimavoq: „Ernera, silatuujuniarit taamalu uummatiga nuannaartillugu, mitallersikka uannut akisinnaaqqullugit.“ (Ussatit 27:11) Jesusip oqimaaqatigiissumik eqqortullu akerlianut nakkaannarumanani naapertuilluassusia Jehovap uummataanik  nuannaartitsisimaqaaq. Uaguttaaq Jehova nuannaartissinnaavarput Jesus malillugu assuarnaatsumik ingerlagutta. — 1 Pîtruse 2:23.

Nikallujuissutsimit ilikkagaqarneq

Apustili Peter ima allassimavoq: ’Tamanna pillugu qiimmattaritsi, naak pisariaqarpat misiligaanertigut tamalaatigut maannakkut sivikitsumik aliasutsinneqaraluartusi, uppersusersi misiligaalluartoq kuultimit innikkut misiligaasaraluarluni nungujasumit akisunerungaartoq nersornaatigineqaqqullugu naalannaatigineqaqqullugulu ataqqinaatigineqaqqullugulu Jesus Kristusip saqqummerfissaani.’ (1 Pîtruse 1:6, 7) Naammalluinnanngitsuugatta Satanillu silarsuaani inuugatta misilinneqartuarlutalu usserneqartuartassaagut. Peterilli oqarneratut tamakku ajunngitsumik kinguneqarsinnaapput. Uppernitsinnut misiligutaasarput, sanngiinnersoq nukittunersorluunniit.

Aamma misilinneqarnivut ilinniutigisinnaavavut. Jesus ’anniartitaanermigut naalannermik ilikkarsimavoq’. (Eprîarit 5:8) Misilinneqarnitsinni nikallujuikkutta naalanneq aamma Jehovamik tunaarinninneq ilikkarsinnaavavut. Ilinniarnerlu tamanna naammatsilluinnarfissani tikillugu ingerlajuassaaq, soorlumi Peter oqarsimasoq: ’Guutip . . . nammineq piginnaanngorsarluarlusilu aalajangersillusilu pissatsissavaasi.’ — 1 Pîtruse 5:10.

Misilinneqarnitsinnili nakkaannarutta ersersissavarput qunutuujulluta sanngiillutalu, Jehovamik sakkortuumik asanninnermik naapertuilluassutsimillu amigaateqarluta aammalu imminut naalakkersinnaassutsimik amigaateqarluta. Sanngiissutsit taamaattut suulluunniit Guutimut attaveqarnitsinnik navianartorsiortitsisarput. Paulus ima mianersoqqusisimavoq: ’Sallusuissut ilisarereeraluarlugu piaaraluta ajortuliorutta taava ajortit pillugit pilliutissaqarunnaarpoq.’ (Eprîarit 10:26) Ajortuliunngilluaannarneq pitsaaneroqaaq sanngiissutsimut nakkaannarnermit taamaalillunilu siunissami inuunissamik ulorianartorsiortitsinermit!

Assuarnaalluinnarneq

Pruffiitip Danielip nalaani hebriiarit pingasut sioorasaarneqarsimapput guutiliaq pallorfiginngikkunikku ikuallagaallutik toqunneqarnissaminnik. Qanoq qisuariarsimappat? „Guutitta iluariguniuk illit assannit annaassinnaavaatigut aatsitsivimmillu aamaannaasumit aniguisissinnaalluta, kunngiaa. Kisianni ilisimassavat, kunngiaa, taama pisoqanngikkaluarpalluunniit taamaattoq illit guutigisat guutisiorfigiumanngikkipput inuusaliarlu kuultiusoq nappartitat pallorfigiumanagu!“ — Daniel 3:17, 18.

Taamaaliorput eqqortumik iliornissartik kissaatigigamikku. Toqumik kinguneqassagaluarpat, allatut ajornaqaaq. Makititaanissamik neriuutissaqarput. Guutilli annaatissagaluarpatik, aamma ajussanngeqaaq. Aalajangerneralli aalassatsitassaanngilaq. Guutip kiffai taamaattuaannartuusariaqarput.

Nalitsinni eqqortup akerlianik iliorumasimanngitsut parnaarunneqarlutillu, naalliutsitaallutillu allaat toqunneqartarsimapput. Allat pigisatik annaasimavaat, najoqqutassiat eqqortut akigalugit pisuunngornissaminnut taarsiullugu piitsuunissartik qinersimallugu. Arnaq kristumiu ilanngutassiap matuma siuliani eqqartorneqarpoq qanoq piva? Nakorsap ajunngitsussaq siunertaralugu inussiarnisaarnera pingaartippaa, upperisamili akerlianik iliorumanngilaq. Jehovap inatsisaanik ataqqinninnini tunngavigalugu aalersuinertalimmik pilatsikkumanngilaq. Qujanartumillu peqqisseqqippoq suliniarluarlunilu Jehovamik kiffartornini nangeqqillugu. Aalajangerluinnarnini qanoq kinguneqassasoq nalugaluarpaa, suulli tamaasa Jehovap assaanut ilinissaannut piareersimasimalluni.

 Tatineqarnermini aalajangiusimannittuaannarnissaanut suup ikiorpaa? Namminersorluni aalajaanniarsarinngilaq, Guutillu kiffai tamarmik taamaaliornianngisaannartariaqarput. Eqqaamassavat ’Guuti tassa qimarravipput nakuussuterpullu, isumannaatsumik ikiuiserput annikilliornartuni tamani’. (Tussiaat 46:2) Misilinneqarnermi Guutimut ikioqqulluni saaffiginninnissaq pitsaaneroqaaq ajortulioriarluni naakkinniffigeqqunissaminngarnit!

Aap, Guutip naakkinningaassusia suusupaginngisaannartigu. Ajornartorsiornitsinnili allaat eqqortumik iliornissamik kissaateqarneq ineriartortinniartigu. Taamaaliorutta Jehovamut attaveqarnerput nukittussaaq, naassaanngitsumik inuunissatsinni pisariaqartitarput sungiusassavarput, Guutillu naakkinnissusianik eqqortumik ataqqinninnermik ersersitsissalluta. Taamatut ileqqoqarneq Ataatatsinnut qilammiusumut nuannaartitsissaaq. (wD 1/10 93)

[Qupp. 24-mi assiliartaq]

Makititaanissamik upperinnilluinnarnertik hebriiarit pingasut assuarnaannissaminnut iluaqutigaat