Ilaqutariittut ingerlallualernissamut aqqut

„ILAQUTARIIT ataqatigiikkunnaariartuinnarput,“ siorna USA-mi præsidentimut qinigassanngortittut ilaat taama oqarsimavoq. Ilalumi ilaqutariittut ingerlanerliorneq ingasammat. „Aningaasaqarneq nioqqutissiornerluunniit ukiuni tamakkunani taama annertutigisumik allanngorsimagaluarpata uissuummingaaratta aatsangaannalissagaluarpugut,“ atuagassiami Fortune-mi taama allassimasoqarpoq. Allaat ilaqutariit Biibilimi najoqqutassianik maleruaaniartut alianartunik eqqorneqarsinnaasarput.

Ukiualuit matuma siorna ataataq arfinilinnik nukangasunik meeralik kristumioqatiminit ajunngitsumik isumaqartumik ima oqarfigineqarsimavoq: „Meeqqavit ilaasa sisamat silarsuarmut annaanissaat naatsorsuutigisinnaavat.“ Ataatarli isumaqarpoq meeqqaminut ataatsimulluunniit tamanna pinavianngitsoq.

„Meeqqavut nammineq pigivinngilavut,“ oqarpoq. „Tassaapput nuliannut uannullu Jehova Guutip paarisassanngortitarisimasai, taassuma ’tunissutai’. Taannalu oqarsimavoq ingerlavissaannik eqqortumik ajoqersuukkutsigik ’tamanna nigussanngikkaat’. Taamaattumik Jehovap pigisaatut isumassorniarsariuaannarsimavavut.“ — Tussiaat 127:3; Ussatit 22:6.

Ataatap taassuma ilaqutariittut ingerlalluarluni inuunermut aqqut saqqummiuppaa — angajoqqaat meeqqatik Guutip pigisaatut iliorfigalugit isumassortuartariaqarpaat. Imaanngikkaluarpoq unnersuussutitit pitsaasut tamaasa meeqqavit tamatigut maleqqissaartassagaat, taamaattoq Guutip ilinnut paarisassanngortitaatut isumassornissaat akisussaaffigaat.

Akisussaaffik suusupagisassaanngitsoq

Isumassuineq tamanna ataqqinnillutit soqutiginnilluarlutillu, soqutigittaatsumiunngitsoq, ingerlattariaqarpat. Suliarisariaqarpat paasillugu Guutip ilinnut paarisassanngortitaa, tunissutaa, pillugu akisussaallutit. Meeqqanik perorsaariaatsit assigiinngitsut misiligarnisssaat pisariaqanngilaq. Angajoqqaat Guutip unnersuussutai oqaasiani Biibilimiittut kisiisa pisariaqartippaat, maleruaqqissaartariaqarlugillu.

Jehova Guuti ima unnersuussisimavoq: „[Oqaatsikka] qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu. Assannut qilerutissavatit ilisarnaatitut qaannilu inissisimallugit eqqaasitsissutissatut. Allakkit illunni matserfinnut illoqarfiullu isertarfiinut.“ Biibilimi aamma ima kajumissaaruteqarpoq: ’Ilissi, angajoqqaat, qitornasi . . . paariniarsigik perorsarlugit inertertarlugillu Jehovamit.’ — 5 Moses 6:7-9; Evfisumiut 6:4.

Meeqqat perorsassagaanni pisariaqarpoq ulluinnarni sammisarnissaat; aap, naammattumik piffissaqarfigisariaqarput ingammillu asanninnermik soqutiginnilluinnarnermillu ersersitsivigisariaqarlugit. Angajoqqaat meeqqamik pisariaqartitaannik tunngaviusunik tamakkuninnga isumaginnittut ilaqutariittut ingerlalluarnissaq eqqarsaatigalugu Guutip pisariaqartutut isigisaanik iliuuseqartarput.

Isumaqarpit taamaaliornissaq pisariuallaartoq? Angajoqqaarpassuit taamatut isumaqarnertik iliuutsimikkut ersersittarpaat. Guutilli tunissutai taakku — meeqqatit — ilumut immikkut soqutigineqartussaapput.

Qanoq isumassorneqarsinnaasut

Meeqqaminnik perorsaanerminni nuannaarutigalugu iluatsitsilluarsimasut  maligassiaat qimerluussallugit silatusaarneruvoq. Atuagassiat ilaanni ilanngutassiami „Ilaqutariit ajasoornartut“-mik qulequtalimmi meeqqanik perorsaanermi iluatsitsissagaanni pisariaqartut sisamat eqqartorneqarput: „[1] Nereqatigiinnermi oqaloqatigiinneq silassorissutsikkut ineriartornartoq, [2] atuakkanik pitsaasunik atuarneq, [3] maligassaalluartunut isumassarsiorneq, [4] ilaqutariittut ileqqunik atatitsiniaanissamik misigisaqarneq.“ — U.S.News & World Report, 12. decembari, 1988.

„Nereqatigiinnermi oqaloqatigiinneq“ eqqaasitsivoq Guutip angajoqqaanut unnersuussutaanik angerlarsimatillutik issiasaraangamik meeqqaminnik ajoqersuisarnissaannik. Ilissi ilaqutariittut nereqatigiittarpisi, taamaalillusi ulluinnarni ataatsimooqatigiinnissamut periarfissat atortarlugit oqaloqatigiilluartarlusilu? Piffissat taamaattut pingaartorujussuupput meeqqanullu puiuikkiunnartuullutik, aalajaassutsimik toqqissisimanermillu misigisaqartittarlugit. Arfinilinnik ukiulik oqarsimavoq nereqatigiittarnitik nuannareqalugit ataatsimoortillutinngooq ’ilani isumakullutigisariaqartannginnamigit’.

Nereqatigiinnermimi oqaloqatigiinnerup pitsaassusia? ’Atuakkanut pitsaasunut’, ilaatigut Biibilimut atuagassianullu Guutimut kiffartornitsinnut tunngasunut Guutilluunniit pinngortitaanut tunngassuteqartunut amerlanertigut sammisarpat? Taamatut nereqatigiinnermi oqaloqatigiittarnerup saniatigut aalajangersimasumik atuaqqissaaqatigisarnerisigut angajoqqaat meeqqatik Jehovamik taassumalu inatsisaanik naapertuilluartunik asannilersinniartariaqarpaat.

„Nerinermi ataatsimoortarneq ajornartorsiutigisimanngilarput,“ arfinilinnut ataataasoq siusinnerusukkut eqqaaneqareersoq nassuiaavoq. „Nereqatigiinnissarput eqqaasitsissutigisariaqarneq ajorpoq, ataasiussuseqalissutigaarpullu. Aalajangersimasumilli Biibilimik atuaqqissaartarnissaq ajornakusoorsimavoq.“ Ullormut sulerulooreersimalluni qasusimasaqigami atuaqqissaarnerup ingerlanerani ilaannikkut sinilersoortarsimavoq. Meeqqanili Biibilimik atuaqqissaaqatiginngitsoortarsimanngilai, ataasiakkaarlugillu oqaloqatigisarlugit oqaasissaannillu tusarnaartarlugit.

Nereqatigiinnermi oqaloqatigiilluartarnerup atuakkanillu pitsaasunik ataatsimoorussaqarnerup saniatigut aamma meeqqat maligassiortariaqarput. Inummik inuit inuusimasut pingaarnerpaartaannik, Jesus Kristusimik, malinnittunut meeqqavit akuutittarnissaat inersimasutut ajunngitsumik ingerlalernissaannut pingaaruteqartorujussuuvoq.

Taavami „ilaqutariittut ileqqunik atatitsiniaanissamik misigisaqarneq“ eqqarsaatigalugu? Meeqqavit paasissallugu pisariaqartippaat ilaqutariinni najoqqutassaqartoq aalajangiusimasassatut imminnut naatsorsuutigisaasunik — ileqqoqartoq, oqaloriaaseqartoq, atisalersoriaaseqartoq, pissusilersuuteqartoq ilaallu ilanngullugit akuerisaanngitsunik ilaqutariittullu ileqqunut naapertuutinngitsunik. Paasisariaqarpaat ilaqutariittut ileqqunik unioqqutitsineq iliuusiusoq ilungersornarluinnartoq — ilinnut alinartuusoq, soorlu itsaq ataataanerpaaq Jakob ernini kanngunartumik ileqqulersormata oqarsimasoq ’nunap inuinut uuminarsaraanni’. — 1 Moses 34:30.

Arfinilinnut ataataasup meeqqaminik Guutip pigisaatut isiginnittup ingammik „ilaqutariittut ileqqut“ pingaartissimavai. Meeqqani nassuiaattuartarsimavai atisalersoriaaseq, ipeersaarneq silarsuarmillu immikkoorniarneq eqqarsaatigalugit ilaqutariit najoqqutaat qanoq ilillutik Pinngortitsisup, Jehova Guutip, anersaavanut unnersuussutaanullu naapertuuttuusut. Piffissap, asanninnerup soqutiginnilluarnerullu meeqqaminut tunniussaata — aqqutissaatigut ilinniartitsinerata — kingunerisaanik meeraasa arfinillit tamarmik ’ingerlavissartik nigorsimanngilaat’. — Ussatit 22:6.

Nunarsuarmi tamarmi ilaqutareeqarpoq ataasiussuseqarluartunik. Pinngortitsisuminnut nersornaataaqaat, angajoqqaanullu namminissarsiunngitsunut asannittunullu akissarsiaallutik annertuut! Angajoqqaat taamaattut ukiut ingerlatillugit meeqqaminnit, ilungersornerminnik iluaqutiginnissimasunit, qujamasuffigineqaraluattuinnartarput. (wD 1/10 93)