Qatanngutitut tunniusimanerup pilerfia nassaariuk
Qatanngutitut tunniusimanerup pilerfia nassaariuk
’Guutimillu mianerinnillusi qatanngutissinnut tunniusimaniaritsi.’ — 2 PÎTRUSE 1:5-7, NV.
1. Jehovap innuttaasa katersoqatigiittarnerini nuannaartuarneq ilaatigut sumik pissuteqarnerua?
NAKORSAQ Jehovamut Nalunaajaasuunngitsoq ilaanni najuussimavoq panimmi Napasuliaq Alapernaarsuiffiup Biibilimik Atuarfiani Gileadimi soraarummeernerani, pania taanna ajoqersuiartortitassatut tassani ilinniarsimalluni. Inuppassuit pilluartut takullugit killitsingaarami nakorsaq isumaliulersimavoq inuit tamakku napparsimajuissimassaqisut. Sunamiuna inunnik taakkuninnga taamarsuaq nuannaalersitsisoq? Aammami, sooq-uku Jehovap innuttaasa katersoqatigiittarneri tamarmik taama nuannaarfiusartigisut, ilagiinni ataatsimiinnerugunik, ataatsimeersuarnerugunik ataatsimeersuaararnerugunilluunniit? Tamanna pissuteqannginnerluni qatanngutitut tunniusimanermik imminnut ersersitsivigisarnerannik? Qularutissaanngilaq, qatanngutitut tunniusimaneq pissutaasut ilagaat oqartoqarsimammat upperisarsioqatigiinnik allanik taama nuannaartigisunik, pilluartigisunik qiimatigisunillu nassaassaqanngimmat, Jehovap Nalunaajaasui kisimik.
2, 3. (a) Griikerit oqaasii marluk suut immitsinnut qanoq misigissuseqarfigisariaqarnitsinnik oqaatiginnippat? (b) Qanorpiaq taakku isumaqarpat?
2 Qatanngutitut tunniusimanermik taamaattumik naammattoorsinissarput naatsorsuutigissavarput Peterip oqaasii uku eqqarsaatigalugit: ’Sallusuissummut naalannikkut qatanngutigiissutut asaqatigiinnissamut (tunniusimanissamut, NV) peqqusersuitsumut tarnisi minguiarsigik, uummatissigullu ilungersorlusi asaqatigiigitsi.’ (1 Pîtruse 1:22) Oqaatsip griikerisuup uani „qatanngutigiittut tunniusimanermik“ nutserneqartup nagguiisa ilagaat phi·liʹa (tunniusimaneq). Taassuma isumaa oqaatsip a·gaʹpe-p „asanninnermik“ nutserneqarajuttup isumaanut qanittorujussuuvoq. (1 Juánase 4:8) Oqaatsit qatanngutigiittut tunniusimaneq asanninnerlu paarlakaattumik atorneqartaraluartut tamarmik immikkooruteqarput. Uagulli akuleriissinnaaveersaartigit, Biibilimik nutserisartut ilarpassuisut pinnata. Matuma kinguliini paasissavarput qatanngutigiittut tunniusimaneq aamma asanninneq qanoq isumaqarnersut.
3 Ilisimatooq griikerit oqaasiisa taakku assigiinngissutaannut tunngatillugu oqarpoq phi·liʹa „oqaasiusoq inussiarnernermut, ataqatigiinnermut tunniusimanermullu tunngalluinnartoq“. Kisiannili a·gaʹpe isummamut tunngassuteqarneruvoq. Akerlilersortitsinnut asanneqqusaagaluarluta taakku tunniusimaffiginngilavut. Sooq? Tassa ’ajortut ikinngutigalugit ileqqut ajunngitsut aserortarmata’. (1 Korintumiut 15:33) Oqaatsit assigiinngissuteqarnerat erserseqqinneqarpoq apustili Peter allammat: ’Qatanngutisilu asallugit [tunniusimaffigalugit, NV] tamanik asanninniaritsi’. — 2 Pîtruse 1:5-7; naleqqiuguk Juánase 21:15-17.
Qatanngutigiittut tunniusimalluinnarnermut assersuutissat
4. Sooq Jesus Johannesilu immikkut ittumik imminnut tunniusimaffigeqatigiippat?
4 Guutip Oqaasiisigut arlalinnik takussutissinneqarpugut qatanngutigiittut tunniusimalluinnarnermut assersuutissanik. Tunniusimalluinnarneq taanna isumassarseriataarnikkut pineq ajorpoq, tunngaveqarlunili inuup pissusiinik nuannersunik pingaartitsinermik. Tamatumunnga assersuutissat qularnanngitsumik ilisimaneqarnerpaartaraat Jesus Kristusip apustilimut Johannesimut tunniusimanera. Jesusip nangaassuteqarani apustiliminut ilumoortunut qatanngutitut tunniusimaffiginnippoq, pissutissaqarluarluni. (Lúkarse 22:28) Tamanna ilaatigut takutippaa isigaasa asannerisigut, tamatumuuna maniguunnermik ilinniartillugit. (Juánase 13:3-16) Jesusilli Johannes immikkut ittumik tunniusimaffigaa, tamannalu Johannesip arlaleriarluni eqqaasarpaa. (Juánase 13:23; 19:26; 20:2) Jesus ajoqersukkaminut apustiliminullu tunniusimassutsimik takutitsisaraluartoq Johannesip Jesus pissutissaqalersissimagunarpaa imminut tunniusimalluinnarnissaanut, Johannesip Jesusimut itinerusumik pingaartitsinera pissutigalugu. Tamanna takusinnaavarput Johannesip allagaani arlalinni, iivangkiiliuani aammalu isumassarsisitaalluni allagaani. Asanninneq qassinimmitaava allakkamini taavaa! Jesusip anersaakkut piginnaassusiinik Johannesip angisuumik pingaartitsinera takussutissaqarpoq Johannesip allagaani kapitalini 1-imi aammalu 13-imiit 17-imut, taamatullu aamma Jesusip inunngunngikkallarami qilammiissimaneranut arlaleriarluni innersuussisarnerani. — Juánase 1:1-3; 3:13; 6:38, 42, 58; 17:5; 18:37.
5. Paulusip Timoteusillu imminnut immikkut ittumik tunniusimaffigeqatigiinnerat qanoq oqaatigineqarsinnaava?
5 Taamatuttaaq takunngitsoorsinnaanngilarput qatanngutitut tunniusimalluinnarneq apustilip Paulusip kristumiutullu ikinngutaata Timoteusip akornanniittoq, qularnanngitsumik pissutsiminnik qujamasuutiginneqatigiinnerannik tunngaveqartoq. Paulusip allakkamini Timoteus eqqartorluartarpaa, soorlu imaattumik: ’Allamik taassumatut ilissinnik isumaginnilluarumaartumik isumaqateqannginnama . . . Taannali misiligaalluartoq ilisimavarsi, [nutaarsiassamut nuannersumut, NV] kiffartuusseqatigigakku, soorlu qitornaasup ataatani kiffartuuttaraa.’ (Filípimiut 2:20-22) Allakkamini Timoteusimut innersuussisarneratigut erserpoq Paulus Timoteusimut tunniusimassuseqartoq. Assersuutigalugu malugiuk Timûtiusimut agdlagkat sujugdlît 6:20: ’Timoteusiaa, ilinnut paarititaq paarilluarniaruk.’ (Aamma takukkit 1 Timûtiuse 4:12-16; 5:23; 2 Timûtiuse 1:5; 3:14, 15.) Pingaartumik Paulusip Timoteusimut allagai Titusimut allagaanut sanilliukkaanni Paulusip inuusuttumut taassumunnga tunniusimalluinnarnera erseqqissisarpoq. Timoteusip ikinngutigiinnertik Paulusitulli misigisimassavaa, soorlu Paulusip Timûtiusimut agdlagkat áipait 1:3, 4-mi malugineqarsinnaasoq: ’Aammami soraarnanga qinusarnikkut eqqaasarpakkit, . . . qullisillu eqqaasarlugit takorusulillaaraakkit tipaatsulluinnaleqqullunga.’
6, 7. David Jonatanilu imminnut qanoq misigissuseqarfigippat, sunalu pissutigalugu?
6 Allakkat hebriiarisuut aamma maligassaalluartunik saqqummiussaqarput, soorlu David Jonatanilu. Oqaluttuarineqarpoq Davidip Goliatimik toqutsinerata kingorna ’Jonatanip David nuannaringaaleraa, namminermisut asatigilerlugu.’ (1 Samuel 18:1) Davidip Jehovap aqqanik ilungersuussinermigut aammalu qunusuilluni Goliatersuarmut sassarsimanermigut maligassiuilluarnera qularnanngitsumik pingaartillugu Jonatan Davidimut tunniusimalluinnalerpoq.
7 Jonatan Davidimut ima tunniusimatigaaq allaat inuunini navianartorsiortissimallugu David illersoramiuk kunngip Saulip ajortumeeriniarneranit. Aamma Davidip Israelikkut kunngissaattut Jehovamit qinigaasimanera Jonatanip ajuallaatiginngivippaa. (1 Samuel 23:17) Taamattaaq David Jonatanimut tunniusimalluinnarpoq, tamannalu erseqqippoq taamani ullaaq taanna Jonatan toqummat oqaasiinit imaattunit: „Aliasuutigaakkit qatanngutiga Jonatan, ilami asagaluaqigakkit. Uannut asanninnerit pingaarnerutippara arnat asanninnerannit allaat.“ Ilumut, pingaartitsingaarneq inuit taakkua akornanni malunnaataavoq. — 2 Samuel 1:26.
8. Arnat marluk kikkut immikkut ittumik imminnut tunniusimaffigeqatigiippat, sunalu pissutigalugu?
8 Allakkani Hebriiarisuuni aamma kusanartumik takussutissaqarpugut arnat marluk imminnut tunniusimaffigilluarnerannik, tassa No’omi ukuaalu uillarneq Rut. Rutip No’omimut oqaasii eqqaamakkit: „Ilinnit qimagunnissannut angerlarnissannullu kimigiiserfigeqinanga. Ornikkat uangattaaq ornissavara, najugariligassannilu najugaqassaanga. Inuiaqatitit uangattaaq inuiaqatigissavakka, illillu Guutit uangattaaq Guutigissavara.“ (Rut 1:16) Tamanna pillugu ima inerniliisariaqannginnerpugut, No’omip pissutsimigut aammalu Jehovamik oqaluuserinnittarnermigut Rutimi pingaartitsineq pilersissimagaa? — Naleqqiuguk Lúkarse 6:40.
Apustilip Paulusip maligassiaa
9. Sumit paasinarpa Paulus maligassaalluartuusoq qatanngutitut tunniusimanerup tungaatigut?
9 Soorlu taaneqareersoq, apustilip Paulusip Timoteus qatanngutimisut tunniusimaffigilluinnarsimavaa. Aammali Paulus kusanarluinnartumik maligassiivoq anersaakkut qatanngutiminut tamanut inussiarnerluni tunniusimarpaluttumik saaffiginnittarnermigut. Utoqqaanertat Efesusimiut oqaluttuuppai ’ukiut pingasut naallugit unnuakkullu ullukkullu soraarnani tamaasa immikkut eqqaasinniartarsimallugit qullililluni.’ Tassa inussiarnersumik qatanngutinut tunniusimaneq? Tamanna qularutissaanngilaq! Aammalu utoqqaanertat Paulusimut taamatulli misigissuseqarput. Tusaramikku takoqqinnaviarnagu ’tamarmik qiangaarput, Paulusilu qungasiatigut eqippaat kunillugulu’. (ap. sul. 20:31, 37) Tassa qatanngutitut tunniusimaneq pingaartitsinermik tunngaveqartoq? Aap! Paulusip qatanngutitut tunniusimanera aamma takuneqarsinnaavoq Korintumiunut allagaasa aappaanni 6:11-13-imi: ’Qanerput ilissinnut ammarpoq, Korintumiut ukorsii; uummaterput neruttorpoq. Ilutsinni ninniortitaanngilasi, ilissili uummatissinni ninniortitsivusi. Nalissaannik akiliiniarlusi (qitornakkalusooq oqaluffigaakka) ilississaaq neruttoritsi.’
10. Sunaana pissutigalugu Paulusip misigisani erloqinartut oqaluttuarisariaqalersimagai, 2 Korintumiut 11-imi atuarsinnaasatsitut?
10 Erseqqippoq Korinthimiut ilarpassui apustilimut Paulusimut qatanngutitut tunniusimanermik pingaartitsinermillu amigaateqarsimasut. Taamaattumik ilaat naammagittaalliorput: ’Allagai kimittoqalutillu artornallaaraat, timimigulli najuilluni sanngiittarpoq oqaasialu sussaanngilaq.’ (2 Korintumiut 10:10) Taamaattumik-una Paulusip eqqaasikkai ’apustiliinik akitsisunik’, oqaluttuarisariaqalerlugillu misilinneqarnini erloqinartut, 2 Korintumiut 11:5, 22-33-imi allaaserineqartut.
11. Suup takutippaa Paulus tunniusimassuseqarsimasoq Thessalonikami kristumiunut?
11 Paulusip kiffartorfigisaminut inussiarnerluni tunniusimanera ingammik erseqqippoq Tásalûníkamiunut agdlagkat sujugdlît 2:8-mi: ’Taama asangaarlusi (tunniusimaffigingaarlusi, NV) nuannarisaqarpugut aviffigiumallusi, Guutip iivangkiiliuinnaanik pinnata, inuunitsinnilli allaat, tassa uatsinnut asanarsigassi.’ Qatanngutertaanimi taakku ima tunniusimaffigitigai allaat sapilerami Timoteus taakkununnga tikeraartillugu, qiimmaallaatigeqisaminillu tusarfigalugu. (1 Tásalûníkamiut 3:1, 2, 6, 7) Atuakkami Insight on the Scriptures-imi iluamik ima oqaatigineqarpoq: „Paulusip kiffartorfigisaasalu akornanni qilerutitut qajannaatsutut ippoq qatanngutitut tunniusimaffiginninneq.“
Qujamasuutiginninneq - qatanngutitut tunniusimanerup pilerfia
12. Suut pissutigalugit qatanngutivut qamannga pisumik tunniusimanermik takutitsivigisariaqarpavut?
12 Qularutigineqarsinnaanngilaq pingaartitsineq qatanngutitut tunniusimanerup aallaavigigaa. Manna ilumuunnginnerluni kikkut tamarmik Jehovamut kiffartortut tunniulluinnarsimasut pissuseqartut pingaartitatsinnik, tunniusimassutsitsinnik pilersitsisunik taakkununngalu nuannarinnissutigilikkatsinnik? Tamatta Guutip naalagaaffia naapertuilluassusialu sallitippavut. Tamatta sapiilluta akiuuppugut akeqqatsinnut pingasunut: Satanimut anersaapiluinullu, silarsuarmut ajortumut Satanimit aqunneqartumut aammalu uinitta ajortiliusup namminissarsiorumatussusianut kingornussimasatsinnut. Taamaattumillu tamatigut naatsorsuutigisariaqannginnerparput qatanngutivut ajornartorsioraluarlutik ajunnginnerpaamik iliorniartut? Kikkut tamarmik nunarsuarmiittut Jehova iliginngikkunikku Satan iligissavaat. Qatanngutitta angutit arnallu tunniulluinnarsimasut Jehova iligaat — tassa uagut iligaatigut. Taamaattumillu qatanngutitut tunniusimaffigineqartariaqarput.
13. Sooq utoqqaanertat qamannga pisumik tunniusimaffigisariaqarpavut?
13 Utoqqaanertammi qanoq isumaqarfigaavut? Pingaartippavut? Uummatitsinni immikkut inissaqartittariaqannginnerpavut qanoq ilungersortigalutik ilagiinnut sullissinerat eqqarsaatigalugu? Taakkua aamma uagutsitulli imminnut ilaquttaminnullu isumaginnittussaapput. Uagutsitulli pisussaaffeqarput nammineerluni atuaqqissaarnissamut, ataatsimeeqataasarnissamut oqaluussiartortarnissamullu tunngasunik. Tamakkua saniatigut ataatsimiinnerni saqqummiussinissaminnut piareersartarput, tamanut ammasumik oqalugiartarlutik aammalu ajornartorsiutit ilagiinni pilersut nakkutigisarlugit, taamalu ilaannikkut nalunaaqquttap-akunnerpassuini naliliisoqatigiit ataatsimiinnerini peqataasinnaasarlutik. Kissaatigaarput angutit ’taakkunatut ittut ataqqisariuarumallugit’. — Filípimiut 2:29.
Qatanngutitut tunniusimanerit iliuutsinni takutiguk
14. Allassimaffiit suut qatanngutitut tunniusimassuseqaqqulluta inappaatigut?
14 Jehova nuannaartikkumallugu qatanngutitut tunniusimanerput uppeqatitsinnut iliuutsitsinni ersersittariaqarparput, soorlu Jesus Kristus apustililu Paulus taamaaliorsimasut. Soorlu imaattoq: ’Qatanngutigiittut tunniusimanissinni qamuuna tunniusimaqatigiigitsi.’ (Romamiut 12:10, Kingdom Interlinear) ’Qatanngutitulli tunniusimanissamik allaffigisariaqanngilasi nammineq Guutimit ajoqersorneqarassi asaqatigeeqqullusi.’ (1 Tásalûníkamiut 4:9, Int) ’Qatanngutitut tunniusimaqatiginneq soraarnaveerli.’ (Eprîarit 13:1, Int) Uffami, Ataatatta qilammiusup nuannarisarpaa qitornaminut nunarsuarmiittunut qatanngutitut tunniusimanermik ersersitsigaangatta!
15. Qanoq iliornikkut qatanngutitut tunniusimanermik takutitsisoqarsinnaava?
15 Apustilit nalaanni kristumiut ileqqorisimavaat imminnut ilassisarlutik ’kunimmik iluartumik’ imaluunniit ’kunimmik asannissutsip pianik’. (Rûmamiut 16:16; 1 Pîtruse 5:14) Tamanna qatanngutitut tunniusimanermut ersersitsisuulluarsimavoq. Ullumikkut amerlanerni tulluarnerutinneqarpoq ilumoorluni inussiarnerluni qungujunnikkut assammiinikkullu qatanngutitut tunniusimanermik ersersitsinissaq. Latinamerikami, soorlu Mexicomi, kunissineq isigineqartarpoq tunniusimanermik ersersitsilluarnertut. Immaqaana tunniusimalluarneq tamanna qatanngutitta ersersittagaat silarsuup ilaani tamaani amerliartornerujussuannut pissutaasut ilagigaat.
16. Ataatsimiittarfitsinni katersuukkaangatta sunik periarfissaqarpugut qatanngutitut tunniusimanermik takutitsinissatsinnut?
16 Ataatsimiittarfitsinni katersuukkaangatta qatanngutitut tunniusimanerput takutinniarlugu immikkut ittumik iliuuseqartarnerpugut? Tamatuma qiimmannartunik oqaaseqarnissatsinnut kajumissisissavaatigut pingaartumik ilavut immaqa nikallungasut eqqarsaatigalugit. Tassami allaat peqquneqarpugut ’nikallortut tuppallersartaqqullugit’. (1 Tásalûníkamiut 5:14) Taamaaliorneq qatanngutitut tunniusimanermik ilumoortumik ersersitsilluarneruvoq. Aamma taamaaliortoqarsinnaavoq qujamasunnermik ersersitsisaraanni tamanut ammasumik oqalugiarluartumut, ataatsimiinnermi ingerlalluartumi saqqummiusseqataasumut, teokratiimik ilinniarfimmi peqataalluartumut assigisaanilluunniit takutitsilluartumut.
17. Qatanngut utoqqaanertaq qanoq ililluni ilagiinnit tamanit tunniusimaffigineqalerpa?
17 Aammalu qatanngutit angutit arnallu assigiinngitsut neriartoqqulaassannginnerpavut imaluunniit ataatsimiinnerup kingorna kingusippallaanngippat tiitoriartoqqullugit kaffisoriartoqqullugilluunniit? Tamatumani maleruassannginnerparput Jesusip Lúkarse 14:12-14-imi siunnersuutaa? Ilaanni siornatigut ajoqersuiartortitaasimasoq ilagiinni nakkutilliisut siulittaasuattut toqqagaavoq, ilagiinni ilaasortaasut allat tamaasa naggueqatiginagit. Malugaa qatanngutitut tunniusimaneq amigaataasoq, aalajangerporlu tamanna iliuuseqarfiginiarlugu. Qanoq? Sapaatit tamaasa ilaqutariit tulleriiaarlugit imminut neriartoqqusarpai. Ukiullu ataatsip ingerlanerani ilagiinniittut tamarmik qatanngutitut tunniusimassuseqarfigilerpaat.
18. Qanoq ililluta qatanngutivut napparsimasut qatanngutitut tunniusimanermik takutitsivigisinnaavavut?
18 Qatanngut angut arnarluunniit napparsimappat, angerlarsimaffimmini napparsimmavimmiluunniit, qatanngutitut tunniusimassutsitta killissavaatigut taassuminnga isumassuinitsinnik takutitsinissatsinnut. Aamma paaqqinniffinni najugaqartut puigorniaqinagit. Soormi pulaassanngiligit, sianerfigalugilluunniit, imaluunniit assiliaaqqamik nassillugit isumagineqarnerannik ersersitsivigalugit?
19, 20. Qanoq ililluta takutissinnaavarput qatanngutitut tunniusimanerup tungaatigut ’annertunerulersimanerput’?
19 Qatanngutitut tunniusimanermik ersersitsinissaq eqqarsaatigalugu ima immitsinnut aperisariaqarpugut: ’Qatanngutitut tunniusimassutsinni kinaassusersiunnginnerpunga? Ammip qalipaataa, sumik ilinniagaqarsimaneq imaluunniit qanoq peqartigineq sunniuteqartarnerlutik qatanngutitut tunniusimassutsimik ersersitsiniarninni? Pisariaqartinnginnerpara qatanngutitut tunniusimassutsimik ersersitsisarnerma annertunerulernissaa, soorlumi taama apustilip Paulusip Korinthimi kristumiut kajumissaarsimagai? Qatanngutitut tunniusimanerup qatanngutitsinnik ajunngitsumik eqqarsaatiginnittarnissamut killissavaatigut, tassa pissusaat nuannersut pingaartilissagatsigik. Qatanngutitut tunniusimanerup aamma sunnissavaatigut qatanngutip anersaakkut ittumik siuariarnerinik nuannaarutiginnittarnissatsinnut, sinnganeq pinnagu.
20 Aammattaaq qatanngutitut tunniusimanerup sunnertariaqarpaatigut uppeqatitsinnik oqaluussisarnikkut ikiuunniartarnissatsinnut. Jehovap Nalunaajaasuisa erinarsuutaanni normu 92-imi (kalaallisuunngortinneqanngitsumi) oqaatigineqartutuut iliortariaqarpugut:
’Sanngiitsoq ikiorumasaruk.
Qatanngutitaatit ikiukkit
nakussatseqqullugit uppissuseqaleqqullugillu nalunaajaanissamut.
Anersaaruluttut tuppallersakkit;
Guutitsinnik tatiginnilluinnaleqqullugit ikiukkit.’
21. Qatanngutitut tunniusimassuseqarutta tamatuma qanoq kinguneqarnissaa ilimagisinnaavarput?
21 Taamaattumik, qatanngutitut tunniusimaneq ersersittuarlutigu, puigorniaqinatigik Jesusip Qaqqami Oqaluutsimini najoqqutassiissutai: ’Tunisigitsi, taava ilississaaq tunineqassaasi. Ajunngitsumik naqissimasumik aalatikkamik qammissimasumik uuttugaq saassinnut tunniukkumaarpaat uuttuutigisassinnik uuttuiffigineqarumaarassi.’ (Lúkarse 6:38) Tassa paasivarput aamma uagutsinnut iluaqutissaasoq qatanngutitut tunniusimanermik takutitsisarutta aammalu Jehovamut uagutsitulli kiffartuussisunik pingaartitsinerput ersersittarutsigu. Ilumut, pilluarput qatanngutitut tunniusimanerminnik takutitsisut! (wD 15/10 93)
Qanoq akissavit?
□ Griikerisut oqaatsit suut qatanngutitsinnut attaveqarnitsinnik oqaatiginnittuuppat, qanorlu immikkooruteqarpat?
□ Qatanngutitut tunniusimassutsip suna pilerfigaa?
□ Immikkut ittumik qatanngutitut tunniusimassuseqarnermik Biibilimi assersuutissat suuppat?
□ Sooq qatanngutivut utoqqaanertallu qamannga pisumik qatanngutitut tunniusimaffigisariaqarpavut?
[Atuaqqissaarnermi apeqqutit]