Suup pillualersippaatit?

POLITIKERIT qinikkat qinersisimik pillualersinnissaat ilungersuutigisarpaat. Tamannami suliaannut aalajangiisuuvoq. Atuagassiamili eqqartorneqarput Polenimi „qinersisartut isumallualussinnartitat sumiginnakkallu“. Tusagassiortoq oqaluttuarpoq USA-mi inuiaqatigiit ’politikerinut tatiginninngitsorujussuusut’. Allaatiginnittartut ilaata ’Frankrigimi politikkikkut ilaguutiinnaleriartuinnarneq’ allaaserisimavaa. Taamatut ilaguutiinnarnerup naammagittaalliornerullu annertuup — nunani taakkunani pingasuinnarnioqqajanngitsoq nassaassaasup — ersersippaa politikerit inunnik pillualersitsisinnaasimanngitsut.

Aamma palasit pillualernissamik neriulluarsaarisarput; massakkut inuunermiunngikkuni siunissami. Neriulluarsaarutitik inuit toqujuitsumik ingerlaqqittartumilluunniit tarneqarnerannik — inuppassuit assigiinngitsunik pissuteqarlutik assortugaannik Biibilimilu ersarissumik akerlilerneqartumik — tunngaveqartinniartarpaat. Naalagiartartut ilagiinnullu ilaasortat ikiliartuinnarnerata ersersippaa inuit millionilippassuit upperisarsiorneq pillualernissamut apeqqutaanngitsutut isigilersimagaat. — Naleqqiuguk Mosesimik allakkat siulliit 2:7, 17; Hesekiel 18:4, 20.

’Aningaaserituujunikkut’ naammagittaanneq

Pilluarneq politikkimiinngippat imaluunniit upperisarsiornermiinngippat taava sumi nanineqarsinnaava? Immaqa niuernerup silarsuaani? Oqartoqartarpormi niuerneq pillualersitsisartoq. Ussassaarutitigut tamanna tunngavissaqartinniarneqartarpoq, tusarliussarlu paasiuminarpoq: Pilluarneq pigisatigut kiffartuussinertigullu pisiarineqarsinnaasutigut anguneqartarpoq.

 Inuit taamakkunuunatigut pilluarnermik anguniagaqartut amerliartuinnarsorinarput. Ukiut arlallit matuma siorna oqaatigineqarpoq Tysklandimi tamarmi inoqutigiit affaat akiitsugalerujussuusut. Taamaattumik tupinnarpallaanngilaq Tysklandimi aviisimi akuersugaasumi Die Zeit-imi siulittuutigineqarsimammat ’taakkua ilarpassuisa akiitsukkaminnik akiliinissaat minnerpaamilluunniit ilimanaateqanngitsoq’. Aviisimi allassimavoq: „Kontomiititat aningaaseriviit killissarititatut neqeroorutigiuagaannik qaangernissaat ajornanngeqaaq — akiitsukkallu qilersuinerat qilerussaassallugu ajornaqaluni.“

Nunani nioqqutissiorfiusuni allani aamma taamaappoq. Ukiualunnguit matuma siorna New Yorkimi City-universitetimi sociologiusoq David Caplovitz missingersuisimavoq USA-mi inoqutigiit 20-25 millionit akiligassalerujussuusut. Oqarpoq: „Inuit akiitsulerujussuupput, tamannalu inuunerminnut aseruutigisarpaat.“

Ila pilluarnerorpasilaanngilaq! Niuernerulli silarsuaata allat marluk (politikkip upperisarisornerullu) naammaasisinnaanngisaannik pilersitsinissaa naatsorsuutigisariaqannginnerparput? Kunngi pisooq Salomon ilaanni ima allassimavoq: „Aningaaseritooq aningaasaatiminik ilatsaasuiuartarpoq. Pisuussutinik nuannarinnittoq pissarsiaminik naammatsiuitsuuvoq. Tamannattaaq piunngitsuuvoq suiallannerinnartut illuni.“ — Nalunaajaasup oqaasii 5:9.

Pigisatigut pilluarnermik anguniagaqarneq sioqqanik illunnguusiornertut ippoq. Sanallugit pissanganaqaaq, najugaqarfiginiaraluaraannili ajornartorsiutit takkutissapput.

Pilluarneq anguneqarsinnaavoq — qanorli?

Apustilip Paulusip Jehova ’Guutitut pilluartutut’ eqqaasimavaa. (1 Timûtiuse 1:11) Guutip pilluartup inuit imminik assililluni pinngortinnerisigut pilluarnermik misigisinnaassusilerpai. (1 Moses 1:26) Pilluarsinnaassappulli aatsaat Guuti kiffartuukkunikku, soorlu tussiaasiortoq oqarsimasoq: „Pilluarput inuiaat [Jehovamik] Guuteqartut.“ (Tussiaat 144:15b) Ny Verden-nutsikkami oqaatsit „pilluarneq“-rup „pilluarpoq“-llu atorneqarfiisa 134-usut ilaat misissorutsigik Guutimut kiffartornerput sunik nassataqartoq taassumunngalu kiffartorneq qanoq ililluni pillualersitsisartoq paasisinnaanerulissavarput.

Anersaakkut pisariaqartitatit nassuerutigikkit

Jesus Kristus, Guutip ernera, qaqqami oqaluutsimini tusaamasaasumi ima oqarsimavoq: „Pilluarput anersaakkut pisariaqartitaqarnerminnik miserratiginninngitsut.“ (Matîuse 5:3, NV) Niuernerup silarsuaata isumaqalersinniarsaraatigut pigissaarutinik pigisaqalerutta pillualissasugut. Angerlarsimaffitsinnigooq qarasaasiartaarutta, videomik assiliissutitaarutta, telefonitaarutta, biilitaarutta, timersornermut atortunik nutaanik atisanillu mutinik pisaarutta pillualissaagut. Eqqaaneqarnerli ajorpoq inuit millionilippassuit nunarsuarmi sumi tamaaniittut tamakkuninnga peqanngikkaluarlutik pilluaatsuunngitsut. Tamakkua pillualernissamut aalajangiisuunngillat, immaqa ulluinnarni inuunermik oqinnerulersitsisaraluarlutik.

Anersaakkut pisariaqartitaqarnerminnik miserratiginninngitsut Paulusip oqarneratut oqartarput: ’Nerisassaqarlutalu atisassaqarutta tamakku naammagissavavut.’ (1 Timûtiuse 6:8) Sooq? Anersaakkut pisariaqartitatta matuneqarnerat inuunermik naassaanngitsumik nassataqassammat. — Juánase 17:3.

Pisiarinissaannut akissaqaraanni pigissaarutinik nuannaarutiginninneq kukkusuugami?  Immaqa naamik. Akissaqarnerli pissutigiinnarlugu sunnguit tamaasa pisiarisannginnissaannik ilikkarneq anersaakkut peqqissutsimut nakussassaataavoq. Jesusitut, silamiut isaannit pisoorsuunngikkaluarluni, naammagisimaarinnillunilu pilluarnissaq ilikkarneqartarpoq. (Matîuse 8:20) Aammami Paulus pilluaannani ima allassimavoq: ’Qanoq atugaqaraangama naammagissallugu ilikkarpunga. Nikanarneq sungiusimavara peqangaarnerlu sungiusimallugu, tamanik tamanilu sungiussisimavunga qaarsilaarnermik kaannermillu, peqangaarnermik ajorsarnermillu.’ — Filípimiut 4:11, 12.

Jehova tunaariuk

Anersaakkut pisariaqartitanik nassuerutiginninnikkut Guutimut tunaarinninneq ersersinneqartarpoq. Tamanna pilluarnermik kinguneqartarpoq, soorlu kunngi Salomon oqarsimasoq: „Pilluarpoq [Jehovamik] tunaarinnittoq.“ — Ussatit 16:20.

Ilumuunnginnerpa inuppassuit aningaasat pigisallu Guutimit tunaarinerugaat? Taamaattumik aningaasanik „Guuti tunaarivarput“-mik allagartalersuineq assuarnarluinnartuuvoq. Taamaakkaluartoq Amerikami inatsisit naapertorlugit aningaasat naligisaannut tunngaviutitami taama allassimasoqarpoq.

Kunngi Salomon, aningaasanik pisiarineqarsinnaasunik amigaateqanngitsoq, nassuersimavoq pigisanik tatiginninneq pilluarnermik ataavartumik kinguneqarneq ajortoq. (Nalunaajaasup oqaasii 5:12-15) Aningaasat aningaaserivimmiititat aningaaserivik ajutoorpat aningaasalluunniit naleeruppata annaaneqarsinnaapput. Pigisat aalajangersimasut pinngortitap ajunaarnersuaqartitsineratigut aserorneqarsinnaapput. Sillimmasiissutit, pigisanik ilaannaasumik taarsiissutissiisartut, misigissutsikkut annaasaqarnernik taarsiisinnaanngillat. Aktiat obligationillu aningaasanik niuernermi ajutoornikkut naleeruteriataarsinnaapput. Allaat suliffik aningaasarsinarluartoq assigiinngitsorpassuarnik peqquteqartumik annaaneqarsinnaavoq.

Taamaattumik Jehovamik tunaarinnittup Jesusip mianersoqqussutaanut tusarnaarnissani sianisuutut isigaa: ’Pequutinik nunami katersuiniassanngilasi, oquillu manngertornerullu aserugassaannik tillikkajuttullu ammarteriffigisassaannik tilligassaannillu. Pequutinilli qilammi katersuiniaritsi, oquillu manngertornerullu aserussanngisaannik tillikkajuttullu ammarteriffigissanngisaannik tillissanngisaannillu.’ — Matîuse 6:19, 20.

Nalunngikkaanni Guuti ajugaqanngitsoq isumassuiuaannartoq tunaaralugu, toqqissisimaneq pilluarnerlu annerpaat misigineqarsinnaapput. — Tussiaat 94:14; Eprîarit 13:5, 6.

Guutimit oqaanneqartigit

Siunnersorneqarneq, aap allaat ilungersortumik oqaanneqarneq, ikinngummit  ilumoortumit asannittumik pisoq ilassiumaneqarajuttarpoq. Jobimut Guutip kiffaanut ikinngutaanerartoq imminut iluartuutinniarluni ilaanni Jobimut ima oqarsimavoq: „Pilluarpoq inuk Guutip anusinngorsagaa.“ Tamanna ilumoorpoq; Elifazilli pisaa tassaavoq Job annertuunik unioqqutitsisimasoq — tamannalu eqqunngilaq. Tassa ’tuppallersaasoq erloqisitsiinnartoq’! Kingusinnerusukkut Jehovap asannittumik periaaseqarluni ilungersortumik oqaammani maniguulluni Jobip akueraa taamaalillunilu pilluarneq angisooq angullugu. — Job 5:17; 16:2; 42:6, 10-17.

Ullumikkut Guuti Jobimut iliorsimanermisut toqqaannartumik kiffani oqaluffigineq ajorpai. Oqaatsini peqatigiissortanilu anersaaminik siulersukkani aqqutigalugit oqaattarpai. Kristumiut pigisat tungaatigut ulapputeqartut Biibilimik aalajangersimasumik atuaqqissaartarnissaminnut ataatsimiinnernullu Jehovap peqatigiiffiata aaqqissugaanut najuunnissaminnut amerlasuutigut piffissaqaratillu nukissaqaratillu kajumissuseqarneq ajorput.

Ussatit 3:11-18 malillugu Guutip ilungersortumik oqaassaata taamatut oqaanneqarnerup akuerinissaata silatusaarnerussusia paasisarpaa: „Pilluarpoq ilisimassummik nassaartoq, inuk siuneqarluarnermik pissarsiaqartoq. Ilisimassutsip pissarsiarinissaa sølvip pissarsiarinissaanit pingaarneruvoq, iluanaarutissartaalu kuultimit anneruvoq. Ilisimassut sapanngarissunit erlinnarneruvoq, pilerinartitavillu suugaluartulluunniit allat nallersinnaanngilaat. Tigumiarai talerpimmini inuunertussuseq, saamimminilu pisuussutit ataqqinaallu. Ilisimassutsip aqqutai aqqutaapput alianaatsut, ingerlavii tamarmik eqqissinermut sammipput. Aalajangiussisiminut tamanut orpiuvoq inuunartoq, pilluarput taassuminnga iperaanaveersaartut.“

Minguitsuugit eqqissinermillu nuannarisaqarit

Jesusip inuit pilluartut ’minguitsumik uummatilittut’ aamma ’eqqissisitsisutut’ eqqartorpai. (Matîuse 5:8, 9) Silarsuarmili pigisanik pingaartitsilluni inooriaaseqarnissamik kajumissaariffiusumi namminissarsiussuseq, immaqalu allaat kissaatit minguttuut, uummammi sorlaneqqajaasaqaat! Guutip ilisimassusianit siulersorneqartinngikkutta periaatsit unneqqarippasinngitsut inunnut allanut eqqissinartumik attaveqarnitsinnik aseruisinnaasut aqqutigalugit aningaasatigut qaffakkiartornissamik anguniagaqarnermut sangutitaasooqqajaasinnaavugut! Pissutissaqarluarluni Biibilip mianersoqquaatigut: ’Aningaasanik piumatuunermit ajortut tamalaat naasarput; tassungalu kajumissillutik ilaasa upperneq tammaavaat, erloqinartorpassuillu imminnut atortippaat.’ — 1 Timûtiuse 6:10.

Aningaasanik piumatuunerup namminissarsiussuseq naammagittaalliornermik, qujasuissutsimik sunillu tamanik piumatussutsimik ilasaasoq siuarsartarpaa. Tamanna pinngitsoorniarlugu kristumiut ilaat aningaasatigut annertuumik aalajangiinnginnerminni ilaatigut ima apereqqaartarput: Ilumut pisariaqartilluinnarpara? Inuit millionilikkuutaat tamakkuuteqanngikkaluarlutik ajunngitsumik ingerlanerat eqqarsaatigissagaanni pisiassat akisuut taakku imaluunniit suliffik akissarsiorfiulluartoq piffissaajarnartorlu taanna pisariaqartippakka? Aningaasaatikka imaluunniit piffissara pallorfiginninnermut ilumoortumut peqataanerulernikkut, nunarsuaq tamakkerlugu oqaluussinermik tapersersuinikkut, imaluunniit atugarissaannginnerusunik ikiuinikkut atorluarnerusinnaavakka?

Nikallujuissuseqarit

Misilinneqarnerit Jobip atortariaqarsimasaasa ilagaat aningaasanik annaasaqarneq.  (Job 1:14-17) Soorlu taassuma maligassiaatigut ersertoq inuunermi sutigut tamatigut nikallujuitsuusariaqarpugut. Kristumiut ilaasa malersugaaneq nikallujuillutik atortariaqartarpaat, ilaasa ussernartut akiorniartariaqartarpaat, allallu aningaasatigut ingerlanerliorneq atortariaqartarpaat. Soorluli ajoqersugaq Jakob Jobip nikallujuissusia innersuussutigalugu allassimasoq nikallujuissuseq qanorluunniit ittoq Jehovamit akilerneqartarpoq: ’Ata, ilalaartut pilluarnerararaavut.’ — Jâko 5:11.

Aningaasatigut atugarisat pitsaanerulersinniarlugit anersaaakkut soqutigisanik ilaginnaaneq immaqa aningaasatigut sivikitsumik ingerlalluartitsilersinnaagaluarpoq, Guutilli naalagaaffiani tamakkiisumik pigissaalernissamik neriuummik nakussatsissutaassanerpa? Taamatut navianartorsiortinneq imminut akilersinnaava? — 2 Korintumiut 4:18.

Maannakkut naassaanngitsumullu pilluarneq naniuk

Nalunanngilaq ilaasa inuit pillualissappata suup pisariaqarneranik Jehova isumaqatiginngikkaat. Guutip siunnersuutai maleruarunikkik ingerlaannaq inuttut iluaqutissaminnik takusaqarsinnaanngillat pingaarnerungaartorlu, tassa siunissami ungasinnerusumi ajunngitsorsiassat, arajutsillugit. Paasinngilaat pigisanik tunaarinninneq piunngitsuusoq pakatsinermillu kinguneqartarluni. Taamaattumik Biibilimik allaqataasoq eqqortumik oqarsimavoq: „Aningaasaatit amerligaangata taakkuninnga iluaquteqarniartut aamma amerlanerulersarput. Pisuup pisuussutimigut iluanaarutissatuaa tassa nakkutigisassami amerliartuinnarnerat.“ (Nalunaajaasup oqaasii 5:10; takukkittaaq Nalunaajaasup oqaasii 2:4-11; 7:12.) Pigerusulluinnartutut misigiffigisimavut erniinnaq soqutigiunnaartarpavut — amerlasuutigullu assiliaataaginnalersarput pujoralattuutaaginnalerlutik!

Kristumiu ilumoortoq misigineqalersinneqanngisaannartariaqarpoq pigisatigut allat naligisariaqarlugit. Nalunngilaa nalillit piviusut nalilerneqartartut pigisat naapertornagit pissuserli naapertorlugu. Qularutiginngilaa inuk pillualissappat suna pisariaqartoq — pilluarneq piviusoq tassaasoq Jehovamut attaveqarluarneq taassumunngalu kiffartornermi ulapputeqarneq. (wD 1/6 93)

[Qupp. 29-mi assiliartaq]

Pigisat kisimiillutik pilluarnermik ataavartumik pilersitsisinnaanngillat

[Qupp. 31-mi assiliartaq]

Biibilimi allassimavoq: „Pilluarput anersaakkut pisariaqartitsinerminnik miserratiginninngitsut“