Utaqqisinnaanngissutsimik ajornartorsiut

ARLAANNIK kissaatigisamik utaqqisinnaaneq qularnanngitsumik uagut inuit ilikkaruminaatsinnerpaasatsinnut ilaavoq. Meeraaqqat utaqqisinnaangissuseq pissuseraat. Suut takusatik pissanganalaartunnguit tamaasa piumasarpaat, massakkorluinnaq! Misilittakkatilli naapertorlugit nalunngilat inuunermi sunnguit tamaasa massakkorluinnaq pineqarsinnaanngitsut. Allaat pissusissamisoortunik kissaateqartilluta utaqqisariaqartarpugut. Inuppassuit utaqqinissartik ilikkartarpaat, allalli ilikkanngisaannarpaat.

Ingammik inuit Guutimit iluarisaarusuttut utaqqisinnaanerup ilinniarnissaanut pissutissaqarluarput. Jeremiasip, itsaq Jehovamut kiffaasimasup, tamanna erseqqissarpaa: „Pilluaataasarpoq [Jehovap] annaassinissaa nipangersimalluni utaqqigaanni.“ Kingorna ajoqersugaq kristumiuusoq Jakob ima oqarsimavoq: ’Taamaattumik, qatanngutikka, erinitsannaveeritsi Naalakkap tikiuffissaa nalliutserlugu.’ — Upputit 3:26; Jâko 5:7.

Jehova siunertaminik naammassinniffissaminik piffissamik nammineq aalajangersagaqarpoq. Piffissamut taassuma aalajangersagaanut utaqqisinnaanngikkutta naammagittaalliulissaagut nuannaarunnaarlutalu. Guutip kiffaa nuannaassuseqanngikkuni anersaakkut sanngiillissaaq, soorlumi Nehemiasip nunaqqatini ima oqarfigisimagai: „[Jehovami] nuannaarneq ilissi nakuussutigaarsi.“ — Nehemja 8:10.

Utaqqisinnaanermik ilinniarneq silatusaarneruvoq

Kisimiittut katillutik aappaqalernissaminnik aappariilluunniit meeqqiulernissaminnik kissaateqarnerat pissusissamisoorpoq. Aammalu pigisatigut pisariaqartitanik kissaatinillu naleqquttunik perusutaqarneq kukkusuunngilaq. Kristumiulli ilarpassui aaqqissuussaanerup matuma ulluisa naaqqajaalernerat Guutillu silarsuassaani nutaami Guutip ’assamminik ammaanissaa pinngortitanillu tamanik ajunngitsuutiminik qaarsillartitsinissaa’ upperalugu aalajangersimapput kissaatigisamik ilaat piffissamut naleqqunnerusumut utaqqisinniarlugit. — Tussiaat 145:16.

Inuilli taamatut kristumiutut aalajaatsumik uppissuseqanngitsut kinguartitsinissaq pissutissaqarsorinngilaat. Jehovamut, ’tunissutit tamarmik ajunngitsut tunniussallu tamarmik naammalluartut’ pilerfiannut, uppissuseqannginnamik siunissamut nalornisigisaminnut kinguartitsinissaq silatusaarnerusorinngilaat. Imatullusooq oqarniarput: ’Nerillutalu imeqisa, aqagu toqussagatta.’ — Jâko 1:17; 1 Korintumiut 15:32; Jesaja 22:13.

Nunami siuarsimasuni ussassaarusiorfiit inuit erniinnaq pisaarnissamik kissaataat napassutigisorujussuuaat. Inuit imminnut nukatsinnissaminnik kajumissaarneqartarput. Niuernerup silarsuaata uppilersinniarpaatigut atortorissaarutit inuulluataarutillu muteerniusut inuunermi pisariaqarluinnartuusut. Oqartarput sooq kreditkortit, naafferaalluni  akilersuisinnaaneq aamma massakkut-pisigit-kingorna-akilerumaarpat-mik aaqqissuussat iluaqutigalugit tamakku tamaasa pisinnaallugit atorluarniassanngikkivut. Kiisalu, ’Pitsaanerpaamik pisariaqarputit; imminut ajunngisaarfiginiarit! Eqqaamassavat, massakkut inuulluaatiginianngikkukkit kingorna periarfissaqalinngissaatit!’ Taama pilerisaarisoqartarpoq.

Taamaakkaluartorli inuit millionilippassuit nunani ineriartortinniakkaniittut inuunissaminnut pisariaqartunik naammaqqalaaginnartunik atugaqarlutik inuupput — imaluunniit pissaqarpiaratik. Inuiaat politikkikkut aningaasaqarnikkullu aaqqissuussaanerata equngassusiat naapertuilluanngissusiallu tamatumannga ersarinnerusumik ersersinneqarsinnaanerpa?

Utaqqisinnaassutsimik ilinniarnissap silatusaarnerussusia takuneqarsinnaavoq inuit millionilippassuit taamaaliorusunngitsut — taamaaliornissamulluunniit pissutissaqarsorinngitsut — kissaatitik piaartumik perusungaaramikkik akiitsugaqartorujussuanngorsimaneratigut. Pissutsit siumut naatsorsorneqarsinnaanngitsut, soorlu napparsimalerneq suliffissaarunnerluunniit, ajortorujussuarmik kinguneqarsinnaasarput. Tysklandimi aviisimi Frankfurter Allgemeine Zeitung-imi nassuiarneqarpoq Tysklandimi inuit millionit suna pissutigalugu angerlarsimaffeqanngitsut: „Angerlarsimaffeqannginneq suliffissaaleqinermik annertoorujussuarnilluunniit akiitsoqarnermik pissuteqarajuppoq.“

Taamatut iluatsitsinngitsoortorpassuit akiligassaminnik akiliisinnaajunnaarlutik angerlarsimaffitik pigisatillu tamaasa annaasariaqartarpaat. Tatineqarneq annertusiartuinnartoq ilaqutariit ingerlalluarunnaarnerannik amerlanerpassuartigut kinguneqartarpoq. Aappariinnerit ingerlalluarunnaarsimasut aserortarput. Nikallorujussuartarnerit peqqiilliuutillu allaat ulluinnarni atugaalersarput. Kristumiut tamakkuninnga atugaqartut anersaakkut peqqiilliulersarput, immaqalu kukkusumik eqqarsariaaseqalerlutillu ileqqoqalerlutik. Sianiilliorlutik tamanik perusuttut naggataatigut suutaarulluinnangajattarput.

Inuppassuarnut unamminiarnartoq alla

Jesusip erseqqissaaffigaatigut mianersortariaqartugut ’silap matuma pii isumakuluutiginaveersaarlugit, pisuussutinit salloqittarteqinagatta, pileritsannermullu iseqinagatta, oqaaseq ipitillugu inerititaqarnatalu’. (Mák. 4:19) Eqqaamasariaqarparput Jesusip oqarneratut politikikkut aaqqissuussap suulluunniit isumakuluutit, ilaatigut aningaasatigut isumakuluutit, aaqqissinnaasimanngimmagit.

Kommunistiussuseq, maanna Europap kangiani nunanit atorunnaarsinneqartoq, aningaasaqarneq naalagaaffimmit nakkutigineqartoq ikiortigalugu pissutsinik naligiissaareriaraluarsimavoq. Kiffaanngissuseqarnerusumik aaqqissuussap akerlianik aaqqissuussap qanganisap nunani tamakkunani inuit ataasiakkaat aningaasaqarnikkut isumannaatsumik ingerlanissaannut aqqutsissiuussimavai aningaasaatilissuassutsip amerlanertigut iluatsittanngisaanik. Taamaakkaluartorli isumakuluutit Jesusip eqqartugai atuuttuarsimapput atuisunut nioqqutissaalitsinikkut kiffaanngissutsillu killeqarneratigut.

Kingulliunerusutigut nunat ilarpassuini niuernikkut aaqqissuussat innuttaasunut unamminiarnartumik aamma allamik nassataqartut atulersinneqarsimapput. Qanittukkut ima nalunaartoqarpoq: „Uppertikkuminassuseq nunat killiit atueriaasiannik angusipallakkusussutsimut atavoq.“ Tamanna angujumallugu „Tysklandip kitaani Länder-ini inuit amerliartuinnartut akiligassalerujussuanngoriartorput“. Nalunaarut ima ilaqarpoq: „Aningaasaqarnikkut kiffaanngissuseqalerneq qiimasuutigineqarpilussuareermat annilaanganeq ernumanerlu siaruaapput.“ Isumakuluutaat ataannarput, maannali aningaasaatilissuarpalaartunik atisartaartorsimapput.

Politikkikkut aningaasaqarnikkullu kiffaanngissuseqarnerulerneq aningaasaqarnikkut pitsanngoriaatissanut periarfissiipput. Taamaattumik inuppassuit immaqa namminersorlutik inuussutissarsiuteqalernissaminnut nunamulluunniit allamut suliffissaqarnikkut periarfissarissaarfiunerusumut nuunnissaminnut sakkortuumik ussernartorsiulersimapput.

 Tamakku inuup nammineq aalajangigassarai. Kristumiup aningaasaqarnini pitsanngorsarumaguniuk kukkunngilaq. Immaqa taamaaliorusunnerminut ilaquttaminik isumassuilluarnerunissani siunertaraa, nalunnginnamiuk ’kialuunniit ilani annnerusumillu inoqutini isumaginngikkunigit, taassuma upperneq soraarussimassagaa uppinngitsumit ajornerulluni’. — 1 Timûtiuse 5:8.

Taamaattumik allat aalajangigaannik isornartorsiuinissaq naleqqutinngilaq. Kristumiulli eqqaamasariaqarpaa aningaasaqarnini oqilisaaffiginiarlugu annertoorujussuarmik akiitsugaqarnissaq silatusaarnerunngimmat napitiffiusinnaallunilu. Taamatuttaaq kukkunerussaaq aningaasaqarnerup oqilisaaffiginiarnerani anersaakkut pisussaaffiit soqutigisallu sumiginnassallugit.

Allat ilinniarfigikkit

Sorsunnersuup kingulliup kingorna tyskit tusindilippassuit Europamit sorsunnermi aserorneqarsimaqisumit nunanut allanut, ingammik Australiamut Canadamullu, nutsersimapput. Ilarpassui taamaalillutik aningaasaqarnikkut pitsaanerusunik atugassaqalersimapput, arlaannaalluunniilli Jesusip oqarsimaneratut aningaasaqarnikkut isumakuluutaarulluinnarsimanngilaq. Aningaasaqarnikkut ajornartorsiutit aaqqinneqarnerat ilaannikkut ajornartorsiutinit allanit taarteqartarsimavoq — angerlarserneq, oqaatsitigut ajornartorsiutit, nerisassanik allanik sungiussiniarneq, ileqqut nutaat, nutaanik ikinngutitaarniarneq pissusilersuutinillu sungiusimasamit allaanerusunik sungiussiniarneq.

Nunasiartortut tamakku ilaat Jehovamut nalunaajaasuupput. Qujanartumik taakkua amerlanersaasa nunasinermut atatillugu ajornartorsiutit anersaakkut peqqissutsiminnut aseruutigitissimanngilaat. Ilaalli pisuussutinut pisaritissimapput. Teokratiikkut siumukarnerat aningaasatigut qaffakkiartuaarneranni ipiartuaarsimavoq.

Tamatumuuna takutilluarneqarpoq silatusaarpalunngitsunik aalajangiinnginnermi pissutsinik atukkanik naliliiniaqqaarnissap silatusaarnerussusia. Pigisanik pingaartitsivallaalersoorutta suliaq uteqqinneqartussaanngitsoq, tassa kristumiut ajoqersuganngortitsiortoqqusaanerat, tunullinngortittoorsinnaavarput. Sumiikkaluaruttaluunniit taamaalisoorsinnaavugut, nunaqanngimmammi aningaasatigut isumakuluuteqanngitsunik inulimmik.

Iluartumik sorsugit upperluarlutit

Paulusip Timoteus ima oqaassimavaa: ’Iluarneq Guutimillu mianerinninneq uppernerlu asanninnerlu nikallujuinnerlu qanilaarnerlu noqqaassutigikkit. Iluartumik sorsunniarit  upperluarlutit; inuuneq naassaanngitsoq tiguuk taassumunnga qaaqquneqaravit.’ Kristumiunullu Korinthimiittunut ima oqarsimavoq: ’Aalajangeritsi saqinnaveerlusilu Naalakkallu suliaanik naammassisaqangaartuinnarlusi.’ — 1 Timûtiuse 6:11, 12; 1 Korintumiut 15:58.

Oqaaqqissaarummik tamatuminnga maleruaaneq pigisanik pingaartitsivallaalinngissamut ikiuutissaavoq iluatsitsinarnerpaaq — kristumiullumi suliassaqaqaat! Nunani ikittuinnarnik oqaluussisartulinni inuppassuit sallusuissut suli tusarsimanngilaat. Jesus eqqorluartumik siulittuisimavoq: ’Katersugassat amerlaqaat, sulisussalli ikeqaat.’ — Matîuse 9:37.

Nunani tamakkunani aningaasatigut isumakuluutit anersaakkut suliaminnut akornusiitinnagit Jehovap nalunaajaasuisa pissutsit atorluarniartarpaat periarfissat ammasut tamakkiisumik atorluarnerisigut. Ilarpassuisa suliffissaarukkallaraangamik oqaluussinermut peqataanertik annertusisittarpaat. Kiffartornerat Jehovamik unnersiutiginnissutaavoq annertooq, aammali aningaasatigut ajornartorsiutiminnik nammannissaannut pisariaqartumik nuannaarnermik tunisarpai.

Nalunaajaasut taakku oqaluussisarnertik salliutippaat aningaasatigullu ajornartorsiutitik tunullinngortillugit, nunarsuaq tamakkerlugu qatanngutigiissuartut takutillugu Jehovap imminnik isumassuinissaa tunaarilluinnarlugu. Taannami ima neriorsuisimavoq: ’Guutip naalagaaffia iluarnerlu taassuma pia piniaqqaarsigik, taava tamakku tamaasa ilanngullugit piumaarpasi.’ — Matîuse 6:33.

1919-imili pallorfiginninneq ilumoortoq pilerseqqinneqarmat Jehovap innuttani ilaginnarsimanngilai. Peqqarniitsumik malersorneqarneranni sumiiffiillu ilaanni ukiuni qulikkaani isertortumik sulineranni sernissorsimavai. Jehovap nalunaajaasuisa aalajangiusimalluinnarpaat Diaavulup malersuineq aqqutigalugu iluatsissinnaasimanngisani pigisanik pingaartitsivallaarnermik napititsiniutikkut aamma iluatsissanngikkai!

Sutigut tamatigut utaqqisinnaaneq ilikkaruk

Ataatsimiittarfiit inissaqarluartut, nipilerinermut atortorissaarutit akisuut, ataatsimeersuartarfiit angerlarsimaffiillu nuannerunaqisut Betelit Guutimut nersornaataapput innuttaminillu pilluaqqusineranut nipaatsumik nalunaajaataallutik. Jehovap nalunaajaasui nunani suliatta sivisuumik inerteqqutaaffigisimasaaniittut immaqa misigipput tamakkua eqqarsaatiglugit kinguarsimaqalutik. Pingaarnerpaasorli tassaavoq anersaakkut kinguarsimalinnginnissaq. Guutip pilluaqqusinerata qallikkut ersitsortai piffissaq nalliuppat takkutissaqqaarput.

Jehovap kiffaasa tunniulluinnarsimasut inuttut soqutigisatik eqqarsaatigalugit sianigisariaqarpaat pigisanik aalajangersimasunik peqalernissaminnut utaqqisinnaajunnaartutut misigilinnginnissartik. Aningaasatigut inuttullu atugarisatigut pitsaanerusunik atugaqalernissamik erinigisaqarneq paasinarpoq, Jehovalli innuttaasa arajutsisimanngilaat Guutip kiffai tamarmik pitsaanerusunik atugaqalernissamik erinigisaqartut. Tappiitsup takunnissinnaaqqilernissani erinigaa, ataavartumik napparsimasup peqqisseqqinnissani erinigaa, isumatsassimasup isumamigut oqilinissani erinigaa qimagaasullu asasami toqusup takoqqinnissaa erinigaa.

Pissutsit assigiinngitsut pissutigalugit kristumiut tamarmik arlaatigut ajornartorsiutimik aaqqinneqarnissaannut Jehovap silarsuassaanut nutaamut utaqqisariaqarput. Taamaattumik imminut ima aperisariaqarpugut: ’Nerisassaqarlungalu atisassaqaruma tamakku naammagiinnartariaqannginnerpakka aningaasatigullu pitsaanerusunik atugaqalernissannut utaqqillunga?’ — 1 Timûtiuse 6:8.

Kristumiut Jehovamut tunaarinnilluinnartut qularisariaqanngilaat utaqqiinnarsinnaagunik kissaatitik pisariaqartitatillu pissusissamisoortut erniinnaq piumaarlugit. Kinaluunniit utaqqilussinnarnavianngilaq. Paulusip oqaasii uteqqinniartigik: ’Aalajangeritsi saqinnaveerlusilu Naalakkallu suliaanik naammassisaqangaartuinnarlusi, suliniarnisi Naalakkami asuliinnaanngitsut ilisimagassigik.’ — 1 Korintumiut 15:58.

Taamaattumik utaqqisinnaanermik ilinniarnissaq ajornartorsiuterujussuusariaqarpa? (wD 15/10 93)

[Qupp. 10-mi assiliartaq]

Utaqqisinnaaneq ilinniarukku inuunerit annaassinnaavat