Danielip allagaani ullut siulittuutaasut — uppernerpullu
Danielip allagaani ullut siulittuutaasut — uppernerpullu
„Pilluarpoq aalajaalluni ullunik 1335-inik angumersisoq.“ — DANIEL 12:12.
1. Sooq inuppassuit pilluarneq piviusoq nassaarisinnaanngilaat, pilluarnerlu sumit piva?
KIKKUT tamarmik pilluarusupput. Ullumikkulli ikittuinnaat pilluarlutik inuupput. Sooq? Ilaatigut inuit amerlanerit pilluarneq kukkusumut ujartortarmassuk. Ilinniagaqarnikkut, pisuunngorniarnikkut, qaffakkiartorniarnikkut pissaaneqalerniarnikkulluunniit pilluarneq ujartorneqartarpoq. Jesusilli qaqqami oqaluutsini aallarnersimavaa oqarluni anersaakkut pisariaqartitanik nassuerutiginninnikkut, naakkinnittuunikkut, uummatikkut minguitsuunikkut assigisaannillu pissuseqarnikkut pilluarneq anguneqarsinnaasoq. (Matîuse 5:3-10) Pilluarneq Jesusip eqqartugaa piviusuullunilu ataavartuuvoq.
2. Siulittuut naapertorlugu naggatissami suna pilluarnermik nassataqassava, suullu apeqqutaalerpat?
2 Naggatissap nalaani tanitanut sinneruttunut pilluarneq aamma allamut atassuteqarpoq. Dânialip agdlagai-ni, nutsikkami pisoqqami, ima allassimasoqarpoq: ’Ingerlaannarit, Daniel, oqaatsit mattussaallutik naqissusersimammata naggatissaq nalliutserlugu. Pilluarpoq utaqqisoq angumeralugillu ullut tuusintillit pingasunillu untritillit pingasunillu qulillit tallimallu.’ (Dâniale 12:9, 12) Ullut 1335-t taakku piffissami sumiippat? Aamma sooq taakkuninnga angumersisut pilluarpat? Tamanna ullumikkut uppernitsinnut attuumassuteqarpa? Apeqqutit tamakku akissutissarsiniarlugit piffissaq Danielip oqaatsinik tamakkuninnga allaffiata nalaa misissorsinnaavarput, tassa Israelikkut Babylonimi tigusaaqqanerminnit aniguisitaanerata kinguninngua ukiullu Persiap kunngiata Kyrosip kunngiuffiisa pingajuat. — Daniel 10:1.
Atulerseqqitsineq nuannaarutaavoq
3. Kunngip Kyrosip peqqussutaa suna 537-mi u.n.s. juutinik pillualersitseqaa, Kyrosilli juutit sumik immikkut pisinnaatitaaffilinngilai?
3 Juutit Babylonimit angerlamut uternertik nuannaarutigisimaqaat. Juutit ukiuni 70-ingajanni nunaminnit qimaatitaaqqareersullu Kyrosersuup kajumissaarsimavai Jerusalemimut angerlassasut Jehovallu naalaffia sanaqqillugu. (Esra 1:1, 2) Angerlamut utertut taamaaliorput neriulluaqalutik. Ukiumi 537-mi u.n.s. nunaminnut apuupput. Kyrosilli kajumissaarpai kunngeqarfimmik kunngip Davidip kinguaavanik kunngilimmik atulersitseqqinnginnissaannik.
4, 5. (a) Qanga Kunngeqarfik Davidikkoortoq uppitinneqarpa, sooq uppitinneqarpa? (b) Kunngeqarfiup Davidikkoortup pilerseqqinneqarnissaa Jehovap qanoq neriorsueqqissaarutigaa?
4 Tamanna malugisariaqartuuvoq, tamannami ukiunik 500-t missaanniittunik sioqqullugu Jehovap David ima neriorsorsimavaa: „Kinguaassatit naalagaaffiillu atajuassapput kiinnama saani, issiavissaarsuillu soraajuitsumik aalajaassaaq.“ (2 Samuel 7:16) Ajoraluartumilli Davidip kunngitut kinguaavisa amerlanersaat pikitsitsiniartuupput, inuiaallu toqutsinermut pillaatisiassaat ima annertutigilerpoq Jehovap 607-mi u.n.s. Davidip kinguaavisa kunngeqarfiata uppitinneqarnera akueralugu. Sivikitsumik makkabæerinit naalagaaffigineqarnera eqqaassanngikkaanni Jerusalem taamanimiit ukiumi 70-imi u.n.k. aappassaanik aserorneqarnissami tungaanut allamiunit naalagaaffigineqartuarsimavoq. Taamaalillutik ’Guutimik nalusut ullussaat’, Davidip kinguaavinik kunngeqanngiffiusussat, 537-mi u.n.s. suli qaangiussimanngillat. — Lúkarse 21:24.
5 Jehovalli Davidimut neriorsuunni puiorsimanngilaa. Ukiuni hundredelikkuutaani, Babylonip naalagaaffissuunerata Davidillu kinguaavata naalagaaffimmi Jehovap innuttaanik innuttaqartumi kunngitut naalakkersuilerfissaata akornanniittuni, silarsuarmi piumaartussat annikitsualuttai tamaasa ilanngullugit takorruukkatigut sinnattutigullu arlalitsigut pruffiitiminut Davidimut saqqummersippai. Siulittuutit taakkua, Danielimik allakkat kapitaliini 2-mi, 7-imi, 8-mi aammalu 10-12-imi nassaassaasut, juutinut aalajaatsunut uppernarsaapput Davidip issiavissaarsua ’soraajuitsumik aalajaassasoq’. Aap, saqqummersitsinerup taamaattup juutit 537-mi u.n.s. nunaminnut angerlartut pillualerseqai!
6. Qanoq ililluta nalunngilarput Danielip siulittuutaasa ilaat nalitsinni eqquuttussaasut?
6 Biibilimik nassuiaasartut amerlanersaat oqartarput Danielip siulittuutai annerusutigut Jesus Kristusip inunngornera sioqqullugu eqquussimasut. Nalunanngitsumilli tamanna eqqunngilaq. Ny Verden-nutsigaq naapertorlugu Daniel 12:4-mi inngili Danielimut ima oqarpoq: „Illilli, Daniel, oqaatsit isertukkit allakkallu naqissuserlugit naggatissap nalaa nalliutserlugu. Amerlasuut misissoqqissaarumaarpaat, ilisimassullu annertusissaqaaq.“ Danielimik allakkat naqissutaat aatsaat naggatissap nalaani peerneqassappat — iluamik oqaatigalugu, saqqummersinneqassappata — siulittuutit ilaat soorunami piffissamut tamatumunnga tunngasimassapput. — Takukkit Daniel 2:28; 8:17; 10:14.
7. (a) Guutimik nalusut ullussaat qanga qaangiuppat, apeqqullu suna akineqartariaqarsimava? (b) Kikkut tassaanngillat „inussiaq aalajaallunilu silatooq“?
7 ’Guutimik nalusut ullussaat’ 1914-imi qaangiupput, silarsuullu matuma naggatissaa aallartippoq. Kunngeqarfik Davidikkoortoq atulerseqqinneqarpoq, Jerusalemimi nunamiunngitsoq, kisianni ’qilaap nuiaani’ takussaanngitsumi. (Daniel 7:13, 14) Taamaalinerani ’naasupiluit’, kristumiut ilumuunngitsut, naajortulerput, kristumiullu ilumoortut kikkuunersut suli paasineqanngilaq — ingammik inuit isaannit isigalugu. Apeqqulli pingaartoq manna akineqartariaqarpoq: „Kinami taava inussiaava aalajaallunilu silatooq?“ (Matîuse 13:24-30; 24:45, NV) Davidip naalagaaffianut atulerseqqitamut kikkut nunarsuarmi aallartitaassappat? Danielip timikkut qatanngutai juutit aallartitaassanngillat. Taakku ajattorneqarsimapput uppissuseqannginnamik Messiasilu ilassiumannginnamikku. (Rûmamiut 9:31-33) Inussiaq aalajaatsoq aamma kristumiuunerartut peqatigiiffiini nassaassaaqqajaasimanngilaq! Iliuusiisa ajortut ersersippaat Jesusimit ilisarisimaneqanngitsut. (Matîuse 7:21-23) Taavami „inussiaq aalajaallunilu silatooq“ kinaava?
8. Kikkut naggatissap nalaani ’inussiaq aalajaallunilu silatuujunersut’ paasinarsisimava? Qanoq ililluta tamanna nalunngilarput?
8 Qularutissaanngitsumik tassaapput Jesusip qatanngutai tanitat ikittunnguit 1914-imi Biibilimik atuaqqissaartartutut ilisimaneqartut 1931-miillu Jehovap Nalunaajaasuinik taaguuteqalersimasut ataatsitut isigalugit. (Jesaja 43:10) Taakkua kisimik naalagaaffik atuutilerseqqitaq Davidip kinguaavanik kunngeqartoq oqaluussissutigaat. (Matîuse 24:14) Taakkua kisimik silarsuarmit avissaaqqasimapput Jehovallu aqqanik qutsissisitsillutik. (Juánase 17:6, 14) Taakkununngaannarlu ullussani kingullerni Guutip innuttaanik Biibilimi siulittuutit eqquussimapput. Siulittuutinut taakkununnga ilaatigut ilaapput piffissat siulittuutaasut Danielimik allakkat-ni, kapitalimi 12-imi, eqqartorneqartut, ilaatigut ullut 1335-t pilluarnermik kinguneqartussat.
Ullut 1260-it
9, 10. ’Piffissarititami ataatsimi piffissaritanilu marlunni piffissarititallu affaani’, Daniel 7:25-mi eqqartorneqartuni, pisut suut malunnaataappat, allassimaffinnilu allani suni piffissaq taamaattoq aamma eqqaaneqarpa?
9 Daniel 12:7-imi piffissaq siulittuutaasoq siulleq pillugu ima allassimavoq: „Piffissarititaq ataaseq, piffissarititallu marluk piffissarititallu affaa. Guutip innuttaasa illernartitaasut annikilliortitaanerat soraarpat tamakku tamarmik naammatsissapput.“ * Piffissaq tamanna sarĸúmersitat 11:3-6-imi eqqaaneqarpoq, Guutip nalunaajaasui ’puussiamik atissaqarlutik’ ukiuni pingasuni affarmilu nalunaajaassasut, kingornalu toqutaassallutik. Daniel 7:25-mi allassimavoq: „Qutsinnerussaartoq assortorlugu oqalukkumaarpoq Qutsinnerussaartullu innuttai qunusiarissallugit. Pilersaarusiorumaarpoq nalliussiviit illernartut inatsisillu allanngortinnissaannik, taassumalu assaanut Guutip innuttai illernartut tunniunneqassapput piffissarititaq ataaseq piffissarititallu marluk piffissarititallu affaa qaangiutserlugit.“
10 Siulittuummi pineqartoq tassaavoq naalagaaffissuit pissaanillit tallimaat, Babylonimit naatsorsorlugu. Tassaavoq ’nassuk mikisoq’, piffissamilu taassuma pissaaneqarfigisaani Inuup Ernera „pissaanermik naalannaammillu naalagaassutsimillu“ tunineqassaaq. (Daniel 7:8, 14) Nassuk assersuutaasoq tamanna, tassaasoq Tuluit Nunaat nunasiaallu attavigisaallu, sorsunnersuup siulliup nalaani tassaaleriartuaarsimavoq Amerikamiut tuluillu naalagaaffissuat marloqiusaq, ullumikkut nuimanersaa USA-usoq. Piffissani pingasuni affarmilu, imaluunniit ukiuni pingasuni affarmilu, pissaanilissuup tamatuma Guutip innuttai illernartut qunusiarissavai aammalu piffissat inatsisillu allanngortinniassallugit. Naggataatillugu Guutip innuttai illernartut taassuma assaanut tunniunneqassapput. — Takujuttaaq sarĸúmersitat 13:5, 7.
11, 12. Ullut 1260-it siulittuutaasut aallartinnissaata tungaanut sunik pisoqartarpa?
11 Siulittuutit tamakku tamarmik qanga eqquussorpat? Ukiuni sorsunnersuup siulianiittuni Jesusip qatanngutaasa tanitaasut tamanut mianersoqqussutigaat Guutimik nalusut ullussaat 1914-imi qaangiukkumaartut. Sorsunneq aallartimmat ersarippoq mianersoqqussut tamanna sumiginnarneqarsimasoq. Satanip ’nersut’ pini, nunarsuaq tamakkerlugu politikkikkut aaqqissuussaaneq taamanikkut tuluit naalagaaffissuannit (Det Britiske Imperium) siuttuuffigineqartoq, atorlugu Guutip naalagaaffiata naalakkersuilernissaanut ’piffissaq aalajangersakkallu’ allanngortinniarsarigaluarpai. (sarĸúmersitat 13:1, 2) Iluatsitsinngilarli. Qilammi Guutip naalagaaffia atulersinneqarpoq, inuit angusinnaasaannit ungaseqisumi. — sarĸúmersitat 12:1-3.
12 Sorsunnersuup nalaa Biibilimik atuaqqissaartartunut misilinneqarfiuvoq. 1914-imi januaari aallarnerfigalugu Skabelsens Fotodrama, Danielip siulittuutaanik innersuussisoq, isiginnaartittalerpaat. Ukiumi tamatumani aasakkut sorsunneq nunarsuup affaani avannarlermi aallartippoq. Oktobarimi piffissaq aalajangersagaq qaangiuppoq. Tanitat sinneruttut ilimagaat ukiup naalernerani qinugisaalerumaarlutik. Taama ilimasunnerat erserpoq 1915-imut najoqqutassamissut qinersimammassuk allassimaffik Matîuse 20:22, Jesusip ajoqersukkani aperigai: ’Ermutsip imaa imigassara imersinnaavisiuk?’
13. Biibilimik atuaqqissaartartut ullut 1260-it ingerlaneranni qanoq ilillutik ’puussianik atisaqarlutik’ oqaluussisarpat, piffissallu tamatuma naanerani qanoq pisoqarpa?
13 1914-imi decembarimit oqaluussisartut ikittunnguit ’puussianik atisillutik’ oqaluussisalerput, Jehovap eqqartuussissutai nalunaarutigiitigalugit maniguullutik nikallujuillutik. Napasuliaq Alapernaarsuiffiup præsidentia siulleq, C. T. Russell, 1916-imi toqummat amerlasuut tupaqaat. Sorsukkumanersuaq siaruaakkiartortillugu akerlilersorneqarneq annertusiartuinnarpoq. Ilaat parnaarussaapput. Inuit ataasiakkaat, soorlu Frank Platt Tuluit-Nunaanni aamma Robert Clegg Canadami, oqartussaasuni atorfilinnit naalliutsitsiumatuunit naalliutsitaasarput. 1918-imilu juunip 21-ani J. F. Rutherford, præsidentitut toqqarneqaqqammersoq aamma Napasuliaq Alapernaarsuiffiup Peqatigiiffiani siuttuusut eqqunngitsumik unnerluutigisaallutik sivisuumik parnaarussassanngortinneqarput. Taamaalilluni ’nassuup mikisup’ piffissap siulittuutaasup naggataata tungaani tamanut oqaluussineq toquppaa. — Daniel 7:8.
14. Tanitat sinneruttut atugaat 1919-mi qanoq ilillutik allanngorpat?
14 sarĸúmersitat-ni siulittuutit ersersippaat taava qanoq pisoqassasoq. Sivikitsumik unittooqqareerlutik — tanitat sinneruttut ulluni pingasuni affarmilu toqungasutut aqqusinermi nalareerlutik — uummaqqipput suliniaqqilerlutillu. (sarĸúmersitat 11:11-13) Marsip 26-ani 1919-imi Napasuliaq Alapernaarsuiffiup Peqatigiiffiata præsidentia siuttuilu iperagaapput, kingornalu eqqunngitsumik unnerluutigisaasimanerminnit minguiarluinnarneqarlutik. Iperagaanermik kinguninngua tanitat sinnerisa suliaq aaqqissuuteqqippaat suliniutissat allat siunniusimallugit. Taamaalillutik sarĸúmersitat-ni eqqanaarnartup siulliup eqquunneratut suliaqanngissutsip itinersuanit qaqipput anersaakkut pillertatut putsumit suikkaasumit ingiaqatigineqartutut illutik. Putsukkut aarlerisaarutaavoq upperisarsiornerit ilumuunngitsut piffissamik taartumik atugassaqalernissaat. (sarĸúmersitat 9:1-11) Ukiuni tulliuttuni marlussunni tanitat anersaakkut nerisarput pisussanullu upalungaarsarlutik. 1921-mi atuagaq nutaaq, Guds Harpe, (Guutip kukkilattariaa) nutaanut meeqqanullu Biibilimi ajoqersuutinik tunngaviusunik ilinniutissaq, saqqummersippaat. (sarĸúmersitat 12:6, 14) Tamakkua tamarmik piffissarititami pingaaruteqartumi allami pipput.
Ullut 1290-it
15. Ullut 1290-it qanga aallartinnersut qanoq naatsorsorsinnaavarput? Piffissaq tamanna qanga qaangiuppa?
15 Inngili Danielimut oqarsimavoq: „Ullormit ullut tamaasa pilliutaasartut [„pilliutaajuartut“, NV, ataani ilanngussaq] atorunnaarsitaaffiannit maajunnartullu piuneerutitsisup nappartitaaneranit ullut 1290-it qaangiutissapput.“ (Daniel 12:11) Mosesip inatsisaasa atuunnerisa nalaanni „pilliutaajuartut“ naalaffimmi Jerusalemimiittumi pilliivimmi ikikkarneqartarsimapput. Kristumiut ikikkagassanik pilliineq ajorput, anersaakkulli pilliuteqartuartarput. Tamanna Paulusip tikkuarsimavaa oqarami: ’Taamaattumik soraarata taassumuuna pilliutinik qujaniutinik Guuti aatsivigisigu, tamassa qarlut taassuma aqqanik nassuerutiginnittut anitaannik.’ (Eprîarit 13:15; naleqqiuguk Hosea 14:2.) Pilliutaajuartut tamakku 1918-imi juunimi peerneqarput. Sunamiuna „maajunnartoq“ — nalunaaqqut alla sianigisassaq? Tassa Naalagaaffiit Peqatigiissortaat, sorsunnersuup siulliup naanerani ajugaasunit pilersinneqartoq. * ’Maajunnarpoq’ kristumiuunerartut siuttuisa peqatigiiffik tamanna Guutip naalagaaffianik inangiisimmassuk, oqarlutik tamanna inuiaat eqqissinissamut neriuutissatuarigaat. 1919-imi januaarimi Naalagaaffiit Peqatigiissortaat-a pilersinnissaa siunnersuutigineqarsimavoq. Taamanimit ullut 1290-it (ukiut pingasut qaammatillu arfineq-marluk) siumut naatsorsorutsigik septembari 1922 tikissavarput.
16. Qanoq ililluni erseqqippa tanitat sinneruttut ullut 1290-it naaneranni ’saassussinissaminnut’ piareersimasut?
16 Taava qanoq pisoqarpa? Aap, Biibilimik atuaqqissaartartut nutaanik nukissaqalersimapput, Babylonimit Angisuumit aniguisitaasimallutik, ’saassussinissaminnullu’ piareersimallutik. (sarĸúmersitat 18:4) 1922-mi septembarimi Cedar Pointimi, Ohiomi USA-miittumi, ataatsimeersuarneq aallarnerfigalugu Guutip kristumiuuneraqatigiinnut eqqartuussissutissai qunusuillutik oqaluussissutigilerpaat. (sarĸúmersitat 8:7-12) Pillertat kiggii qasillerput! Pingaarnerusumillu, sarĸúmersitat-ni eqqanaarnartup aappaa aallartippoq. Kristumiut qimussersorpassuit — aallaqqaammut tanitaannaasut kingornali amerlangaartunit ingiaqatigineqalersut — nunarsuaq tamakkerlugu ujameriapput. (sarĸúmersitat 7:9; 9:13-19) Aap, ullut 1290-it qaangiunnerat Guutip innuttaanut nuannaarnermik nassataqarpoq. * Sulili allanik pisussaqarpoq.
Ullut 1335-t
17. Ullut 1335-it qanga aallartillutillu qaangiuppat?
17 Daniel 12:12-imi allassimavoq: „Pilluarpoq aalajaalluni ullunik 1335-nik angumersisoq.“ Nalunanngitsumik ullut taakku 1335-t, imaluunniit ukiut pingasut qaammatillu arfineq-pingasut affarlu, piffissarititaq siulianiittoq qaangiummat aallartipput. 1922-mi septembarimit kisitsigutta 1926-mi (nunarsuup affaani avannarlermi) upeernaaq kingusissoq tikissavarput. Ulluni 1335-ni taakkunani qanoq pisoqarpa?
18. Suup ersersippaa 1922-mi suli allanngortiterinissamut pisariaqartitsisoqartoq?
18 Naak 1922-mi allanngortitsisunik pisoqaraluartoq ilaat pereersunik suli uninngaviginnikkusupput. Studier i Skriften, (Allakkanik Illernartunik atuaqqissaarutit) C. T. Russellimit allanneqarsimasut, atuaqqissaarutitut suli tunngaviupput. Atuagassiaaqqami Millioner af nulevende Mennesker skal aldrig dø-mi (Inuit maannakkut inuusut millionilikkuutaat toqunngisaannassapput) ilaatigut saqqummiunneqarpoq Guutip siunertaanik eqqarsaat, tassa nunarsuarmik paratiisinngortitseqqinnissaa itsarlu aalajaatsunik makititsinissaa, 1925-miit eqquukkiartuaalersumaartoq. Tassa tanitat annikilliorunnaarnissaat ilimanarsisimavoq. Biibilimilli atuaqqissaartartunut ilaasut tamakkeratik nutaarsiassamik nuannersumik allanut oqaluussissutiginninnissaminnut kajumissuseqarput.
19, 20. (a) Ulluni 1335-ni Guutip innuttaanut qanoq allanngornersuaqarpa? (b) Ullut 1335-t qaangiunnerannut pisut suut ilisarnaataappat, Jehovallu innuttai pillugit qanoq ersersitsippat?
19 Ullut 1335-t taakkua ingerlaneranni tamakkua tamarmik allanngorput. Qatanngutit nakussassarumallugit eqimattakkuutaarluni Napasuliaq Alapernaarsuiffik-mik aalajangersimasumik atuaqqissaartarneq aaqqissuunneqarpoq. Oqaluussinissaq pingaartinneqarpoq. 1923-mi maaji aallarnerfigalugu qaammatit tamaasa marlunngornermi siullermi nalunaajaasarnissamut tamarmik qaaqquneqarput, sapaatillu akunnerata qeqqani ilagiit ataatsimiinnerini suliamut tamatumunnga peqataanissamut tamarmik kajumissaarneqartarput. 1923-mi aggustimi Los Angelesimi Californiamiittumi ataatsimeersuarnermi nassuiaatigineqarpoq savanik savaasanillu Jesusip assersuusiaa ukiuni tuusintini naalagaaffiup siorna eqquukkumaartoq. (Matîuse 25:31-40) 1924-mi radioqarfik WBBR, nutaarsiassamik nuannersumik aallakaatitsiffiusussaq, atoqqaartinneqarpoq. The Watch Tower-imi 1. marsi 1925-moortumi (Vagt-Taarnet 1. maaji 1925-moortumi) ilanngutassiaq „Inuiaqatigiit nutaat inunngornerat“-nik qulequtalik sarĸúmersitat, kapitali 12-imik, paasinninnermik nutaamik imaqarpoq. 1914-19-imi pisut paatsiveerunnartut pillugit kristumiut aalajaatsut kiisami paasisaqalerput.
20 Ukioq 1925 qaangiuppoq, sulili naggatissaq nalliutinngilaq! Biibilimik atuaqqissaartartut 1870-imiilli ukioq aalajangersimasoq eqqarsaatigalugu kiffartorsimapput — siullermik 1914, taavalu 1925. Maannali paasivaat Jehovap piumasaatut sivisutigisumik kiffartortariaqarlutik. Watch Tower 1. januaari 1926-moortoq (Vagt-Taarnet 1. februaari 1926-moortoq) ilanngutassiamik allanngortitsisumik „Kia Jehova ataqqiumavaa?“-mik qulequtalimmik, Guutip aqqata pingaaruteqassusianik aatsaat taama erseqqissaateqartumik, imaqarpoq. Maajimilu 1926-mi Londonimi ataatsimeersuarnermi aalajangersaaneqarpoq taaguutilimmik „Silarsuup matuma pissaanilittaanut nalunaajaat“. Tassani isertugaqarnani Guutip naalagaaffianik sallusuissut Satanillu silarsuaanik aseruinissaq nalunaarutigineqarput. Ataatsimeersuarnermi tamatumani saqqummersinneqarpoq atuagaq sakkortuunik oqariartuutilik Verdensbefrielsen, (Aniguisitaaneq) atuakkat ataqatigiit Studier i Skriften-imut (Allakkanik Illernartunik atuaqqissaarutit) kingoraartaasut siullersaat. Guutip innuttai maanna siumut isigilerput, kingumut isigiunnaarlutik. Ullut 1335-t qaangiussimapput.
21. Ulluni 1335-ini taamanikkut Guutip innuttaasa nikallujuinnerat taakkununnga sumik nassataqarpa, piffissarititarlu tamanna pillugu siulittuutip eqquunnera uagutsinnut qanoq pingaaruteqarpa?
21 Ilaat ineriartornermut nutaamut tamatumunnga naapertuussarumanngillat, nikallujuitsulli pilluarnermik angisuumik misigisaqarput. Aammali uagut piffissarititat siulittuutaasut tamakkua eqquussimanerannik kingumut qimerluuisugut pilluarpugut, tassami kristumiut tanitat ikittunnguit piffissarititanik tamakkuninnga aqqusaarisimasut ilumut tassaanerannut inussiaq aalajaallunilu silatooq tatiginninnerput nukittorsarneqarmat. Ukiuni taamanimiilli ingerlasimasuni Jehovap peqatigiissortai amerlisimaqaat, inussiarli aalajaallunilu silatooq suli qitiuvoq siulersuillunilu. Tanitat savallu allat suli pilluarnarnerusunik atugassaqartut ilisimallugu ila nuanneqaaq! Tamanna Danielip siulittuutaanit allanit erserpoq. (wD 1/11 93)
[Quppernerup ataani ilanngussat]
^ imm. 9 Piffissarititat siulittuutaasut tamakku qanoq ililluni naatsorsorneqarsinnaasut atuakkami Den kommende verdensregering — Guds rige-mi, Napasuliaq Alapernaarsuiffiup Peqatigiiffianit naqiterneqartumi, kapitali 8-mi, sammineqarpoq.
^ imm. 15 Takuuk Vagttårnet, 1. oktobari 1985, quppernerit 8-18.
^ imm. 16 Takuuk Vagttårnet, 1. januaari 1991, qupperneq 12, aamma Vågn op! 8. marsi 1976, qupperneq 19.
Nassuiarsinnaaviuk?
□ Qanoq ililluta nalunngilarput Danielimi siulittuutit ilaat nalitsinni eqquuttussaasut?
□ Qanoq ililluta qularinngissinnaavarput tanitat sinneruttut tassaasut „inussiaq aalajaallunilu silatooq“?
□ Ullut 1260-it qanga aallartillutillu qaangiuppat?
□ Tanitat sinneruttut ullut 1290-it ingerleranni qanoq ilillutik nakussatsinneqarpa?
□ Sooq ulluni 1335-ni nikallujuitsut pilluarpat?
[Atuaqqissaarnermi apeqqutit]
[Qupp. 19-mi ungalusaq]
DANIELIMIK ALLAKKANI PIFFISSARITITAT SIULITTUUTAASUT
Ullut 1260-it:
Decembari 1914-imit juuni 1918-imut
Ullut 1290-it:
Januaari 1919-imit septembari 1922-mut
Ullut 1335-t:
Septembari 1922-mit maaji 1926-mut
[Qupp. 16-mi assiliartaq]
1919-imiilli ersarissimavoq „inussiaq aalajaallunilu silatooq“ tassaasimasut tanitat sinneruttut
[Qupp. 18-mi assiliartaq]
Naalagaaffiit Peqatigiissortaat-a qullersaqarfia Genèvemi Schweizimiittumi
[Suminngaanneernera]
Foto: FN