Nuannaarlutik ’oqaatsimik naammassinnittut’

’Qanilaarlusi oqaaseq ilissinnut ikkussimasoq ilassiniarsiuk, tarnissinnik annatsitsisinnaasoq. Oqaaserlu naammassillugu pigitsi tusaaginnarnagulu.’ — JÂKO 1:21, 22.

1. 1996-imut allassimaffik qanoq isigissavarput?

’OQAASEQ NAAMMASSILLUGU PIGITSI.’ Oqaatsit naatsunnguit taakku kimittuumik oqariartuuteqarput. Biibilimi Jâkup agdlagai-neersuupput, 1996-imullu allassimaffittut atorneqarmata Jehovallu nalunaajaasuisa naalagaaffilersaarfianni allagartarineqarmata ukioq naallugu takuneqarsinnaassapput.

2, 3. Sooq pissusissamisoorsimava Jakobip nammineq aterminik taaguutilimmik allassimanera?

² Jakob, Naalakkap Jesusip affarmik qatanngutaa, ukiuni hundredelinni siullerni ilagiinni kristumiuni nuimasumik atorfeqarsimavoq. Jesus toqusunit makititaanermi kingorna Jakobimut namminermut saqqummersimavoq, kingornatigullu apustilinut tamanut. (1 Korintumiut 15:7) Kingorna apustili Peterip tupinnartuliornikkut parnaarussaajunnaarsinneqareerluni kristumiut katersuussimasut ima oqarfigisimavai: ’Jakobimut qatanngutitsinnullu tamanna oqaatigisiuk.’ (apustilit suliait 12:17) Jakob apustiliunngikkaluarluni siulersuisoqatigiit Jerusalemimi ataatsimiinneranni apustilit utoqqaanertallu aalajangermata juutiunngitsut kristumiunngortut kipineqartariaqanngitsut, ataatsimiinnermik siulersuivoq. Anersaap illernartup siulersuineratigut aalajangerneq tamanna Jakobip ataatsimut eqikkarpaa, ilagiinnullu tamanut tusarliunneqarpoq. — apustilit suliait 15:1-29.

³ Jakobip inersimalluartutut tunngaviliussaa tamanna pingaartinneqarluarsimagunarpoq. Taamaakkaluartorli maniguulluni imminut ’Guutip Naalakkallu Jesus Kristusip kiffaatut’ isigiinnarpoq. (Jâko 1:1) Taassuma allagai isumassarsiarititaasut ullumikkut kristumiunut unnersuussuterpassuarnik pitsaasunik kajumissaaterpassuarnillu imaqarput. Allanneqarnerat naammassivoq Romamiut sakkutuuisa Cestius Gallusimit siulersorneqartut Jerusalemimik saassusseqqaarnissaat ukiunik sisamat missaanniittunik sioqqullugu, nutaarsiassaq nuannersoq ’pinngortitani tamani qilaap ataaniittuni’ peqqissaartumik oqaluussissutigineqareersorlu. (Kulorsamiut 1:23) Taamanikkut ullut nalorninartorsiornartuupput, Jehovallu kiffaasa qularinngilluinnarpaat Jehovap juutit aaqqissuussaanerannut eqqartuussutissaa naammassineqaraluttualersoq.

4. Suup takutippaa kristumiut siulliit Guutip oqaasianut tatiginnilluinnartuusimasut?

⁴ Taamanikkut kristumiut taakku Allakkat Hebriiarisuut tamaasa Allakkallu Griikerisuut ilarpassui pigaat. Siusinnerusukkut allanneqarsimasunut innersuussutiginnittarnerpassuisa takutippaat kristumiut Biibilimik allaqataasut Guutip oqaasianut tatiginnilluinnartuusimasut. Ullumikkuttaaq kajumilluta Guutip oqaasii atuaqqissaartariaqarpavut inuunitsinnilu atorlugit. Nikallujuissinnaaqqulluta anersaakkut nukissat sapiissuserlu Allakkani Illernartuni pissarsiarisinnaasavut pisariaqartippavut. — Tussiaat 119:97; 1 Timûtiuse 4:13.

5. Sooq ullumikkut immikkut ittumik unnersuunneqarnissarput pisariaqartipparput, unnersuunneqarnerlu tamanna sumi nassaarisinnaavarput?

⁵ Ullumikkut inuiaat pisussap matuma pilluinnalernerani inuupput: ’Taamaannerani naalliunnartoqangaassavoq silarsuaqaleqqaarneranit mannalu tikillugu naleqanngisaannartumik  kingornaluunniit naleqassanngitsumik.’ (Matîuse 24:21) Guutimit siulersorneqarutta aatsaat annassinnaavugut. Qanoq ililluta siulersorneqartissinnaagatta? Ajoqersuutinut Guutip oqaasiini anersaamit illernartumit isumassarsiarititaasuniittunut uummatitta ammarneratigut. Taamaaliorutta Jehovap itsaq kiffaasut ilumoortutut ’oqaatsimik naammassinnittunngussaagut’. Guutip oqaasii peqqissaartumik misissorlugillu atuartariaqarpavut Jehovallu unnersiutigineqarnissaanut atorlugit. — 2 Timûtiuse 2:15; 3:16, 17.

Nuannaarluni nikallujuinniarneq

6. Sooq misilinneqaraluarluta nuannaaginnarsinnaavugut?

⁶ Jakobip allakkami aallaqqaataata tungaani ’tipaatsunneq’, Guutip anersaavata inerititaasa ilaat normu 2-tut taaneqarsimasoq, eqqaavaa. Ima allappoq: ’Qatanngutikka, tamalaanik misilinneqaraangassi tipaatsuutigiinnarsiuk, nalunnginnassi uppersusersi misilinneqaruni nikallujuinnermut sunniutaassasoq; nikallujuinnerli sulinermik inersimalluinnartumik kinguneqassavoq, inersimalluinnaqqullusi innarlueqqullusilu, sumik inorsarfeqarnasi.’ (Jâko 1:2-4; Galâsiamiut 5:22, 23) Qanoq ililluni misilinneqarnerit ’tipaatsuutigiinnarneqarsinnaagamik’? Jesus qaqqami oqaluutsimini assingusumik ima oqarsimavoq: ’Pilluarpusi uanga pillunga mitaatigippasi qinugalusilu, nalinginnarnillu oqaatiginerluppasi sallullutik. Tipaatsullusi qiimmattaritsi, akissarsiassarsi angeqimmat qilammi.’ (Matîuse 5:11, 12) Tamaviaarluta anguniakkatta, inuunerup naassaanngitsup, tungaanut ingerlanitsinni ilungersornivut Jehovap pilluaqqugai takullugit nalerisimaarnarlunilu nuannertaqaaq. — Juánase 17:3; 2 Timûtiuse 4:7, 8; Eprîarit 11:8-10, 26, 35.

7. (a) Nikallujuinnissatsinnut qanoq ikiorneqarsinnaavugut? (b) Jobitut qanoq pilluaqqusaasinnaavugut?

⁷ Jesus nikallujuissinnaasimavoq ’tipaatsuutissaq imminut saqqangiussaq’ ikiortigalugu. (Eprîarit 12:1, 2) Jesusip sapiilluni maligassiaa  eqqarsaatigiuarutsigu uaguttaaq nikallujuittuaannarsinnaavugut! Soorlu Jakobip allakkami naggataa’tungaanni eqqaagaa assuarnaassutsiminnik attassiuaannartut Jehovap akissarsisingaartarpai. ’Ata, [nikallujuitsut, NV] pilluarneraraavut,’ Jakob allappoq. ’Jobip [nikallujuissusianik, NV] tusarsimavusi, Jehovallu aniguiffigititaa ilisimavarsi, Jehova nallittuillunilu isumassuinertoqimmat.’ (Jâko 5:11) Eqqaamajuk Job assuarnaassutsini pillugu akissarsisinneqartoq, peqqisseqqilluni asasanilu ilagalugit inuuneq pilluarnartoq tamakkiisumik nuannaarutigisinnaaleqqillugu. Uaguttaaq assuarnaassuserput attattuaannarlugulu nikallujuittuaannarutta Guutip silarsuassaani nutaami paratiisi neriorsuutigisaasoq nuannaarutigisinnaassavarput. Taamanikkussamut nuannaarneq nuannaarnermit ullumikkut Jehovamut kiffartornitsinni misigisartakkatsinnit suli annerussaaq.

Ilisimassummik ujartuigit

8. Ilisimassut ilumoortoq atoriaannaasoq qanoq ililluta nanisinnaavarput, qinunerlu tamatumani qanoq pingaaruteqarpa?

⁸ Guutip oqaasiinik misissuigaangatta, tamakkuninngalu inuunitsinni maleruaagaangatta ilisimassummik Guutimeersumik pigisaqalertarpugut, tamannalu Satanip silarsuaani toqujartortumi misilinneqarnitsinni nikallujuinnissatsinnut iluaqutigissavarput. Ilisimassut taama ittoq qanoq ililluta nassaarisinnaavarput? Jakob ima allappoq: ’Ilisimassutsikkut inorsartumik ilaqarussi Guuti tamanik appisaluussinani tunisisaannartoq qinnuigiliuk; taava tunineqarumaarpoq. Upperlunili qinuli nakimanani; nakimasummi assigaa immap malinga anorip aalatitaa qaffiumisaartoq.’ (Jâko 1:5, 6) Ilungersorluta qinusariaqarpugut, qularutiginngilluinnarlugu Jehovap qinnutivut tusassagai akiumaaraalu piffissanngorpat namminerlu periaatsini atorlugu.

9. Ilisimassut Guutimeersoq Jakobip qanoq nassuiarpaa, tamannalu qanoq ililluni ersertarpa?

⁹ Ilisimassut Guutimeersoq Jehovamit tunissutaavoq. Tunissut taama ittoq pillugu Jakob ima allappoq: ’Tunissutit tamarmik ajunngitsut tunniussallu tamarmik naammalluartut pavannga qaamasut Ataataannit allanngorfeqanngitsumit tarranilluunniit taallerneqartanngitsumit pisarput.’ Allakkami ilaani kingusinnerusukkut Jakobip ilisimassummik piviusumik pigisaqalernerup kingunera eqqartorpaa ima oqarami: ’Kina arlarsi ilisimatuullunilu sianisuuguni taassuma ilisimatuutut piuaalluni ileqqorissutsimigut suliani nittarligit. . . . Ilisimassulli pavannga pisoq siullermik minguitsuuvoq, aammattaaq eqqissisitsiniararaaq isumagillunilu oqaatseriarlunilu nallittuingaarlunilu ajunngitsunillu naammassisaqangaarluni  kinaassusersiornanilu pisuusaarnanilu.’ — Jâko 1:17; 3:13-17.

10. Upperisarsiorneq ilumuunngitsoq upperisarsiornermit ilumoortumit qanoq allaanerutigaa?

¹⁰ Upperisarsiornerit ilumuunngitsut iluanni, nunani kristumiuunerarfiusuni imaluunniit naami, ileqquuvoq tussiarneq, qinnutinik utertuakkanik alanngaakkanillu tusarnaarneq immaqalu oqalugiartumik tusarnaarneq. Neriuummik tusagassaqanngilaq, upperisarsiornerimmi amerlanersaat siunissamik qaamasumik neriugisaqanngillat. Aamma Guutip Messias aqqutigalugu naalagaaffianik neriuut nuanningaartoq taaneqanngisaannarpoq imaluunniit paatsoorluinnarneqarsimalluni. Jehova kristumiuunerartut pillugit ima siulittuisimavoq: „Ajortut marluk innuttama suliarisimammatigit: Uanga, puilasuusunga imivimmik imilik, qimappaannga, sialummullu katersuiffissianik imiisiviliorniarput, imiisivinnik ussiitsunik, erngartunik!“ (Jeremia 2:13) Sallusuissutip ernganik pigisaqanngillat, ilisimassut qilammeersoq amigaatigigamikku.

11, 12. (a) Ilisimassutip Guutimeersup sumut killittariaqarpaatigut? (b) Ilisimassutip Guutimeersup sumut mianersoqquaatigut?

¹¹ Jehovap nalunaajaasuisa akornanni pissutsit allaanerulluinnarput! Guutimeersumik nukissaqarluarlutik Guutip naalagaaffia pilersinneqarsimasoq pillugu nutaarsiassaq nuannersoq nunarsuaq tamakkerlugu oqaluussissutigaat. Ilisimassut oqaluutigisaat Guutip oqaasiinik tunngaveqarluinnarpoq. (Naleqqiuguk Ussatit 1:20; Jesaja 40:29-31.) Ilisimasatik paasisatillu ilumoortut atorlugit Guutitta Pinngortitsisittalu siunertai nuanningaartut oqaluussissutigisarpaat. Kissaatigisariaqarparput ilagiinniittut tamarmik Guutip ’peqqusaanik ilisarsisorsuanngussasut tamanik ilisimalerlutik anersaallu piinik sianilerlutik’. (Kulorsamiut 1:9) Taama ittumik tunngaveqarlutik inuusuttut utoqqaallu tamarmik ’oqaatsimik naammassinnittuarnissaminnut’ kajumissuseqartuassapput.

¹² ’Ilisimassutip pavannga pisup’ ajortulianut Guutimit iluarisaajunnaarnermik kinguneqarsinnaasunut mianersoqquaatigut. ’Nalunngilarsimi, qatanngutikka asasakka,’ Jakob allappoq, ’inulli kinaluunniit tusarasuarluni pili oqalukkumaarnertullunilu kamakkumaarnertullunilu, angut kamatsilluni Guutip iluarisaanik iliortarinngimmat.’ Aap, Guutimit unnersuunneqarnermut tusarnaarniapallattarnissarput atuiniapallattarnissarpullu ilungersuutigisariaqarparput. Aamma oqqap ’mikisunnguugaluartup’ atornerluttoornissaa mianersuutigisariaqarparput. Usorsitsaapilunneq, ingutsineq imaluunniit imminut sianisuutippallaarluni oqalunneq innertut ’orpinnik amerlasuunik’ ikuallatsitsisutut issinnaavoq. Taamaattumik sutigut tamatigut ilakkuminassuseq imminullu naalakkersinnaassuseq pissuserilerniartariaqarpavut. — Jâko 1:19, 20; 3:5.

13. Sooq ’oqaatsip uagutsinnut ikkunnissaa’ taama pingaartigaa?

¹³ ’Tamanna pillugu,’ Jakob allappoq, ’mingunnartut suut tamaasa ajorsutsillu amiakkua iperarsigik, qanilaarlusilu oqaaseq ilissinnut ikkussimasoq ilassiniarsiuk, tarnissinnik annatsitsisinnaasoq.’ (Jâko 1:21) Silarsuaq piumatooq manna, usorsitsaapilulluni, pigisalerituulluni namminissarsiorlunilu inooriaaseq ileqqussatigullu ajortunngorsimaneq ilanngullugit, suujunnaangajalerpoq. ’Guutilli peqqusaanik naammassinnittoq naassaanngitsumik atassavoq.’ (1 Juánase 2:15-17) Taamaattumik ’oqaatsip uagutsinnut ikkussimanissaa’ pingaartorujussuuvoq! Ilisimassut Guutip oqaasianeersoq silarsuarmi toqujartortumi ajussutsimit allaanerulluinnarpoq. Ajussutsip tamatuma ilaannaaluunniit peqataaffigiumanngilarput. (1 Pîtruse 2:1, 2) Jehovap aqqutigeqqusaanit naapertuilluartunit avissaanngisaannarnissarput aalajangiusimajuaannassagutsigu sallusuissummut asannittariaqarpugut sakkortuumillu uummatitsigut uppissuseqartariaqarluta. Guutilli oqaasianik tusaannarnissaq naammappa?

’Oqaatsimik naammassinnittunngorit’

14. Qanoq ililluta oqaatsimik ’tusaannarnata naammassinnittunngorsinnaavugut’?

¹⁴ Jâko 1:22-mi allassimavoq: ’Oqaaseq naammassillugu  pigitsi tusaaginnarnagulu, ilissinnut salloqittaqinavusi.’ ’Oqaaseq naammassillugu pigitsi’! Tamanna Jakobip allagaani tamani erseqqissarneqaqattaarpoq. Tusarnaartariaqarpugut, taavalu ’Guutip peqqusineratorluinnaq iliorluta’! (1 Moses 6:22) Ullumikkut inuppassuit isumaqarput ilaannikkuinnaq naalagiartarneq upperisarsiornikkullu iliuuseqartarneq naammattut. Eqqarsartarput namminneq isumartik naapertorlugu ’ajunngitsumik inuugunik’ naammattoq. Jesus Kristusili ima oqarsimavoq: ’Uannik malinnikkumasoq imminik isumakkiissavoq, anniartitaaffinilu ersullugu malissavaanga.’ (Matîuse 16:24, NV) Tassa erseqqilluinnarpoq kristumiuussagaanni ilumoortoq imminut pilliutigeriaannaalluni nikallujuillunilu Guutip piumasaanik iliornikkut Jesusip maligassiaa pinngitsoorani malittariaqartoq. Nalunngilaat imminnut ullumikkut Guutip piumasaa ukiuni hundredelinni siullerni Jesusip toqusunit makissimalluni ima peqqusinerata nalaani Guutip piumasaata assigigaa: „Taamaattumik aallaritsi inunnillu inuiaqatigiinnit tamaneersunik ajoqersuganngortitsigitsi.“ (Matîuse 28:19, NV) Illit tamatumani suleqataavit?

15. (a) Qanoq ililluta pilluarluta ’oqaatsimik naammassinnittunngorsinnaanerput’ ersersillugu Jakob qanoq assersuusiorpa? (b) Ileqqulersuutaannartigut upperisarsiorneq sooq naammanngila?

¹⁵ Guutip oqaasia misissortuaannarutsigu tarrarsuutitut, qanoq inuttut pissuseqartariaqarnitsinnik takutitsisutut, ilersinnaavoq. Jakob ima oqarpoq: ’Inatsisinut naammalluartunut kiffaanngissutsip piinut soraarani itsuartoq tusartaalluni puiutunngitsoq suliassamillu naammassinnittoq taanna qanoq iliornermini pilluarumaarpoq.’ (Jâko 1:23-25) Aap, tassaassaaq ’oqaatsimik naammassinnittoq’ pilluartoq. Pingaartorujussuuvoq kristumiutut inuunitsinni sutigut tamatigut ’naammassinnittuunissarput’. Immitsinnut salloqittanngisaannarta upperisarsiornikkut ileqqulersuutaannarsornissaq naammattoq. Jakobip oqaaqqissaarpaatigut pallorfiginninnerup ilumoortup immikkoortui, allaat kristumiut ilungersuussiniarluartut qaangiinnartoorsinnaasaat, eqqumaffigeqqullugit. Ima allappoq: ’Guutisiorneq Guutip Ataatap minguitsuutitaa assuarinngisaalu tassa imaattoq: iliarsuit uillarnerillu naalliunneranni takusartarlugit, silarsuarmit mingutsinnaveersaarlusi.’ — Jâko 1:27.

16. Suna pissutigalugu Abraham ’Jehovap ikinngutaanik’ taaneqarsimava, uagullu qanoq ililluta taamaattunngorsinnaavugut?

¹⁶ Naammanngilaq oqaannassalluni ’Guuti upperaara,’ allamillu iliuuseqarnani. Tassami Jâko 2:19-imi allassimavoq: ’Illit upperaat Guuti ataasiusoq; iluartumik pivutit: anersaapiluittaaq upperaat uulillutillu.’ Jakobip erseqqissarpaa ’upperneq sulianik ilaqanngitsoq toqungasoq’, Abrahamilu innersuussutigalugu ima oqarluni: ’Suliai uppernerup peqatigai suliaanillu upperneq naammatsitaavoq.’ (Jâko 2:17, 20-22) Abrahamip suliaanut ilaavoq qanigisanik ikiuineq, inoroorsaarnermik ersersitsisarneq, Isakip pilliutiginissaanut piareersarneq Guutillu neriorsuutaanut ’illoqarfimmut tunngavilersukkamut’, Guutip naalagaaffianut Messiasikkoortumut, upperluinnarnermik tamanut oqaluussissutiginninneq. (1 Moses 14:16; 18:1-5; 22:1-18; Eprîarit 11:8-10, 13, 14; 13:2) Taamaattumik tupinnanngilaq Abraham ’Jehovap ikinngutaanik’ taaneqarmat. (Jâko 2:23, NV) Uaguttaaq ’Jehovap ikinngutaatut’ naatsorsuunneqarsinnaavugut naalagaaffianut naapertuilluartumut pilersinneqarsimasumut uppernerput neriugisarpullu suliniarluta tamanut nalunaarutigisarutsigu.

17. (a) Sooq Rahab ’iluarsuseqartitaasimava’, qanorlu pilluaqusaasimava? (b) Kikkut ’oqaatsimik naammassinnittutut’ Biibilimi allaatigineqarpat? (c) Job qanoq pilluaqusaasimava, sooq?

¹⁷ ’Oqaatsimik naammassinnittut’ ’sulianit iluartuutitaasarput uppernerinnarmillu pinnatik’. (Jâko 2:24) Aamma Rahabip ’oqaatsimut’, Jehovap tupinnartuliaanut atatillugu tusarsimasaminut’, uppernini sulianik ilaqartissimavaa. Israelikkut alapernaarsuiartortitaat toqqorsimavai qimaanissaannillu ikiorlugit, taavalu ataatami inoqutai sernissorneqarsinnaaqqullugit katersortissimallugit. Makititaaguni nuannaassaqaaq paasillugu uppernini sulianik ilaqartoq Messiasimut siuaasanngornerminik  kinguneqarsimasoq! (Josva 2:11; 6:25; Matîuse 1:5) Eprîarinut agdlagkat kapitaliisa 11-anni uppernerminnik takutitsillutik ’oqaatsimik naammassinnissimasorpassuit’ allat taagorneqarput, pilluaqqusaangaassappullu. Aammattaaq puiussanngilarput Job, oqimaatsumik misilinneqaleruttorfimmini ima oqarsimasoq: „[Jehovap] aqqa unnersiutigineqarli!“ Soorlu nalunngikkipput taassuma uppernera suliaalu pilluaqqusaangaarneranik kinguneqarput. (Job 1:21; 31:6; 42:10; Jâko 5:11) Uaguttaaq ullumikkut ’oqaatsimik naammassinninnitsinni’ nikallujuittuarnerput Jehovap iluarinninneranik kinguneqassaaq.

18, 19. Qatanngutit sivisuumik naqisimaneqarsimasut qanoq ilillutik ’oqaatsimik naammassinnittunngorsimappat’, suliniarnerallu qanoq kinguneqarsimava?

¹⁸ Qatanngutivut Europap kangianiittut ukiorpassuarni nikallujuittariaqarsimasunut ilaapput. Maanna killilersuutit ilarpassui atorunnaarsinneqareermata avatangiisiminni nutaani ingallutik ’oqaatsimik naammassinnittalersimapput’. Ajoqersuiartortitat pioneerillu nunanit saniliusuneersut ilinniartitsinermut aaqqissuussinermullu ikiuukkiartorlutik nuussimapput. Napasuliaq Alapernaarsuiffiup Peqatigiiffiata Finlandimi nunanilu sanilerisaani immikkoortortaqarfii sanasunik pikkorissunik aallartitsisimapput, nunarsuarlu tamakkerlugu qatanngutigiissuit tukkoqalutik immikkoortortaqarfiliornernut naalagaaffilersaarfiliornernullu aningaasatigut tapersersuisimapput. — Naleqqiuguk Korintumiunut agdlagkat áipait 8:14, 15.

¹⁹ Qatanngutivut sivisuumik naqisimaneqarsimasut taakkua maanna annertoorujussuarmik nalunaajaateqartarput! ’Erloqillutik’ sulipput oqaluussinertik ’iluarisaanngikkallarmat’ iliuserisinnaasimanngisatik matussutissinniarlugillusooq. (1 Timûtiuse 4:10; 2 Timûtiuse 4:2) Assersuutigalugu, siorna apriilimi Albaniami, peqqarneeqisumik naqisimanniffiusimasumi, naqitaaqqat „Sooq taama inuuneq ajornartorsiuteqartigaa?“-mik qulequtallit pigineqartut tamarmik ullut pingasuinnaat ingerlaneranni agguaanneqarput. Tamanna Jesusip toquneranik eqqaaniaanissamut siulequtaalluarpoq — eqqaaniaanermut najuuttut 3491-iupput — Albaniami oqaluussisartunit suliniartunit 538-usunit amerlanerujussuit.

20. Ukiuni kingullerni eqqaaniaanermut najuuttut amerlassusiata suna takutippaa, amerlasuullu qanoq ikiorneqarsinnaappat?

²⁰ Aamma nunat allat ukiuni kingulliunerusuni eqqaaniaanermut najuuttartut 10.000.000-init amerlanerulersimanerannut annertuumik suleqataasimapput. Sumiiffiit ilarpassuini nutaat eqqaaniaanermut najuunnertik uppernermikkut nakussatsissutigalugu ’oqaatsimik naammassinnittunngorsimapput. Nutaat tamakku suli amerlanerusut immikkut pisinnaatitaaffimmut tamatumunnga piukkunnarsarnissaannik kajumissaarsinnaannginnerpavut?

21. Ukiumut allassimaffik naapertorlugu qanoq iliorniartariaqarpugut, sunalu anguniarlugu?

²¹ Ukiuni hundredelinni siullerni kristumiut ilungersuussisut, kingornalu allarpassuit, assigalugit aalajangiusimaniartigu qilammi naalagaaffimmi imaluunniit tamatuma aqutaani nunarsuarmi inuuneq naassaanngitsoq akissarsiassaralugu anguiniakkatta ilungersuutigiuarnissaa. (Filípimiut 3:12-14) Tamatuma anguniarnerani ilungersuutit tamarmik asuliinnarnavianngillat. Tusarnaartuuinnarluni uniinnarnissamut piffissaanngilaq. Ullumikkut aatsaat iluamik nukittunissamut sulinissamullu piffissaavoq. (Haggaj 2:4; Eprîarit 6:11, 12) ’Oqaaseq uagutsinni ikkutereermat’ massakkut naassaanngitsussamullu ’oqaatsimik naammassinnittuujuarniarta pilluartut’. (wE 15/12 95)

Qanoq akissavit?

□ Qanoq ililluta nuannaarluta nikallujuinniarsinnaavugut?

□ ’Ilisimassut pavannga pisoq’ sunaava, qanorlu iliorluta piniarsinnaavarput?

□ Sooq ’tusaaginnarnata oqaatsimik naammassinnittuusariaqarpugut’?

□ Nalunaarutit suut ’oqaatsimik naammassinnittuunissatsinnut’ kajumississutigisariaqarpavut?

[Atuaqqissaarnermi apeqqutit]

[Qupp. 17-mi assiliartaq]

Uaguttaaq uummaterput Guutimit ajoqersorneqarnermut ammarniartigu

[Qupp. 18-mi assiliartaq]

Job assuarnaassutsiminut pilluaqqusaavoq ajorunnaarluinnarsinneqarami asasanilu pilluarluni inooqatigileqqikkamigit